Kakching Khunou ah Water Supply Scheme chiapi hiding: CM

Imphal, Sept. 18 *(Nisin Thuhiltu)* : District Administration, Kakching leh Kakching Khunou Municipal Council organised bawlna' tuni'n Kakching Khunou ah Go to Village camp a um hi. Zia hun chu Chief Minister N. Biren Singh in a uap a, ama'n mipi lak ah a thugenna a chun, Kakching Khunou ah Rs. 9.12 crore bei ah water supply scheme chiapi ah um ding a hidan puang in a vaima theilam ah zia scheme chu chiapi hiding in a gen hi. Porject Detailed Project Report (DPR) submit hitaleh sanction order ngak hizing in a gen a, medical emergency ziak ah area mipi'n haksatna a tuak zing sek uh sukven theina ding ah Kakching Khunou ah Primary Health Centre chu 24x7 ah hawn hiding leh doctor 3 kawibe hiding in a gen hi.

Kakching Khunou Municipal Council building sakthakna ding tawh kisai ahileh avaima theipen ah sakthak hiding ah gen in, State Government in Kakching Khunou market shed le siamhawi thak ding hin a gen a, local playground chu Government’s Khelo India scheme nuai ah siamhawi hiding in a puang hi. Bank branch hawn ding ah phutna tawh kisai ahileh a kisaipi thuneitu te kiang ah thil umdan tut ding leh a vaima theilam ah hawn ahitheina ding ah panlakna nei ding in thutiam a bawl hi. Go to Village mission chiapi ah a umna tawh kisai agenna a chun, Government schemes leh services te mipi te a inn chiat ua a tunsak ding dawina ziak ah chiapi ah um a hidan gen in, mission in Census villages total 2660 um lak ah villages/localities 1550 cover ta a hidan gen in a dang te chu March 2019 tiang ah cover hiding in a gen hi. Government employees te hill/interior areas ah a posting theina ding ua Transit Accommodations sak hiding ti'n le a gen a, tu ah state government in society chualchum diak te dawpkangna ding ah panlakna a neizingna chung ah Go to Village mission banah Chief Minister-gi Hakshel-gi Tengbang, Chief Minister-gi Sotharabasinggi Tengbang leh Lairik Tamhansi scheme etc chiapi hin a gen hi.

Kakching Khunou ah tuni, Go to Village camp chu CAF & PD Minister Karam Shyam; Forest and Environment Minister Th. Shyamkumar ; Manipur Legislative Assembly Deputy Speaker . K. Robindro, Sekmai AC MLA H. Dingo, Councillors & Chairperson of Kakching Khunou Municipal Council, Additional Chief Secretary (Forest and Environment/Works) leh State Level Nodal Officer of GTV Dr. Suhel Akhtar, Additional Chief Secretary (Agriculture/CADA) Letkhogin Haokip, Principal Secretary (Commerce & Industry) P. Vaiphei leh Kakching DC Neilenthang Telien te'n le a uap ui. Camp hun sung in Government schemes -CMHT, CMST, Old Age Pension scheme, Ujjwala Yojana leh Housing for All scheme etc beneficiaries te kiang in thil piakdawna a nei ua, Government Departments 31 in stalls a hawng ui.

MU Vice Chancellor Prof. AP Pandey suspend ah um

Imphal, Sept. 18 *(Nisin Thuhiltu)* : Manipur University, Visitor leh India President Ram Nath Kovind in Manipur University vice chancellor Prof Adya Prasad Pandey chu a chung ah ngawna um te khualna (enquiry) zawthian a himasang sia leh enquiry bawlna thil mudaw um te dungzui ah a chung ah action lak a hi masang ah suspend hiphawt in order a sua hi. Deputy secretary Surat Singh of department of higher education, Union ministry of human resource development in 17th September 2018 ah order a suana a chun, Prof. Prof. Adya Prasad Pandey, Vice Chancellor, Manlpur University chung ah ngawna chuamchuam um te ziak ah MUSU, MUTA leh MUSA te'n kiphinna a nei uh tawh kitawn ah state sung ah dan leh thupiak (law and order) dinmun hawilo tak a tunna chung ah President of India in thuthak a um kit masia provisions of Statute 13(1) of the Statutes of the Manipur University Act, 2005 read with Section 16 of the General Clause Act, 1897 ah thuneina kipia mang ah suspend a bawl hin a taklang hi.

RIMS Campus ah biak-inn pani chung ah eviction order kisua dawilo ah chutmun kiphinna nei; ATSUM in humanitarian ground ah eviction order withdraw ding ah phutna nei

Imphal, Sept.18 *(Nisin Thuhiltu)* : Regional Institute of Medical Sciences (RIMS), Campus ah Lamphel Rongmei Baptist Church leh Lamphel Baptist Church te lakdawna ding ah eviction order a sua chu All Tribal Students’ Union Manipur (ATSUM) in humanitarian ground ah a kisaipi thuneitu te'n withdraw a bawl ding un phutna a nei hi. Seiboi Haokip, General Secretary, ATSUM in a genna a chun, tribal apex student body in kum 45 sung lam umta RIMS campus ah biak-inn 2 lakdawna ding ah eviction order sua ah um chu ngaikhawk mama a hidan taklang kawm in, SDO Lamphel in 4th Septemver 2018 ah eviction order a sua chu kum 2009 ah Supreme Court thutanna siam kal a hidan gen in, kum 2009 masang ah public mun ah Pathian biakna inn umsa suksiat pawimaw ahiloleh chawndaw ding pawimaw te cabinet meeting thupukna a umzaw tak leh bep chiapi thei ding ah thutanna a siam hin a gen hi. Eviction order ki mawk sua ziang chu state Government official policies leh procedures in humanity ngaikhawklo a hidan a kilatna a hidan le gen in, huham tak ah Christian community te chung ah thupukna kisiamkhum chu pawmthiam haksa ti'n a gen hi. Chuleh, zia eviction order chung a chu
state Government in panlakna a nei ding, a kisaipi thuneitu te'n a thupukna siam uh a etthak kit ding uh pawimaw in a gen hi. Biak-inn pani te chu northeast states chuamchuam apat Christian community, RIMS ah medical students leh employees te Pathian biakna mun hin a gen hi. A langkhatlam ah tuni'n Tarung Community Hall ah All Manipur Christian Organization (AMCO) leh Civil Based Organization mapuina' SDO, Lamphel Dr. Mayengbam Veto Singh in 4th September 2018 ah RIMS, Campus sung ah um Lamphel Rongmei Baptist Church leh Lamphel Baptist Church te chung ah Eviction order (case no.18 of 2017) a sua dawilo suklatna'n chutmun kiphinna a um hi. AMCO President Rev. S.Prim Vaiphei in thuthak lakhawm mite kiang ah a genna a chun, Lamphel Baptist Church leh Lamphel Rongmei Baptist Church chu 16th March, 1973 ah RIMS ah staff leh a kiang tuam ah gingtu um te'n a la phudaw uh hita a hidan gen in, Lamphel SDO, Imphal West in thakhat thu eviction order a sua ziang chu thil khawk mama a hidan genkawm in, Religious Minorities, Christian Communities te chung ah ziagual nasep thil bawl chu "Secularism" kal hin a gen hi.

Chun, Biak-inn pani chung ah eviction order sua ah a umna tawh kisai ah Manipur Chief Minister N.Biren Singh kiang ah Christian organization pathum - All Manipur Christian Organization (AMCO) President Rev. S.Prim Vaiphei, Manipur Baptist Convention (MBC) General Secretary Rev. Dr. W. Konghar leh Rongmei Christian Advocacy Council (RCAC) Convenor Angan Pamei te suaikaina joint memorandum khat pia a hidan uh a gen hi.

5 Days Mushroom Cultivation Skill Training pan

CCpur, Sept. 18 *(Nisin Thuhiltu)* : 54 Bn Border Security Force (BSF), CI post Torbung Bunglow leh Zillai Kangvai Block in Torbung Community hall ah ni 5 sung Mushroom Cultivation Skill Training organised a bawl ding uh tuni, 18th Sept. 2018 zingkallam dak 10:00 in a kipan hi. Zia hun chu khuallian hina tawh Suneel Kumar Singh, Commandant 54 Bn BSF in a uap a, Skill Training hawnna a nei a, VLK Vaiphei, Dy Commandant, 54 Bn. BSF in training kibawlna ziak leh training thiltup gen latna a nei hi. Training thiltup ahileh sepna neilo khangthak te skill training piak ding, zia skill a neiteu chu mang mimal kihinsua theina ding ah panlakna aneitheina ding uh tupna hin a kigen hi. Training hun sung ah resource person chuamchuam in trainee te ziltilna a nei ding a hiu.
A langkhatlam ah tuni mah in BSF Wives Welfare Association (BWWA), 54 Battalion, BSF, Gangpimual in SK Singh, Commandant, 54 Battalion BSF mapuina' 26th Raising Day amang ua, zia hun a chu Dr. V. Simte, Vice President, BWWA panna officer zi tamtak in hun matna uap in, BSF Martyr zi (wife) te kiang ah Memento leh thi thawnpiak (gift) piakna a nei ui. Memento piak ah um te chu - Chinngaihkim w/o Late Mangkholal (Ex. 54 BN BSF); Moinu w/o Late Khamzagou (Ex. 83 BN BSF); Zenkhanniang w/o Late Kamkhanthang (Ex. 163 BN BSF leh Lamneihoih w/o Late Dousuankhup (Ex. 136 BN BSF) te a hiu.

Lower Kom Keirap leh Joutung Village ah 'GTV' camps bawl

CCpur, Sept. 18 *(Nisin Thuhiltu)* : Churachandpur, September 18: Keirap Aimol Govt. High School Campus, Lower Kom Keirap ah tuni'n Go to Villages ( Khungang Chatse ) camps a um a, zia camp chu Kangvai & 1-Khousabung huapsung ah khua 10 -(Upper KomKeirap, Lower KomKeirap, Louchulbung, TokapKabui, Kha-Aimol, New Canaan, Digaijang, Thenjang, Raengdailong (Sadukhoiroi) and KokadanDaron) te huap ah bawl a hi. Zialo a chun, Pherzawl District, Joutung Village ah Pherzawl & 5-Thanlon huapsung ah khua 4 - Joutung, Bukpi, Dialkhai&Vaipheimuol te cover ah Go to Villages camp bawl a hi. Keirap Aimol Govt. High School Campus ah Go to Villages ( Khungang Chatse ) camps chu JC Ramthanga, Principal Secretary (Cooperation & Commissioner, Departmental Enquiry) leh Nodal officer of 'Go to Villages' mission for Churachandpur & Pherzawl Districts in a uap a, ama'n a thugenna a chun, mipi te'n kituptak ah government scheme te a mutheina ding ua 'Go to Villages' mission chiapi ah um a hidan a hi. Hun matna chu, Shyam Lal Poonia, IAS, DC Churachandpur, Rajgopal Singh, Commandant 32 BN, CRPF, Loktak Project, K T Rajah Pandian, Chief Engineer (Electrical), Loktak Power Station, NHPC Limited, S Khaikhopau Ngaihte, MCS, AC-I, Lalrongbawl Hmar, MCS, SDO Kangvai leh District Level Officer chuamchuam in le a uap ui.
Camp hun sung in, Education, Social Welfare, Medical, PHED, PWD, ADCC, etc te'n telchuam ah um te Sports & School materials (Skipping Rope, Volley Ball & Net), agriculture equipments -knapsack sprayer, garbage bags, etc piakdawna a nei ua, district Election Dept. in spot Special Summary Revision (SSR) a chiapi hi.
Joutung Village ah Go to Villages ( Khungang Chatse ) camps ahileh Autonomous District Council, Churachandpur leh District Administration, Pherzawl District te organised bawlna ‘One Day Poshan Tribal Food Mela’ tawh camp chiapi in a um hi.

Numei te ding ah football tournament "Footgal 2018" kiti hawng

CCpur, Sept. 18 *(Nisin Thuhiltu)* : District Adimistration CCpur leh Lamka Core in "An Opportunity To Shine Clebrating Girls in Sports, Girl Child Education Net the Right to Vote" ti thupi nei in district khangthu a khatveina ding in numei football kihelna Footgal 2018 kiti October 8, 2018 apat Rayburn High Campus, New Lamka ah organised bawl ding ahi. Zia ding chu tawh kisai in, tuni September 18, 2018 zingkallam dak 9:30 in DC Quarter, IB Road ah Footgal 2018 official ah hawndawna a um hi. Shyam Lal Poonia, IAS DC CCpur in official tak ah Footgal 2018 hawndawna a nei hi. Footgal 2018 hawnna hun chu K Kabib Senior SP, CCpur banah Footsal 2018 Committee leh Lamka Core apat official-te'n a uap ua, S Ginmuan MCS, Secretary Footsal 2018 Committee in hun matna mapui in, Footsal 2018 organised bawl ding ah guanggalna a umna ziak genlatna a nei hi. Shyam Lal Poonia, IAS in a thugenna a chun, India Government in numei-te dawpsanna ding ah a thuneinau sukhat zawk sem theina ding ah guanggalna chuamchuam nei a hidan gen in, Beti Beti Bachao Beti Padhao Campaign chiapina kawm ah Footsal sai ah um hin a gen hi. Chun, maban election ding tawh kisai ah a kisaipi department in Special Summary Revision chiapi zing a hidan uh gen in, January 1, 2019 tiang ah vote khia thei ding ah kum ting te'n Special Summary Revision nei hun sung September 1 apat October 31, 2018 sung ah min khumlut thei ding, a kisaipi - BLO, Supervisor, AERO, ERO, ER, DEO office ah registration bawl thei ding ti'n a gen hi. Lamka Core apat S Sangluai in Footsal 2018 umna ding tawh kisai a genna a chun, Student book store & Sationalry Rayburn College, New Lamka ah Rs 100 piak ah Entry Form muthei ding, Entry fee ahileh Rs 2000 banah security deposit Rs 500 hiding, kum bithiak umlo, numei a ut taphawt pan thei hiding, Footsal ah numei football club 24 pang ding, zia lak a chu team 8 te chialthaw ah pang ding, team 16 te ding ah open hiding in a gen hi. Chuleh, Footsal 2018 ah pang ding team-te chu district administration in sport kits Jersey peding, winner team in Rs 30, 000, trophy, medal leh certificate sang ding, runners up in Rs 15, 000, medal leh certificate sang ding leh mimal ah core player, top goalscorer leh best goalkeeper te prize piak hiding a hi.

MLA 60-Singngat in khua chuamchuam ah tube well ding vit

CCpur, Sept. 18 *(Nisin Thuhiltu)* : Ginsuanhua@GS Haupu, Chairman MANIREDA & MLA 60-Singngat in amah bialsung ah tui haksatna diak ah kihia, Tangpijpl, Behiang, Buangmun, Chahnou khua panna khua banghem zat in machine mang in tube well a vi piak hi. Tangpijol khua a tuinek khawlna ding tanky kisiam le zawthian vang hita, tube well ding vina le zawthian phial hita ti'n thudawnna'n a gen a, zia te chu zawthian a hitak leh tui pump mang ah tube well apat tuinek ding Tanky ah luanlutsak hiding ti a hi. Tangpijol khua a tuinek khawlna ding tanky ahileh feet 4 a sang, feet 10X12 ah lian, tube well ahileh feet 180 a thuk ah ki vit a hi.

10th Seikam Memorial Open Football Tournament kipan

CCpur, Sept. 18 *(Nisin Thuhiltu)* : Kholmun Youth Club (KYC) organised bawlna 10th Seikam Memorial Open Football Tournament tuni, September 18, 2018 nitaklam dak 2:00 in Kholmun Playground ah a kipan hi. Paolal Haokip, MDC Henglep in Chief Guest hina tawh Opening Ceremony uap in, H. Paokhothang, DI (HQ), ADC in Functional President hina tawh a uap hi. Chief Guest in Tournament hawnna (kick-off) nei in, kihelna nei ding te inspection bawlna a nei a, opening match pat in a um hi. Chief Guest Paolal in a thugenna a chun, tournament sponsor bawltu German Kuki in lawiupa khat chawisanna leh hiat zingna ding ah kum 10 lam tournament a chiapi takna chung ah pakchat thu gen in, zia tournament apat a chu State leh National level tiang ah kihel thei khangthak banghem zat umta ti'n a gen hi. Chun, kihelmi te ding ah mimal kithunna, tup kichian tak nei pawimaw a hidan gen in, kihel mite zu leh sa, khamthei ah kibuallo ding pawimaw in a gen hi. Donor German in a thugenna a chun, Seikam Memorial Open Football Tournament pen 2007 kum apat district sung ah kihel mite a ding ah patdaw ah um himaleh buaina ziak ah kum khat chawlsak ah um a hidan gen in, (L) Seikam’ insungmite hiatpina tawh tournment chiapi ah um, tukum apat cash prize Rs. 1 Lakh hita ding ti'n a gen hi. Opening Match ah tuni’n Tuibong Area Youth Club (TAYC-A) leh S. Haijang Association Youth (SHAY) te a kihel ua, tournament ah team 47 kihel ding, league system ah kihelna chiatha ding himaleh kum 2017 ah finalist United Khawzim Brothers (UKB) leh KONSAM FC banah State dang apat team 2 te, Quarter Final apat kihelsak hiding, a kigawm ah Team 51 zia Tournament a chu kihel ding uh tina a suak hi. Tuni opening match a chun, TAYC-A in 1-0 in gualzawna chang a, zing nitaklam dak 2:00 leh SCYC in SYC maitua ding, dak 3:15 leh LJFC in Bunglon YC maitua ding a hi.