S. Chakmual khua leh G & S Sharon Park hawnna leh latna nei

S. Kawtlian, Oct. 3 *(Nisin Thuhiltu)* : S. Chakmual Village Development Committee mapuina’ tuni'n S. Chakmual Village, Kangvai Sub-Division ah Hermon Parayer Mount banah S. Chakmual khua, official ah a hawnna leh Goukam & Sons Sharon Park hawnna, a latna a um hi.

Zingkal dak 9:30 in Rev. S. Prim Vaiphei, President All Manipur Christian Organization (AMCO) in Hermon Prayer Mount hawnna leh Pathian kiang ah a latna nei in Pathian thu genna a nei a, Upa Liankhothang, Secretary in Hermon Prayer Mount tawh kisai genlatna a nei hi.

Sun dak 12:00 in S. Chakmual khua leh G & S Sharon Park hawnna leh a latna a um a, zia hun chu Thangzalam Haokip @ T.T Haokip, MLA/Henglep leh Chairman, Hill Areas Committee (HAC) in Chief Guest hina tawh a uap a, Joel G. Haokip, SDO/Kangvai in Guest of Honour hina tawh a uap hi.

Chief Guest, T.T Haokip in S. Chakmual khua hiatzingna ding suangphu hawnna a nei a, zia nung a chun G & S Sharon Park hawnna a nei hi. Rev. Thanglianlal, i/c S. Kawtlian Pastor bial in Khua leh park latna a nei hi.

Sharon Park neitu Upa Lalkithang in park tawh kisai tawh kisai a genna a chun, Pathian in mihingte etkawl ding ah a a hung piak thingkung leh lohing te kituptak leh hawitak ah etkawl ding tupna ama mimal sum seng ah park a siam hin a gen hi.

Thangzalam Haokip in a thugenna a chun, S. Kawtlian khua ah khanglian a hidan taklang kawm in a neulai ah tu ah park kibawlna chu lo-bawlna mangkha a hidan uh gen in, park ah a kisiamdaw chu kipakpi mama in a gen hi. Technology lam ah khantona a san mama na chung ah khawvel khantona a san dungzui ah nidang ah park kiti hiatphak a la hingailo maleh tuhun ah park kiti thil pawimaw mama hita hin a gen a, gam 20 a phak khakna mun te mi’n park a thupi bawl mama a hidan uh a gen hi. Chuleh, ama bialsung banah Churachandpur district sung ah park thupitak um nailo a hina chung ah tu ah park kihawng chu park lawting tak a hiding a nawpthu le taklang kawm in, Private sum seng ah park bawl kiti thil bailam ahilodan hiatpi mama hin le a gen hi.

Chun, park lawting tak a hitheina ding ah MLA a hi sung ah G & S Sharon Park chu Manipur Govt. recognition ahitheina ding ah tourism department ah delpi ding hin a gen a, tunitak mama ah Manipur Chief Minister kiang ah zikthaw recognition dawtna siam ding hin a gen hi. Zia ah hun mat sung a chun, laa thiam chuam chuam te a pat laa ngaithakna le a um a, S. Minliangthang Vaiphei, IAS (Retd); Khatkhotong Baite, President VPC Gen. HQ banah VPC Kangvai Block leh Kangvai Area Chief Association te’n hun matna uap in thugenna a nei ui.

S. Chakmual Village/Goukam & Sons Sharon Park hi hiatbailam ding ah T. Munjang/Torbung a pat ki petto,Pengjang khuasak lam tawh kinai ah um a hi.

Zillai Chawngkhawzo block hawng

Lamka, Oct. 3 *(Nisin Thuhiltu)* : Zillai GHQ Annual Assembly 2017 thupukna dungzui in zani a khan, Munpi Community Hall ah Zillai Chawngkawzo Block sukhin thakna/hawnthakna a um hi. Zia hun a chun, Dr. Haominthang Vaiphei, President Zillai Gen. HQ in Zillai Chawngkawzo Block hawnna leh lawiupa thak ding te kitiamna a nei sak hi. chun, Rev. S. Lama Vaiphei, i/c Munpi Pastor bial in block thak latna leh lawiupa thak ding te pauchappiakna a nei hi. Zillai GHQ in thusua’n a taklatna a chun, a kihawng thak Zillai Chawngkawzo Block in Thanlon leh Henglep Sub-Division ah Tuiliduang area, Chawngkhawzo area, Leijangphai area leh Kawlhen area ah Vaiphei khua um te huap ding hin a taklang hi. Zia hun matna chu VPC GHQ, Vice President Lunkhomang Neihsial, YVA GHQ, VPC Chawngkhawzo block leh khua chuamchuam ah khua-hausa te’n le a uap ua, thugenna le a nei ui. Zillai Chawngkawzo Block lawiupa thak ding te a hiu leh; President - Soikhanding, Vice President - K. Zolian leh member - Paulalthuam, Thangminlun, Thangminsiak, Thangsonlian, Hatthianchoi leh Angela te a hiu a, GHQ President in nominate a bawl a hi.

Medical Camp –cum- Awareness Campaign nei

Lamka, Oct. 3 *(Nisin Thuhiltu)* : Singhat sub-Divisional Headquarters ah tuni’n 26 Assam Riffle saina’ Hill Model Government Aided High School ah Singngat mipi-te a ding in Free Medical Camp –cum- Public Awareness Campaign a um hi. Zia hun a chun, government department chuamchuam - Forest, Horticulture, Sericulture, Agriculture leh Veterinary & Animal Husbandry te’n stall hawng in amau product chiat suklatna a nei ua, 26 Assam Riffle in khangthak te lak ah Indian Army te galvan chi chuamchuam suklatna nei in, India Amry ah pangnuam te’n hiatthiamlo dawt theina ding in stall a hawng hi. Zia hun matna chu Brigadier Ajay Kumar, 27 Sector Assam Rifle in chief guest hina tawh a uap a, hun matna ahileh Major T Lianmung amapui hi. Baptist youth Fellowship BYF, EBCC Singngat in le laa pawl sakna a nei hi. Chief Guest Brigadier Ajay Kumar a thugenna a chun, Assam Rifle in gamgi tuam ah um te ngaikhawk mama a hina chung ah a kallak leh awareness programme chuamchuam chiapi sek a hidan uh a gen a, India Government nuai ah khantona ding leh masawnna ding ah mipi phatchuampi thei ding scheme chuam chuam um te le hiatthiam sakna nei zing sek a hidan taklang kawm in, district sung ah lekha helo um te ngaikhawkna lian mama in a gen hi. Medical Camp hun ah 26 Assam Riffle a pat Doctor chuamchuam banah PHC Behiang a pat doctor Ginsiam Tunglut, MO leh staff nurse Ninglianmawi te leh PHC Singngat a pat doctor Dr Langlunthang, MO leh Staff nurse Biaklun ten kithuapi in, 26 Assam Riffle in a thawn in damdawi le a pengal ui. Medical Camp hun ah khua mipi leh school naupang 1, 500 a pang ua, 26 Assam Riffle in nek leh chak ding le a pawdawk vek hi.

Gandhi Jayanti matna khawsung suthiang

Lamka,Oct. 3 *(Nisin Thuhiltu)* : BJP mapui Centre Government in Gandhi Jayanti (Mahatma Gandhi pianni) Cleanliness Day ah mat ding ah guanggalna a nei tawh kitawn ah zani 2nd October 2017 ah Cleanliness Day mat ah a um tawh kitawn in Lingsiphai khawsung mipi’n le Gandhi Jayanti (Cleanliness Day) a mang ui. Zia chu tawh kitawn in JCB khat mang in khawsung sukthianna a nei ua, lampi hawilona mun te le a siam hawi ui. Nasepna ahileh khaw hausa, Khuplianmang in a mapui a, Special Contractor T. Lala in JCB khat tuakdawk in khawsung tuam ah lampi tui kitinna mun te a siamhawi ua, khawsung huap ah Khuga Cannel le sukthianna a nei ui. Nasepna tawh kisai, Henneilien, President, Sonlai/YVA Lingsiphai Unit in a gennaa chun, Gandhi Jayanti a hi tawh kitawn ah khawsung sukthianna nei a hidan uh taklang kawm in kiphal tak ah JCB tuakdawk T. Lala chung in kipakthu a gen hi.Gandhi Jayanti ahileh India in zalen galdona mapuitu Mohandas Karamchand Gandhi kipiak zawna suklatna ding leh hiatzingna ding ah October 2 ni, India gamsung pumpi ah mat hisek a hia, United Nations General Assembly in June 15, 2007 ah October 2 chu International Day of Non-Violence ah mat ding ah a puan le hita a hi.

PTC GHQ election ding ah mi 36 in nomination file
Lamka,Oct. 3 *(Nisin Thuhiltu)* : Paite Tribe Council PTC GHQ in vaipaw thak ding telna (election) a neina ding ah candidate te’n nomination Form a piaklut hun ding uh a bei tak tawh kitawn in mi 36 in nomination form a pelut ui. PTC GHQ vaipaw thak ding telna (election) ding tawh kisai ah September 11 a khah, election commission PTC GHQ in election notice a la suadaw a hia, zia dungzui a chu September 13 a pat Nomination Form hawpdaw ah um, mi 40 in nomination form a lak nung ua mi 36 in nomination form a piaklut uh a hi. Nomination form file te ding ah October 4 leh October 5 leh scrutiny um ding a hia, October 17 tiang ah candidate te ki withdraw kit thei ding a hiu. Chun, Bukpi Khua, Thanlon Sub-Division ah October 17 - 19, 2017 sung ah Bukpi Khua, Thanlon Sub-Division ah Paite Tribe Council PTC General Headquarters' Assembly 2017 leh General Election kithua a um hun ah PTC GHQ ah vaipaw thak ding telna (election) um ding a hi. Election ahileh CWC in a se K.Vungzamawi, Dr N.Lalzagou, T.Khamsuanmung DFO , Siamnunlian Valte, Suanmawi Guite te’n election commission hina tawh mapui ding a hiu. Vote nei thei ding te a hiuleh Khua-hausa 58, Cabinet-8, Elected CWC-13, Ex-Officio-10, CWC Member-15, Block a pat palai 104, Ex-President-5, Ex-General Secretary 5 banah Unit tin ah palai te hiding a hiu.

Gospel Music Fest mang
Lamka,Oct. 3 *(Nisin Thuhiltu)* : Tualsung Baptist Saptuam Upa Committee (TBSUC), Bethlehem Baptist Church, EBC in Biakinn Building sakna ding ah sum mutheina ding in zan nitak dak 6:00 a pat amau biak-inn ah Gospel Music Fest a mang ui. Pastor K. Vumzathang, Local Pastor, Bethlehem Baptist Church in Gospel Music Fest hawnna a nei a, T. Lianchinpau leh Chiinngaihlun te’n hun matna amapui ui. Gospel Music Fest ah Lamka khawpi sung ah laa sak thiam chuamchuam 11; LL Muana, Lalparzo, Vunglianmawi, Thangchinkhum, Chingngaihlian, Mercy Tingzo, Mansiankim, Hnunhoih, Lawmnakim, Tracy Nggaihching leh Lianding Guite te’n lasakna a nei ui.

Gospel Revival Crusade
Lamka,Oct. 3 *(Nisin Thuhiltu)* : Gospel Revival Crusade Committee saina’ October 3 - 5 sung ah St. Paul Inst. Campus ah “Huihpi Daisakpa” ti thupi nei ah Gospel Revival Crusade um ding a hi. Zia hun sung a chu Speaker ah Evan Langdokhup pang ding a hia, Khitui Gospel Ministry team te'n Praise and Worship mapui ding a hiu. Crusade ahileh October ni 3 nitak in Rev. V Nenglian D.S. Lamka South Division EBC in hawng ding a hi.

CM in Sangai Run Half Marathon leh Festival, 2017 website hawng

Imphal, Oct. 3 *(Nisin Thuhiltu)* : Manipur Chief Minister N. Biren Singh in tuni’n Chief Minister’s Secretariat, Imphal ah Sangai Run Half Marathon leh Festival, 2017 website hawnna a nei a nei hi. Sangai International Half Marathon ahileh 19th November, 2017 leh Manipur Tourism, Government of Manipur sponsored bawlna nuai ah Athletic Association of Manipur support bawlna tawh OOREP Sports saina um ding a hi. Marathon ahileh 21 kilometers - Sendra, Thanga, Keibul Lamjao leh Moirang huap ah um ding a hi. Chief Minister N. Biren Singh in a thugenna a chun, government thak in Sangai (Brow-Antlered Deer) zat chuam bik a hina suklatna ding leh Loktak lake thupina khawvel pumpi hiat ah suklat gua a hidan taklang kawm in Sangai Run chu Manipur Sangai Festival, 2017 hun ah curtain raiser hiding in a gen hi. Manipur Sangai Festival, 2017 matna ding tawh kisai chu
Minister, MLA leh people te’n support bawl chiat ding pawimaw in a gen a, Loktak Lake leh Manipur chu tourist munpi khat suana ding ah panlak chiat ding pawimaw in a gen hi. Sangai Half Marathon chu kum kit world Half Marathon Destination Calendar/List ah pansak theina ding ah panlak hiding in le a gen hi. Zia hun matna a chun, Chief Minister in Sangai Half Marathon 201, promotional video le hawnna a nei a, Half Marathon ah pang nuam te amau mimal ah website (sangairun.com) ah ki register thei ding uh leh 4th October - 4th November, 2017 sung ah Registration hawn hiding in a gen hi. Chief Minister in a gen belapna a chun, Government thak in khawvel pumpi hiat ah Manipur chu buaina mun hizing zianglo a hidan suklat theina ding ah panlakna nei zing in a gen a, zan ale thawveng tak ah hun mat thei a hidan suklatna ‘Imphal Evenings’ kihawng in a gen hi. Sangai Run Half Marathon leh Festival, 2017 website hawnna hun chu - Minister for Forest and Environment Th. Shyamkumar, Advisor (HR & Economic Affairs) to CM leh MLA Moirang AC P. Sharatchandra Singh, Chairman, Manipur Tourism Development Corporation Dr. S. Ranjan Singh, Chairman, PDA T. Robindro Singh, MLA Kumbi AC S. Bira Singh, MLA Mayang Imphal AC K. Robindro Singh, Vice-Chairman, Manipur Infrastructure Development Agency M. Asnikumar Singh, Special Secretary (Tourism) R. Sudhan, Commissioner (Tourism) P.K Singh, football stars P.Renedy leh M. Gouramangi Singh ten le a uap ui.

Imphal ah state level Kut mat ding lemsaklo thu taklang
Imphal, Oct. 3 *(Nisin Thuhiltu)* : State Level Kut Committee (SLKC), Manipur in tukum State level Kut Program Imphal ah mat ding ti ah a thupukna chung in Sadar Hills Kangpokpi district ah Kuki Inpi leh Kuki Students Organisation (KSO) in lungnawplo thu a puang a, October 2, 2017 ah Kut matna ding mun thupukna lakna hun chu kihiatsak tua khial khak ziak ah meeting uap theilo a hidan uh taklang kawm in kum 10 val lam Imphal ah state level Kut mat ah umta chu hill district ah nei ding dawi a hidan uh a taklang ui. Chuleh, tuchung ah Kangpokpi District ah state level Kut mat ding dawi uh hin a taklang ui.

8th Oct leh Miss Kut Screening um ding
Imphal, Oct. 3 *(Nisin Thuhiltu)* : P. Dounegl IPS, Secretary, State Level Kut Committee, Manipur in thusua a bawlna a chun, State Level Kut Committee (SLKC), Manipur saina’ 1st November, 2017 leh Imphal ah State Level Kut 2017 mat hun ah Cultural program, noon session leh beauty pageant banah musical entertainment um ding a hidan a taklang a, Miss Kut contest ah pang ding candidate te chu 8th October, 2017, 10.30 am leh 1st Manipur Rifles Banquet Hall ah Screening um ding hin a taklang hi. Chuleh, zia mun a chu Entry forms leh details muthei hiding in le a taklang hi.

3rd Batch Commando Refresher Course kipan

Imphal, Oct. 3 *(Nisin Thuhiltu)* : Manipur Police Training College, Pangei, Imphal East District ah tuni’n 3rd Batch Commando Refresher Course a kipan a, zia Refresher Course hapta 9 sung um ding a chun, district chuam chuam ah kimang telchuam ah um commando units te a pang ui. R.K. Tutusana, IPS, Director, Manipur Police Training College, Pangei in a thugenna a chun, refresher course chu physical leh lungthim ah bangthil tung leh le maitua theina ding banah professional tak ah thil tung te maitua theina ding ah chiapi a hidan a gen a, Director General of Police, Additional Director General of Police, Manipur te’n Manipur Police Commando Units te fit leh professional unit a hiding uh a dawi bak ua, refresher course um ding lemsakna nei a hidan uh a gen hi. Tuchung Commando personnel training hun ah NSG, bomb lam ah zilna nei Police Officer, a chiata kum 2 /3 sung ah USA, Canada ah anti-terrorist training ah pang te chu instructors/resource persons mat hiding un a gen hi. 3rd Batch Commando Refresher Course hawnna hun chu Victoria Yengkhom, SP; Sh. Jugeshwar Sharma, MPS, Course Director, MPTC; Instructor ding te’n a uap ua, refresher course ah commando personnel 80 te pang ding a hiu.

Leimakhong ah Army Recruitment Rally kipan

Leimakhong, Oct. 3 *(Nisin Thuhiltu)* : Football Ground Kendriya Vidhyalaya Leimakhong ah tuni’n Maj Gen U Suresh Kumar, YSM, VSM, GOC HQ 57 Mtn Division in Army Recruitment Rally flagged off bawlna a nei a, Churachandpur, Kamjong, Pherzawl & Ukhrul a pat total candidate 2313 te Recruitment Rally in a pang ui. Col M K Singh, Director Recruiting HQ 3 Corps incharge, Manipur & Nagaland in 59 Mountain Brigade nuai ah 38 Assam Rifles in recruitment rally um ding ah support nasatak ah a bawlna chung in kipakthu genna a nei a, amau panlakna ziak ah Recruitment Rally ah mitamtak te panlak a hidan uh taklang kawm in Manipur khangthak te sepai ah apan nau a pat socio-economic development um chuam ding ah ginchat nei in a gen hi. Zia Recruitment Rally a chu 04 Oct 17 ah Bishnupur, Chandel, Noney, Tamenlong & Tengnoupal, 05 Oct 17 ah Kakching & Thoubal, 06 Oct 17 ah Imphal East, Imphal West & Jiribam leh 07 Oct 17 Senapati & Kangpokpi apat candidate te ding ah districe wise ah date bithiat piak a hiu.

Minister Nemcha Kipgen in PMUY scheme nuai ah free LPG piakdawna nei

Kangpokpi, Oct. 3 *(Nisin Thuhiltu)* : Social Welfare and Cooperation Minister Nemcha Kipgen in tuni’n Kangpokpi Community Hall, Kangpokpi District ah Field Officer, I.O.C., T.C. Koren leh Civil Society organization member te uapna tawh Pradhan Mantri Ujjwala Yojana (PMUY) scheme nuai ah beneficiary 51 te kiang in free LPG connection piakna dawna a nei hi. Local MLA leh Minister Nemcha Kipgen in zia hun a chun, khua-hausa te Socio Economic Caste Census Data tawh kituak ah PMUY scheme mu ding dawl select bawl ding ah chialna bawl in, tu ah BJP mapui government migenthei leh inchen haksa te a hiding gual tak ah kithuapi nuam hin a gen a, thing, meihawl leh thil dang ah ann-huan na chawlsan ah mi zosian LPG chu ann-huanna a mat chiat ding ah panlakna nei in a gen hi. Zia chun numei te leh naupang te damtheina siam hawi chuam ding ah genkawm in meikhu tawh chaksang ah hun matna sukbei hunta hin a gen hi. Zia ah free connections chu M/S J.S. Indane Kangpokpi a pat issued kibawl a hi. Pradhan Mantri Ujjwala Yojana ahileh Prime Minister Narendra Modi in May 1st, 2016 ah Ballia, Uttar Pradesh ah a la hawn a hia, BPL inkuan Crore 5 te free LPG connection piak ding ti tupna tawh chiapi a hi.