Union Home Minister in Zomi Nam Ni 2018 uap theilo ding
Lamka, Feb. 11 *(Nisin Thuhiltu)* : 70th Zomi Nam Ni Organizing Committee 2018 leh a nuai ah department chuamchuam um te’n tuni sunnung in Hill-town, Lamka ah meeting a nei ua, zia hun a chun maban panlak dingdan tawh kisai panna’n thu chuamchuam a genkhawm ui. Meeting tawh kisai a thupukna chuamchuam a siamteu H. Pauzalal, Secretary, ZNN-OC 2018 in a genna a chun, Khatkhotong Baite, Chairman hina nuai ah meeting nei ah um a hidan gen in, organizing committee te dawidan zil ah Delhi ah khualzin Th. Khamneithang Vaiphei, Secretary, Zomi Council leh H. Pauzalal te’n Delhi a khualzinnau tawh kisai ah report piakna a nei hun ua, Zomi Namni Chief Guest ding ah chial ah um Union Home Minster Rajnath Singh in Feb. 20, 2018 ah meeting pawimaw tak Inter-State Council Meeting amapui ding ziak ah Zomi Nam Ni matna uap theilo ding ah report piakna nei un a gen hi. Chun, Lamka Football Gound ah Zomi Nam Ni Football fournament chiatha zing chu Feb. 17, 2018 ah final match um ding ah lemsakna a nei bak ua, organizing committee in Zomi Nam Ni matna ding tawh kisai ah flag kizuak chawtu te zosia chung ah kipakthu genna nei a hidan uh a taklang hi. Chuleh, Zogam Artist Association (ZAA) mapuina nuai ah joint artist te’n Zomi Nam Ni matna ding tawh kisai ah mipi sukphulna ding ah motivational road campaign a nei uh sunzawm ding leh mipi’n kithuapina piak chiat ding ah lemsakna nei uh hin a gen hi.
CBYF Quadrennial Conference 2018 mang zo
Lamka, Feb. 11 *(Nisin Thuhiltu)* : Chin Baptist Youth Fellowship (CBYF) in Feb. 8, 2018 a kipat Tangnuam CBA Biakinn ah “Khris Nungzui Muanzia” (Matthai 16:24) ti thupi nei ah CBYF Quadrennial Conference 2018 a nei uh chu tunitak biakna kikhawp tawp in a zo ui. Rev. Dr. Sut Khan Thang, Exe. Secy. CBA in CBYF Quadrennial Conference 2018 khakna a nei hi. Tuni zingkal lam dak 10:30 in biakna kikhawpna Pastor Dong Sian Pau in pauchapna tawh a hawng a, Central Church, Sinai leh Tangnuam te’n lapawl sa’n, Rev. Dr. JM. Ngul Khan Pau in thugenna a nei hi. Sunnung dak 1:00 in Ordination Programme a um a, zia hun a chun Hyderabad a Pastor ding LP Tuang ordination piak in a um hi. Nitak dak 5:30 a biakna kikhawp hun ah Rev. Dr. JM. Ngul Khan Pau in thu genna a nei a, Central Church LBYF mapuina’ Closing Ceremony a um hi. Chin Baptist Association nuai ah India gamsung ah Biakinn 16 um hi’n a kigen a, khawmpi ah mun chuamchuam a kipat tamtak a chiakhawm ui.
ECA Youth Deptt. in Golden Jubilee lawm zo
Lamka, Feb.11 *(Nisin Thuhiltu)* : Evangelical Churches Association (ECA) nuai ahYouth Department te’n Feb. 8 nitak apat Tuibong a Peace Ground ah ‘Being Renewed; Psalm 103:5’ ti thupi nei ah Golden Jubilee a mat uh chu tunitak in a zo ui.
Golden Jubilee matna ah thugenpi in Rev. Dr. Michael Gabbert, Senior Pastor, Evergreen Baptist Church, USA a pang hi. Feb. 10, 2018 zingkal dak 7:30 in Molnom khua ah Dr. Michael Gabbert in Golden Jubilee suang a hawng a, telchuam ah um mi 50 te’n Jubilee dakpi khetna nei in, Golden Jubilee matsung in competition leh seminar le um in, seminar ah Resource Person in Upa Tongkholun Haokip, Dy. Registrar IIT in ‘The Indispensable Ministry of the Holy Spirit’ leh Rev. Dr. J. Lamboi Haokip in ‘Christian Youth’ thupi mang in in seminar paper present a bawl ua, tunitak in Upa Henkholun, Moderator ECA in Jubilee lawpna a khak hi.
Culvert hukbing thei ding ah nin kipai
Lamka, Feb.11 *(Nisin Thuhiltu)* : Zion Veng, New Lamka ah um Young Paite Association (YPA) Zion Veng unit office kiang a lamlian ah culvert kibawlna mun ah hun banghemchan chiata a pat nin pai ah a um ziak in, anamse mama a, mihing a ding a damthei huailo in a kilang hi. Chuktui luan hun ah zia zia nin kipai sek te chu tui in tawkmang thei sek maleh tu ah tui luanglo a hina chung ah nin kipai te chu mipha chuam ngai pawl in suthiang ah nin paitalo ding leh hiatsakna thusua bawl zing sek maleu phachuamlo hin a kigen hi.
TSP GHQs in exam dingte pauchap piakna nei
Lamka, Feb.11 *(Nisin Thuhiltu)* : Thangkhal Sinlai Pawlpi (TSP), General Headquarters in TBC Tangnuam Biak-inn ah tuni’n Board Exam dingte pauchap piakna programme a mang ui. Zia hun matna chu Elco Kamlianlal, Vice President TSP GHQs in amapui a, programme hun sung in Khaisuanlam, President, TSP GHQs in vaidawn thu genna nei in, Khaiminlian, Manipur Education Services in exam dingte tilkhona thu leh exam hun ah hiatding pawimaw chuamchuam te genna a nei hi. TSP President in exam dingte kiang ah thilpiak a piak banah Pastor Hangmuanlian, Director, Youth & Mission, TBC in Exam ah pang ding te pauchap piakna a nei a, Hauminlian, Joint Secretary, TSP GHQs in kipakthu genna nei in, Rev. Khaikhanthang, Director, Tanglian leh Tuhun (Gospel film) in hunkhakna a siam hi.
TBC in M. Tanglian PCI (R) laklutna nei ding
Lamka, Feb.11 *(Nisin Thuhiltu)* : Thangkhal Bible Church (TBC) ah M. Tanglian PCI(R) kochuam laklutna programme Feb. 15, 2018 leh um ding a hi. Khaikhanhau, Chief of M. Tanglian & Thangkhal Tribe Council (TCC), President panna, innkuan bangzat a hem te’n TBC kochuam zawm ding a hiu. Pastor Chinminlian, Executive Director, TBC in zia hun chu a tamtheipen in uap chiat ding in chialna leh hiatsakna a bawl hi.
Disaster Management Training um ding
Lamka, Feb. 11 *(Nisin Thuhiltu)* : District Disaster Management Authority, Churachandpur in February 12 a pat February 14, 2018 sung ah District Training Centre, Tuibuang ah Disaster Management tawh kisai ah Training bawl ding a hi. Training hun ah District sung a kisaikhakpi, civil society organization, NGO, Institution leh Village Authority-te pang ding ah hiatsak a hiu. Thuchian kimzaw, Gin Muan Ngaihte, AC-II, DC Office, Churachandpur kiang ah Contact No. 8414-991-784 ah thuhiat leh kanchian thei ding a hi.
Ngaina gual ah office, school kaizawm ding ah State Home Department in thusua bawl
Imphal, Feb. 11 *(Nisin Thuhiltu)* : State Home Department in 12th February 2018 zingkal dak 6:00 a pat KCP (MC) Nongdrenkhomba group in dakkal 42 sung bandh a puan chu kuama’n support bawllo ding in mipi te chialna a bawl a, state government in thil dawi umlo a tunkhak ding venna ding ah panlakna nei in a taklang hi. Rehanuddin Choudhury, Home Secretary suaikaina press release in a taklatna a chun, government semtu te ngaina gual ah office kai chiat ding leh nasem chiat ding ah hiatsakna bawl in, office kailo a um leh action lak hiding in a taklang a, KCP (MC) bandh puan chu dan-kal (illegal bandh) a hi ti’n a gen hi. Mipi te chu ngaina gual ah nasem thil bawl ding ah chialna bawl kawm in, students leh teacher te le ngaina gual ah school kai zawm ding in chialna a bawl hi. KCP (MC) Nongrenkomba group kiti chu a chiata kum 4 masang ah government khut ah ki surrendered leh State leh central government tawh kinawptuana nei ah MOU suai a la kai, kum 4 sung, cadre te stipend leh onetime payment Rs. 2.50 lakhs chiat piak ah a la um, KCP (MC) Nongrenkomba group leader in kum 4 sung designated camp ah a um nung ua, KCP (MC) Nongrenkomba group kiti a la sukbei, KCP (MC) Nongrenkomba group te kitiamna neidan tak ah zia gual letter head kiti chu a mat thei taklo ding uh, a group le umtalo a hina chung ah KCP (MC) Nongrenkomba group min ah letter head kisiam leh kimang chu dan-kal (illegal) a hih ti’n Rehanuddin Choudhury, Home Secretary suaikaina press release in a taklang hi. Zia chu tawh kitawn ah KCP (MC) Nongdrenkhomba group min dakkal 42 sung bandh kipuang chu state government in ngaikhawk mama in le a gen hi. A langkhatlam ah KCP (MC) thusua in a taklatna a chun, thingnuaimi MoU suai kai group te demand tawh kisai State Assembly ah genkhak leh sukpitin ding guat ahilona chung ah bandh a puan uh hin a taklang hi.
Khudei Khunou Village ah PHC kawi hiding: Health Minister
Imphal, Feb. 11 *(Nisin Thuhiltu)* : Health and Family Welfare Minister L. Jayantakumar Singh in tuni’n Chief Guest hina tawh Chandel District ah Khudei Khunou Village, Foundation Day Cum Platinum Jubilee (75 years) Celebration a uap a, ama’n a thugenna a chun, Khudei Khunou (Khotle Yulran) ah Public Health Centre (PHC) hawn hiding in a puang hi. State sung ah health sector siamhawi ding pawimaw a hidan gen in, Health Facility kituptak a um ding pawimaw in a gen hi. Tanggam ah medicinal plants um te value nei mama a hdian uh gen in, market tut theina ding ah panlak ding pawimaw in a gen a, zia chu hileh lobawlmi te mai hilo ah state revenue kibelapna hiding in a gen hi.
State Government in state sung ah Medicine factory siamdaw ding leh resource um thei zosia lak khawm ding ah guanggalna a neina chung ah Central Government thuhiat zing hin a gen hi.Maring community in Art leh Dance lam ah hausakna a nei dan uh gen in, Maring community in indigenous song leh dance a nei te chu nam dang te a sang ah niamzaw lo hin a gen hi. Zia hun mat sung a chun, Minister Jayantakumar in Platinum Jubilee Celebration suangphu leh Khudei Khunou Village chanchin kizikna lekhabu hawnna le a nei hi. Chun, hun matna chu L. Modun Charang, President Maring Uparap Assembly(MUA) leh Willington Tonsin, Executive Member, Education & PHED, ADC Chandel ten le a uap ui.
CPM in Manipur ah 7th Pay Commission thu BJP thudawtna siam
Imphal, Feb 11 *(Nisin Thuhiltu)* : Left Front party ten Manipur ah BJP government chu 7th Pay Commission chiapilona chung in dawtna a siam hi. Election campaign hun ah Prime Minister Narendra Modi in state mipi te ama party’n vaihawmna a chan thei ahileh 7th Pay Commission chiapi hiding ah a tiam himaleh tuni tiang ah chiapilo ah a um chu ngaithiam lo uh hin a taklang ui. Chief Minister kiang ah lekha thawt Manipur Government Services Federation (MGSF) president, M Rajendra Singh suai kaina’n a taklatna a chun, February 27, 2018 tiang ah 7th Pay Commission chiapi ahilo ahileh Left Front “cease work strike” pan ding in a gen a, tunitiang ah 4th Pay Commission chiapi ah um leh state in hun sawtpi a pat 7th Pay Commission demand a bawl hita hin a gen hi. 7th Pay Commission recommendations chu state sung ah chiapi hileh state government in additional Rs 1700 crore a puakdaw ding himaleh zia chu State budget 2018-19 ah suklat hikhalo in a taklang hi.
Sunjwan terror attack: Jawna 5 leh minautang 1 thi
Sunjwan (Jammu), Feb. 11 *(Nisin Thuhiltu)* : Sunjwan Army camp attack bawl ah pang Jaish-e-Mohammed (JeM) thingnuaimi 3 kaplup hita a hi banah attack na’ army jawan 5 leh minautang 1 in thina tuak hi’n Army official te’n a gen u’i. Galvan hawitak tawh kithuam thingnuai pawl khat in Kiginni zingkal mattak ah 36 Brigade Jammu & Kashmir Light Infantry camp ah lut in attack a bawlna ua Junior Commissioned Officers (JCOs) 2 pang ah Army personnel 5 in thina a la tuak ua, thingnuaimi te lak ah a thumnapa chu Army van ah kivan in a dang 2 te gual ah galvan haiwtak pua hi’n defense thupuangtu’n a gen a, thingnuaimi te a pat AK-56 rifles, Under Barrel Grenade Launcher, meichang leh grenade hunkhawp mudaw ah um hi’n a gen hi. Attack a chun numei leh naupang 6 pang ah mi 10 in liamna a tuak ua, zialak ah nupi khat chu nauvawp hi’n a kigen hi.Liamna tuak lak ah kum 14 naupang khat luchang ah meichang lut in ama dinmun chu lauthawng um hi’n thupuangtu chun a gen hi. Jammu-based Army PRO Lt Col Devender Anand in, family quarters te a pat a lua te puidaw ah um in search operation a chiatha zing hi ti’n a gen a, innkuan hunkhawpte camp sung ah um nalai uh a hina ah amau bitna ding ah Army in theitawp sua hi’n a gen hi. Camp hi a hileh tha 15 chiata a khan le attack in a la um kha’i. A chiata November 29, 2016 a khan thingnuaimite’n Army's Nagrota camp ah lut in officer 2 pang ah Army personnel 7 a la kaplum ua, operation bawl a hina ah security force te’n thingnuaimi 3 a kaplum u’i.
Tripura ah thaguam suana politics theng hun hita: Amit Shah
Agartala, Feb. 11 *(Nisin Thuhiltu)* : Bharatiya Janata Party (BJP) in Tripura ah thagum suana politics chu khantona tawh sâng ding hi’n party chief Amit Shah in tuni’n a gen hi. Mohanpur ah election rally na’ a thugenna a chun, BJP in Tripura ah vai hawm leh kum 5 sung ah state chu model state khat suaksak ding hi’n a gen a, state mipi te chu vote khelo ding ah vau aum hi’n a gen hi. Ni 2 state vena nei Shah in a hileh Chawmanu leh Teliamura ah le election campaign a bawl a, tuni zingkal ah Bamutia a pat Mohanpur a zawt a chun road show a nei malalm hi. Tripura Assembly election a hileh a hung tung ding February 18 leh um ding a hi.
A langkhat lam ah Union Finance Minister leh senior Bharatiya Janata Party (BJP) leader Arun Jaitley in tuni’n BJP vision document suadawna a nei hi. Tripura assembly election masa kha party in North-east state dang te a pat zathuapna dawnglo in, a hinla party in state zosia’ panla in zathuapna leh tawsawtna kaikhawm hi’n Jaitley in a gen hi. Tripura mipite’n hun sawttak a pat vai a la hawm, Communist Party of India (Marxist) dodal ah kiphinna nei in, CPI (M) chung ah lung-awilo mama uh hi’n a gen hi. A hung tung ding February 18 ah Tripura assembly a ding election um ding a hia, March 3 leh result puandaw hiding a hi.
Nov 2017 a pat I&B Ministry official 155 ki transfer
New Delhi, Feb. 11 *(Nisin Thuhiltu)* : Ningkum November tha a pat Indian Information Service official 155 te a sepna mun ua pat transfer in aum hi. July ah Cabinet lepthakna ahi hun ah Ministry of Information and Broadcasting (I&B) mawpaw ding ah Smriti Irani guat ahi zaw tha 3 nung ah zia gual chu um a hia, a hinla zia gual transfer chu nidang ah a la um kha ngailo hi’n a kigen hi. Ministry ah senior official khat in a genna a chun, Minister Irani in official te kimupi in thupukna te chu ama mimal tak ah a genkhawmpi a, mun chuam ah kichawn ding tawh kisai ah haksatna a um ahileh ama kiang ah hiatsak uh hi’n a gen hi. Nikhat thu ah transfer tampen ni a hileh February 7 a hia, zia ni khan officer 48 te chawn in a um u’i. Irani masang ah I&B minister a la tû, Venkaiah Naidu in le official te New Delhi a pat chawndaw ding phasak thu a la genlang kha maleh zia gual lawm ahin a la bawl diak puai. November 2017 a pat transfer ah um official 155 te lak ah 15 chu capital pawlam ah chawndaw ahia, a lianpen tele hawi hidiak lo in Director General level official 4 banah Additional Director Generals 36 leh Deputy Directors 60 le transfer ah um lak in a pang u’i.
Kaziranga ah a kî lak ding ah chingpi khat kaplup ah um
Tezpur (Assam), Feb. 11 *(Nisin Thuhiltu)* : Sakapte’n Kaziranga National Park ah chingpi khat kaplum in a kî zammang pi uh hi’n senior forest official khat in tuni’n a gen hi. Kaziranga National Park Divisional Forest Officer Rohini Ballav Saikia in, zani znankhang tuam ah Sitamari area kiang Polokata ah zia thilsuak chu tung hi’n a gen a, chingpi kî chu a lak zaw ua sakap te zammang ngal in a mun a chun .303 rifle kikap dawna nung chang 5 mudaw ah um hi’n a gen hi. Saikia in, senior forest official dang te tawh tuni zingkal ah zia tak mun chu va pha in etthâkna nei uh a hidan genlang kawm in forest leh police personnel te kithua joint team in sakap te hawldaw leh matna ding operation pan uh hi’n a gen hi. Thiltung chu tukum sung ah chingpi kaplup ah a um a 2veina a hitai. A chiata January 14 a khan Daflang camp area sung Bagori range ah chingpi anû khat kaplup a la himaleh a kaptute’n a kî a la kilak man puau.
Zia thilsuak a tung masang cha Assam Governor Prof Jagadish Mukhi in law enforcing agency te kiang ah Kaziranga National Park ah chingpi kâp vênna ding ah panlak thei chan a lading in a hiatsak hi. Kaziranga National Park leh kî khat nei chingpi ziak ah Assam chu khawvel in a hiat khat hi’n a gen a, sakap te’n chingpi a kaplup uh chu a gamsa chung bep hilo ah state kisaktheipi chung ah attack bawlna hi’n Governor in a gen hi. Golaghat district authority te tawh zani zan ah review meeting a nei hun ah Governor Mukhi in zia thu hi a gen a hi. Chingpi kâpna thilsuak chu chu tawm hiai hiai ta maleh chingpi humbitna ding ah security agency te kiging zing ah a um uh kûl hi’n a gen hi. Chun, Governor in district police thuneitute kiang in, state dang te tawh district kigamgitna te chu thawveng tak suak sak ding in a dawn kawm in, district sung ah chamna leh muanna a um theina ding ah security force te panlak dan chu lungtum um leh kipak um a sak thu a puang hi.
NPP in Meghalaya ah government siam di: Conrad
Shillong, Feb. 11 *(Nisin Thuhiltu)* : National People’s Party president Conrad K Sangma in, tukum Meghalaya assembly election ah NPP in gualzawna chang ding leh government kit chu party amau party in siam ding hi’n tuni’n kimuang tak in a gen hi. North Garo Hills ah Gokul kiti khua’ rally a nei hun ua a thugenna a chun, Sangma in, election hun ah NPP in seat mu tampen ding leh state ah a government thak ding chu siam ding hi’n a gen hi. NPP a hileh Centre leh Manipur ah BJP tawh kizawp a hi banah North East Democratic Alliance (NEDA) ah pang khawm himaleh Meghalaya Assembly election a chun a chang in a ding ua, seat 53 ah candidate a kawi hi. Sangma in a genna a chun, NPP in a gammi diktak te leh minority te a ding ah panla zing in, Meghalaya bep hilo ah NE India pumpi ah khantona umsak theina ding ah Centre tawh pan lakhawm zing hi’n a gen a, NPP chu North East mipite leh minority te a ding ah pan nasatak ah la, famta Purno Sangma in a la phudaw hi’n a gen hi. Zia kawmkal a chun, senior BJP leader Rajiv Pratap Rudy in, Meghalaya assembly election a ding ah party dang te tawh pre-poll a hiloleh post-poll alliance siamlo ding hi’n hialchetna a bawl hi. Tuni’ Shillong ah hhudawt khat a dawnhuna a chun, BJP in election chu a chang ah tet ding hi ah Rudy in puandawna nei kawm in, gualzawna chang thei ding ah kimuang huntawk uh a hidan a gen hi. Seat 60 umna Meghalaya Assembly a ding election a hileh tutha tarik 27 leh um ding a hia, March 3 leh result puandaw hiding a hi.
BJP-NDPP Alliance nawl ding ah Nagaland Congress in mipi chial
Kohima, Feb 11 *(Nisin Thuhiltu)* : Nagaland Pradesh Congress Committee (NPCC) in thusua a bawlna a chun, 2018 assembly election chu political partite vaihawm ding kichuna hilo bep hita lo ding leh maban hun hung tung zel ding te a ding ah Nagaland politics kibulphuna hung hi ding a hina ah Nagaland khangthu a ding ah tepte kham ting ding hi’n a taklang hi. Congress party in sakhua zalenna leh mipi vaihawmna diktak chu dinpi zing in, a langkhat lam ah Hindutva force te ai-aw ah pang BJP leh a kizawppi NDPP pang hi’n a gen a, amau in vaihawm nailo uh a hina ah tuhin Hindutva force te pawm ding leh nawl theina ding ah dawitelna nei nalai ti’n mipi te kiang in a gen a, amau vaihawmna hileh zia gual dawi telna chu um talo ding leh ama thunuai ah um ngai ta ding hi’n hillawkna a bawl hi. NPCC in zia ah mipite dawitelna chu humbitna ding ah hun dang gual ah sakhua zalenna leh mipi vaihawmna diktak chu tangko pi zing leh dinpi zing hi’n a gen hi. Party in Nagaland mipi te kiang ah BJP-NDPP alliance chu Hindutva forcete thupiak gual ah tawi uh a hina ah ala nawl ding in a dawn hi.
HPC(D) Leader in kihona a lawtin ding a kinepthu taklang
Aizawl, Feb 11 *(Nisin Thuhiltu)* : Hmar People’s Convention (Democratic) leader Lalthalien Hmar in Mizoram government tawh tha kit leh Hmar te issue chung ah political level talks hun ah kiho lemna a um thei ding kinem a hidan a taklang a, himaleh kihona pang ding delegation member ding te sufel nailo uh hin a gen hi. Mizoram Home minister R Lalzirliana in a taklat dungzui ah HPC (D) leh Mizoram Government in March 5,2018 leh Aizawl ah political level talks nei ding a hi.
Russian passenger lenna tuaksia; mi 71 thi
Moscow, Feb. 1 *(Nisin Thuhiltu)* : Russia, domestic Saratov Airlines in operate a bawl Antonov An-148 kiti passenger lenna, capital's Domodedovo airport a pat Urals city Orsk zuan ah kipan dawk chun Russia khawpi Moscow kiangnai Ramensky district ah tuni’n tuaksiat a tuak a, ziana a chun lenna sung ah chuang mi 71 ten thina a tuak ui. Russian news agency te taklatdan ah zia lenna tuaksia a chu passenger 65 leh crew member 6 chuang a hiu a, mit ah mute gendan ah lenna chu len zinglai ah kang (burn), lengzawm theilo ah ketha hin a gen ui. Tulak cheng ah Russia gamsung mun chuamchuam ah vuk a kiak nasat mama nachung ah khua muna hawitalo in a kigen a, Russian khutsuak Antonov An-148 lenna tuaksia chu kum 7 ah upa hita a hi.
A langkhatlam ah zia lenna tuaksiatna ziak chu hiatchian ahilona chung in Investigative Committee of Russia in criminal investigation bawlna a nei a, Russian President Vladimir Putin zia tuaksiatna tawh kisai chu khualna nei ding ah "special commission” order sua a hidan Putin's spokesman Dmitry Peskovin a gen hi.
Syria in Israeli kidona lenna kapthak piak
Jerusalem, Feb. 1 *(Nisin Thuhiltu)* : Iran-backed positions Syrian in anti-aircraft missile mang in Israel kidona lenna F-16 fighter jet khat a kapthak piak a, himaleh pilot 2 te chu parachute ah kichawmtha’n a suakchau hi. Zia kapthak ah um Israel kidona lenna chu gamgi tuam ah Iran-backed positions Syrian te chung ah bombing raid bawl, a kinungle lam ah kikaptha hin Israeli official thusuak in a gen a, Syrian anti-aircraft missile in a kap khak nung ah northern Israel ah kidona lenna chu ketha hin le a gen hi. Zia nung a chu Israel in second leh air raid nasa bawl in, Syrian air defence systems panna Iranian sepai te munpi 12 leh Syria ah Lebanon's Iran-backed Hezbollah group te umna mun te chu target in a nei hi. Lebanon's Iran-backed Hezbollah group in zia ah Israel lenna kikapthu chu hunthak a hidan suklatna leh Syrian airspace ah Israel kidona lenna a mawk len kit taklo ding etsakna hin a gen hi.
CMHT enrolment bawlsa te’n a health card ding uh kilak theita ding
Lamka, Feb. 11 *(Nisin Thuhiltu)* : Chief Minister-gi Hakshegi Tengbang (CMHT), Manipur phatchuampi thei ding, BPL innkuante’ minkhumna District hospital ah OPD Building (First Floor) in a chiatha zing sek himaleh District Hospital ah Health card print na ding smart card printer umlo ziak in, Imphal lam ah enrolment kibawl zousa te thawtsuk vek ngai in, nasepna lemchanglo tak ah um in a kigen hi.
A langkhatlam in, January 30 tiang ah Enrollment bawl mi 872 te Health card ding tuni in a tung a, minkhumna mun, OPD building 1st floor a, NCD Clinic kiang ah CMHT enrolment bawlsa te’n a health card ding uh kilak theita ding a hiu. Zialo a chun, min khum kha nailo te’n le minkhum thei zing ding a hi.
Enrolment bawlzaw tak leh CMHT Health Card piak hiding a hiu a, card neite’n empanelled network hospital-te ah a sum (cash) ah hilo in ki etkawlna Rs. 2 lakh tiang govt. in kithuapina muthei ding a hiu. Zia scheme phatchuampi thei ding te chu, migenthei diak ah kihia, Social Economic Caste Census (SECC) 2011 data ah tetpte ah um, BPL innkuan, Disability Certificate leh Widow (Methai) te hiding a hiu. Enrolment bawlna ding ah Aadhaar card (Xerox copy) chawi ngai, AAY Card holder, Widow (Meithai) Certificate leh Disability Certificate neite’ a ding ah enrolment fee Rs. 50/- piak ngailo ding, zia gual neiilo te ding a chu enrolment fee Rs. 50/- hiding a hi. SECC 2011 Data ah umkhalo Aadhaar card nei ah enrolment bawl ding te a hiuleh DC hiatpina leh verifying officer in approval a bawl leh enrolment bawlthei ding a hiu. CMHT Health Card nei te’n damlona tawh kisai a ah ki-etkawlna Rs. 2 lakh tiang govt. in panpina peding, Rs. 2lakh chunglam chu damlo inkuan ten a kisen ding uh a hi. Scheme ahileh natna/damlona zil ah Primary, Secondary & Tertiary (Critical Care) category ah khen in a um a, Primary & Secondary Care te’n Rs. 50,000 tiang panpina muthei ding, Tertiary (Critical Care) adiak in Cardiovascular Disease, Kidney Diseases, Cancer, Neurological condition, Liver ailment, Neo-Natal Diseases leh Burns (Meikang) ten Rs. 2lakh tiang muthei ding leh Scheme phatchuampi te’n allowance chuamchuam le muthei ding uh hin a kigen hi. State sung ah damlo khat in kum khat ahRs. 3000 tiang transport allowance ah mu thei ding, khatvei chiatua lumletna Rs. 300 zel muding, transport allowance chu Rs. 2lakh in huamkha ding a hi. Zia gualma a chu, State pawlam ah ki-enkawl ding te’n le Rs. 2 lakh apat hospital in ki-etkawl sung ah mat ding, ni khat ah Rs. 1,000 tiang zel Rs. 10,000 chan muthei ding a hiu.