Zogam.com kum 10 chinna kipahpih dia hong pai khawm tengteng na vek un ka seppih admins te siik le taang in vaidawnna Chibai ka hon buk vek uh hi. Amasa pen in kum 10 vingveng honna pi Pathian kiang ah kipahthu i tut masa a, thupi na tengteng Amah i khusak ahi. Kum 10 ka et kiik chiangin lungleen huai bang kasa a, hun paisa a Zogam.com a ka seppih te leh ka thiltuah te lungsim mitkha in hong lang dundun hi. Zogam.com in kum 10 mel a muhtheih na ziak i biak Pathian hatna leh pii na ziak ahi a, tua banah ka seppih admins te felna leh deihsaktu users te nungthuapna ziak ahi pen hi.
Tuni hun in ainah hon phahpih leh ma hon patpih seppih lawm lui te min bangzah hiam ka lou ut hi. Zogam.com server honna setup sak Malaysia a om Pu Sianpu, server man hun sawt kuam honna piak sak Sydney Australia a om Pu Paul Khaipu, tua ban ah website hoihtaka hon etkol pih ka lawm hoih Delhi a om Pu Muan Hangsing te tuni’n ka ngai khol diak hi. Tuni in hun paisa leh tu hun a ka seppih admins tengteng tung a zahna ka pia a, amau te tung ah kipahthu ka gen vek ahi.
Kum 2000 lakvel a pan in Internet technology India leh sehvel ah hong om pan hi. Mualdawn khuak ana neu tuan kei a, March tarik 9, 2003 ni in internet khovel a website ki chian ei Zomi te a dingin ZOGAM.COM patkhiat hong hita hi. Website tampi mahmah mi te’n ana bawl ua, himahleh a tam zaw te sawt daih zou lou in ana puk se zel ua, himahleh Zogam.com bel tatlou in kum 10 vingveng ana pai tou a, I minam sung a website kumlui pen hong suak hi. Zogam.com in khovel kil 4 a om Zomi te ki thuzaktuahna leh ki tanau na deihpen a, tua ziakin a thupi dingin BRIDGING THE ZOMIS chih min ana ki vuah hi. Hiai thupi Bridging The Zomis chih pansan in Zogam.com tungtawn in khovel kil 4 a om Zomi te ki meltheih tuahna hon bawl a, ki tanau na nasatakin hon tun hi.
Zogam.com in lam tuamtuam a i nam dopkang leh siamna nei te dopsang a tup hi gige hi. Tua dingin platform hoihtak in pangtou gige a, i mi nam sung a zong laigelh siam leh talent nei tuamtuam tampi te Zogam.com tungtawn in pholhsuah hong hi uhi. Zogam.com in literature lam a ngaisang a, 2008 kum in I khangthu a masa pen dingin Zogam.com Writers Award, New Lamka ah kisai a, 2010 in Dr. T. Ginkam Writing Competition Award ana kisai hi. Zogam.com in social development lam zong ki ngai poimawh mahmah a, 2011 kum in Churchandpur District Hospital hahsiangna ki nei in, damlouh te gift zong ki pia hi. Tua lou in Lamka a Orphanage home a tam zaw te vehna leh panpihna zong ana ki nei hi.
Zogam.com a kipat tungin computer zong aki nei zou kei a, cyber café mun te a pan mahni pocket money te zang in ana ki update tou ngitnget hi. Tu chiang in users te deihsakna leh Zogam.com Tshirts aki bawl khe te a pan in Zogam.com in mahni server ki neih ta a, ei singtangmi North East sung a mahni server ki neih masa pen zong ki hi hi. Tua banah North East sung a mobile version website pan khe masa pen zong i hi. Member tawm chik a kipan khe pen tu chiang in online member 10000 val pha ta hi.
2003 kum a mawl chik a pat hi mah leh tu chiangin Zogam.com pen I mi nam a ding in website leh portal lian pen hong suak ta a, tu chiang in a neu a lian a dingin kithuzak tuahna hoihtak hong hi a, thuthak hi ta leh, thu vangtaang leh I gam sung a thupoimawh te discussion na mun hoihpen leh mite bildoh pen hong hita hi.
Zogam.com a pha tuam thei di pen in I zang tou zel ding uh. Na panpihna te uh, na feedback te uh leh na support te uh ka poimawh gige uhi. Hun paisa a na hon panpih sa mahbang un mailam a zong pangkhawm in sem khawm tou zel ni uh.
Zogam.com damsawt hen la, phungching tou zel hen aw!!
Ginza Vualzong
Founder,
ZOGAM.COM | Bridiging The Zomis.