Minister Letpao Haokip in Union Minister Nitin Gadkari tawh Water Resources Ministers te meeting uap

New Delhi, Feb.15 *(Nisin Thuhiltu)* : State Water Resource Minister Letpao Haokip in tuni’n Transport Bhawan, New Delhi ah State 7 ah Water Resources Ministers te leh Union Minister Nitin Gadkari meeing a nei hun a uap a, ama’n a thugenna a chun, Manipur Government in priority project 99 a neite lak ah PMKSY nuai ah project pawimaw mama pani - Thoubal Multipurpoise Prokject leh Dolaithabi Barrage Project chiapi a hidan taklang kawm ah Thoubal Multipurpose Projet dinmun a genna a chun, barrage mun te siamzaw hitaleh1991 ah kimangpan hita hin a gen a, Spillway leh Dam mun te le siamzaw hitaa hina chung ah canal system leh water transmission system te advance stage ah um in a gen hi. Ministry ah Accelerated Irrigation Benefit Programme (AIBP) nuai ah Rs. 74.366 crore sanctioned bawlna ding ah proposal piaklut ah um himaleh project Revised Estimate dungzui ah Rs. 113.425 crore - Rs.256.925 crore tung a hidan gen in Rs.143.50 crore kibelap in a gen a, BE state ah State matching share Rs.13.425 crore chu RE state ah Rs. 14.305 crore tung, zia chu State government in release a bawlta a hidan a taklang hi. Ministry ah central share, Revised AIBP Rs. 100.00 crore release bawlna ding ah proposal piak ah um chu single instalment ah release bawl ding in Union Minister kiang in dawtna a siam a, Government of India in Fast Track Performa Clearance nuai ah 6th Revised Estimate, AIBP component Rs. 1726.79 crore le approved bawl in a gen hi. Project dungzui ah AIBP component chu5th Revised approved cost a pat Rs. 277.35 crore ah ki belap a hidan taklang in, Union Minister of Water Resources chu special case ah AIBP component a ding one time assistance Rs. 277.35 crore peding in a chial bawk hi. Dolaithabi Barrage Project tawh kisai a genna a chun, barrage mun te siamzaw hita, State government in central share Rs. 13.81 crore release bawlna ding ah AIBP proposal pelutta a hidan taklang in, hun tiam sung ah project sukpitin ding a siatna umlo in a gen hi.

Longmai ah Lui-Ngai-Ni festival kimang

Imphal, Feb. 15 *(Nisin Thuhiltu)* : Longmai Common Ground, Tamenglong district ah tuni’n Lui-Ngai-Ni (Naga Seed Sowing Festival)- 2018 a kipan a, zia hun chu L. Dikho, Minister of Printing, Stationery & PHED, Samuel Jendai Kamei leh Leshiyo Keishing ten khuallian hina tawh a uap ui. L. Dikho in a thugenna a chun, pu leh pa te culture chu siamthak leh etthak ding pawimaw a hidan gen in, community chuamchuam te kituaktak ah khawsak khawm theina ding ah panla chiat ding in a chial hi. Lui-Ngai-Ni- 2018 matna a chun, Naga sung ah nam chuamchuam 16 ten nam lam suklatna leh folk song, dances, etc te perform a bawl ui. Longmai ah Lui-Ngai-Ni festival kimang chu 16th Feb. ah khak hiding a hi. A langkhatlam ah Lui-Ngai-Ni festival a hi tawh kitawn ah State Holiday a hi ziak in government office, Institutions leh Bank te tuni’n a kikhak hi.

Film Forum in kiphinna pan ding ah vau
Imphal, Feb. 15 *(Nisin Thuhiltu)* : Film Forum, Manipur in Manipur State Cine Policy, 2016 kituptak ah chiapi a hitheina ding ah panlakna leh a neilo ahileh March 11 leh kiphinna pan ding a hidan taklang in, Film and Television Institute leh teachers leh infrastructure kining ting tak tawh a function ding pawimaw in a gen hi. ManipurPress Club ah Film Forum, Manipur, Secretary Ngangbam Ghanashyam Singh in thuthak lakhawm mite kiang ah a genna a chun, Manipur State Cine Policy chu government lui in approve a bawl himaleh tu ah government thak in August 28, 2017 ah policy approve kibawlsa chu pawmlo ah taklang maleh tha 5 lam a chiatak nung ah panlakna bangma um diaklo in a gen hi. Tu ah State Assemnly budget session ah policy tawh kisai genkhak ah a umlo leh policy chiapi hilo ding a hidan kichian ding hin a gen hi.

Chief Justice in CM kimupi

Imphal, Feb. 15 *(Nisin Thuhiltu)* : Manipur High Court ah Chief Justice, Justice Abhilasha Kumari in tuni’n Manipur Chief Minister Nongthombam Biren Singh chu a office in a kimupi a, state issue chuamchuam tawh kisai in holimna a nei ui. Justice Abhilasha Kumari ahileh Feb. 9 ni ah Manipur High Court ah numei Chief Justice masapen ding ah kitiamna a la nei a hi.

Bandh bawl ding ah puang
Imphal, Feb. 15 *(Nisin Thuhiltu)* : Haopu Touthang, Spokeperson, All Manipur Hill Area DPC, Completed Re-recruitment of Police Constable, Male 2016 (K. Jayenta Batch) in thusua a bawlna a chun, kum 5 nung tiang ah government in a thutiam a sukpitinlona chung ah Feb16, 2018 zan a pat Feb 18, 2018 tiang ah Manipur Hill area ah Total shutdown bawl ding a hidan a taklang hi. Chun, zia hun sung a chu thil dawi umlo a tun a, thil suksiat a um leh government in amaw a puak ding, kiphinna limsak a hidiaklo ahileh kiphinna a khauzaw sem chiapi ding uh hin le a taklang hi.

SLS in annual meeting leh election nei

Lamka, Feb. 15 *(Nisin Thuhiltu)* : Simte Literature Society (SLS) in tuni zingkallam dak 10:30 in Simte Inn, Simveng ah General Body Annual Meeting cum Election a nei hi. Zia hun a chun, Rev. H. Thangkhanlal Hangluah, Secretary in SLS panlak dan report piakna leh H. Doukang, Auditor in audit report piakna a nei in, business session a nei ui. Business hun sung a chun, agenda chuamchuam- Membership fee, Naupang Sunday School ah mat ding lekhabu, Simte pau ah lekha zik leh lekhabu kisiam ding ti te genkhawmna a nei ui.

Business session zaw in Simte Youth Organization, General Headquarter mapuina’n election a nei ua, term khat (kum 3) sung ah Chairman ding in Langkhothang Hangnung, Simveng a chuutu umlo ah teltin in a um hi. Secretary ding ah Richard Thanglianmang, V. Munhoih leh Treasurer ding ah P. Nengkham, V. Munhoih te le chuutu umlo ah teltin in a um ua, Election Commissioner L. Dongchinthang Simte, President SYO GHQ in teltin thak ah um te kitiamna neisak in, Rev. K. Hangnung, President Baptist Partnership Ministry, NTBCA in pauchapna a nei piak hi.

MPC Sub-HQ, Zone-I lawiupa ding telna nei

Lamka, Feb. 15 *(Nisin Thuhiltu)* : Mizo People Convention (MPC) Sub-Headquarters, Zone-I, Manipur in tuni zingkallam dak 11:00 in Chiengkawnpang ah MPC, Sub-HQ, Zone-I office ah 2018-20 sung ah vaipaw ding telna a nei hi. Rev. T. Kamgin, Exe. Director, ESC in pauchapna tawh hun hawnna a nei a, Thangpau, President, MPC Sub-HQ, Zone-I in vaidawn thugenna leh presentation mapui in, vaipaw thak ding telna a nei ui. Zia hun a chun, MPC Sub-HQ, Zone-I ah term 2018-20 sung ah vaipaw ding in, President - HVL Sanga; Vice President -Thangpau leh Treasurer - K. Thangkhomang te teltin a hiu. Elder Dr. LS Gangte, Consultant, MPC Sub-HQ, Zone-I mawpuina mawpuakna kipiaktuana a nei ui. Rev. L. Sata, Local Pastor, ESC in teltin thak ah um lawiupa te pauchap piakna a nei hi. Progamme mat sung a chun, Vanlalrinliana, President, MPC Manipur; President thak HVL Sanga leh ST Solomon, Adviser, MPC Sub-HQ te'n thugenna a nei ua, Thangboi Gangte, MCS, SDO/CCpur; S. Thienlaljoy Gangte, MSC, AC to DC/CCpur leh Elder Dr. LS Gangte te chawihawina siam in, memento piakna a nei ui.

Vaphual (Hornbill) Lim kisiam hung tung

Lamka, Feb. 15 *(Nisin Thuhiltu)* : Zomi Nam Ni Organizing Committee in Lamka Public Ground ah 70veina Zomi Nam Ni mat hun a khuallian-te piak ding Nagaland ah Vaphual (Hornbill) lim a siamsak uh chu Mr. K. Vanlallian, President, ZSF/GHQ & Zomi Nam Ni Organizing Committee ah Secretary, Information & Publicity panlakna nuai in tuni'n Lamka puaktung in a um hi. Khamneithang, Secretary, Zomi Council inn ah zia lim te chu kawi in a um hi. Vaphual (Hornbill) ahileh pathum (3) siam in a um a, khat siamna Rs. 9,000 vel bei hi'n a kigen hi. Vaphual chu Zomi te’n National Bird dan ah a mat uh ti a hia, a matna ziak uh ahileh Vaphual nupa’n kihepi tak, a thi khat a um leh a thilo pen le vanlaizawl a pat lengsuk ah leitual sena kinei ah thi mai sek ti a hi ziak ah ziagual ki hepina chu Zomi te’n kihepi etsakna a mat uh hin a kigen hi.

Tipaimukh Road kisiam thak quality hawilo

Lamka, Feb. 15 *(Nisin Thuhiltu)* : Border Roads Organization (BRO) nuai ah Border Road Task Force (BRTF)’ 80-Road Construction Company (RCC), Thanlon in Nov. 6, 2017 a pat Bungmual a kipat Police Station (Zero point) kikal Tipaimukh Road (National Highway-150) a siam uh nasepna chiatha zing in Public Ground kiang tiang black-topping bawlna a zo ui.
New Lane, Bungmual ah BRTF camp kiang a pat Lamka Police Station manaw ah lampi black-topping a bawl uh a hia, nitak tak leh nasem sek a hiu.

Lampi siamna khenkhat ah Water Bound Macadam (WBM) sung masalo in lampi black-topping umsa ngansia in a chung ah 20mm a lian suang leh bitumen (alkatara) a sung ua, a chung ah suangvui tawh bitumen mahelkhawm in black-topping abawl ziak un quality hawilo tak a suak hi. Zia chu tawh kitawn in, Hiangtam Lamka hausa banah MDC Thangkhosuanmung Guite mapuina’ Hiangtam Lamka area ah mipi’n lampi kisiam chu quality a hawilo ziak in nasepna a chawlsak ui. Nasepna chawlsak ah a um nung in, BRTF official ten kihona neipi in, tunitak a pat nasep sunzawm ding in lemsakna a nei ui.

A langkhatlam ah lampi kisiamzaw nasa te et in lampi kisiam thak chu quality neilo mama ah muthei in a um hi.

Mun chuamchuam ah welcome gate tungdawk

Lamka, Feb. 15 *(Nisin Thuhiltu)* : Zomi Nam Ni Organizing Committee mapuina Feb. 20, 2018 ah Lamka Public Ground ah a 70veina Zomi Nam Ni matna ding tawh kisai in kisaklawkna a chiatha zing a, tribe body leh philanthropic organization chuamchuam in Nam Ni welcome gate mun chuamchuam in a tung dawk ui. Zia chu tawh kitawn in, Paite Tribe Council (PTC) GHQ in Central Lamka, Tedim Road in welcome gate a tungdawk ua, Young Vaiphei Association (YVA) Kangvai Unit in le Bishnupur tawh kigamgitna Kangvai bazar ah Zomi Nam Ni welcome gate a tungdawk hi.

IFCA International a pat a kizukkitna tawh kisai genkhawm
Lamka, Feb. 15 *(Nisin Thuhiltu)* : Thangkhal Bible Church (TBC) in Dec. 2017 ah IFCA International a pat kizukkik (withdraw) bawl a hidan uh leh American Baptist Association tawh kizawp matna nei ding lemsakna a neina chung in, thil umdan kanchian ding in tuni’n Dr. Langkhanthang Lianzaw chu Delhi a pat Lamka a tung hi. TBC kochuam sung ah pawl chuamchuam te Mission veng ah kimupi in thil umdan a genkhawm pi hi.
Thil umdan ahileh Dec. 29, 2017 ah Elder Nengsuanmang, Elder Kampau leh Pastor Chinminlian in IFCA International ah email mang ah TBC chu IFCA International a zawpnau a pat kizukkik (withdraw) a hidan uh leh American Baptist Association zawm ut a hidan uh hiatsakna siam uh ti a hia, himaleh Thangkhal Bible Church (TBC) sung ah IFCA um nalai ding ut leh utlo a um ziak ua New Mission Veng TBC, Lamjang TBC, Teikot TBC leh Lanva TBC te panna TBC kochuam te panna kochuam ten IFCA a zawpnau a pat a ki-draw lam uh henailo uh ti a hi.

TBC sung a buaina tawh kisai chu IFCA International in ngaikhawk ah thuchian kanzui ding ah Dr. Langkhanthang a sawl hin a kigen a, Dr Langkhanthang mudan ah a tamzaw te IFCA International um zawm naklai ding lemsa a mu dungzui ah report piakna nei ding, zia zaw tak chuleh Dr. Les Lofquist, IFCA International, Executive Director in Thangkhal Bible Church chu IFCA International ah um nalai a hidan suklatna official membership certificate piakna nei ding hin a kigen hi.

Best Scientific Paper Award mu
Lamka, Feb. 15 *(Nisin Thuhiltu)* : Scientist (Documents). Ministry of Home Affairs, Govt. of India nuai ah Central Forensic Science Laboratory ah sem Naulak Lian Paite in 'Forensic Document Science' ah Best Scientific Paper Award a sang hi. Award ahileh Union Minister Ravi Shankar Prasad, (Law, Justice & IT) leh Unioin Minister Hansraj Ahir (Home) ten Feb. 10-12, 2018 sung ah Ahmedabad ah 24th All India Forensic Science Conference hun in piakdawna a nei ui. Naulak Lian Paite ahileh Kolkata ah posting hin a kigen hi.

RDS nuai ah training zo
Lamka, Feb. 15 *(Nisin Thuhiltu)* : Rengkai Road, Zenhang Lamka a Rural Development Society (RDS) in NABARD kithuapina tawh KVK, Pearsonmun ah Feb.12-14, 2018 sung training on ‘Scientific Cultivation of Ginger & Vermi-Compost/Soil Management a bawl chu tuni’n a zo thiang hi. Training sung in Dr. R.K. Roshan, Subject Matter Specialist (SMS), Bashil leh Dr. Roma, Subject Matter Specialist (SMS), KVK, Pearsonmun te’n hiat ding ah thil chuamchuam te genlatna nei in, training ah pang te ziltilna a nei ui.

KZP /GHQ in pauchappiakna nei ding
Lamka, Feb. 15 *(Nisin Thuhiltu)* : Khangthah Zuun Pawl (KZP) General Headquarters in Feb. 18, 2018 sunnung dak 1:30 leh Simte Inn, Simveng ah Class X leh Class XII exam dingte tilkhona leh malsawm dawtpiakna nei ding a hi.

Evan Lunminthang Simte in exam dingte tilkhona leh malsawm dawt piakna nei ding a hia, KZP member lawtinna chuamchuam nei te kipakpina hun le nei ding a hiu. Kipakpi ah um ding te chu - T. Thangliansiam, MSS, Under Secretary (Works), Govt of Manipur; L. Kamchinhau, Asst. Professor (Economics); Dr. Esther Lalremkim, Asst. Professor(Anthropology) leh S. Thongchinthang Ngaihte, Jr. First Officer, Indigo Airlines te hiding a hiu a, progamme sung ah Sonkim, Fiona Nemmuanching, Esther Thangsing leh H. Lulun Simte te'n laa sakna nei ding a hiu. Zia hun chu student-te banah KZP ngaina te'n uap chiat ding in organizing committee in chialna a bawl hi.

Measles-Rubella Campaign Training sunzawm

Lamka, Feb. 15 *(Nisin Thuhiltu)* : District Family Welfare Officer (DFWO), Churachandpur in tuni, February 15, 2018 sunma dak 11:00 in CMO Mini Conference Hall, CMO Complex ah Measles-Rubella Campaign tawh kisai ah Training nei ah um chu a sunzawm hi. Training ah tuni’n Henglep, Thanlon, Sinzawl, Singngat, Behiang leh Zezaw PHC leh PHSC ah sem, Female Health Worker leh ANM te a pang ua, WHO leh UNDP a pat team te’n ziltilna nei ding uh ti himaleh a lemchanlo ziak un, Dr. Jamthianlal, DFWO Churachandpur leh Ven Langel, District Cold-Chain Manager te’n ziltilna a nei ui

Gam hallo ding ah ZRO in hiatsakna bawl
Lamka, Feb. 15 *(Nisin Thuhiltu)* : Ministry of Information and Public Relations, ZRO in thusua a bawlna a chun, huihat hun, thing leh gua keu hun a hitak tawh kitawn ah kuama’n gamhal chinglo ding in hiatsakna a bawl a, ZRO in hun sawttak a pat “Green Revolution” ti thupi nei ah thing-leh-gua gamsa leh gammang venbitna ding ah panlakna nei a hidan taklang in, Dynamo, bleaching powder leh poison chuamchuam mang ah luidung a ngamat ti te khap bikbek hizing nalai in a taklang hi. Chun, gam Niim dildial leh hing dipdip ah a um theina ding leh damtheina a hawi theina ding ah panla chiat ding ah mipi te chialna leh hiatsakna bawl in, thupiak zui chiat ding in le mipi a chial hi.

Sum thiik Rs 10 a lem hilo: LATSEA

Lamka, Feb. 15 *(Nisin Thuhiltu)* : Churachandpur District sung ah hun banghem chan sung, Rs. 10 thiik (coins) mat theilo ah a umna tawh kisai in tuni, February 15, 2018 sunma dak 11:30 in CT Lian Guite, Convener, Lamka Traders & Self-Employed Association (LATSEA) in mipi hiat ding leh zui ding in hiatsakna a bawl hi. CT Lian in Rs. 10 thiik chu Reserved Bank of India (RBI) in chi chuamchuam 14 a siamdaw a hidan taklang in Economy, Culture tawh kituak ah mun chuamchuam hawmdawk in a gen a, eilak ah a umsa te tawh a tung thak te a kibatlona tiang um himahleh, RBI in a siam vek a hina chung ah a lem (fake) umlo, matthei hivek in a gen hi. Zialo a chu, RBI in January 17, 2018 ni ah hilchianna bawl ah, district sung ah Bank leh bazaar kai kua hitaleh sum thiik te lavek ta ding in hiatsakna bawl in, a la nuamlo a um leh LATSEA kiang ah Report bawl ding in hiatsakna a bawl hi.

Hero Maestro khat police station tut a um
Lamka, Feb. 15 *(Nisin Thuhiltu)* : A chiata ni 2 sung ah a neitu hiatlo Hero Maestro khat Thingkangphai ah um chu tuni, February 15, 2018 in District Police in Thingkangphai a pat ladawk in Police Station a tut hi. Police a pat a ki hiatdan in February 13, 2018 ni a pat a neitu hiatlo ah kikawi, Hero Maestro (white) Registration Number NM01L-2274 chu tuni ah district police in vala dawk ah Churachandpur Police Station tut ah um, a neitu ten police station ah lak thei ding hin a kigen hi.

First IRB in panpina pia
Lamka, Feb. 15 *(Nisin Thuhiltu)* : Headquarter veng ah um First IRB in tuni’n CCpur District Sport Academy vethakna nei in, JK Suan Guite, MPS Assistant Commandant First IRB mapuina’n Sport Academy home ground Gangpimual field ah panpina’n annchang bag 4 a piau hi. JK Suan, Guite, MPS in First IRB a pat panpina ding ah fund leh facility bangma umlo himaleh First IRB Commandant N Mani Mohan Singh, IPS in naupang te a ngaikhawk ziak ah zia gual panpina chu piak thei ah um hin a gen hi.

Zomi Namni, Special Exhibition Match um ding
Lamka, Feb. 15 *(Nisin Thuhiltu)* : Zomi Namni 2018 matna ding tawh kisai in, February 16, 2018 sunnung dak 1:00 ah Lamka Football Ground ah Special Exhibition Match um ding a hi. Zia hun a chu, Zomi Namni XI team leh Imphal a pat All Blacks United te kihel ding a hiu a, zia kihelna a pat sum kimu te chu Only Grace ah um naupang te panpina kimang ding hin a kigen hi. Zia kihelna pang ding All Blacks United kiti te chu State leh National Level ah kihel te kigawmkhawm ding a hiu a, Zomi Namni XI team ahileh, District sungmi club chuamchuam a pat kilakhawm ding a hiu. All Blacks United ahileh 2010 ah kiphutdawk a hia, H. Balram Singh, MPS SP/Pherzawl in mapui ding Imo, MLA Sagolbang, Th. Naoba Singh, Director, Classic Hotel, Imphal, Momo Singh, General Manager, Classic Hotel, Imphal te zia team a chu kihelkha ngai uh ti a hi. Zomi Namni Squad te ahiuleh Goalkeeper, Liansuanthang, VENUS leh Lenjapao, Koite Youth Union, Defender ah Mangkholen Kipgen, FC Zalen, Boigou Hmangte, Muvanlai Athletics, Thangminlun Vaiphei, UKB, Lianminthang, DSK Shivajian, Nangminlun, NLYC, Midfielder ah Lalminlian@Minlian Vaiphei, FC Zalen, Buanthanglun Samte, FC Pune, Siamminthang, FC Pune, Daniel Hmar, Pune City FC, Henry Thanglalmuan, Jarkhand FC, Forward ah Ginminthang Hangshing, FC Zalen, Gogou Hangshing, FC Zalen, Paokhongam Haokip, FC Zalen ti te hiding a hiu.