MP Thangso Baite in VPC GHQ Cabinet member thak te kipakpina siam

Lamka, Sept. 28 *(Nisin Thuhiltu)* : Vaiphei Peoples Council (VPC) General Headquarter Office, Bethel Veng, New Lamka ah tuni’n Thangso Baite, Lok Sabha MP (Outer Manipur) in VPC GHQ Cabinet member thak te kipakpina siam in ann-nek khawmpi a nei hi. Thangso Baite in VPC GHQ Cabinet member thak te lak ah a thugenna a chun, kipakpina thu puangkawm in, maban ah panlakna nasatak a nei ding uh dawisak hin a gen a, Vaiphei nam te chu community chuam chuam te tawh kituak tak ah chengkhawm leh panla khawm thei a hidan uh taklang kawm in kipum khat tak leh kituak tak ah panlak khawm zing ding a nawp thu a gen hi. VPC GHQ President Khatkhotang Baite in a thugenna a chun, Thangso Baite, Lok Sabha MP in VPC GHQ Cabinet member thak te kipakpina a siamna chung in kipakthu a gen a, kipak etsakna’n Thangso Baite leh a zi Hatkhoneng Baite, khiangkawi puan silsakna a nei hi. VPC GHQ Cabinet member te tawh interaction hun a neizaw un, Thangso Baite in a kisa zinglai, VPC Community Hall dinmun et-thakna le a nei a hi.

Hospital huangsung suthiang
Lamka, Sept. 28 *(Nisin Thuhiltu)* : District Hospital Churachandpur in thianthona chiapi zawm zel in, tuni zingkal ah District Hospital Administration malatna’n Hospital a sem Doctor, Nurse banah staff te’n Hospital huangsung ah social work nei in, sukthianna a nei u’i. District Hospital in 71veina Indian Independence Day 2017 mat hun ah District Administration in Churachandpur sung ah government office te lak ah thiantho pen hina a la piak a hi.

Tuaksiat ah liam te District Hospital pawtung
Lamka, Sept. 28 *(Nisin Thuhiltu)* : Saihum leh Santing kikal ah Lamka a pat Pamzal zuan a tai, Leijangphai Express in zani tuaksiat a tuakna tawh kisai ah zani zan dak 9 tuam in liamna tuak mi 4 District Hospital puaktung a hiu a, amau chu –gari neitu, Tualzamuan (39) s/o P Lammang of Pamjal (V Munhoih, New Lamka ah um), Lalmuansang (20) s/o Ginthang of Pamjal, (Zion Veng, Rengkai ah um), Thianneikap (40) s/o (L) Letkhohau of Gouchinkhup Veng, New Lamka leh Hoineimuang (18) d/o P. Tunkham of Pamjal (Zion Veng, Rengkai ah um) a hiu a, puaktung a hi u tawh kitawn in duty doctor in Observation Room in a umsak hi. Sainoujang ah um BRTF lak ah kilawkawm, Zabir (45) in tuaksiat ziak in thina a tuak a, a luang a hileh BRTF gari ah puak ah um in Saivum ah a thânkuang ding bawlpiak in a um hi. Liamna tuak te lak ah Driver pang ah midang 3 te tuni zingkal in PHC Thanlon Ambulance mang ah Leizangphai a pat District Hospital puaktung in a um uh hi. Gari neitu Tualzamuan in, KTC Electric Post phuna dingah lampi kâwina mun, lam thanglam pang kicho in lampi a nai deu ziak ah zia kuak a chu gari taitha ah tuaksia hi’n a gen a, zani nitak ah liamna tuakte puaktung ahi hun ua L. Dongchinthang, President, SYO GHQ panna’n leader chuam chuam te’n damdawi inn del ngal in liamna tuak te a buaipiu hi.

District Level Meeting on Documentation of Customary Laws
Leisang, Sept. 28 *(Nisin Thuhiltu)* : Leisang Community Hall ah tuni’n Rural Aid Service (RAS) saina leh RNBA-EED-Brot support bawlna‘n “One Day District Level Meeting on Documentation of Customary Laws with Respect to Women Land Rights” kiti mat in a um hi. Zia hun a chun, tuhun ah customary law dungzui ah numei te’n chan-mun a neilo dan uh leh numei te chan-mun neitheina ding dan gen in a um hi. Chun, Leisang Area ah Youth Club chuamchuam te kiang in volleyball, football leh volleyball net piakdawna a um a, Youth Club chuamchuam a pat palai hunkhawp in hun matna a uap ui.

ZCB in Tangmual JB School entha
Lamka, Sept. 28 *(Nisin Thuhiltu)* : Zillai Churachandpur Block (ZCB) puitute’n tuni’n Tangmual JB School enthakna a nei ua, zia hun a chun class room tin ah infrastructure dinmun etthakna a nei ban un teacher te tawh le interaction nei uh hi’n thutut a kidawng hi. JB school staff te’n school fencing a umlo ziak ah gucha te’n a guk ding uh venna’ van hunkhawp te chu school ah kawi hilo a hi dan ZCB a hiatsak uh hi. ZCB in staff te panlak dan lungtun um a sak thu puang kawm in maban ah pan lahawi zaw diak ding in chialna a bawl hi.

Mi 7 in nomination pelut ta
Lamka, Sept. 28 *(Nisin Thuhiltu)* : Paite nampi kikhai khawmna Paite Tribe Council (PTC) GHQ in thakit leh election a neina ding tawh kisai ah tuni tiang in mi 7 in nomination Form a pelut ta’u hi. PTC GHQ in a hileh a hung tung ding October 17-19 sung Bukpi khua’ "NAM KIPUMKHATNA" ti thupi tawh Assembly leh General Election kithua nei khawm ding a hiu a, zia hun achun Khawmpi Speaker ah Langkhanpau Guite, Deputy Speaker ah K. Chinkhanlian leh Recording Secretary ah GK Zalal te pang dung a hiu. A chiata September 13 a pat nomination form piakdaw a hi a pat mi 39 in form la maleh tuni tiang in mi 7 in a pelut pan hi. Form a hileh October 3 tiang ah piaklut thei ding leh October 4-5 sung ah scrutiny um ding banah a ki zukkit nuam te a ding ah October 19 tiang hun piak hi ding ti a hi.

Kumsin Khawmpi mang di
Lamka, Sept. 28 *(Nisin Thuhiltu)* : EBC Lamka South Division in a hungtung ding October 6 - 8, 2017 sung EBCC Drocas Veng, New Lamka ah “Diktatna a Kilamthakna” ti thupi tawh a 11veina Kumsim Khawmpi 2017 mang ding a hiu a, Khawmpi a hileh October 6, 2017 nitak kikhawp hun ah Rev. V. Nenglian, Divisional Superintendent, LSD in a hawnna nei ding a hi. Khawmpi hunsung Rev. Paukhanmang Guite, Director of Ministries, EBC leh Rev. V. Nenglian, Divisional Superintendent, LSD te’n Pathian thu gen in, Pastor E. Chinzamang, Local Pastor, EBCC Zion in Bible Study hun malat ding a hia, October 8, 2017 nitak kikhawp hun ah Rev. V. Nenglian in khak ding a hi. Khawmpi hunsung ah Vaihawmna len um ding hi’n a kigen hi.

MLA te’n kerosene quota a neitheina ding ua Bill ki passed khalo: Minister Karam Shyam

Imphal, Sept. 28 *(Nisin Thuhiltu)* : Manipur Consumer Affairs, Food and Public Distribution Minister Karam Shyam in tuni ama official quarter, Sanjenthong ah thuthak lakhawm mite kiang ah kerosene thautui tawh kisai a genna a chun, State Government in black ah thautui zawkna a etzui tawh kitawn ah kiningting tak leh regularly tak ah beneficiary te supply thei ah umta hin a gen a, political party Spokesperson khat in a chung ah ngawna a siam chu thuzuau leh mumal bei in a gen hi. Manipur Legislative Assembly in MLA te’n kerosene quota a neitheina ding ua Bill bangma passed khalo hin le a gen a, Manipur Legislative Assembly in MLA te’n kerosene quota a neitheina ding ua Bill bangma passed hikhalo in le a gen a, Directorate ‘Kerosene Reserve’ a pat tu ah govt. in MLA te a ding kerosene oil quantity a sukpun hizaw hin a gen hi. Tu ah Government in Government masa nuai ah backlog um zosia tha 4 sung ah sufel hin le a gen a, (December 2016, January – March 2017) sung a ding a kerosene kigawm ah 12 KL (Kilo Litre) (3KL for each month) allocate um in le a gen hi. MLA te a ding ah April-June 2016 sung ah 5561. 8 KL (MLA te ding ah 3 KL), July-September 2016 ah 5292 KL (MLA te ding ah 2 KL), April –June 2017 ah 4476 KL (MLA te ding ah 2.5 KL) leh July- September 2017 ah 4476 KL (MLA te ding ah 2.5 KL) allocate kibawl in le a gen a, government lui nuai ah MLA te sang ah tu ah MLA te’n kerosene mutawm zaw nalai in a gen hi.
Minister Karam Shyam in a gen belapna a chun, a kisaipi official te Ningol Chakouba hun ah LPG kining ting tak a um theina ding ah panla ding ah thupiak nei hina gen a, dan guallo tak ah LPG zuak leh kipei a um leh gawtna khautak piak hiding in a gen hi. Banghem ti ah taksapna a um khak leh Chief Minister tawh thil umdan enkhawm ding leh Union Minister of Petroleum & Natural Gas leh IOC thuhiat ding uh hin a gen hi.
Chuleh, State in tha khat (one month) ah subsidized LPG(14.2 kg) 51,17.864 MT (Metric Tonne), 3,60,413 pawimaw in a gen a, himaleh IOC (Indian Oil Corporation) in April tha ah 2791.663 MT, May tha ah 1377.214 MT, June ah 2092.76 MT, July ah 1398.13 MT, August ah 1663.7 MT leh September a ding (under process) 1147.98 MT pia hi’n a gen hi. Consumer te’n LPG kining tinlo ziak ah haksatna a tuak uh sukven ding government thil dawi hin le Minister Karam Shyam in a gen hi.

General Officer Commanding 3 Corps in Chief Minister kimupi

Imphal, Sept. 28 *(Nisin Thuhiltu)* : Ni 2 sung (28 - 29 Sep 2017) Manipur ah hun mang ding leh North East India ah countering insurgency dinmun leh security dinmun etzuina nei ding Lieutenant General Anil Chauhan, AVSM, SM, VSM, General Officer Commanding 3 Corps chu Imphal a tung a, Manipur ah Assam Rifles head General Virender Singh tawh kithua in Chief Minister N Biren Singh a kimupi ui. General Chauhan in Manipur mipi te Durga Puja wish bawl kawm in Chief Minister chu Manipur ah security leh dan leh thupiak (law and order) dinmun tawh kisai in holimna a neipi hi. Zia hun a chun, Chief Minister in Army te tawh kithua zing ding leh NE Region ah chamna leh muanna a um zing theina ding ah panlak a nawp thu a gen hi.

FIFA U-17 World Cup ah achapa kihel etna ding ah Nu’n insung haksat ziak ah train bahara (fare) ding neilo
Imphal, Sept. 28 *(Nisin Thuhiltu)* : India in a zintun ding October 6, 2017 leh kipan dih, FIFA U-17 World Cup ah pang ding India team player ding ah footballer 21 select ah um te lak in northeastern state neucha Manipur a pat in player 8 select bawl in a um ua, player 8 te chu inn-chen haksat ziak ah kituptak ah nek leh chak neizo lo, diet bawl zo lo ngawn a hiu a, haksatna tampi palto kawm ah Internation Level ah football pek thei ding ah um a hiu. Fee piak ding neilo ziak ah coaching ah pang theilo, balanced leh nourishing diet kituptak bei ah a nu leh pa teu nisin nikhawtha lawdaw khamkham ah nek leh chak ding ki siam te nekawm ah khanglian vek hi ua hiat a hi. World Cup kihel thei ding ah umta himaleu a nu leh pa teu in haksa tak ah a chateu khanglian a hidan uh a gen thaw mai un le a mithi luannau a hi nalai mai hi.
Tu ah Germany ah training bawl K. Ningthoinganba pianna nu (mother) K. Mina in a genna a chun, balanced diet a ding ah sum pezo lo ding a hina chung ah, a chapa a hung ki nungle lo chu a chapa a ding ah thilpha zaw hiding in a gen a, mithi-tui thiak kawm in a chapa kihel etna ding ah train bahara (fare) ding natiang neizo-lo hin a gen hi. Himaleh mi lunglian leh mi lunggel thei te panpina tawh a chapa kihel enthei ding ah um in a gen a, a chapa kihel a et thei ngei ding kinem hin a gen hi.
Ningthoinganba ahileh a pa’n a beisan, a nu Mina leh a suapi numei 2 tawh thampheleng-inn ah khawsa a hiu a, hun dang ah bawng (cow) vak mi himaleu tuhun ah bawng (cow) na tiang neizo talo, a nu Mina in bazaar ah nga (fish) zuak ah a mu khamkham tawh khuasa a hiu.
Zia gualma a chu player dang te le game boot/sports shoes natiang chaw zo lo, hi ua hiat a hia, a nu leh pa teu nisin nikhawtha kilaw mi hiu ah hiat a hi bawk hi.
Chuleh, player a tamzaw te chu ticket chawkna ding sum neilo ziak ah competitions chuam chuam ah kibual theilo leh pang zo lo hi un a kigen hi.

Meghalaya CM Mukul Sangma in constituency 2 ah Assembly elections contest ding

Shillong, Sept. 28 *(Nisin Thuhiltu)* : Meghalaya Chief Minister, Dr Mukul Sangma in 2018 Assembly elections hun ah Assembly constituency pani 2 - Songsak leh Ampati Assembly constituency ah contest bawl in kisingsakna a nei hi. Zia chu Chief Minister Dr Mukul Sangma in tunaicha Garo Hills ah mipi hiat ah a puan hin a kigen a, himaleh tuni Meghalaya Pradesh Congress Committee (MPCC) in confirmed a bawl bak ah Assembly constituency pani 2 ah party ticket apply bawlna ding ah form lata hina gen hi. Alangkhat lam ah Nationalist People’s Party (NPP) spokesperson, James K Sangma in Assembly constituency pani 2 ah election contest ding ah Chief Minister in kisingsakna a neina a pat teltin kit hiding ah kimuan ngamna neitalo a hidan kilang in a gen hi. Hiathei khat chu, tu leh tu Songsak Assembly constituency seat hi, NPP legislator, Nihim D Shira in a lua a hi.

Centre in Manipur ah Indo-Myanmar border ah security dinmun review bawl
Imphal, Sept. 28 *(Nisin Thuhiltu)* : Centre government in 1643-km ah sau, India-Myanmar international border ah security dinmun review bawlna a nei a, 4096.7-km ah sau north east region ah Indo-Bangladesh border ah security dinmun le review bawlna a nei hi. Myanmar, Rakhine State buaina ziak ah Rohingya Muslims te gam chuam chuam a zam chekna chung ua phalna bei ah India gamsung a lut khak ding uh lauthawnna ziak in gamgi tuam ah security sukkhau in a um hi. Centre government in a mun tak ah security arrangement leh thil umdan enzui ding in Joint Secretary (Northeast) Satyendra Garg leh Special Secretary (International Security) Rina Mitra chu mawpuakna a pia, zia chu tawh kitawn in Indo-Myanmarese Commercial Trade Centre leh Indo-Myanmar Friendship Bridge te panna gamgi dinmun etzuina a nei zing ui. Joint Secretary (Northeast) Satyendra Garg in a genna a chun, amau nasep ding chu Myanmar tawh gamgi ah um Arunachal Pradesh, Nagaland, Manipur leh Mizoram ah FMR (Free Movement Regime) umdan hiathiam ding, zia dungzui a chu Free Movement Regime system siamthak ding leh formalise bawl hiding hin a gen hi. Centre official team in 11 Assam Rifles officer leh security personnel te le kimupi in security check-post ah gam 2 kawmtua mi te dinmun tawh kisai in a thuhiat ua, nisin ah mi bang zat in India-Myanmar border, Gate No. 2, Moreh chu kikawmtuana’n a mang uh em, ti te daily basis ah record bawl ding in thupiak a nei hi.
Moreh banah Assam leh Bangladesh gamgi tawh kinai ah um Jiribam chu India kinaipi gam dang mi te phalna bei ah India gamsung luttheina ding mun hi ah muanmawna mun te lak ah khat a hia, phalna bei ah mi tamtak te lutsekna mun hi ah hiat le a hi bawk hi. Rohingya issue ahileh Manipur State Government in le a ngaikhawk mama a, Rohingya Muslims te phalna bei ah Manipur ah a lutlona ding un, Moreh leh Jiribam ah security a sukkhau a, nisin phial ah drive bawl in phalna bei ah state lut a um em ti etzuina chiapi zing hizing a hidan Manipur Director General of Police, LM Khaute in a gen hi. DGP, LM Khaute in a genbelapna a chun, security check post ah security personnel double ah kikawi hin a gen a, phalna bei ah gam dang mi te state sung lutthei ding ah muanmawna mun zosia police force leh security force kawi ah um, security arrangement kituptak ah kibawl a hidan taklang in tuni tiang ah Rohingya Muslims te state sung lut um nailo in a gen hi. Chun, central leh Manipur government in Rohingya issue ziak ah buaina a umlona ding leh border area banah Myanmar ah chamna leh muanna a um ziang theina ding ah panla zing in a gen hi.

Differently-abled persons te ding ah special scheme hawn hiding: CM

Imphal, Sept. 28 *(Nisin Thuhiltu)* : Manipur Chief Minister N. Biren Singh in tuni, Old Assembly Road, Imphal ah “Credit Linkage Programme of Manipur State Co-operative Bank Ltd. (MSCBL)” hun ah a thugenna a chun, State Government in state sung ah differently-abled persons te a ding special scheme hawn ding ah guanggalna nei a hidan taklang kawm in October thabul leh hawn hiding in a puang hi. Zia scheme nuai a chu skilled differently-abled persons te’n business a bawl theina ding ua loan piak hiding, monthly pension piakna ding ah provision le um ding hin a gen hi. Scheme ahileh differently-abled persons te haksatna dawn zangkhai theina ding ah chiapi hiding in a gen a, ziana ding a chu banks, corporate houses, private organisations leh individuals etc te kithuapi a dawn hi.
Manipur Chief Minister N. Biren in November 21 leh kipan ding Manipur Sangai Festival, 2017 inaugural function chu India President Ramnath Kovind in uap ding hin le a puang a, infrastructure development a ding ah foreign investment pawimaw a hidan taklang kawm in Manipur Sangai Festival hun ah Development Summit chu gam chuam chuam 15 a pat Ambassadors leh palai te’n uap ding uh hin a gen hi. Manipur ah buaina um zing ah hiat a hi tawh kitawn ah foreign investor te state sung hung lut ding nuamlo uh hin le a gen a, state sung ah organization um te chu bandh ahiloleh kiphinna kiti himhim Summit hun ah foreign delegate mu leh hiat thei ding ah bawllo ding in chialna a bawl hi. Government thiltup chu state sung ah chatgana sukbei ding leh tusang ah hindan nuamzaw khawsak theina ding ah kisanna (change) a um ding a hidan taklang in, Prime Minister Narendra Modi supervise bawlna nuai ah government in lungtup mualsuana ding ah panla zing hin a gen hi. Chuleh, proposed Night Plaza chu October 2 leh Imphal ah hawn hiding in a gen hi. Forest and Environment Minister Th. Shyamkumar and Social Welfare leh Cooperation Minister Nemcha Kipgen te’n le zia hun matna chu a uap a, Th. Shyamkumar in a thugenna a chun, loanees te’n a hun tak ah a loan lak uh a dit kit ding uh pawimaw ina gen a, Night Plaza um ding thu a hi. Nemca Kipgen in a kisaipi Ministry ah cooperative banks leh society te a ding ah special package a ding lekha pelutta hina gen hi.
Chun, hun mat sung in beneficiary 642 te kiang ah loans chi chuamchuam Rs. 2,25,08,500 hawpdaw in a um a, MSCB Ltd. Complex ah Manipur State Co-operative Bank Ltd. (MSCBL) ATM le hawn in a um hi.