Defence Acquisition Council in Rs. 3,547 Crore ah Assault Rifles, Carbines chawk ding lemsa
New Delhi, Jan. 16 *(Nisin Thuhiltu)* : Defence Minister Nirmala Sitharaman mapui, top government panel- Defence Acquisition Council in tuni’n fast-track basis ah India armed forces - Army, Air Force, Navy leh Coast Guard te mat ding Assault Rifles leh Battle Carbines 1,66,000 chawk ding ah guanggal chu lemsakpina a siam hi. Zia ah meithal chawkna ding tawh kisai hi kum tamtak buaipi ah a la um hita a hia, defence ministry highest decision-making body Defence Acquisition Council in sepai te thil dawt chu tuktan taklo ding leh a vaima theipen ah chawk ding ah thupukna a siam a hi. Thupukna dungzui a chu, armed forces ten Defence Research and Development Organisation, or DRDO te panna, khawvel ah meithal siam (gun manufacturer ) chuamchuam te khutsuak meithal etthakna nei ding a hiu a, a lungtun dan zil ua contract suai kaipi ding leh carbines 93,895 leh assault rifles 72,400 chawk ngal hiding ti a hi.
India sepai te ahiuleh tu ah India khutsuak - AK-47 leh INSAS ahiloleh Indian Small Arms System rifles, te matsak/chawisak a hiu a, tukum sung ah a meithal mat/chawi uh chu meithal hawizaw ah san (replace) hiding, meithal chawkthak ah um ding te chu border tuam leh counter-insurgency operations ah mat hi chuam bik ding a hi.
A langkhatlam ah Indian Army ten kum 2017 a khan, Ordnance Factory Board in a siam 7.62mm assault rifles chu reject a la bawl a, kum 2016 in le 5.56 mm INSAS rifle thasang ah mat ding ti ah kigen indigenously made gun – Excaliburte le reject a la bawl bawk hi. Zialo a chun, 2015-16 ah meithal siam (gun manufacturer ) 4 te shortlist a la bawl a, etthakna a nei hun ua, Israel Weapons Industries khutsuak bep chu chawk tâk in a la kawi ui.
Research bawlna ding ah Infrastructure leh khutmat hawi pawimaw: Najma Heptulla
Imphal, Jan. 16 *(Nisin Thuhiltu)* : Manipur Governor Dr. Najma Heptulla in tuni’n research work chiapina ding ah infrastructure leh equipments a hawi ding pawimaw a hidan Jubilee Hall, RIMS, Imphal ah Department of Radio Diagnosis, Regional Institute of Medical Sciences (RIMS) a ding "Digital Radiography & High End Ultrasonography Machines" hawnna a nei hun in a gen hi.
RIMS chu 1972 ah phudaw hitamaleh tu ah Regional Institute dinmun ah um thei pan a hidan gen in, RIMS in North Eastern States te Medical, Dental, Nursing Education, etc. thil ah puaihuai theita hin a gen hi. RIMS in infrastructure lam ah taksapna liantak tuak zing himaleh tu kum 1/ 2 sung ah talent nei hawi taktak teachers, Doctors, etc te panlakna ziak ah khangto mama in a gen hi.
Manipur chu hill area liantak nei a hina chung ah communication leh medical aid lam thil ah mun gamla um te kithuapi ding thil haksa mama a hina chung ah Flying Dispensary, um theina ding ah panla zing hin a gen a, Central Government Scheme nuai ah remote rural leh hill areas ah damlo te panpi theina ding ah panla ding hin a gen hi. Chun, damlo te panpi theina ding ah donate machine donate Samsung Electronics Pvt. Ltd te pakchatthu gen in, state sung ah mipi te chu damlo leh panpi ngai te panpina ding ah kalsuan chiat ding in chialna a bawl hi.
Hun matna uap, Dr. Manoj Rajoria, Convenor, Parliamentary Standing Committee on Health and Family Welfare, Government of India in a thugenna a chun, RIMS ah infrastructure siamhawina ding leh intake capacity tu ah 100 seat sukpunna ding ah government in panlakna nei a hidan a gen hi.
"Digital Radiography & High End Ultrasonography Machines" hawnna hun chu, Parliamentary Committee on Health and Family Welfare member - K. Somaprasad, MP, Rajya Sabha; Ashok Siddarth, MP, Rajya Sabha; K. Kamaraj, MP, Lok Sabha; Thangso Baite, MP, Lok Sabha; J.J.T. Natterjee, MP, Lok Sabha; Arjun Lal Meena, MP, Lok Sabha leh Gayatri Mishra Jt. Secretary, MoHFW; Prof. A. Santa Singh, Director, RIMS ten le a uap ua, senior citizens te ding ah Blue Card leh RIMS khangthu amasapen ding ah RIMS Calender, 2018 le hawn in a um hi.
CMO mapuina’ Performance Review Meeting nei
Lamka, Jan. 16 *(Nisin Thuhiltu)* : Dr. Kimngaihching, Chief Medical Officer (CMO), Churachandpur malatna in tuni, January 16, 2018 sunma dak 11:00 in a office chamber ah HMIS/MCTS tawh kisai District nasepna, Performance Review Meeting a um hi. Meeting hun ah Health Management Information System (HMIS)/Mother & Child Tracking System (MCTS) tawh kisai panlaknate genkhawm ahiban ah maban panlak ding dan genkhawm in a um hi. Zia hun ah Numei nauvawp hawldawna leh Antenatal Care (ANC) Check-Up tawh kisai ah ASHA-te mawpuak ahi dan leh, record ziklut dingdan tawh kisai gen tangpi in a um a, ASHA worker te’n numei in nau a vawp apat nau a nei chan ban ah, nausen a hunbi a damdawi piak leh kap ding tite ah mawpuakna liantak a nei ua, zia ding chun Record le hawitak ah a kawl ua, Report a piak zel uh ngai ahi dan gen in a um hi. Meeting hun ah District Health Society, Churachandpur nuai a District Program Manager (DPM), District Data Manager (DDM), Block chuamchuam a Program Manager-te leh Block Data Manager, Block HMIS Assistant leh ASHA Facilitator-te Meeting hun in a pang ui.
SSPP Presidential candidate Benjamin V Jamkhanpau ki withdraw
Lamka, Jan. 16 *(Nisin Thuhiltu)* : Siamsinpawlpi General Headquarters ah Presidential Election (2018-202) ah Candidate panite lak ah Benjamin V Jamkhanpau in Election Commission, SSPP-GHQ kiang ah zani, January 15, 2018 in SSPP-GHQ Presidential Candidate 2018-2021 a hina apat kizukkikna (withdrawal) lekha a pia’i. Presidential candidate, Benjamin V Jamkhanpau, in kizukkikna lekha ah a taklatna ah Siamsinpawlpi hepina leh zillaite maban ding khualna leh nam damna leh kipumkhatna ding dawina ah SSPP-GHQ Presidential Candidate 2018-2021 term sung vaipaw ding ah dawtna a bawl pawmpiak ahi ziak in kipakthu a gen a, lemsakna gual ah zia kitelna hi January 13, 2018 in SSPP Foundation Day matna hun ah Election Commission vaisaina nuai ah nei in a um a, zia hun ah mi tamzawte dawisakna leh muanna a chan ziak in dawisaktu leh ngainatute chung ah zana tawh kipakthu gen ahidan taklat in a um hi. Election Commission saina nuai ah Presidential Candidate-te vote mu zat sim ahi dingkuan ah, SSPP Aizawl Headquarters nuai a Block, Branch, Life Member leh Patron Member-te vote sim ding leh simlo ding tawh kisai Presidential Candidate-te sik-le-chang a ding, Reference Person Biaklal leh Gousonlian-te’ lemsakpina tawh Election Commission in Aizawl HQ nuai a Block, Branch, Life Member leh Patron Member-te vote simlo ding a thupuk uh ahidan taklang a, zia thupukna, Election Procedures & Conduct Rules a Point number 5(v) dungzui in, “Election tawh kisai a thubuai a um leh Election Commission thukhenna pen thutawp ahi ding” ti himaleh Election Commission in zia thuneina pen kembit theilo ding khawp a boruak a um ziak a khawksa mama ahi dan Presidential Candidate Benjamin V Jamkhanpau in kizukkikna lekha in a taklang hi. Ziahaw ziak hin Bejamin in pawlpi dawithaw leh hawmthaw mama sung ah zillai hawilopi hunglut ding dawilona leh nam sung damna ding dawizawkna leh Pathian dawilam le a hizawk ding kinepna lianpi tawh zan January 15, 2018 in SSPP-GHQ Presidential Candidate a hina apat kizukkit ahidan a taklang hi. Hotute’n hepina tawh pawlpi a ding ah a nasepnate uh zana pekawm in pawlpi leh nam damna ding a kalsuan zawmzel ding in a dawisak thu a taklang a, mipi leh nautang in namsung damna leh kituakna ma pawimaw sa ahina ah, candidate a hina a pat a kizukkikna pen pawlpi leh nam itna ziak liauliau ahi ti pawmpi ding in Election commission kiang ah dawn in, maban a le zillaite a ding ah Pathian in hiatna leh thiamna a piakte mang ah semto zel ding ahidan Benjamin V Jamkhanpau in election commission SSPP-GHQ kiang a kizukkikna lekha a piakna ah taklat in a um hi. SSPP GHQ a presidential candidate tawh kisai in presidential candidate panite apat zani leh tuni ah cable news ah suadaw ahi tawh kitawn in, SSPP GHQ presidential candidate thu tawh kisai genveng, saifel ahima chan news ah hung kisualo phawt ding ahi.
Puankhui dan ziltil
Lamka, Jan. 16 *(Nisin Thuhiltu)* : Dorcas Central Sub Committe (DCSC) in DORCED project nuai a innsungkuan khawsakna haksa diakte kiang ah panpina leh a nekhawlna ding un puankhui dan a zilsak ui. DORCED project nuai a puankhui zilna ahileh ningkum 2017 June tha apat a zil ua, puankhui a zilzaw utawh kitawn in practical a DORCED naupangte uniform khuina ding in tuni January 16, 2018 in Dorcas Hall Compund, New Lamka ah Rev Ginmalsawm, Director of Social Development in Dorcas Central Sub Committe DCSC leh puankhuitu ding mi-3 te Pathian kiang ah latna a nei hi.
Malaria Deptt. in gari thak nei
Lamka, Jan. 16 *(Nisin Thuhiltu)* : Government of India nuai a Intensified Malaria Elimination Project, National Vector Borne Disease Control Program (NVBDCP) Malaria Department, Churachandpur District in a mat ding in government apat gari thak Bolero LX piak in a um ui. Gari thak Bolero LX ahileh Imphal a hung tung tawh kitawn in Malaria Department, Churachandpur in a chiasa January 12, 2018 in SMO, Regional Health & Family Welfare, Imphal leh Director, Health Services, Government of Manipur hiatpi in zani, January 15, 2018 in Malaria Office, CMO Campus ah Department gari thak matpatna ding in Malaria Department Staff, Pa Hau, in Pathian kiang ah a kawlsakna leh a latna nei in, gari thak a mang pan ngal ui. Gari thak Bolero LX body ah malaria apat kiveng dingdan tawh kisai thu kizik leh lim chichuamchuam kitak a um hi.
Measles-Rubella Campaign bawlna enthak
Lamka, Jan. 16 *(Nisin Thuhiltu)* : Measles-Rubella Campaign Core Committee in tuni, January 16, 2018 sunnung dak 2:30 in CMO Office Chamber ah Meeting a nei ui. Measles-Rubella Campaign ding Central Government in a ngai pawimaw mama ziak in pan halak sem ding ah hiatsak a hi dungzui ua maban panlak dingdan a genkhawm ua, tuni tiang ah Centre Team in etthakna a nei dungzui ua zia campaign tawh kisai a chu Manipur a sepdaw umlo gual ah ngaidan a nei uh, District in hapitak ah panla ah, lawting tak ah nesep ahitheina ding a Educational Institution lam habawl ding in a genkhawm ui. Meeting hun ah Dr. Kimngaihching, CMO, Churachandpur, Dr. Liankhawzam Guite, CMO Pherzawl, Dr. Jam Thianlal, DFWO, Churachandpur, Zenngaihlun, DPM, Churachandpur, Seiboi Mate, DDM, Churachandpur, K. Lalsanglian, DPM incharge, Pherzawl, Nengkhanlal, DI of School, ZEO Churachandpur leh Robin S. Pukhram, Secretary, CDPSA tite a pang ui.
CCpur VDF Association in kiphinna nei
Lamka, Jan. 16 *(Nisin Thuhiltu)* : Laltingen, President, Churachandpur District Village Defense Force Welfare Association (CDVDFWA) in tuni, January 16, 2018 sunnung dak 3:00 in Mini Secretariat Complex, Tuibuang ah thuthak saite kimupi in thalaw a mulo ziak ua kiphinna pan a hidan uh a gen hi. Laltingen in zia hun ah All Manipur VDF Welfare Association mapuina’ zani, January 15, 2018 ni ah General Body Meeting thupukna dungzui a Government in VDF-te thalaw, November 2017 apat a piaklo uh lungkimlo taklatna ding ah tuni, January 16, 2018 apat Cease Work Strike pan uh ahi dan gen in, thalaw piak a hi masia kiphinna sunzawm ding ahidan uh gen in, zia tawh kisai ah SP, RO/RI te’n a haksatna tuak uh hethiam a thagum a duty ding ah a sawllona chung ua kipakthu a gen ban a, VDF personnel te’n le hawitak ah a kiphinnau a zathuapna chung un kipakthu a gen hi. President mapuina tuni ah Secretariat a kihona nei in a um a, naupangte school admission bawl a, textbook, uniform leh a pawimaw dangdang chawk hunta banah Christmas hun a le thalaw mulo a hidan uh gen in, duty peilo ziak hilo a, a mu dingdawl uh a mulo ziak ua kiphinna a nei uh a hidan uh mipi zosia’n hiatpi ding in a taklang ui.
LAGSA Golden Jubilee lawpna kipan
Lamka, Jan,17 *(Nisin Thuhiltu)* : LAGSA ti ah kihia, Lonpi Area Games and Sports Association, Golden Jubilee Celebration chu Khopijang khua ah tuni, 16th January 2018 in a kipan hi. Zia hun chu YAS & WR Minister Letpao Haokip in Chief Guest hina tawh a uap a, Ginsuanhau Zou, Chairman, MANIREDA leh K. Ranjit Singh, MLA le former Minister ten Guests of Honour hina tawh uap in, Sheithang Haokip MDC leh Khupsei Haokip, Chief of Lonpi ten Function President leh Chief Host hina tawh a uap ui. LAGSA President leh Golden Jubilee Management Committee Chairman Ngamkholal Baite in LAGSA kum 50 tin dan leh LAGSA chanchin genna a nei a, Thiengnu Haokip, Jenny Touthang, Kamboi Baite, T. Sianpiahthang Zou, Marina, James Arjun Suantak ten laa’n mipi te a chawk lim mama ui. Chun, Lonpi Area Games and Sports Association kum 50 tin hiatzingna chung ah suangphu hawnna a um a, YAS & WR Minister Letpao Haokip in a hawnna a nei hi. LAGSA Golden Jubilee Champion kichuna ahileh Team/Club 32 ten nei ding a hiu a, zia chu 17th January 2018 ah kipan ding a hi.
CDSA in Physical Fitness Test ah pang te vaidawnna nei
Lamka, Jan. 16 *(Nisin Thuhiltu)* : All Manipur Football Association (AMFA) saina a Football Referee ding Physical Fitness Test ah pang te tuni, January 16, 2018 sunma dak 9:00 in Churachandpur District Sports Assocation (CDSA) in vaidawnna amau office mun, Hiangtam Lamka ah a nei ui. Fitness Test a ding in CDSA min in Churachandpur District apat mi 9 Imphal ah kuan in, a chiasa January 7, 2018 ni in Khuman Lampak Main Stadium mun ah Test a nei ua, zia hun ah CDSA min a kuan mi 9-te a leng un lawtinna a chang ui. Zia dungzui a chun James Vanlalhluna, Mansonmuan leh Chinsonlian te’n Grade IV in lawtinna chang ua, Jangkhochon, Lalsonmung, Thenmang, TS Thangzangam, Benjamin leh Lalramhlun te’n Grade V in lawtinna a chang ui. Hun kimat sung in Thiauthianmung Guite, President, CDSA in vaidawnna thu gen in, Churachandpur District sung a sports lam a khantona khat hiding a Imphal a Fitness Test neina ah pang District apat referees-te kipakpi mama ahidan gen a, amau apat a sports leh games lam a khantona thupitak a hung tun ding a dawi thu gen in, Fitness test nei hun a pang referees-te apat report chawmkim le ngaithak a hi. Vaidawn a umte apat James Vanlalhluna in fitness test tawh kisai report piakna nei a, Imphal mun ah fitness test nei ding ah Manipur district chuamchuam apat Pawsal 108 leh numei 12 kigawm in, mi 120 chiakhawm in, kumdang sang a fitness test lawting pen leh referee kihel tampen hun ahidan a gen hi. Hun mat ahi sung ma in District sung a Tournament chuamchuam a um hun ah, vaisai dingdan leh thupawimaw chuamchuam a genkhawm ui. Pastor D. Kamchinmang, Local Pastor, EBCC Hiangtam Lamka in lawtinna changte a ding ah tilkhona thu gen in, pauchappiakna le nei in hun matzaw ahi.
CCTV kawibe hiding: MAHUD Minister
Imphal, Jan,17 *(Nisin Thuhiltu)* : High Security Zone, Imphal Raj Bhavan kiangnai, PRO Defence Wing Office M Sector sung leh Johnstone Higher Secondary School kiangnai ah zani bomb 2 sukpuak ah um chu Municipal Administration, Housing and Urban Development (MAHUD) leh Town Planning Minister Thounaojam Shyamkumar in nasatak in demna a bawl a, Imphal khawpi sung bitna ding ah CCTV kawibe hiding in a taklang hi.
North East a ding ah Centre in Rs. 10,000 cr val sanctions: Manoj Sinha
Guwahati, Jan. 16 *(Nisin Thuhiltu)* : Union Telecommunication minister Manoj Sinha in Guwahati ah tuni thuthak lakhawm mite kiang ah a genna a chun, North East ah network connectivity siamhawina ding ah Centre in Rs. 10,000 cr val sanctioned bawl in a gen a, tukum 2018 sung ah zia project chu zaw (complete) hiding in a gen hi. Assam leh Arunachal Pardesh panna North East pumpi huap ah project chiapina ding ah MoU suai 2 kai ah um hin le a gen a, border areas ah network connection upgrade hiding in a gen hi. Assam IT minister Keshab Mahanta in a genna a chun, Centre in zia ah nasepna enzui ding a chu nodal officer 2 sawl ding hin a gen a, Assam ah Optical Fibre Cable vuina tukum 2018 sung ah zawthian a hiding a kinep thu a gen hi.