RWUS leh IGSSS mapuina Women’s Day mang

Lamka, Mar. 8 *(Nisin Thuhiltu)* : Tuni March 8, International Women’s Day- Numeite Ni a hi dungzui in, CCpur district sung ah mun chuamchuam in Numeite Ni mat in a um a, zia dungzui a chun, Rural Women Upliftment Society(RWUS) Training Hall, Sielmat ah RWUS leh Indo Global Social Services Society (IGSSS) intekna nuai in Press for Progress ti thupi mang in International Women’s Day Celebration 2018 mat in a um hi. Zia hun chu zingkal dak 11 in a kipan a, district sung ah mun chuamchuam apat numei huntiang a pang ui. Lalrimawi, Project Officer, IGSSS in mapui in, Hrilrohnem, Chairperson, RWUS in vaidawnna thu a gen a, Deborah Infimate, Co-ordinator, RWUS in Keynote Address genna a nei hi. Chun, Hrilrohnem, Chairperson, RWUS in Resource person-te kiang ah Numei-te Ni thilpiak piakna a nei hi. Hun zat sungin Numei-te Rigist tawh kisai in Resource person Joseph Joute, Freelance Journalist in Women and Society tawh kisai sinsakna pia a, Esther, Project Co-ordinator, Shalom in ‘Women and Health’ ti thupi mang in ziltîlna a nei ban ah, George Munluah, Advocate in ‘Legal Right of Women and Schemes’ ti thupi mang in ziltîlna a pia’i. Melody Zairemmawi, Co-ordinator, RWUS in kipakthu gen in hun a mangzo ui.

Food Poisoning ziak ah mi 8 Singngat PHC tut ah um

Lamka, Mar. 8 *(Nisin Thuhiltu)* : Khuga Battalion in Pesticide (ganhing tha’na gu’) nekkhak ziak a damlo mi 17, Singngat Sub-Division ah um C. Lancha Village te enkawl in Singngat PHC a tut ui. Thu kihiat dan in, a ann lak ua gu’ kihel nekkhak ziak in, sungkhaw leh lua in a um ua, a chanchin uh 27 Section Assam Rifle nuai a um, Khuga Battalion in a hiat phet ua del ngal in, damdawi a nei dandan ua a etkawl zaw ua, Singngat PHC tut uh hi’n a kigen hi. Damlo 17 te lak ah mi 8 te chu Singngat PHC ah admit in a um ua, Bialtu MLA Ginsuanhau, Chairman, MANIREDA leh bialtu MDC, Hausuanthang Zou in a nei ua, bialtu MLA in damlote Rs. 1,000 chiat in a kithuapi a, zia hun achun, Singngat hausa, Haukholian Munluo leh mapuitu chuamchuam te’n le zui in, Dr. Robert Zou, MO incharge, Singngat PHC leh Nurse Biaklun tawh Singngat PHC dinmun tawh kisai genkhawmna nei ui. Food Poisoning ziak a damloumi 8-te chu - Hatlhing (53) w/o Tonghen of K.Thenjawl; Hatneilhing (38) w/o Ngamlal of Thadou Veng, Singngat; Thangkholal (40) w/o Chinkhotin of Thenjawl ; Hatneichong (35) w/o Thangkiam of Zaulen; Nenem (38) w/o Jangkhohao of Thadou Veng, Singngat; Ngamkhothang (38) s/o (late) Pauzalet of Lancha Village; Thethem (18) d/o (late) Pauzalet of Lancha Village leh Seijang (42) h/o Ningzakim of Thenjawl te a hiu a, amau chu Lancha gamsung ah nasem ah gam giak, March 6, 2018 nitak ah Amkam tamlo tawh Anzou leh Bal huankhawm ah anek nung ua, a zing ah a leng ua damlo ah um a hiu.

Mid-Media Campaign nei
Lamka, Mar. 8 *(Nisin Thuhiltu)* : National AIDS Control Organization, Department of AIDS Control, Ministry of Health & Family Welfare nuai ah Manipur State AIDS Control Society thupiak dungzui in tuni, March 8, 2018 in District sung mun thum ah AIDS tawh kisai Mid-Media Campaign (Shumang Leela) nei in a um hi. Mid-Media Campaign ahileh Manipur Youth Cultural Organization, Imphal tawh kizawp ah nei ahia, tuni’n Lanva, Thingkangphai leh Mata ah LRRC etkawlna nuai ah nei in a um a, nitaklam in Mandop Leikai, Zouveng leh Khumujamba Meitei Leikai ale nei ahia, zing March 9, 2018 in LWS etkawlna nuai ah Saidan, Rengkai leh Mualvaiphei ah nei hiding ahi. March 12, 2018 ah Khominthang, Gouchinkhup Veng, Saikot leh Thenmol ah SHALOM mapuina nuai ah mat hikit intin, Mid-Media Campaign ahileh District sung ah hawitak ah mat ahia, himaleh a entute lak ah Meitei pau helo a tam ziak un, a phatchuam ding gual tak in a phachuam diam ti ngaitua kham tak ahi.

Myanmar gamgi ah Intl. Women’s Day mang
Lamka, Mar. 8 *(Nisin Thuhiltu)* : Khuga Battalion, Indian Army, Myanmar tawh gamgi ah um te’n, tuni March 8, 2018 International Women’s Day ahi dungzui in, Zoukhunou khua ah puankhuina khawl 4 piakdawna a nei ui. Khuga Battalion in, International Women’s Day ahi dungzui ah thingtang ah cheng, numeite khawsakna dawpkang ding tupna ziak ah Self Observed and Initiated Little (SOIL) Project nuai ah puankhuina khawl a piak ban un, Job Awareness, Aadhaar leh PAN Card chungchang ziltîlna ban ah damtheina etkawlna ding ah nek-le-dawn a pilvan ding dan ziltîlto zel ding uh ahidan mipite kiang in a hiatsak ui.

BOSEM nuai ah pawl X exam chiatha zing
Lamka, Mar. 8 *(Nisin Thuhiltu)* : Board of Secondary Education, Manipur(BOSEM) nuai ah High School Leaving Certificate(HSLC) Examination 2018 a chiata February 20 apat Manipur pumpi ah exam chiato zel in, tuni’n Social Science subject a exam ui. CCpur district ah exam centre 3- Ebenezer Academy ahileh main exam centre ahia, sub centre ahileh Don bosco Higher Secondary School leh Children Training Higher Secondary School ahi. A hung tung ding March 13 ah Mathematics leh March 17, 2018 ah Optional Subject nei in exam zo thiang ding ahiu. Zingkal dak 9:00 apat sun dak 12:00 sung exam sek ahiu a, tuni’n centre 3 kigawm ah candidate 3080 lak ah, candidate 3057 in exam bawl in, candidate 23 a absent ui.

Entrustment Ceremony leh Deworming Camp nei

Lamka, Mar. 8 *(Nisin Thuhiltu)* : Thiamzilna dawpsang ding tupna in tuni, March 8, 2018 in 2nd Battalion Assam Rifle, Singngat in Hill Model High School, Singngat ah student-te Entrustment Ceremony leh Deworming Camp a neipi ui. Zia hun chu, Bialtu MLA, Ginsuanhau, Chairman, MANIREDA in Chief Guest hina tawh uap in, Hausuanthang, MDC Singngat leh Suanchinpau, MDC Lungthul te’n Guests of Honor hina tawh a uap ui. Singngat a um school chuamchuam ah student ban ah nu-le-pa tamtak inle uap in, Hill Model High School ah kai student-te tîlkhona di’n lekhabu chuamchuam a thawn in a piak ban un, gualbanlo leh thiamzilna ah chungchuang mi bangzat hem kiang ah kithuapina ding ah sum a piau hi. St. Mary’s High School in a mat ding ua Computer Set khat leh printer pia in, khawsung ah Assam Rifle in Waiting Shed a bawl uh zawthian ahi dungzui in khawsung thuneitute khut ah piakdawna le a nei ui. Zia hun a chun, Cultural Program le um in, Hill Model High School leh St. Mary’s High School student te’n Cultural Dance thaw in, 27 Sector Assam Rifle te’n le Khukhri Dance a thaw ui. Student-te kiang ah Hûtlo(Deworming Tablet) piak ahiu a, Assam Rifle te’n Weapon Display bawl in, mi tamtak in a kipakpi mama ui. Indian Army ah luttheina ding tawh kisai Recruitment Counseling le a nei ui.

Dist level ah International Womens Day kimang

Lamka, Mar. 8 *(Nisin Thuhiltu)* : Action for Women and Child Advancement (AWCA), Ccpur District Administration leh CCpur Police saina Lamka Football ground, Hiangtam Lamka ah tuni 8th March 2018 in International Womens Day 2018 mat in a um hi. Zia hun matna chu Niangngaihmang, Deputy Director CCI in amapui a, Chief Guest in Neerja Rashmi W/o RR Rashmi IAS a pang a, Special Guest in Rubina Akhtar w/o Suhel Akhtar IAS; Kaisa Puni w/o Puni Mao IFS; Rita w/o T Pamei IAS; Khumi Lakher w/o Lungmuana Lakher IAS retired banah, Luna Arora w/o Ajay Arora leh Shippra Singh w/o Shambu Singh, Addl Chief Secretary te a pang ua, Mami Sinate in laa a sak ban ah, HYA leh Tuibong Christian Church in cultural troupe suklatna a nei ui. International Womens Day mat sung a chun, Churachandpur district sung ah numeite lak chawisanna chang thei ding ah teldaw ah um, numei 6 te Achievers Award piak in a um ua, Pinkathon marathon ah a taihat pen mi 15 te kiang ah Certificate piak in le a um hi. Achievers Award piak ah um te a hiuleh, S Lalsangzuali, Niangngaihkim, Dr Chingnunsiam, Rev Dr Ruth Niangpi Singson, Niangngaihnem leh SI Chinneilam Gangte te a hiu a, khuallian in Certificate leh thilpiak piakna a nei hi. Marathon a tai hatpen 15 tiang prize piak ah um te ahiuleh -Lalita Prajapat, Purnima Thakur, Lilamanti Baghele, Ghule Shakunta Ramdas, Manju Rautela, Sujata Sandhukhan, Chanchala kumara, Harpreet Kaur, Florence Vahboihthem, Vungthanching, S Chingngaihlun, Rebecca Haokip, Taichin Gangte, K Jenny Gangte leh Felly Gangte te a hiu a, Certificate khat chiat piak a hiu. Chun, International thiamzilna ngaikhawk ziak ah school phudawk - Hatboi Buansing, Bethany Christian College; Mary Grace Niangnuam, Grace Academy; R. Tusing, Young Learners School; Vanlalruati & Mangzavung Thomte, The Dawn School, Rita Vanlalchhanhimi, The Pathway School; Laltluongmawi, Vision Academy leh Deborah Haokip,Legacy Faith Academy te Women’s Day Award piak in a um ui.

DLCC-cum-Review meeting um ding
Lamka, Mar. 8 *(Nisin Thuhiltu)* : Shyam Lal Poonia, IAS, DC/CCpur mapuina’ DC office, Conference Hall ah March 9, 2018 sun dak 12 leh District Level Coordination Committee (DLCC)-cum-Review meeting um ding a hi. Zia hun chuleh Mentoring of Govt Schools; Ccpur District ah Govt Dept/Office-te’n project/scheme a chiapidan uh; District sung ah Govt Dept/Office gam leh lei thu, staff attendance panna thu pawimaw chuamchuam genkhawm ding ahiu. DLCC-cum-Review meeting ah a kisaipi District Level Officer-te pangkim chiat ding in DC/Ccpur in hiatsakna a bawl hi.

CDSA in Consultative meeting ko
Lamka, Mar. 8 *(Nisin Thuhiltu)* : Churachandpur District Sports Association (CDSA) ah Honorary Secretary SN John in thusua a bawlna a chun, CDSA in March 7, 2018 ni ah meeting resolution dungzui ah, March 9, 2018 ah Consultative meeting pawimaw tak um ding a hi. Zia Consultative meeting chu KKL complex, IB Road CCpur ah sunma dak 11:00 ah kipan ding a hidan taklang kawm in, CDSA nuai a kikhum lut Club a lianpen a pat a neupen tiang banah, CCpur district sung ah student Organisation zoasia pang chiat ding in chialna a bawl hi. Agenda ding ahileh Lamka Football ground dinmun tawh kisai hiding in a taklang hi.

e-FMS ah Job Card holder te nikhawtha piak ding thakawl
Lamka, Mar. 8 *(Nisin Thuhiltu)* : MGNREGS 2017-18 tawh kisai ah 4th Phase nuai ah Job Card holder-te nasepna nikhotha Hills District - Tadubi, Tengnoupal, Ukhrul, Tamenglong leh CCpur District ah Block 1 chiat ah Electronic Fund Management System (e-FMS) ah mimal bank account chiat ah sum piak/deposit ding ti himaleh Job Card holder tamtak in mimal ah bank account a neilo ziak ua Ministry of Rural Development, Govt of India in e-FMS ah sum piakding chu thakawl (exempt) thak hin a kigen hi.

Zia dungzui a chu CCpur District ah Lamka Block a pat Job Card holder 16000 vel te’n 4th phase nuai ah ni 4 sung Job Card nasepna thaman ding te State govt. account ah Central govt. in deposit bawlzota, state govt. lam in zia a pat chu District Account ah sum deposit ta ti a hi. Project Officer (MGNREGS) in District Account a pat SDO/BDO account ah sum deposit kit ah, zia a pat chu Job Card holder-te nasepna nikhotha Bank account lo ah piak thei ding hin a kigen hi. A langkhatlam ah Lamka Block ah Job Card holder mi 16000 vel um lak ah mi 11,000 vel te’n amau min ah bank account neita uh hin a kigen a, CCpur District sung ah Block 12 a pat Job Card holder-te lak ahPMAY-G scheme (nidang a IAY kiti) beneficiary-te a ding ah 5th Phase Convergence MGNREGS 2017-2018 nuai ah ni 5 nasepna ding sum Feb. 27, 2018 ah sanction hita a hi. 5th Phase muthei ding te ahihleh Job Card holder ahiding banah PMAY-G beneficiery-te bep hiding ahiu a, Job Card holder zosia hilo ding a hi.

Lenlai Red in Ccpur Womens Football Tournament champion hina la

Lamka, Mar. 8 *(Nisin Thuhiltu)* : Action for Women and Child Advancement (AWCA) in Lamka Football ground ah ‘Dare to Shine’ ti thupi nei ah Ccpur District Sport Association (CDSA) kithuapina Ccpur Womens Football Tournament 2018 a sai uh chu tuni’n International Womens Day 2018 matna tawh khak in a um hi.
Tournament closing ceremony chu Dr. Kimboi w/o V Hangkhanlian, Minister, Agriculture, Veterinary and Animal husbandry in Chief Guest hina tawh uap in, Thianching w/o Ginsuanhau Zou, MLA & Chairman, MANIREDA leh Mary Tombing te’n khuallian hina tawh a uap ui. Final match a chun, Tuaitengphai YAU leh Lenlai Red te a kihel ua, kisi thei mama in fulltime sung ah goal kikhum a umlo ziak un, penalty peksak in a um ua penalty round khatna a kidraw kit nung un, a vel ah penalty peksak in a um ui. Ziana a chun, Lenlai Red in 2-1 gualzawna a chang a, District khangthu a Numei football tournament masapen ah Champion hina chang hi. Prize in Rs 10,000/- , Trophy leh Certificate a sâng ua, Runners up Tuaitengphai YAU in Rs 5,000/-, Trophy leh Certificate a sâng hi. Ccpur Womens Football Tournament 2018 ah team/club pangkha zosia te chu consolation prize ah football leh certificate piak a hiu a, Individual prize sâng te a hiuleh - Golden boot (Top scorer) award ah Lenlai Red a pat Nengthennei; Tuaitengphai YAU a pan Kimkim in Best Player award sâng in, Golden Gloveah Lenlai Red keeper Tinneithem in a sâng a, Most Promising player ahileh FC Zomi Colony apat Niangthiankim in a sâng hi. Nurses FC in ahileh Most disciplined Team award a sâng hi.

Transfer Posting

Lamka, Mar. 8 *(Nisin Thuhiltu)* : External Affairs, Govt of India nuai ah Embassy of India to Kandhar (Aghanistan) ah sem Senneilal Vaiphei, IFS (B) chu Embassy of India to Doha (Qatar) ah posting ding ah order a suak hi. Ama’n April 2018 ah a sepna mun thak ding Doha (Qatar) zuan ding hin a kigen hi.

KIM President thak ding ah Lunpi S. Thangjom kitiamna nei
Imphal, Mar. 8 *(Nisin Thuhiltu)* : Kuki Inpi Manipur President thak ding ah teldaw ah um Lunpi S. Thangjom in tuni’n Kuki Community Hall, Langol in organization chuamchuam ah leader te uapna tawh kitiamna a nei hi.
Chairman of KIM Election Commission Dr. H.Lupho in President thak ding kitiamna a neisak a, Rev. Benjamin Shakum, Chairman, Youth Affairs in pauchap piakna a nei hi. Thangsei Haokip, Kumpipa in a thugenna a chun, Kuki Inpi Manipur President ding ah teldaw thak Lunpi S. Thangjom kipakpi mama kawm in famta KIM President lui Khamliankhup Lianzaw panlakna ettawn tak a hidan a gen hi.

HSLC exam ah student 17 expelled kibawl
Imphal, Mar. 8 *(Nisin Thuhiltu)* : A chiathazing Board of Secondary Education, Manipur (BOSEM) nuai ah High School Leaving Certificate (HSLC) Examination 2018 (pawl X exam) ah tuni'n Pallel ah Roll No. 15822; Saparmeina ah Roll No. 22315; Lamlai ah Roll No. 26016 & 26140; Wangoo Sagang ah 30491 & 30520; Kakching Khunou ah 32441; Wangoi ah Roll No. 38353 & 38424; Lamlong Hr. Sec. School Imphal ah Roll No. 45034; Borobekra ah Roll No. 17837, 17859, 17868, 17884 & 17964 te leh Somdal ah Roll No.13432 & 13436 (impersonation) te chu examination rules kal ah a um ziak un expelled bawl in a um ui.

PLA bomb expert khat mat ah um

Imphal, Mar. 8 *(Nisin Thuhiltu)* : HQ IGAR(South) nuai ah 26 Assam Rifles of 9 Sector Assam Rifles leh Thoubal Commandos ten In joint operation a bawl hun un, People Liberation Army (PLA) ding ah Improvised Explosive Device (IED) expert khat a man dawk ui. Matdaw ah um hardcore PLA cadre chu Myanmar a pat Kamjong District chuan ah IED bomb ah sumkawl vei te tawh a kithuhiat guatna kiman dawk hin a kigen a, ama chu kum 2022 apat PLA a la sem, security forces te attack bawlna ding ah tuma sang ah IED pali a la mangkha ta ah kipuang in IGAR (S) thusua in a taklang hi.

Jagat kithana chung ah KCP cadre 1 panna mi 4 mat ah um

Imphal, Mar. 8 *(Nisin Thuhiltu)* : Yaoshang festival hun ah Thokchom Jagat alias Tony thana kigawl KCP member khat leh mi dang 3 te matdaw in a um ui. KCP cadre mat ah um chu Haobijam Dillip alias Taibangnganba of Bishnupur tu leh tu Langol Lai Manai in Imphal West ah khawsa a hi. Jagat, son of Suresh, of Nagamapal Phougeishangbam Leikai chu Yaoshang festival , Thabal Chongba ah pang, inn lam zuan ah a chiana March 2 & 3 zan ah a inn kiang nai ua lampi ah kaplup ah um a hia, Jagat kithana chu CC TV in a capture khak, zia a pat chu police ten a thattu te a hawldaw uh a hi. A langkhatlam ah jagat kithana chung a chu local body te leh a insung miten kiphinna nei ah tuni tiang ah a luang, Regional Institute of Medical Sciences, Imphal ah kawi hizing nalai a hi.

Manipur numei te dinmun hawi hi ah Governor in gen

Imphal, Mar. 8 *(Nisin Thuhiltu)* : Durbar hall, Raj Bhavan, Imphal ah tuni’n International Women’s Day mat in a um a, zia hun a chun district chuamchuam apat numei 16 te chawisanna piak in a um ui. International Women’s Day chu “Time is Now: Rural and Urban Activists Transforming Women’s Lives” ti thupi nei ah mat in a um a, Manipur Governor Najma Heptulla mapuina tawh hun mat in a um hi. Governor Najma Heptulla in a thugenna a chun, India gamsung ah Manipur ah numei te thuneina sangpen ah mu a hidan gen in, North East region ah numei te chu liberal society ah khanglian a hi dungzui ua, a dinmun uh hawi mama in a gen hi. Hun matna Manipur Social welfare and cooperation minister Nemcha Kipgen in a thugenna a chun, social, political, religious leh cultural rights chung ah “gender equality a um ding pawimaw hin a gen hi. Minister of consumer affairs, food and public distribution, Karam Shyam, chairperson, Manipur State Women Development Cooperation, Samurailatpam Satyabhama Devi ten le zia hun matna chu a uap ui.

N-E state ah PMSGY-II muthei ding ah Manipur tit: Biswajit

Imphal, Mar. 8 *(Nisin Thuhiltu)* : Rural Development & Panchayati Raj Minister Thongam Biswajit Singh in tuni’n Kanto ah Kanto River,Yumnam Khunou to Sinam Kom Road, National Highway-150 to Naranseinya Maning Road ,Wangjing to Heirok Part I & II Road leh Pallel to Mantak Road a ding ah Lei kidaw thak Bailey Bridge (170 ft) hawnna a nei hi. Minister in a thugenna a chun, Northeast ah state chuam chuam um te lak ah ah Manipur chu PMGSY –II muthei ding ah state panina a hidan taklang kawm in 325kms ah sau lampi 5.5m ah keklian hiding in a gen hi. Lei kihawng dawk thak chu khantona ding, kipumkhatna ding ah pawimaw mama a hidan gen in, nekhawlna leh kikawmtuana lam ah a panpitu hithei ding, khua khat leh khat kihiattuana le hawi chuam mama ding in a gen hi. PMGSY II ahileh March 2019 ah PMGSY-I a kichai tak leh state sung ah chiapi hiding, rural roads siamhawina ding ah PMGSY-III le puandaw pai ah um ding hin a gen hi.