Chief Minister N. Biren Singh in thutiam diklo bawl ah oppositions party te ngawna pawmlo

Imphal, Nov. 17: Chief Minister Nongthombam Biren Singh in thutiam diklo (false promise) bawl ah oppositions party te ngawna chu pawmlo a hidan tuni ah Hill Leaders’ Day & Meeyamgi Numit hun in a gen hi. State sung ah tunai ah khantona chi chuamchuam muthei ah um a hidan taklang kawm in, state government thak in mipi te a ding ah theitawp sua panlakna nei zing hin a gen a, government thak in mipi te kiang ah kitiamna diklo nei a hidan gen in, guanggalna bangkim a um zaw tak leh mipi hiat ding ah puan ah um sek hin a gen hi. Government in state sung ah good governance a um theina ding ah transparent tak ah panlakna nei zing in le a gen a, government lui in sep leh a bawl khial issue um te sukvenna ding ah panlakna le nei zing in a gen hi. Tu dinmun ah government dawilona ziak ah kiphinna/ protest bawl hiat ding khat le um nailo a hidan gen in, government in mipi support dawng zing in a gen hi. Chief minister in a gen zawm zelna a chun, government in mipi phat chuampi thei ding ah oriented policies leh programmes chuamchuam chiapi ah state khantona ding lampi ah kalsuan zing hin a gen a, mipi te support pawimaw in le a gen hi.

Government in disability certificate piakna ding tawh kisai ah district chuamchuam ah assessment camps nei zing in le a gen a, Tamenglong-Haflong road chu National Highway ah upgrade bawl ding ah panlakna um leh estimated cost Rs 40 crores tawh Tamenglong ah Water Supply Scheme chiapi hiding in a gen hi.

BPL family te ding ah 1st January, 2018 leh health insurance scheme hawn hiding, zia chu damlo haksatna tuak te’n financial assistance Rs 2 lakh muthei ding a hidan uh taklang in, tuni, 17th Nov. ah Meithai (widow) te ding ah Health Care Insurance Scheme issue ah umta hin a gen hi.

Manipur Sangai Festival 2017 hun ah North-East Development Summit ding tawh kisai Chief Minister Biren Singh in a genna a chun, kisak lawkna um zing a hidan gen in, zia hun a chu National leh International investors, company tamtak pang ding ua gingcha hin a gen a, North-East Development Summit chu 21st-22nd November, 2017 ah um ding hin a gen hi. Zia submit chu uap ding ah Assam, Arunachal Pradesh leh Nagaland Chief Minister confirmed ah umta leh Myanmar a pat Media Team khat in State vena nei ding uh leh state ah media person te tawh interaction nei ding uh hin a gen hi. A langkhatlam ah tuni, Hill Leaders’ Day & Meeyamgi Numit hun in Chief Minister in complaints 500 enzui in, mimal tak in mi 1500 tuam te zingkal dak 8:00 a pat nitaklam dak 3:15 kikal in a kimupi hi.

Care Seminar Programme mang
Lamka, Nov. 17: Evangelical Baptist Convention EBC Headquarter in Mini Auditorium, Dorcas Hall Campus, New Lamka ah ni 2 sung Member Care Seminar Program a nei chu tuni’n a zo thiang hi. Member Care Seminar ahileh November 16 sunma dak 10:30 ah kipan, Rev. V Nenglian, Divisional Superintendent, Lamka South Division in hawnna a nei a hi. Seminar hun sung in Mission Agency Worldwide Evangelization for Christ (WEC) a pat nupan Martyn leh Wendy Bakers te’n resource person hina tawh “The Role of Church Leadership in Effective Sending, Caring and Mission Agency Partnership, Re-Entry and Debriefing, Understanding God’s Heart for Sending leh A practical Model for Member Care” ti thupi nei in kochuam puitu te ziltilna a nei ua, Lamka South Division leh Lamka North Division sung ah Pastor te seminar in a pang ui. Chun, Rev E Paukhanlian, Divisional Superintendent, Lamka North Division in pauchapna tawh seminar khakna a nei hi.

Search & Rescue, Fire Fighting traning bawl

Lamka, Nov. 17: Civil Defence, Revenue & Disaster Management (R & DM), Manipur saina’ Rayburn College Auditorium, New Lamka ah Search & Rescue, Fire Fighting & Mock Drill kiti Master Trainer-te training piak ah um chu tuni, November 17, 2017 in sutzawm in a um hi. Training in District sung ah Master Trainer leh New Lamka huap sung ah Village Leader te a pang ua, “A Bridged Concept on Natural and Manmade Calamities”, “Emergency Medical and Health Services”, “Theory of Combustion/Uses of different Fire Extinguisher” chihleh “Stage of Survey Organization of Rescue Service /Uses of Rope” chihte sinsak hi ua, tuni’n ahileh “First Aid Organization/ Constitution of First Aid/Team”, “Uses of Triangular and Roller Bandages, “Artificial /Respiration/ CRP” tawh kisai in kiziltilna a um hi. Training ahileh Department of Relief and Disaster Management, Government of Manipur sponsor buawlna nuai ah nei ah um a hia, Md. Ayub Khan, Staff Officer leh Ch. Raisi Leo, Senior Instructor te Trainer in a pang ui.

DAPCU in October tha sung ah HIV/AIDS positive 18 mudawk
Lamka, Nov. 17: District AIDS Prevention and Control Unit (DAPCU), Churachandpur in thalui October 2017 sung in HIV/AIDS positive mi 18 mudaw thak a nei a, zia lak a chun, mi 8 ten Antiretroviral Therapy (ART) damdawi nek a pan ui. DAPCU in zia ah HIV/AIDS positive mi 18 a mudaw thak teu chu General Client lak ah Injecting Drug User (IDU) mi 175, Female Sex Worker (FSW) mi 145, numei nauvawp (Antenatal Care) mi 489 te te panna a kigawm ah mi 782 te test a bawl hun ua a mudaw uh a hi. A langkhatlam ah zia hun sung a chun, District TB Clinic ah kimang, CB NAAT Machine a siat ziak ah ICTC/ART a pat Referral umlo in a kigen hi.

BRTF in Tipaimukh Road ah lampi siamthakna nasep chiapi zing
Lamka, Nov. 17: Tipaimukh Road, Zero Point, Churachandpur Police Station a pat lampi siamthakna nasep chiapi ah um chu chiazawm zel in tuni, November 17, 2017 in Lamlian Veng, Bungmual a lampi siatna mun Border Road Task Force (BRTF) te’n a siam ui. Lampi siamna nasep ahileh Ministry of Defence, Government of India nuai ah fund mang ah kisiam a hi. Nasepna a hileh 25-BRTF Imphal nuai ah um, 80 RCC Thonlon a pat Nishant Saurabh, Junior Engineer in a enzui a, Zero Point a pat Meter 300 sung chu, Evaluation Team in a siat diakna mun te tepte in Water Bound Macadam (WBM) technique mang ah a siam uh hin a kigen hi. Tuni ah nasepna mun ah ballu single sun ah um te, detdo zo lo sak ziak in nasem te’n a cho dawk ua, 40 mm a sungkhum ui. Lampi a siatdiakna munte siamzaw a hitak leh black topping bawl vek hiding in Nishant Saurabh, Junior Engineer in a gen hi. Chuleh, lampi siatdiakna munte siamhawina ding ah dawi gual ah suang kining ting tak a umlo ziak ah nasepna ni 2 sung chawl un le a gen a, Tuilaphai a pat suang lak a hi bak ah traffic ziak duthusam gual tak ah nasepna chan gang theilo in le a gen hi.

Lamka Food Festival chiatha zing
Lamka, Nov. 17: Pasikhawm Restaurant kiti saina’ United Motors, Hebron Veng, New Lamka ah Lamka Food Festival 2017 nei ah um chu a chiatha zing hi. Food Festival ahileh zani ah kipan a hia, Pasikhawm Restaurant, Life Café leh Wonderchef te’n Stall bawl in, nek thei chi chuamchuam a zuak ui. Food Festival ahileh sun dak 12:00 a pat nitak dak 7:00 kikal nei a hi sek a, a nitawpni November 17, 2017 ah competition chi chuamchuam um ding hin a kigen hi. Kidemna ding te ahileh Momo leh Kawlbu-chi siam kidemna, Foodfight ah Momo, Vokthau leh Malcha kineksiak ti te hiding a hi. A pangnuam te’n Rs. 200 leh Foodfight ah Rs. 100 sun dak 12:00 tiang ah piaklut ding, kidemna ahileh nitaklam dak 2:00 ah kipan ding hi’n Henry Samte, Proprietor, Pasikhawm Restaurant in a gen hi.

TKSU CCpur College in election nei
Lamka, Nov. 17: Thadou - Kuki Students' Union (TKSU) Churachandpur College in tuni’n kum 2017 - 18 sung ah vaipaw ding telna KKL Complex , Churachandpur in a nei a,zia hun a chun, President ding in Mr Jangkhohao Haokip; V/ President- Ngamjahao Chongloi; General Secretary- Goulungmon Haokip; Finance Secretary - Mercy Nengneihoi Singsit; Secretary Socio & Culture –Lunkhohen; Secretary Education - Esther Nengpichong leh Secretary Info & Pub. - Lunkhomang Misao te a telting ui. Teldaw ah umsia min puandawna Presiding officer Thangboi Haokip in a neizaw in Lunkhohao Haokip President TKSU - GHQ in kitiamna (Oath Taking) a nei sak ngal hi.

National Legal Service Campaign bawlna’ Cycle Rally nei

Lamka, Nov. 17: Manipur State Legal Services Authority (MSLSA) leh Churachandpur District Legal Services Authority (CDLSA) in National Legal Service Campaign a nei uh sunzawm in tuni, November 17, 2017 nitaklam dak 2:30 in Khawpi sung ah Cycle Rally a um hi. Rally ah pang ding te chu, Chief Judicial Magistrate Court, Tuibong ah kingakkhawm in, Kimneinieng Shoute, Chairperson, CDLSA in flag-off bawlna a nei hi. Cycle Rally a taite’n Tuibong Forest Gate a pat Tedim Road -New Bazaar Bus Parking - New Bazaar area ah tai in IB Road chuan in, Tipaimukh Road a man ua, Police Station a pat Tedim Road chuan in, Chief Judicial Magistrate Court, Tuibong tiang in Rally a nei ui.
Zia hun a chun, District sung ah Legal Aid Clinic chuamchuam a pat Para Legal Volunteer te rally in a pang ua, khawpi sung ah Poster leh Banner chuamchuam takdawna le a nei ui. Hiatthei khat chu, National Legal Service Campaign bawlna’n November 9, 2017 a khan “Imphal To Churachandpur Motor Cycle Rally” a um a, November 12, 2017 nitaklam dak 3:00 ah Greenwood Academy ah Spot Painting Competition um in, zani a khan HSA Building ah district sung ah Para Legal Volunteer te ding ah seminar a um hi. Chuleh, Campaign nei hun sung in Chief Judicial Magistrate Court, Tuibong ah Help Desk hawng in, mimal, innkuan leh thil dangdang a buaina neite’ Help Desk a pat Legal Aid piak a hiu.

Annual Parent’s Day-cum-Prizes Distribution Function 2017 mang

Lamka, Nov. 17: Bungmual ah um Hermon English School in tuni’n Annual Parent’s Day-cum-Prizes Distribution Function 2017 a mang hi. Zia hun chu school managing committee member, student te, nu-le-pa ten a uap ua, Sir Ginlalsiam Thangluai leh Miss Chinglunmawi ten hun matna amapui ui. Hun mat sung in H Thongkhopau, Headmasters Hermon English School in headmaster address bawl in, Upa V Ginchinpau, Chairman, School Managing Committee leh school managing committee member gennuam nei te a pat thugenna hun a um hi. School in October 16 -20 sung ah Annual Sport Meet a nei hun ua Prize hawpdawna le zia hun a chun a um a, Hermon English School student ten items chi chuamchuam suklatna le a nei ui. Hermon English School ahileh 1983 ah phudaw ah um, kum sin leh student, teacher leh nu-le-pa te tawh Annual Parents Day ala mang zing sek a hiu a, kum 2015 leh 2016 ah buaina chuamchuam a um ziak ah Annual Parents Day mang theilo ah a la um, Headmaster H Thongkhopau etzuina nuai ah non-teaching leh teaching staff 21, student 500 vel umna a hi.

Minister Karam Shyam in SK Oil dealer te thautui la ding ah hiatsak

Imphal, Nov. 17: Manipur Consumer Affairs, Food and Public Distribution Minister Karam Shyam in SK Oil (Superior Kerosene) dealer te chu oil stocks ladawk ding ah chialna bawl in, oil depot ah thautui tamtak um in a gen hi. Laklo ah thautui tamtak ki sinawt zen ah a um khak ding lauthawng a hidan taklang kawm in, November 30, 2017 tiang ah SK Oil lakdaw a hiloleh SK Oil chu mobile sale ah retail shops te piak hiding in a gen hi. Thautui ki sinawt a um zing leh Central Government in State a ding SK Oil allocation chawlsan thei ding hin le a gen hi.

Minister Karam Shyam in, September, October leh November 2017 a ding ah State in 1,456 KL (one thousand four hundred and fifty six kilo litre) SK Oil mu hin a gen a, zia lak a chu September tha ah 708 KL (seven hundred and eight kilo litre) lakdaw ah um, October tha ah 848 KL (eight hundred and forty eight kilo litre) lakdaw ah um, total 1,356 KL (one thousand three hundred and fifty six kilo litre) chu September leh October tha ah laklo ah um in a gen hi.

November ah State quota chu 1,456 KL (one thousand four hundred and fifty six kilo litre) a hidan taklang kawm in 408 KL (four hundred and eight kilo litre) chu November 17, 2017 tiang ah ladaw ah um maleh a dang sia chu lakdawlo ah um zing nalai in a gen hi. Zia chu tawh kitawn ah SK Oil dealer te’n a quota ding chiat uh a vaima theipen ah a ki lakdaw ding uh pawimaw in a gen a hidan gen in, kituptak ah SK Oil etzuina nei a hi ziak ah tamtak oil depot ah um thei hin a gen hi.

PDS items tawh kisai a genna a chun, government thak in March 2017 a pat PDS item te dealers/agents te khut ah pedawk zing in a gen a, black market ah LPG cylinder zawk ah a um tawh kisai le a kisaipi thuneitu te’n nisin ah etzuina nei zing un a gen hi.

Imphal Smart City Mission a ding ah Centre in Rs 106 crore releases : MAHUD Minister

Imphal, Nov. 17: Municipal Administration, Housing and Urban Development (MAHUD) and Town Planning Minister Thounaojam Shyamkumar in tuni’n Imphal Smart City Mission a ding ah Centre in Rs 106 crore released bawl a hidan New Secretariat,ama office chamber ah thuthak lakhawm mite kiang in a taklang hi. Ama department in Imphal Smart City Mission nuai ah tha 3 sung ah nasepna 90% zawthian ding ah guanggalna nei a hidan le taklang in, Mission tawh kisai ah nasepna bangkim chu Chief Minister tawh kithuhiat ah chiapi hiding ah gen in, Imphal Smart City Mission lawtin theina ding ah mipi te’n government panlakna support chiat ding in chialna a bawl hi. Municipal areas ah a kum a sim cleanliness drive chiapi ah um ding chu November 21-30 sung ah um ding Manipur Sangai Festival 2017 khualna 18th November 2017 ah cleanliness drive pat hiding in a gen hi. Imphal Municipal Corporation (IMC) staffs leh Mayor mapuina ah cleanliness drive chiapi hiding,Municipal Council dang Moirang, Bishnupur, Kakching, Yairipok leh Thoubal a le zia drive chu chiapi hiding in a taklang hi.

Minister Th. Shyamkumar in Imphal core zone area - Thangal Bazar, Paona Bazar, Uripok road, Kwakeithel road, Yairipok road, Keisamthong road, Singjamei road te ah dukan/dawr bawl te chu kituptak ah dustbin mang ding leh lampi sunin thei ding ah nin pai thâng zeng zung lo ding in chialna a bawl a, nin pai thâng zeng zung a um leh a chung ua legal action lak hiding in a gen hi.

Memorandum draft bawlna zawthian vang hita: Deputy Chief Minister
Imphal, Nov. 17: Government of India leh NSCN(IM) in peace talk a neina chung ua, Manipur ah All Political Party meeting lemsakna dungzui ah Prime Miniter leh a kisaipi thuneitu te piak ding, Memorandum draft bawl ding ah guat a um Memorandum Drafting Sub Committee in tuni’n a 3 veina ding in meeting a nei hi. Memorandum Drafting Sub Committee chairman, Manipur Deputy Chief Minister Yumnam Joykumar Singh, Office chamber, Manipur Secretariat (North Block) ah meeting nei in, Memorandum chungchang a genkhawm ui. Meeting zaw ah Deputy Chief Minister in press conference ah a genna a chun, Sub Committee in 3 vei meeting neita a hidan taklang in, memorandum ding draft zaw hita hin a gen a, zia chu ni 2 /3 zaw leh Chief Minister kiang ah piaklut hiding in a gen hi. Chief Minister kiang ah piaklut a hi masang ah, all-party meeting um ding, zia tak chu le final bawl hiding in a gen hi. Memorandum final a hitak leh Prime Minister kiang ah piaklut hiding in le a gen hi. Memorandum Drafting Sub Committee ahileh Imphal ah 28th October, 2017 ni, all-party meeting lemsakna dungzui ah phudaw ah a la um a hia, 2nd, 14th leh 17th November, 2017 ah Deputy Chief Minister chairman hina nuai ah Drafting Sub Committee in meeting nei ah political party chuamchuam te suggestion piak te enkhawm ah Memorandum draft a bawl a hi.

Maoist in Indefinite Cease Work puang

Imphal, Nov. 17: Maoist Communist Party of Manipur (Maoist Armed Revolutionary Party) in 18th November 2017 a pat indefinite public cease work strike chiapi ding a hidan a puang a, zia chu state sung ah indigenous mite humbitna ding ti a hi. Mangang, coordinator, standing committee suai kaina press release in a taklatna a chun, indigenous mite te humbitna ding ah Manipur mipi te zia gual kiphinna pan ding a chu kimansa um a hidan uh taklang in, November 21, 2017 leh India President in Sangai Festival a uap ding tawh kitawn ah kiphinna nasatak ah chiapi ding pawimaw, Manipur chu mi hangsan te panlakna piang hi ah suklat ding pawimaw in a gen hi. Training

Kiphinna nei hun sung ah mimal nasep thilbawl, official duty chawlsan ah kiphinna tawsawt chiat ding leh state mipi te chialna a bawl a, markets leh business centers, offices, schools leh college te khak vek ding in le hiatsakna leh chialna a bawl hi. Himaleh zia kiphinna nei hun a chu, Hospitals leh media related works, emergency services leh sakhua thil te relaxed hiding a hi.

A langkhatlam ah Maoist thupuan support bawlna kawm ah Manipur Civil Society Organisation chuam chuam – UCM, AMUCO, MAFYF, MPIP, CCSK te mapuina’ Lamyanba Shanglen, Imphal ah “One Day Political Open Dialogue on the Possible Outcome of the Frame work Agreement” um ding a hi.

ZUF in Noney nusia ding ah NSCN-IM vauna bawl

Imphal, November 17: Noney Bazar ah Zeliangrong United Front (ZUF) in NSCN IM chu Noney nusia ding in vauna bawl kawm in zanitak dak 10:25 tuam a khan Noney market area ah meithal 2/ 3 a kap puak hi. ZUF in NSCN-IM chona leh vauna ah meithal a kap puak chu local mite’n demna bawl in tuni’n student te panna, Noney Bazar road in rally a nei ua, zia gual numei chapang sulau thawng thei thil te chu tunung ah a umkitlo ding tangko kawm in, chamna a um theina ding ah a kuakua’n panlakna a nei ding a nawp thu a taklang ui. A kigendan ah ZUF Jenchui Kamei group leh NSCN-K te’n NSCN-IM te Noney area ah a um ding uh nasatak ah dodal zing uh hin a kigen a, Noney area chu sum dawlna leh Tamenglong a pat zamdawk theina ding ah mun pawimaw tak a hi ziak ah pawl 2 te kal ah a thuneizaw ding kichuna piang zing hin a kigen hi. Thudawnna dang khat in, Noney area leh Khoupum area ah pawl 2 te kal ah kikaptuana tunung ah piang zing thei ah um in a gen hi.

Ithai mipi’n Ithai Barrage project chawlsan ding phutna kiphinna nei
Imphal, Nov. 17: Bishnupur ah Ithai local mite’n tuni’n lampi khak in Ithai Barrage project chawlsan ding phutna nei in kiphinna a nei ua, “GO BACK NHPC” ti ki zikna pang in placard chi chuamchuam muthei in a um hi. National Hydroelectric Power Corporation (NHPC) ahileh Loktak Lake ah Loktak Multipurpose Hydroelectric Project chuamchuam chiapia hi. Local mite gendan in a chiata kum 5 sung ah Ithai barrage leh Loktak Hydro project chiapi ah um chu chawlsan ding phutna nei zing a hidan uh taklang kawm in, Ithai barrage leh Loktak Hydro project chiapi ah a umna a pat thil pha chuam sang ah thil suksiat ahiloleh mihing thina, environment siatna sangzaw hin a gen ui. Hiatthei khat chu, Governor Dr Najma A Heptulla in November 19 a khan ecological balance a kitup theina ding ah Ithai Barrage project chawlsanna ding ah panlakna nei ding a hidan genkawm in Ithai Barrage project lem a sakpilo thu a la gen hi. A langkhatlam ah Jiten Yumnam, Centre for Research and Advocacy Manipur secretary in Ithai barrage project ziak ah gamsa, ganhing te umna buaizo ta leh Loktak hydroelectric project chiapi a hiziak ah agriculture land 80,000 hectares lam tui in chupmangta hin a gen hi. Project ahileh 1984 a pat chiapi hita a hi.

Chamna leh muanna a um ding pawimaw : CNPO
Imphal, Nov. 17: Chandel Naga Peoples Organization (CNPO) in November 13 ah Chandel ah IED bomb puakna Assam Rifles jawan 2 in thina a tuaknau tawh kisai chu nasatak ah demna bawl in ziagual thil chu underground group te’n tuban ah chiapi zawm lo ding in chialna a bawl hi. LV Robert Lamkang, President (CNPO) in a genna a chun, 13th November, 2017 ah Mahamani village ah IED kikam chu nasatak ah demna bawl in thina tuak jawan insungmite suunpi thu a puang a, police dept. in IED mang ah attack bawltu te matdaw theina ding ah panlakna a nei chu nasatak ah kithuapina piak hiding ah taklang in, chamna leh muanna a um zing theina ding ah a kua kua’n panlakna nei ding pawimaw in a gen hi.

Search operation bawl

Imphal, Nov. 17: India President Ramnath Kovind in November 21 leh Imphal ah Manipur Sangai festival 2017 hawnna a nei ding boycott bawl ah Coordinating Committee (CorCom) in general strike a puanna chung in State security sukkhau in a um a, mun chuam chuam ah Police Commando te’n frisking leh checking a bawl zing ui. Zia chu tawh kitawn in tuni’n Thoubal district police in Yairipok Singa area ah cordon leh search operation a bawl ua, mi 150 te verification bawlna a nei ui. Zia gualma a chun, Imphal east police in le Okram Chuthek, Imphal East in a bawl ui. A langkhatlam ah Manipur Sangai Festival 2017 kimatna mun ding, -Hapta Kangjeibung, Lamboi Khongnangkhong, Keibul Lamjao etc ah kisingsakna nasatak a chiatha zing a, Chief minister Nongthombam Biren Singh in zani a khan kisingsakna dinmun ama mimal tak in et-thakna a nei hi.