Mega Women Medical –cum- Health Awareness Camp bawl

Lamka, Nov. 25 *(Nisin Thuhiltu)* : Assam Rifles, Churachandpur leh All Tribal Women Union ATWU, Manipur saina’ tuni sunma dak 9 :00 a pat in YPA Hall,New Lamka ah numei-te a ding in Mega Women Medical –cum- Health Awareness Camp a um a, zia hun a chun, Assam Riffle doctor Captain Simranhkeet Kaur, Dr Deepak Yadav leh District Hospital a pat Special Doctor chuamchuam in a ki etsak nuam min pelut te, nurse te kithuapina tawh en in, a kituakpi ding uh damdawi a thawn in a piau hi. Mega Women Medical Cum Health Awareness Camp hun sung in numei 500 val a ki etsak ui. Health Awareness campaign hun ah Dr. Kimngaihching Simte, Chief Medical Officer, Churachandpur leh Major Radha Krishan leh Major Pankaj Giri ten thugenna a nei ui.

World Aids Day matna ding ah “On the Spot Painting Competition” um ding
Lamka, Nov. 25 *(Nisin Thuhiltu)* : December 1 World Aids Day ah matna ding tawh kisai in, District Aids Prevention and Control Unit DAPCU, CCpur saina a hung tung ding, November 29 sunma dak 11:00 – 1:00 PM kikal ah CMO Conference Hall, CMO Campus ah Right To Health ti thupi mang ah “On the Spot Painting Competition” um ding a hi. Painting Competition ahileh open hiding, lunglutna nei ten DAPCU Office, CMO Campus ah November 28 tiang ah min piaklut thei ding a hi. Painting Competition First Prize ahileh Rs. 2, 000, Second Rs 1, 500, Third Rs 1, 000, 4th leh 5th te’n Rs. 500 sang ding a hiu. December 1 World Aids Day ahileh District Aids Prevention and Control committee, DAPCC CCpur saina’ Peace Ground Tuibong ah District Level ah kimang ding a hia, V Hangkhanlian, Minister, Agriculture, Veterinary and Animal Husbandry, Government of Manipur in Chief Guest hina tawh uap ding a hi. Chun, December 1 zingkal dak 7:15 leh Lanva Lei a pat Peace Ground, Tuibong tiang ah World Aids Day Rally um ding, zia hun a chu Khaipao Haokip, Chairman, ADC CCpur in Rally Flag Off bawl ding, Peace Ground, Tuibong ah sunma dak 9:00 ah District Level World Aids Day mat hiding, Shyam Lal Poonia, IAS, DC CCpur/Chairman, District Aids Prevention and Control committee, DAPCC CCpur in vaidawnna thu gen ding , Chief Guest V Hangkhanlian, Minister, Agriculture, Veterinary and Animal Husbandry, Government of Manipur a pat thugenna um ding leh DC XI team leh NACP XI team ten friendly football match nei ding, On the Spot Painting Competition Prize hawpdawna um ding a hi.

ZogamOnline.com in Musical Concert bawl

Lamka, Nov. 25 *(Nisin Thuhiltu)* : ZogamOnline.com website saina’ YPA Hall, New Lamka ah zani tak a khan ZOLMA 2017 ding tawh kisai in Karaoke Night kiti, Musical Concert a um hi. Zia hun a chun, laa thiam chuamchuam - Esther Lalruatfeli, Margarete Tawmbing, Daniel Gangte, S. Pauginmuan, Bel Gangte, Mwanlal Tunglut, Boigin Singson, Thangboi Zou, Sam Bailong leh Muan Hangzo te’n laasakna a nei ui. ZogamOnline Music Award (ZOLMA) ahileh November 28, 2017 leh hawp ah um ding a hia, zia hun a chu Category chuamchuam - Best Vocalist (Male), Best Vocalist (Female), Most Promising Artist (Male), Most Promising Artist (Female) leh Best Choir Group ah award piak hiding a hi. Ziana ding a chu November 21 a pat December 2, 2017 sung ah ZogamOnline Facebook account ah Nomination piaklut thei ding a hia, kuama khenchuam umlo ti le a hi. ZogamOnline Music Award (ZOLMA) ahileh kum 2012 a pat laa lam ah talent nei te chawisanna ding ah kum sin leh hawp hisek a hi.

Khawpi sung ah tui piak ah um thiantho lona tawh kisai ah CCCin thusua bawl
Lamka, Nov. 25 *(Nisin Thuhiltu)* : Churachandpur Consumers’ Club (CCC) in khawpi sung ah tuinek piak ah um a thiantho lona tawh kisai tawh kisai ah thusua a nawlna a chun, Public Health Engineering Department, Churachandpur in khawpi sung tuidawn ding a piakna Khuga Dam a Intake Point a pat tui hungkai etmai a le niin leh thianglo a hidan mizosia hiat hin a taklang a, zia tawh kisai a chu, Churachandpur Consumers’ Club in November 22, 2017 ni ah amun ah thil umdan etthakna nei hun ua, Department in tui thitthianna, Filtration Unit khatbep mat thei a nei ziak ah tui thiang kining ting theilo a hidan a gen hi. Zia tawh kisai chu District Administration leh a kisaipi thuneitu ten a etzui ding uh pawimaw a hidan taklang in, tuithianglo a pat natna piang thei a hina chung ah Filtration Unit kawibe ding in phutna a bawl hi.

Measles-Rubella tawh kisai ah training
Lamka, Nov. 25 *(Nisin Thuhiltu)* : District Family Welfare Officer (DFWO) Churachandpur saina’ ah tuni, November 25, 2017 sunma dak 11:00 in DFWO Conference Hall, District Hospital ah Measles-Rubella tawh kisai in training a um hi. Zia hun a chun, Dr. Pushpen, SMO, WHO in German measles le kiti, Rubella veite a vun uh san ah bawl tektuk, naupang lak ah tamdiak maleh piting in le vei thei a hidan te gen in, kikhu hun ah chil leng te a pat kikai sawn thei a hidan gen in, Ministry of Health & Family Welfare, Government of India in Routine Immunization ah zia natna a pat chu kiven theina ding ah damdawi a pansakna chung ah naupang kum 9 a pat kum 15 kikalte Anganwadi Center leh School ah kap hiding a hidan taklang in, Measles-Rubella tawh kisai in ziltilna a nei hi. Hunmatna chu Dr. Kim Simte, CMO, Churachandpur, Dr. Jamthianlal, DFWO, Dr. VC Pau Tonsing, Medical Superintendent, District Hospital, PHC, CHC ah Medical Officer in-charge, Immunization leh Medical staff te a uap ui.

Santing-L Rural Market Shed hawng

Lamka, Nov. 25 *(Nisin Thuhiltu)* : Santing-L khua ah zani, November 24, 2017 a khan Rural Market Shed hawnna leh a latna a um hi. Zia hun chu, S Thienlaljoy Gangte, MCS, Assistant Commission to DC & Chairman Santing-L Rural Market Shed SRMS, Thangchinkhup AGM/DDM NABARD, CCpur, H Timmy Gangte Chief Manager,SBI CCpur leh Nemzating@Tingnu, Chief of Santing-L ten khuallian hina tawh a uap ua, S Thienlaljoy Gangte, MCS, Assistant Commission to DC & Chairman SRMS in Rural Market Shed hawndawna nei in, Pastor Khailalsiem Gangte, Bial Secreary, Saichang Bial ESC in Pathian kiang in a latna a nei hi. Chun, P Kaijamang, Secretary STA/SRMS in Rural Market Shed sakna tawh kisai in, report piakna a nei a, Zamlun Seretary, SRMS in Market shed mat dingdan tawh kisai genna a nei hi. Santing-L khua ah Rural Market Shed ahileh NABARD funding bawlna nuai ah kisa a hia, Rural Market Shed ah Toilet, Drinking Water Tanky leh Solar street lamp kawi a hi.

Lamka - Sugnu Road siam kipanta ding: MLA Ginsuanhau

Lamka, Nov. 25 *(Nisin Thuhiltu)* : Ginsuanhau@GS Haupu, Chairman, MANIREDA leh MLA 60 Singngat Assembly Constituency in a bialsung zawtna lampi, Lamka - Sugnu Road leh Lamka - Singngat siam hawina nasep, November 26, 2017 ah kipan ding a hidan taklang in, DC leh SP Churachandpur te uapna tawh, Churachandpur Police Station mai, Zero Point ah Flag-office bawlna um ding hin a gen a, zia hun chu khantona ngaikhawk a tam theipen in uap ding in chialna a bawl hi. Churachandpur-Sugnu Road ahileh 1983 kum a Black Topping bawl ah um, tuni tiang ah siamthak nailo ah um, a siam thakna ding ah DONER in SIDF ah March 31, 2017 ni Released a bawl, fund mang ah siamthak hiding, Churachandpur-Singngat Road ahileh tu November thasung ngei ah kipan ding a hidan a gen hi. Churachandpur-Singngat Road siamna ding ah Road Surface Transport Minister kiang ah lekha piaklut ah um in le a gen a, mimal tak ah kimupi ding gawmaleh muthei nailo a hidan genkawm in, department chuamchuam te a kimupi nung ah lampi puapha thei ding dinmun ah um hin a gen hi. Chuleh, lampi siamhawina ding ah panlakna chu a kua kua’n kithuapi chiat ding in chialna a bawl hi.

Ordain zi-te ding ah Seminar bawl

Lamka, Nov. 25 *(Nisin Thuhiltu)* : Evangelical Baptist Convention EBC Lamka South Division nuai ah Division Baptist Dorcas Fellowship saina’ tuni’n EBC Zion, New Lamka ah “La Um Dan Uh Khrist Chanchinhawi tawh Kituaksak Phawtphawt Un” ti thupi nei ah Ordain Zi-te Seminar 2017 a um hi. Zia hun a chun, Evan T. Damkhothang in resource person hina tawh ziltilna hun mang in, Pastor C Chinzamang, Local Pastor, EBCC Zion semeinar khakna a nei hi.

Comedian Hunt 2017 Audition Round zo

Lamka, Nov. 25 *(Nisin Thuhiltu)* : Lamka Core saina’ YPA GHQ Hall, Hiangtam Lamka ah November 24 leh November 25 nitak dak 5:30 zel ah kipan in, Comedian Hunt 2017 Audition Round a um a, tuni, November 25 in Audition round a zo ui. Audition Round a chun, Pa Mawi, Nachees Tonsing, Sumpandi leh Lalcha@ Sambuchiing te Judge in a pang ua, Audition Round ah teldaw ah um te’n December 1 nitak leh Comedian Hunt 2017 First Round ah tawtbawl kidemna nei ding a hiu. Comedian Hunt 2017 ah winner te’n Cheng Siing ni leh Trophy leh Citation sang ding a hiu a, second te’n Cheng Siingkhat leh Trophy, Citation sang ding, Consolation Prize mi 5 tiang in muding a hiu. Comedian Hunt 2017 competition pang ding ah min pelut mi 10 a um ui. Comedian Hunt 2017 ahileh November 24 nitak dak 5:30 ah Thangkhosuanmung Guite, MDC leh Chief of Hiangtam Lamka in a hawndawna a nei a hi.

Van-man tawh kisai ah CCC in thusua bawl
Lamka, Nov. 25 *(Nisin Thuhiltu)* : Churachandpur Consumer Club CCC in thusua a bawlna a chun, district sung ah dukan/dawr bawl te’n Festival Season a naitak tawh kitawn ah district sung ah van zuak te’n amau mimal nawp dan dan ah van man kalsaklo ding in chialna leh hiatsakna a bawl a, van man tawh kisai Churachandpur Consumer Club CCC in district mipi te khualna kituptak ah enzui ding hin a taklang hi.

VDF recruitment: Viva Voce bawl

Lamka, Nov. 25 *(Nisin Thuhiltu)* : Chaurachandpur Dsitrict ah Village Defence Force personnel 23 lakna ding Recruitment nei ah um chu chiatha zing in tuni, November 25, 2017 in SP Office ah Viva Voce a um hi. Zia hun a chun, Physical Efficiency Test (PET) zo candidate te Rakesh Balwal, IPS, SP Churachandpur, Johnny Sharma, SDPO Churachandpur leh SI Thangtinlun, RO to SP Churachandpur te’n thudawtna chuamchuam a nei ui. Recruitment chiadan ahileh Excellent ah PET zo te’n mark 10 mu, Qualify te’n mark 5 leh Disqualify te’n mark mu neilo a hiu a, Viva Voce ah a mark mudan uh tawh gawpkhawm ah mark musang penpen mi 23 tiang VDF ah sem ding ah lak hiding a hi.

ZP, Pradhans leh ward member te’n Sangai Festival ah chial ahilo ziak ua a lung awi-lo thu’u taklang
Imphal, Nov. 25 *(Nisin Thuhiltu)* : Panchayat election ah tunaicha teltin thak ah um - Zilla Parishad members, Pradhans leh Ward member te’n state tourism festival –Sangai Festival ah chial a hilona chung un state government in thuselo ah kawi a hidan uh taklang in a lung awilo thu’u a puang ui. Sangai Festival organizing committee in City Convention Imphal ah November 21 & 22 ah um North East Development Summit 2017 leh Sangai Festival ah chial hilo a hidan uh le a taklang ua, himaleh Adhyaksha leh Upa Adhyaksha Zilla Parrishad te chu NEDS Summit ah chial ah um uh hin a gen ui. Zilla Parishad member khat in thuthak lakhawm mite kiang ah a genna a chun, Assembly constituency, vote kimkhat te’n mipi palai ding ah a teltin uh himaleu Manipur Sangai Festival ah chial ah a umlo uh chu lamdangsa a hidan a gen a, elected local body member te panna bei gual ah kikawi chu ngaithiamlo uh hin le a gen hi.

Accident ziak ah mo-pa panna mi 4 thi; 3 liam
Thoubal, Nov. 25 *(Nisin Thuhiltu)* : Thoubal district, Thoubal Kshtri leikai, Moirang Palli area ah tuaksiatna ziak in mo-pa (bridegroom) panna’n mi 4 in thina a tuak ua, mi 3 in liamna a tuak ui. A kigendan ah mo-pa (bridegroom) leh a lawite mi 6 chu, mo (bride) te inn ah ‘Mangani Chakkouba’ ah chia, a ki nungle lam ua nitaklam dak 2:00 tuam ah zia gual tuaksiatna chu tuak kha a hiu a, hattak ah tai 407 mini truck tawh mo-pa chuanna car (YUVA Car bearing registration number MN05 A 7066) ki phuttua a hi. ‘Mangani Chakkouba’ ahileh Meitei chawndan ah numei leh pawsal ki chenzaw nung ni 5 tinni leh a numei te inn ah, mo-nu insungmi te, a lawi leh pai te tawh mo-pa’n hun a mat khawm sek uh a hi. Zia ah thina tuak mo-pa chu - Maibam Meghachandra (18) hi ah hiat a hia, a lawite pathum thina tuak te ahiuleh Thongam Jupiter ( kum 18), Asem Amujao (17) leh Md. Apik (17) te a hiu. Car sung ah thi den ngal a hiu. Liamna tuak te a hiu leh Pradipkumar, Pradip leh Malemnganba te a hiu a, Thoubal district hospital ah etkawl ah a um nung ua,a liamnau a serious ziak in Shija Hospital and Research Center, Langol ah referred bawl in a um ui.

Keibul Lamjao sakhi mantu mat ah um

Imphal, Nov. 25 *(Nisin Thuhiltu)* : Manipur state government in a thupi thei ding pen ah tukum 2017 ah Sangai (tourism) festival amat zing laitak in zani, 25th November a khan, Keibul Lamjao National Park ah um, sakhi chi khat “Kharsa” (local hog deer) kiti chu thaang kam ah amantu leh a sa nek ding ah pua mi khat matdaw in a um hi. Thaang kam ah sakhi mantu chu Mr Heisnam Kengba of Khordak Mayai Leikai, Bishnupur district hi ah hiat a hi. “Kharsa” kiti sakhi chu Keibul Lamjao National Park ah um sakhi chi khat, Schedule I of Wildlife (Protection) Act, 1972 nuai ah “Hog Deer” ti ah ki ziklut, gamsa vang mama, venbit ding gamsa lak ah pansak ah um a hi. A kigendan ah zia ah sakhi mantu chu Keibul Lamjao National Park Forest enkawltu te leh Keibul Lamjao Police Station ah police team khat in 25th November zan dak 8:30 tuam ah amatdaw uh a hia, mat ah um pa kipuan dungzui ah Keibul Lamjao National Park ah sakhi taksa, hun tiang kinusia le mudaw ah um a hi. Manipur Forests and Environment Minister Thounaojam Shyamkumar in a genna a chun, Wildlife Protection Act 1972 tawh kituak ah sakhi mantu chung ah action khautak lak hiding leh a kigawlkha zosia le suakchalo ding uh hin a gen hi. Sakhi “Kharsa” sa tawh matkhawm ah um Mr Heisnam Kengba ahileh Chief Judicial Magistrate (CJM) Court, Bishnupur ah tuni’n dinsak in a um a, ni 7 sung Forest custody ah um ding ah court in lemsakna a nei hi. Hiatthei khat chu, May 2017 a khan le police ten Sakhi “Kharsa” pathum thattu mi khat a la man ui.

Minister Biswajit in Senapati ah DeltaTech Skill Institute hawng

Imphal, Nov. 25 *(Nisin Thuhiltu)* : Works Minister Thongam Biswajit Singh in tuni’n Senapati district ah DeltaTech Skill Institute hawnna a nei a, ama’n a thugenna a chun, Manipur chu culture lam ah hausa mama a hidan gen in, lam chuamchuam a talent leh theina (potential) tamtak nei hin a gen a, himaleh a hiding gualtak ah kimang theilo leh kisuhat theilo in a gen hi. Talent leh resource um te kituptak ah mat thei a hitak leh Manipur khantona buting thei ding a hidan le gen in, khangthak te’n state khanto ding a ngaikhawkna chung ua lungdam mama hin a gen hi.

Khangthak te chu lasapna kiti kichalo ding leh pan thak ah panla, theitawp sua zaw ding in chialna a bawl a, Look East Policy to Act East Policy nuai ah Manipur chu gateway of India to South East Asia hiding hin a gen hi.

Minister Biswajit in aviation sector ah training bawl te chu Udey Deshka Aam Nagrik, UDAN scheme nuai ah benefit piak hiding a hidan uh taklang in, skill development training kiti thil pawimaw mama hin a gen a, talent lam thil ah North Eastern States te lak ah Manipur chu No. 1 hi’n a gen hi. Chun, local organisations chuamchuam in memorandum a piak teu chu enzui ding leh avaima theilam ah panla ding hin a gen hi. DeltaTech Skill Institute hawnna a neizaw in, Minister Biswajit in Jamning Katomei, Senapati ah Royal Football Academy hawnna ding in foundation suangphuna le a nei hi.

Nurses te first line actors a hiu: Minister Radheshyam

Imphal, Nov. 25 *(Nisin Thuhiltu)* : Manipur Education Minister Thokchom Radheshyam Singh in khuallian hina tawh tuni’n CMC College of Nursing, Koirengei ah 2nd Convocation Cum Graduation Day Ceremony a uap a, ama’n a thugenna a chun, Nurse Graduates 33 te kipakpi kawm in, khenchuam neilo ah nurse te’n damlo te a etkawl ding uh pawimaw a hidan gen in, nurse te chu mizosia a ding ah nisa (sun) leh candles vak gual a hiding uh pawimaw in a gen hi.

Nurse profession chu profession lopi tak leh thiangtho hin a gen a, doctors leh nurse te mawpuakna sang mama in a gen hi. Graduate zo thak te chu Pathian muang kawm ah gin-um tak leh kukal tak ah panlakna a pat lawtinna um ding a hidan gen in, tilkhona a nei a, damlo a pawimaw te kithuapi thei ding ah umta ti mai ah professional nurse te mawpuakna bukimlo in a gen hi.

Zia hun matna a chun, Vice Chancellor, Manipur University, Prof. Adya Prasad Pandey leh Rev. Dominic Lumon DD Archbishop Imphal ten le thugenna nei in, nurse te tilkhona a nei ua, Management, staffs, Students leh parents te’n hun matna a uap ui. Chun, Certificates leh medals hawpdawna le a um hi.

CM in Mandalay-Myanmar exhibition football match uap

Imphal, Nov. 25 *(Nisin Thuhiltu)* : Chief Minister N. Biren in tuni’n Khuman Lampak Main Stadium ah Mandalay leh Manipur numei football team te exhibition match uap in, thugenna a nei a, ama’n a thugenna a chun, zia exhibition match chu Government of India’s Act East Policy tawh kituak ah gam kinaipi te tawh relation hawizaw sem a um ding tupna organised kibawl in a gen hi.

Chennai ah ISL match hun ah North East numei te engbawl ah a umnau tawh kisai chu zik thaw ah a kisaipi thuneitu te thil umdan enzui ding ah hiatsak ding a hidan taklang in, Manipur government in Sangai Festival a pat khawvel gam chuamchuam ah um te lak ah Manipur’s hospitality, culture leh Manipur hawina suklatna ding ah panla zing hin a gen hi. N. Biren in Myanmar leh Manipur journalist te’n November 27 leh 28 ah interaction nei ding uh hin le a gen hi.

Hun matna uap, ISPE-MYDA Director Principal U. Myo Myint Aung in le zia hun a chu thugenna nei in, Mandalay leh Government thasik in, Chief Minister N. Biren leh Manipur mipi te chu Mandalay ah tuni friendly matches gual chu uap ding ah chialna bawl in, January 26 leh 27 2018 leh Manipur leh Mandalay in football exhibition match nei ding uh hin a gen hi.

YAS Minister Letpao Haokip in a genna a chun, State top players 75 te chu National leh International tournament ah kihel a hidan uh taklang in, tuni kihelna Manipur team chu Mandalay team sang ah hatzawlo ah kilang in a gen a, January 26 leh 27 2018 leh Mandalay ah friendly matches a um hun tak leh Government in state top players a tam theipen sawl ding hin a gen hi.

Zia hun matna chu, Consumer Affairs Food and Public Distribution Minister Karam Shyam, State Level Committee for Actualisation of Act East Policy Convenor RK Shivachandra, MLA, top civil leh police officer tamtak ten le a uap ui.