NARPS/CCpur nuai ah training on Electrical Wiring chiatha zing

Lamka, Nov. 8 *(Nisin Thuhiltu)* : Natural Agrotech Research and Processing Service (NARPS), Churachandpur in Micro, Small & Medium Enterprises (MSME), Govt. of India, Development Institute, Imphal tawh kithua ah Tuibong, DIC Office huangsung ah um, Natural Agrotech Research and Processing Service (NARPS) Training hall ah “6 weeks training on Electrical Wiring and Estimation” organised a bawl chu a chiatha zing a, tuni’n Ms Chinlianhat Vaiphei, Superintendent of Taxation, Churachandpur in Tax lam thil in trainee te ziltilna a nei hi. Six weeks training on Electrical Wiring and Estimation ahileh MSME, Development Institute, Imphal ah Deputy Director D Mitra & Asst. Director (Admn) S K Dutta te’n 30 Oct. 2017 ni a khah a hawnna a la nei uh a hi.

Drug Cell Unit in khamthei zuak 1 matdaw be
Lamka, Nov. 8 *(Nisin Thuhiltu)* : Churachandpur Police nuai ah Drug Cell Unit in Additional Superintendent of Police (law & order) supervise bawlna’ 7th November 2017, zingkal dak 5:30 tuam ah khamthei Herroin No.4 zuak ah sum kawl vei, Mrs Lalchaamrem(56) w/o (L) Lalthanlian leh a chanu Mrs Suanngaih (32) te banah a sum ah Rs 12,90.000/- leh a kithuapi uh (business partners) midang 2 - Robert Singson (45) S/o Khamkhokam of Nehru Marg leh Siamginlian s/o Vanlalrem of New Lamka G te a matdaw nung un, amau kipuan dungzui in tuni, 8th Bovember 2017 in mi khat a matdawbe kit hi. Tuni ah mat ah um chu Esther Lalmangaih Thang Leivang (28) w/o Lalremthang Leivang of Tuiring Phaisen Village, Saikot Sub-Divsion, Churachandpur a hi. Special Judge NDPS court ah dinsak ah a um nung in Police custody ah 13 November 2017 tiang um ding ah court in lemsakna a nei hi. Zia ah khamthei zuak ah sumkawl-vei te kimatna tawh kisai in FIR No. 98 (11)2017 CCP PS U/S 21/29 NDPS Act nuai ah case ziklut in a um hi.

8th Dec leh 2-Leimatak District Council Constituency ah by-election um ding
Lamka, Nov. 8 *(Nisin Thuhiltu)* : State Election Commission, Manipur in notification a sua dungzui in Autonomous District Council Churachandpur nuai ah 2-Leimatak District Council Constituency seat luatu (L) Demmang Haokip a mualliam nung ah a seat a awng ah um luatu ding telthakna (By-Election) 8th December 2017 leh um ding a hi. Zia ding a chu, Last date for filing nominations -15-11-2017 (Wednesday); Date of scrutiny -16-11-2017 (Thursday); Last date for withdrawal of Candidatures -18-11-2017 (Monday); 4. Date of poll -8th -12-2017 (Saturday); 5. Hours of Polling 8 AM - 4 PM ; Date of re-poll, if any -11-12-2017 (Friday); Date of Counting of votes -13-12-2017 (Wednesday) leh Date of Completion of Elections -16-12-2017 (Saturday) hiding a hi.

 

Spot Painting competition um ding
Lamka, Nov. 8 *(Nisin Thuhiltu)* : Churachandpur District Legal Services Authority saina November 12 leh Greenwood Academy High school, B Vengnom ah sunnung dak 1:00 a pat dak 3:00 kikal in Class V - Class X Student-te ding a Spot Painting competition um ding a hi. Zia competition chu category 2 ah khen in a um a, Category I ah Class V a- Class VII leh Category II ah Class VIII - Class X te hiding a hiu. Lunglutna nei te’n min, pa’ min, umna, school min, class zat leh school identity Card Xerox copy tawh November 10 sunnung dak 4 tiang ah Chief Judicial Magistrate’s Court, Tuibong ah office kai hunsung ah kidawtna lekha piaklut thei ding a hi.

Imphal to CCpur Motor Cycle Rally um ding
Lamka, Nov. 8 *(Nisin Thuhiltu)* : Manipur State Legal Service Authority (MASLSA) saina’ 9th Novembr ah “Connecting to Serve” ti thupi nei ah “Imphal To Churachandpur Motor Cycle Rally” um ding a hi. Motor Cycle Rally ahileh sunma dak 9:00 ah Khwalrambang bazar, Shamumakhang, Imphal ah Justice N Kotiswar Singh, Executive Chairman MASLSA leh Justice Kh Nobin Singh, Chairman High Court legal service committee ten Imphal To Churachanpur Motor Cycle Rally” flag off bawl ding a hiu, Malom, Nambol chuan ah Bishnupur court complex ah hun sawtlo mang ding uh le Kwata leh Tuibong area ah legal awareness nei in, Churachandpur Court complex ah hun matna nei ding a hiu. Zia hun a chu Churachandpur District Legal Services Authority in CJM Court complex, leh district & session court complex ah thubuai nei te ding in help desk hawng ding a hiu a, awareness le nei ngal ding a hidan uh Churachandpur District Legal Services Authority a pat hiat in a um hi.

BJP CCpur in Anti Black Money Day mang

Lamka, Nov. 8 *(Nisin Thuhiltu)* : Bharatya Janata Party (BJP), Churachandpur mapuina tuni, November 8, 2017 sunma dak 11:00 a pat Police Station mai ah, Tedim Road Bus Waiting Shed ah Kala Dhan Virodhi Diwas (Anti Black Money) matna a um hi. Zia hun chu V. Hangkhanlian, Minister (Agriculture, Veterinary and Animal Husbandry), Sumorjit, BJP State President, Profolo, BJP in-charge, Churachandpur, Michael, Spokesperson, State BJP leh Khaisei Haokip, Spokesperson, BJP Churachandpur te’n uap in thugenna a nei ua, District sung ah BJP Member tamtak in le hun matna a uap ui.

Minister Hangkhanlian in a thugenna a chun, Prime Minister Narendra Modi mapui, BJP Solkal in Anti Black Money Drive a patdaw a pat sum lakh 15.44 crore gamdang a pat India laklut kit ah um a hidan taklang in India economy nasatak ah suhat chuam in a gen a, opposition lam a pat sawiselna um maleh BJP in gamsung khantona ding ah zia gual panlakna chu a nei hidan taklang in, Imphal - Churachandpur Police Station tiang kikawmtuana lampi chu National Highway Authority mawpuakna nuai ah kikawi a hidan a gen hi. Police Station a pat Singngat kikal leh Churachandpur-Sugnu Road ahileh NHIDCL (National Highways and Infrastructure Development Corporation) mawpuakna piakdaw ah um in a taklang a, zia lampi te chu siamhawi a hina ding ah NHIDCL in Tender le suavek tahin a gen hi. National Highway 150, Tipaimukh Road chu BRO mawpuakna kawi a hi dungzui ah nasepna chiapi ah umta hin le a gen a, District sung ah lampi chuamchuam - Mission Road, IB Road, Thangjam Road, Red Cross Road, Nehru Marg leh Zenhang Lamka te siamzaw a hi tawh kitawn ah mun dang siamna ding proposal buaipi hizing in le a gen a, PWD in Rs 4 crore sanction bawl ding leh nasepna sutzawm ah um ding hin a gen hi. Khaisei Haokip, Spokesperson, BJP Churachandpur in a thugenna a chun, black money dodalna demonetization leh GST chiapi a hina chung ah mipi’n phatchuamna tamtak nei zing a hidan gen in, Prime Minister Narendra Modi solkal in Demonetization a chiapi nung ah India gamsung a sum muna diklo tamtak sukbei ah umta leh company lakh 3 val te buai a hidan uh taklang kawm in company 2.1 lakh Registration sukbei piak ah um leh Company 450 lakdaw ah um leh company hiatchian theilo 800 te le sukbei ah um in a gen hi.

Tipaimukh lampi siamthak hizing

Lamka, Nov. 8 *(Nisin Thuhiltu)* : Tipaimukh lampi siamthakna nasep chiatha zing in tuni, November 8, 2017 in Chiengkawnpang ah lampi siatna mun te siamphat in a um hi. Lampi siamthakna ahileh 25-BRTF, Imphal nuai ah 80 RCC Thonlon etzuina nuai ah kisiam a hia, BRTF in maintenance tawh kisai enzui ding ah a mi mimat teu leh local mi lampi siamna kithuapi ding mi hunkhawp le lak in a um hi. Tipaimukh Road ahileh Zero Point, Police Station a pat kilometer 20 siam hiding a hi. Chun, lampi siatna diak ah kihia Tuilaphai leh Sabual kikal ah kilometer 3 ah sau lampi chu siam masakpen ah nei a hi.

IMI Second round a ding ah vaccine la

Lamka, Nov. 8 *(Nisin Thuhiltu)* : Numei nauvawp lai te leh nausen kum 2 kikalte damtheina ding tawh kisai ah October 2017 a pat January 2018 sung ah District Task Force-Immunization (DTF-I) CCpur District intekna nuai ah Intensified Mission Indradhanush (IMI) chiapi a hina ding ah, October tha ah First Round a zaw uh tawh kitawn in IMI Second Round a ding in District Immunization Office (DIO), IB Road ah Cold Chain Point chuamchuam a ding vaccine lakdaw in a um hi. IMI Second round ahileh November tha sung ah nei ding a hiu a, tuni’n DIO, Parbung Cold Chain Point, Thanlon Cold Chain Point, Sinzawl Cold Chain Point leh Henglep Cold Chain Point ten a mau a ding chiat vaccine a la dawk ui. CCpur District ah Intensified Mission Indradhanush IMI kipatna ding in October 7 in District Hospital Campus ah Shyam Lal Poonia, IAS DC CCpur in a hawndawna a la nei a, IMI First Round sung ah nausen kum 2 kikal 2186 target na lak ah 771 vaccine kap in a um ua, nauvawp 451 target a umna lak ah 198 kap in a um ui. IMI First Round ah khua 153 chuansuak ding ti himaleh October tha sung ah guatui a zuk zing ziak ah khua 113 ah vaccine kap thei un a kigen hi. Intensified Mission Indradhanush IMI ahileh October, Novermber, December leh January 2018, tha 4 sung ah, ni 7 a pat ni 14 kikal zel ah chiapi hiding a hi.

Demonetisation leh GST nasatak ah ki phatchuampi: CM Biren Singh

Imphal, Nov. 8 *(Nisin Thuhiltu)* : Prime Minister Narendra Modi mapui India government in November 8, 2016 ni ah corruption leh black money dodalna ding ah sum note Rs 500 leh Rs 1000 subei ah sum note thak a siamdaw nung kum khat tinna, tuni’n India gamsung in mun chuam chuam ah “Anti Black Money” Day ti ah mat in a um hi. “Anti Black Money” Day mat a hina chung ah Manipur Chief Minister N. Biren Singh in “Anti Black Money” Day tawh kisai, ama office chamber ah thuthak lakhawm mite kiang ah a genna a chun, Prime Minister Narendra Modi in hangsan tak ah demonetisationa chiapi chu gamsung mipi te’n support bawl in a gen a, mihausa a hiding gual tak ah government ah tax pelo te ding ah haksatna tuntu pang hin a gen hi. Demonetisation leh Goods and Services Tax (GST) chiapi ah a umna a pat India gamsung ah sector chuamchuam in phatchuamna tamtak nei in le a gen hi.

Chief Minister in demonetisation thiltup thupi pen chu black money sukbei ding, fake currency note ban ding, terrorism leh extremist funding sukbei ding, drugs leh illegal arms smugglings funding sukbei ding leh cashless transactions sukhat ding banah digital wallets leh credit/debit cards mang ah sum transfer bawlna sukhat ding leh transparent National Economy umsak ding hin a gen a, demonetisation a pat lawtinna thupi tak um chu digital economy, digital transaction hin a gen hi.

Demonetisation nung ah India gamsung ah digital financial transactions 58 percent ah kibelap, digital economy in nasatak ah masawn,73.62 crore bank account te Aadhar card tawh linked ah um a hidan taklang in demonetisation thiltup chu black money dodalna mai hilo in a gen hi. Chief Minister in a gen zawm zelna a chun, real estate ah black money mang ah Benami transactions chiapi ah um te le government dodalna chiapi in a gen a, Goods and Services Tax (GST) a pat government's revenue collection nasatak ah kibelap chuam in a gen hi. Manipur a le State government in July-September, 2017 sung ah revenue Rs. 184.31 crore tiang kaikhawm zo in a gen hi.

N. Biren Singh in Income Tax Returns leh demonetisation in India gam sung h income tax collections nasatak ah suhat leh kum 2015-16 ah income tax payer 66.53 lakhs um chu 2016-17 ah 84.21 lakhs ah kibelap zo in a gen hi.
2016-17 fiscal year ah mimal 2 crore te’n e-returns filed bawl un a gen a, tu fiscal year 2017-18 ah mimal 3.01 crore in tutiang ah e-returns filed bawl un a gen hi.
Banks and Financial institutions te report dungzui ah 4.7 lakhs illegal financial transactions te demonetisation nung ah suizuina nei ah um in a gen hi.

UPA regime nuai ah kum 2004-2014 sung ah Government in Manipur Jiri-Tupul Railway line siamna ding ah Rs. 627 crores bep bithiat in a gen a, himaleh NDA government nuai ah, Central Government in Jiri-Tupul Railway line a ding ah Rs 9,658 crore bithiat in a gen hi. Zia railway project chu December, 2019 tiang ah zawthian hiding in le a gen a, zia chu siamzaw hun ding ki bithiat tha 3 masang ah kisiamzo ding tina syak in a gen hi. Zialo a chu Central Government in Manipur ah highway saimhawina ding ah Rs. 25,000 crore piak ding ah thutiam bawl in a gen a, Barak leh Makru lei (bridge) siamna le kipanta hin ataklang hi.

Manipur ah BJP mapui Government dindaw a hi nung ah social welfare schemes chuamchuam – family 21,320 te Pradhan Mantri Ujjwala Yojana nuai ah LPG connection piak ah um, MUDRA scheme nuai ah mi 9,879 te kum 2017-18 sung ah loan Rs. 66.72 crore sanctioned ah um, Rs. 63.26 crores te beneficiary te kiang ah piak ah umta hin a gen a, Housing for All by 2022 ti thupi nei ah PMAY (Gramin) nuai ah chenna inn, 39,000 sak hiding leh PMAY (Urban) nuai ah inn 26,462 sak hiding in a gen hi. 8th November chu “Anti-Black Money” Day ah kimang leh hapta ah sim black money leh corruption dodalna 4th -12th November, 2017 sung ah kimang in a gen hi.

Dy CM in ADC 6 te khut ah L.E.D. Reading Lamps pedawk

Imphal, Nov. 8 *(Nisin Thuhiltu)* : Deputy Chief Minister Yumnam Joykumar Singh in tuni’n Auditorium Hall of Manipur Science Centre, Takyelpat, Imphal ah Autonomous District Council (ADC) 6 te kiang in High Efficiency L.E.D Reading Lamps piakdawna a nei hi. L.E.D. Reading Lamps te chu ADC Kangpokpi, Churachandpur, Tamenglong, Chandel, Senapati leh Ukhrul districts ah CEO te khut in a pedawk hi. Joykumar Singh in a thugenna a chun, government in migenthei society ah a niampen pen te tiang in ziagual benefit chu a mu ding uh dawi hin a gen a, department of Science & Technology chu department neicha himaleh energy consumption kisanna ding ah panlakna nasatak nei thei hi’n a gen hi. Integrated Rural Energy Programme (IREP),2016-17 nuai ah High Efficiency L.E.D Reading Lamps chu hawpdaw ah um a hia, ADC 6 te’n priority basis ah beneficiary ding select a bawl ua, a hawp ding uh a hi.
Zia hun chu, Joint Secretary (Science & Technology) Shri A. Subash Singh, ADC 6 ah member te leh Director (MASTEC) te’n le a uap ui.

Opposition te’n demonetisation dawilo suklatna Rally nei
Imphal, Nov. 7 *(Nisin Thuhiltu)* : Prime Minister Narendra Modi mapui India government in November 8, 2016 ni ah corruption leh black money dodalna ding ah sum note Rs 500 leh Rs 1000 subei ah sum note thak a siamdaw nung kum khat tinna, “Anti Black Money” Day a matna chung in Manipur ah non-Bharatiya Janata Party(BJP) opposition political party, All Opposition Political Parties Against Demonitisation (AOPPAD) in Nov. 8 chu Black Day in a mang ua, nasatak ah demonetisation dawilo a hidan uh a sulang ui. Zia chu tawh kitawn in Imphal ah Congress Bhavan, BT road leh Khoyathong, Minuthong, Hatta, Iboyaima Shumang Leela Sanglen, Imphal East district etc ah demonetisation dawilo suklatna’n opposition te’n public meeting a nei ua, demonetisation leh GST(goods and service tax) ziak ah mitamtak in haksatna tuak in a gen ui. Non-BJP opposition party te chu - Indian National Congress, Nationalist Congress Party, Manipur units of Aam Aadmi Party, All India Forward Block, Bharatiya Samata Party, Communist Party of India, Communist Party of Marxist, All India Trinamool Congress, Janata Dal-Secular leh Revolutionary Secular Party te a hiu.

NIT-Imphal ah Bihari student te kisawisakna chung ah Bihar CM in Manipur CM thuhiat; CM in thil umdan entha

Impha/Patna, Nov. 8 *(Nisin Thuhiltu)* : Bihar Chief Minister Nitish Kumar in telephoned ah Manipur Chief Minister N. Biren Singh hopi in National Institute of Technology (NIT), Imphal ah Bihar student te sawisak ah a umnau tawh kisai ngaikhawk leh enzui ding in chialna a bawl hi. Zia gualma a chu, Bihar Director General of Police P.K. Thakur leh Principal Secretary (Home) Amir Subhani te’n north-eastern state ah a hina kibatpi teu thuhiat ah student te bit theina ding ah panla chiat ding in chialna a bawl ui. National Institute of Technology (NIT), Imphal ah Bihar student te Sepatni a khah local mi te’n NIT campus sung ah valut ah a ban-ua a jep nung ua Chief Minister Level ah zia gual kihona chu piang a hi. A kigen dan ah locals leh hostel student te’n Pathianni ah football match a nei hun ua, kinialbuaina a nei uh tawh kisawisakna piang in a kigen a, zia hun a chu police te ki gawl ah buaina sukven ding gua maleu Bihari Student te ngawna siam dan ah Police te’n khenchuam nei ah khenkhat mawl ah a jep nung ua police custody a tut pawl uh le um ti a hi. A langkhatlam ah ah Chief Minister N. Biren Singh in tuni nitaklam in National Institute of Technology (NIT) Manipur kimupi in campus ah thil umdan etthakna nei in, Bihari student te a kmupi a, student te venbitna piak hiding in a gen hi. Chuleh ,Union Human Resources Development Minister Prakash Javadekar kiang ah campus sung ah CRPF kawi ding ah dawtna siam leh Central paramilitary force kawi ding ah lemsakna um in a gen hi. NIT thuneitu te chu a hun tak ah students te haksatna enzui zing ding leh tunung ah buaina leh haksatna a nei khak ua leh State Government ah thil umdan tut ding in a hiatsak hi.

17th November leh Meeyamgi Numit leh Hill People's Day matkhawm hiding
Imphal, Nov. 7 *(Nisin Thuhiltu)* : Ashok Kumar Scretary to Chief Minister, Manipur in thusua a bawlna a chun, Yangon, Myanmar ah International Conference uap ah Manipur Chief Minister N Biren Singh a khualzin ding ziak ah 10th leh 15th November 2017 ah Meeyamgi Numit (People's Day) leh Hill People's Day umlo ding a hidan taklang in, 17th November leh November 2017 tha a ding ah Meeyamgi Numit and (People's Day) leh Hill People's Day matkhawm hiding in a taklang hi.

Mary Kom strikes gold at Asian Women’s Boxing Championships

Pti Ho Chi Minh City, Nov. 8 *(Nisin Thuhiltu)* : M.C. Mary Kom in Asian Women’s Boxing Championships ah gold medal 5 a lakna ding in tuni gualzawna a chang hi. 48kh category final ah Olympic bronze medallist Mary Kom in a kisukpi North Korea’s Kim Hyang Mi chu 5-0 verdict ah zo in gold medal a dawng a, zia hi a hileh 2014 Asian Games zaw ah gold medal a lakkit masakna pen leh kum khat lam nung ah medal a lak kit patna a hi. Kum 35 ah upa leh Rajya Sabha MP nu hin goal medal a lak tawh kitawn in Indian Prime Minister Narendra Modi in Twitter ah kipakpi thu a puang ngal hi. 57kg category ah India mi ma Sonia Lather in a kisukpi China’s Yin Junhua chu zolo in silver medal ah a lungkim mai a ngaitai. India a pat boxer 7 semifinal a la lut maleu L Sarita Devi, Priyanka Chaudhary, Lovlina Borgohiam, Seema Punnia leh Shiksha te final lut zolo in Bronze medal a sâng ua, Championships ah India in gold 1, silver 1 leh bronze 5 a la zo hi.

KHAMNA THEI THIL TE I KAWIDAN UH A HI DING MAWNG A DIAM?
Editorial- Nisin Thuhiltu 9th Nov. 2017

Tulai in Churachandpur District sung leh mun chuam chuam ah khamthei zuak, khamthei pua, Security Force te’n amatdaw thu hiat leh mu ding a um zing a, mat ah um khamthei zuak leh pualumlet te jail tiang tung sek maleu khamthei zawk, khamthei puakna a bei diak pua, khamthei ne leh dawn le kiam chuam diak in a kilang lo a hi. Khamthei kiti chu a siamtu te’n thil pha chuam ding ah a siam uh hiding himaleh amatna ding dawl ah a kimatlo ziak ah thilsia hi ah kihia a hi. Khamthei nek leh dawn ziak ah insung siatna, khawtang mualphona iti te a piang thei a, zia ziak a chun dan leh thupiak enzui security forces te’n dodalna a nei uh a hiding ginchat a um hi.

Zia hi thilphalo a hi kihia chiat ngal ah bang a ti leh ki zuak leh ki ne/dawn tei tei a hi diam? Sumkawl veina lam thil ah a lawm ah sum muna bailam a hi ziak ah ki zuak zing hingei intin, a ne/dawn te le chawlsan thei talo ah addict a hitak ziak ua ne/dawn zawm zing hiding a hiu.

Zia hi dodal zawlo thil, a hi ding him ah I kawi mai ding uh a hi diam? Mipi te kithutuak in diktatna tawh dodalna tak tak chiapi hileh dodal zawlo ti um ding in ginchat a umlo a hi.

Hiatthei ding in, Churachandpur District Police team khat in November 7, 2017 zingkal in Axis Bank, Churachandpur branch building step nuai ah khamthei zalentak ah bawl, mi banghem zat te mipi mu in gawtna a piau a, a van matteu lakpiak in zalentak ah mipi mu ah ah khamthei kikap leh hiip ti te a bawltaklona ding uh dawina ziak ah zia gual gawtna chu a piak uh hin a kigen hi.

Churachandpur khawpi sung mun chuam chuam ah numei-naupang muhthei ding ah khamthei kikap, khamthei hiip, a khaamsa um ti te mu thei ah a um zing mai sek uh hi a hiding mawng, a ngaina gual in a kilang a, numei naupang muthei ding ah zalentak ah khamthei bawlna kiti a um mai hi ngaikhawk thak ding nawp a um hi. A ziak chu ni dang ah ziagual thil te mu leh hiat in a la um ngai pua, muthei leh hiat ah a hung um lim in mi tamtak tizat um isau a, kidakna etc ti te I nei ui. Himaleh tuhun ah khawpi sung ah zia gual thil te I mu zing mai tak uh tawh kitawn in, a hiding him leh a ngaina gual in a kuakua’n a ki kawi a, khamthei bawl te ding a le society mitmu ah a thil bawl uh chu a hiding mawng gual in a umta a hi.
Zia a pat a chun, khangthak te lak ah banggual a hi em ti hiatnawpna, patep nawpna lunggel, khawk saklona lunggel a piang a, addict kibelap zel in, suapi u leh nau, khawsung, vengsung, society ding ah mualphona tuntun a pang zing tamai hi.

A langkhatlam ah khamthei addict a hi ziak ua mihing khat kilawmlo tak leh a hilo gual tak ah kawi leh kihiatlo sak mai chu thil dik hiding in ginchat a um pua, addict te maban siamhawi theina ding ah society, kochuam organization etc min ah panlakna um thei leh hawi mama ding in ginchat a um hi.