Ginsuanhau in lampi siamna leh Sangaikot Police station entha

Lamka, Mar. 3 *(Nisin Thuhiltu)* : Ginsuanhau @ GS Haupu, Chairman MANIREDA & MLA Singngat A/C in tuni’n Ministry of Development of Nort East Region (M/o DONOER) nuai ah Social and Infrastructure Development Fund (SIDF) in Rs. 47.96 Crore a sanctioned mang ah Chura-Sugnu Road (kilometre 26 asau) nasepna chiatha zing chu a etthakna a nei hi. Zia hun a chun, J Baite, EE panna, Engineering te’n le a zui ui.

Chura-Sugnu Road ahileh Sangaikot area mipite a ding ah hinna lampi pawimaw mama a hina chung ah Zero point (CCpur Police Station) a pat Sugnu Bridge tiang black-topping bawl hiding, lampi siamna kimang ding ballu single, earth cutting, side drain, culvert siamna ding mun te engineering te’n a enchian ui. A vailam metre 6 a sau ah ballu-single sun ding, BT-Surface Ft-18 a bawl ding leh Ft.12 a lian ah blacktopping bawl hiding in PWD department te’n a gen ui. Chura-sugnu lampi siamna tawh kisai Ginsuanhau @ GS Haupu in a etthak hun ah a genna a chun, 1993 kum kisiam zia lampi chu puaphatlo ah a la um, kum 2012 a kipat Centre ah lampi siamna ding sum del a hi nung ah, kum 5 vel zaw ah lampi siamthak kit thei ah um hin a gen hi. Chura-Sugnu Road lampi ahileh PWD, Manipur implementing agency hina nuai ah Contractor M/S HVS Construction Materials Pvt. Ltd., Special Class Contractor Patsoi Lamkhai, N.C. Road Imphal leh local contractor chuamchuam ten a siam uh a hi. Zero-point a pat Sugnu Bridge tiang kilometre 26 ah sau chu total project cost Rs.47.96 crore bei ah siam hiding a hi.

Total project cost Rs.47.96 crore lak ah1st instalment ah March 31, 2017 ni Rs. 23.98 crore sanction ah umta a hi. Lampi siamna nasep ahileh tha 24 sung Nov. 2019 tiang ah zaw thian ding ti a hi.

Ginsuanhau @ GS Haupu, Chairman MANIREDA & MLA Singngat A/C in lampi siamna a etzaw in Sangaikot Police Station le etthakna a nei a, zia hun a chun, Sangaikot Police Station chu 2008 kum a pat kikawi hita himaleh official tak ah a hawnna nei ahinailo ziak ah, Sangaikot Police station ah um ten buaina um hun ah case sai thei nailo uh leh FIR tiang ziklut theina a hinailona chung ah March thasung ah siamthak hiding, a siamthakna nasep zaw a hitak leh official ah a hawnna nei hiding, FIR tiang ziklut theina police station a hipaina ding ah panla ding hin a gen hi.

NERCORMP/ CCpur in Sangaikot area ah Piggery Fattening Unit hawnna nei

Lamka, Mar. 3 *(Nisin Thuhiltu)* : North Eastern Region Community Resource Management Project (NERCORMP), CCpur in Sangaikot Sub-Division huapsung ah Partner NGO te tawh North Eastern Council (NEC) nuai ah B. Salvaphai Village, Dongjang Village, G. Songgel Village leh Lalumbung Village ah Piggery Fattening Unit tamtak a bawl uh suklatna kawm in media team-te tawh tuni’n exposer programme a nei ui. NERCORMP team-te chu D. Khuala Vaiphei, District Project Director, NERCORMP/CCpur in amapui a, staff-te leh Partner NGO- Central for Mass Communication and Research Development (MASSCORD) leh Sahei Foundation (SF) a kipat Chief Functionary Tingkhonei Baite leh Thempi Khongsai-te pang in, khua 4-ah NaRM-G te la a pang ui. D. Khuala Vaiphei, District Project Director in B. Salvaphai khua ah Piggery Fattening Unit 10, Dongjang khua ah Unit 20, G. Songgel leh Lalumbung khua ah unit 6 gel, a kigawm ah Unit 42 hawndawna a nei a, hawndaw ah um Piggery Fattening Unit-te chu NERCORMP in partner NGO-ten a etkawl ding un mawpuakna a pedawk hi. Piggery Fattening Unit hawndawna mun te a chun, programme saulo mang malam pek in NaRM-G te’n NERCORM nuai ah project chuamchuam a muteu report bawlna le a nei pek ui. D. Khuala Vaiphei, District Project Director, NERCORMP/CCpur in a genna a chun, kum 1999 ah NERCORMP chu Manipur lut a hidan gen in, zia hun a chu Ukhrul leh Senapati District bep in NERCOMP a la phatchuampiu a hidan taklang in, CCpur District ah NERCOMP project a um theina ding Thangso Baite, MP (Lok Sabha) panna mi chuamchuam in panlakna a la nei uh hin a gen hi.
Chun, Manipur ah CCpur leh Chandel in Phase-III mutheita a hidan gen in, NERCORMP/CCpur in project chuamchuam a neite sepdaw theina ding ah NGO kizawppi 11 nei in a gen hi. Chuleh, NGO te chu amau area tawh kituak ah mawpuakna piak hisek un a gen a, Sangaikot Sub-Division ah Partner NGO- MASSCORD leh Sahei Foundation (SF) te chu amau umna area zil ah Sangaikot Area ah Piggery Fattening Unit sepdaw theina ding ah mawpuakna piak ah um bik uh hin a gen hi.

Thawngkhenmung, Asst. Account Officer (AAO), NERCORMP/CCpur in a thugenna a chun, Piggery Fattening Unit beneficiary te’n tu tiang ah vokbuk sakna ding leh vokno panna thil chuamchuam chawkna ding sum second instalment tiang piak hita a hidan gen in, vawk ann-man, vaccination leh tui banah thil chuamchuam chawkna ding third instalment le process chiatha zing, DC/CCpur in approval bawlzota a hina chung ah hapta 1/ 2 sung ah beneficiary-te bank account ah third instalment transfer hiding in a gen hi. Piggery Fattening Unit 42 a ding a chu, NERCORMP in Unit khat ah Rs. 1,13,800 zel sanction bawl in le a gen hi. Sangaikot Sub-Division huap sung ah khua 4 ah beneficiary khat in Voknou 3 tiang vawk vak un a gen hi.

EM ding ah MDC 2 la lut
Lamka, Mar. 3 *(Nisin Thuhiltu)* : Khaipao Hoakip, Chairman, Autonomous District Council, Churachandpur in Executive Member post 2 a awng ah um te luatu ding in member 2 a la lut thak hi. Member 2 laklut thak ah um ten tuni’n office a lua pan ui. Executive Member thak te chu Genneikhup, EM leh Lalditsang, EM te a hiu a, Office a lua hun uh chu Khaipao Haokip, Chairman, V. Khaikhanmung, Vice-Chairman, T. Paukhanlian, EM, P. Kamkholal, EM leh Seilenmang Khongsai, EM te’n le a uap ui. Hiatthei khat chu Chairman, Autonomous District Council nuai ah Chairman leh Vice Chairman ban in Executive Member 5 a um hi.

Police te Gypsy ding ngaitua piak
Lamka, Mar. 3 *(Nisin Thuhiltu)* : Sangaikot Police station ah Police te gari neilo ah hun banghem chan sung a um nung ua, GS Haupu, MLA 60-Singngat & MANIREDA Chairman in Sangaikot Police station ah um Police personnel-te mat ding Gypsy khat ngaitua piak hin a kigen a, zia Gypsy chu tu ah Sangaikot Police station in mangpan ngaltua hi ua gen a hi. Ziana chung a chun, Sangaikot Police station ah Officer in-charge SK Haumang in GS Haupu chung in kipakthu a gen hi. Sangaikot Police station ahileh tu leh tu officer 3 panna Police leh VDF kigawm personnel 45 umna a hi. Chun, police officer leh personnel zia mun ah posting te chu a duty na mun ua umkim zing un a kigen hi. Hiatthei khat chu , kum 2008 ah Sangaikot Police Station umsak hita himaleh official tak ah a hawnna nei ahinailo ziak ah, Sangaikot Police station ah um police ten buaina um hun ah case sai thei nailo, FIR tiang le ziklut theina ding ah thuneina piak hinailo a hiu.

YPA 65th Raising Day mang

Lamka, Mar. 3 *(Nisin Thuhiltu)* : YPA GHQ Hall Hiangtam Lamka ah YPA 65th Raising Day mat in a um hi. Zia hun matna chu Lawmpi Tangpua & Manngaihkim ten amapui ua, T Khailianthang, President YPA Ghq in YPA Flag kaipalna nei in, Upa V Vungzathang, senior adviser YPA Ghq in hun hawn pauchapna a nei a, M. Luahkhanchin, Vice President YPA GHQ mapuina’ YPA motto genkhawmna a um hi. T Khailianthang in Presidential address bawl in, Lianmuanthang Valte, Secretary YPA ghq in suunna amapui kawm in Secretary report piakna a nei a, Rev. V. Khamvum, Principal Grace Bible college in thilkhona thu genkawm in, YPA lawiupa te pauchap piakna a nei hi.

Hun mat sung in a kal hel in, YPA Mata Unit, YPA Dorcas Veng Unit, YPA bungmual unit, YPA Kanan Veng unit, Vengnuam Unit, Pearsonmun unit, Lamka Unit, Khominthang unit, Vengnuam south Unit leh lathiam chuamchuam - Chingngaihlian, Biaksang, Jenny Thomte te’n laa sakna nei in, YPA Zenhang Lamka Unit in nam lam suklatna a nei ua, YPA Jt. Hqtr Bengaluru, YPA Singngat Block, Imphal Block, Lamka Block, New Lamka Block leh Lanva Block ah President ten thugenna a nei ui.

YPA 65th Raising Day lawpna hun chu Minister V Hangkhanlian, MDC hunkhawp banah YPA GHQ Ex President, Secretaries leh Patron Member, Life Member hunkhawp ten le a uap ua, YPA GHQ a Secretary Lianmuanthang Valte mapuina certificate piakdawna leh Honorary Patron Member ding ah YPA founder Asst Secretary a la hisa, tu ah dam nalai leh YPA activities chuamchuam ah panla zingtu V Dongsiam leh kum 30 val YPA a ding a la kimang, Central Executive Committee Chairman S Chinngaihpau te chu T Khailianthang, President YPA Ghq in certificate leh memento piakna a nei hi. YPA Ghq in damlote a puakvelna ding ah Ambulance ngaitua piak Lallawmpui Ngaihte, Senior Sales Manager (North Bengal & Sikkim) HPCL kiang ah le a kipiakzawna chung ah Honorary Life Membership hina piak in a um a, Memento leh Certificate piak a hi. Tuni tiang ah YPA ghq ah Honorary Patron Member 9 umta leh Patron Member 48 um hin a kigen a, Honorary Life Member 11 leh Life Members 67 um in le a kigen hi.

Promotion muthak

Imphal, Mar. 3 *(Nisin Thuhiltu)* : Mrs. SN Vaiphei (Avei) w/o Tongneilal Vaiphei of Langol, Imphal in Manipur Public Service Commission (MPSC) nuai ah hun banghem chan sung Section Officer (SO) ah a sep nung in 01 March 2018 ni ah promotion order suak in Registrar (under Secretary), Manipur Public Service Commission (MPSC) in a kaisang hi

Tuilangkuol B.S Quarter hawng
Lamka, Mar. 3 *(Nisin Thuhiltu)* : Central Kristen Khanglai Pawl, ESC Guonggalna nuai ah KHANGLAI 2017 khawmpi Project Tuilangkuol BS Quarter sakzaw a hi tawh kitawn in March 2, 2018 a khan, Rev T. Kamgin, Executive Director ESC in a hawndawna a nei hi. Khanglai 2017 Project ahileh Mrs Parpui Shaw Gangte (Main Sponsor) leh Khanglai 2017 sponsor bawltu te panlakna ah kisa a hia, a chung langva (Tin) ahileh Vungzagin Valte , Chairman MTDC, Govt of Manipur in a tuak a hi.

Manipur Skill Expo-2018 khak hita

Lamka, Mar. 3 *(Nisin Thuhiltu)* : NESEED Foundation Manipur leh STEP Trust, Delhi in NESEED Office, Tuibong ah March 1, 2018 a kipat ’developing skill & entrepreneurship eco-system’ ti thupi nei ah Manipur Skill Expo-2018 a nei uh chu tuni’n a zo thiang ui. Closing function ah Expo ah pang te kiang in award leh certificate piakdawna a nei ui. Skill Expo ah mun chuamchuam a kipat mi 190 pang in Beauty & wellness, Eco-Tourism, Digital Marketing & Business Proposal Workshop, Solar energy/green job, Film/Videography, Handicraft & Textile (Design & Marketing), Essay Writing Competition tawh kisai in kiziltilna a um hi.
Syam Lal Poonia, IAS, DC/CCpur in tuni’n Expo ah pang te vena nei in, trainer, trainee leh organizer-te tawh thu pawimaw chuamchuam genkhawmna a nei ua, DC/CCpur in skilling pawimaw dan gen in, entrepreneurship lam a ngaikhawk ding uh a nawp thu a gen hi. Hun matna uap, Ajay Arora, AC to DC/CCpur in govt. in sumdawnna tawh kisai ah panpitu ding PMKVY, PMKK ti te panna skill development program chuamchuam chiapi a hidan a gen hi.

Skill Expo a chun ziltiltu’n Kshitij Amodekar, Expert Eco Architect and Solar, Delhi & Bangalore; Sumit Kanu: Expert, Digital Marketing and Business Planning, Delhi; Oinam Doren, President Award Winner, International proclaimed Film Maker and Editor, adviser to various film festivals; Tshering Bhutia: Assistant Professor, Designing and handicrafts, NIFT Shillong; Kim Tunglut, Industry Expert- Beauty & Wellness leh Poonam Dhamdhere, Expert Hospitality-Eco Tourism te a pang ui.

Skill Expo hunkhakna a chun,Mr Lianzalal Vaiphei, CEO, NESEED Foundation in participant te’n development job roles, gained general awareness on skill industry, re-engineered the skill, livelihood business leh entrepreneurship development tawh kisai in skill tamtak hiatbelap un a gen a, mihing 5% bep in govt. skill development training schemes chuamchuam PMKVY, PMKK te hia a hidan uh taklang in, CCpur district chu Agriculture, Education, IT/ITeS, Travel, tourism leh hospitality lam ah high growth sector hi’n a gen hi.

Thudik ziak ah SP/CCpur in pakchatna thilpiak pia

Lamka, Mar. 3 *(Nisin Thuhiltu)* : Joshua R. Roungul (15) s/o Samuel H Roungul of Sielmat, Lalveng, CCpur in a suapi te khat tawh Muolvaiphei Prayer Mountain ah pursue/wallet mangkhat mu’n, a neitu ding a hawl nung ah a muzawlo ziak in Ccpur police station in a va kawi hi. Police te’n a neitu diktak a hawl nung un, a neitu’n police station ah a thil sukmang a va kilak kit hi. Naupang kum 15 mi Joshua R. Roungul in thudik tak leh gin-um tak ah a thilmu a neitu piakkitna ding ah panlakna a neina chung a chun, Rakesh Balwal, IPS, SP/CCpur in ama office chamber ah kimupi in, pakchatna’n Rs.500/- a pia, SP/CCpur tawh a holim hun un, scientist hiding lunggul a hidan a gen hi.

DC/CCpur in excursion chia ding te flag-off

Lamka, Mar. 3 *(Nisin Thuhiltu)* : Thingtang gam a nek leh chak khawsakna haksatak nei a, khawpi sung ah thiamzil zo lo te khualna ziak ah Grace Zamnu, MDC in a phudaw Solace Academy ah kai naupang te Bus khat ah excursion chia in, Imphal khawpi sung mun chuamchuam etthakna a nei ui. Solace Academy student excursion chia ding te chu zingkal dak 7:30 in Ccpur Police station ah flag-off bawl in a um a, Shyam Lal Poonia IAS DC/CCpur leh Rakesh Balwal IPS SP/CCpur in flag-off bawlna a nei ui. Solace Academy a pat Excursion chiate chu Class 3 a pat Class 7 tiang student te a hiu a, a vek ua student 45 a hiu. A teacher teu mapuina tawh Imphal khawpi sung leh a kiim ah, Andro, Rose Garden, War Cemetry, Zoological Garden, state Museum leh mun dang tamtak etthakna a nei ui.

District Magistrate in Leimatak Lamdan Kuki area ah Prohibitory Order sua
Lamka, Mar. 3 *(Nisin Thuhiltu)* : Leimatak Lamdan Kuki, Majuron Kabui, Kokadan, Thenjang leh Dimdailong area ah gamgi thu buaina sosang ah February 27, 2018 ni, pawl 2 kal ah kinawktuana a la pian bak ah mi 1 in liamna a tuak tak tawh kitawn ah SDC/Executive Magistrate, Kangvai in District Magistrate, Churachandpur ah thil umdan report a piaklut tawh kitawn in Old Cachar Road dung, Kangvai Sub-Division huapsung ah um, New Kungpi, Bongmol, Lamdan Kuki, Majuron Kabui, Kokadan, Thenjang leh Dimdailong khua ah Prohibitory Order sua in a um hi. Zia buaina tawh kisai a chun, a chiata February 28, 2018 ni a khan, Churachandpur leh Bishnupur ah Deputy Commissioner leh Superintendent of Police ten Commanding Officer, 32nd Battalion, CRPF, Loktak tawh thiltunna mun etthakna a nei ua, pawl 2 ah leader te tawh a mun ah thil umdan genkhawm ding leh buaina sukven ding ah panlakna nei maleu, a mun ah kihona nei ah buaina sukven ding a lemchanlo ziak in March 7, 2018 ah DC/Bishnupur Office ah kihona nei ding in lemsakna a nei ui. Zia kawmkal a chun, March 1, 2018 ah meithal git hiat ding a um kit banah pawl 2 te kikal sosang thei ding dinmun in a um a zing a, kihona nei masang ah buaina a sosan khak ding venna ah Shyam Lal Poonia, IAS, District Magistrate, Churachandpur District in Code of Criminal Procedure 1973 nuai ah Section 144 ah thuneina kipia mang ah Prohibitory Order a sua a hi. Zia Prohibitory Order dungzui a chu mi 5 sang ah tamzaw umkhawm phal hilo ding, hiam leh hei chawi phal hilo ding a hi. Chuleh, Arms Act 1959 nuai ah Clause (b), Section 17 nuai ah Sub-Section 3 ah thuneina kipia mang in, Old Cachar Road dung, Kangvai Sub-Division huap sung ah um, New Kungpi, Bongmol, Lamdan Kuki, Majuron Kabui, Kokadan, Thenjang leh Dimdailong khua ah, licensed meithal neiten a meithal uh Loktak Police Station ah March 3, 2018 nitaklam dak 5:00 tiang ah a piaklut ding ua le District Magistrate in order a sua bawk hi.

Registration mu
Lamka, Mar. 3 *(Nisin Thuhiltu)* : Zomi Mothers’ Association (ZMA) Headquarter in a etkawl Only Grace Home in Department of Social Welfare, Government of Manipur nuai ah Registration mu a hidan taklat in a um a, zia dungzui a chu Only Grace Home chu Institution, Agency leh Voluntary Organization in a etkawl Juvenile Justice Care and Protection of Children Act 2015 nuai ah naupang etkawlna leh venbitna dan ah Department of Social Welfare in a hiatpi ti a hi.

CDSA team te flag-off

Lamka, Mar. 3 *(Nisin Thuhiltu)* : All Manipur Football Association (AMFA) nuai ah 7th Kanglei Mega Sports Meet 2018 Under-17 kihelna pang ding, District Sports Association (DSA) Churachandpur team-te tuni, March 3, 2018 sunma dak 9:15 in Lamka Public Ground kiang ah a thakdawna a um hi. Zia hun a chun, T. Kammuanlal Simte, CEO, ADC Churachandpur in flag-off bawlna a nei hi.

BJP in Tripura ah gual zo; Nagaland ah BJP-NDPP alliance in govt. thak form ding; Meghalaya ah kichian nailo
Agartala/ Kohima/ Shillong, Mar. 3 *(Nisin Thuhiltu)* : Northeastern state 3 - Meghalaya, Nagaland leh Tripura Legislative Assembly election results tuni’n puan in a um hi. Zia dungzui a chun, Tripura ah Bharatiya Janata Party (BJP) leh a pankhawmpi Indigenous Peoples Front of Tripura (IPFT) have in kum 25 sung Left Front/ Communist Party of India (Marxist) vaihawmna subei in, absolute majority hina tawh government thak siam thei ding in a um hi. BJP in seat 34 ah gualzawna chang in, IPFT in seat 8 a lua a, BJP-alliance chu seat 41 lua a suak hi. CPI (M) in ahileh seat 13 bep a lua zo a, Congress ahileh seat 1 le changzo lo in a um hi. BJP state President Biplab Kumar Deb in Banamalipur seat ah a ki tetpi te lak ah a kinaipi pen Amal Chakraborty chu 9,500 votes in a zo a, Tripura Chief Minister Manik Sarkar in Dhanpur seat in gualzawna a chang hi. State PWD Minister leh CPIM candidate Badal Choudhury in le Hrishyamukh seat in gualzawna a chang a, CPIM candidate leh Agriculture Minister Aghore Deb Barma in Asharambari constituency seat a thasuak hi. Ama chu a ki tetpi IPFT candidate Mevar Kr Jamatia in 7,000 votes val ah a zaw a hi.

Meghalaya election result dungzui ah majority hina tawh government siam thei ding party um chuamlo in “hung assembly” in a um a, Congress in single largest party hina tawh seat 21 in gualzawna a chang hi.
National People’s Party (NPP) in seat 19 ah gualzawna a chang a, United Democratic Party (UDP) seat 6 lua in BJP in seat 2 a lua zo hi. Hill State People’s Democratic Party (HSPDP) in le seat 2 a lua zo a, PDF in seat 4 a lua hi. Chun, NCP leh Khun Hynniewtrep National Awakening Movement in seat 1 ah gualzawna a chang a, Independent candidates ten seat 3 a lua ui. Chief Minister Mukul Sangma in Ampati seat leh Songsak seat in gualzawna a chang gel a, senior Congress leader Ampareen Lyngdoh in East Shillong seat a lua hi. National Peoples Party, NPP candidates Agatha K Sangma, Jim M Sangma, Macmillan Byrsat leh Gigur Myrthong te’n tuchung election a chun gualzawna a chang ua, HSPDP candidate Samlin Malngiang in State Home Minister H.D.R.Lyngdoh chu Sohiong constituency ah vote 622 in a zo hi.
A langkhatlam ah political chuamchuam ten government siam theina ding in nasatak in panlakna a nei pan ngal ua, National People’s Party, NPP candidate teltin thak ah um te’n Shillong ah meeting nei ah party dang tawh pankhawm ah government siam dingdan genkhawm un, thudawnna’n a gen hi. Zialo a chun, senior Congress leader ten le party dang tawh pankhawm ah government siamna ding in panlakna a nei ui.

Nagaland Assembly election dungzui in BJP in seat 12 in gualzawna a chang a, a partner-NDPP in seat 16 ah gualzawna chang in, NPF in seats 26 a lua hi. NPP in seat 2 in gualzawna a chang a, Independent in seat 1, JD (U) in seat 1 a lua hi. Zia chu tawh kitawn ah ruling Naga People s Front (NPF) in kum 15 sung Nagaland ah a vaihawmna chu bei in, BJP-NDPP alliance in Nagaland government thak form ding tina a suak hi.