Zomi Nam Ni 2018 matna ding tawh kisai ah panlakna enthak
Lamka, Feb. 18 *(Nisin Thuhiltu)* : “Convergence” ti thupi mang ah, a 70-veina Zomi Nam Ni 2018, Lamka Public Ground ah matna ding tawh kisai ah Organizing Committee mapuina in tuni’n nitak lam dak 2:00 in PTC GHQ Conference Hall, Hiangtam Lamka ah meeting a um hi. Meeting hun in Khatkhotong Baite, Chairman, Organizing Committee in mapui in, Organizing Committee leh Sub-Committee ban ah Zomi Council nuai a kikhaikhawm Tribe chuamchuam ah President leh Secretary tele a pang ui. Zomi Nam Ni lawtinna ding ah ngaidan chuamchuam genkhawmna hun bangchan hem matzaw in, Zomi Council Chairman, Vice Chairman leh Organizing Committee ah Chairman te’n Press/Media briefing a bawl ui. Zia hun achun Dongzalian, Chairman, Zomi Council in Organizing Committee Chairman ah guat a um, Khatkhotong Baite in guat ahi dungzui ah a sepkhawmpi ding bawl in, pan nasatak ah la in, Zomi Nam Ni Football Tournament chanpha ah Sub-Committee a bawlte ziak ah lawting tak ah zaw ahitak ziak in a chung ah kipakthu a gen a, Tournament lawtinna ding ah a uaptu mite chung inle kipakthu gen in, maban ah Nam Ni matna le uapto zel di’n chialna a bawl hi. Khatkhotong Baite, Chairman, Organizing Committee in Pathian lopina ding ah mizosia’n Zomi Nam Ni matna thuanuam tak ah uap chiat di’n chialna a bawl a, Organizing Committee ah a sepkhawmpi leh Sub-Committee ah member-te kipiakzawna chung ah kipakthu gen in, frontal organisation cheng inle uap chiat di’n chialna a bawl hi. L. Pumlianpau, President, PTC GHQ inle Organizing Committee-te kipiakzawna chung ah kipakthu gen in, mizosia’n hun matna uapchiat di’n chialna a bawl hi. S. Jamkhanpau, President, TCU GHQ in Khawvel pumpi ah Zomite umna zosia ah February 20, 2018 ni ah Zomi Nam Ni kimang ding ahi’dan gen in, lawting tak ah I nam chawisangna ding ah a tam theipen pang ding in chialna a bawl hi. Chun, kisaklawkna zawthian phial hita ahi’dan organizing committee apat hiat ahi.
Tata Sumo in mi umkha phukha; mi 5 liam
Lamka, Feb.18 *(Nisin Thuhiltu)* : Koite khawsak ah um K. Salemphai khua ah tuzingkal dak 11:00 vel in Tata Sumo Regt. No. MN 03P/2151 in chenna inn khat a phukha, inn sung ah um mi 5 ten liamna a tuak ui. Liamna tuak mi 5 te lak ah mi 2 te chu serious in a kigen a, gari ahileh K. Salemphai khawte a ma a hi. Lamka leh Mizoram kikal service hi’n le a kigen hi.
Gari in a phut ziak a liamna tuakte chu - Thongkholal (58) h/o Deikholhing of Mongbung,CCpur tulel a K. Salemphai khua a teng hi a, Geby Hatneithiang (2) d/o Seiminlal Haokip of K. Salemphai; Lhingkhohoi (38) w/o Robert Gangte, Robert Gangte (48) h/o Lhingkhohoi of K. Salemphai leh Paokholet Haokip (50) h/o Nemjalhai of Mongkot Village te a hiu a, Geby Hatneithiang chu khua helo ah a um ziak ah Imphal ah puak ah um, a dang te district hospital ah admit in a um ui.
Hospital ah admit-te lak ah Tongkholal chu a changlam khutban leh nakgu (ribs) 3 tan hi’n doctor te’n a gen ui. Gari hektu ahileh zu gin-nam hi’n a gen ua, zia inn phutkhak ah um neitu chu Robert Gangte-te a hia, varanda a carom kihelte a phut theng a hi.
EOC Annual Council 2017-2018 zothiang
Lamka, Feb. 18 *(Nisin Thuhiltu)* : Evangelical Organization Church(EOC), ECCI in EOC Lingsiphai Biak-In ah, a 66-veina Annual Council 2017-2018 hun matna tuni’n a zothiang ui. Sûn Biakna kikhawpna ah Ordination leh Pension kipakpina thilpiak piakna hun a mang ua, Rev. Lamkhogin Khaute, Moderator in Pathian thugenna a nei hi. Kochuam upa ding ah ordained ah umte ahiu leh; Pauzagen of Suangpha, Paokholun of Suangpha leh Pauthianlal of K. Tonglon ahiu a, Rev. Lamkhogin Khaute in ordination a chansak hi.
Rev. Harry Muanlal, Executive Director in pension hina changtu, kochuam upa ettawntâk Upa Luttinthang of Pengjang leh a zi kiang ah puan silsakna leh kipakna thilpiak piakna a nei a, Rev. Lamkhogin Khaute, Moderator in Pathian kiang ah pauchappiakna a nei hi. Khawmpi ahileh February 16, 2018 nitak kikhawpna ah Rev. Dr. S. Lalpi Vaiphei, Executive Chairman in hawndawna a nei ahia, Khawmpi hun sung in Council Member te’n vaihawmna nei in, thupukna chuamchuam namdetna a nei ua, Lamkhogin Khaute chu Moderator thak ding ah telting in, kum 2018-19 budget ding in Rs. 3,44,77,369 (Three Core Forty-Four Lakhs Seventy-Seven Thousand Three Hundred and Sixty Nine) a bithiat ui.
EOC, ECCI ahileh Pastor Bial 5 in a kikhen a; K. Tonglon Pastor Bial, Imphal Pastor Bial, Lamka Nuai Pastor Bial, Lamka Chung Pastor Bial leh Jiribam Pastor Bial ahi.
KZP GHQ in exam dingte tîlkhona leh pauchappiakna nei
Lamka, Feb. 18 *(Nisin Thuhiltu)* : Khanthah Zuun Pawl (Simte Students’ Organization) General Headquarters in tuni nitaklam dak 1:30 in Simte Inn, Simveng ah zillai Class X leh Class XII exam dingte tîlkhona leh pauchappiakna a nei ui. Zia hun achun, T. Thangliansiam, MSS, Under Secretary (Works) Government of Manipur; Ginlianlal Buhril, Senior Professor, Director Corporate Governance, Universal Business School, Raigad, Maharastra; L. Kamchinhau, Assistant Professor (Economics); Dr. Esther Lalremkim, Assistant Professor (Anthropology) leh S. Thongchinthang Ngaihte, Junior First Officer, Indigo Airline apat thugenna a um a, Evan. Lunminthang Simte in tîlkhona leh pauchappiakna a nei hi. Lasak thiam Fiona Nemmuanching, Esther Thangsing, Sonkim leh lasak thiam chuamchuam in lasakna nei in, Th. Jamchinthang, MDC Thanlon leh Simte Nam sung a mi pawimaw chuamchuam ban ah exam dingte nu-le-pate tamtak in a uap ui.
Khamthei leh a zuaktu man
Lamka, Feb. 18 *(Nisin Thuhiltu)* : District Police nuai a Night Duty Officer (NDO) pani leh a team te’n thugûk a mu dungzui un, zani nitak lam in Zou Veng ah mi In khat ah khamthei zuaktu, Thanglenmang (24) S/o Kampu of Hmar Veng leh a panpitu mi pathum ban ah khamthei bangzat hem a mandawk ui. NDO team-te ahiu leh, T. Seikholal, SI leh Hauginlian Tonsing, SI mapuina nuai ah ahi. Khamthei kimandawkte ahi leh, Spasmo Proxivon(SP) chang 81, The World is Yours(WY) bangzat hem tawh Salkol damdawi chang 249 ahi. Mat ah umte ahiu leh police khut in a um nalai ui.
Handloom Mela um ding
Lamka, Feb.18 *(Nisin Thuhiltu)* : Autonomous District Council, CCpur saina’ Feb. 21-24,2018 kikal ah Hiangtam Lamka ah YPA GHQ hall ah Handloom MELA um ding a hi. Handloom MELA ahileh tualsung mite khutsuak puan ga-thawh chi chuamchuam promote-na ding hin a kigen hi. MELA ah Siamgaan, Society, Self Help Group leh Entrepreneur tamtak in a khutsuak uh puan suklatna nei ding a hiu a, Societies/ Self-Help Groups, Entrepreneur leh mipi lunglutna nei kua hitaleh panthei hiding in ADC/CCpur in hiatsakna leh chialna a bawl hi. Handloom MELA ahileh zingkal lam dak 10:00 ah kipan ding nitak lam dak 4:30 tiang ah um sek ding a hi.
Medical canteen siamhawithak
Lamka, Feb.18 *(Nisin Thuhiltu)* : Dist. Hospital huangsung ah um Medical canteen siamhawi thakna nasep chiatha zing in nasem te’n atamzaw zo ta uh hin a kigen hi. Medical Canteen ahileh Governing Body, Rogy Kalyan Samiti in Oct. 25 & 26, 2017 ah DC/CCpur tawh meeting a nei hun ua lemsakna a nei uh tawh kitawn ah siamhawi thak ah um a hi. Canteen kekletna ding a chun, district hospital ah thuneitute'n chek pia’n Medical canteen enkawltu ten amau sum kisen ah a siam uh a hi. Zaw thian a hitak leh table 10 tiang kawi hiding, canteen kekletna nasep chiatha zing himaelh staff te’n a nasep ngai uh sem zing un, Canteen Manager in a gen hi.
JAA in La zilkhawm
Lamka, Feb.18 *(Nisin Thuhiltu)* : Joint Artist Association (JAA) in Feb. 2018 ah 70 veina Zomi Nam Ni mat hun ah a lasak ding uh tuni’n Hiangtam Lamka, YPA GHQ hall in a zilkhawm ui. JAA in Nam Ni mat hun ah laa a sak ding uh, tuni ah a zilkhawmteu chu Gospel leh Gam ngaila kigawm 13 - Hungro Hungro (Mizo Gospel Song), Lam dil del, Eiram leh Ei Hnam, Ei leh Ei, Leng dialdial ni, Thinglhang gam, Zogam aw, Insuihkhawm, Kut za la, Malai ipi le Pu te, I Gam lei hawng pal ding, Na Na Na (Zogal Lapi) leh Tunsung khat pan ti te a hi.
ZNN Welcome Gate phusia taisan
Lamka, Feb.18 *(Nisin Thuhiltu)* : Zomi Youth Association (ZYA) leh Village Authority, Mata kithua ah Zomi Nam Ni 70 veina matna ding tawh kisai ah Feb. 8, 2018 ni, Mata khawlai ah ZNN Welcome Gate a tundaw uh chu zan nitak dak 10:30 vel ah Car hattak ah tai ten, Lamlian thanglam ah gate kitung pen chu phusia’n a taisan ui. A kiangnai ah um te gendan in Gari in Welcome Gate a phut zaw ah Lamka lam zuan a taisuak uh hi’n a gen ua, gari number tepte manlo himaleu a rong (colour) silver hin a gen ui. Thiltung tawh kisai a chun, ZYA leh Village Authority, Mata in lung awilothu a taklang hi.
Songtal khua ah Zomi Nam Ni kimang ding
Lamka, Feb.18 *(Nisin Thuhiltu)* : Guite kual ah um Songtal khua ah Feb. 20, 2018 leh Zomi Nam Ni a 70vei tin lawpna um ding a hi. Zia hun chu Chief Guest hina tawh Lalhrilien, Ex-EM, ADC/CCpur in uap ding a hia, Guest of Honour ah G. Suanchinpau, MDC (Lungthul) pang ding a hi. Chun, Functional President hina tawh T. Khaikhomang, MDC (Lanva) pang ding, Chief Host ah Th. Jamchinthang, MDC (Thanlon) pang ding a hi. Hun mat sung in Commanding Officer Mount Sinai mapuina’ famta salphate’ sunna hun nei ding a hiu a, area mipite’n zia hun chu uap chiat ding in organizing committee in chialna a bawl hi.
Numei te thuneina zabawl piak pawimaw: Governor
Imphal, Feb. 18 *(Nisin Thuhiltu)* : Raj Durbar Hall, Raj Bhavan, Imphal ah tuni’n “Prize Distribution Ceremony’ of the Nationwide competition on Legal Rights of Wome” kiti a um a, Chief Guest hina tawh Governor Dr. Najma Heptula in hun matna uap in, Prize piakdawna a nei hi. Governor Dr. Najma Heptula in a thugenna a chun, India gamsung mun chuamchuam tawh tekak ah Manipur ah numei ten mun leh zabawlna sang mama a hidan gen in, gamsung mipi zosia’n numei te thuneina humbit theina ding ah panlak chiat a nawp thu a gen hi. Kilawm lo tak ah numei chung ah gamtatna, ki pawngsualna etc um te nasatak ah demna bawl ding, India ah numei te ding ah Constitutional Rights leh Legal Rights um in a gen hi. Zia ah hun matna chu Education Minister, Th. Radheshyam Singh; Chairperson, Manipur State Commission for Women (MSCW), Dr. K. Sobita Devi; MSCW’s Members, Dr. farida Shah lehRanjita Golmei ten le a uap ui.
Kangpokpi ah inn khat mei in kangtum
Kangpokpi, Feb. 18 *(Nisin Thuhiltu)* : Kangpokpi DHQ, National Highway-2 thang, Ward No. 1 ah tuni’n inn sawng 2 ah kisa, semi pucca building khat mei in a kangtum hi. Zia ah inn kang chu room 4, inn bahara min a lua, a neitu ahileh Lunneo Haokip, s/o of Somang Haokip of Sapormeina a hi. Innlua tute a hiuleh Juginder Das, Brajesh Das, Arjun leh Rajender te a hiu a, mei kang chu hat mama himaleh mihing a kat khak umlo in furniture, nik leh puan, sum leh van chuamchuam hun tiang a kangtum hi. Kangpokpi Fire Sub Station ah fire personnel te panlakna ziak ah inn kang tawh kinaicha um, Tinkholhing leh Ishmael Panmei te le kangtum thei ding hin a kigen hi. A langkhatlam ah Tinkholhing inn bâng them khat a kang man a, Ishmael Panmei inn kiang ah Syntex 2- 1000ltrs leh 500ltrs te a kangsiai. A langkhatlam ah zia thu zik a hi tiang ah mei kipatna leh inn kang in a kat siat thil te chu bangzat bei zo ahi em ti hiatchian a hi puai.
Gospel visual album hawng
Kangpokpi, Feb. 18 *(Nisin Thuhiltu)* : TBA-I Centre Church Kangpokpi ah tuni’n Gospel visual album ‘Pakai Vahchoi bou Kakipana’ kiti TBA-I Centre Church Kangpokpi, Male Voice ten a siam uh chu hawn in a um hi.Zia hun chu, Kailoulen Kipgen, Thongkhojam Khongsai leh Hethem Kipgen ten Chief Guest, Guest of Honour, Functional President hina tawh a uap ua, Chief Guest in Album hawnna nei in, Rev. K. Hangshing in Pathian kiang in album latna a nei hi.
Tripura Assembly election ah voters 78.56% ten vote khia
Agartala, Feb. 18 *(Nisin Thuhiltu)* : Assembly seat 60 umna Tripura Assembly election ah tuni’n zingkal lam dak 9:00 a pat vote khiak in a um a, zan dak 9:00 tiang ah voter 78.56 per cent ten vote a khiau. Vote kikhia chu kum 2013 election ah 91.82 per cent kikhia dawk zat tawh kikhia mama in a kilang hi. Area khenkhat ah Electronic Voting machines a kituplo ziak ah zan dak 9 tiang ah vote khiak ah um a hi.
Chief Minister Manik Sarkar mapui CPM in term masa seat 50 a lua a hia, tu chung election ah gualzawna a chan kit ua leh term 6 a kizawm ah CPM in Tripura ah vaihawmta ding a hi. BJP ahileh Indigenous People's Front of Tripura (IPFT) tawh pangkhawm ah Chief Minister Manik Sarkar vaihawmna sukbeina ding ah panlakna nei a hia, seat bangzat a chang zo diam ti chu result suak hun ah kichian mai ding a hi. Tripura chief electoral officer Sriram Taranikanti in a genna a chun, constituency khenkhat ah Electronic Voting Machines leh Voter-Verifiable Paper Audit Trail machines te mattheilo ah a um ziak ah ballot units 97 te a thak tawh kisai a hidan gen in, numei 23 te panna candidate 292 um in a gen hi. Tuchung election ah Congress chu party dang tawh pangkhawmlo in, election contest a bawl a, seat 57 ah candidate a kawi hi. Congress ahileh election masa seat 10 a la lua a hi. Chun, ruling CPM in seats 57 in candidate a kawi a, seat 1 chiat chu a pankhawmpi party dang te ding in a kawi khek hi. BJP in ahileh seat 51 in contest a bawl a, seat 9 chu Indigenous People's Front of Tripura (IPFT) ding in a kawi hi. A langkhatlam ah Charilam constituency ah election chu CPM candidate Ramendra Narayan Debbarma thi ziak in March 12 a ding ah a hun vawkchawn in a um hi. Hiatthei khat chu, February 27, 2018 ah Meghalaya leh Nagaland in le Assembly election nei ding a hia, March 3 leh Tripura Assembly election tawh thakhat ah result puankhawm hiding a hi.