State sung ah buaina um te sukvenna ding ah govt in panla zing: CM

Imphal, Aug. 19 *(Nisin Thuhiltu)* : State Government organised bawlna’ 1st Battalion Manipur Rifles, Banquet Hall ah tuni’n State level Sadbhavana Diwas (Harmony Day) mat in a um a, zia hun matna chu Chief Minister N. Biren Singh leh Agriculture and Veterinary and Animal Husbandry Minister V. Hangkhanlian banah Ministers, MLA, top civil leh police officer te leh Government employees tamtak in a uap ui. Chief Minister N. Biren Singh in a thugenna a chun, tu ah state Government in state sung ah buaina chuam chuam um te sukven vek ding leh kiphinna kiti umsaklo ding ah panlakna nei a hidan a gen a, himaleh organisation/individual te’n bang demand hitaleh sum ah government tatdaw sakna ding ah panla lo ding in a gen hi. Government masa hun ah Nungei buaina ziak ah inn leh lo suksiat piak ah um te compensation piak ding ah Government lui in panlakna a neidan zil a, a kisaipi DC leh SP te’n report a piaklut dungzui ua compensation sum fixed ah um a hidan hilchianna bawl in community/group khenchuam nei ah panlakna bangma umlo hin a gen hi. Government kiti chu community zosia te â a hidan le gen in, State Cabinet meeting hun ah ama Cabinet Minister te chu community-based ahiloleh region-centric issue pawlutlo ding in chialna a bawl hi. State mipi te’n hunchiasa ah buaina um te hiazing kawm ah panlakna a nei zing leh Manipur in khantona lampi kituptak ah chiapi theilo ding a hidan le gen in, self-centric leh community-centric ideas te ziak ah buaina um te paithak ding leh khantona kibang tak a um theina ding ah ngaituana a um ding pawimaw in le a gen bawk hi. Chun, state sung ah civil society organization te’n government panlakna a kithuapi zing ding uh kinem hin a gen hi. Agriculture, Veterinary & Animal Husbandry Minister V. Hangkhanlian in a thugenna a chun, India siamhawi thakna ding ah India Prime Minister naupangpen ah kihia, Rajiv Gandhi panlak dan taklang in, sunglam leh pawlam ah gamsung kipumkhatna susia thei ding te dodalna leh gamsung khantona ding ah Rajiv Gandhi panlakna ettawn tak a hidan a gen a, ama panlakna ziak ah kihona nei ah Punjab Accord, 1985 leh Mizoram Accord 1986 um thei a hidan a gen hi. Chun, Rajiv Gandhi in kichamna tawh panlakna a neidan te chu State in le a chiapi pawimaw in a gen hi. Sadbhavna Diwas (Harmony Day) ahileh India ah Prime Minister naupangpen ah kihia, Rajiv Gandhi pianni (birthday) kimang sek a hi.

One day Public Consultative Workshop nei

Lamka, Aug. 19 *(Nisin Thuhiltu)* : District Administration, Churachandpur District leh Centre for study of Social Exclusive Policy (CSSEIP), Manipur University ornaised bawlna’ tuni’n District Level Officer (DLO), Civil Society Organisation (CSO) leh Village Authority chuam chuam te’n DC Office kiangnai ah um DTC Hall ah “One day Consultative Workshop for Stateholders on Churachandpur Vision 2022 and Manipur Vission 2032 and Discussion on workplan to improve and sustain general hyeniene and cleanliness in Churachandpur Town" kiti a nei ua, zia hun chu V.Hangkhanlian, Minister Agriculture, Veterinary and Animal Husbandry in Chief Guest hina tawh a uap hi. Minister V.Hangkhanlian in a thugenna a chun, Churachandpur District in MAHUD Department saina nuai ah 1st State Level Swachhata Award 2017 a sanna chung ah kipakpi mama a hidan gen in, Vision-2022 leh Vision 2032 lawtinna ding ah panla chiat ding in chialna a bawl hi. Deputy Commissioner, Shyamlal Poonia, IAS in key note address a bawl hun in “Vision 2022” in smart city, quality education, public transport system siamhawi ding, district number one tourist destination, livelihood generate theina ding ah industry lam thil siam hawi thak ding, crime free town, disaster ah kiven theina ding leh cash less economy umsak ding ti tup ah nei a hidan taklang in, khawpi sung thiantho thei zingna ding ah mipi te kithuapina pawimaw in a gen hi. Chairman of the Autonomous district Council Chuchandpur, Khaipao Haokip in le thianthona lam ah District in a masawn dan te genna a nei a, zia nung a chun, “Churachandpur Vision 2022 leh Manipur Vision 2032” tawh kisai in discussion leh interaction a um hi. Zia hun matna chu Rakesh Balwal, IPS, SP/CCpur, civil organization, village authority chuam chuam a pat palai te, church leader te leh District sung ah Government official hunkhawp in a uap ui.

VA mapuina’ lampi siamhawi

Saipum, Aug. 19 *(Nisin Thuhiltu)* : Saipum khua lutna lampi hawilo tak ah um zing himaleh bialtu MLA leh a kisaipi thuneitu te’n hun sawttak siamphatlo ah a kawi nung un Village Authority panlakna ah khawsung mipi’n sum tuak khawm in tuni’n lampi siamna a nei ui. Josephy Cyril Bamford (JCB) excavator leh Tipper Truck hire in lampi ah balu single sunnna a nei ua, inn suan ah mipi kuankhawm te’n lampi ah balu single ki sung te thaizak in a sutuak ui. Hiatthei khat chu, tulak in khawsung/veng kikawmtuana lampi hawilo mipi tawmngai in a kisiam uh ti hiat ding a um zing a, umna chiat siamhawi chu thilpha mama himaleh bialtu MLA, MDC etc te’n government development fund mang ah siam hawi theilo ding a hidiam uh ti chu mipi te ngaituana a hizing hi.

CSC/VLE Society CCpur in General Election nei

Lamka, Aug. 19 *(Nisin Thuhiltu)* : BRGF Hall, DC Office ah tuni’n Chairman/DC Churachandpur Shyam Lal Poonia mapuina leh District Managers, Peter G Bieklien leh Michael Paul Haokip te Election Officer hina’n District e-Governance Society (DeGS), Churachandpur nuai ah CSC/VLE Society Churachandpur in General Election a nei hi. Zia hun a chun, Shyam Lal Poonia, Chairman/DC DeGS in thugenna nei in, Common Service Centre chu Digital India khuam bulpi, a diak ah Digital thil - PAN Card Application, Aadhaar Enrolment, IRCTC, Bank Mitra (Customer Service Points), Digi Pay (Aadhaar Enable Payment System), Passport bawlna, e-District Portal apat Tribe, Domicile, Income, Birth Certificate chuam chuam siamna mun pawimaw mama hung hiding leh Central Government schemes te implementation agency hung hithei ding a hidan gen in , CSC ah semtu Village Level Entrepreneur (VLE) te nasa tak in tilkhona a nei hi. General Election hun ah Office Bearer ding in President ding in Mangkholien Haokip, CSC-GOFICO, Vice President ding in Auralieus Zoramlien, CSC- Zenhang Lamka; Secretary - Samson Pamei, CSC-Digaijang; Asst Secretary Lianzagou Hauzel, CSC- Central Lamka; Secy Finance -P Soiminthang Zou, CSC-Tongdam; Treasurer - K Esther Vaiphei, CSC-Mata Mualtam; Information and Publicity Secretary - M Bishorjit Singh, District Consultant PMGDISHA leh Biaklianlal Zou, CSC-Vengthlang te teltin in a um ua, Ex-Officio ding ah Peter G Bieklien District Manager leh Michael Paul Haokip District Manager te guat in a um ui.

SDO Saikot Office ah Certificate chuam chuam laktheita ding

Saikot, Aug. 19 *(Nisin Thuhiltu)* : SDO Saikot Office ah Lalthazam, MCS, SDO Saikot, Solomon L. Fimate, SDC leh Saikot Sub Division Demand Committee-in tuni’n meeting a nei hun ua lemsakna a nei dungzui un, August 21, 2017 (Monday) a pat Saikot Sub Division huapsung ah um te’n SDO Saikot Office ah Certificate chuam chuam - Tribe, Residential/Domicile, Income, Minority Certificate etc laktheita ding ti a hi. Chun, Revenue Staff leh SDO staff te’n kituptak ah nasep a nei theina ding ua August 21, 2017 dak 11:00 am leh SDO, Saikot Office ah Saikot Sub Division Demand Committee vaisaina ah Rev. JF Lalropuia in pauchapna nei piak ding a hia, zia hun chu uap ding ah Sub Division huapsung ah VA, Students Leader, Val-Upa, HYA, YMA, SYC, HWA,MYC, HSA, KSO, MZP, Zillai, SSPP, Church Leader, Saikot Defense Party te chial a hiu.

Khuga Dam ah ketha, Lamsuanthang hawlna sunzawm

Lamka, Aug. 19 *(Nisin Thuhiltu)* : Khuga Dam a ketha Upa Lamsuanthang of Phaibem, Singngat Sub-Division hawlna a chiatha hi. Upa Lamsuanthang a hileh zani Khuga Dam gal, T. Kotlian khel lam ah thingsat ah kuan, sunnung dak 1:30 tuam ah innlam zuan ding ah kisa chu tuichung ah a thingsat sia tawh a chuanna lawng a pat ketha a hia, zia hun ah a gal ah um ngaman te’n a kikona aw 2 vei tuam hia man uh hi’n a kigen hi. Thiltung a hiat hiat un, Phaibem khaw mipi malatna nuai ah mimal leh pawl chuam chuam in Lamsuanthang hawlna pan ngal maleu a mulo ziak un tuni’n le a hawlna sutzawp a hi. Thiltung tawh kisai ah CT Lian Guite, MDC in Khuga Battalion kimupi in amau lawng leh Team CT Lian in a mat lawng mangcha’n tui chung in a hawlna a nei u’i. Lamsuanthang hawlna a hileh ZYO Phaibem Unit malatna nuai ah sutzawp hi ding in thutut a ki dawng hi.

PTC Block 2 in election nei

Lamka, Aug. 19 *(Nisin Thuhiltu)* : Paite Tribe Council (PTC) General Headquarter nuai ah Block 2 in tuni’n election a nei u’i. PTC Lamka Block vaipaw ding kitelna a hileh G. Nengdouthang, Secretary (External), PTC GHQ Presiding Officer hina tawh Headquarter Office, Hiangtam Lamka ah nei in a um a, zia hun a chun President ding ah M. Kamzagin teltin a hia, Vice President - N. Thangzamawi, Secretary - V. Hlunminthang, Assistant Secretary - H. Goukhenthang, Finance Secretary - H. Chinzalian leh Treasurer ding ah N. Ginzabiak te teltin a hiu a, Executive Member ding ah N. Goukhenpau, Zamlian Tonsing leh Ngulchinthang te guat in a um u’i. , Vaipaw thak ding te chu L. Pumlianpau, President, PTC GHQ in kitiamna neisak in T. Khupzadou, Secretary (Custom & Culture) PTC-GHQ in pauchap piakna a nei hi. PTC New Lamka Block vaipaw ding kitelna a hileh New Lamka Upper Primary School ah nei in a um a, zia hun a chun Chinkhanmang Ngaihte, Secretary (Organization) PTC GHQ mapuina nuai ah election nei in a um hi. Election a chun, President ding ah H. Chinthuam teltin a hia, Vice President - Hauzakap, Secretary - S. Kamkhanmuan, Assistant Secretary - S. Khupmung, Finance Secretary - H. Thonzachin leh Treasurer ding in S. Thangkhanmuan teltin a hiu a, Executive Member ding ah H. Thangkhozam, V. Tualzakhup leh S. Kamkhansuan guat in a um u’i. Teltin thak ah umte chu H. Paukhenmung, Finance Secretary, PTC GHQ in kitiamna a neisak hi. Teltin thak ah um te’n 2017-2022 sung vaipaw ding a hiu.

KKP Meet 2017 mang

Lamka, Aug. 19 *(Nisin Thuhiltu)* : Mizoram Presbyterian Church Synod (MPCS), Manipur Area nuai ah Lamka South Presbytery in Kristian Khanglai Pawl (KKP) Meet 2017 a nei uh tuni’n Jubilee Church, Compound Veng, D. Phailian ah a kipan a, sunma kikhawp khawm hun ah Bial KKP Secretary te a pat report ngaithakna a um ban in Rev. Gintinthang, Moderator, Lamka South Presbytary in Pathian thu genna a nei hi. Sunnung ah Fellowship nei ah um in zia hun a chun Lunmuanthang, Assistant Conductor, Manipur Area Choir in “Lapawl masawnna ding” ti thupi mang ah sharing hun a la, D. Phailian Bial, Mata Bial, Panglian Bial leh New Lamka Bial a pat lapawl ngaithakna a um hi. Nitak kikhawp hun ah Pro Pastor Ph Thianneilal, D. Phailian Bial in Pathian thu genna a nei a, Biakna kikhawp pel in Manipur Area Choir Night mat in a um hi. KKP Meet a hileh zing ah le sutzawp hi ding a hia, Rev. Malakia Lalnunfela, i/c Mata Bial, Rev. Joseph Lalnunmawia, i/c D. Phailian Bial leh Rev. Paulalsiam, i/c Panglian Bial te’n Pathian thu genna nei ding a hiu.

Transform Manipur Summit (TMS) 2017 hawnna leh latna nei
Lamka, Aug. 19 *(Nisin Thuhiltu)* : Rev. Dr. Richard Howell, General Secretary, WEA & Church Facilitator, TW2020 in zani zan a khan Rayburn Chapel, New Lamka ah Transform Manipur Summit (TMS) 2017 hawnna a la nei a, Rev. Dr. Lalhmuoklien, Chairman, CDCGC in Pathian kiang ah latna a nei hi. Rev. Dr. Richard Howell in Inaugural Message piakna a nei ban in ama mapuina’n chiakhawm te’n gamsung ah kithenna a umna ding ah suai kai in kitiamna a nei ua, Rev. Harry Muanlal, Executive Director, EOC in malzawlna gen in hun khakna bawl a hi. Tuni sunma dak 10:00 hun matna ah Rev. Dr. Richard Howell in “The Importance of the Church to Focus on Transformational Mission” ti thupi ah mang in thugenna a nei a, Rev. Samson Manwatkar, Director, Nagpur Christian Art Centre leh Rev. Godson Samuel, Methodist Church, Chennai te’n “Arts of Christ” leh “Arts as a Medium of Presenting Gospel Truths” ti tawh kisai genna a nei u’i. Sunnung hun ah Pastor Doupu Kom, New City Fellowship, Bangalore in “Ideological Challenge: Postmodernism”, Zeeneta Lens, Managing Director, Neighbor’s Gospel Ministries in “Ideological Challenge: Islam Challenge in Manipur”, Rev. Dr. V. Lalnghakthang, General Secretary, RPCNEI in “Justice, Peace & Reconciliation: Challenges and Opportunities for the Church in Manipur” ti tawh kisai genna a nei ban un Dr. Leban Serto, Director, Center for Peace Education, Manipur in “Transform Trans-Asian Highway: Challenges and Opportunities for the Global Church” tawh kisai genna a nei hi. Hun mat sung in ngaidan genkhawmna hun le a um banah Dr. Chingnunsiam, Dr. Hegin Tungdim leh Margaret Ramtharsiem te’n nasepna a pat Pathian gam nasep chiapi dan ding a genna nei u’i.

Jersey thak latna nei

Lamka, Aug. 19 *(Nisin Thuhiltu)* : New Lamka Youth Club (NLYC) Office, New Lamka ah tuni’n NLYC jersey thak latna nei a hia, zia hun a chun Pumshong Hangshing, President, NLYC in NLYC panlak dan te leh maban ah chiapi ding dan te genna a nei a, Pastor K. Pumsuanthang, Local Pastor, EBCC Pethuel in Pathian kiang ah Jersey latna a nei hi. Pumshong in a thugenna a chun, amasa pen ding ah Angel’s Vision in jersey a la sponsor leh a ban ah Sauliim neitu Thanglalmuan in a sponsor hi’n a gen a, tuchung ah Tullou.TV neitu Suanlian in a sponsor piak hi’n a puang hi. NLYC in Sports Authority of India (SAI) tawh kithua ah Special Area Game Centre kiti a bawl guat tawh kisai ah Revised Estimate le Government ah piaklut hita in financial sanction bep ngak hita hi’n a gen a, PT Sports Complex chu a matna lo ding ah mat ding NLYC in nang ding hi’n le mipi hiat in a puangdawk hi.

ISL player tawh hun mangkhawm
Lamka, Aug. 19 *(Nisin Thuhiltu)* : Kristian Thalai Pawl (KTP), Lamka EAC in zani zan in ISL Player Chinglensana tawh hun a mangkhawm u’i. Zia hun a chun Chinglensana in thugenna sau lo nei in hinkhua ah lawsapna tampi um maleh mi kukalte ma lawting leh Pathian in malzawl a hi dan a gen a, ama le a tupgukna ziak ah zia tiang chu tung a hi dan a gen hi. Thugenna a nei zaw in KTP, Lamka EAC in a mat ding un Football Jersey Set, Football, Goalkeeper Glove leh Stocking piakdawn a nei a, Pastor Dr. Lalbiekthang Buhril in Chinglensana a ding in a pauchap piak hi. Hun matna a chun, Rozarlien Kholum, Chairman in mipi mu ding ah Jersey suklatna a nei ban in Hmar Thangsuah Puan khat Chinglensana a silsak hi. Chinglensana a hileh Indian Super League (ISL) season thak ah FC Goa ah kihel ding a hi.

Cement Store thak hawng

Lamka, Aug. 19 *(Nisin Thuhiltu)* : BJP Churachandpur ST Morcha ah Vice President, Thanga Tonsing in tuni’n Lanva lei kiang ah um, Khupnou Cement Store hawnna a nei a, dawr thak chu kingakna tâk leh lawting a hi ding dawisakna le a lân hi. Khupnou Cement Store ah inn sak ding ah vanmat chuam chuam - Cement, Langva, Rhino pêk, thîk (Iron Bar), thikkil leh a dang dang muthei ding a hia, dawr dang gual hilo in van kichaw te chu puak piak ngai a um leh dawr neitu’n a pawimaw dan zil in thawn ah puak piak ding hi’n a kigen hi.

Enquiry Committee in interim enquiry report pia

Imphal, Aug. 19 *(Nisin Thuhiltu)* : Kum 2013-2014 sung ah Modernisation of State Police Forces nuai ah Manipur Police Department a ding Digital Radio Sets leh Repeaters van a hi ding gual tak ah a umlona chung ah khualna nei ding ah government in a siam daw, Enquiry Committee in tuni’n Chief Minister N. Biren Singh khut in interim enquiry report piakna a nei hi. Principal Secretary J.C. Ramthanga mapui three member committee in Additional Director-General of Police (AP) Anand Prakash leh Inspector-General of Police (Admn) Dr. S. Ibocha Singh tawh interim report chu Additional Chief Secretary (Home) Dr. J. Suresh Babu uapna tawh Chief Minister in kiang in a pelut ui. State government approve bawldan tawh kituak ah Digital Radio Sets leh Repeater te lak ah um a hina em, supply order tawh kituak ah van mat quality kituak a hina em ti te Committee in khualna a nei a hi.

CM Relief Fund ding ah Rs 5.5 lakh donate

Imphal, Aug. 19 *(Nisin Thuhiltu)* : Manipur ah tui-let ziak ah haksatna tuak te kithuapina ding in mimal leh organization chuam chum in Chief Minister’s Relief Fund (CMRF) ding in donation a bawl zing ua, tuni’n Public Works Department, Manipur Staffs te’n Rs. 4,50,250 donate a bawl ui. Chun, Manipur Olympic Association in Rs. 1,00,000 donate a bawl hi. Chief Minister Secretariat ah Chief Minister N. Biren Singh khut in piakdawna a nei ua, Chief Minister in panpina ding ah sum tuaktu te panlakna chu pakcha mama hin a gen hi.

Dy CM in Ethno Medicinal Research Centre hawng

Hengbung, Aug. 19 *(Nisin Thuhiltu)* : Deputy Chief Minister Yumnam Joykumar Singh in Commerce and Industries Minister ThongamBishwajit Singh tawh tuni’n Hengbung Village, Kangpokpi district ah North East Centre for Ethno Medicinal Research Centre hawnna a nei hi. Research Centre chu Hengbung Village inKangpokpi district kiangnai ah um Foundation for Environment & Economic Development Services (FEEDS) campus ah kawi a hi. Research Centre hawnna a nei hun ah Deputy Chief Minister in a thugenna a chun, ziagual Research Centre kihawng chu North-East, a diak ah Manipur in medicinal plants tam tak nei a hina chung ah phatchuampi diak ding hin a gen a, Research Centre in co-ordinate institutes - ICAR, IBSD & Central Agricultural University te tawh research bawlna panlakna a nei khawm ding pawimaw in a gen hi. Commerce & Industries Minister Thongam Bishwajit Singh in a thugenna a chun, ethno-medicinal treatment kiti chu hun sawtpi a pat traditional dan ah nei hita hin a gen a, khawvel pumpi medicinal plant species 12,000 um lak ah North-East ah 430 species um, Manipur ah 108 species um ah kigen hin a gen hi. Dr. H.B. Singh, Senior Scientist, Ministry of Science & Technology in le Prime Minister’s Make in India Campaign nuai ah local resources leh manpower matthiam pawimaw a hidan zia hun matna a chun a gen hi. Hun matna chu Deputy Commissioner Kangpokpi T. Ranjit Singh leh Haokholet Kipgen, President FEEDS te’n le uap in thugenna a nei ui.

Minister Nemcha Kipgen in first ‘Consolidated Annual Report – 2012-16’ hawng

Imphal, Aug. 19*(Nisin Thuhiltu)* : Social Welfare and Cooperation Minister Nemcha Kipgen in tuni’n ama office chamber, New Secretariat, Imphal in first ‘Consolidated Annual Report – 2012-16’ of Manipur Commission for Protection of Child Rights (MCPCR) hawnna a nei a, ama’n a thugenna a chun, naupang te lul dan gen in, naupang zosia venbit ding chu fundamental rights hin a gen hi. Manipur Commission chu mipi te’n kithuapi leh panlakpi ding ah mipi te chialna bawl in, Chairperson leh commission member te chu naupang te khenchuam neilo ah a bittheina ding pen ua panla chiat ding in chialna a bawl bawk hi. Chairperson (MCPCR), S. Saratkumar Sharma in zia hun matna a chun, Commission in state sung ah children welfare a ding ah panlakna chuam chuam te genlatna a nei hi.
Dr. K. Sobita Devi, Chairperson, Manipur State Commission for Women leh MCPCR official hunkhawp in le hun matna a uap ui.

One-day food festival “ Gusto de ICM” mang

Imphal, Aug. 19 *(Nisin Thuhiltu)* : Institute of Co-operative Management, Lamphel saina’ ICM campus ah tuni’n one-day food festival “ Gusto de ICM” a um hi. ICM Director Dr.N. Ranjana Devi in festival hawnna a nei a, trainee officers leh ICM student te’n nek thei chi chuam chuam -momo, pork sausage, chicken samosa, singju, kelichana,tharoi thongba, kakching bora, egg roll, mimi chicken bite, French fries , chicken kabab, yerum bora leh paknam ti te siam in nek khawmna a nei ui.