VPC leh Zillai Eastern Block, Conference cum sports Meet- 2018 kipan
Salampatong, Jan. 30 *(Nisin Thuhiltu)* : Vaiphei Peoples Council (VPC) Eastern Block leh Zillai Eastern Block (ZEB) in Salampatong Village, Kangpokpi District ah 30th January - 5th February 2018 sung ah "Rejuvenating the Spirit of Oneness" ti thupi nei ah Conference- cum-Sports Meet- 2018 a mat ding chu tuni’n hawn in a um hi. Conference- cum-Sports Meet- 2018 inaugural function chu Yamthong Haokip, MLA Saikul A/C, Haokholal Hangsing, Chairman, ADC Kangpokpi, N. Rajendro @ Boy, Ex-President, ICHAM, Haukhotinlian Vaiphei, Chief of S. Molnuam te'n Chief Guest, Guests of Honour leh Functional President hina tawh a uap ua, Special Guests hina tawh - Prafullo, President ISTV, Kh. Khogen, General Secretary, ISTV leh Editor Naharolgi Thoudang te banah Vaiphei Eastern Block huapsung ah khua-hausa, YVA, Chief Association, Zillai GHQ lawiupa ten a uap ui. Chief Guest, Yamthong Haokip, MLA Saikul A/C in Conference- cum-Sports Meet- 2018 hawnna nei in, Zillai Eastern Block Veteran leh ISTV Staff, Manipuri Film Star Mr Sadananda leh Mr Gokul te pan na'n football exhibition match a nei ua, goal 3-3 a ki khumtua ui.
Functional President, Haukhotinlian Vaiphei, Chief of S. Molnuam in a thugenna a chun, Saikul Assemnly Constituency ah Vaiphei khua tampi a um tawh kitawn ah voter 3000 val um a hidan gen in, Vaiphei te kilungtuak tak leh Nam lawiupa te thugen zui kawm ah panlak chiat ding a nawp thu a gen a, election hun hin banglam thil hitaleh pankhawm dan thiam ding, a phachuam thei ding pen ah nasep thilbawl chiapi ding a nawp thu a gen hi. Chun, election hun ah a pha chuam thei ding ah candidate te support bawl ding, support I bawllo ten ei lau thei ding khawp ua, hangsan tak leh kithutuak tak ah pankhawm ding pawimaw a hidan gen in, Zillai Anthem ah “ka ki khawm ui, achawi hawi din” ti chu a sakthaw mai hilo ah taksua thei chiat ding ah Zillai ten panlakna a nei ding uh a nawp thu a gen hi.
VPC leh Zillai Eastern Block, Conference cum Sports Meet- 2018 hun sung a chu, competition chi chuamchuam - Cultural dance, Choir Competition, Lakawi Laa, Busep, Busuk, Kangkap leh pu leh pa ten a la bawl sek uh item chuamchuam ah gualnawp leh gualsiakna nei ding a hiu a,
Sunday Worship Program hun ah Rev. S. Prim Vaiphei leh Rev. Dr. S. Lalpi ten Pathian thugenna nei ding, 3rd January 2018 leh EVYSA Nite kiti um ding a hi. EVYSA Nite chu, Genhaumang, Paurouchung leh Zillai GHQ Presiedent Dr. Hauminthang Vaiphei ten khuallian hina tawh uap ding a hiu.
Closing Ceremony ahileh 5th February 2018 ah um ding a hia, Zia hun chu Letpao Haokip, Minister, YAS & Water Resources, Thangkam Misao, Vice Chairman, ADC Kangpokpi, O. Lukhoi, MLA, Wangoi A/C, Dr. SL Lunjapau Vaiphei, Ex-president, Zillai GHQ, Yamthong Haokip, MLA, Saikul A/C ten Chief Guest, Guests of Honour, Functional President leh Chief Host hina tawh uap ding a hiu.

Khuga Battalion in Singngat -Khunta lampi siam

Lamka, Jan. 30 *(Nisin Thuhiltu)* : Khuga Battalion in Singngat Sub-division huapsung ah Myanmar tawh gamgi tuam ah um khua (village) te kikawmtuana (saktiman lampi) hawilo tak ah um zing chu bulldozer mang in a siam hawi hi. Zia lampi a siam uh chu Singngat a pat Khunta tiang, 46 km tuam hin a kigen a, Zoukhonuom, Theigotang, Hiangtam Khonou leh Singngat ah um te kikawmtuana lampi pawimaw mama a hi. Khuga Battalion in SOIL projects nuai ah khua-mipi te ngaikhawkna ziak ah ziagual nasep chu a chiapi hin le a kigen a, lampi kituptak ah siamzaw a hitak leh a kim leh kiang ah cheng te ding ah sum leh pai hawlna, nek hawlna, education, damlo hitan hun ah hospital zawtna leh lam chuamchuam ah thawveng chuam mama ding a hi. Khuga Battalion in khangthak sepna neilo ten sepna a mutheina ding ua, free coaching leh activity chuamchuam chiapi zing kawm ah kikawmtuana lampi kituplo tak ah um te a siamhawina chung in, Assam Rifles Sector, Churachandpur nuai ah Khuga Battalion chung in khua-mipi leh area mipi’n kipakthu a gen ui.

Sparsh Leprosy Awareness campaign cum Anti-Leprosy Day mang

Lamka, Jan. 30 *(Nisin Thuhiltu)* : India Pa ti ah kihia, Mahatma Gandhi thini a hi tawh kitawn in Tuni, 30th January 2018 chu India gamsung pumpi ah Anti-Leprosy Day mat in a um a, zia dungzui a chun, Churachandpur District Leprosy Unit/NLEP, DHS organised bawlna’ CMO Mini Conference Hall ah Sparsh Leprosy Awareness campaign cum Anti-Leprosy Fortnight observance hawnna a um a, zia hun chu Deputy Commissioner, Churachandpur district Shyam Lal Poonia in khuallian hina tawh uap in, ‘Leprosy Free’ ti ah District puandawna neikawm in Sparsh Leprosy Awareness campaign cum Anti-Leprosy Fortnight observance hawnna a nei hi. Anti-Leprosy Fortnight observance ahileh Janaury 30 -February 13, 2018 sung ah um ding a hi. Shyam Lal Poonia in a thugenna a chun, district administration in district ah leprosy cases a umkhak leh a vaima theipen ah hiatdaw a hitheina ding ah panlakna nei ding leh Leprosy dodalna a lawtin theina ding ah panla ding a hidan gen in, leprosy case nei te chuam bawlna leh kawi chuamna umlo ding, pankhawm chiat ah leprosy dodal hiding in a gen hi. Zia hun matna a chun, Dr Kim Simte, CMO, Dr Kimneihlam, District Leprosy Officer leh Goihzachiin, Principal GNM Nursing School te mapuina’n Mahatma Gandhi zana piakna a um a, Dr Kimneihlam, District Leprosy Officer in Anti-Leprosy Day leh Sparsh leprosy Awareness Campaign tawh kisai genna nei in, GNM Nursing school student ten step 7 ah khut sawp thiang dingdan suklatna nei in, Sparsh leprosy Awareness Campaign bawlna’n skit show a bawl ui.

Assam Rifles in S. Kawtlian ah Medical Camp bawl

S. Kawtlian, Jan. 30 *(Nisin Thuhiltu)* : Assam Rifles, Churachandpur in District Administration leh District Medical authority te kithuapina tawh OP SADBHAVNA nuai in tuni’n S. Kawtlian ah free Medical Camp -cum- Awareness Programme organised a bawl hi. Zia hun chu, Chief Guest hina tawh Brig Ajay Kumar leh TT Haokip, Chairman Hill Area Committee ten uap in, Medical Camp -cum- Awareness Programme hawndawna a nei ua, Shyam Lal Poonia, IAS, Deputy Commissioner Khaipao Haokip, Chairman, Autonomous Development Council, CCpur leh Rakesh Balwal, IPS, Superintendent of Police, CCpur ten le a uap ua, KKP S. Kawtlian Branch, MPCS ten le laa present a bawl ui. Army, Assam Rifles leh Chief Medical Office, Churachandpur a pat Doctors & Dentist ten damlo ki etsak nuam mi 850 te a en ua, District AIDS Control unit in awareness leh counseling bawlna a nei hi. Chun, government department chuamchuam - Sericulture, Horticulture, Fisheries, Veterinary, India Post, North Eastern Community Resource Management Project (NERCORMP) & District Family Welfare ten stall a hawng ui.

Tipaimukh Road siamzo pai ding ah dawtna siam
Lamka, Jan. 30 *(Nisin Thuhiltu)* : Zomi Namni 2018 Organizing Committee in a hung tung ding February 20, 2018, Zomi Namni lawpna ding tawh kisai ah panlakna a nei uh chiato zel in, tuni’n Bungmual a um, BRTF official-te va-kimupi in, Zomi Namni a tunma ngei a Tipaimukh Road ah blacktopping kibawl zing lai, Police Station mai (Zero Point) chan zoman ngeingei ding in ngekna bawl uh hi’n ZNN-OC apat hiat ahi. Union Home Minister, Rajnath Singh in Zomi Namni ah Chief Guest hina tawh uap ding ahi ban ah, government top official tamtak inle hung uap ding uh a hiziak ah nasep kinawdeu ding ah dawtna a bawl uh hi’n le a kigen hi.

Free Echo, Heart & Diabetes Screening Camp bawl

Lamka, Jan. 30 *(Nisin Thuhiltu)* : Sky Hospital & Research Centre, Imphal, Manipur Heart Foundation leh Non-Communicable Disease(NCD) Clinic, District Hospital, Churachandpur kithua in tuni, January 30, 2018 sunma dak 10:00 a pat NCD Clinic ah Free Echo, Heart & Diabetes Screening Camp a bawl ui. Free Screening ahileh Rashtriya Bal Swasthya Karyakram(RBSK) nuai ah nei ahia, damlona mudaw ah um, damdawi ah phachuamlo, at ngai dingte Sky Hospital ah a thawn ah bawlpiak hiding ahiu, ahi’nla damdawi leh a um man ahileh damlote’n a kipiak uh ngai ding ahi. Damlo et sung in, Shyam Lal Poonia, IAS, Deputy Commissioner, Churachandpur in etthâkna a nei hi. RBSK nuai ah NCD Clinic ahileh National Program for Prevention & Control of Diabetes, Heart Disease & Stroke nuai ah um ahia, Free Screening hun a damlo mudaw ah umte, Sky Hospital in RBSK Scheme mang ah a thawn ah at ding ahiu. Tuni’n naupang 50 leh piting 50 a ki-etsak ua, March tha ah ziagual free screening hi umkit bep ding hi’n a kigen hi.

Pension thâkna nei

Lamka, Jan. 30 *(Nisin Thuhiltu)* : District Hospital in tuni sunnung dak 1:00 in Dr. T Nengkhanmang, Deputy Superintendent Office Chamber ah hospital a sêm, pension ding Matron Chinzaniang Nursing Superintendent leh Grade IV Nemzachiin, Sweeper-te thâkna hun a mang ui. Zia hun achun, Hospital a sêm ward incharge, staff nurse leh grade IV bangzat hem in uap in, a thâkna ah district hospital in puandum silsakna a nei ui. Matron Chinzaniang, Nursing Superintendent mun ahileh staff nurse lak ah a senior pen, Sangthuam in lua ding ahia, zing January 31 ah charge kipe ding a hiu.

VEINA Free Coaching zo
Lamka, Jan. 30 *(Nisin Thuhiltu)* : Village Educational Initiative of Navodaya Alumni (VEINA) in thingtang apat zillaite khualna ah project VEINA nuai ah Free Coaching a nei uh zaw a hitai. Free coaching ahileh Jawaharlal Novadaya Vidhalaya (JNV), Tuinom a Class VI zil utte dawisakna ziak ah Navodaya Alumni te’n tha khat vel chiata apat Convention English High School, Sinzawl khua ah a bawl uh a hi. Sinzawl leh a kiang nai ah khuate a pat student 45 vel a pang ui.

BPCCHN student te’n exam pan
Lamka, Jan. 30 *(Nisin Thuhiltu)* : MS Conference Hall, District Hospital ah Indira Gandhi National Open University School of Health Sciences nuai a Bridge Program of Certificate Course in Community Health for Nurses (BPCCHN) student te’n exam, za’ni January 29 in a pan ui. BPCCHN ziltheina ding in June 28, 2017 in IGNOU tawh District Hospital pangkhawm a district Hospital ah Study Centre hawndaw ahia, tulaitak in student 19 in a zil ua, a zilzaw phat uleh, Primary Health Centre(PHC) ah Community Health Officer dinmun tu in Administration, Record Keeping tite enkawl ding ahiu. Zia course hi tha guk sung Certificate Course ahia, kum 2 sung ah zawthei ding ahi.

Kimang nailo himaleh ACLS Ambulance siam ah um

Lamka, Jan. 30 *(Nisin Thuhiltu)* : State Health Society, Manipur nuai ah January 21, 2018 ni ah Chief Minister-gi Hakshelgi Tengbang (CMHT) hawndaw ahi hun ah Churachandpur District a ding ah piak ah um, Advanced Critical Life Support (ACLS) Ambulance duthusam zo lo ziak in Company apat Mechanic-te’n a hung siam ui. Ambulance ahileh a hoilona hiatdaw pai himaleh, company apat a bawl dingte naw hat ziak bep ah hung uh hi’n a kigen hi. Mechanic te’n tuni Ambulance a bawl laitak un Shyam Lal Poonia, IAS, DC Churachandpur in entha in, a pawimaw leh ahiding gual tak ah bawlhawi ding in a mechanic-te a hil hi. Zia ambulance hi, damlo gim mama mundang ah puakdaw ngaite a ding ah mat hiding ahia, ECG Monitor, Defibrillator, Cardiac Monitor leh Ventilator te a um a, Operation Theatre ah Medical Officer, Technician leh Nurse-te zia ambulance matna ding tawh kisai hin training le piak hiding ahi dan uh hiat ahi.

Mizo People Convention in General Assembly nei

Lamka, Jan. 30 *(Nisin Thuhiltu)* : Mizo People Convention (MPC) Headquarter, Manipur in a 33-na, General Assembly tuni, January 30, 2018 sunma dak 11:00 in YMA Hall, YMA Complex, Hmuia Veng in a pan ui. CV Duhawma, President, Group YMA, Manipur; S. Vanlalruala, Chairman, MLS, Manipur; Paul Lalchhanhima, President, MZP Headquarter, Manipur leh Lalrinliana, President, MPC Headquarter, Manipur te’n thugenna a nei ui. Upa Lungmuana, IAS, Consultant, MPC Headquarter, Manipur in “Manipur Mizo-te’ dinmun leh kipumkhatna pawimaw dan” ti thupi mang in thugenna le a nei hi. Sunnung hun vaihawmna hun in a mang ua, Upa Dr. LS Gangte, Consultant, MPC Headquarter, Manipur in ma’pui in, agenda puaklut ah umte simdawna nei in, vaihawmna a nei ui. MPC Headquarter, Manipur nuai ah Unit 14 leh Sub-Headquarter khat a um a, Sub-Headquarter nuai ah Unit 31 vel a um hi.

Liansangmung thina chung ah kiholem
Lamka, Jan. 30 *(Nisin Thuhiltu)* : Liansangmung @ Sangmung s/o Zellet of Gouchinkhup Veng, New Lamka thina tawh kisai ah kiholemna a um dungzui in, a luang Imphal apat Lamka puak tung in a umtai. Liansangmung ahileh, achiata January 23, 2018 sunnung dak 3:00 vel a Paite Veng, Imphal ah Bike a tai lai, thautui pua tanker in a nunglam apat phu in, damdawi inn puaktung himaleh damzolo ah thi ahi. Hun bangchan hem kiholem theilo nung ah, Vungzagin Valte, Chairman, MTDC, MLA thanlon leh All Tribal Student Union Manipur(ATSUM) pangkhawm ah kihotheina ding lampi a ngaitua dungzui ua, tuni sunn dak 12 ah Vungzagin Valte, Chairman, MTDC, MLA thanlon Inn, Lamphelpat, Imphal ah kiholem ahiu. Sangmung ahileh, MANITRON nuai a Churachandpur District ah Aadhaar a ding ah limlatu khat ahia, mi kamtawm leh kipezo tak ahidan hiat a hi.

State in Martyrs’ Day mang

Imphal, Jan. 30 *(Nisin Thuhiltu)* : India Pa (Father of the Nation) ti ah kihia, Mahatma Gandhi thi ni, January 30 a hi dungzui in tuni’n India gamsung mun chuamchuam ah Martyrs’ Day mat in a um a, Mahatma Gandhi zana piakna leh suunna ah hun mat a hi. State Level ah GM Hall, Imphal ah Martyrs’ Day mat in a um a, zia hun a chun Manipur Governor Dr. Najma Heptulla mapuina’n Chief Minister N. Biren Singh leh a Council Minister te, Opposition leader O. Ibobi Singh, MLA leh top civil leh police official ten Mahatma Gandhi statue chung ah pakcha piakna leh zana piakna a nei ui. Chun, warning signal leh closing signal dan in siren sukgit in a um a, minute 2 sung Mahatma Gandhi suunna a um hi. Zia minute 2 sung a chun, Mahatma Gandhi zana etsakna’n gari taitua zosia chawlsak in a um a, a suunna nei zaw in, Shri Shri Bal Mukundev Government Music College, Imphal a pat teacher leh student ten Mahatma Gandhi ngaisan mama, Bhajans suklatna a nei ui.

‘A semlo te, sepman piak hilo ding: Minister Nemcha Kipgen
Imphal, Jan. 30 *(Nisin Thuhiltu)* : Social Welfare &Cooperation Minister Nemcha Kipgen in tuni’n District Social Welfare Office, Bishnupur District vethakna (surprise visit ) a nei a, zia hun a chun, semtu te attendance a hawilo ziak in ama departments in semtu te ding ah “ a semlo te, sepman piaklo ding” ti a vaima theipen ah chiapi (implement) bawl ding hin a gen hi. Minister Nemcha Kipgen in, officers-in-charge te chu kituptak ah attendance register mang ding leh a hun tak ah office kai ding, office hours sung ah kituptak ah nasem chiat ding in hiatsakna a bawl a, semtu ten ana sepman ding ua government in thalaw (salary) a piak a hi hezingkawm ah panlakna a nei ding uh pawimaw hin a gen hi. Official te chu mipi te haksatna kituptak ah ngaitha ding leh hepna neitak ah a haksatnau sukven theina ding ah panla chiat ding in chialna a bawl a, a pawimaw dungzui ah department te haksatna sukven theina ding ah ama’n a theina chan ah panlakpi ding hin le a gen hi. Social Welfare Minister in District Social Welfare Office etthakna anei hun sung a chun, rooms sung zosia chuan in office sung leh pua thiangtho tak ah kawi ding in le semtu te a hiatsak a, a kitupzawk sem theina ding ah District office te vethakna nei zing ding hin a gen hi.

Defence Ministry delegates ten Bishnupur District entha
Bishnupur, Jan. 30 *(Nisin Thuhiltu)* : Ministry of Defence nuai ah National Defence Colleg a pat delegate member 18 ten tuni, 30th January 2018 in Bishnupur district headquarter vena nei in, thil umdan etthakna a nei ui. Delegate member 18 te chu Major General Shri Vinaya Chandran (YSM, SM) in amapui a, delegate member te lak a chun, Israel, Japan leh Nigeria a pat foreign military delegate te le a pang ui. Chun, Pawan Yadav, Bishnupur DC leh Yogeshchandra H, SP mapui district team te tawh Mini Secretariat in meeting a nei ua, Panchayati Raj, Law and order, Women empowerment, Health, Education, Power, NGOs etc tawh kisai ah National Defence Colleg a pat delegate member ten thudawtna a nei ui. Meeting neizaw in delegate member ten Sendra Resort panna’n mun chuamchuam vena a nei ui.

Tobacco product dodal maw, aman (price) sukal???
Churachandpur Police in Old Bazar, Tuibong leh New Bazar ah dukan/dawr leh godown te check bawl in, tobacco product bangzat hem te a mandawk ua, tobacco product matdaw ah umte lak a chun, sadar 905, baba 120, baba black, sajan tobacco, balkimi tobacco, rally khaini tobacco, nerula tobacco ti te a pang a, a sum ah hisap ah Rs 4 lakh man ding vel a hi. Zialo a chun, a zuaktu mi 7 te man in Cigarettes and Other Tobacco Products (Prohibition of Advertisement and Regulation of Trade and Commerce, Production, Supply and Distribution) Act, 200 nuai ah case ziklut in a um hi. Zia gual panlakna hi, hun sawtpi a pat uh hitamleh tuni tiang ah tobacco product a kimuzo tapuai ti hiat ding khat le a um nai tadi lo a hi.

Mihing damtheina ding ah hawilo ah kihia tobacco product dodalna nei police te panlakna I pakcha, dodalna a pat ngal ua leh dodal zo ngei ding in panlakna neizawm leu dawi a um hi. Ahinlah tobacco product dodalna pan-ngal ah a ban zawm lo ding tho ahiuleh a ki pat phawlawklo uh thilpha hizaw ding in ginchat a um hi. A ziak chu, tobacco product leh khamthei dodal hizawlo ah a man (price) sukaltu mai in a pangkha sek ua, tobacco product leh khamthei ah sumkawlvei mite phungvuktu’n a le pan kit zaw sek ui. Khatvei, nivei tobacco product dodalna nasep nei ah chawlsan kit ziang kiti chu support bawl ding mipi te ding a le panlakpina ding hun um thei lo a hi.

Hiatthei ding in, lawting tak ah India ah tobacco khap (banned) ding chu thil haksa mama hiding a hi. A ziak chu, India ah tobacco product - chep leh muan chiing/ addict mi 200 million val a um a, zia chu khawvel pumpi chep leh muan chiing/ addict population 12% lam umna gam tina a hi. Thakhat thu’n Tobacco banned kibawl taleh tobacco addicts mi 200 million val te chu banggual in a um diam uh? Zialo a chun, Tobacco industry kiti mitamtak te sum muna leh kivakna pang a hi kit a, India ah tobacco manufacturer lianpen ah kihia chu ITC Ltd a hia, India gamsung ah tobacco product kizuak 80 % chu ITC Ltd product a hi. Cigarette manufacturer dang, Godfrey Philips in kum 2017 a khah turnover 3600 crore mu zo ah taklat a hi. Commercial sector ah Indian tobacco industry chu direct leh indirect ah mitamtak te sepna petu leh nisin kivakna, sum muna pang a hi.

Zia ziak a chun, a pha ding dawina ziak ah panlakna um a hi ngal leh kituptak in panlakna um zawm leh ti I dawi a, Manipur Government in tobacco product dodalna chiapi taktak ding a ti ahileh, National Highway, Imphal-Dimapur, Silchar -Imphal etc ah tobacco product puaklut ding khap bik bek henlah tobacco manufacturer te sukbeina ding in panlakna taktak nei leh Churachandpur District sung ah neilo ziak ah tobacco product zuak ah sumkawl veimi kiam chuam mama ding, tobacco product dodalna nasep in umzia a nei ngei ding in ginchat a um hi.