Thangtingmual area ah ah DI tuaksia; Mi 9 liam
Lamka, Mar. 20 *(Nisin Thuhiltu)* : Thangtingmual area ah tuni zingkal dak 9:00 tuam ah DI-207 khat a tuaksia, a sung a chuang mi 30 lak ah mi 9 liam in Churachandpur District Hospital tut in aum u’i. Liamna tuakte serious talua umlo maleu alak ua a gimdeu mi 2 surgical ward ah admit in aum ua, a dangte observation room ah etkawl in aum u’i. Gari ah chuangte ahiuleh Thangtingmual area a lokuan ding ahiu a, Kangvai Sub-Division huapsung a um Bijang Gangte, Leisanbung leh B. Khonom khawmi ngen leh Tronglaobi ah um Vikram gari a reserved/hire uh hi'n akigen hi. A chuanna uh gari chu Thangtingmual phak ding kuan lamto ah tai to zolo ah kinung tawl ahia, a brake fail ziak ah lamsaklam khobang baw kha in lamlian lai ah a gari ki vâikhan a hi. Tuaksiat ah liamna tuak te chu Lalboi (24) s/o Tongngam of Leisanbung, Lamhoih (23) d/o Jangkhai of B. Khonom, Rebecca (22) w/o Lalboi of Leisanbung, Lamnei (50) w/o Thangpao of Bijang Gangte, Thangpao (52) h/o Lamnei of Bijang Gangte, Hoikhonem (55) w/o Jammang of B. Khonom, Boishi (40) w/o Jamlal of B. Khonom, Phalneikim (26) w/o Letsanglien of Bijang Gangte leh Nukang (45) w/o Thanglal of B. Khonom ahiu.
Feb sung ah OPD ah damlo ki-etsak mi 9,285 pha
Lamka, Mar. 20 *(Nisin Thuhiltu)* : Churachandpur District Hospital ah ward chuam chuam ah a kigawm in lupna 141 aum a, Medicine Ward ah lupna 31, Pediatrics Ward ah 28, Surgery, Ortho, ENT, Eye, Dental Ward ah 38, Gynae & Obst. Ward ah 25, Postpartum ah 8 leh Casualty Observation ah 11 aum hi. Damlo a tam hun ah lupna changlo tamtak tuanglai ah lupsak in aum ua, February 2018 sung in OPD ah damlo pawsal 4,385 leh numei 4,901, a kigawm ah mi 9,285 a ki-etsak ua, zia hunsung ma ah damlo admit aum pawsal 378 leh numei 517, a kigawm 895 a um hi. February thasung ma in hospital ah damlo etkawl ah umte lak ah pawsal 7 leh numei 3, a kigawm ah mi 10 dam zolo in thina a la tuak u’i. February 2018 sung ah major operation 110 leh minor operation 1249 kibawl a um ua, zia hun sung ma ah nausen piang 203 um in zia lak ah normal ah piang 149 leh ki at thawh ah 44 a piang hi. Blood Bank & Blood Transfusion ah voluntary ah thisan unit 31 leh replacement mi 80 aum ua, thamsa sung ah Blood unit 108 mat ah um in zia te chu - A group ah unit 33, B group ah unit 26, AB group ah unit 13 leh O group ah unit 36 a hi.
February 2018 sung ah OPD chuam chuam ah ki-etsak zat ahileh Medicine ah pawsal 1,179 leh numei 1,131; Pediatrics ah pawsal 639 leh numei 535; Ortho ah pawsal 526 leh numei 515; Surgery ah pawsal 591 leh numei 507; Gynae & Obst ah 568; Dermatology ah pawsal 371 leh numei 383; Eye ah pawsal 205 leh numei 306; Dental ah pawsal 336 leh numei 343; Psychiatrics ah pawsal 74 leh numei 103; Ayush ah pawsal 32 leh numei 89; PPTCT ah 274; VCCTC ah pawsal 151 (+ve 1) leh numei 127 (+ve 3); ART ah pawsal 6 leh numei 4; MOT ah pawsal 603 leh numei 584 a hi zo hi. February tha sung ah ward chuam chuam ah damlo admit a um zat ahileh Medicine ah pawsal 146 leh numei 120; Peadiatrics & Neonatal ah pawsal 126 leh numei 90; Ortho ah pawsal 31 leh numei 19; Surgery ah pawsal 62 leh numei 45; Gynae ah 33; Obst ah 203; ENT ah pawsal 13 leh numei 7 ahi. Chun, Casualty/ Emergency Department ah February 2018 sung in damlo ki-etsak 1,864 um in, zia lak ah mi 196 admit in aum u’i.
Pawngsualna ah kigawl ding ah muanmaw mi 3 mat ah um: SP/CCpur
Lamka, Mar. 20 *(Nisin Thuhiltu)* : Ni tamlo chiata ah Rengkai new cemetery ah numei lungthim lam venglona nei khat thagum ah pawngsual ahina tawh kisai ah Churachandpur SP, Rakesh Balwal in tuni thusua a bawlna a chun, thiltung tawh kisai ah FIR No. 1(3)2018 Women police Station-CCP U/S 363/342/376 (2)(J)(L)/376D/34 IPC ziklut a um ta ahidan a gen a, District Police in pawngsual tute matdaw ahi theina ding ah nasatak ah panla ahidan a gen hi. Police ah complaint kibawl ni, March 18 nitak mama a khan le mun chuam chuam apat a kigawlkha ding ah ginlâ um mi 19 kaikhawm a um a hidan le a gen a, mat a umte hawitak ah thudawtna nei leh examination bawl ahinung ah pawngsual a um numei in a mêl uh a teptena apat in numei pawngsualna ah pangkha hi ding ah muanmaw mi 3 matdaw ah um ahidan a puang hi. SP in, mat ah um tea pat thuchian hiat bena ding ah police in thudawtna nei zing ahidan taklang kawm in, thiltung tawh kisai ah thuchian zaw hil ut ahilo leh evidence pe ut aum leh kuamasap in Officer In-charge, Women Police Station, CCpur a hiloleh Mobile number 8974974580 ah piak thei ding hi’n le a gen hi.
Thil umdan ahileh, March 17 (Kiginni) nitak ah Rengkai New Cemetry ah melhiatlo pawsal 2 in, thagum ah numei kum 19 a upa khat a pawngsual nung ua, zamsan uh ti a hi. Zia thiltung tawh kisai a chun, pawngsual a um numeinu suapipa Kaitonlou Suantak (23) s/o Vialhauthang Suantak of Ngulzen Veng, Tuibong in Police ah March 18, 2018 sunnung dak 1:00 in Police ah report a bawl a, report dungzui ah March 17, 2018 nitak dak 7:45 vel ah pawngsual ah um mi bang chetlo numei chu a inn ua apat dawk, zan sawtnung tiang ah inn a tunlo ziak ah, zan khawvak ah mun chuamchuam ah a hawlna nei maleu muzolo uh ti a hi. Khovak tiang ah le a umna hiatlo ah um, March 18 zingkal ah Renkai Joute Veng ah a mukha um ah hiatsakna a mu’u tawh kitawn ah a val del ua leh Rengkai Thanmual ah panpitu umlo ah beidawng tak ah ama bep a la ding, a um dan a pat muanmawna a nei ziak ah thu chuamchuam dawtna a nei ua leh pawngsual ah um a hidan hiatdaw ah um ti a hi. Pawngsual ah um numei kipuan dan in, March 17 nitak dak 7:45 ah a inn uh a pawtsan zaw, a inn mai uh a tun ah pawsal 2 in thagum ah gari mang ah a puakdaw uh, Rengkai ah um Rengkai New cemetery, Koute Veng Rengkai ah pawsal ni te’n thagum ah tamveitak khawvak machan kisang tua ah a pawngsual un a ki puang a, a pawngsual zaw ua a nutsia uh ti le a hi.
Wildlife Sanctuary dodalna ding ah JAC
Lamka, Mar. 20 *(Nisin Thuhiltu)* : Thanlon Sub Division sung a um Kailam khua leh a kiangtuam ah gam liantak khaw banghem zat huap ah Manipur state sawlkal in Kailam Wildlife sanctuary a bawl dawilona in Wildlife sanctuary in a sukkhak ding khaw chuam chuam, Mualnuam, Suangdoh, Thanlon leh Henglep block a kipat hausate’n a chiata March 18, 2018 a khan Compound Veng, D Phailian a um Hauneilal Inn ah gam – leh – gua humbit ding tupna ziak in Thangkholal Thangsing Chairman hina nuai ah 'JAC Against Kaihlam Wildlife Sanctuary' kiti a la phutdawk u’i. JAC member ding te a hiuleh - Thangkholal Thangsing – Chairman; G. Mangkhenpau - Vice Chairman; Hauneilal – Secretary; Thanglian Haokip - Joint Secretary; T. Kamzachin - Finance-cum-Treasurer; G. Khamkhohau - Information Secretary leh Thuomzalal - Information Secretary te a hiu.
Kinepna-II film hawng ding
Lamka, Mar. 20 *(Nisin Thuhiltu)* : A hung tung ding March 24, 2018 sunnung dak 1:00 leh YPA GHQ hall, Hiangtam Lamka ah Zogam Film Development Association (ZOFIDA) in abawl Kinepna-II hawnna um ding ahi. Zia hun chu V.Hangkhanlian, Minister (Agri, Vety &AH) in Chief Guest hina tawh uap ah film hawnna nei ding ahia, Functional President ah Khaipao Haokip, Chairman, ADC/CCpur leh Guest of Honour ah P.Kamkholal, EM, ADC/CCpur ban in Chief Host ah G.Thangkhosuanmung, MDC & Chief of Hiangtam Lamka pang ding ahi. Hun matna chu Zomi Council, Kuki Inpi Manipur, Thadou Inpi, Hmar Inpui GHQ, Mizo Peoples’ Convention, Manipur; Meitei Society; Gangte Tribe Council; Komrem Union, Manipur GHQ; Mate Tribe Council; Paite Tribe Council; Simte Tribe Council; Tedim Chin Union; Thangkhal Peoples Organization; United Zou Organization; Vaiphei People’s Council, GHQ banah ZYA GHQ, ZSF GHQ, ZMA GHQ, ZAA, ZHRF GHQ, ZOLLS, ZEPADA, Bukpi Film Company, Niso Film Company, Gangte Film Company, ZOCFIDS, Neo Vision, Zuapa Film Company, Khawvaiphei Film Company, Zalen Gam Film Company, Singzabuangpi (SZB), Zo Dreams, Piingpei Pictures leh Zotal Film Company tite Special Invitees ding ah chial in aum u’i.
Music Album hawng ding
Lamka, Mar. 20 *(Nisin Thuhiltu)* : Living Hope Choir (LHC) te’n abawl uh, ‘Lung Hon Len Zion Khopi’ Vol-IV kiti Gopsel Music Album hawnna leh Pathian kiang ah latna chu a hung tung ding March 23, 2018 zingkal lam dak 10:30 leh YPA Hall, Bungmual ah umding ahia, album a hileh Dr. Kimbawi in a hawnna nei ding leh Pastor G.Thangsanglian, Local pastor, EBCC Bungmual in Pathian kiang ah a latna nei ding ahi.
April 13 ah Martyrs’ Trophy kipan di
Lamka, Mar. 20 *(Nisin Thuhiltu)* : Hmar Martyrs’s Trophy Organising Board (HMARTOB) in kumsin ah Hmar Martyrs’ Day matna ding tawh kisai ah open football tournament a sai sek uh chu tukum a ding in a hung tung ding April 13, 2018 ni leh Saikot Ground ah kipan ding ahi. A 15veina ding Manipur State Level Hmar Martyrs’ Trophy Open Football Tournament 2018 ah pang nuam ah lunglutna nei Club/Association-te’n TK Medico Opposite, UBI CCpur Branch; A Tha Bekbek Store, Rengkai; Blessed Pharmacy, Saikot; Parate Enterprise, ICI Centenary Building, Sielmat leh Salem Hardware, Salem Veng, Tedim Road ah entry form lathei ding ahiu a, March 23, 2018 tiang ah entry fee Rs 5,000 leh security deposit Rs 2,000 tawh piaklut ngai ding ahi. Tournament ah khatna late’n kipakman Rs 1 lakh leh 2na late’n Rs 60,000 sâng ding a hiu a, semi final lut team te’n Rs 10,000 chiat sâng ding a hiu. Chun, tournament ah pang ding club/team tin ah manger te’n a hungtung ding April 1, 2018 ni leh Saikat pavilion ah managers’ meeting nei ding ahiu.
MSF in TB dodalna campaign chiapi zing
Lamka, Mar. 20 *(Nisin Thuhiltu)* : Sans Frontieres (MSF)/ Doctors Without Borders, India (DWBI) te’n World TB 2018 zatna dan in ‘Lead to end TB’ thupi zang in zan apan Lamka khawpi leh a kim a khua chuam chuam ah Tuberculosis (TB) natna tawh kisai awareness campaign aneih uh sunzom uh a, tuni’n leng Mata Community hall ah tuni’n nei uhi. Huai hun ah Mata khawsung mipi banah Convention English School, Mata akai student-te kihel uh a, MSF/DWBI team te’n Tuberculosis (TB) natna tawh kisai a theihtuak chuam chuam omte sinsak uhi. MSF team te’n zan in Saikot Community hall ah TB natna tawh kisai in awareness campaign pan uh a, March 21, 2018 in Nghathal Community Hall, March 22, 2018 in Saidan Community hall ah nei ding uh a, March 23, 2018 in Tuibong ah nei ding uhi. March 24, 2018 in Lamka Public Ground ah neinawn ding uh a, huai hun in UKB leh Lenlai Club te’n football friendly match nei ding uhi. Tuberculosis natna veikha te’n HIV veibaih diak uh chih hi a, HIV natna hik in mihing taksa a immune system zongkhalsak a, tua ziak in HIV natna neite’n TB natna tawh veikhawm baihdiak uh hi’n kigen hi.
Tuibong ah um Canara Bank in zannung tiang ah ATM booth hawng
Lamka, Mar. 20 *(Nisin Thuhiltu)* : Tuibong ah um Canara Bank, CCpur Branch in mipi khualna ziak in ATM booth zan dak 9:00 tiang in a hawng sek a, zia bep chu hilo in Pathianni ah le hawng sek un a kigen hi. Zia chu tawh kitawn in Kuki Students Organisation (KSO), CCpur in mipi khualna‘ Canara Bank in ziagual panlakna a nei chu kipakpi in kipakpithu a puang hi. CCpur chu cosmopolitan gual a hi dungzui ah mi tamzaw’n sum lakdawna Bank leh ATM kingakna mang a hina chung ua, ATM in economy ah panmun liantak nei hi’n KSO thusua in a taklang hi. CCpur town ah tu leh tu’n Bank branch chuamchuam kigawm in ATM booth 24 a um a, himaleh ATM booth tamzaw nisa tum kuan ah kikhak tangpi sek, suty ni ah le kihawng ngailo tangpi a hi. Canara Bank panlakna chu lemsakpi thu society chuamchuam in le a taklang kawm in, nationalised leh private bank chuamchuam te’n le entawn in bawlthei leu mipi haksatna dawn zangkhai chuam mama ding in ti a hi.
Manipur in food processing lam thil ah theina nei hawi: Governor Dr. Najma Heptulla
Imphal, Mar. 20 *(Nisin Thuhiltu)* : Main Pandal, Manipur University, Imphal ah Prime Minister, Narendra Modi in 16th March, 2018 ni ah a hawn 105th Indian Science Congress, chu tuni’n Manipur Governor Dr. Najma Heptulla in khuallian hina tawh hun matna uap in, a khakna a nei hi. 105th Indian Science Congress khakna nei hun ah Governor Dr. Najma Heptulla in a thugenna a chun, Manipur in food processing lam thil ah theina (potential) nei hawi mama ah gen in, scientist te chu state mipi te phatchuampi thei ding pan ah theina (potential) um te a hiding gualtak ah phatchuampi theina ding ah panla chiat ding in chialna a bawl hi. Manipur chu bio-diversity lam ah le hausa mama, khawvel ah top 10 hotspot ah pang pha hi'n a gen hi. State sung ah nisin phial ah thil thak thak mudaw ah um, tunung ah le mudawbe hiding ah kinep um a hidan gen in, Manipur chu agriculture lam ah le theina neihawi mama state hi’n a gen hi. Bazaar ah sumkawvel veina mat thei ding, Nachang, Lengthei, kawmla leh tomato etc pian hawina state a hidan le gen in state sung ah piang thei thil te kituptak leh phatchuampi theipen ah mat a hitheina ding ah, Science & Technology pawimaw mama in a gen a, umzia nei tak ah research work chiapi ding pawimaw in a gen hi. Hun tamtak ah research um sek maleh a result phatchuampi theilo ding tamtak um a hidan gen in, India chu scientific research lam ah world’s powerhouses khat hi’n a gen hi.
105th Indian Science Congress khakna nei hun a chun, khangthak scientist te tilkhona ding ah awards piakdawna a um a, Scientist 14 te kiang ah ‘Young Scientist Awards 2017-18’, Scientist 20 te ‘Best Poster Award’, Scientist 5 te ‘Best Science Model’ leh ‘Pride of Indian Exhibition Awards’ piakdaw a hi. Awards chu Certificate leh Memento khat chiat a hi.
Hiatthei khat chu, Manipur University in 105th Indian Science Congress chu “Reaching the unreached through Science and Technology” ti thupi nei ah a zintun a hi. 106th Indian Science Congress ahileh Barkatullah University, Bhopal ah January 2019 leh um ding a hi.
FCRA nuai ah MHA in Mary Kom NGO suizui di
New Delhi, Mar. 20 *(Nisin Thuhiltu)* : Olympic medalist leh Rajya Sabha MP Mary Kom in a la phudaw NGO, Rajiv Gandhi Charitable Trust leh India’s IT industry a ding ah apex body, NASSCOM tite chu foreign funding laws bawsiat ziak ah Home Ministry in suizui ding ahia, ministry in a suizui guat chu a kigawm ah organization 42 ating hi. Union Minister of State for Home Kiren Rijiju in Lok Sabha ah a thugenna a chun, NGO 21 kiang ah dawtna chuam chuam nei ah um zia lak ah Mary Kom Regional Boxing Foundation, Rajiv Gandhi Charitable Trust, Delhi, Asianet New Charitable Trust, Kerala, Amnesty International (India) Foundation tite pang ahi dan a gen hi. Rijiju in Lok Sabha ah dawnhuna a piakna a chun, Shakti Sustainable Energy Foundation, Delhi, NASSCOM, Delhi leh Public Health Foundation of India tite pang ah NGO 21 te ah audit leh inspection nei hita ahidan a taklang hi. A min chuang kha NGO te’n forign funding danwg uh ahina ah Foreign Contribution Regulation Act nuai ah a chung chang uh suizui pawimaw hi’n a gen hi. Mary Kom Regional Boxing Foundation a hileh charitable trust khat ding ah kum 2006 a khan phudaw leh register in a la um a, Manipur leh NE India sung ah innsung haksa apat kipan khangthak te lak ah boxing promote ding tup ah 2012 London Olympics Bronze medalist, Padma Bhushan awardee leh nominated Rajya Sabha MP MC Mary Kom leh a pawsal K Onler te’n a la patdaw uh ahi. Inndung haksa te, a diak ah rural area apat kipan te dawpsangna ding ah a la kipan dawk, Rajiv Gandhi Charitable Trust (RGCT) ahileh kum 2002 ah phudaw ala hia, UP ah tu tiang a hin numei te dawpsangna ding ah social mobilisation programme lianpen ahi.