ZYA Delhi makaihna nuai in tukum Delhi Khuado 2012 1st December 2012 zinglam dak 10:30 in Old JNU Campus, SDG (CPRP) Football ground ah thupi tak in zat in om hi. Hiai hun ah Delhi sung a Zomi om te hong pai khawm ua, sun nitum in program nuam takin zang uhi.
Hiai hun seh ni in ki khen a, 1st session Pu Soilianmang in hon makaih a, hiai hun a thugenna leh lasak na tuamtuam neih in om hi. Rev Liankholal in hun latna a neih zawh in vaidawnna thugenna Pu K. Ginkhanthang a kipan ngaihkhiat in om a, tua zawh in phamsate phawkna leh sunna Rev Thawng Khan Lian makaih in pastor tuamtuam te'n nei ua, leitung bup a Zomite a ding in thupha ngetna zong nei uh hi.
Pu THANGSUO BAITE, MP
ZYA Secretary pu in report a neih khit in organization tuamtuam ZSF, ZHRF, ZEPADA leh ZYA a pan thugenna hun neih in om hi. ZYA Delhi President Pu Vumsuan Naulak in thu a gen khit in Khuado Tualteek Pu Thangsuo Baite (MP) mipi mai a pulakna nei a, tua zawh in thugenna hun nei ding in chial ngal hi. Pu Thangsuo in a gen na ah Khuado pawi zang dia chial a om kipah thu gen hi. Tua banah mi gam a i om chiang a social adjustment a poimawh dan leh i gam sing le gua te kepbit a poimawh dan te nasatak in gen hi. Khuado vaisaite panpihna dingin Pu Thangsuo in dangka siing 2 pia hi.
First session a bei tawh kiton in mipi te'n Khuado feast an nekkhawmna nei uhi. An nek zawh in 2nd session zat hi pah a, Comperes Kimremmawi leh Cicily Zou te'n 2nd session - Cultural leh music program nuam takin hon makaih uhi. Zomi Inkuan Vikaspuri a kipan in cultural dance - 'Khuado Lapi' leh 'Dak Laam' siam takin hon lak uhi. Tua zawh in Bodela Zomi lia leh taang te'n choreography 'Zogam Nuam' lahna hon nei ua, amau zom in Hastal veng Zotawi lia nu ten 'Aksi Laam' siam takin hon lak nawn uhi. Choreography mah 'Topa Nang Tung Ah' leh 'Tuailai Te' zong Hastal lia le taang ten hon lak zom uhi. Zomi Jabbawockeez Dance Kham Lam leh a lawmten siam tak in hon lak ua, Rubber Band a kipan zong choreophy nalh tak mai hon lak uhi.
Cultural Dance leh Choreography lahna zawh ahih in, lasakna lam hun neih ahi hi. Hiai hun a lasa siam tuamtuam - Hoihniang & Co, Hangkhanlian, Sylvia & Co, David Mate, Muanlal, Mang Tawng, Muanthang, Thamuan & MU, Mary JOnes, Doukhanmang, Thawnmung, Khukhup, Henry, Mungpi, Decendency Band leh Traffic Jam Band te a kipan performance muhnop huai tak neih in om hi. Lasa siam te leh laam lah ten mipi su thathou mahmah ua, mipi te nuamsa leh siamsa awng zuazua uhi.
Huchi in Khuado hun nuamtak zatzawh ahih in Rev GK Samte in hun khakna hon neisak hi.
