Henglep MLA mapuina’ school tawh kisai genkhawm
Lamka, Jan. 10 *(Nisin Thuhiltu)* : 57 Henglep Assembly Constituency MLA, T. Thangzalam Haokip alias TT Haokip, Chairman, Hill Areas Cummittee (HAC), Manipur mapuina in tuni, January 10, 2018 zingkal lam dak 10:30 in B. Vengnum Cummunity Hall ah Henglep Assembly Constituency sung ah khua- hausate, ZEO leh ADC nuai a school a semte leh RMSA/SSA teacher-te tawh school dinmun tawh kisai genkhawmna a um hi. Zia hun a chun, MLA pu’n Henglep Assembly Constituency sung ah school a sem, Headmaster/Headmistress leh staff-te ko in, school dinmun tawh kisai in dawtna a siam a, admission a bawlzaw hun hun ua student umzat report peding ah hiatsakna bawl in, school um te, bialsung mipite’ a ding ah kingakna tak a hitheina ding ah panla chiat ding in hiatsakna a bawl hi. Kingakna taklo school te chu lakdaw hiding leh ama mimal lemtina school kila dawk hizawlo ah Cabinet Thupukna dungzui ah school kila dawk hizaw ah ngaithiam ding in dawtna a siam hi. Zia kimu khawmna a chun, Zonal Education Office (ZEO) a pat Nanda Kumar, DI of School, Henglep; Autonumous District Council (ADC) a pat Pauthang, DI of School, Henglep leh khua-hausa leh school a sem staff tamtak te a chiakhawm ui. Hiatthei khat chu, 57 Henglep Assembly Constituency sung in Council nuai ah School 41 leh ZEO nuai ah School 49 a um a, Henglep MLA in Education tawh kisai ah zia gual meeting a bawl chu a 2 veina hita a hi.
CEO/Manipur in Final Photo Electoral Roll suadawk
Imphal, Jan. 10 *(Nisin Thuhiltu)* : Election Cummission of India in nitiam a piak tawh kitawn in, Chief Electoral Officer (CEO), Manipur in tuni, January 10, 2018 in Manipur pumpi ah Assembly Constituency 60 a ding Final Photo Electoral Roll a suadawk hi. Zia dungzui a chun, Manipur pumpi ah vote neithei Pawsal 9,32,791 leh numei 9,82,452 a um a, a kigawm in voter/elector 19,15,243 a um hi. Kum 2017 sang ah voter pawsal 7,360 leh numei 14,140 in a kibelap a, a kigawm in Manipur pumpi ah voter/elector 21,500 a kibelap hi. Final Electoral Roll ahileh Regional leh National Political party leh a kisaipi te’n Electoral Registration Officer (ERO) te office ah a thawn in muthei ding a hiu a, zialo a chu copy khat ah Rs. 2 leh half copy Re. 1 leh Assembly Constituency khat CD ah Rs. 300 h chawk thei ding a hi.
Pat (Yarn) Home Delivery Scheme chung ah MoA suai kai
Lamka, Jan. 10 *(Nisin Thuhiltu)* : Govt. in Puankhawngmi (Weavers) te a ding khualna ah "Yarn Delivery Scheme" a bawl uh, Churachandpur District ah Depot Operation nasep leh mawpuakna ah kinawptuana lekha ah suaikaina "Saannem" Store neitu Mr. L. Thiankham Tombing leh Mr. K Lamlee Kamei, Managing Director, Manipur Handloom and Handicrafts Dev. Corp Ltd in Memorandum of Aggreement (MoA) suai kaina Imphal ah tuni,10th January 2018 in a nei ui. Zia kinawptuana dungzui a chu, Churachandpur District sung ah Puankhawngmi zosia’n phatchuamna tamtak a nei ding ua ginchatna nei a hidan "Saannem" Store neitu Mr. L. Thiankham Tombing in a gen hi. Scheme umdan ahileh, Puankhawngmi kua hileh District Handloom & Textiles Office ah Register kibawl zosia’n a innmun chiat ua pat (yarn) a ki order ding uh, zia chu a innmun tiang ua vaki kawipiak ding ti a hidan le a gen hi.
YMA Manipur Group Annual Sport 2018 hawng
Lamka, Jan. 10 *(Nisin Thuhiltu)* : Young Mizo Association (YMA) Manipur Group in tuni, January 10 a pat January 20, 2018 tiang, ni 10 sung YMA Manipur Group Annual Sport 2018 a nei ding uh tuni zingkal lam dak 11:00 in Ngahthal Player Ground ah a hawnna a um hi. Zia hun a chun, YMA Manipur Group nuai ah YMA Branch chuamchuam a pat puitu te leh member te a pang ua, Thangkhosuanmung Guite, EM ADC CCpur leh Michael Ginzasuan, District Supply Officer DSO CCpur in khuallian hina tawh uap in, Sports hawnna a nei ui. Zia sports meet sung a chu YMA Branch chuamchuam ten Football, Volleyball leh Badminton ah gualsiak kidemna nei ding a hiu.
HSLC exam 2018 routine suadaw hita
Lamka, Jan. 10 *(Nisin Thuhiltu)* : Board of Secondary Education, Manipur nuai ah Controller of Examination in High School Leaving Certificate (HSLC) Examination, Regular leh External Candidate te a ding in Exam Routine a suadawk a, zia dungzui a chu February 20, 2018 ah English Subject ah exam kipan ding, February 24, 2018 ah MIL, February 27 ah Science, March 8 ah Social Science, March 13 ah Mathematics leh March 17, 2018 ah Optional Subject ah exam um ding a hi. Exam ahileh zingkal lam dak 9:00 a pat sun dak 12:00 sung ah um sek ding a hi.
YPA in mi 2 chung ah “etsan” ah a puan suttha
Lamka, Jan. 10 *(Nisin Thuhiltu)* : Central Executive Cummittee (CEC) Young Paite Association (YPA) General Headquarter mapuina’ tuni, January 10, 2018 zingkal lam dak 11:00 a pat YPA GHQ Hall, Hiangtam Lamka ah Block leh Unit a lawiupate leh Advisor, Val-Upate panna’n meeting a nei ua, zia hun a chun, Three Bills ziak ah YPA in etsan ah a puan teu sutthakna a nei ui. Zia meeting chu, Chin Ngaih Pau, Chairman, CEC, YPA GHQ in a mapui a, hun chiasa YPA panlakna umte leh maban panlakna ding ah guanggalna um te taklatna nei kawm in, a chiakhawm mipi te’n ngaidan leh dawidan a genkhawm nung un, Chin Ngaih Pau in January 10, 2018 nitaklam dak 2:00 a pat YPA in October 8, 2015 ni ah Phungzathang Tonsing leh Vungzagin Valte te chung ah etsan ah a puan chu sutthata a hidan puandawna a nei hi.
Doctor of Mission muthak
Lamka, Jan. 10 *(Nisin Thuhiltu)* : Pastor Lianzamang Thomas Vaiphei@ Mang Thomas Vaiphei s/o Mrs Lamniang of Compoun Veng in tunaicha a khan, International Institute of Arts and Theology, Kolkata in Doctor of Mission a mui’i. Ama ahileh tu leh tu South Korea ah Jesus Love Presbyterian Church ah sem le a hi.
DC/Kangpokpi kisang
Kangpokpi, Jan. 10 *(Nisin Thuhiltu)* : Secretary, Revenue Department, Got of Manipur panmun lau ding ah, Kangpokpi District ah Deputy Commissioner (DC) masapen, T. Ranjit Singh, IAS transfer ah a um tawh kitawn in, tuni’n Kangpokpi mipi te’n a thaakdawna a nei ui. T. Ranjit Singh ahileh ‘Man of Work’ ti ah kihia, officer nasem hawi mama ah hiat a hi. A langkhatlam ah T.Ranjit Singh thasang ding Pradeep Chandren, IAS lawplutna le mipi ten a nei ui. Kangpokpi, Deputy Commissioner thak ding, 2012 IAS batch Pradeep Chandren, IAS ahileh Churachandpur, Chandel leh DC Ukhrul panna district chuamchuam ah SDO ah a la sep nung ah Joint Secretary, RD&PR, Govt. of Manipur panmun piak ah um, DC Kangpokpi ding ah mawpuakna piak thak ah um a hi.
Union Cabinet in MPLADS chiapi zawm ding leh CISF Group 'A' Executive Cadre review bawl ding ah lemsakna nei
New Delhi, Jan. 10 *(Nisin Thuhiltu)* : Union Cabinet in Prime Minister Narendra Modi chairman hina nuai ah tuni’n Group 'A' Executive Cadre of Central Industrial Security Force (CISF), Cadre te dinmun etthak ding in lemsakna a nei a, zia dungzui a chu Assistant Commandant to Additional Director General ranks te a pat posts 25 siambe ding, CISF Cadre, Group 'A' posts 1252 hisek chu 1277 ah sukpun hiding leh Additional Director General post 2, Inspector General, Deputy Inspector General posts 8 leh Commandant post 8 ah sukpun hiding a hi. Union Cabinet in Canada tawh Science & Technology lam thil ah panlak khawmna ding tawh kisai ah Memorandum of Understanding (MoU) suai kai ding in le lemsakna a nei a, MoU kaina a pat India leh Canada academic institutions dinmun hawi chuam ding ti a hi. National Trust for the Welfare of Person with Autism, Cerebral Plasy, Mental Retardation and Multiple Disabilities Act, 1999 ah Section 4(1) leh Section 5(1) chu amend bawl ding, Board of National Trust - Chairperson leh Members te kum 3 term fix bawl ding ah le lemsakna siam in, Members of Parliament Local Area Development Scheme (MPLADS) chu 14th Finance Commission i.e. 31.03.2020 tiang ah chiapi zawm ding in approved a bawl hi. Chun, CCEA in Tungabhadra Steel Products Limited (TSPL) khak ding ah lemsakna a nei le Union Cabinet in approve a bawl a, Foreign Direct Investment, FDI Policy siam thak ding le lemsakna a nei hi.
Hill Leaders’ Day, Meeyamgi Numit in govt leh mipi te kankhawm:CM
Imphal, Jan. 10 *(Nisin Thuhiltu)* : Durbar Hall, Chief Minister’s Secretariat, Imphal ah tuni’n Manipur Chief Minister N. Biren Singh in Hill Leaders’ Day a hi tawh kitawn in tanggam a pat ama kiang ah haksatna tut nuam te leh ama kimupi nuam mi 600 tuam te kimupi in complaints 180 dinmun ngaithakna a nei hi. Mipi te a kimupi zaw ah Chief Minister N. Biren Singh in thuthak lakhawm mite kiang ah Hill Leaders’ Day tawh kisai a genna a chun, Hill Leaders’ Day leh Meeyamgi Numit a pat mitamtak te haksatna leh thil dawi hiatpi thei ah um a hidan gen in, Hill Leaders’ Day leh Meeyamgi Numit a um chu pha chuam mama in a gen a, differently-abled persons, meithai, panpi ngai, teksia, thiamna nei khangthak ama kiang ah chia, mitamtak te government in panpina peta hin a gen hi. Hill Leaders’ Day leh Meeyamgi Numit in mipi te leh government kal sunai chuam mama a hidan le gen in, mipi te kimupi zing hiding in a gen hi.
Prime Minister Narendra Modi in March tha leh Imphal a phakna ding tawh kisai a genna a chun, official confirmation um nailo hin a gen a, himaleh Manipur ah BJP-led State Government’s first anniversary celebration chu March 15 hiding, zia hun chu tawh kituak ah Prime Minister in Imphal pha ding ah ginchakna nei in a gen hi. Chuleh, March 16th ah 105th Indian Science Congress kipan ding hin a gen a, Prime Minister in Imphal a phak tak leh National Sports University foundation suangphu hawnna leh Thoubal Dam, Dolaithabi Project, Civil Secretariat Complex leh hill districts ah Women’s Markets te hawnna nei ding hin a gen hi.
State Budget tawh kisai ah dawtna a dawnhuna a chun,Chief Minister in fiscal year 2018-19 ah - skill development, connectivity (including internet & media, road, railways & air services), education, health, fisheries, agriculture leh horticulture etc lam ngai pawimaw ah kawi hiding in a gen a, State Budget session umna ding tawh kisai ah Government Departments zosia’n khatvei joint meeting nei ding hin a gen hi.
Minister V. Hangkhanlian in cooking gas set piakdawna nei
Imphal, Jan. 10 *(Nisin Thuhiltu)* : Agriculture, Veterinary and Animal Husbandry Minister V. Hangkhanlian in tuni’n RAM School, Pangei,Imphal East ah Pradhan Mantri Ujjawala Yojana Programme nuai in, cooking gas set leh LPG Safety Clinic hawpdawna a nei hi. Zia hun chu, Former State President, BJP Manipur Pradesh, Sh. Shantikumar Sharma, Manager,FI & IT Manipur Rural Bank Laishram Roshan , President, BJP, Mahila Morcha, Khundrakpam Mandal, Arambam Ngangbi Devi, State Missions Manager (Skill) Manipur Rural livelihoods Mission(MSRLM) Kh.Bobby Singh, Executive Member & Vice President President, BJP, Kishan Morcha ,BJP, Manipur Pradesh, Dr, Kala Singh, State Missions Manager (Skill) Manipur Rural Livelihoods Mission(MSRLM) Kh.Bobby Singh ten le a uap ui. Minister V.Hangkhanlian in a thugenna a chun, Prime Minister's Programmes nuai ah Ujjwala Programme kihawng chu numei leh inchen haksa te kithuapi theina ding ah kihawng a hidan gen in, a pha chuam thei ding pen ah mat ding pawimaw in a gen hi.