Nau neina nausen leh a nu thina chung ah JAC kiphutdawk; kiholem thei nailo

Lamka, Feb. 22 *(Nisin Thuhiltu)* : Churachandpur District Hospital, Operation Theatre (OT) ah Nau nei ziak ah thina tuak Sapam Thoibi Devi (24) w/o Sapam Somorjit of Torbung tawh kisai in tuni, February 22, 2018 in kihouna um maleh kiholemna taktak umtheilo in a kigen hi. A kihiatdan ah Sapam Thoibi Devi (24) w/o Sapam Somorjit of Torbung, nauvawp zing lai chu Lamka ki etsak ding ah a hungna’ doctor in naubu hawilo ziak ah kintak ah a nau a nei ding pawimaw hi ah a hiatsak dungzui ah District Hospital ah emergency operation bawl ding ah puaklut ah um hi’n Sapam Thoibi Devi suapipan a gen hi. Operation hun ah nasen a thisa lakdaw a hi bak ah a nu le dam zo lo ah mualliam in a gen hi. Zia thil tung tawh kisai a chu thina tuak Sapam Thoibi Devi insung miten doctor te bawl khial ah thina tuak hiding ah a muanmaw ziak un, 'JAC against the killing of Sapam Ongbi Thoibi Devi with baby during delivery dead' kiti phutdawk in, Churachndpur Police Station in case a file ui. Zia chu tawh kitawn in, Police Station ah JAC, Medical Team leh DIG khat tawh kihona a nei ua, kihona nei hun sung in Torbung a pat mi kipunkhawm Police Station gate mai ah mu ding um maleh buaina bangma umlo in, kihona a chiatha thei a, himaleh zia thu zik a hi tiang ah kiho lemna taktak umtheilo ah hiat a hi. Sapam Devi thina chung ah JAC Convenor Oinam Ibomcha in a genna a chun, Sapam Thoibi Devi chu Feb. 21, 2018 sunnung dak 3:00 vel ah Clinic khat ah naunei ding ah kisa lai a buaisiat ziak ah kintak ah nitak dak 7:45 vel ah Dist. Hospital puaklut a um, zan dak 10:30 vel ah emergency operation bawl a hi nung ah thina tuak hin a gen hi.
Sapam Thoibi Devi ahileh tuni mama, post mortem bawl ding ah Medical Directorate in Imphal a pat Forensic Expert, Dr. A. Sylvia leh Dr. Salam Bitam Singh a hung sawl a, himaleh kiho lemna a um theilo ziak in Post Mortem bawllo in, District Morgue ah a luang kawi in a um hi. Thiltung tawh kisai chu a enzui ding ah Medical Team khat siamdaw in a um a, amau chu Dr. Kim Simte, CMO, Chairperson, Dr. VC Pau Tonsing, MS, Vice-Chairman ban ah member ding in Dr. I. Chourajit Singh, Gynaecologist, Dr. Tinglonlei Thangluai, Anesthetist, Dr. K. Amarjit Singh, Physician leh Dr. Y. Nabakumar Singh, Pathologist (Consultant) te guat in a um ui. Sapam Thoibi Devi ding ah tu ah a nau nei ding chu a 2 veina hita ti a hi. A langkhatlam ah zia thiltung tawh kisai a chun Police te’n Unnatural Death (UD) No. 03/CCP-PS/2018 u/s 174 CrPC case in registered a bawl ui.

ATWU lawiupa ten Union Home Minister kimupi

Lamka, Feb. 22 *(Nisin Thuhiltu)* : All Tribal Women Union (ATWU) GHQ pawl in Jehovah Jire home, Beaulahlane ah Nianglian, President, ATWU mapuina Delhi ah Joint Secretary, Govt. of India; Union Home Minister Rajnath Singh banah UPF leh KNO political talks interlocutor kimupi ah chiate vaidawnna a nei ui. Zia hun a chun, Nianglian in report piakna a nei hi. Nianglian in a genna a chun, tribal movement kipatnung ah salphate vuidaw ah umta himaleu, demand mu a hi nailo ziak ah ATWU in movement chawlsanlo ah gam leh nam a ding a hi nak leh min siat ding le khawsalo khawp ah pauchapna tawh kalsuan zing a hidan uh genkawm in, Feb. 9 nitak lam dak 4:00 vel ah New Delhi tung a hidan uh a gen a, Delhi a tun uh tawh kitawn ah D Raja, MP mang ah Union Home Minister kimupina ding ah line hawl maleu kimupi ziang theilo ah um, Parliament suty laitak a hi ziak ah line mu haksa mama in a gen hi. Feb. 12 nitak lam dak 5:00 ah Jitendra Kumar Sinha, Joint secretary for North East, Govt. of India kimupi thei ah Manipur ah thingtangmi meithal chawi Suspension of Operation (SoO) suaikai-te tawh government in political talks a nei theina chung ah kipakthu vagen uh hin a gen a, solution solution a um paitheina ding ah panla ding ah chialna le bawl un a gen hi. Zia hun a chu Joint Secretary in Manipur phaizang bial in a buaipi mama uh Inner Line Permit (ILP) chungchang cancel ah um a hidan hiatsakna a la nei in a gen a, Joint Secretary for North East a kimupi nung ua Raja, MP panlakna zal ah Feb. 14 sunnung dak 1:00 ah Union Home Minister Rajnath Singh tawh le kimutua ah minute 20 sung holimna neikhawm uh hin a gen hi. Union Home Minister a kimupi hun ua ATWU palai te’n sulpha-te vuiliam ah a um nung ah political dialogue pan theita leh interlocutor tiang guat piak a hitakna chung ah kipakthu genna neikawm ah Paite puandum silsakna nei un a gen a, zia hun a chu Manipur ah thingtang mite te’n MLA 20 nei, phaizang mite’n MLA 40 nei a hina chung ah thingtang mite minority hizing a hidan tangko kawm ah thingtang mite ding ah solution khat a um theina ding ah panlakna nei ding ah Union Home Minister chialna bawl un a gen hi. Feb. 15, 2018 sun dak 12:00 ah UPF leh KNO tawh Central govt. in political dialogue a neina interlocutor Dineshwar Sharma kimupi ah thingtangmi te suakchat theina ding ah kihona a pat a vaima theilam ah solution umtheina ding ngaitua ding ah chialna bawl un a gen hi.

YVA GHQ President leh Vice -President in kitiamna nei

Lamka, Feb. 22 *(Nisin Thuhiltu)* : Young Vaiphei Association (YVA) General Headquarters in Bethel Veng ah VPC Complex in tuni'n General Assembly-2018 a nei hi. Zia hun a chun, kum 2018-21 sung ah YVA GHQ President leh Vice -President ding te kitiamna neisak in a um a, Unit leh Block chuamchuam ah lawiupa ten hun matna a uap ui. Zia hun matna chu Upa Lalkithang, Organizing Secretary, YVA GHQ in amapui a, D. David, General Secretary, YVA GHQ in term khat sung ah YVA panlakna tawh kisai ah report piakna nei in, Khatkhotong Baite, President, VPC/GHQ in YVA Dabu kisiam thak hawnna a nei hi. Danbu kihawng thak chu Rev. Lamkhogin Khaute in pauchapna tawh a latna a nei a, Election Commissioner Kap Banyan in kum 2018-21 sung ah vaipaw thak ding te puandawna leh election commission tawh kisai taklatna a nei hi. Aman a genna a chun, election notification suadaw nung ah President leh Vice President ding ah nomination file Vungminthang s/o (late) Tongkhawzam of Rengkai leh Vice President H. Sangpi s/o Th. Kappu of Compound Veng. D. Phailian ti telo midang nomination file umlo a hina chung ah amau teni chu President leh Vice President ding ah teltin ah puan ah um a hidan uh a gen hi. Chun, Election Commission Joel Phaltual mapuina’ kum 2018-2021 term sung ah YVA/GHQ President leh Vice President ding ah teltin ah um mi 2 te kitiam sakna a um a, Khatkhotong Baite, President VPC in kitiamsakna a nei hi. Kitiam sakna neizaw in Rev. Siama Phaltual, Executive Secretary, Tuithaphai KSP in pauchap piakna a nei hi.YVA lawiupa ding ah teltin thak President leh Vice President in ni 15 sung ah cabinet a form ding ua pawimaw a hidan election commission in hiatsakna a bawl bawk hi. Hiatthei khat chu, YVA GHQ ding ah a chutu umlo ah teltin ah um President Vungminthang leh Vice President H. Sangpi te chu tu leh tu President leh Vice President tu zing lai le a hiu a, tu ah term thak chu a term 2 na ding uh hita a hi.

Khatkhotong Baite in a thugenna a chun, President leh Vice President ding ah mi 2 te election commission in un-contest ah a puan theina ziak chu mipi te dawisakna leh muan-ngamna chang zawm nalai a hidan uh a kilatna a hidan gen in, lawiupa khat I hi tak leh bawl nuam tamtak um sek maleh mipi lam a pat pressure a tam ziak ah ut zosia bawl ziang thei hilo a hidan a gen hi. Nam dam theina ding leh khanto theina ding ah thupukna siam pawimaw a hidan le gen in, leader kiti mipi lam a pat le hawmthawna um ngei ding himaleh society masawnna ding ah mipi lam a pat leader te tawsawt leh zathuap pawimaw in a gen hi. VPC a ding ahYVA & Zillai kiti chu frontal khat a hidan le gen in, VPC sung a hat theina ding ah pawl 3 ten kituaktak ah kal a suankhawm uh pawimaw in a gen hi.

Dr. Hauminthang Vaiphei, President, Zillai GHQ in a thugenna a chun, YVA kiti phatchuam ngai ah panla zingtu a hina chung ah a haksa leh genthei liangvai te kankhawmtu a hina chung ua khangthak ten zathuap pawimaw in a gen hi. Chuleh, Nampi in maban ding gelna plan leh policy chuamchuam a nei te zui thei ding ah mipi’n lunggel leh ngaituana nei ding pawimaw in le a gen hi.

District Project Director, NERCORMP ti hizaw ta ding

Lamka, Feb. 22 *(Nisin Thuhiltu)* : North Eastern Council (NEC) Secretary & NERCORMP Board Chairman, Ram Muivah, IAS mapui Board Meeting in approved a bawl dungzui ah Dr. S. Chaudhari, Managing Director, NERCORMP in 19th Feb 2018 ah Order a suana a chun NERCORMP Project Manager kiti sek chu District Project Director ti ah then (re-designated) a hidan taklang kawm in post min then a hi dungzui ah terms of reference, pay, allowances etc te le zia order suani a pat a chu lemsakna thak approved kibawl dungzui ah chiapi hingal ding hin a gen hi.
Zia chu tawh kitawn ah NERCORMP Churachandpur Project Manager D Khuala Vaiphei le District Project Director ti ah a designation/post kisang in, District Project Director ti hizawta ding a hi.
Vak hiatthei khat chu, NERCORMP phase 1&2 ahileh Govt of India leh International Fund for Agriculture Development ( IFAD) joint Project 1999 ah kipan a la hia, IFAD in khawvel pumpi project a implement na lak ah NERCORMP in Best Completion certificate dawng in, Dec 6. 2017 a khan New Delhi ah Mr Gilbert F Houngbo, President, International Fund for Agriculture Development ( IFAD) in certificate piak dawna a nei hi. NECORMP phase 3 ahileh Govt of India, Ministry of DoNER, NEC Flagship project liau liau a hi.

Measles-Rubella Campaign bawlna ding ah Training zothiang

Lamka, Feb. 22 *(Nisin Thuhiltu)* : District Family Welfare Officer (DFWO), Churachandpur saina CMO Mini Conference Hall, CMO Complex ah Measles-Rubella Campaigntawh kisai ah Training um chu chiatha zing chu tuni’n a zo ui. Tuni’n training a chun, GNM Training School, Bethesda College of Nursing a pat nursing student ban ah Sielmat Christian Hospital leh Nazareth Nursing Home a pat nurse-te a pang ua, Dr. Jamthianlal, DFWO Churachandpur leh Ven Langel, District Cold-Chain Manager te’n ziltilna a nei ui. Measles-Rubella Campaign tawh kisai ah Training ahileh February 13, 2018 a pat CMO Mini Conference Hall, CMO Complex ah ni 9 sung nei ah um a hia, training hun sung in WHO leh UNDP team, Dr. Robert Zou leh Seiboi Mate, Dr. Steve Minlun, Dr. Jamthianlal, DFWO Churachandpur leh Ven Langel, District Cold-Chain Manager te’n ziltilna a nei ui. Measles Rubella Vaccination Campaign ahileh March 28, 2018 takleh kipan ding, campaign hun sung ah district sung a naupang tha 9 a pat kum 15 kikal mi te Measles Rubella dalna damdawi dawnsak hiding a hiu.

Lamp Lighting Ceremony 2018 nei ding
Lamka, Feb. 22 *(Nisin Thuhiltu)* : Muolvaiphei ah um Bethesda College of Nursing Muolvaiphei rural health and research centre in February 28, 2018 sunma dak 11:00 leh amau college huangsung ah Lamp Lighting Ceremony 2018 nei ding a hi. Zia hun chu Professor Th Ratan Kumar Singh, Director, College development council Manipur university in chief guest hina tawh uap ding, Miss Deborah leh Miss Hoihkim Tutor ten hun matna mapui ding, Miss Lalnunmawi Hmar, Principal BSN in vaidawn thugenna nei ding a hi. Chun, Miss Elfleda lallienhnem lecturer, BCN in code of ethics hun mapui ah Chief Guest Professor Th Ratan Kumar Singh, Director, College Development Council Manipur University in lamp lighting nei ding, Principal Bethesda college of nursing in oath taking hun mapui ding leh Rev JL Songte Executive Secretary Independent Church of India in pauchap piakna nei ding a hi. Hun mat sung ah GNM student ten traditional show le nei ding a hiu a, chief gest a pat thugenna um in, hun tawp ah Dr HL Liensang, Chairman, MRH & RC in kipakthu genna nei ding leh Rev Lalneikhup Hmar Secretary, Tuithaphai Presbytery in pauchapna tawh hun khak ding a hi.

Kuki Nam Toana um ding
Lamka, Feb. 22 *(Nisin Thuhiltu)* : Kuki Nampi Taona Committee saina’ Myanmar gamsung Phailen khua ah Feb. 28 March 3, 2018 sung ah 55th Kuki Nampi Taona um ding a hi. Zia hun a chu speaker ah Bishop Paothang Haokip, Good Shepherd Church India leh Rev. Dr. Jamkhopao Haokip, Former General Secy., Myanmar Baptist Convention te pang ding a hiu a, Feb 28, 2018 zingkal dak 7:00 ah Imphal MST Parking/Office Moirangkhom a pat zia pauchapkhawmna pang ding te chun Moreh zuan ding, TBA Church Compound ah kingakkhawm ah Myanmar zuan ding uh hi’n a kigen hi.

Trial selection ah mi 18 teldawk
Lamka, Feb. 22 *(Nisin Thuhiltu)* : Khuman Lampak Stadium, Imphal ah All Manipur Football Association (AMFA) saina’ March 1, 2018 a kipat kum 17 nuailamte a ding ah 7th Kanglei Mega Sports Meet 2018 umna ding tawh kisai in, District ai-awh ah pang ding player hawlna dan in, tuzingkal in Lamka Football Ground ah CDSA saina’ trial selection a um hi. Trial selection a chun, kum 17 nuailam pawsal 51 a pang ua, zia lak a chun, mi 18 teldaw in a um hi. Teldaw ah um te chu CDSA in a hiatpi club khat ah registered bawlte ngawn a hiu a, Jan. 2001 leh 2002 Dec. kikal a piangte le a hiu ah hiat a hi.

Computer Training Centre hawng ding
Lamka, Feb. 22 *(Nisin Thuhiltu)* : District Co-operative Office Complex, CCpur ah Feb. 23, 2018 sun dak 12:00 ah Central Co-operative Management Computer Training Centre, CCpur Branch kiti hawndawna um ding a hi. Computer training Centre chu Khaipao Haokip, Chairman, ADC/CCpur in Chief Guest hina tawh hawng ding a hia, L. Tombipishak, President, MSCU; Jeena Potsangbam; Hemanta, Co-operative Member; L Basanta Sharma, Co-operative Member; Paolal Haokip, MDC leh Jangkhongam Haokip, Vice President MSCU (Hills) ten Functional President, Chief Host, Guest of Honour hina tawh uap ding a hiu. Zia Training centre chu a hawnna nei hun ah Rev. L. Khupboi Vaiphei in Pathian kiang ah a latna nei ding a hi.

Air India in April 2018 ah Delhi-Imphal Direct Flight panta ding: CM

Imphal, Feb. 22 *(Nisin Thuhiltu)* : Ministry of Commerce and Industry, Government of India, International of Chamber for Service Industry leh Manipur Infrastructure Development Agency (MIDA) organised bawlna tuni’n Classic Grande, Imphal ah Tapping Potential of Services Sector Catering to Domestic and International Demands” ti thupi ah nei in, 3rd International Convention of Service Industry NER(I)-ASEAN FOCUS CLMV (Cambodia, Laos, Myanmar, Vietnam) a um hi. Zia hun chu Chief Guest hina tawh Chief Minister N. Biren Singh in a uap a, ama’n a thugenna a chun, Air India in April, 2018 hapta masa (1st week) a pat Delhi – Imphal direct fligh service panta ding ah Ministry of Civil Aviation in State Government thutiam a hidan a gen hi.

State government in tourist te etla thei ding ah state sung ah Resort siam ding guanggalna nei a hidan taklang in, zia Resort siamna ding a chu Tengnoupal area, Imphal-Moreh road ah government in gam 100 acres lak ding lemsakna nei in a gen a, Indo-Myanmar border ah culvert lian taktak mun 39 ah siamna ding Prime Minister Narendra Modi in fund bithiak piak in a gen hi. Zia ah culvert kisiam ding te chu Chief Minister of Sagaing Region, Myanmar tawh a hawnna neikhawm ding uh hin le a gen a, Imphal/Manipur chu South East Asian country te ding ah gateway ahidan taklang kawm in, South East Asian country te kawmtuana ding ah Manipur chu a lampi suchawmtu ah pang thei hin a gen hi. Imphal ah NEDS 2017 a bawl chu Assam leh Uttar Pradesh ti ten le entawn ah Summit bawl un le a gen a, state mipi te chu state sung ah khantona leh a phalam ah kisanna a um theina ding ah ngaidan, khawheidan etc sang ding in chialna a bawl hi.

Hun matna uap, Ambassador of Union of Myanmar to India, Moe Kyan Aung in a thugenna a chun India leh Myanmar kal ah kikawmtuana hawitak a um ding, a bik tak ah air connectivity siamhawi ding, Imphal -Rangoon etc direct flight a um ding pawimaw in a gen a, trade, goods & services zalen tak ah a um thei ding pawimaw in a gen hi. Zia hun matna chu Joint Secretary, Ministry of Commerce, Government of India Sudhanshu Pandey, Additional Chief Secretary (Home) Dr. J. Suresh Babu, Director General International Chamber of Service Industry Dr. Gulshan Sharma, Vice Chairman MIDA M. Asnikumar, Head of India-SriLanka leh Nepal Fly Dubai Pran Dasan, Head of Operations Media Entertainment Industry Mohit Soni ten le a uap ui.

Ithai Barrage Gate enkawl ding Joint Commmittee kisiam: CM

Imphal, Feb. 22 *(Nisin Thuhiltu)* : A chiatha zing 11th Manipur Legislative Assembly, 4th Session ah MLA K. Ranjit Singh in dawtna a siam, House leader, Chief Minister N. Biren Singh in a dawnhuna a chun, Ithai Barrage gate hawn ah a umna tawh kisai enzui ding ah Joint Committee khat siamdawa h um in a gen a,
Water Resources Minister Letpao Haokip in National Hydroelectric Power Corporation (NHPC) nuai ah Ithai Barrage function a hina chung ah state government in Ithai Barrage chung ah guanggalna bangma siamlo in a gen hi.
Chief Minister N. Biren Singh in Governor banah Union Minister RK Singh tawh thil umdan genkhawm ah Ithai Barrage ziak ah buaina a umlona ding ah government in panla ding a hidan taklang in,Joint Committee in thil umdan enzui zing ding hin a gen hi.

MLA Kh. Joykisan Singh dawtna siam, Minister Letpao Haokip in a dawnhuna a chun, Ministry of Water Resources, Government of India kiang ah Utilization Certificate (UC) piaklut ah a umna tawh kisai a genna a chun, tu financial year ah Thoubal Multipurpose Project a ding ah AIBP Rs 39.934 crore leh Dolaithabi Barrage project a ding ah Rs 14.55 crore piaklut ah um hin a gen a, kum 20172-2018 sung ah State Finance Department in Thoubal Multipurpose Project a ding ah Project Authority khut ah Rs 39.934 crore release bawl ta a hidan gen in, Central assistance Rs 25.634 crore, State share Rs 14.300 crore hin a gen hi. Dolaithabi Barrage project a ding ah Total fund released Rs 14.55 crore hita leh
Central assistance Rs 12.11 crore leh State share Rs 2.44 crore hin a gen a, kituptak ah project sukpitinna ding leh zawthianna ding ah Ministry ahiloleh funding agency in Thoubal Multipurpose Project a ding ah Rs 111.073 crore leh Dolaithabi Barrage project a ding ah Rs 13.81 crore a piakbe ding pawimaw in a gen hi.

MLA K. Ranjit Singh dawtna siam, Water Resources Minister Letpao Haokip a dawnhu kitna a chun, Chingkhei Ching water treatment plant chu December 2018 ah hawn hiding a hidan gen in, Thoubal Dam in Chingkhei Ching water treatment plant chu tui supply bawl ding hin a gen hi. Chingkhei Ching water treatment plant a ding ah Thoubal Dam in ni khat sung ah 10 MGD/45MLD tui a supply pawimaw ding hin a gen hi.

MLA Surjakumar Okram in dawtna a siam, Labour and Employment Minister Th. Radheshyam in a dawnhuna a chun, Pradhan Mantri Kaushal Vikas Yojana (PMKVY), 6,070 job roll wise target a hi dungzui ah first batch te ding ah National Skill Development Corporation (NSDC) leh Sector Skill Councils (SSCs) tawh formality sukfel a hitak leh training kipan ding a hidan gen in, total budget provision Rs 50 crore lak ah Centre in flagship scheme PMKVY a ding ah Rs 25 crore release bawlta a hidan gen in, zia nuai a chu kum 2020 tiang ah mi 32,000 te training piak hiding in a gen hi.

Zero hour hun ah MLA N. Loken Singh in Bishnupur ah CAF&PD inspector khat kilawmlo tak ah kibawl ah local newspaper ten a suklatnau tawh kisai ah House leader in kilawmlo tak ah gamta te chung ah action lak ding phutna a nei hi. MLA Kh. Joykisan Singh in CAF&PD Minister Karam Shyam chu tunung ah thil dawi umlo a tunlona ding ah a kintheilam ah panlakna a nei ding phutna a bawl hi.

MLA Kh. Joykisan Singh in dawtna a siam, Chief Minister N. Biren Singh in a dawnhuna a chun, Jiribam-Tupul-Imphal railway project chiapina chung ah compensation a hiding guallo tak ah piak ah a umna tawh kisai chu Government in khualna nei zing in a gen a, 27th February, 2018 leh thuchian kilang ding hin a gen hi.

Mapithel Dam mat pat masang ah economic package piak ding phutna nei

Imphal, Feb. 22 *(Nisin Thuhiltu)* : Mapithel Dam downstream affected villagers of Tumukhong Moirangpurel area in tuni’n Tumukhong Moirangpurel village community hall in meeting a nei ua, Chingakham Ibemhal in a haksatnau tawh kisai a genna a chun, dam area ah lampi hawilo, chief minister in a khuau vena neita himaleh bangma panlakna um chuamlo, area mipi te ngainep ah um hin a gen hi. Government masa leh tu government chu a kibang (same) hin a gen a, Dam area mipi te haksatna ngaikhawk umlo uh hin a gen hi. Mapithel Dam downstream affected village - Tumukhong, Itham, Moirangpurel, Laikhong, Nongpok Keithelmanbi, Nungbrang, Leirongthel etc ten Dam function sak a hi masang ah state government in affected villager te kihinsua theina ding ah special package piakdaw pawimaw in a gen hi.