CDEEU in 53th General Assembly-cum-Election 2017 nei

Lamka, Nov. 10 *(Nisin Thuhiltu)* : Churachandpur Distric Education Employees’ Union (CDEEU) in tuni, sunma dak 11:00 a pat in YPA GHQ Hall Hiangtam Lamka ah 53th General Assembly-cum-Election 2017 a nei hi. Zia hun chu N. Chingkhei Singh, MES, ZEO Churachandpur in Chief Guest hina tawh a uap a, Christina Zokhumi leh Mary Haokip te’n hun matna a mapui ui. CL John Vice President, CDEEU in vaidawn thugenna nei in, Lamkhothong in hun pat pauchapna a nei hi.
Hun mat sung in, G Kamzachin, Finance Secretary leh Laltanlien Joute, General Secretary te a pat Report piakna a um a, Laltinlien Joute, General Secretary in Appreciation Certificate piakdawna hun mapui in CCpur District a pat State Level Teacher Award sang mi 2 - CL John Headmaster, Gandhi Memorial High School leh Awikhanching, Assistant Headminster Lanva Model High School te kiang ah Appreciation Certificate piak in a um hi. Zia nung a chun, H. Pauzachin, MES (Retd.), President, CDEEU leh Chingkhei Singh, MES, ZEO Churachandpur te a pat in thugenna a um a, vaisaitute mapuina’ Business Session hun nei in, CDEEU constitution approval ah a umna tawh kisai leh employess enrolement chungchang panna, DCG leh PCG tawh kisai genkhawmna a nei ui.

Zia nung a chun, CDEEU 2017-2019 sung ah vaipaw ding telna (election) a nei ua, election a neizaw un, Presiding Officer in election result puandawna a nei hi. President ding ah Kaikhanlian Guite, Vice president Lalhmasawn, General Secretary D Neihkhohao Haokip, Assistant Secretary S Manglianthang Ngaihte leh Finance Secretary ding ah Gouchinlangh te teltin in a um ua, Election Presiding Officer Lalhmasawn, DI Tipaimukh Block in teltin ah um te kitiamsakna a nei hi.

H. Pauzachin, MES (Retd.), President, CDEEU in a genna a chun, September 30, 1959 kum ah Bijang Loubuk Government school ah Tribal Teacher Association phutdaw ah a la um a hidan taklang in, kum a chiazel dungzui ah Tribal Teacher Association a la kiti chu, Teacher Association, South District Teacher Association ti ah a min san ah um leh kum 1971 ah Ccpur District Teacher Association ah kisang kit, zia nung a chu October 13, 2015 ah Churachandpur District Education Employees’ Union ti ah um hin a gen hi.

Zia hun mat sung a chun, Late Sehzahao insung mite a galna’n a sum in (Death cum Gratuity) in Rs 30,000/- piakna a nei ua, Pensioner mi 8 te kiang ah Penson cum gratuity in Rs 5000/- piakna a nei bawk ui. Chuleh, kum 2015-2017 sung ah Executive member thina a la tuak - T Donglainpau Assistant General Secretary leh Onkhomang, Executive member te panna famta member 20 te suunna hun a nei ui.

Dy Commandant H. Lienzamang Gangte liam

Ranchi, Nov. 10 *(Nisin Thuhiltu)* : Tuni, 10th November dak 9:25 vel in Jarkhand State, Latehar district huapsung Latu kitina mun ah Maoist te IED Bomb kam sukpuak khak ziak in H. Lienzamang Gangte, Deputy Commandant panna mi dang 3 in liamna a tuak ui. Liamna tuak te chu - 1. Sh. H.L Gangte,DC (Got splinter injury in left eye) ; 2. HC/RO Nilesh Pandey, (Got splinter injury in both thighs); 3. HC/GD Gopaljee Yadav (Got splinter injury in his Right hand,right eye brow, hand and face) leh 4. CT/GD Deepak Singh (Right forehead cut due to splinter injury) te a hiu. Helicopter mang ah Ranchi tut in a um ui.

“Adopted” Gospel Team in khanglai te tawh hun mang ding
Lamka, Nov. 10 *(Nisin Thuhiltu)* : Cityview Church, Vancouver, Canada a pat “Adopted” kiti Gospel Team khat in November 7 a pat November 12 sung Lamka khawpi sung ah Biak-inn leh Home chuamchuam ah “The Outsider is Now The Insider” ti thupi nei ah Pathian thu laa mipi tawh fellowship programme a chiapi’u chu chiatha zing in, zing November 11 nitak dak 6:00 leh EBC Gospel Centenary Hall, New Lamka ah khanglai te tawh hunpi (main event) matna a um nei ding a hiu. Zia hun a chu khanglai a tam theipen in uap ding in Divisional Superintendent, Lamka South Division in chialna a bawl hi.

“Tunglut Enterprise” kiti hawng

Lamka, Nov. 10 *(Nisin Thuhiltu)* : Leingoi, suanghum leh cement mang ah T Chinzasawm in Innsung leh Compound ah mat thei ding paver chuamchuam siamna a bawl thak “Tunglut Enterprise” kiti chu tuni’n New Lamka Vengnuam ah a hawnna leh a latna a um hi. Zia hun a chun, Pastor Letzathang Guite, Local Pastor, EBCC Central Lamka in “Tunglut Enterprise” hawnna leh Pathian kiang in a latna a nei hi. Tunglut Enterprise neitu T Chinzasawn in a genna a chun, innsung leh compound sung mat ding paver chi chuamchuam siamdaw theina ding ah kum 2013 ah kisingsakna a nei nung ah Maharashtra ah Tara Company tawh kithua ah nasem khawm thei ding ah kinawptuana a nei uh himaleh lawting tak tak theilo ah a um tawh kitawn ah kum 2015 ah Maruti Hydraulics Private Limited te machine mang ah nasem thei ding ah kiholemna a nei nung ua a machine te October 10, 2017 ah Lamka tut a hi tawh kitawn ah “Tunglut Enterprise” hawng thei ah um a hidan gen in, Paver block kil thum neite chu Rs. 50 leh Rs 35 man ding, Paver killi nei te Rs 45 man ding, paver design chi chuamchuam um te zil ah aman le a chuam chuam um ding hin a gen hi.

TKSU CCpur Govt. College Branch in election nei ding
Lamka, Nov. 10 *(Nisin Thuhiltu)* : Thadou-Kuki Students’ Union (TKSU) General Headquarter saina’ TKSU Churachandpur Government College Branch ah kum 2017-2018 sung ah vaipaw thak ding telna um ding a hi. Zia ah candidate nuam te’n November 11 - November 14, 2017 sung ah RCDS Office, B. Vengnom Community Hall ah Rs. 100 pia, Nomination Form lak thei ding, Departmental Secretary ding te’n Rs. 50 a piak uh ngai ding ti a hi. Election ahileh November 17, 2017 leh KKL Office, IB Road ah um ding a hi.

PMEGP 2017-2018 apply bawl thei
Lamka, Nov. 10 *(Nisin Thuhiltu)* : Director of Trade, Commerce & Industries, Manipur thusuak dungzui in khangthak kum 18 chunglam, lekha thiam, sepna neilo, Churachandpur leh Pherzawl District a pat te’n Prime Ministers’ Employment Grneration Program (PMEGP) 2017-2018 apply bawl thei ding un a taklang hi. Application ahileh November 9, 2017 a pat November 21, 2017 sung ah online ah apply thei ding a hi. Aplly bawlnuam te’n www.kviconline.gove.in/pmegp ah Ministry of MSME guideline tawh kituak ah apply a bawl uh ngai ding ti a hia, Notice Board ah kitak, negative list ah pang te’n a hileh apply theilo ding uh ti a hi. Application ahileh DIC Churachandpur leh Pherzawl, KVIC Imphal leh MKVIB, Lamphal ah piaklut ngai ding in le a kigen a, hard copy leh a kisaipih document zosia ahileh General Manager, DIC Churachandpur ah piaklut ngai ding a hi. Document pawimaw te ahileh Aadhar Card, Pan Card, Caste/Tribe Certificate, Special Category Certificate, Rural Area Cerficate, Project Report, Educational Qualification tit e hiding a hi. Thuchian kimzaw, a chung ah kipia official website ah etchian thei hiding a hi.

Zou Gal Centenary Shield Football Tournament 2017 hawng

Lamka, Nov. 10 *(Nisin Thuhiltu)* : Organizing Board, Zou Gal Centenary Shield Football Tournament 2017 leh Churachandpur District Sports’ Association (CDSA) saina’ tuni, November 10, 2017 sunnung dak 1:00 in Peace Ground, Tuibong ah Zou Gal Centenary Shield Football Tournament 2017 Opening Ceremony a um hi. Zia hun chu Khaipao Haokip, Chairman, ADC Churachadpur in Chief Guest hina tawh a uap a, B. Dongzalian Simte, Chairman, Zomi Council in Guest of Honor hina tawh uap in, TS Haokip, Social Worker in Functional President hina tawh a uap a, Chinlunthang, President, UZO General Headquarter in Chief Host hina tawh a uap hi. Rejoice Milun in hun matna a mapui a, Zou Artist Union mapuina’ UZO lapi sakna nei in, Nengchinlam, Chairman, ZGCSC 2017 in vaidawn thugenna a nei a, Chief Guest in tournament kick-off bawl in, Opening Match ah Bungmual Youth Club (BYC) leh Zoheisa Football Club (Zoheisa FC) te a kihel ua,goal 2-2 in a ki draw ui. Zia tournament a chu zing 11 November 2017 ah sunma dak 11:00 leh Tuaitengphai YAU leh UZO Daijang Unit te kihel ding a hiu a, sunnung dak 12:30 leh Lamka SC leh Taqchapa United FC kihel ding, nitaklam dak 2:00 leh UZO Tuila Block leh FC Zogene te kihel zawm ding a hiu.

Winners Cup 2017 semi-final ah UKB in 1-0 ah RAU zo
Lamka, Nov. 10 *(Nisin Thuhiltu)* : A chiatha zing Manipur Winners Cup 2017 ah Churachandpur District champion UKB leh Imphal East champion RAU tuni, 10 November 2017 nitaklam dak 1:00 in RAU te home ground ah Semi- final match a nei ua, match kipat nung second 10 vel in UKB jersey no. 9 Paosei in senior Midfielder Jersey no. 11 Ngulkhosiam in naltak ah a pass phei a kipat in left side ninglam a pat in goal a peklut ngal hi. Thumvei ball khawi khakna goal khumngal ti thei in a um hi. Artificial turf ground ah UKB player te a kihel masaknapen uh a hi ziak in UKB player te chu ground matdan haksa sa a bang ua, RAU te fitness hawi zawk ziak in ball possession chu 60% RAU te a hiu. A hinlah, UKB inle goal chance tamtak a mansua hi. Paosei shot khat goal post kha in a kile kit a, goal mai ah free tak ah khum ziang thei lai Haokhongam in a chunglam in a pekmang hi. A mau lam inle chance hawitak 2 vel a miss ua, D box sung ah Thangminlun foul ziak a free kick a mu uh chu a miss hawi mama ui. Khatvei goal keeper pa goal taisan nung ah goal ding lai Thangminlun in a head mang hi. Hun bei tiang ah RAU ten ball chang mun zaw bang maleu goal khat a puak uh dit kit zo talo in Half masang ah UKB in goal khat a la khum chu fulltime tiang ah (1-0) gualzawna’n a pang hi. UKB in ahileh 12th November 2017 leh RAU chu a homeground, Leisang ah zintun ding a hi.

UNC demand thu ah Govt.of India, Govt. of Manipur leh UNC in tripartite talk nei

Senapati, Nov. 10 *(Nisin Thuhiltu)* : Manipur ah district thak 7 siamdaw ah a umna chung ah UNC in roll back ding phutna Manipur khangthu economic blockade sawtpen ah tepte thei hial khawp ah economic blockade ni 139 sung a chiapi nung ah Govt. of India, Govt. of Manipur leh United Naga Council (UNC) in Tripartite Talk a chiapi chu tuni’n Senapati District HQ in a sunzawm ui. Zia hun a chun, UNC in tuni tang ah a demand uh sukpitin piak a hilona chung in a lung awi-lo thu’u a taklang a, govt. in UNC demand chu a kisaikhakpi chuamchuam te thuhiat phawt hiding leh awl ah a demand uh sukven piak theina ding ah panlakna um ding in thutiam a bawl hi.
Zia kihona a chu kinawptuana thil thupi hiat thei ding umlo maleh state government in a kisaipi thuneitu te UNC demand tawh kisai kihona a neipi ding leh February, 2018 second week ah next round of talks nei ding leh Feb. 23, 2018 ah neizawm ding in kinawptuana a siam ui. Chuleh, state government in district kisiamdaw thak ziak ah mipi haksatna tuak te dinmun le a etzui ding in lemsakna a nei ui. Tuni ah Tripartite Talk chu Govt of India thasik in Satyendra Garg, Joint secy. (NE) Ministry of Home Affairs in a uap a, Govt. of Manipur thasik in V. Hangkhanlian, Agriculture Minister, N. Kayisii, TD minister a leh Th. Radheshyam, Education minister te banah Dr. Suresh Babu, Addl, Chief Secy. And K. Radhakumar Singh, commissioner te’n a uap ui. United Naga Council (UNC) team te a hiu leh President Gaidon Kamei in amapui hi.

Buddhist pilgrim te a ding ah guest house sak hi di: CM Biren

Yangon, Nov. 10 *(Nisin Thuhiltu)* : Institute of Social and Cultural Studies, India (ISCS) leh Myanmar Institute of Strategic and International Studies (MISIS) in Embassy of India, Yangon, RIS, India, MIBC leh Mizzima Media Group te support bawlna organized a bawl, Yangon, Myanmar ah International Conference ‘Looking Forward: India Myanmar Relations’ inaugural session hun chu tun’n
Manipur Chief Minister N. Biren Singh in khuallian hina tawh a uap hi. Ama’n a thugenna a chun, Manipur Government in Mynamar ah Buddhist pilgrims te a ding ah guest house sak ding ah guanggalna nei a hidan gen in tourists leh damlo te tunna ding le siam piak ding hin a gen hi.

Manipur ah gam dang pau (foreign languages) zil theina ding ah regional language study centre hawn hiding leh zia mun a chu a bik tak ah Myanmar leh Thai pau zil thei hiding in a gen a, Manipur Government in Nalanda University tawh kithua ah Buddhist religious teaching institution(s) hawng ding, zia chu Ministry of Culture, Government of India nuai ah umsak hiding in a gen hi.

Indo-Myanmar relations tawh kisai, Chief Minister in a genna a chun, India leh Myanmar ki unauna chu ki unau maimai hizawlo ah a kikhen theilo ki-unauna nei hin a gen a, a khang a khang ah a la pangkhawm leh dingkhawm zing hin a gen hi.

Moreh leh a kiangnai tuam ah cosmopolitan township thak siamdaw hiding leh international trade facility bukim tak umsak ding ah government in guanggalna nei in le a gen a, Act East Policy pawimawdan le genlatna a nei hi.

Chuleh, State Government in Power, Tourism, Horticulture, Agro based industries, Food Processing, Handloom and Handicrafts etc te nuai ah project chi chuamchuam chiapi a hitheina ding ah panla zing in le a gen hi. Chief Minister in Mynmar media fraternity te chu ‘Manipur Sangai Festival 2017’ hun ah guests ah pang ding in chialna le a bawl a, Myanmar Women Football Team leh Manipur Women Football Team in Manipur Sangai Festival hun ah “Connecting through Sports” ti thupi nei ah exhibition football match nei ding uh hin a puang hi.

Zia hun matna chu Manipur a pat Principal Secretary to Chief Minister Vineet Joshi, State Level Committee for Operationalisation of Act East Policy Convenor RK Shivachandra leh Personal Secretary to Chief Minister Salam Rajen te’n le a uap ua, Retired Ambassador and MISIS Chairman U Nyunt Maung Shein, Permanent Secretary of the Ministry of Foreign Affairs U Kyaw Zeya, Ambassador of India to Myanmar Vikram Misri and Institute of Social and Cultural Studies, India (ISCS), Secretary Arindam Mukherjee ten le a uap ui.

Siamsin One Day Career Guidance

Lamka, Nov. 10 *(Nisin Thuhiltu)* : Siamsinpawlpi SSPP Singngat Block saina’ tuni sunnung dak 1:00 in Singngat YPA Hall ah Siamsin ONE DAY CAREER GUIDANCE kiti a um hi. Zia hun matna chu Jambiaklal leh Lamminmang ten amapui ua, SSPP Singngat Block President Suanpau Samte in vaidawn thugenna nei in program chiapi ah a umna ziak leh a chia ding dan taklatna a nei hi. Hun mat sung in, Block Adviser T Dongzahau in thugenna saulo a nei a, Hill Model High School leh Rayburn High School a pat Class - VIII a pat a chunglam student 120 vel chiakhawm te resource Person - T. Lianchinpau, PGDPM & IR, Vice President (internal) SSPP GHQ & Vice Principal Rayburn College leh Nangmuansang Lethil, MBA, General Secretary SSPP GHQ te'n career tawh kisai in ziltilna a nei ui. Zia hun matna chu SSPP GHQ a pat Nengbiaklal Assistant General Secretary Organization leh Benjamin Public Relation Secretary ten le a uap ui.

Sports Minister Letpao in Mary Kom kipakpi
Imphal, Nov. 10 *(Nisin Thuhiltu)* : Youth Affairs & Sports Minister Letpao Haokip in boxer leh MP (Rajya Sabha) MC Mary Kom in Ho Chi Minh City, Vietnam ah um Asian Boxing Championships ah gold medal a lakna chung in kipakpi thu a puang a, tunung ah lawting to zawm zel ding in a dawisakna a lan hi.

Works Minister Biswajit in lampi kisiamna mun khenkhat entha

Imphal, Nov. 10 *(Nisin Thuhiltu)* : Manipur Public Works Minister Thongam Biswajit Singh in Imphal –Dimapur National Highway No. 39 leh Tiddim Road ah lampi repairing kibawlna mun te leh lampi kuakna mun siamhawi ah a umna mun te et-thakna a nei a, Ningthoukhong ah thuthak lakhawm mite kiang ah a genna a chun, highways leh Keibul Lamjao approach road repairing works chu Sangai Festival mangsang ah zawthian hiding a hidan taklang kawm in zia ah lampi siamhawi thakna nasep chu a tawpna hilo hin a gen hi.

State government in kikawmtuana lampi te siam ding leh lampi condition siamhawi ding ah panlakna nei zing in le a gen a, Sangai Festival kichai tak leh kituptak ah lampi siamna chiapi hiding in a gen hi.

Minister Biswajit chu Works department iah Executive Engineers leh accompanied engineer hun khawp in le a zui ua, National Highway 39, Koirengei Area leh Ningthoukhongalong, Tiddim Road ah lampi kisiam thak mun te leh nasep dan etthakna a nei hi.

India President in Manipur Sangai Festival 2017 hawnna nei ding

Imphal, Nov. 10 *(Nisin Thuhiltu)* : Old Secretariat, Conference Hall, Imphal ah MLA Dr. Sapam Ranjan, Chairman, Tourism Corporation Manipur Limited in thuthak lakhawm mite kiang ah a genna a chun, India President, Ram Nath Kovind in 8th Manipur Sangai Festival 2017 hawnna nei ding a hidan taklang kawm in,21st - 30th November, 2017 sung ah Sangai Festival 2017 mat hiding in a gen a, festival hun ah uaptu tumasang sang ah double ah kibelap ding a hidan a gen hi. Hatta Kangjeibung, Khuman Lampak Sports Complex, Imphal East District; Lamboi Khongnangkhong, Imphal West District leh Sendra, Takmu water Sports Complex leh Keibul, Bishnupur District ah festival mat hiding in a gen a, festival chug am (country) 20 ah national leaders, policy makers, industry experts, business delegates leh exhibitors te panna 50,000 tuam in uap ding ah kisingsakna um hin a gen hi. Chun, visitor te bit theina ding ah 24x7 helpline numbers (SP, Imphal East – 9436033471; SSP, Imphal West – 9436279997; SP Bishnupur – 9862067893; Lamboikhongnangkhong; Khuman Lampak, Control Room– 0385-2450214; Hatta Kangjeibung, Control Room – 0385-2452669 leh Bishnupur Control Room – 03879-222339) te mat ah um ding, programme kimatna munpi zosia CCTV cameras kawi hiding, Tourism Department in GPS devices kibul Tata Wingers 40 te festival uap te thak lumlet ding ah kawi ding hin a gen hi. Media persons DIPR Identity cards neite chu hun matna zosia free ah lut sak hiding leh festival kimatna sung ah a lutman Rs. 30/- (Adult) leh Rs. 20/- (Uniformed Students) te hiding in a gen hi. Zia ah press briefing hun chu R. Sudhan, IAS, Director (Tourism), Government of Manipur, Clay Khongsai, IGP (Zone -1) ten le a uap ui.