Pawsal khat ama leh ama petrol ah kihal
Lamka, Feb. 25 *(Nisin Thuhiltu)* : College Road, Churachandpur ah tunitak dak 5:30 vel in Jesai Lalditsak (28) h/o Liansingpui & s/o Ramropui of of Rengkai , Bible Hill mei in a kihal a, mi phatchuam ngai te’n district hospital a tutnung un Imphal ah etkawl ding ah doctor in refer a bawl hi. Thiltung tawh kisai ah Jesai Lalditsak (28) insung mite gendan in, Jesai in ahileh a zi tawh cha nei maleu kikhen, tunitak ah phone ah numei khat tawh kiho in, activa ah inn a ki pawtdawk, a ki hopi chu a zi hiding ah gingcha’n a kiho buai ziak ua lung-awilo ah ama leh ama petrol mang ah kihallup gua hiding in a ginchak thu’u a gen ui. Jesai ahileh a kawng a ki pat a chung lam taksa mun tamtak a kang sia, lungthim nat ziak ah petrol ah kihal hi ah a insung mite kiang ah hiatsakna bawl in, a in kuan te’n a gen ui.
Jesai ahileh Zamsuan road junction ah numei khat leh naupang khat tawh um, zia nung a chu college veng ah compound khat ah meikuang tawh tailut hin mit ah mu ten a gen ui. Chuleh, Numei khat in a ban ah mat gua maleh meikuang tawh taikual vel in le a kigen hi.
TCP Office ah Meeyamgi Numit (People's Day) um ding
Lamka, Feb. 25 *(Nisin Thuhiltu)* : Tu tha February 2018 ah Manipur State Assembly session ziak ah Meeyamgi Numit (People's Day) date 15/02/2018 ah a la um theilo chu 26/02/2018 ah um ding a hi. Zia chu tawh kitawn ah Traffic Control Police (TCP), Office ah le date 26/02/2018, 11:00 am ah Meeyamgi Numit (People's Day) mat hiding, DC,SP & DTO ten le zia hun chu uap ding a hiu a, Churachandpur District sung ah Auto Association te leh Line zosia President/Chairman & Secretary te zia hun a chu pangkim chiat ding ah hiatsak a hiu.
Thanlon a ding 132/33KV transformer pua
Lamka, Feb. 25 *(Nisin Thuhiltu)* : Thanlon Power Station siamzaw a hitak tawh kitawn in zia mun a chu kawi ding 132/33KV transformer lian mama khat, zani ah Imphal a pat hung kipua chu Tipaimukh Road chuan ah Thanlon zawtpi in a um hi. Transformer ahileh a gik mama ziak in Lamka leh Thanlon kikal Tipaimukh Road a lei (bridge/culvert) tamtak mun umlo ah hiat a hi ziak in, zia te chu a pelna ding ah PWD in road diversion bawl ti thu a um hi. Thanlon Power Station ah132/33 KV Transformer in Thanlon Power Sub-Station 33/11KV, Pherzawl Power Sub-Station 33/11KV, Sinzawl Power Sub-Station 33/11KV, Mualnuam Power Sub-Station 33/11KV supply ding a hi. Thanlon MLA Vungzagin Valte, Chairman, MTDC panlakna ziak ah Thanlon bial a ding transformer puaklut ah um hin a kigen a, zia transformer chu kituptak ah a function thei hun hun ah Thanlon bial leh Tipaimukh bial in meivak kiningting tak mutheita ding a hi.
1st CCpur Women’s Football Tournament um ding
Lamka, Feb. 25 *(Nisin Thuhiltu)* : A hung tung ding March 8, 2018 ah International Women’s Day matna ding tawh kisai in, Action for Women and Child advancement (AWCA) saina nuai ah March 1-8, 2018 sung in Lamka Football ground ah 1st Churachandpur Women’s Football Tournament um ding a hi. Zia Numei Football tournament a chu champion ten Dangka 10,000 + Trophy+ Certificate sang ding, Runners Up in Rs. 5000 + Trophy + certificate sang ding a hiu. Tournament ah pang ut te’n SG Computer, opp Dorcas Hall, New Lamka; Excel travels, New Bazar Traffic point leh CDSA office ah entry form muthei ding, February 27, 2018 tiang ah entry form lakna mun ma ah Entry fee Rs 700 tawh piaklut ngaiding a hi. Numei Football tournament ah pang club zosia chu consolation prize dan ah Football leh Certificate piak hiding a hiu a, match khat ah player 7 zel kihelsak hiding a hiu.
Govt semtu mi 38 pension ding
Lamka, Feb. 25 *(Nisin Thuhiltu)* : A hung tung ding March 1, 2018 ah Ccpur district sung ah Education Department a semtu mi 25 leh Medical Department a semtu mi 13 a sepnau a pat pension ding a hiu. Amau chu - Medical Department (CMO) a pat Ngemkhongai, Head Clerk; Malsawmthieng, FHW/ANM; Seikhomawi Joute, FHS; Nengneihoi, FHS; Th. Sanachandra Singh, MHW; Y. Somokanta, MHW; Chinlianmang, Driver; Lalfakthang, Grade-IV; P. Pauzagin, Grade-IV; Lalthangvung, Grade- IV; Samuel, Grade-IV leh Lamkhomang, Grade- IV te a hiu a, Education Department (ZEO), Ccpur a pat K. Dongzalam, DI of School Thanlon; N. Pakasana, DI of School, Samulamlan; M. Thangzalian, Head Clerk, ZEO/Ccpur; Nengthang, Graduate Teacher, Hanship High School; Tohlen Kom, Graduate Teacher, Keiral Aimol High School; S.T. Liana, Graduate Teacher, Vungzagen Hr. Sec. School; Ph. Subol, Graduate Teacher, Kangvai High School; Tuankhanpau Phualte, Graduate Teacher, Suangdoh High School; RK Shanitibala Devi, Sr. Accountant, Thanlon High School; Rohlupui, Matriculate Teacher, Rengkai Hr. Sec. School; H. Prema Satiba, Matriculate Teacher, Leisen High School; Nianzadim, Matron, Vimala Raina High School; Zamkhosuan Guite, Matriculate Teacher, Lungchin High School; L. Pakhuongte, Matriculate Teacher, New Bazar Jr. High School; Lalzawmvel, Matriculate Teacher, Pherjawl High School; Thangchungnung, Matriculate Teacher, Ponlen High School; Vanlallun, Matriculate Teacher, Thingpuikuol Jr. High School; S. Chingkhochong Kom, Matriculate Teacher, Tualkhohau High School; Niangzahoih, Matriculate Teacher, Tuibong Jr. High School; Dimzachiin, Matriculate Teacher, Vimala Raina High School; Dardinglian, Matriculate Teacher, Vungzagen High School; Tlanglawmthang, LDC, Senvon High School; L. Songpa Kom, Grade-IV, Keirap Aimol High School, Thangte, Chowkidar, Lungthulen Jr. High School leh Lallienthang, Chowkidar, Sartuinek Jr. High School te a hiu.
Sian Huai Siam Backery hawng
Lamka, Feb. 25 *(Nisin Thuhiltu)* : Churachandpur Joshua Road leh KG Marg kisuktuana bul ah um N Sumkai chenna inn huangsung ah tuni sunnung dak 1:30 in, Sian Huai Siam backery kiti nekthei siamna mun ding hawn in a um hi. Zia hun chu Nu Mang in Chief Guest hina tawh nekthei siamna mun ding hawnna a nei a, Pastor Muankim, PCI (R) in Pathian kiang ah a latna a nei in, Guest of Honour in Elder Langkhanpau Guite MDC & Ex-Chairman ADCC a pang a, Chief Host in N Sumkai a pang hi. Sian Huai Siam Backery in vanmat neikim nailo maleh machine order a bawlteu a tun kim masang ah Menu 2 bawl phawt ding uh hin a kigen hi. Sian Huai Siam Backery neitu ahileh Khamcinthang @ Thathang a hi.
ECA in 66th Khawmpi 2018 nei
Lamka, Feb. 25 *(Nisin Thuhiltu)* : Evangelical Churches Association (ECA) in a 66-tinna Khawmpi 2018, Thingkangphai ECA Church ah a mat uh tuni’n Ordination hun in a mang ui. Pastor Thongkhotinlal, Lecturer, STS in zingkal dak 10:00 ah Ordination hun a mapui a, Upa Thoyam, Vice-Chairman, HQ Pastorate Area-I in hun hawnna pauchapna nei in, Rev. Dr. TJ Haokip, Chairman, Pastoral Committee in Kochuam Upa ding mi 15 damdetna a nei a, Rev. LB Angam, Executive Director in pauchappiakna a nei hi. Upa Demmang, Chairman, Finance & Planning in Kochuam Upa leh Sêmtu kum 70 tingta ah pension dingte chawihawina thilpiak piakna a nei a, Upa J. Lhungdim in kipakthu genna nei in, Upa T. Simon, Vice-Chairman, AWC HQ Pastorate Area-II in hun khakna pauchapna nei in, hun a mangzo ui. Sunnung dak 3:00 in Khawmpi khakna hun mat ahia, Upa Henkholun Doungel, Assembly Moderator in vaithakna leh kipakthu genna nei in, Rev. Dr. TJ Haokip, Vice Chairman, ECA in khawmpi khakna hun a mang hi. ECA (ECCI) nuai ah Pastorate Area 25 um hi’n a kigen hi.
SSPP GHQ lawiupa ten kikhutsanna nei
Lamka, Feb. 25 *(Nisin Thuhiltu)* : Siamsinpawlpi (SSPP) GHQ President thak, Thanglalmuan Hauzel, kiang ah tuni February 25, 2018 sunnung dak 3:00 ah SSPP Complex, Siloam Veng, Buangmual ah mawpuakna piakdawna hun a mang ui. Zia hun achun, Ricky Vanlallawm Guite, Chairman, Standing Committee, SSPP GHQ in mapui in, President lui, Lianzapau Samte in SSPP GHQ in van leh go chuamchuam a neiteu President thak kiang ah piakdawna nei in, kikhutsânna suai le a kai gêl ua, hiatpina suai, Ricky Vanlallam inle a kai hi. President ding kitelna ahileh a chiata January 13, 2018 ni ah SSPP Residential School, Nghathal ah SSPP Foundation Day ah election nei ahia, kum 2021 chan vaipaw ding ahi.
MBBS zo thak
Lamka, Feb. 25 *(Nisin Thuhiltu)* : Tv. Khaiginlal Lengen s/o Mr Lianboi Lengen & Dr. Tinglonlei Thangluai, Anesthetist of Red Cross Road in tunaicha a khan JNIMS Medical College, Imphal a pat in Bachelor of Medicine & Bachelor of Surgery (MBBS) final examination ah sangtak in lawtinna a chang hi. Ama’n 1st March, 2018 a pat tha 12 sung Internships bawl nalai ding a hi.
SYO, New Lamka Unit vaipaw ding telna nei
Lamka, Feb. 25 *(Nisin Thuhiltu)* : Simte Youth Organization (SYO) General Headquarter saina’n tuni, February 25, 2018 nitak dak 2:00 in Simte Inn, Simveng ah SYO, New Lamka Unit vaipaw ding kitelna a nei ui. Zia hun achun, Presiding Officer in L. Dongchinthang, President, SYO GHQ a pang a, Polling Officer in GK Naulak, H. Thangkhansuan, Assistant Secretary, H. Chinsuanlal, Th. Doumuan, T. Doumuan, T. Chinminlun leh H. Chinsuanlal a pang ui. SYO, New Lamka Unit huapsung ah Inkuan 240 vel a um a, Zone A, B leh C in a kikhen hi. Vote khiatna nei zaw ah result puandaw ngal ahia, teltin ah umte ahiu leh; President- Ginkhup, Secretary- Th. Louminthang leh Finance Secretary-cum-Treasurer ding in B. Thongchinlian ahiu a, Executive Member ding in Zone tin ah mi 4 teltin ahiu. Zia dungzui achun, Zone A ah Thangvel, Manglian, Suanlian leh Ginmuanthang, Zone B ah Nengkham, Lamjahau, Jacob leh P. Soichinpau ban ah Zone C ah T. Khanlam, H. Khaikhochinlal, Nangdoupau leh Khaikholian teltin ahiu. Presiding Officer, L. Dongchinthang in teltin thak ah umte a ding ah tîlkhona thu gen in, kitiamna a nei sak a, Pastor L. Khammang in pauchappiakna a nei hi. Dongchinthang in Unit khat election ding ngaikhawk ah mipi tamtak hungkhawmte chung ah kipakthu gen in, zia gual ah kipumkhatna latsak hi Simte mite’ a ding ah kipumkhat zawksemna ding ah kalbi ahi ding a dawi thu a gen hi.
M/S Vangsei in Best Overall Performing Distributor Award dawng
Lamka, Feb. 25 *(Nisin Thuhiltu)* : M/S Vangsei Indane Gramin Vitrak, K. Salbung in North-East bial ah 2017-2018 a ding in Best Overall Performing Distributor Award dawng in, Certificate of Appreciation piak in a um hi. Award ahileh a chiata February 23, 2018 ni ah Sonapur, Guwahati ah Annual Distributor’s Convention mat ahi hun ah Nengneikim, Proprietor khut ah piakdaw ahi. Nengneikim in a gendan in, October 7, 2015 ni ah patdaw ahia, Pathian panpina ziak ah tuni chan chiato zel in, Indian Oil Corporation Limited (IOCL) in a hiatkham ding ah award chuamchuam dawng uh ahi’dan a gen a, Stephen Guite dawisakna leh kaihuaina ziak ah February 23, 2018 ni ah Best Performance Distributor Award dawng ahida’n le gen in, staff-te ziak ale chan hih tung thei ahi’dan a gen hi. In nupi khat hina ah, IndSoft matna tawh kisai buaina ah a panpitu; Suresh, Sialngenthang & Sons, Kim Joe Gas, Bungmual Indane Gramin Vitrak leh Songtal Indane Gramin Vitrak-te chung ah kipak mama ahi’dan le a gen hi.
CM Biren in self help groups leh mimal 179 te kiang ah loan piakdawna nei
Imphal, Feb. 25 *(Nisin Thuhiltu)* : Manipur Chief minister Nongthombam Biren Singh in tuni’n Durbar Hall, Chief Minister’s Secretariat, Imphal ah self help groups leh mimal 179 te kiang in loan piakdawna a nei hi. Loan piakdaw ah um chu total ah Rs. 2,35,01000, Manipur State Co-operative Bank (MSCB) Ltd. nuai ah kipia a hi.
Total Rs. 2,35,01000 lak ah Rs. 1,38,34,000 chu Meeyamgi Numit leh Hill Leaders’ Day hun ah Chief Minister kiang ah financial assistance dawn te piak a hiu a, Piggery loan ah mi 56 te Rs. 51,52,000 piak a hi. Chun, dairy loan mi 6 te Rs. 7,20,000 piak in a um a, self help groups 65 te Rs. 37,95,000 piak in a um hi.
Biren Singh in a thugenna a chun, loan distribution programme bawl ah a umna ziak chu state sung ah self employment promote bawlna ding a hia, MSCB officials leh employee ten government thak mission lawtin theina ding ah panlakna a nei uh chu pakcha mama in a gen hi. Government thak nuai ah MSCB Ltd. in Rs. 3.5 crore tuam loan ah hawmdawk ta a hidan gen in, internationally renowned fashion designer Robert Naorem le loan mute lak ah a pan chu kipak mama a hidan gen in, March 1 – 15 sung ah 100 schemes/projects hawn hiding, zia chu Manipur ah BJP-led state government anniversary lawpna kawm hiding in a gen hi.
Manipur ah BJP-led state government anniversary lawpna chu Union home minister Rajnath Singh leh BJP National president Amit Shah in le uap ding, Prime Minister Narendra in a uap leh a uaplo ding chu 26th February 2018 ah New Delhi a phak hun ah confirm bawl ding hin a gen hi. Khurai Assembly Constituency MLA L. Susindro leh MSCB Ltd managing director A. Subhash Singh ten le loan piakdawna hun chu a uap ui.
Minister Nemcha Kipgen in 8th International Women’s Conference uap
Bengaluru, Feb. 25 *(Nisin Thuhiltu)* : Social Welfare and Cooperation Minister Nemcha Kipgen in Vishalakshi Mantap, The Art of Living International Center, Bengaluru ah February 23 -25, 2018 sung ah um 8th International Women’s Conference (IWC) 2018 a uap hi. Minister Nemcha in IWC ah Manipur numei ten economy dawpkangna ding ah panlakna a nei dan uh taklang kawm in Khwairamband Bazar leh Ima Market (Mother’s Market) chu khawvel ah numei ten market a run uh umsuun a hidan gen in, Manipur numei ten sports leh lam chuamchuam ah le panlakna nasatak nei in a gen hi. IWC ahileh gam chuamchuam 60 a pat achievers, artists, sportswomen, policymaker delegates 250, speakers 75, rural areas a pat100 colleges 30 a pat mi 60 ten uap ui. Zialo a chun, D. Roopa, IGP, Karnataka; Former Chairman, SBI, Arundhati Bhattacharya, Actor, Rani Mukherji, actor, Dr Jiko Haveni, first female speaker, Fijian Parliament ten le a uap ui.
Rs 100 crore ah YAS budget sukpun hiding: CM Biren
Imphal, Feb. 25 *(Nisin Thuhiltu)* : Youth Affairs and Sports (YAS) Department, Govt of Manipur organised bawlna Khuman Lampak main stadium ah tuni’n Shannaroishinggi Numit mat in a um hi. Zia hun chu Chief minister Nongthombam Biren Singh in khuallian hina tawh uap in, 2019-20 fiscal year ah Youth Affairs and Sports (YAS) a ding ah annual budget Rs 100 crore ah sukpun hiding in a gen a, national level competitions ah pang sportsperson te cash incentives Rs. 3 lakh a pat Rs. 6 lakh ah sukpun ding, daily allowance Rs. 200 hisek chu Rs. 500 ah sukpun hiding in a gen hi. Zia chu state Cabinet in a vaima theipen ah sufel ding a hidan taklang in state government in state pawlam ah state players panla zing tu te sepna pevek ding hin a genhi. Government tu ah Olympic gold medalists te Rs 1 crore , silver medallists Rs. 75 lakhs, broze medallist Rs. 50 lakhs leh Olympic ah pangzo te Rs. 25 lakhs award dan ah pia a hidan gen in, tunaicha a khah International tournament ah Gold medal winners Mirabai Chanu chu state in cash prize Rs. 20 lakhs piata hin a gen hi. Zia hun matna chu YAS minister Letpao Haokip in le a uap hi.
RPF constable 1 in Asst. Commandant khat kaplum
Shillong, Feb. 25 *(Nisin Thuhiltu)* : Meghalaya's South West Khasi Hills district ah Pathianni zingkal in Assembly election duty Railway Protection Force (RPF) 6th Battalion, E Coy, constable khat in Assistant Commandant khat kaplum in a seppi dang khat a kapliam hi. Superintendent of Police H G Lyngdoh in thiltunna tawh kisai a genna a chun constable mi a officer uh kaplumtu mat ah um leh a meithal chawi lakpiak hita a hidan gen in, police custody ah kikawi hin a gen hi. Meghalaya Chief Electoral Officer FR Kharkongor in a genna a chun, Assistant Commandant Mukesh Tyagi chu constable Arjun Deshwal kiti’n Railway Protection Force (RPF) camp,Mawkyrwat town ah a kaplup a hidan gen in constable dang, Joginder Kumar kiti’n liamna tuak in a gen a, North Eastern Indira Gandhi Regional Institute of Health and Medical Sciences (NEIGRIHMS) ah ki enkawl in a gen hi. Inspector Pradeep Meena leh Sub-Inspector Om Prakash Yadav ten le liamna thupi talua hilo maleh liamna tuak un CEO in a gen hi. A lankhatlam ah bang ziak ah ziagual thil chu piang thei a hi em ti hiatchian a hinai pua, himaleh constable mi kaplum tu chu Assistant Commandant chung ah lung-awilona nei hiding in a kigen hi. Meghalaya' s 60-member Assembly election ahileh 27 February 2018 ah um ding a hia, ziana ding a chu central security forces tamtak election duty ding ah kikawi a hi.