UPF/KNO tawh Govt in SoO suksaube; kihona sutzawm pai hiding

Imphal, Aug. 9 *(NISIN THUHILTU)* : Ashoka Hotel, New Delhi ah tuni’n third round, Indo-Kuki Political Talks a um a, zia hun a chun, United People’s Front (UPF) leh Kuki National Organization (KNO) leader te’n Government of Manipur leh Government of India palai te tawh demand chuam chuam um te genkhawmna nei in Suspension of Operations (SoO), June 8, 2017 ah beita chu August 9, 2017 a pat August 31, 2018 tiang ding in a susau (extend) ui. Dakkal 3 sung tavang kihona chu Satyendra Garg, Joint Secretary, NE in ama pui a, Government of India in kihona mapuitu ding ah a guat Interlocutor Mr Dineshwar Sharma, IPS, retired former Director of Intelligence Bureau (IB) official tak ah puandawna a nei hi. Zia ah kihona hun chu Government palai hina tawh Dr. J. Suresh Babu, Principal Secretary (Home); Dineshwar Sharma, Interlocutor; Pramod Asthana, ADGP, Intelligence (Law & Order), Manipur; Col. Amit Tiwari, DGMI and Dr. Baljit, Ministry of Home Affairs (IB) te’n a uap ua, United People’s Front (UPF) palai 10 te Spokesperson, Aaron Kipgen in amapui a, Kuki National Organization (KNO) palai 9 te Negotiator Seilen Haokip in amapui hi. Interlocutor ding ah guatthak ah um Dineshwar Sharma khut ah political dialogue piakdawna neizaw ah Suspension of Operation agreement umsa suksau a hi bak ah issue chuam chuam genkhawm in le a um hi. SoO agreement suksau ah a umna chung ah Aaron Kipgen, Calvin H, L. Sanga Hmar, Romeo Haokip leh David Chongloi te’n UPF sik in suai a kai ua, T.S. Haokip, T. Samuel, David Hangshing, Lalpu Hangshing leh L.M. Dimo Zou te’n KNO thasik in suai a kai a, Satyendra Garg, Joint Secretary (NE), MHA and Dr. J. Suresh Babu, ACS/Home Department, Government of Manipur te’n Governments thasik in suai a kai ui. UPF Spokesperson Aaron Kipgen in phone ah kihona tawh kisai a genna a chun, Joint Secretary (NE), Satyendra Garg in officially tak ah UPF leh KNO Interlocutor guat ah um Dineshwar Sharma puandawna a nei nung ah political issue tawh kisai ah Interlocutor in tunung sawtlo ah Kuki inhabited areas ve-thakna nei ding a hidan taklang hin a gen a, Dr. J. Suresh Babu, Chairman of the Joint Monitoring Group in Manipur Chief Minister chu a kum ah sim Kukis leh SoO groups te political issue sukfel ding leh Manipur ah chamna leh muanna a um kit ding dawi ah panla a hidan tak lang in a gen hi. UPF Spokesperson in a gen zawm zelna a chun UPF leh KNO political demand chu Statehood hizing hizing a hidan gen in, Interlocutor in August thatawp ahiloleh September thabul leh political dialogue hun ding puanna nei ding hin a gen hi. Chuleh, UPF leh KNO palai te’n second round of talks, October 19, 2016 ah Statehood demand tawh kisai ah Government of India a pat dawnhuna a um ding phut maleu Government in Interlocutor thak in thil umdan a etzui ding ah mawpuakna piak ah um hi ah taklang hin a gen hi. A langkhatlam ah Indo-Kuki Political Talks support bawlna’n tuni’n Kangpokpi DHQ ah mipi’n rally a nei ua, Brig. Thomas Ground, Kangpokpi DHQ ah zingkal dak 7:00 a pat civil society organizations chuam chuam a pat mipi chiakhawm te’n We Support Indo-Kuki Political talks”, “We endorse UPF & KNO”, “Expedite Indo-Kuki Political Talks”, Statehood, the long cherished dream of the Kukis”, “Kuki National Assembly’s memorandum to the PM, 1964-Statehood for the Kukis, Haipi Declaration of the Kukis, 2015-Statehood for the Kukis, UPF&KNO today-Statehood for the Kukis”, “Why not Statehood for the Kukis”, etc ti ki zikna placard chawi in Trans Asian Highway No.1 chuan in Kangpokpi Bazar tiang in lamzawtna a nei ui. Chuleh Churachandpur District a pat All tribal Women Union ATWU GHQ, All Tribal Movement of Lamka ATML Headquarter, Civil Organization, Philanthropic Organization chuam chuam te’n support puang kawm in mun khenkhat ah poster leh banner campaign bawlna muthei in a um hi.

P Doungel, IPS, ADGP in CCpur pha

Lamka, Aug. 9 *(NISIN THUHILTU)* : P Doungel, IPS, ADGP (Training) in tuni, August 9, 2017 in Churachandpur Police Station pha’n Women Police-te tawh Criminal-Crime Tracking Network System (CCTNS) tawh kisai genkhawmna a nei ui. Zia hun chu Rakesh Balwal, IPS, SP Churachandpur, Johnny Sharma, MPS, SDPO Churachandpur leh Chinneihlam, SI banah Women Police a pang ui. Criminal-Crime Tracking Network System ahileh National Crime Records Bureau in implement a bawl, Cyber Crime lam thil te etzuina ding ah August 19, 2016 a khah India ah amasapen ding ah Maharashtra ah ki launch a hia, police station zosia link bawl ding, nationwide online tracking system umsak ding leh e-Governance nuai ah policing sukhat ding banah Police Stations 15000 link ding ti a hi.

Public Ground ah nasepna entha

Lamka, Aug. 9 *(NISIN THUHILTU)* : North Eastern Council (NEC) a pat Official khat - Hitesh Chandra Sharma, Regional Level Monitor, for Implementation of NEC Funded Project, NEC, Shillong, Government of India in tuni, August 9, 2017 sunnung in Public Ground, Hiangtam Lamka, Churachandpur District ah Gallery kisiam zinglai dinmun et-thakna a nei hi. Mr Chandra Sharma chu Imphal a pat Par-a, SO, MTDC leh Y. Ramananda Singh, AE, MTDC, Manipur te’n le a zui ua, nasepna tawh kisai a mun mama ah et-thakna nei in, Contractor te’n thil umdan a hil ui. Public Ground kisiam thakna a etthak zaw ah Mr. Hitesh Chandra Sharma in thuthak lakhawm mite kiang ah a genna a chun, nasepna luntun um a hidan a gen a, Tipaimukh Road lampang ah Gallery siamna ding ah DPR piaklut ah um leh a pawimaw dungzui ah etzuipi ding a hidan gen in, Sports Minister tawh le thil umdan genkhawm ding a hidan uh a gen hi. Hitesh Chandra Sharma in Gallery banah Toilet Complex, Water Reservoir leh Fencing kisiam dan te le et-thakna a nei a, NEC Fund ah ziagual nasepna chu um nailo in a gen bawk hi. Public Ground et-thakna a neizaw in District sung ah NEC Fund ah kisiam nasepna chuam chuam te le et-thakna nei in, nitaklam in Imphal a zuan hi.

DC/CCpur in Deworming Day hawng

Lamka, Aug. 9 *(NISIN THUHILTU)* : District Health Society, Churachandpur saina ah tuni’n Vimala Raina Government High School, IB Road ah National Deworming Day Launching program nei in a um a, zia hun chu Shyam Lal Poonia, DC CCpur in Chief Guest hina tawh uap in N Chingkhei Singh, ZEO, CCpur leh L Sorojini Devi, DPO, ICDS, CCpur te’n Guest of Honour, T Kammuanlal Simte, CEO, ADC CCpur in special guest leh Dr. Kimngaihching Simte, Chief Medical Officer (CMO), CCpur in Functional President hina tawh a uap hi. Chief Guest Shyam Lal Poonia, IAS DC CCpur in National Deworming Day hawnna a nei zaw in ama malatna in kuallian te’n school naupang te kiang ah hûtlo, Albendazole nesak na a nei u’i. Chief Guest Shyam Lal Poonia, IAS, DC in a thugenna a chun, gilsung a um hût thana ding ah kum khat in hûtlo nekni, Deworming Day 2 vei hi ah taklang kawm in tukum ah a khatveina ding chu February ah nei hita in a2veina ding chu tuni’ hawn a um hi’n a gen hi. Deworming Day nipi ni, August 10 leh kum khat a pat kum 19 kikal te’n mani school ah nek ngei ngei ding banah school kailo te’n mani umna veng anganwadi centre ah nek ding leh zia ni nekha lo te’n mob up day, August 17 ni leh ne chiat ding in a chial hi. Zenngaihlun, DPM NHM in naupang te kiang ah step 7 mang ah khut silthiang ding dan a hil a, hun matna uap te kiang in thianthona tawh kisai ah panlakna ding in kitiamna a neisak a, school naupang te kihelna ding in volley ball leh football khat gel a piak ban in toilet ah mat ding syntex khat pia ding hi’n a gen hi. Programme mat zaw ah school nuapang te’n school huangsung sukthianna a nei u’i. DC CCpur in Vimala Raina High School ah hun a mat zaw in district sung ah government office te ah staff te zosia chu thianthona tawh kisai ah pan la ding in a kitiam sak hi. Zia lo chun, a hung tung ding August 11 leh khawpi sung sukthianna um kit ding tawh kisai ah tuni sunnung in BRGF Hall, DC Office, Tuibong ah DC in meeting a ko hi. Thutut kimu dungzui in, khawpi sung sukthianna mun te chu Central leh State a pat team khat team khat in a hung tung ding August 12 leh August 13 leh entha ding hi’n a kigen hi.

DC Office ah Sit-in-Protest nei

Lamka, Aug. 9 *(NISIN THUHILTU)* : Joint Action Committee against the Killing of Thangkhanlun (JAC-AKT) malatna in tuni sunma dak 10:00 a pat DC Office, Tuibong huangsung ah Sit-in-Protest nei a hi. Sit-in-Protest a hileh Thangkhanlun Taitom sawisak lupna ah kigawl kha zosia a kintheilam ah matdaw ding leh dân tawh ki tuak ah gawtna piak ding phûtna ah nei a hi. Sit-in-Protest neizaw in Simte Inn, Simveng ah maban panlak ding dan genkhawmna a um a, zia hun a chun JAC-AKT member leh Adviser zosia banah Student leh Philantropic Organization chuam a pat leader hunkhawp te pang in ngaidan genkhawmna a nei u’i. Meeting a chiakhawm palai te’n DC leh SP a pat sep pitin bangma muthei ding a um lo ziak ah state government kiang ah panpina dawt ding, kiphinna haisan phawt ah thiluang umna morgue ah sûnna leh lengkhawpna sunzaw ding ti’n a thupuk ua, a chiata August 2 ni’ DC tungtawn in state government a ding Memorandum piaklut a um le namdet thakna a nei u’i.

Red Cross Road ah le One-Way

Lamka, Aug. 9 *(NISIN THUHILTU)* : Churachandpur Police leh Diesel Auto Association chuam chuam in kinawptuana a nei dungzui un tuni, August 9, 2017 a pat Red Cross Road ah le One-Way Traffic mat pat in a um hi. Zia rule thak dungzui a chu, Tedim Road a pat Red Cross Road ah gari lutto thei himaleh Tipaimukh Road a pat Red Cross Road ah lutsuk theilou ding, Tipaimukh Road a pat Tedim Road mannuam te’n Thangjam Road a chawt uh ngai ding tina a suak hi. IB Road ahileh a ngaina gual ah chiazawm ding a hia, Tedim Road a pat lutto zawm ding a hi. One Way Traffic rule thak kisiam chu et-thak phawt hiding leh lemchang zaw leh thaw veng zaw hiat a hileh chiapi zawm hiding, zia chu a hiloleh sutzawm hilo ding in a kigen hi.

EhSAS (E-Swachhta Abhiyan)
Lamka, Aug. 9 *(NISIN THUHILTU)* : Cyber Crime Police Station (CCPS) in District Administration leh District Police, Churachandpur tawh kithua ah 10.08.2017 (Thursday) ,11:00 a.m. leh DTC Hall, (DC Office, kiangnai ah) "awareness programme on EhSAS (E-Swachhta Abhiyan)" kiti organized bawl ding a hi. Zia hun a chu a kisaikhakpi zosia pangkim chiat ding in Shyam Lal Poonia, IAS, DC/CCpur in chialna leh hi.

Tripartite tawh zathuapna ah ATWU in lampi zui

Lamka, Aug. 9 *(NISIN THUHILTU)* : UPF leh KNO in Government tawh kihona a nei zathuapna leh kipakpi suklatna in All Tribal Women Union (ATWU) General Headquarter, Churachandpur malatna ah tuni’n lampi zuina nei a hi. Zia hun a chun Community Hall, Hiangtam Lamka a pat Tipaimukh Road zuisuk in Tedim Road man in DC Office tiang lampi zuina a nei ban un Shyamlal Poonia, IAS, DC Churachandpur khut in Indian Prime Minister a ding Memorandum a piau a, DC in le tuni mama ah Prime Minister Office thawt ding hi’n a hiatsak hi. Memorandum a chun ATWU in Tripartite Talk nei a um chu zathuap thu puang kawm in memorandum piaklut sa te ah a thil dawt te chu supiting ding in le a dawn hi.

KNO/KNLF chief thaana kigawl mi 1 mat ah um
Lamka Aug. 09 *(NISIN THUHILTU)* : KNO/KNLF (Kuki National Liberation Front) general secretary Tonglianlal Haokip aka Lalmoi thana ah kigawl kha mi khat Ccpur police leh 25 Assam Rifles in zanitak a khan a man dawk ui. Matdaw ah um chu Ngamminlen Haokip aka Diamond Haokip (23) s/o (L) Jangpu Haokip of Ward No. 1, Moreh, Tengnoupal district hi ah hiat a hia, Addl. SP (LO) leh 25 Assam Rifles officer khat mapuina Kinkin area Churachandpur raid a bawl hun ua matdaw ah um hin police thusuak in a gen hi. Chuleh ama a pat 1 (one) 9mm pistol, magazine, 3(three) live rounds, Grenade, detonator leh bike khat le matdaw ah um hin a gen hi. KNO/KNLF general secretary ahileh ugust 02 nitak ah Tuibong ah a chenna bomb mang ah tha ah um a hi.

YPA Unit in damlo vê
Lamka, Aug. 9 *(NISIN THUHILTU)* : Young Paite Association (YPA) Khominthang Unit in zani nitak in V. Munhoih a um Nianghoihkim @ Hoihkim (18) d/o (L) H. Rema vena nei in pauchap piakna le a nei hi. Zia hun a chun, T. Laltuakmawi, President in Pathian muang ding ah chial kawm in damdawi chawkna leh a pawimaw dan zil ah a mat ding ah a chawi panpina sum chu Hoihkim khut ah a pia’i. Hoihkim nuneu, Biakhoih in mipite pauchap piakna zal ah Hoihkim in a natna thuak chu nuam sa chuam mama hi’n a gen a, ni ding ah Pain Relief in le a zawlo himaleh tuhin damdawi nelo a le zan ipmu theita hi’n le a gen hi. Hoihkim a hileh tuni’n T. Paukhanlian, EM, ADC Churachandpur in a gari mang in JNIMS, Imphal ah ki etsak ding in pawsuk a, Imphal ah Minister V. Hangkhanlian inn ah kinga in, a zi Dr. Kimboi puihuaina tawh Dr. Mary Jone in test chuam chuam a bawlpi hi.

Draft Agriculture Product &Livestock Marketing Bill, 2017 takdaw ah um
Imphal, Aug. 9 *(NISIN THUHILTU)* : Manipur Agriculture Department official web portal www.agri.manipur.gov.in ah draft Manipur Agriculture Product leh Livestock Marketing (Promotion & Facilitation) Bill, 2017 takdaw in a um a, state mipi te’n Bill chung ah suggestion leh ngaidan 3rd September 2017 tiang ah email id: This email address is being protected from spambots. You need JavaScript enabled to view it. ah piaklut thei ding a hidan Ph. Rhendra Singh, Director of Agriculture, Manipur in tuni thusua a bawlna a chun a taklang hi.

Kpi CSO te’n Shutdown hun ding Aug. 13 ah chawn gamla
Kangpokpi, Aug. 9 *(NISIN THUHILTU)* : National Sports University (NSU) umna ding thu ah Haraothel Village tu ah L. Tangnuam Village gam, a neitu te hiatpina leh lemsakna bei ah gam kithunei khum a hidan a taklang kawm in Director, Youth Affairs & Sports, Manipur in allotment orders a sua demna bawl zing kawm ah Kangpokpi District ah civil society chuam chuam in kiphinna a nei zing uh tawh kitawn ah August 11, 2017 zingkal ah a pat Kangpokpi District huap ah shutdown chiapi hiding ah Kangpokpi District, civil society organizations in a puan chu state Government lam a pat a phalam ah dawnhuna a mu’u tawh kitawn ah August 13 zawk leh um ding ah a hun chawn in a um hi. Zia ah shutdown chawn ding ah lemsakna chu Kangpokpi DHQ ah tuni nitaklam ah civil society organization te’n meeting hun ah a siam uh a hia, Thangminlen Kipgen, KSO Sadar Hills in demand sukven theina ding ah government lam a pat dawnhuna a um ziak ah shutdown ding ah kipuang chu August 13 zawk ah um ding ah lemsakna um hin a gen a, government in August 12, 2017 nitak lam dak 3:00 leh a kisai khakpi (stakeholders) te tawh kihona um ding ah thutiam a bawl hin le a gen hi.

Chief Minister in Loas ah kikawmtuana hawi pawimaw dan tangko

Imphal, Aug. 9 *(NISIN THUHILTU)* : Vientiane (Lao PDR) ah ASEAN- India Dialogue Partnership, 25th anniversary celebration conference uap ah Manipur Chief Minister N. Biren Singh in Loas ah Minister chuamchuam te a kimupi hun in Manipur leh Laos kal ah kikawmtuana siam hawi ding a nawp thu a gen hi. Manipur Chief Minister N. Biren Singh in Loas ah capital Vientiane ah Prime Minister’s Office Minister Alunkeo, Commerce and Industry Minister Khemmani Pholsena leh Information, Culture & Tourism Minister Bosengkham Vongdara te a chuam chiat ah kimupi in maban panlak khawm ding dan a genpi hi. August 6 ah kipan ASEAN- India Dialogue Partnership, 25th anniversary celebration conference chu zani a khah khak a hi. Chief Minister N. Biren Singh in Loas ah Minister chuam chuam te tawh kihona a nei uh chu lawting mama hin a gen a, culture, tourismleh trade lam ah masawnna a um ding a kinepthu a gen hi. Chief Minister chu Parliamentary Secretary (Tourism) Dr. S. Ranjan, Parliamentary Secretary (Home) L. Susindro, Advisor to CM Rajat Sethi leh Personal Secretary to CM S. Rajen te’n le a zui ua, tuni Imphal zuan kitta hin a kigen hi.