CMO/Ccpur lui thâkna leh kikhutsanna nei

CCpur, Aug. 21 *(Nisin Thuhiltu)* : R. Rang Peter, Joint Secretary Health and Family Welfare, Government of Manipur in August 16, 2018 ni ah Transfer Order a sua hun ah TH & FW Training Centre, Imphal ah Principal mawpuakna tuk ding ah Dr Kim Simte , Chief Medical Officer (CMO) CCpur guat ah a um tawh kitawn in tuni, August 21, 2018 zingkallam dak 11:00 in CMO Office Chamber ah ama ngainatu leh CMO CCpur nuai ah staff chuamchuam in a thâkna a nei ua, CMO CCpur thak ding tawh kikhutsanna le a nei ui. Zia hun a chun, Dr Kim Simte in CMO CCpur thak ding ah guat ah um Dr J Songoukham Samte kiang in CMO Charge piakdawna a nei a, Dr J Songoukham Samte in CMO chair lua in, Pastor S. Thangchinlun, Local Pastor EBCC Hiangtam Lamka in tilkhona leh pauchap piakna anei hi. Dr Kim Simte ahileh October 21, 2016 ah CMO CCpur ding ah CMO office lua pan a hia, kum 1 leh tha 8 sung CMO CCpur mawpuakna a tuk nung ah tuni ah CMO CCpur, 11-na ding Dr J Songoukham khut ah CMO mawpuakna a piakdaw a hi. Dr J Songoukham Samte ahileh tha 10 sung Senior Specialist CMO Office Imphal East a tuk nung ah CMO CCpur ding ah transfer ah um a hi.

Go to Village camp bawl

CCpur, Aug. 21 *(Nisin Thuhiltu)* : Churachandpur District ah tuni, August 21, 2018 in Lamka TD Block nuai ah um Mission Compound ah Go to Village camp a um hi. Zia hun matna chu Mary Vung, DCM, NHM Churachandpur in amapui a, Shyam Lal Poonia, IAS, DC Churachandpur in Go to Village mission apat mipi’n govt. apat phatchuamna chi chuamchuam muthei a hidan uh genlatna nei in, department chuamchuam in stall hawng in, beneficiary chuamchuam te kiang in phatchuampi thei ding thil chi chuamchuam piakdawna a nei ui. Thil chi chuamchuam piakdawna department te chu, Forest Department, Employment Exchange, Handloom & Textiles, PHED, ZEO (Education), Veterinary, ADCC, Sericulture, CMHT, Medical, Social Welfare, SDO/BDO Lamka TD Block leh Bungmual Indane Gramin Vitrak ti te a hiu a, Education Department in Class I leh Class V kikal student 180 te kiang in a thawn in kengtaw a thawn in a piadawk ui. ADC Churachandpur in beneficiary 15 kiang in Vermi Compose Bag piakna a nei ui. Tuni ah Go to Village camp chu Mission Compound, Gangpimual leh Pearsonmun te cover sak a hi.

Vaiphei Thusim Chawn leh Khan kiti lekhabu hawng

CCpur, Aug. 21 *(Nisin Thuhiltu)* : Vaiphei Peoples' Council (VPC) General Headquarter in Published a bawl VAIPHEI THUSIM CHAWN LEH KHAN kiti lekhabu hawnna tuni, 21 August 2018 zingkal lam dak 08:00 in VPC GHQ Office, Bethel Veng, New Lamka in a um hi. Zia hun a chun, Khatkhotong Baite, President VPC GHQ in lekhabu hawnna a nei a, Rev. P.K. Lianmang in Pathian kiang in a latna a nei hi. Zia lekhabu a chu Vaiphei nam, Pu leh Pa Khang a kipat Chawn leh Khan, Vaiphei Thusim um hi’n a kigen hi. Hawn thak ah um lekhabu chu bukhat ah Rs 150 zel ah VPC Office Bethel Veng ahchawk thei ding hin a kigen hi.

54 Bn BSF in facilitation centre hawng

CCpur, Aug. 21 *(Nisin Thuhiltu)* : Central Armed Police Forces (CAPF) nuai ah Constable (GD) recruitment ah pang nuam, online registration bawlna tawh kisai ah haksatna nei khangthak te kithuapina ding in DIG SHQ Border Security Force (BSF) CI (Ops) Manipur nuai ah 54 Bn Border Security Force (BSF) in Civic Action Program in, 54 Bn BSF, Loktak Project, CI Post Torbung leh CI Post Heirok in facilitation centre a hawng hi. Zia facilitation centre a chu khangthak online registration bawlna lam thil ah haksatna nei te’n panpina muthei ding, 17th August 2018 - 17th September 2018 s ung ah facilitation centre kihawng ding a hi. 54 Bn Border Security Force (BSF) thusuak in a taklatna a chun, khangthak a tam theipen in zia facilitation centre chu phatchuampi gua ding in chialna a bawl a, khangthak a tamtheipen in organization chuamchuam-BSF, Assam Rifles, NIA, SSB, CRPF, ITBP etc ah sepna amuthei ding uh dawina ziak ah facilitation centre kihawng in a gen hi.
Chun, Sh. Suneel Kumar Singh, Commandant 54 Bn BSF in applicants te chu a pawimaw dungzui ah pre-recruitment training piak hiding ti’n a gen hi.

GYO/CCpur in Thangboi Gangte, MCS panlakna pakcha
CCpur, Aug. 21 *(Nisin Thuhiltu)* : Gangte Youth Organisation (GYO), Churachandpur in thusua a bawlna a chun, Thangboi Gangte, MCS, SDO/CCpur in Aug 19 & Aug 20 zan ah melhiatlo pawl khat in SDO, Churachandpur Office mei ah a hal hun ua, ama mimal bitna ding hemil khawp ah Thangboi Gangte, MCS in SDO/Churachandpur Office building kangtum thei ding dinmun ah umlai, hangsan tak ah a phelmit theina chung in, ki-letsakpi leh pakcha mama a hidan a taklang a, a kipiakzawna leh a panlakna chu ngaisang mama hin a taklang hi. Chun, SDO Office hal ah a um chu nasatak in demna a bawl a, zia gual mi dawi kawlawk te thilbawl chu tunung ah kuama’n chiing kittalo ding in hiatsakna leh chialna a bawl hi.
A langkhatlam ah Chiengkonpang Village Authority leh YMA Chiengkon Branch in SDO Churachandpur office hal ah a um chu nasatak ah demna bawl in, Thangboi Gangte, MCS, SDO/BDO Churachandpur leh a kiangnai ah cheng te panlakna ziak ah phelmit ah a um theina chung in, Thangboi Gangte, MCS leh mei phelmitna ding ah panlatu te pakchat thu a puang hi.

Doctor te’n NPCDCS training zo

CCpur, Aug. 21 *(Nisin Thuhiltu)* : Population Based Screening of Common NCD under National Program for Prevention and Control of Cancer, Diabetes, Cardiovascular Disease and Stroke (NPCDCS) kiti, Medical Officer-te a ding ah ni 3 sung, CMO Mini-Conference Hall, CMO Complex ah nei ah um chu tuni, August 21, 2018 in a zo thiang ui. India gamsung ah Ayushman Bharat Scheme nuai ah Health & Wellness Centre patdaw a hi dungzui ah Manipur ah Imphal West District, Chandel District, Thoubal District leh Churachandpur District te ah chiapi hiding ah teldaw a hiu tawh kitawn ah district zosia ah kigawm ah Medical Officer 60te training in a pang ui. Chun, Dr. Th. Nirpendra Singh, MD Radiotherapy, District Hospital, Churachandpur in Centre Coordinator leh Dr. Y. Premchandra Singh, State Nodal Officer (Training) in Course Coordinator hina tawh Training a enzui ua, training hunsung in Specialist Doctor, Senior Medical Officer leh Medical Officer 16 in ziltilna nei in, tuni’n Dr Linthoingambi Potsangbam, MD Radiotherapy, District Hospital Thoubal, Dr. A Meghannath, Gynecologist, District Hospital, Chandel, Dr. Zuii Hauzel, Senior Gynecologist, District Hospital Churachandpur, leh Dr. Matouleibi, Gynecologist, District Hospital Churachandpur ten ziltilna a nei ui. Hiatthei khat chu, Churachandpur District ah Community Health Centre (CHC) khat, Singngat leh Primary Health Sub Centre (PHSC) 5 te chu Health & Wellness Centre ding ah teldaw in a um ua, zia te lak a chun, Henglep PHC nuai ah Charoikhullen, Saikot PHC nuai ah Mission Compound leh Leisang, Sangang PHC nuai ah Koirengtak banah Singngat CHC nuai ah Suangdoh a hi.

CDBA member 10 in Ukhrul zuan

CCpur, Aug. 21 *(Nisin Thuhiltu)* : Bakshi Ground Indoor Stadium, Ukhrul ah 37th Inter District leh 63-veina State Open Badminton Championship ah kihelna um ding a hi. Zia a chu, Churachandpur District Badminton Association (CDBA) apat member 10 pang ding a hiu a, tuni, August 21, 2018 zingkal Ukhrul zuan in a kipan dawk ui. Kihelna ahileh August 22 apat August 25, 2018 sung ah um ding, Inter district kihelna August 22 leh 23, 2018 zingkal ah nei hiding, Individual, State Open Badminton Championship kihelna ahileh August 23 apat August 25, 2018 sung ah um ding a hi.

Pre-Recruitment training pan ding
CCpur, Aug. 21 *(Nisin Thuhiltu)* : Churachandpur ah Army Recruitment Rally umna ding tawh kisai ah Pre-Recruitment Training a ding ah Sixth Sikh Light Infantry (Khuga Battalion) ah min khumlut te ding ah, August 22, 2018 zingkal dak 6:00 leh PT Sports Complex, Khominthang, New Lamka ah training kipan ding a hi. Zia hun leh mun a chu tungkim chiat ding in Sixth Sikh Light Infantry (Khuga Battalion) in hiatsakna a bawl hi.

Essay Writing Competition nei
CCpur, Aug. 21 *(Nisin Thuhiltu)* : Siamsinpawlpi SSPP Joint headquarter Lamka saina tuni August 21, 2018 zingkal dak 6:30 in Rayburn College, Hebron Veng New Lamka ah Essay Writing Competition a um hi. Zia chu khangthak lekha zik lunglut te tilkhona ding leh dawpkangna ding ah a sai uh a hi. Essay Writing Competition hun a chun, SSPP Branch 6 - Vk Tawna College, CCPUR College, Rayburn Degree, Rayburn Higher Secondary, Ebenezer College leh Don Bosco Higher Secondary School apat lekha ziklunglut te hunkhawp a pang ua, “Pau leh Lekha Zik Dan Kepbit Apawimaw’i” ti thupi nei in Essay Writing Competition a nei ui.

Island, Senapati ah Forest Minister in Agar Plantation hawng

Senapati, Aug. 21 *(Nisin Thuhiltu)* : Manipur Forest and Environment Minister Thounaojam Shyamkumar in tuni’n Island, Senapati district ah Thoubal Forest Division organised bawlna nuai in Agar Mass Plantation Program a hawng hi. Minister Shyamkumar in a thugenna a chun, agar plantation in khuami (villagers) te income belap chuam ding leh state environment vengbit chuam ding a hidan gen in, Island area ah 3,300 agar trees phu ah um ding in a gen hi. Khuasung mite chu Agar thingno phu ah um te a pitin masang sia kituptak ah enkawl ding in chialna a bawl a,kum 7-8 sung ah agar thingkung khat apat khuasung mi ten Rs 30,000 – Rs 1lakh per tree tiang income muthei ding uh hin a gen hi. Hiatthei khat chu, Chief Minister N. Biren Singh in Langol Reserved Forest, Luwangshangbam ah June 24, 2018 ah Agar plantation hawnna a la nei a hia, Government of India leh Government of Laos in Manipur Sangai Festival 2017 ah MoU suai a kai dungzui ua Agar plantation chiapi ah um, maintenance fund, treatments tawh kisai Government of Laos in a puakdaw ding a hi. Tuuni ah Agar Mass Plantation Program chu Kereilhouvi Angami, Principal Chief Conservator of Forests & Head of Forest Force (PCCF & HoFF), officials of Thoubal Forest Division leh local mite’n a uap ui.

ZUF Chairman leh Info. Secy mat ah um
Shillong, Aug. 21 *(Nisin Thuhiltu)* : Meghalaya Police in Manipur pansa Zeliangrong United Front (ZUF) top leader 2 aman a, mat ah um leader 2 te chu ZUF chairman Raitu Chawang, 66, leh information secretary Gengchung Pou Namthuiyang, 43 te a hiu. Bus ah Guwahati zuan, Assam’s Silchar - Guwahati via Meghalaya’s West Jaintia Hills ah a chia nau ah West Jaintia Hills district police in amat uh a hi. West Jaintia Hills district superintendent of police Vivek Syiem in a genna a chun, mi 2 te pat mobile phones 4 mudawk a hidan uh gen in, local court ah dinsak ah a um nung ua, police custody um ding ah court in lemsakna nei in a gen hi. Mat ah um te chu Manipur ah Arms Act. nuai ah case 5 ah Wanted a hidan uh le gen in, ZUF leaders 2 te chu Manipur police team in Manipur tut ding uh hin a gen hi.

Principal in-charge hiatpina bei ah Kakching Khunou College a ding fund Rs. 36,32,952/- withdraw kibawl

Imphal, Aug 21 *(Nisin Thuhiltu)* : Government college ah tunaicha upgrade ah um Kakching Khunou college a ding fund Rs. 36,32,952/- chu Sh. Manitombi Devi kiti’n college principal in-charge hiatpina leh phalna panglo ah withdraw bawl in Kakching Khunou College, Student Union, General Secretary in tuni’n Manipur Press Club in a gen hi. Zia ah sum chu Manipur Rural Bank Kakching Branch ah August 18, 2018 ni ah withdraw kibawl in a gen a, Sh. Manitombi Devi chu Physics department ah head of department hin a gen hi. Principal –in-charge ahileh L. . Iboyaima Singh , Joint Director of Universities & Higher Education Manipur hin le a gen a, L. Iboyaima chu Principal in-charge of Kakching Khunou Colllege ding ah Commissioner of Higher & Technical Education H. Deleep Singh in order a sua hin a gen hi. Bank ah sum lakdaw ah a um tawh kitawn ah Kakching Khunoui College, Principal in-charge L. Iboyaima in General Manager , Manipur Rural Bank Keishampat chu zikthaw ah lekha thawt ah Sh. Manitombi Devi kiti mi khat in, Principal , Kakching Khunou College phalna panglo ah Rs. 29,32,952 withdraw bawl leh midang, khat bank account ah Rs. 7 Lakhs transferred hi a hidan hiatsak in a gen hi. Zia gual ah fund diklo tak ah a kilakdawna chung a chu, Kakching Khunou College Students’ Union in a kisaipi government authority te’n Sh. Manitombi Devi chung ah action a laklo ua leh kiphinna pan ding uh hi’n Kakching Khunou College, Student Union, General Secretary in a gen hi. Chun, Manager , Manipur Rural Bank , Kakching branch ah Amarjit in le fake in-charge Principal gual ah zia sum kilakdawna a chu panlakna nei ding ah muanmaw hin a gen hi.

Ima Apunba Lup in Raj Bhawan mai ah kiphinna nei

Imphal, Aug. 21 *(Nisin Thuhiltu)* : United Committee Manipur mapuina nuai ah tuni’n Nongchup Imphal Palem Ima Apunba Lup (NIMPAL) pawl in Kwakeithel apat Raj Bhawan zuan ah rally nei in, Manipur Assembly in Naga framework agreement tawh kisai ah special session a nei ding phutna a nei ui. Raj Bhawan a tun kuan uh 200 meters vel in Police ten a khamtang ua, NIMPAL president, Th. Ibeyaima mapuina palai 6 te chu governor, Najma Heptulla tawh kimu sak in, memorandum piakna a nei ui, NIMPAL secretary general S. Santileima in Article 371 (A) tawh kituak ah Manipur ah Naga community te special status piakchuam ding kiti pawm theilo uh hin a gen hi.

State chuam chuam ah Governor kisâng
New Delhi, Aug. 21 *(Nisin Thuhiltu)* : India President Ram Nath Kovind in state khenkhat ah governor guat thakna a nei a, zia dung zui a chun, Jammu & Kashmir governor thak ding ah Bihar Governor Satya Pal Malik chu transferred leh appoint bawl in a um a, Bihar governor ding ah Lal ji Tandon guat a hi. Haryana Governor ding ah Satyadev Narayan Arya guat in a um a, Uttarakhand Governor ding ah Baby Rani Maurya guat a hi.
Meghalaya Governor, Ganga Prasad chu Sikkim Governor ding ah chawn a hi. Meghalaya Governor ding ahTripura Governor, Tathagata Roy chu transferred leh appoint bawl in a um a, Haryana Governor Kaptan Singh Solanki chu Tripura Governor ding ah transferred leh appoint bawl in a um hi.