Lamka College ah Tribal Youth Hostel building kang

Lamka, Dec. 21 *(Nisin Thuhiltu)* : Lamka College Campus ah um Tribal Youth Hostel building chu tuni, 21st December 2017, sunnung dak 3:00 vel in a kang hi. Zia building a chu roum 12 um a hia, zia lak a chun, roum 7 te nasatak in a kangsiai. Meikuang kipatna hiat hilo maleh electric short circuit ziak hiding ah muanmaw thu khenkhat in a gen ua, meikuang ahileh building tumlam pang ah kipan a hi.

Tribal Youth Hostel building roum 12 um lak ah New Lamka Youth Club (NLYC) leh Lamka Driving School (LDS) te'n roum khat gel chu office leh driving school ding ah concern SDO hiatpina tawh kum tamtak chiata a pat a lua (occupied) uh hita hin a kigen a, roum dang te ahileh chowkidar panna, mun chuamchuam a pat student te'n a lua uh, roum khenkhat a innkuante uh tawh umkhawm uh hi'n NLYC lawiupa te a pat hiat a hi.

Building kang ahileh a sak a Damkam Bazar a sa-zuak te'n inn chung a pat meikhu pawt dawk a mu uh tawh kitawn ah a del uh himaleh meikhu kipatna roum pen chu kuama umlo, a kawtkhak chabi kikam ziak ah luttheilo uh hin a kigen a, inn sung lut ding a ngaitua kal ua, meikuang huaisia man ti a hi. Meikuang ahileh a kipatna ziak hiatchian hilo maleh, a bang cheklei (bricks) ahih banah a chung langva kikhu a hia, a chung ceiling (phek ah kisiam) a hi ziak ah ceiling sia chu mei in kang masa, roum zosia kang suak a hi.

Inn kang um ti hiat a hi tawh kitawn in vengsung mipi leh a kim leh kiangnai ah um te’n mei katna mun del ah meikuang phelmitna ding ah nasatak ah panlakna nei a, room chuamchuam ah student-te nik leh puan panna innsung van chuamchuam meikhu vengvung lak ah lakdawpi maleu meikuang a hat takluat ziak ah dawi gual ah van lakdaw man umlo, van tamtak kangtum in a gen ui.

Meikatna tawh kisai chu CCpur Fire Brigade te hiatsak a hiu tawh kitawn ah Fire Brigade ten tanker tawh del maleu traffic buai ziak ah a huntak ah meikatna mun tung theilo a um ti a hi. Fire bridage te’n siren ginsak maleu gari tai khenkhat in lampi a awt pailo ziak ua, mei katna mun tung pai theilo un le a kigen a, emergency thil a tun hun ah Fire Service, Ambulance te lampi awng awt ngaikhawk ding dan mipi te kizil thak ding pawimaw in a kilang hi.

Lamka College Campus ah um Tribal Youth Hostel building kang chu, CCpur Fire Bridage a pat fire tanker 2, Assam Riflfes a pat tanker 2, CCpur Police water tanker 1 leh Lamka ah private tanker chuamchuam tawh kithua ah dakkal 1 leh a kim val mipi’n a phel nung un, meikuang chu phelmit thei in a um a, Moirang Fire Bridage a pat in le Fire tanker 1 meikatna mun a tung hi.

Youth Hostel lua a um student chuamchuam te ahiuleh Paumalsawm (Hope Baptist Academy) s/o Paulianjohn of Khuangkhai; Hangkhanpau (TDC 1st Sem, CCpur Govt. College) s/o Haumang of Ainah Village; Mammy Khualneilam (Class-IV of SSPP Residential School, Nghathal) ; Liansuanmang (Class- III of SSPP Residential Schoo) s/o Tongkholian of Aina Village; Rebecca Thumlalnei (Class-X of Rayburn High School); Lalminthang (Class -VI of Ebenezer Academy) s/o Lamlalson of Nalon Village; Chinglianniang (Class-I of Ebenezer Academy), Chinmuanthang (Nursery of Ebenezer Academy) s/o Lianbiakmuan of Mualian; Manghoihching (Class-IV of Donbosco Schoo); Khupmuansang (Class-B of St. Paul's Institute) s/o Khupzamlal of Lungchin Village; Ningsila (TDC First Sem of Rengkai Govt. Hr. Sec. School) s/o Chungzakhup of Loktak Project; Lalminthang (Class TDC 2nd Sem of Rayburn Collge); Hohoih (Class X of Ebenezer Academy) ; Chiinthianching (Class VIII of Ebenezer Academy) d/o Khampi of Daijang Village; Chinghuaikim (Class IX of Rayburn High School) leh Vungsiam (Class-A of Rayburn High) d/o Thangbiakmuan te a hiu a, a van cheng uh lakdaw umlo ah kangtum vek a hi.

Building kang ahileh Langkhanpau Guite, MDC & Ex-Chairman ADC/CCpur; T. Paukhanlian, EM, ADC/CCpur, Lunkhumang Khongsai, Addl. SP/CCpur (Law & Order) mapui CCpur Police team leh Thangboi Gangte, SDO/CCpur leh a team te'n le a del ua, zialo a chun, Major Radha Krishan mapui Assam Rifles te'n le Tanker 2 tawh a del ui.

Career Counseling Seminar cum weapon display bawl
Lamka, Dec. 21 *(Nisin Thuhiltu)* : 25 Assam Rifles, Churachandpur in tuni, 21 December 2017 sumna dak 9:30 in Kendriya Vidyalaya School G. Mualkoi ah Career Counseling Seminar cum weapon and Equiment display Seminar a bawl hi. Zia hun a chun, Kendriya Vidyalaya School ah kai Class -I a pat Class- XII student te a pang ua, Major Radha Krishan in Indian Army luttheina ding ah lampi chuamchuam um te tawh kisai ah student te lamhilna nei in, Major Krishan in India Army ah Trade chuamchuam um te genna a nei a, Officer Rank ah naupang cha luttheina lampi um a hidan te a taklang hi.

UPSC saina nuai ah NDA, Officer Rank ah Military Doctor, Nurse leh General Duty pan theina lampi te le genlang in, Indian Army ah Churachandpur mi, numei Officer pathum um in a gen hi.

Zia hun a chun, Assam Rifle te’n galvan chi chuamchuam 84 mm RL, 2 inch Mortar, 9 mm CMG, 7.62 AK 47, 7.62 mm Assault Rifle, 5.56 mm INSAS Rifle, 5.56 mm INSAS LMG, 7.62 mm LMG leh 7.62 mm MMG ti te le student te a etsak ui. Kendriya Vidyalaya School ahileh Principal SH Lekhraj Menna etkawlna nuai ah Teaching leh non teaching staff 23 leh student 300 val umna a hi. Hiatthei khat chu, 25 Assam Rifles, Churachandpur in district sung ah school leh college chuamchuam in tumasang a khan le, Career Counseling Seminar cum weapon and Equiment display Seminar a chiapi sek ua, tunai a khan le St Mary School, Rayburn College, VK Tawna College in a la bawl ui.

Lampi kuakna mun te siamhawi
Lamka, Dec. 21 *(Nisin Thuhiltu)* : Tedim Road Zero point Police station a pat kilometer 10 ah sau, Torbung tiang, lampi kuakna mun te siam phatna nasep a kipan hi. Lampi siamna a hileh Public Work Department PWD, Manipur etzuina nuai ah siam in a um hi. Road Roller khat mang in December 20, 2017 a khan, nasep pat in a um a, zia chu tuni’n le a sunzawm ui. PWD in Zero point Police station a pat lampi siam nasep pat ding ah guanggalna a nei himaleh Christmas ding ziak khawpi sung ah gari tam ziak in, gari taitua a tawm deuna mun, Hmar Veng a pat nasep pat in a um a, District Transport Office DTO tiang tuni’n a siam ui.

Zan khawvak ah pauchap khawmna nei
Lamka, Dec. 21 *(Nisin Thuhiltu)* : All Tribal Women Union (ATWU) General Headquarter in Christmas in Jehovah Jire Home, Beulahlane ah zani tak a khan zan khawvak in pauchap khawmna a nei ui. ATWU in gamsung siatna leh maban ah Christian-te a ding ah hun pawimaw mama Christmas leh Kumthak thawveng tak ah mat a hitheina ding ah ziagual pauchap khawmna chu a nei hin a kigen hi.

TCP in Road Safety Drive bawl

Lamka, Dec. 21 *(Nisin Thuhiltu)* : Lianthansang, OC, Traffic, Churachandpur mapuina’ Traffic Control Police (TCP) personnel te’n tuni, December 21, 2017 sunnung in Churachandpur Police Station mai in, Tedim Road ah Road Safety Drive a nei ui. Zia hun a chun, helmet khuklo ah gari keng 2 (two-wheeler) ah tai te, kum tinglo gari hek, Driving Licence leh Registration Certificate neilo ah gari tawl ti te check bawl in, traffic rules tawh kituaklo ah gari tawl mat ah um te chu TCP Office, Churachandpur Police Station mun ah TR-5 Receipt cut in sum a liausak ui. Drive ahileh Christmas leh kumthak ding kuan ah bazaar kai leh gari tai tua a tam tawh kitawn ah Rakesh Balwal, IPS, SP Churachandpur in thupiak a bawl dungzui ah chiapi ah um hin a kigen a, maban ah le chiapi zel hiding in a kigen hi. Chun, two-wheeler a mi ni sang ah tamzaw ki puak phal hilo, footpath chung ah meh leh van zawk phal hilo a hina chung ah drive chiapi zing hiding in le a kigen hi. Tuni ah Road Safety Drive hun sawtlo sung a nei hun un, traffic dan zui diklo mi 73 te man in, a liausak ua, tuni ah a sum mudaw uh, Rs. 8,100 chu SP Churachandpur khut piakdawna nei ngal un le a kigen hi.

Bunglawn ah ESC biak-inn building thak hawng
Bunglawn, Dec. 21 *(Nisin Thuhiltu)* : Bunglawn village, Churachandpur District ah Evangelical Synod Church in a sak thak biak-inn hawnna leh a latna tuni’n a um hi. Zia biak-inn sakna ding a chu famta Upa Kamkholien in 30th April 2012 a khah foundation suangphu hawnna a la nei a hi. Biak inn thak chu, Reverend Thangkhosiem, Executive Director , Evangelical Synod Church (ESC) in a hawnna a nei a, Upa Letkam Gangte in a latna a nei hi. Zia biak-inn kisa thak chu a dung feet 80' leh a vai feet 40' lian ah kisa a hia, mi 500 tiang kikhawp khawm theina a hi. Chun, biak-inn sakna, Rs crore khat val bei in a kigen hi. Biak-inn hawnna hun a chun, “Amazing Grace” kiti souvenir hawnna le a um hi. Chuleh, Synod Headquarters Church Choir te panna laa thiam chuamchuam in laa sakna a nei ui. Bunglawn ESC Biak-inn ahileh kum 1957 ah a la kiphutdawk, Rev Khaitinthang, Rev Dr Soson Gangte, Founder Principal, Faith Theological College, Dimapur, Pastor SJ Minthang Gangte leh Pro - Pastor Soilal khandawna biak-inn le a hi.

LPG Safety Clinic-cum-PMUY Awareness Campaign bawl

Lamka, Dec. 21 *(Nisin Thuhiltu)* : M/S Vangsei Indane Gramin Vitrak, K. Salbung in tuni, December 21, 2017 sunnung dak 1:00 in LPG Safety Clinic-cum-PMUY Awareness Campaign kiti a nei a, zia hun chu PMUY nuai ah Beneficiary 130 te’n uap in, LPG Free Connection le a bawl piak ui. Nengneikim, Proprietor, M/S Vangsei Indane Gramin Vitrak in awareness hun ah PMUY tawh kisai a genna a chun, Pradhan Mantri Ujjwala Yojana kiti chu inchen haksa, BPL innkuan a pat numei te a ding bik ah LPG free connection ki bawl piak hin a gen a, India gam sung ah ann huanna thing leh gua ki mang sek sukbeina ding, ann huan ah pang bik, numei te damtheina ding khualna tawh 2011 census dungzui ah BPL innkuan a pat beneficiary hithei ding ah teldaw ah um te free connection piak ah um hin a gen hi.

M/S Vangsei Indane Gramin Vitrak in ahileh tuni tiang ah customer 4,700 vel neita uh hin a kigen a, PMUY scheme nuai ah free connection 5-vei a piakdawnau hita ah le gen in a um hi. PMUY scheme nuai ah beneficiary 600 vel LPG Free Connection piak ah um te lak a chun, Sagang, Tuiringphairen, lukhumbi, M. Songgel, K. Salbung, Khousabung, Haotak Phailen, Gangpichai, Gelmol khawmi te leh a dang dang te a pang ui. Pradhan Mantri Ujjwala Yojana ahileh May 1, 2016 ni ah India Prime Minister Narendra Modi a la hawn a hi.

Winter Meet -cum –Musical nei
Lamka, Dec. 21 *(Nisin Thuhiltu)* : New Lamka Elim Veng ah um New Lamka Baptist Church NLBC nuai ah khanglai pawl, Baptist Youth Fellowship in “Bangkim Pathian Thupi Na ding In” ti thupi nei in, December 20 a pat 21 December 2017 sung in Winter Meet -cum -Musical a nei uh chu chiazawm zel in, tuni’n Fancy Dress nei in, sunnung in kidemna chi chuamchuam a nei ui. Winter Meet kipatni December 20 zingkal dak 6:00 in Meet hawnna leh Marathon Race Flag Off na a nei ua, zia hun a chun, Upa T Ginzalian in Winter Meet -cum –Musical hawnna nei in, Marathon Race a nei ua, Grace bible College GBC Campus ah outdoor game competition nei in, Pathian thu leh laa in kidemna chi chuam chuam le a nei ui.

Khuga Battalion in thisan unit 8 pia

Lamka, Dec. 21 *(Nisin Thuhiltu)* : Churachadpur District Hospital ah damlo thisan tasam ah um, Manglamnuam w/o Vanlalmawi@Mumawi of T. Vajang chu tuni, December 21, 2017 in Khuga Dam ah um Sixth Sikh Light Infantry (Khuga Battalion) in a pawimaw ding zat thisan a thawn in a hawm ui.
Thisan pawimaw ziak ah Beidawng tak ah um, Pastor M. Thangboi Zou in WhatsApp ah thisan pawimaw thu a taklat tawh kitawn ah Khuga Battalion ah Captain T. Douminlian panalakna thisan kihawm a hi.
Manglamnuam ahileh thisan Unit 6 pawimaw a hia, Unit 3 piakdaw ah um hita himaleh Replacement ding a umlo ziak ah Unit 3 lakna ding helo ah um beidawng tak ah um Manglamnuam innsung mite, ngaikhawkna tawh Khuga Battalion in Unit 8 thisan hawm a, a val Unit 2 chu donation dan ah kawi in a um hi. Khuga Battalion a pat thisan petute chu - Subedar Jaspal Sing, Halvidar Jarnail Singh, Sepoy Krishan Singh, Halvidar Paramjit Singh, Lance Niak Jarnail Singh, Halvidar Tirth Singh, Halvidar Buta Singh leh Halvidar Joginder Singh te a hiu.

Outreach Program nei
Lamka, Dec. 21 *(Nisin Thuhiltu)* : Happy Heart Junior College, Bethel in tuni, December 21, 2017 in Outreach Program a nei ua, Children Home pani - Bijang a um Sangga Muon Inn leh Thingkangphai aum Happiness Home te vena nei in, Christmas Gift piakna a nei ui. Home pani a phak hun ua chun, Happy Heart Junior College in Home te a ding annchang leh Stationery van chi chuamchuam, Pen, Pencil, Notebook, notepad leh nekthei chi chuam chuam piakna a nei ua, muamthum le a hawm bawk ui.

Financial Year kichai tak leh PMAY Scheme nuai ah chenna inn 9740 sak hiding : Th. Biswajit

Imphal, Dec. 21 *(Nisin Thuhiltu)* : A chiatha zing,11th Manipur Legislative Assembly Winter Session ah tuni, 21 December 2017 ah MLA K. Meghachandra Singh in dawtna a siam, RD & PR minister Th. Bishwajit in a dawnhuna a chun, government in PMAY Scheme “Centre's Housing for all Scheme “ nuai ah Gram Panchayat areas ah chenna inn 9740 sak ding ah panlakna a nei dungzui ah tu financial year kichai leh nasepna pat hiding in a gen a, zia inn kisa ding chu district-wise ah Bishnupur 347, Chandel 972, Churachandpur 1819, Imphal East 1332, Imphal West 423, Senapati 1536, Tamenglong 1068, Thoubal 1586 leh Ukhrul 657 hiding in a gen hi.

MLA Kh. Joykishan in dawtna a siam, Deputy CM / incharge of Finance Y. Joykumar in a dawnhuna a chun, Hill Districts - Ukhrul, Senapati, Kangpokpi, Chandel, Churachandpur leh Tamenglong ah Chief Minister in package a puan te chu implement bawlna ding ah panlakna um zing a hidan taklang in, nasep zawna chung ah sanction, nasep patna ding ah sanction kibawl te tuni tiang ah a kigawm ah sanctioned order 97 tingta hin a gen hi.

MLA S. Bira Singh in dawtna a siam, RD & PR minister Th. Biswajt Singh in a dawnhu kitna khat a chun, Sagang-Sugnu Road leh Moirang Kumbi Road - Kumbi Thingel Leikai te chu PMGSY Phase IX & X nuai ah nasepna pat ah umta a hidan gen in, Kumbi Assembly Constituency huap sung chu Contractor/Agency - M/S N. Jilla Singh & Sons leh N. Jegeshwar Singh te khut ah piak ah um, Sagang-Sugnu Road leh Moirang Kumbi Road -Kumbi Thingel Leikai siamna ding ah Rs 165.10 lakh leh Rs 36.91 lakh sanction ah um in a gen hi. Chun, balances Rs 313.00 lakh leh Rs 57.15 lakh um in a gen hi. Sagang-Sugnu Road leh Moirang Kumbi Road -Kumbi Thingel Leikai lampi siamzawna ding ah hun bithiat dungzui ah 31.07.2018 tiang ah Sangang-Sugnu Road siamna nasep zaw ding, Moirang Kumbi Road - Kumbi Thingel Leikai lampi ahileh 31.03.2018 ah siam ding ah a hun bithiat ah um in a gen hi.

A langkhatlam in, Chief Minister N. Biren Singh in Corrigendum No. 282/MR/2017(DEL) dated 1st November, 2017 of Election Commission of India republished in the Manipur Gazette dated 6th November, 2017 chu luidawna nei in, genkhawmna a um a, MLA Kh. Joykishan Singh in NSCN (IM ) leh Government of India in Framework Agreement suai a kaina tawh kisai ah dawtna a siam chu House in bawzui ding leh Framework Agreement details tawh kisai chu Government of India kiang dawtna siam ding in lemsakna a nei hi. Chief Minister N. Biren Singh in Framework Agreement tawh kisai a genna a chun, ama mapui BJP government in public hiatthei ding ah Framework agreement details suklat a hitheina ding ah panla ding hin a gen hi.

State Assembly Winter Session ah tuni, discussion hun a chun ruling party lam in house leader N. Biren Singh, Deputy Chief Minister Y. Joykumar Singh, CAF & PD Minister Karam Shyam, MLAL. Radhakishor, S. Rajen, Dr. S. Ranjan, Awangbou Newmai, P, Sharatchandra leh S. Subhaschandra te a pang ua, Opposition lam ah O. Ibobi Singh, Gaikhangam, Gobindas Konthoujam, Kh. Joykishan, K. Ranjit, K. Meghachandra, Md. Abdul Nasir, Th. Lokeshwor, Ak. Mirabai, Dr. Chaltolian Amo te a pang ui.

Health Minister zuau gen; MLA Dr. Chaltolien Amo
Imphal, Dec. 21 *(Nisin Thuhiltu)* : A chiatha zing,11th Manipur Legislative Assembly Winter Session ah tuni, question hour hun ah MLA Dr. Chaltolian Amo in CHC Parbung construction a ki pat leh ki patlo, construction a ki pat leh kua te contract bawlna nasepna kipan, fund sanctioned a hitak leh hilo tawh kisai ah dawtna a siam chu, Health and Family Welfare Minister L. Jyentakumar in dawnhu mumal theilo in a um a, Zero Hour hun lemchang ah mang in, Dr. Chaltolian Amo in thil umdan a hilchian hi. Dr. Chaltolian Amo in a hilchianna a chun, Health and Family Welfare Minister L. Jyentakumar in diklo tak ah dawnhuna pia’n a tak lang a, CHC Parbung construction kipanta, Manipur Tribal Development Corporation contract bawlna nasepna pat ah um, approved cost 467.75 lakhs lak ah National Health Mission nuai ah Rs 70,16,159/- . sanctioned hita ah dawnhuna a piak himaleh MTDC a thuhiatna, zia gual fund chu deposit hinailo ah hiat ah um in a gen a, fund sanction kibawllopi nasepna bangti kipat ding a hi em ti’n dawtna a siam bawk hi.

Rs. 2 lakhs man ding No. 4 tawh mi 2 mat ah um

Imphal, Dec. 21 *(Nisin Thuhiltu)* : Narcotic Cell Imphal East in tuni’n Hatta, Imphal East District ah mi 2 a pat in Rs. 2, lakhs man ding, khamthei (Heroine powder) a man dawk hi. Hatta petrol pump area ah nitak lam patrolling chia narcotic cell team in Yairipok Bamon Leikai, Thoubal district a pat mi, Md. Hussain (34) leh Makakmayum Rahman (31) te a pat Heroine/No. 4, 15 gram a matdaw uh hin, police thusuak in a gen a, mat ah um te chung a chu a pawimaw dungzui ah legal action lak ding ah case ziklut a hi.

National Integration Tour (NIT)
Moirang, Dec. 21 *(Nisin Thuhiltu)* : Assam Rifles saina nuai ah Moirang leh a kiangnai tuam ah student 18 leh teacher 2, Delhi leh Agra ah 14th Dec 2017 ni ah National Integration Tour (NIT) ah chia te’n tuni, 21 Dec. 2017 in Mr Kiren Rijiju, Union MoS for Home Affairs a kimupiu a, zia hun a chun, holim khawmna nei in, Mr Kiren Rijiju in student te chu maban ah lawtingto zel ding in a dawisakna thu genkam in wish a bawl hi.