Manipur Chief Minister lui Rishang Keishing mualliam; Manipur government in ni 3 sung ama suunna hun mat hiding ah puang

Imphal, Aug. 22 *(Nisin Thuhiltu)* : Manipur Chief Minister lui leh Rajya Sabha MP lui Rishang Keishing (98) chu Regional Institute of Medical Sciences (RIMS) hospital, Imphal ah tuni, 22 August 2017, nitaklam dak 6:30 in damlona ziak in a mualliam hi. Rishang muallianna chung in, Manipur government in ni 3 sung ama suunna hun ah mat hiding in a puang ngal hi. Senior Congress leader Rishang Keishing (98) ahileh July 1, 2017 ni ah damlona ziak ah RIMS ah admit ah um a hi. Rishang Keishing hi, Manipur Chief Minister term 4 a la tuk, last surviving member of India's first post-1947 Parliament hi ah hiat a hi bak ah kum 87 a hi hun ah khawvel pumpi leh India ah parliamentarian upapen ah hiat le a hi. Ama a hileh 25 October 1919 ah piang, MLA ding ah term 7 vei teltin ah um, Manipur a pat Rajya Sabha MP lui, Manipur Chief Minister panmun term 4 (1980 to 1988 leh 1994 to 1997) sung a la pang, Bungpa village, Ukhrul District a pat mi a hi. Kum1950 ah a zi Mrs. Khatingla Keishing tawh a la kicheng a hiu a, chapa pali leh chanu pani nei a hi. Ama thina chung ah Manipur Chief Minister Biren Singh in Manipur in Manipur chapa diktak khat mansua a hi dan taklang in lung-gil tak ah suun a hi thu a puang a, Manipur khantona ding ah Rishang Keishing panlakna um te chu hiat zing hiding in a gen hi. Chun, ama suunna leh za (respect) et-sakna’ State in August 23,2017 a pat ni 3 sung hun mang ding, zia hun sung a chu Government offices leh educational institutions te kikhak ding hin a puang hi. Congress party in le Keishing suunna thu puang in a insungmi te thawkpi a hidan a taklang hi. West Bengal Chief Minister lehTrinamool Congress supremo Mamata Banerjee in le1980s hun ah kum tamtak Manipur Chief Minister panmun a la lua, Rishang Keishing chu suun mama a hidan taklang in a innsungmite leh ama ngainatu te suunpi a hidan a puang hi. Rishang Keishing hi, kum1935 ah Kangpokpi Mission Middle Elementary School ah Class VI a zaw, kum 16 bep a hi ah Bungpa Lower Primary School ah teacher ah a la sem, kum 1 teacher ah a pan nung ah Churachand High School ah thiamzilna sunzawm, 1937-38 ah Class VII & VIII zo, Kohima Government High School ah kum 1939-40 ah Class IX zo, Calcutta University nuai ah um Jorhat Christian High School, Assam ah kum 1944-45 ah class X zo a hi. St. Paul’s Cathedral College, Calcuta ah Class 12 tiang zo leh Calcutta University ah kum 1949 ag graduate zo, Graduate a zaw ah Ukhrul Christian Junior High School, Head Master ah a la sem, full-fledged High School ah Ukhrul Christian Junior High School a la tung dingtu le a hi. Head Master panmun chu January 1952 ah nusia, a khatveina ding ah Indian Socialist Party ticket ah first Lok Sabha, Member of Parliament ding ah Manipur Outer Parliamentary a pat tel tin ah a la um a hi.

YPA V. Munhoih Unit in kum 3 tinna lawm

Lamka, Aug. 22 *(Nisin Thuhiltu)* : Young Paite Association (YPA) V. Munhoih Unit in tuni’n Aaichin Bazaar, V. Munhoih ah a kum 3 tinna Raising Day a mang ua, zia hun chu V. Hangkhanlian, Minister (Agriculture, Veterinary & Animal Husbandry) in Chief Guest hina tawh a uap a, Khaipao Haokip, Chairman, ADC Churachandpur leh Paukhanlian, Executive Member, ADC Churachandpur te’n Guest of Honor banah M. Gouzamang Guite, MDC in Functional President hina tawh a uap hi. Vengsung mipi’n Chief Guest leh a zi hun matna mun chan zawn in zia chun Chief Guest in YPA Puanlap kaipalna a nei hi. Functional Pesident Gouzamang in MGNREGS mat theina ding ah V. Munhoih chu Village Develeopment Council (VDC) ah kipua hi’n a gen a, mipi a ding ah pawimaw te chu MLA in a etthâk ding dawi thu a puang hi. Guest of Honor Khaipao in Munhoih vengsung mipi’n damlona tuak, Hoihkim zia tiang ah a dawpsan na chung ah ettawn tak a sak thu a puang a, khawpi sung thianthona ding ah mitin in panla ding in a chial hi. Guest of Honor Paukhanlian in khawpi sung thianthona ding in maban ah phatchuam ngai pawl chuam chuam leh vengsung club te’n a etsui thei ding dan uh lampi ngaitua ah um hi’n a gen a, vengsung mite’n a zawlo uh leh District Council in ensui ding hi’n a gen hi. District sung thianthona ding leh gukchak-lakchak a pat kivenna ding ah mitin pankhawm ngai hi’n le a gen hi. Chief Guest Hangkhanlian in a thugenna a chun, election hun ah tuplona muntak ah ding kha himaleh ginchak khel ah Pathian leh mipite dawisakna ziak ah teltin ah um hi’n a gen a, election hun ah candidate leh political party zosia’n Manifesto neichiat hi ah taklang kawm in manifesto kiti sep pitin pai ziang thei thil hilo leh election kit ah bang tiang sepdaw a hi tam ti review bawl in sep pitin nailo te sep to zle ding chu thil chiadan a hina ah mawk ngakla ziang chu phachuam lo hi’n a gen hi. Tulai Facebook leh WhatsApp ah nam ngaina hi ah kigen tamtak mu ding um ta hi ah genlang kawm in social media ah thu kigen te sang ah khat leh khat kimu ah gaidan genkhawm chu phachuam zaw ding ah gingcha ahi dan a puang dawk hi. Suspension of Operation (SoO) nuai a um UPF/KNO leh Government in Tripartite Political Talk a neina ding ah Interlocutor chu Manipur Chief Minister in propose a bawl a hina ah Manipur Government len lunglut a hi dan sulang hi’n a gen hi. YPA V. Munhoih Unit a hileh a chiata August 22, 2014 ni ah kiphudawk a hia, kum 3 lawpna hun matna ah Chief Guest in YPA Hall bawlna ding ah Rs. 20 lakh piak ding in a tiam hi.

IMI tawh kisai orientation chiatha zing
Lamka, Aug. 22*(Nisin Thuhiltu)* : Intensified Mission Indradhanush (IMI) tawh kisai ah August 21 a pat August 29 sung National Health Mission NHM Block nuai ah Block Program Manager (BPM) leh ASHA Facilitator te’n PHC Area chuam chuam ah Orientation a nei ding uh chu a chiatha zing hi. Tuni sunma dak 10:30 in Samulamlan NHM Block nuai ah Town Area sung ah BPM leh AHSA facilitator te’n DFWO Conference Hall ah a nei ua, Recourse Person Dr. VC Pau Tonsing, DFWO/ DTFI in Contraceptive leh Intensified Mission Indradhanush (IMI) sep pitin ding dan tawh kisai ah ziltilna a pia, zia hun a chun Town Area a BPM leh ASHA Facilitators te a pang u’i. orientation tawh kisai ah zing, August 23 sunma dak 10:30 leh Saikot PHC Area te’n Saikot Community Hall ah nei ding a hiu a, August 24 leh Sagang PHC Area te’n Sagang PHC, August 26 leh Henglep PHC Area in Bijang Community Hall, August 28 leh Singngat NHM Block nuai ah Singngat PHC area te’n Singngat PHC leh Behiang PHC, Thanlon NHM Block te’n August 25 leh Sinzawl PHC Area banah Thanlon PHC Area te’n DFWO Conference Hall ah nei ding a hu a, August 29 leh Parbung CHC leh Senvon PHC area te’n DFWO Conference hall ah nei ding ahiu. IMI tawh kisai ah District Workshop a hileh Indian Prime Minister Office (PMO) in India gamsung ah nuapang leh numei nauvawp te’n full immunization a chang thei ding uh dawina ah a patdaw a hia, PMO in IMI 1st Phase a ding ah district bang hem zat teldaw ah um in zia lak a chun Manipur a pat Churachandpur leh district dang 3 a pang hi.

Bank strike ziak ah bank kikhak

Lamka, Aug. 22 *(Nisin Thuhiltu)* : United Forum of Bank Union (UFBU) nuai ah um bank a semtu mi 10 lakh val te’n tuni’n India gamsung pumpi ah All India Bank Strike nei in nasem lo ah bank mai in strike a nei ua, ccpur district ah strike um in public sector bank kihawng mu ding a um puai. India gamsung ah Public bank te kikhai khawmna lianpen, UFBU in bank te zui ding dan chuam chuam India government in a pass chu dawilo suklatna ah dakkal 24 strike chu a sai a hia, bank ah semtu te’n nasemlo in bank mai ah sit-in-protest a nei u’i. Zia tawh kitawn a chun CCpur district sung ah public sector bank - State Bank of India (SBI), Central Bank of India (CBI), United Bank of India (UBI), UCO Bank, Vijaya Bank leh Canara bank te’n le kiphinna chu tawsawt in tuni’n bank a khak vek u’i.

JACAKT phiat; Ex-gratia piakdawna nei

Lamka, Aug. 22 *(Nisin Thuhiltu)* : Joint Action Committee against the Killing of Thangkhanlun (JACAKT) in tuni’n Simte Inn, Simveng ah meeting nei in maban panlak ding dan banah Government tawh kihona umsa tawh kisai genkhawna a nei u’i. Meeting zaw ah Laldawnlien Varte, Spokesperson, JACAKT in Press Briefing a bawlna a chun, Thangkhanlun thina tawh kisai ah ngaw pipen ah um, Romeo chu Government in Wanted ah a puantak banah exgratia piak ding a tiam ziak ah JACAKT chu phiat hita leh JACAKT sung ah mawpuakna chuam chuam um te le phiat gita hi’n a gen a, JACAKT in sukkhial - bawlkhial a nei te kuamasap in ngaidam ding in a dawn hi. JACAKT phiat a hi tawh kitawn in File leh lekha pawimaw chuam chuam te chu JACAKT Chairman, Thonglianmang in Dongchinthang, President, SYO GHQ khut ah piakdawna a nei hi. Thangkhanlun luang a hileh zing leh District Morgue a pat lakdaw hi ding leh SYO Simveng Unit inntekna nuai ah Simveng thânmual ah vui hiding a hi. Thangkhanlun thina tawh kisai ah tuni’n SYO GHQ puitu te leh District Administration in kihona nei in zia hun a chun Thangkhanlun innsung mite khut ah ex-gratia piakna le neingal a hi.

Mega trade Fair kipan di

Lamka, Aug. 22 *(Nisin Thuhiltu)* : Churachandpur district a ding ah a khatveina ding in zing, August 23 leh YMA Hall, Hmuia Veng ah Mega Trade Fair 2017 kipan ding a hi. Kevi Society Kohima leh Team CT Lian saina nuai ah um ding Trade Fair hawnna hun chu zing nitaklam dak 5 leh Vasti, Headmistress, Songtal Government High School in Chief Guest hina tawh uap in a hawnna nei ding a hia, Paukhanlian in Pathian kiang ah latna nei ding a hi. September 30 tiang um ding Mega Trade Fair a chun khawvel gam chuam chuam a pat van chi chuam chuam te chu stall 30 vâl ah zuak hi ding banah talent show leh Dance Competition le um ding a hia, talent show leh dance competition ah pang nuam a tam ziak in August 30 chan Audition round hiding a hi. Mega Trade Fair a hileh hawndaw zawleh zingkal lam dak 9 a pat zan dak 8:30 tiang kihawng zing ding a hia, talent show leh Dance Competition a hileh nitak dak 5 leh kipan sek ding a hi. Mega Trade Fair chia nuam te a ding ah entry fee Rs. 20 hi ding leh entry ticket chu lucky draw le hingal ding a hia, lucky draw chu Fair zaw ni leh draw hi ding a hi.

AIKS office hawnna chung ah kipakthu puang
Lamka, Aug. 22 *(Nisin Thuhiltu)* : A chiata August 19, 2017 ah All India Kisan-Sabha (AIKS) Manipur Lou Milup Office hawnna chung ah Thangneilal Suantak, President leh L. Haokip, Secretary te’n thusua bawl in kipakthu a puang u’i. Office a hileh S. Khamminthang, General Secretary, ZYA Mata Unit in a hawnna a nei a hia, ZYA Mata Unit nungak-tangval te’n a pawimaw bangkim arrangement bawlpiak in zawthian a hima chan ah kithuapina a piak ziak un le kipakthu a gen u’i. Chun, kiphaltak ah Office mun ding a thawn ah matsak tu, Kamthang chung banah Office Bearer te’n kawng chuam chuam ah pan a lakpina chung ua le kipakthu a puangdawk u’i.

Imphal lui ah khialut chapang luang mudaw hita
Imphal, Aug 22 *(Nisin Thuhiltu)* : A chiata, August 20, 2017 ni Minuthong area, Imphal lui (river) ah khia-lut numei naupang kum 5 ah upa Baby Shakila, d/o Mrs Ibem of Hatta Golapati luang hawl hizing chu tuni’n Kiyamgei Mayai leikai area ah mudaw in a um hi. A kigendan ah a luang chu tuichung ah a kilapdaw nung ah mudaw thei ah um a hi.

Seminar on “Media & Parliamentary Reporting
Imphal, Aug 22 *(Nisin Thuhiltu)* : Manipur Legislative Assembly in 6th September, 2017 leh Manipur Legislative Assembly, conference hall ah one day Seminar on “Media & Parliamentary Reporting” organized bawl ding a hidan Joint Director leh PRO, Manipur Legislative Assembly, Raju Yanglem in thusua a bawlna a chun a taklang a, electronic leh print media editor te chu reporter 2/ 3 sawl chiat ding in hiatsakna a bawl hi.

NBCC in Yoga chiapilo ding ah hiatsakna bawl
Imphal, Aug 22 *(Nisin Thuhiltu)* : Nagaland Baptist Church Council in amau nuai ah um Associations leh Church te chu Yoga chiapilo ding in hiatsakna a bawl a, Yoga kiti chu Hinduism sakhua a pat piangpan a hidan taklang kawm in Christian te chiapi ding ah lemlo hin Rev. Dr. Zelho Keyho, General Secretary, Nagaland Baptist Church Council in thusua a bawlna a chun a taklang hi. A langkhatlam ahYoga kiti chu sakhua khat leh khat kal hilo himaleh Christian community te religious sentiment a suk khalona ding ah Nagaland pawlam ah um Naga students te chu Yoga practice bawlna a pat thakawl ding in le dawtna a siam hi.

KSA in dakkal 48 General Strike chawlsan
Imphal, Aug 22 *(Nisin Thuhiltu)* : Kangleipak Students’ Association (KSA) in student te chung ah government gamtatna te chung ah lung awilo suklatna leh Manipur sh indigenous mi te bitna ding ah panlakna a um ding phutna August 23 zankhang a pat August 25 zankhang chan state pumpi huap ah dakkal 48 sung general strike um ding ah a puan chu a chawlsan hi.

Preview committee member ding ah Manipur a pat mi 2 guat ah um

Imphal, Aug 22 *(Nisin Thuhiltu)* : Union Ministry of Information and Broadcasting in November leh um Goa capital Panaji ah um ding International Film Festival of India (IFFI) 2017, Preview Committee ding a siamdawk a, committee chu Vivek Agnihotri in Convenor hina tawh amapui ding a hi. Preview Committee member ding ah National Award winning Director te panna mi 40 guat in a um ua, zia te lak a chun, Manipur a pat Manipur’s National Award Winning Director Maipaksana Haorongbam of Lilong Chajing Chingkhong Leikai, Imphal West leh Film-Maker Bhumenjoy Konsam, Khundrakpam, Imphal East te pansak in a um ui.

Eye donation campaign fortnight
Imphal, Aug 22 *(Nisin Thuhiltu)* : Saksham, Manipur Prant saina’ 25th August, 2017 leh Iboyaima Sumang Lila Shanglen, Konung, Imphal ah ‘Eye Donation Campaign Fortnight’ programme kipan ding a hi. Zia Programme chu thi nung ah mit (eye) donate bawl nawpna lunggel mipi te lak ah a um theina ding tupna chiapi hiding a hia, 8th September 2017 tiang ah campaign chiapi hiding a hi. Chun, Speaker Manipur Legislative Assembly, Y. Khemchand Singh leh Chairman MPCB & KVIB, Government of Manipu r L. Radhakishore Singh te’n inaugural function chu Chief Guest leh President hina tawh uap ding a hiu. Hiatthei khat chu kumsin leh National Eye Donation Fortnight chu 25th August- 8th September sung ah chiapi hizing sek a hia, National Programme for Control of Blindness (NPCB) estimates dungzui ah tu dinmun ah global blind population 20 percent tungzo leh kumsin ah estimate 25,000-30,000 cases kibelap zing ti a hi.

KYKL cadre khat mat ah um

Imphal, Aug 22 *(Nisin Thuhiltu)* : Red Shield Division nuai ah Senapati Brigade, Jwalamukhi Battalion troop te’n 21 August 2017 ah operation a bawl hun un, KYKL cadre khat Phumlou Keiroi, Kangpokpi district in a man dawk ui. Mat ah um chu Itanao @ Lanpaba (27) s/o Konsam Maipak, r/o Phumlou Keiroi, Maninglaikai (Manipur) hi ah hiat a hia, KYKL active cadre khat hi ah hiat a hi. A chung ah Imphal West, Police Station ah FIR ziklut in a um hi.

Career Counselling Seminar nei

Imphal, Aug 22 *(Nisin Thuhiltu)* : HQ IGAR(South) nuai ah 5 JAK RIF of 9 Sector Assam Rifles in khangthak tam tak in Armed Forces a zawp ding uh dawisakna tawh “lecture cum weapon display” bawlna sunzawm zel in Hiyangthang Mayai Lekhai, Imphal West District ah zani a khan lecture cum weapon display a bawl a, unit officer te’n Indian Armed Forces umdan leh kivai puakdan banah a luttheina ding lampi tawh kisai in khangthak te ziltilna a nei ui. Local khangthak tamtak in hun matna a uap ui. Chuleh, 5 JAK RIF of 9 Sector Assam Rifles in Tulihal, Imphal West District ah numei student te ding in Career Counselling Seminar organized a bawl a, zia hun a chun Col Amit Bedi, Commanding Officer, Mr Charchit Gaur, IAS, Asst Commissioner, Imphal West, Miss Sylvia, Regional Head (Marketing), Vodafone leh Mr Pankaj Verma, IAS te’n resource person hina tawh numei student te career tawh kisai in ziltilna a nei ua, Civil Services, Corporate Sector, Armed Forces leh CAPF lam ah career chiapi ding dan kawkmuna a nei bawk ui.