North AOC, Imphal ah full fledged GST office ki hawng

Imphal, Dec. 29 *(Nisin Thuhiltu)* : North AOC, Imphal ah tuni’n Manipur a ding full fledged Goods and Service Tax (GST) office hawn in a um hi. Office hawn hun ah Chief Commissioner of Central GST and Customs North East Region Shillong, WL Hangshing in a thugenna a chun, India ah tax regime thak - Goods and Service Tax in gamsung siamhawina masawn sak chuam mama ding hin a gen a, GST um masang ah Manipur panna North East States zosia chu tax piakna lam ah niam mama himaleh GST nuai ah gamsung a ding ah one nation, one tax leh one market system ah panlakna neithei hita ding hin a gen hi. Principal Secretary Finance, Vivek Kumar Dewangan in a genna a chun, GST chu kituptak ah hiathiamna mipi lak ah tasam mama nalai in a gen a, mipi te’n tax regime thak a hiatthiam theina ding ua panlak ding pawimaw in a gen hi. State a ding ah Goods and Service Tax (GST) office ki hawng thak in state leh central government panlak khawmna siam hawi chuam ding in a le gen in, GST nuai ah state’s revenues leh resources hawi chuam mama ding in a gen hi. Goods and Service Tax (GST) office hawnna hun chu, Commissioner of Central GST Imphal, Gaigondin Panmei, taxation, customs leh BSNL Imphal Branch official ten le a uap ui.

Mipi’n Sawmkholal Road siam

Lamka, Dec. 29 *(Nisin Thuhiltu)* :Tualnuam -Mualkot kawmtuana lampi, “Sawmkholal Road” kiti hun sawttak siam hawilo ah a um nung ah mipi te’n haksatna a tuak zing sek uh tawh kitawn in tuni, 29 December 2017 in, “Sawmkholal Road Committee mapuina’ mipi’n social work bawl in lampi a siamhawi ui. Zia ah lampi a siam hun ua chun, tripper truck 2, JCB leh Saktiman 2 mang in balu single a sung ui. Sawmkholal Road Committee te gendan ah zia lampi siamna ding a chu Road Committee in mi kiphal khenkhat te kiang ah sum dawlkhawm ah lamlian a siam uh hin a gen ui. Hiatthei khat chu, tulai in kikawmtuana lampi, mimal leh pawl chuamchuam in tawmngai thil ah a siam uh hiat leh muthei in a um zing a, thilpha mama himaleh mipi palai te’n local development fund mu ngailo a hi diam uh ti thei khawp in a um hi.

“Nisîn Innsung Maichâm Bu, Vol – II” hawng ding
Lamka, Dec. 29 *(Nisin Thuhiltu)* : Vaiphei Innkuan Maichâm Committee (VIMC) in 30th December, 2017 zingkal lam dak 11:00 leh Bethel Veng, MPCS Church, New Lamka ah “Nisîn Innsung Maichâm Bu, Vol – II” hawnna nei ding a hi. Zia hun chu khuallian hina tawh Khatkhotong Baite, President Vaiphei Peoples Council (VPC) General Headquarter in uap ding leh “Nisîn Innsung Maichâm Bu, Vol – II” hawndawna nei ding a hia, Rev. K Lala’n Pathian kiang ah a latna nei ding a hi. Chun, Rev. Khupkam in hun matna mapui ding ahia, “Nisîn Innsung Maichâm Bu, Vol – II” tawh kisai genlatna Rev. S Kaia in nei ding a hi. Zia hun chu VPC, Zillai, YVA leh kochuam nu leh pa a uap thei chan in uap ding in Vaiphei Innkuan Maichâm Committee (VIMC) in chialna a bawl a, , “Nisîn Innsung Maichâm Bu, Vol – II” chu kum thak 2018 January a pat mang pan chiat ding chialna a bawl bawk hi. Chuleh, VIMC in thanuam leh kipak tak ah kum thak lawm chiat ding ah dawisak lan kawm in, simtu te zosia Kum Thak chibai a hun buk ui.

District Third division league khakna um ding
Lamka, Dec. 29 *(Nisin Thuhiltu)* : NYK, District Third division league 2017 khakna 30th December, 2017, 12:00 PM ah Lamka Public Ground ah um ding a hi. Zia hun chu Chief Guest hina tawh Sasang Vaiphei, Vice President (Admin), KSO GHQ in uap ding a hia, Donar - H. Doungel, District Youth Co-ordinator, NYK, CCpur in le hun matna uap ding a hi. Closing Ceremony ahileh SN John, Hony Secy., CDSA in mapui ding, G. Thiauthianmung, President, CDSA in vaidawn thugenna nei ding leh Pastor V. Nengzahau, EBCC in Pauchapna tawh hun khakna siam ding a hi. Final match ah Songdo Youth Club (SYC) leh Dorcas Road Soccer (DRS) te kihel ding a hiu.

DC leh SP CCpur in mipi te kum thak dawisakna thucha thawt
Lamka, Dec. 29 *(Nisin Thuhiltu)* : Shyamlal Poonia, IAS, Deputy Commissioner, Churachandpur in mipite kum thak dawisakna thucha thawt in, kumlui ah mipiten panpina a piakna chung ua kipakthu gen in, khantona leh masawnna thupizaw sem a um theina ding ah kum thak ah mipi ten a nasa zaw sem ah panlakpi ding in chialna a bawl a, a lawting theipen ah Kum thak lawm chiat ding in a dawisak thu a puang hi. Chun, Rakesh Barwal, IPS, Superintendent of Police, churachandpur in le Churachandpur mipi te dawisakna thucha thawt in, kum lui ah mipi te kithuapina chung ah kipak thu gen in, mipi te buaina siamlo ding ah chialna bawl in, Indian constitution za bawl ding in chialna a bawl hi. Zu leh sa, khamthei thil te ziak ah society sung ah kuama’n buaina bawllo ding ah chialna le bawl in, buaina a um khak ahileh Churachandpur Hotline number 7085256377 ah call, sms leh WhatsApp ah Police te thuhiat thei zing hin a gen hi. Nuam leh kipak tak ah kum thak lawm chiat ding in le mipi te a dawisakna a lan bawk hi.

70th Zomi Namni Football Tournament 2018
Lamka, Dec. 29 *(Nisin Thuhiltu)* : 70th Zomi Namni Football Tournament 2018 Organising Sub-Committee in thusua a bawlna a chun, 70th Zomi Namni matna ding tawh kisai ah 15th January 2018 leh 70th Zomi Namni Football Tournament 2018 kipan ding a hidan taklang in, CDSA leh AMFA affiliated clubs a pang nuam ta phawt zia tournament a chu pang thei ding un a taklang hi. Zia ding a chu 30th December, 2017 a pat Entry form issue hiding, CDSA office, Hiangtam Lamka ah form muthei hiding a hi. Entry formman ahileh Rs 100 hiding, Entry fee Rs 5000+1000 (security) hiding leh 10th January, 2018 tiang ah Entry form piaklut ngai ding a hi. Chun, club khat in player dawi zat zat loan ah lathei ding, himaleh player 6 bep kihelna pang thei ding a hiu. Prizes ahileh Winner: Rs 1,50,000; Runner-up: Rs 80,000; Semi-finalist Rs 10,000 leh Quarter-finalist Rs 5000 hiding a hi.

Manipur Chief Secretary service suksaube ah um

Imphal, Dec. 29 *(Nisin Thuhiltu)* : Najma A. Heptulla min ah Ph. Bhavananda Sharma, Under Secretary to Govt. of Manipur in thusua a bawlna a chun, Manipur Chief Secretary Rajani Ranjan Rashmi, service hunt ha 3 sung suksaube ah um a hidan a taklang hi. Chief Secretary Rajani Ranjan Rashmi ahileh Indian Administrative Service (IAS),Manipur Cadre, 1983 batch a hia, 31 December 2017 ah a service hun kichaita ding himaleh 31 March 2018 tiang ah sem zawm ding a hi.

Regional Commissioner, EPFO in Peklum 2017 hawng

Lamka, Dec. 29 *(Nisin Thuhiltu)* : Team Khawvaiphei in kum dang ah a la sai sek gual un, tukum 2017 inle “ 5th Peklum 2017” kiti football pek ah gualnawpna bawlna tuni, 29th December 2017 in Lamka Public Ground ah organise a bawl hi. Zia hun chu Mr. Vanlalmuan, Regional Commissioner , EPFO in khuallian hina tawh uap in Peklum 2017 hawnna a nei hi. Zia peklum gualnawp a chun, team 18 te a pang ua, ni 1 sung ah gualnawp bawlna zo ding ah guanggalna nei himaleu team a tam ziak in Saipum lentual ah 30th December 2017 ah sunzawm ding a hiu.

Manipur Governor in triple talaq chung ah PM support

Imphal, Dec. 29 *(Nisin Thuhiltu)* : Manipur Governor Najma Heptulla in Lok Sabha ah zani (28 Dec. 2017) ah Muslim Women (Protection of Rights on Marriage) Bill, 2017 pass a hina chung ah kipak mama in a gen a, zia Bill pass ah um chun, Act a hi hun hun ah India gamsung ah Muslim numei te haksatna subeitu hiding in a gen hi.
Rajya Sabha member te chu thawveng tak ah Muslim Women (Protection of Rights on Marriage) Bill, 2017 pass a hitheina ding ah panla chiat ding ah chialna bawl in,Prime Minister Narendra Modi in Rajya Sabha ah Bill pass a hitheina ding ah consensus lak ding ah ngaidan a puakdaw chu support bawl a hidan taklang kawm in, triple talaq kiti dan diklo a hi ziak ah Muslim gam tamtak in chiapilo uh hin a gen hi. Prime Minister Narendra Modi in gum tak ah zia gual step a lakna chung a chu Muslim numei te kipak mama a hidan uh genlang kawm in, triple talaq chu sakhua thil hizawlo ah chiin dan diklo hizaw’n a gen hi.

Army Chief in Manipur entha

Imphal, Dec. 29 *(Nisin Thuhiltu)* : Northeast ah ni 2 sung, security te panlakna entha, Indian Army Chief General Bipin Rawat, UYSM, AVSM, YSM, SM, VSM, ADC in tuni’n Manipur a vena a nei a, ama chu Lieutenant General Abhay Krishna, UYSM, AVSM, SM, VSM, General Officer Commanding-in-Chief Eastern Army Command leh Lieutenant General Anil Chauhan, AVSM, SM, VSM, General Officer Commanding Spears Corps te’n le a zui ui. Inspector General of Assam Rifles (South) leh General Officer Commanding 57 Mountain Division in Indian Army Chief chu Security Forces te panlakna tawh kisai a hil hi. Zia hun a chun, Army Chief in state sung ah chamna leh muanna a um theina ding ah sepai (Indian Army) te panlakna chu pakcha mama kawm in, thilpha bawl chimchaklo ah panlakna sunzawm zing ding in chialna a bawl hi.

DIPR in retire ta ding a seppi uh thakdawna nei
Imphal, Dec. 29 *(Nisin Thuhiltu)* : DIPR Employees Association (DIPREA) in a seppiu a sepna a pat retire ta ding Raymond Singson thakdawna, DIPR Head Quarter, Moirangkhom, Imphal ah tuni’n a nei ui. Raymond Singson ahileh 1st January, 1958 ah piang, Grade-IV (Chowkidar) hina tawh kum 1979 ah DIPR a la zawm a hia, tu ah State Information Centre (SIC), DDU Palace Compound, Imphal ah posting, 31.12.2017 leh retire ta ding a hi. Zia ah thakdawna hun chu, Director (IPR), Meghachandra Kongbam, Dy Director (Admn), IPR Chongtham Noyon Singh, News Editor, AIR Imphal, Dr. A. Ibomcha Sharma, Officers leh department staff ten le a uap ua, Director in department thasik in thilpiak piakna a nei hi.

Statehood Day Women’s Polo Tournament organize ding
Imphal, Dec. 29 *(Nisin Thuhiltu)* : Manipur Tourism in Mapal Kangjeibung, Imphal ah January 17-21, 2017 sung ah 3rd Manipur Statehood Day Women’s Polo Tournament organize bawl ding a hi. Zia chu India ah international women’s polo tournament umsun suklatna hiding, team leh player te tunung sawtlo ah puandaw hiding in Manipur Tourism in a taklang hi. Zia kihelna a chu, nasatak ah Manipuri pony mat hiding in a kigen a, All Manipur Polo Association kithuapina tawh Manipur Tourism Department in thupi tak ah organize bawl ding in le a kigen hi.

Guanggalna um te taksuana a pat khantona piang thei: Minister Radheshyam

Imphal, Dec. 29 *(Nisin Thuhiltu)* : Federation of Government College Teachers’ Associations, Manipur (FEGOCTA) leh D. M. College of Arts, Imphal, G.P. Women’s College, Imphal banah Institute of Bioresources and Sustainable Development (IBSD), Imphal te saina’ tuni’n ni 2 sung um ding “International Conference on “Sustainable Development and North East India in the Globalized Era” kiti chu Sangai Conference Hall, Imphal Hotel in a kipan hi. Zia hun chu Manipur Education, Minister Thokchom Radheshyam in khuallian hina tawh uap in, Conference hawnna a nei a, ama’n a thugenna a chun, ngaidan, dawidan ahiloleh guanggalna zat chuamchuam um te taksuana a pat kisanna leh khantona piang thei in a gen hi.
Conference hun sung a chu - Overview of Economy, Political Economy & Environment, Strategy for Economic Growth, Prosperity& Food Security, Bioresources Management & Sustainable Development, Environment & Natural Resources, Quality Education and Development, New Approaches to Physical & Mental Health, Gender Equality & Women’s Empowerment ti te panna issue chuamchuam genkhawm ah um ding a hi.

Conference ahileh Director ISBD, Professor Dinabandhu Sahoo, Principal D. M. College Arts, Imphal Sarangajit Khundrakpam, Principal G. P. Women’s College, Imphal Dr. B. Lalhari Sharma, President FEGOCTA Dr. Angom Pishak Singh, Chairperson, Organising Committee of International Conference Dr. Ch. Sheelaramani te banah gam chuamchuam a pat mi 400 val in a uap ui.

Education system siamhawina ding ah panlakna um zing: Education Minister
Imphal, Dec 29 *(Nisin Thuhiltu)* : State Education Department in student tamlona, primary schools te gawpkhawm ah model school sua theina ding ah panlakna nei zing a hidan Education Minister Th. Radheshyam in SSA/RMSA Office, Babupara ah thuthak lakhawm mite kiang in a gen hi.

Education department in state sung ah education system siamhawi thakna ding ah panlakna nei zing a hidan le taklang in, media person te’n school hawilo dinmun a takldaw sek teu chu department mit leh bil ah lut zing in a gen hi.

Department nuai ah nasep thilbawl diklo um te etzuina kituptak ah chiapi a hi zingna chung ah department nuai ah semtu khenhat te gawtna piak hita a hidan taklang in, khenkhat post 2 ah sem leh mun 2 ah thalaw (salary) mu matdaw ah um hin a gen hi.

Teacher khenkhat a hiding gual tak ah school kailo um in le a gen a, diklo tak ah nasem teacher te chung ah a banban ah action lak hiding in a gen hi. State Assembly winter session ah pass kibawl, education bills 2 - private Schools leh caoching regulation Bill banah Dhanamanjuri University Bill te chung ah governor in lemsakpina suai a kai tak tawh kitawn ah tunung sawtlo ah coaching institute bawl government teacher te chung ah dan thak tawh kituak ah action lak hiding in a gen hi. Radheshyam in a gen kitna khat a chun, school zosia chawt suak leh school kai leh kailo te dinmun etzui zing haksa mama in le a gen a,. Govt. schools kiti private school gual ah mi khat mai in a etkawl a hilona chung ah haksatna khenkhat um in a gen hi. Zialo a chun, Right to Education tawh kituak ah private school zosia’n BPL family a pat student te 25% seat free ah a piak ding uh pawimaw in a gen hi. Education Minister in media person te a ki mupina hun chu, Education Director TH. Kirankumar, Higher Education Director H. Dilip, Higher aleh technical education Director John ten le a uap ui.

Kangpokpi ah District Consultative Committee (DCC) Meeting nei

Kangpokpi, Dec. 29 *(Nisin Thuhiltu)* : Kangpokpi District, Deputy Commissioner, T. Ranjit Singh (IAS) mapuina tuni’n Deputy Commissioner, Conference Hall ah District Consultative Committee (DCC) Meeting a um hi. Zia hun a chun, CD Ratio & performance under Annual Credit Plan (ACP) 2017-18, PMEGP, MUDRA & Stand Up India, KCC, PMFBY, SHG, Farmers Clubs & JLGs, Bank Loans, Aadhaar, mobile seeding, PMSBY & PMJJBY, RuPay Card/ATM, FLAC ti te dinmun tawh kisai etthakna a nei ui. Zia meeting chu Kangpokpi District huapsung ah sub-division chuamchuam ah SDO/BDO, Bank chuamchuam ah Branch Managers, DLO te leh department chuamchuam ah official te’n a uap ui.

Meghalaya Assembly ah Congress MLA 5 leh party dang MLA 3 in haina siam

Shillong, Dec. 29 *(Nisin Thuhiltu)* : Meghalaya ah former Deputy Chief Minister Rowell Lyngdoh panna, ruling Congress MLA 5 te’n tuni’n state Assembly a pat in haina a siam ua, zia chu Congress ding ah niam kiakna chi khat hithei ding in a kigen hi. Congress MLA 5 te banah United Democratic Party MLA khat leh Independents MLA 2 te’n le haina siam in Assembly Principal Secretary Andrew Simons in a gen a,
haina siam thak MLA 8 te’n National People's Party zawm ding ua ginchat a hi.

60-member Meghalaya Assembly ah Congress chu MLA 30 nei a hia, tuni ah haina siam MLA 5 te leh tuma haina a la siam Congress MLA, P N Syiem in Congress a nutsiau tawh kitawn ah Congress in MLA 24 neita a suak hi.
Tu ah Meghalaya Assembly term ahileh 6th March 2017 leh bei ding a hia, kum kit 2018 ah Nagaland leh Tripura tawh Assembly election neikhawm ding a hi.
Haina siam thak Congress MLA 5 te’n tuma a khan Chief Minister Mukul Sangma leh party leadership dawilo in a la gen ui. Senior Congress leader leh former cabinet minister Prestone Tynsong in Meghalaya Assembly election ah Congress niamkiak chuam ding in a gen hi.

Bangladesh ah thawtdaw hiding ah Assam Minister in Tripura CM vau

Kathalia (Tripura), Dec. 29 *(Nisin Thuhiltu)* : Assam Minister Himanta Biswa Sarma in Tripura Chief Minister Manik Sarkar in Bharatiya Janata Party (BJP) worker te chung ah political attack a sukthip lo ahileh Tripura state assembly election 2018 zaw tak leh Bangladesh ah thawtdaw (send) hiding in vauna a bawl hi. Himanta Biswa Sarma in Chief Minister Manik Sarkar chu opposition party supporter te chung ah gamtatna kilawmlo taktak um te chung ah kigawlna nei ah ngawna siam in, BJP party worker khenkhat in thina tuak un a gen hi. “BJP party worker khat la thana chung ah mi dang 10 in BJP a zawp kit zel ua leh a tawp ah Chief Minister seat a pat kaithak ah um ding, zia tak chuleh Bangladesh ah thawtdaw ding ti’n le Sarma in Chief Minister Manik Sarkar, Dhanpur constituency huapsung, Kathalaia ah public rally a nei hun in a gen hi.