Ropiang Foundation in "electric &motor repair skills zil ding mi 15 teldawk

Lamka, Jan. 21 *(Nisin Thuhiltu)* : Ropiang Foundation in 20th Jan. 2018, Mission Road, Lamka Town ah a office mun un, ICICI Academy Jaipur ah_"electric and motor repair skills" zilthei ding mi laakna a nei hi. Zia hun a chun candidate hunkhawp a pang ua, mi 10-15 kikaal lak ding a tiu himaleh candidate te hawithei leh deserving mama a sak ziak un Interview Board in mi 15 (full seats) merit in select a bawl ui. Interview hun ah select khaklo candidate te chu a bawl hawilo hizawlo ah, upcoming courses ah pan thei zel ding hin a kigen hi. Select ah um te chu tarik 6 February 2018 tiang ah training centre, ICICI Academy Jaipur a tun uh ngai ding a hia, course ahileh tarik 9 February 2018 ah kipan ding, tha 3 sung intensive residential training course nei ding a hiu. Course a zaw tak uh leh a thiamna dungzui ua company chuamchuam khawpi chuamchuam ah placement a mutheina ding uh Ropiang Foundation in ngaitua pi ding a hi. Zia _"electric and motor repair skills" zilna a pat chu candidate ten amau nek-leh-chaak diing hawlna panpitu leh society in a pawimaw electric leh gari repairs te le phatchuampi hithei ding ua ginchat a hidan Ropiang Foundation in a taklang hi. Select ah um candidate te a hiuleh - 1. Doulalsiam s/o Thangtual - Lanva; 2. Thanglianlal S. Guite s/o Tuanchinkhup - Guite Mualveng; 3. Dongkhankhual s/o Thongsuanlian - Vengnuam South; 4. N. Ginbiakmuan s/o Jamzalian – Gangpimual; 5. K. Thanglianmuan s/o K. Nengpau- Khominthang; 6. L. Ginmuansang s/o (L) Ginzahau - Zeilang Veng; 7. Samuel Tonsing s/o Ts Thanglian - Dorcas Road; 8. Alean Haokip s/o Paokholun Haokip - B. Aizalon; 9. Ginkipha Hoinge s/o Barnaba Thangchoilian – Leisang; 10. Ginzakhup s/o (L) Thangsuanpau - Zion Veng; 11. Kaibiaksiam Suantah s/o Khupkhansuan New Mission Veng; 12. James Lamzamang s/o Khamneithang - Zion Veng Rengkai; 13. H. Nangson s/o Pumkhansuan - Gangpimual; 14. Lianchinzam Langel s/o Pautuan Khominthang leh 15. Khaigouhao Haokip s/o Lalkhosei Haokip - Headquarter Veng te a hiu.

CM in Chief Minister-gi Hakshelgi Tengbang kiti scheme thak leh Advanced Life Support Ambulances 10 hawng

Imphal, Jan. 21 *(Nisin Thuhiltu)* : Manipur Chief Minister N. Biren Singh in Khuman Lampak Main Stadium ah tuni, January 21, 2018 zingkallam dak 11:00 in Manipur Statehood Day matna kawm in Chief Minister-gi Hakshelgi Tengbang (CMHT) kiti scheme thak leh Advanced Life Support Ambulances 10 hawnna a nei hi. Chief Minister-gi Hakshelgi Tengbang (CMHT) ahiloleh (Manipur Health Protection Scheme) kiti chu BPL family/migenthei damlona ziak ah hospital tut ah um te cashless treatment Rs. 50,000/- tiang (for Primary & Secondary Care) a thawn ah piak hiding, Tertiary (Critical Care) te medical treatment Rs. 2 lakhs tiang per family (per year) ah cover thei ding , floater basis ah chiapi hiding a hi. Chuleh, natna chi chuam chuam 7 - critical ailments - cardiovascular diseases, kidney ailments, neurological conditions, liver ailments, cancer, neo-natal diseases leh burns te le zia scheme hin cover ding a hi. Chief Minister-gi Hakshelgi Tengbang (CMHT) phatchuampi thei ding te chu - SECC Data a min chuang, Widows, Disabled leh AAY card holders te hiding a hiu a, enrolment fee Rs. 50/- (per family) ah a piak uh ngai ding a hi. Himaleh AAY, Disabled leh Widows ten enrolment fee a piak uh ngailo ding a hi.

Advanced Life Support Ambulances 10 kihawng dawk thak te ahileh a sung ah khutmat bukim tak kikawi a hia, tanggam leh mun gamla taktak ah tai vel thei ding ah guanggal a hi.

Chief Minister in a thugenna a chun, CMHT chu Manipur Government thak dream-scheme ahidan gen in, mipi te ding ah noble social security schemes hawng thei ah a um chu kipak mama in a gen hi. Social security schemes dang, Chief Minister-gi Sotharabashing gi Tengbang (CMST) kiti December 3, 2017 hawn hita in le a taklang a, project lawtin theina ding ah panla,
Cabinet Minister, MLA, bureaucrat, official te chung ah kipakthu gen in, a lungtup uh mualsua thei ah a umna chung in kipakpi thu a puang hi.

Chief Minister-gi Hakshelgi Tengbang(CMHT)” hawndawna hun chu,N Biren Singh, Chief Minister of Manipur banah Y Joykumar singh, Deputy Chief Minister, L Jayantakumar Singh Minister of Health and Family Welfare, Law and LA, Arts and Culture, CADA, Th Biswajit Singh, Minister PWD, RD and PR, Commerce and Industries, Power, AR and Training, IPR, Manipur, Karam Shyam, Minister Revenue, CAF and PD, Letpao Haokip, Minister IFCD and YAS, N Layisii, Tribal Affairs and Hill Areas Development, Fisheries, Th Shyamkumar minister forest MAHUD and Horticulture and Soil Conservation, L Dikho, minister, PHED Printing and stationery, V Hangkhanlian, Agriculture, Veterinary and Animal Husbandry; Nemcha kipgen, Minister of Social Welfare and Cooperation; Th. Radheshyam singh, Minister of Education, Labour and Employment leh RR Rashmi, IAS, Chief secretary, Manipur te’n le a uap ua, CCpur District a pat Government official leh medical department apat official leh staff hunkhawp ten le a uap ui.

PWF in Conference -cum- Golden Jubilee mang zo

Saipum, Jan. 21 *(Nisin Thuhiltu)* : Khuga Sadar Presbyterian (KSP) nuai ah Presbyterian Women Fellowship (PWF) in 18th - 21th January 2018 sung ah “Lalpa Thagau ziak bep in a hi” (Zach. 4:6) ti thupi nei ah Saipum Presbyterian Church ah “6th Biennial Conference -cum- Golden Jubilee (1968-2018)” a mat uh chu tuni 21st January 2018 nitak kikhawp hun in a mang zo ui. “6th Biennial Conference -cum- Golden Jubilee lawpna ahileh Rev. Thanglianmang, Moderator, Khuga Sadar Presbyterian (KSP) in a hawnna a la nei a hia, khawmpi hun sung in Jubilee Magazine hawnna, Rev. S.T Kaia Vaiphei in Executive Secretary, Manipur Synod in a nei a, kitelna leh vaihawmna um in, Presbyterian Women Fellowship (PWF) Chairperson thak ding ah Mrs Ngaineihat, Secretary - Deem Melody; Treasurer - Mrs L Chawii; Finance Secretary - Mrs Tingnu te teltin in a um ui. Chun, Rev. Thanglianmang, Moderator, Khuga Sadar Presbyterian (KSP) in Golden Jubilee (1968-2018) suangphu hawnna a nei a, telchuam ah um ten Jubilee dak khetna nei in, Mrs Rochhungi, Tuibong, HQ Church, Mrs Tingnu, Full Time Secretary, PWF (KSP), Mrs. Thianhoi, Imphal, Mrs. Deem Melody, outgoing Chairperson leh Rev. Siama Phaltual, Executive Secretary i/c PWF ten Speaker hina tawh Pathian thugenna a nei ui. Zialo a chun, Saipum KKP; Sadar District PWF, Khuga District Choir, KKP; Tuithanak District Choir, KKP, Miss Hatshi & Miss Siami of Leilon, Miss Chinneikim, Miss Tinghoithiam, Miss Tinghoilal & Mr Thangliankhom of Saipum te leh Miss Mami of Ngathal ten Pathian chawihawina laa a sau’ hi.

Regular Classes kipan ding
Lamka, Jan. 21 *(Nisin Thuhiltu)* : Vanllalawm Guite, Principal, Churachandpur College in thusua a bawlna a chun, 22-01-2018 (Monday) a pat Semesters zosia Regular Classes kipanta ding a hidan a taklang a, Staffs leh Students te kai kim chiat ding in hiatsakna a bawl hi.

NCC contingent te second commander hina tawh mapui ding

Kangvai, Jan. 21 *(Nisin Thuhiltu)* : Mr Jasper Nenglunsang Vaiphei (16) s/o Mr Khualneilawm Vaiphei & Mrs Lily Nemneilam Vaiphei of Torbung Village, Churachandpur District, Manipur in 26th January 2018 leh Republic Day parade hun ah Rajpat, New Delhi ah NCC contingent te second commander hina tawh mapui ding a hi. Jasper Nenglunsang Vaiphei ahileh tu leh tu Rayburn College Churachandpur ah class XI sim zinglai a hi.

Practice thei ding ah certificate mu

Imphal, Jan. 21 *(Nisin Thuhiltu)* : ITS College, Greater Noida, Uttar Pradesh ah B.D.S., Bachelor of Dental Surgery (Dental) zilzing lai Miss Betty d/o Henlal Vaiphei of Kamuching Village/Langol Housing Complex in tunaicha a khan "White Coat Ceremony" a nei hun ua, Dental Surgery practice pantheita ding in certificate a mui. Ama ahileh June 2019 ah a zilna zo thiang ding a hia, himaleh a performance hawi ziak ah practice bawl thei ding ah certificate piak ah um a hi.

SSPP GHQ President thak ding Thanglalmuan Hauzel in kitiamna nei

Lamka, Jan. 21 *(Nisin Thuhiltu)* : Siamsinpawlpi (SSPP) General Headquarter ah President thak ding in Thanglalmuan Hauzel in tuni, January 21, 2018 sunnung dak 2:00 in SSPP Complex, Siloam Veng, Bungmual ah kitiamna a nei hi. Zia kitiamna hun chu Dr. N. Lalzagou, Secretary, SSPP Foundation Trust in amapui a, Ricky Vanlallawm, Chairman, Standing Committee, SSPP GHQ in SSPP puanlaap (flag) nuai ah kum 2018-2021 sung ah SSPP GHQ, President ding Thanglalmuan Hauzel kitiamsakna a nei hi. Chun, Rev. Khen P. Tombing in pauchap piakna a nei a, Dr. Lalazagou in huntawp ah kipakthu genna nei in kitiamna hun a mangzo ui.

Thanglalmuan Hauzel, President, SSPP GHQ in kitiamna a neizaw ah a thugenna a chun, Siamsinna ngaikhawkna leh puaknatna liantak nei ziak ah Presidential Election contest bawl a hidan taklang in, Siamsinpawlpi phudaw lim ah pawl sawm zo a la tam nailo himaleh tuhun ah Graduate tamtak sepna neilo umta a hidan a gen a, ziana chung a chu “Education for Achievement” ti mai huntawklo, phatchuampi thei ding ah thiamna mat ding pawimaw a hidan a gen hi. Pankhawm ah Siamsin Hostel ahiloleh Siamsin Inn kiti siamdaw ding lunggul a hidan le gen in, nidang ah Science subject umna, tu ah umtalo Lamka College le thasuak khak ding lauthawng a hidan gen in, election hun ah mizosia’n panpi chuam ki nei chiat himaleh election zaw a hitakna chung ah kihiatthiamlona khenkhat um te kihiathiam ding leh Siamsin pawlpi a ding ah a tam theipen in panlak khawm ding a nawp thu a gen hi. SSPP GHQ vaipua a kisan ding uh tawh kitawn ah tunung sawtlo ah audit um ding, zia zaw chuleh kikhutna um ding hin a kigen hi.

Aina Battalion, Football Tournament khakna nei

Lamka, Jan. 21 *(Nisin Thuhiltu)* : Assam Rifle, Aina Battalion, Parbung ah um ten, khawsung leh kim leh kiang ah khua um te a pat khangthak te a ding in (L) Lieutenant Colonel Rajeev Bakshi hiatzingna ding in Football Tournament a sai uh chu, January 20, 2018 in final a um hi. Tournament ah Aina Battalion huapsung ah Churachandpur leh Pherzawl District a pat team 13 te a pang ua, Tournament ah Champion Team, Runners-up, Beast Player leh Best Player te’n Cash Award a sang ui. Final Match ah Parbung B leh Senvon A a kihel ua, Parbung B in gualzawna chang in Rs. 10,000 a sang ua, Runners-up Senvon A in Rs. 7,500 sang in, Best Player in Rs. 3,000 a sang hi. Chun, Best Goalkeeper in Rs. 2,000 a sang hi. Tournament ahileh Assam Rifle in khangthak te’n kihelna a pi bawl ding uh, khamthei leh thil dawi umlo bawlna a pat a kikawi kang ding uh tupna tawh organised a bawl hin a kigen hi. Tournament hunsung a chun, Assam Rifle in football pek bep hilo in, khangthak te Career Counseling bawlna le nei in, government leh armed forces lam ah lunglutna nei te ziltilna a nei ua, online application le a bawl piak ui. (L) Lieutenant Colonel Rajeev Bakshi ahileh “Operation Clear” nei hun ah thingnuaimi te khut ah thina tuak a hi.

Pastor Quarter-cum-Saptuam Office hawng

Lamka, Jan. 21 *(Nisin Thuhiltu)* : Evangelical Baptist Convention (EBC) Lamka South Division (LSD) huapsung ah um, EBCC Lamzang in tuni, January 21, 2018 sunma dak 11:15 in Pastor Quarter-cum-Saptuam Office ding hawnna leh a latna a nei hi. Zia hun a chun, Upa S. Lalngailian, Chairman, Division Working Committee, LSD in Pastor Quarter-cum-Kochuam Office hawnna a nei a, Rev. V. Nenglian, Division Superintendent, LSD in Pathian’ kiang ah a latna a nei hi.

Manipur in 47th Statehood Day mang

Imphal, Jan. 21 *(Nisin Thuhiltu)* : 1st Battalion Manipur Rifles ground ah tuni’n State-level ah Manipur, 47th Statehood Day mat in a um hi. Zia hun a chun, parade contingents 59 ten parade a bawl ua, khuallian hina tawh hun matna uap, Chief Guest, Chief Minister N. Biren Singh in salute lakna a nei hi. Chief Minister N. Biren Singh in a thugenna a chun, January 15, 2018 ni ah M-Sector, Kanglapat road ah bomb ki supuak chu government in ngaikhawk mama a hidan taklang in, State Cabinet ah thil umdan puaklut a himasang ah high power committee in bomb puakna tawh kisai khualna nei zui zing a hidan a gen hi. Bomb supuak ah UG group a ki puang umlo a hina chung ua, mi khenkhat in government suk minsiat theina ding ah zia gual thil bawl chu a nei uh hiding ah muangmaw a hidan gen in, Union Home Minister Rajnath Singh kiang ah le thil umdan tutta hin a gen hi.
Prime Minister Narendra Modi, Union Ministers leh state chuamchuam ah Chief Minister ten Statehood Day a hi tawh kitawn ah state mipi wish bawl a hidan uh puang kawm in, railway line ah nasem officials leh worker te kipuimangna Suspension of Operation (SoO) te a ki gawl khak ding uh muangmaw a hidan a gen hi. Zia chung a chun Chief Minister in kuama’n development work chiapi staff leh semtu te chawk buai leh sukgenthei chiinglo ding in a kisai khakpi te chialna a bawl hi.
N. Biren in a genzawm zelna a chun, Government in mipi te lungtup leh thil dawi taksua theina ding ah panlakna nei zing a hidan gen in, thiangtho tak ah panlakna nei zing ding hin a gen a, State Government in Anti-Corruption Police Station leh Anti-Corruption Cell mai siamdawklo ah Grievances Redressal Cell le siamdawk in a gen hi.

Anti-Corruption Cell of CM’s Secretariat incomplaint 500 muta leh case 165 ah action lak hita a hdian a gen hi. Zia hun matna chu Ministers, MLA leh high ranking civil leh police officer tamtak ten a uap ui.

Education Minister in foundation suangphu hawng

Imphal, Jan. 21 *(Nisin Thuhiltu)* : Langmeidong ah Langmeidong Higher Secondary School, main building sakna ding in tuni’n Education Minister Thokchom Radhehsyam in foundation suangphu hawnna a nei a, school kiti, mun thiangtho (holy place) a hidan gen in, tunung ah khuam pawimaw tak hiding naupang te thiamzilna mun hin a gen a, ziana chung a chu infrastructure a kitup ding pawimaw in a gen hi. Foundation suangphu hawnna hun chu local MLA, Hiyanglam A/C Dr. Y. Radhehsyam, Director of Education (S) Th. Kirankumar, Principal, Zilla Parishad Member , teacher, non teaching staffs leh students ten a uap ui.

Asha worker ten kiphinna nei

Imphal, Jan. 21 *(Nisin Thuhiltu)* : Manipur Chief Minister N. Biren Singh in Khuman Lampak Main Stadium ah tuni, January 21, 2018 zingkallam dak 11:00 ah Manipur Statehood Day matna kawm ah Chief Minister-gi Hakshelgi Tengbang (CMHT) kiti scheme thak leh Advanced Life Support Ambulances 10 hawnna a nei zaw in, ASHA worker ten Indoor stadium mai in kiphinna a nei ui. Asha worker ten zia hun matna a chu memorandum piaklutna nei ah, Chief Minister in a haksatnau leh a demand uh tawh hiatpi a hidan a thugenna a genlat ding kinepna nei himaleh genkhak ah a umlo ziak ah kiphinna a nei uh hin a kigen hi.
ASHA workers’ body President Thoibi in a gennaa chun, January 17, 2018 ah ASHA worker ten Anganwadi worker leh Mid Day Meal cooks’ body in Chief Minister kiang ah memorandum piaklutna nei ah state dang te gual ah treatment kibang leh increment Rs 600 per day banah incentives due ah um te sukthian ding phutna nei uh himaleh Chief Minister leh Health Minister in Asha worker te panlakna hiatpi keilo leh genlat nei keilo ah a um uh chu ngaithiamlo a hidan uh a gen hi. Chuleh, Chief Minister leh kuallian dang dang ten Khuman Lampak a nutsiau tawh kitawn ah ASHA worker te chu refreshment, nek leh dawn ding bangma piak hilo a hidan uh gen in, ASHA te kichuambawlna chu ngaithiamlo uh hin le a gen hi.

Grenade puak ziak ah naupang 1 thi, 4 liam
Imphal, Jan. 21 *(Nisin Thuhiltu)* : Noney district, Khoupum Police Station huapsung, Sabunglong Leisok Village ah tuni, 21 January 2018 zingkal lam dak 9:30 tuam in naupang ten kihelna (toy) dan ah hand grenade khat kihelna a nei uh chu puakzak in, naupang 1 in thina a tuak a, midang 4 in liamna a tuak ui. lawi te mi 4 in liamna a tuak ui. Thina tuak chu Shahatngam Kamei (9) s/o (L) Ringlungpou of Subunglong Part -1 a hia, liamna tuak te ahiuleh - Gaillianshui Gonmei (5) s/o Kakinthai, Zaojianthuliu Kamei (2), d/o Gaijaini Kamei, Silas Kamei (5) s/o Khuaithoalung Kamei leh Guillianei Kamei (4) d/o Gairihpou Kamei of Subunglong Part -1 village, Noney district te a hiu. Liamna tuak te chu RIMS hospital tut in a um ui. A kigendan in naupang te a kihel hun ua, leitual ah a mudaw kawm uh grenade chu kihelna (toy) sa, kihelna a nei ua leh puakzak hin a kigen hi.

Cycle Day: pollution-free environment umtheina ding ah cycle pawimaw: Minister Karam Shyam

Imphal, Jan. 21*(Nisin Thuhiltu)* : PCTC, Khoyathong, Imphal ah tuni’n Cycle Day mat in a um hi. Zia hun chu CAF,PD & Revenue Minister, Karam Shyam in khuallian hina tawh a uap a, Cycle Day, cycle rally flag-off bawlna a nei hi. Minister, Karam Shyam in a thugenna a chun,Cycle Day ki matna ziak chu cycle tai ziak ah a pha chuam um te mipin a hiatthiam theina ding ua kimang a hidan taklang in, thau (oil) leh petroleum product te khekchak thiam pawimaw a hidan a gen hi. Ama school kai lai ah 13 km cycle ah tai sek a hidan gen in, insung inchen dan zil ah school a la kai himaleh tu hun ah student tamtak car ah school/college kai umta hin a gen hi. Income nei le hinailo, sum ah ama leh ama leh kitodel thei le hinailo ah nu leh pa te kingakna neikawm ah car ah school/college kai te a kizampi ding uh pawimaw in le a gen a, ama’n pollution-free environment, better economy leh damtheina a um theina ding ah PM Modi in vision ah a nei “Cyclotron” chu support bawl hin a gen hi. Cycle Day, cycle rally a chun Minister, Karam Shyam, Green Revolution Cyclist team leh midang dang te a pang ua, Khoyathong a pat CRPF 69 Main Gate, Mantripukhri tiang tai in, Khongnang Ani Karak ah petto in a kipatdawnau Khoyathong tiang in rally a nei ui.

Statehood Day Women’s Polo Tournament final ah Kenya in 5-4 ah USA zo

Imphal, Jan. 21 *(Nisin Thuhiltu)* : Mapal Kangjeibung, Imphal Polo ground ah tuni’n 3rd Manipur Statehood Day Women’s Polo Tournament final match leh closing ceremony a um a, Governor Dr. Najma Heptulla, All Manipur Polo Association, President, Dr. K. Saratchandra Singh leh Chairman, Tourism Corporation of Manipur Ltd. Dr. Sapam Ranjan ten khuallian hina tawh a uap ui. Governor Dr. Najma Heptulla in a thugenna a chun Women’s Polo Tournament ah a pan khak chu kipak mama a hidan gen in, polo games kihelna Mapal Kangjeibung chu world oldest living polo ground ah kihia a hitin a gen hi. Union Minister of Tourism (i/c) K.J. Alphons in international team te kihelna a pan theina ding ua panlakna a neina chung ah kipakthu gen in, Polo games chu Manipur a piang, state mipi te ki letsakpi leh ki neisakpi tak games hin a gen hi.

A langkhatlam in, Manipur Statehood Day Women’s Polo Tournament final match a chun, Kenya leh USA te a kihel ua, Kenya in 5-4 in gualzawna a chang hi. 3rd Manipur Statehood Day Women’s Polo Tournament ahileh Department of Tourism, Government of Manipur sponsored bawlna All Manipur Polo Association in organised a bawl a hia, 17th January, 2018 ah kipan a hi. Tournament a chun, team 6 - USA, Australia, Kenya, Indian Polo Association leh Manipur a pat team 2 a pang ui.