Tutha lui ah khialut mi 2 thi
Saipum, Aug. 27 (Nisin Thuhiltu) : Tuni, 27th August 2017 nitaklam dak 3:30 tuam in Lalgochan (16) s/o Minpi, Chief of Maite Village (Present Address - Bethel Veng) leh Lalsonthang s/o Luapau of New Lamka (G) te chu Tuitha lui, Saipum lei (bridge) sak ah tuilak in a khialut ua, hawl ah a um nung un Mr Lalsonthang (15) chu tuilak a pat Pa Tinkhomang in a mudawk a, mudaw a hihi ah District Hospital zawtpi himaleh damzo lo in a mualliam hi. Mr. Lalgochan ahileh a thisa Tv. Khamzalem of Saipum in tuilak a pat a mai daw a hi. Amau chu a lawi teu tawh mi 8, tuitha lui ah hun mangkhawm a hiu a, mi 2 te tui ah a khiaklut uh tawh kitawn ah a lawiteu mi pathum in Saipum khua ah a tuaksiatna thu a tut uh tawh kitawn ah Saipum khua ah Nungak, Tangval a hia-pha chan in Tuitha lui del ah tuilak ah khialut te hawlna a nei nung ua a maidaw gel uh a hi. Mr. Lalsonthang ahileh St Paul School ah Class X simlai a hia, Lalgochan ahileh Don Bosco High School ah Class X simlai a hi. Post-Mortem bawl ding ah District Hospital tut gel himaleu zan ah Post-mortem kibawl ngailo a hi ziak ah zing 28th August ah post-mortem bawl hiding a hiu a, a luang uh a inn gel uh tut phawt a hi. A luang uh ahileh Tuitha lui ah lakdaw a hina mun ua a pat Young Vaiphei Association (YVA), Saipum Unit mapuina ah Pa Lettinpau, Shaktiman leh Saipum khua ah Auto um te mang ah District Hospital tut a hi. Chun, District Hospital tut ah a um nung un YVA GHQ mapuina, thiluang buaipi in mi 2 te thina tawh kisai in Churachandpur Police Station ah Unnatural Death (UD) ah case registered bawl in a um hi.

Melhiatlo te’n lobuk halpiak
Lamaka, Aug. 27 (Nisin Thuhiltu): Mualkoi ah BSF Camp saklam Zongtaphai ah lobawlte lak a khat Mrs Tualkhanching (53) w/o B. Ginkhozam of Dorcas Road, New Lamka’ lobuk hiatlo te’n a haltum piak ua, buksung a van pawimaw chuam chuam kawi ah um te kangtum vek hin a kigen hi. Zongtaphai area ah New Lamka a a pat mi bangzat a hem tak lobawl um a hiu a, Mrs Tualkhanching’ lobuk haltum ah a um tawh sim ah lobuk 4 haltum ah umta hin le thudawnna’n a gen hi.

CM reception ding tawh kisai ah meeting um ding
Lamaka, Aug. 27 (Nisin Thuhiltu): Manipur Chief Minister N Biren Singh in September first week leh Churachandpur district a phakna ding leh vaidawnna ding tawh kisai in August 28, 2017 sunma dak 10:00 leh CEO/ ADCC office Hall ah Khaipao Haokip, Chairman, ADCC mapuina meeting um ding a hi. Zia meeting chu Churachandpur district sung ah tribe chuam chuam ah president te, philanthropic organisation leh student organisation chuam chuam ah leader te pang ding a hiu.

Hmar Inpui in HMARTOB term suksau be
Lamaka, Aug. 27 (Nisin Thuhiltu): Hmar Inpui (HI) GHQ in zani a khan amau office Rengkai ah meeting ne in, HMARTOP term a beitakna tawh kisai genkhawmna a nei ui. Zia hun a chun, Hmar Inpui dan-bupi Article 12-Section VII dungzui ah a term uh kum khat belap ding in lemsakna a nei ui. Chun, May 16, ni bik ti ah teptena ah, a san (red) a kawi chiat ding in calendar bawlte kiang in le dawtna a siam ngal ui.

PTC Imphal Block in election nei

Lamaka, Aug. 27 (Nisin Thuhiltu): Paite Tribe Council (PTC) Block chuam chuam ah vaipawte term a bei tak tawh kitawn in PTC-GHQ a pat election commission te mapuina’n block election a chiatha zing hi. Zia chu tawh kitawn in tuni, August 27 in kum 2017-2020 sung PTC Imphal Block vaipaw ding telna a um hi. Zia ah kitelna chu H Pauza¬lal, Gen. Secy., PTC-GHQ in amapui a, teltin thak ah um te kitiam sakna a nei hi. PTC Imphal block lawiupa ding ah teltin thak ah um te ahiu leh Presi¬dent; Thangsing of Lamphelpat; Vice Presi¬dent: G Lianchinthang of Langol; Secretary: N Khamsuanthang of Lam¬phelpat; Asst Secy; T Ginkhanlian of Games Village; Finance Secy: T Dongzathang of Lan¬gol; Treasurer: V Song¬zakham of Lamphelpat leh member ding ah L Kaithawn of Lan¬gol; G Nangkhanthang of Tribal Colony leh G Thangsuankhup of Games Village te a hiu a, Amaute Pastor T Vung¬khansuan, Local Pastor, EBCC Lamphel in pauchapna a nei piak hi.

M/S Kim Joe Gas in ‘Safety Clinic Campaign’ nei

Lamaka, Aug. 27 (Nisin Thuhiltu): M/S Kim Joe Gas, Nehru Marg, Lamka in gas matna a pat buaina a tuntheina tawh kisai ah mipite awareness piakna ding in Saikot leh Rengkai khua ah August 25 leh 26 in ‘Safety Clinic-cum-PMUY Cam-paign’ programme organized a bawl hi. August 25, 2017 ni a khan, Rengkai Community Hall in‘Safety Clinic-cum-PMUY Cam¬paign’ programme chu organize a bawl a, Au¬gust 26 in Saikawt ah Saikawt Village Author¬ity tawh kithua in a sunzawm hi. Zia hun matna a chun, gas a pat meikuang zak ah kivenna dingdan leh kituptak ah amat ding dan tawh kisai in kiziltilna a um a, gentheite lak a genthei diak BPL family ten government scheme chuam chuam nuai ah gas connection muthei a hidan uh le chipchil tak ah ziltilna a um hi. Chuleh, Kim Joe gas tawh kisai ah haksatna um te leh suklat in a um a, Kim Joe gas agency in customer te ding ah theitawpsua zing a hidan uh le taklat in a um hi.

Nursing Training School siamthakna pan
Lamaka, Aug. 27 (Nisin Thuhiltu): Churachandpur District Hospital huangsung ah um Lam¬ka Nursing Training School building sawngchung luatheilo ah um chu siamphat thak in a um hi. Nursing Training School building siamthakna nasep a kipat tawh kitawn in a sawngchung lam ah kawtkhak frame leh tohlet frame zosia le siamthak in a um hi. Lamka Nursing Training School ahihleh ANM chan ziltheina himaleh tunaicha Indian Nursing Council in GNM tiang ziltheina ding ah lemsakna a piak hi a hi.

JNIMS ah sepna piak tiam mi zuautheptu matdaw ah um
Imphal, Aug. 27 (Nisin Thuhiltu): Jawaharlal Nehru Insti¬tute of Medical Sciences (JNIMS), Imphal a sepna piak ding suanlam ah, mi tamtak sum ah them ah ngaw ah um Na¬meirakpam Abung (36) s/o late Bihari of Ningth¬oukhong Ward No 9, Bishnupur district chu tuni Pathianni nitaklam in Cy¬ber Crime Unit, Imphal West-te’n a mandawk ui. Mat ah um Namei¬rakpam Abung in, state Chief Minister Public Relations Officer (PRO) a hidan zuau ah gen ah mi banghem zat a thep hita in a kigen a, mat ah a um hun ah a taksa chung ah Rs 95,000 le mudaw ah um hin a kigen hi. Cyber Crime Unit, Imphal West in a taklat dungzui ah, Nameirak¬pam Abung in, state etkawl hospital JNIMS ah sepna piak ding ti thutiam bawl ah mi chuam chuam a zuau thepna a pat Rs 8 lakh tuam kaikhawm ta leh Phone number 8258843617 mang ah sepna dawi te kihopi sek hin a gen hi.

52nd Hunger Marchers’ Day 2017 mang

Imphal, Aug. 27 (Nisin Thuhiltu): All Manipur Stu¬dents Union (AMSU) mapuina’ tuni, August 27 in Pishum Chingama¬cha Memorial ah 52nd Hunger Marchers’ Day 2017 mat in a um hi. Hunger Marchers’ Day a hileh a chiata kum 1965 ah kiphinna nei hun ah security force te’n meithal a thana chung ua thina a la tuak student 4 te zana etsakna’ kumsin leh mat ah um sek a hi. Kaplup ah a la um te chu student 4 te chu Nong¬meikakpam Promodini, Oinam Nabakumar, Laishram Chaobal leh Waikhom Nilamani te a hiu a, “artificial scarcity of food” tawh kisai ah kiphinna a um hun ah security force te meithal kapna ziak ah thina a la tuak a hiu. Nabakumar, Nila¬mani leh Pramodini te a hiu leh 27th August ah thina a la tuak a hiu a, Laishram Chaobhal Singh ahileh Sep¬tember 26 ni liamna thuakzo lo ah thi a hi. Chun zia ah kiphinna a chun, Laishram Mangi, Ku¬mar leh N Ibohal Singh-te’n le liamna nasatak a la tuk uh ti a hi. Jiri¬bam ah AMSU District Committee, Jiribam in le 52nd Hunger Marchers’ Day matna chu nei ua famta te zana piakna a nei nung un, Jiribam Higher Second¬ary School ah meeting nei in Hunger Marchers’ Day amang ui. 52nd Hunger Marchers’ Day mat a hina chung a chun, Imphal ah Manipur college, Imphal student union te saina’ HDFC Bank, Life Savers’ Manipur leh Shija Blood Bank tawh kithua in college cam¬pus ah 50th Voluntary Blood Donation Camp a bawl ua, zia camp a chun student 50 val te’n thisan donate a bawl ui.

Criminal Justice System leh AFSPA tawh kisai ah discussion nei
Imphal, Aug. 27 (Nisin Thuhiltu): Classic Hotel, Imphal ah tuni’n Manipur ah Criminal Justice System leh AFSPA, 1958 tawh kisai in ‘one-day discussion’ a um hi. Zia pro¬gram chu Northeast Dialogue Forum, Youth Forum for Protection of Human Rights, People for Human Rights and Cli¬mate Change te’n organize a bawl uh a hi. Discussion hun ah resource person leh po¬litical analyst, Leihaotha-bam Sharatchandra in, kum 2000 leh 2012 kikal ah Mani¬pur in, “fake encoun-ters” kiti nasatak thuak a hidan a gen a, kum 2007 leh 2017 kikal ah state ah human rights violation rate sang mama in a gen hi. Cen¬tre in mipi te thutiam bawl maleh tuni tiang ah state a kipat Armed Forces (Special Powers) Act lakdaw ahilona chung ah a thangtawm thu a gen hi. Zia hun matna a chun, Additional Director General of Police lui, adv¬cocate Ahanthem Romen, LMS Law Collge, Imphal Guest Lecturer S Dilip leh United NGOs Mission-Ma¬nipur secretary O Nabak¬ishore te’n ‘criminal jus¬tice system’ thupi ah mang in thugenna a nei ui.

CorCom Finance leh Foreign Secretary mat ah um
Imphal, Aug. 27 (Nisin Thuhiltu): Maj Ankur Rana mapuina nuai ah 6AR leh 42 AR banah Bishnupur Police Com¬mando joint team te’n Tronglaobi area ah tuzingkal matak in comb¬ing operation a nei ua, zia hun a chun,Manipur ah thingnuaimi pawl chuam chuam kikhaikhawmna– CorCom a Foreign leh Fi-nance Secretary Mairem¬bam Achouba (78) @ Achou Meitei aman dawk ui. Achou Meitei ahileh kum 1957 ah Meitei State Army (MSA) a la zawm, kum 1991 ah KCP founder mem¬ber khat a hia, zia nung a chu CorCom zawm leh Foreign leh Finance Secretary panmun tuk hi ah hiat a hi. Chuleh, ama’n CorCom cadre te nasepna ding tawh kisai ah Myanmar, Thai¬land leh China gam te chuan ta hin le a kigen hi.

NPF state unit in NPF Central support ding ah lemsa

Imphal, Aug. 27 (Nisin Thuhiltu): Nagaland sung ah Naga People’s Front sung buai zing himaleh NPF Manipur State unit in BJP tawh alliance NPF Central chu support leh dinpi zing ding in a chiata Kiginni ah ‘office bearers’ meeting’ hun in thupukna siam hi. NPF, Manipur State unit in a taklatna a chun office bearers’ meeting, August 12, 2017 hun ah resolution umsa gual ah Manipur ah BJP tawh NPF pangkhawm zing ding a hidan taklang a, tunaicha a la mualliam Chief Minister Rishang Keishing suunthu le a puang hi. Chuleh, Manipur Minister L Dikho pianna pa Nepuni Lossii a mualliamna chung ah suunpi thu le puang in Nepuni Lossii chu Pathian kicha leh kochuam puitu muan umtak banah social leader piting tak hi ah hiat a hidan le a taklang hi.

Linling in Senapati district hawtling
Imphal, Aug. 27 (Nisin Thuhiltu): 3.2 magnitude ah hat linling in tuni, 27 August 2017 zingkal lam dak 9:35 in Manipur’s Senapati district a hawtling a, himaleh thina tuak leh liamna tuak hiat ding umlo ah hiat a hi. Hiatthei khat chu a chiata August 2, 2017 a khan le 5.4 magnitude ah hat linling in Manipur leh Northeast India a la hawtling a, epicenter ahileh Churachandpur, Manipur a la hi’i.

Delhi ah Uicha tha ziak ah Manipur mi 2 mat ah um
Imphal, Aug. 27 (Nisin Thuhiltu): Delhi ah uicha (dog) tha ziak in Manipur mi, mi 2 mat in a um ua, mat ah um te chu T David Haokip (23) leh Lalminsang Khongsai (20) hi ah hiat a hi. Deputy Commissioner of Police of South District in a genna a chun, mi 2 te police khut ah kipelut a hidan uh a gen a, 15th August ni ah uicha tha ziak ah a chung ua complaint file ah um hin le a gen hi. Munirka village ah chek tâng mang ah public ah uicha a tha bak ua, bag sung ah siam ah a zammang pi nung ua a chung ua case file ah um hi a hia, a tawidan uh bangkim chu CCTV camera ah captured kibawl, Indian Penal Code leh Prevention of Cruelty to Animal Act nuai ah case ziklut ah um hin police thusuak in a gen hi. Police te thudawtna mi pani te a kipuan hun ua nek ding ah uicha chu a tha uh hin a gen ua, Jame kiti midang khat le kisel zing nalai ti a hi.

FIAMA North East DIVA 2016-17 winner te’n CM kimupi
Imphal, Aug. 27 (Nisin Thuhiltu): FIAMA North East DIVA 2016-17 winner te’n tuni’n a office chamber ah Chief Minister N. Biren Singh a kimupiu a, Chief Minister N. Biren Singh in maban ah lawting to zel ding ah a dawisakna thu a lan hi. FIAMA North East DIVA 2016-17 winner te a hiu leh beauty pageant Miss Peden Ongmu Namgyal (21) of Sikkim, 1st runner-up Miss Loukrakpam Angobi Chanu (18) of Manipur leh 2nd runner-up Miss Poonam Das (18) of Assam te a hiu a, Chief Minister N. Biren Singh a pat tunung ah a lawtin theina ding ua malsawmna dawn hi a hiu.

6th State Open Ranking Table Tennis Championship, 2017 khak hita

Imphal, Aug. 27 (Nisin Thuhiltu): Works Minister Thongam Biswajit Singh in Indoor Stadium, DM College Campus, Imphal approach road siamhawi thak ding ah dawtna um chu enzui ding leh siam hawithakna ding ah panla ding a hidan Indoor Stadium, DM College Campus, Imphal ah tuni, 6th State Open Ranking Table Tennis Championship, 2017 Closing Function hun ah a thugenna a chun a gen hi. Minister Biswajit in Sports kiti chu education chi khat hin a gen a, kihelna a pat discipline leh thil chuam chuam tamtak zildaw thei ah um zing a hidan gen in, state sung ah sports lam masawn theina ding ah mizosia support leh panlakkhawmna pawimaw hin a gen hi. Government bep in kisanna (change) umsak theilo ding a hidan gen in, mipi te kithuapina government in pawimaw mama hin a gen a, approach road siamthak ding ah dawtna um chu enzui ding hin a gen hi. Zia hun matna chu DTTA, IE President Mangsatabam Gojendra Singh leh JNIMS Director Prof. Th. Bhimo Singh banah MTTA President H.Devshekhar Sharma (IAS retd.) te’n le khuallian hina tawh a uap ua, Minister Biswajit prize piakdawna le a nei hi. 6th State Open Ranking Table Tennis Championship, 2017ahileh District Table Tennis Association, Imphal East in Manipur Table Tennis Association support bawlna nuai ah organize a bawl a hi.