District thak te panna district zosia DIO Office kituptak ah a um ding pawimaw: IPR Minister

Imphal, Aug. 05 *(Nisin Thuhiltu)*: Information and Public Relations Minister Thongam Biswajit Singh in New Secretariat Conference Hall ah tuni’n IPR Department ah official te monthly review meeting a neipi a, department official te man-power, infrastructure leh equipments siam hawi thakna ding ah panla chiat ding in chialna a bawl hi. A kisaipi thuneitu te chu a pawimaw gari chawkna ding ah proposal pelut ding in hiatsakna a bawl a, District kisiam dawk thak te panna District zosia District Information Office kituptak ah a um ding pawimaw hin a gen hi. Department in DIO office um nailona mun ah office hawn a hitheina ding ah panlakna a nei ding pawimaw in le a gen a, a pawimaw leh office buildings luathaw (rented) ah hawn ding hin a gen hi. District Information Office hawn a hitak leh a pawimaw staff ding lak hiding leh kituptak ah office a function theina ding ah panlak hiding a hidan gen in, social media matkhial khak a phatlo dan tawh kisai ah awareness chiapi ding pawimaw a hidan a gen hi.DIO Tamenglong office gam kekneu piak ah a umna tawh kisai in department official te chu land leh plots record kituptak kawi ding ah hiatsakna bawl in, department nuai ah publication section chu a hun tak ah department’s annual calendar leh diary published bawl ding in hiatsakna a bawl hi. Zia meeting chu IPR Commissioner K Radhakumar Singh, Director Meghachandra Kongbam, Deputy Secretary Maibam Kamala, Deputy Secretary Ch.Sachi Devi, APO (P) leh District zosia DIO te’n a uap ui.

India Vice-President thak ding Venkaiah Naidu

New Delhi, Aug. 5 *(Nisin Thuhiltu)*: India Vice President thak ding telna (election) tuni’n a um a, 13th Vice-President of India ding ah Muppavarapu Venkaiah Naidu teltin in a um hi. Tuzing kal lam ah vote khiak ah um, nitak nung ah election result puan ngal a hi. Election result dungzui ah M. Venkaiah Naidu in total votes 760 um lak in vote 516 a mu, a ki tetpi Opposition candidate Gopalkrishna Gandhi in vote 244 bep a mui. Tuchung ah Vice President elections ah vote kikhia chu highest polling percentage 98.12% hi ah tepte in a um a, vote khelo MP 14 a um hi. Hiatthei khat chu kum 2007 ah vice presidential election ah incumbent Hamid Ansari teltin a hi hun a khan, Hamid Ansari in vote 456, Najma Heptullah in 222 votes leh Rashid Masood in vote 75 a mu, kum 2012 polls a khan Mr Ansari in vote 490 leh NDA nominee Jaswant Singh in vote 238 a la mui.

Khawpi sukthianna Mass drive nei

Lamka, Aug. 5 *(Nisin Thuhiltu)* : District Administration mapuina nuai ah tuni’n Village Authority (VA), Philanthropic Organization leh district mipi kitua in khawpi sung ah Cleanliness drive nei in a suthiang u’i. Khawpi sung sukthianna ding ah District Administration in sector 4 - A, B, C leh D ah khen in Sector A (New Bazaar Area a pat Lanva kikal) chu DFO Churachandpur mawpuakna nuai ah kawi a hia, Sector B (Zenhang Lamka, Rengkai Area a pat Sielmat Lei kikal) chu CEO ADC in maw a pua, Sector C (Forest Gate a pat Sielmat Lei kikal) chu SP Churachandpur in mawpua in Sector D (Hiangtam Lamka a pat Pearsonmun kikal) chu DC Churachandpur mawpuakna nuai ah kawi a hi. Sector chuam chuam te chu mun chuam chuam ah kingak khawm in a area chiat ua mass social work a nei ua, zia hun a chun lampi a nîn leh nulla te suthiang in lampi kuakna munte ah lei a sun ban ua hampa a hitthiang u’i. Social work nei hun sung ah nîn lawm te chu ADC Sanitation truck in dawlkhawm in nîn paina mun in a va bawthai. Social work nei hun sung ah dawr kâi te’n dawr khak ah mani dawr mai chiat sukthian ding ti ah thusua bawl himaleh a hun tak ah dawr kikhak mu ding a umlo banah lampi dung ah mezuak um in, lampi ah gari tai vel a tam takluat ziak in nasem te a ding in buai um mama hi’n a kigen a, district in thianthona leh kithumat tuana tasam mama nalai hi’n nasem tu te’n a gen u’i. Cleanliness drive nei hun a chun mi sîng a sim a pang ua, gamsung thiangthona ding ah district mipi’n kituapina hawitak a piak na chung ah Shyam Lal Poonia, IAS, DC CCpur in kipakthu a puang a, gamsung a thianthona leh a nawpna ding ah maban a le mipite’n panla ah mani hitheina chiat ah thiangthona umsak zing ding inle dawtna leh chialna a bawl hi.

DSO in thusua chuam chuam bawl
Lamka, Aug. 5 *(Nisin Thuhiltu)* : District Supply Officer (DSO), Churachandpur in thusua a bawlna a chun, National Food Security Act nuai ah Ration Card zosia Aadhaar tawh kizawp sakna nasep chu DSO Office ah chiatha zing hi’n a taklang a, Ration Card nei thei ding himaleh a nei nailo te a ding ah min khumna leh min diklo zosia sukdik sak thei hi ah taklang kawm in zia na ding a chun office ah application lakthei ding hi’n a gen hi. Thusua dang khat a chun, Henglep A/C sung ah lakthak a um Rationing Agent leh SK Oil Sub-Dealer te kiang in a hung tung ding August 7, 2017 sunma dak 10:30 leh District Training Centre, Tuibong ah TT Haokip, MLA Henglep A/C leh Chairman, Hill Areas Committee (HAC) tawh meeting um ding hi ah puang kawm in zia hun a chun Henglep A/C a pat Rationing Agent leh SK Oil Sub-Dealer te pang kim ding in le a hiatsak hi. M. Ginzasuan, DSO/ CCPur in thusua a bawl dang khat in a taklatna a chun, SK Oil Sub-Dealer te’n Identity Card chawi ah Advice List dungzui in Dealer te kiang ah lathei ding a hiu a, zia tawh kitawn a chun, Singngat A/C leh Henglep A/C ah Sl. No. 30 a pat 46 kikal te’n M/S JHK Agency a pat, Saikot A/C te’n M/S S. Pudaite a pat, Churachandpur A/C te’n M/S ZT & Co. a pat, Henglep A/C ah Sl. No. 1 a pat 39 te’n M/S BB & Co a pat banah Parbung A/C, Thanlon A/C lehHenglep A/C ah Sl. No. 47 a pat 57 kikal te’n Pudaite Traders a pat lathei ding a hiu.

ME News suaklo di
Lamka, Aug. 5 *(Nisin Thuhiltu)* : Manipur Express a Helper-cum-Printer Trainee ah sem zing, N. Nengkhuallian (22) s/o N. Gouthang of Bungmual, Colony Veng chu tuni zing kal ah damlona ziak in mualliam a, zia tawh kitawn a chun sûnna leh zana suklatna in khawvel hinna Manipur Express August 6, 2017 (Sunday) issue suaklo ding hi’n Editor in thusua a bawlna a chun a taklang a, a mualliamna chung ah sûn thu le puang kawm in a nutsia a innsungmite thuakpi hi’n le a taklang hi.

Video Album hawnna leh latna nei

Lamka, Aug. 5 *(Nisin Thuhiltu)* : Laldavid Samte in phamta a nu leh pa hiat zing na ding ah Gospel music video Album a bawl, ‘Honpi Zel In’ kiti chu tuni’n Rayburn Presbyterian Church, New Lamka ah Rev Khen P Tombing, Chief Coordinator, PCI-R in a hawnna leh latna nei a hi. Zia hun a chun, album bawltu Laldavid Samte, Pator Kamchinthang, Local Pastor, Singngat banah gennawp nei khenkhat in thugenna hun a mang u’i. ‘Honpi Zel In’ album ah lâte a hileh Phamta Kamkhogin Samte in a phuak a hia, Felina Chiinhauching in a produced banah Mary Zou, Mr & Mrs Pautheinmoi, Sawmi Hauzel leh Kimneu te’n a co-sponsored uh a hi. Album a chun lâ 11 a um a, zia te ah music chhu Lalsiam Guite leh Siam T Paite te’n a bawl uh a hi banah Lalsiam Guite in Videography leh editing a bawl a hi.

ZRO in pauchap piak ding ah dawn
Lamka, Aug. 5 *(Nisin Thuhiltu)* : Zomi Re-Unification Organization (ZRO) in tuni thusua a bawlna a chun Kochuam puitute, Upa leh mipi te kiang ah pauchapna ah kithuapi ding in a dawn hi. A hung tung ding August 9 leh pawlpi kikhaikhawmna, United People’s Front (UPF) in government tawh kihona, a 3veina ding Tripartite Political Dialogue ah kalsuan ding a hina ah zia hun chu lawting tak ah zaw a hitheina ding ah pauchap piak ding in a dawn hi. Pathian in organization a mapui dan te leh government in kihona ngaikhawk ah zia ding tawh kisai ah interlocutor 1 guat ta a hina ah chung ah kipakthu gen ding in a chial a, dialogue ah pang ding UPF/ KNO leader te a ding ah dawt piak ding in le chialna a bawl hi. Chun, kihona ah kilang leh kilanglo ah pang kha zosia a ding a le pauchap piak ding ah dawn kawm in gamsung ah chamna leh muanna a um theina ding ah Pathian kiang ah dawn ding in le a ngek hi.

NSS in college suthiang
Lamka, Aug. 5 *(Nisin Thuhiltu)*: National Service Scheme (NSS) Rayburn College unit in social work nei in college huangsung sukthianna a nei u’i. Central government in August 1-15 sung Swatchhta Pakhwada Forthnight ah mang in Government office, Private school, college leh institution te sukthian ding ah thupiak a nei tawh kitawn in Rayburn College NSS Unit in le tuni zingkal in amau college huangsung a suk thian uh a hia, zia hun a chun NSS tamtak a pang ui.

Dept chuam chuam in office suthiang
Lamka, Aug. 5 *(Nisin Thuhiltu)*: August 15 leh Independence Day lawpna ding tawh kisai ah District Administration in CCpur district sung ah Government Department zosia’n amau office chiat ah Cleanliness Drive nei ding ti ah a hiatsak tawh kitawn in department chuam chuam in Cleanliness Drive a nei ua, tuni’n le district sung ah government department chuam chuam in amau office huangsung sukthianna a nei ban ua office sung leh pua rawng a nu u’i. Government Department zosia’n amau office chiat ah Cleanliness Drive a nei uh chu a hung tung ding August 10 leh district administration in etthâknei ding a hia, August 15 leh office thiangthopen 3 te kiang ah kipakman piak hi ding a hi.

Damlote kithuapina ding lut zing

Lamka, Aug. 5 *(Nisin Thuhiltu)*: Henglep bial a pat damlona ziak ah District Hospital kitut te emkawl leh nek leh chak buaipi, Kuki Khanglai Lompi (KKL) khut ah tuni’n le mimal leh pawl chuam chuam a pat panpina a lut hi. Bethel International Mission, Rengkai Road a pat Pastor David Ralsun malatna in naupang te’n KKL Complex pha in KKL lawi upate tawh holimna saulo a nei zaw ua District Hospital leh Youth Hostel ah damlote kiang ah muamthum hawm in hun a matpi ui. Kuki Film Development Corporation (KFDC) in le tuni’n damlote a ding ti’n KKL khut ah ann-chang leh allu bag 1 gel banah vawksa a piau hi. Henglep bial a pat damlo etkawl a umte chu tuni tiang in tamtak discharge a hitau a, tu hin damlo 48 leh a umpi te pang in mi 100 val a um nalai ua, khenkhat te chule discharge thei ding dinmun in a um u’i. Damloute etkawlna tawh kisai ah KKL in Unit chuam chuam te kiang ah mawpuakna pia in Unit te’n zingkal-nitak ah nek leh chak ding a bawl piak ban un a pawimaw dan zil ah damlo te a pua vel sek u’i. Zia kawmkal a chun, damlo te panpina ding ti’n Kuki Khanglai Lawmpi (KKL) D Phailien Unit inntekna nuai ah Charity Musical Road Show nei in a um a, Charity Musical Road Show a pang ding te KKL Complex, IB Road ah kingak khawm in KKL GHQ President Kamthang in a thakdawna a nei hi. Zia hun a chun, district sung ah lasathiam - Lalparzo Sanate, Grace Ngaihching, Bliss Lhingboi, Daniel Gangte, B Muan Ngaihte, Muan Hangzo banah lasathiam dang hunkhawp a pang ua, Tedim Road Bethel/Khawmawi a pat kipan in lampi dung mun chuam chuam Tuibong Bazar, Old Bazar, Nehru Marg Junction banah Rengkai ah Musical Show a nei ui. Charity Musical Road nei hun sung ah pawl leh mimal chuam chuam in amau kiphal dan zil in damlo te a ding ah panpina sum a piau hi.

KKP in lampi siampha

Lamka, Aug. 5 *(Nisin Thuhiltu)*: Khristian Khanglai Pawl (KKP), Tuithanak Presbytery in Fund Raise na ding in tuni zingkal in Tangmual tawh Lingsiphai kikal Tedim Road siatna te siampha in gari taivelte a pat kiphal dan dan in sum a dawk u’i. Khanglai Pawl in luiguam a pat suang chawmkhawm in lampi siatna mun in a sung ua, a chung ah Ballu Single a sungkit ui. Tangmual tawh Lingsiphai kikal lampi a hileh se mama in gari ah tai lumlet te, a diak ah gari neu mang te a ding ah buai um mama in chûk hun ah buanthuak leh khâl hun ah leivui a a um sek hi.

Morgue ah lengkhawpna um zing
Lamka, Aug. 5 *(Nisin Thuhiltu)*: Sawisak lup ah a la um, Thangkhanlun Taitom (30) s/o T Pumhang of Sahei Road, Vengnuam, New Lamka in India dân tawh kituak ah thutanna dik a chang ding dawina leh tualthana ah kigawl te matdaw ding phutna leh dawtna a nei uh a lawtin machan morgue a pat a luang lakdaw hilo ding ti ah JAC Against Killing of T. Thangkhanlun (JAC AKT) in a puan tawh kitawn in morgue ah sûnna in lengkhawpna a um zing a, a chiata July 28 a pat Simte Youth Organization, General Headquarter mapuina nuai ah lengkhawpna chu nei a hi zing hi.

Myanmar mi khat Kakching ah kiman
Imphal, Aug 5 *(Nisin Thuhiltu)*: Passport leh gamdang ah lut theina lekha neilo ti a ngawna bawl in tuni’n Manipur Police te’n Kakching ah Myanmar mi khat ala man ui. Mat ah um Myanmar mi chu Mohammad Abdul Hussain ahi ti’n a kigen a, Kakching taw kinai Pallel check post ah zani tak ah kiman ahi dan police thusua chun a gen hi. Mat ah um pa puak lai Myanmarese dangka India sum ah Rs 47,000 le a man khawm ui.

Manipur CM in Vientiane khawpi Lao PDR zuan

Imphal, Aug. 5 *(Nisin Thuhiltu)*: Vientiane, capital Lao PDR ah 25th Anniversary of ASEAN-India Dialogue Relations Celebration uap ding in Manipur Chief Minister N. Biren Singh in tuni’n Imphal a nusia hi. 25th Anniversary of ASEAN-India Dialogue Relations Celebration chu August 7, 2017 leh Muong Thani Hotel, Lao PDR ah um ding a hia, Chief Minister in Special Guest hina tawh hun matna uap ding leh keynote address bawl ding a hi. Advisor to CM Rajat Sethi in le Chief Minister chu a zui hi. Zia event chu National Chamber of Commerce and Industry (LNCCI) of Lao PDR in support bawlna nuai ah ASEAN India Business Council (AIBC), Lao PDR Chapter leh Embassy of Republic of India, Lao PDR in joint ah organized a bawl a hi.

SSC CGL 2016 final result puan hita
New Delhi, Aug. 05 *(Nisin Thuhiltu)*: Staff Selection Commission (SSC) nuai ah Combined Graduate Level Examination, 2016, final result puan in a um hi. Zia ah lawtinna nei te chu Assistant Audit Officer, Junior Statistical Officer leh Posts dang dang ah sem ding a hiu. Result a hileh official website ssc.nic.in ah et thei ding a hi.

Education Minister in ACI Freshers’ Meet uap
Senapati, Aug. 05 *(Nisin Thuhiltu)*: Manipur Education, Labour & Employment Minister Thokchom Radeshyam Singh leh Minister of PHED, Printing & Stationery in khuallian hina tawh Asufii Christian Institutes (ACI), 7th Freshers’ Meet matna a uap hi. ACI Chapal Hall, Mao Gate ah 7th Freshers’ Meet chu mat a hia, Kholi, Board Member, Chairman, Asufii Christian Institutes (ACI), SDPO, Mao Gate Semi Ramror te’n le hun matna a uap ui. Asufii Christian Institutes (ACI) founder te lak ah khat Minister Dikho in muakna thucha genna a nei a, Minister Radheshyam hinkhua a pat khangthak te’n kipiakzawna, gin umna ti te zildaw thei a hidan gen in, student te tilkhona a nei hi. Minister Radeshyam in a thugenna a chun, freshers’ meet uap tu te pakcha kawm in, ACI chu holy temple pawimaw mama khat a hidan gen in, class chuam chuam te thiamzilna mun a hidan a gen a, Hindus te temple a chia, Christian te Biak-inn ah chia, Muslim te masjid ah chia sek maleu student class, caste, religion chuam chuam te hinna a bitna ding, chamna leh muanna a um theina ding banah society a khanto theina ding ah mun khat ah zilkhawm a hidan uh a gen hi. Chun, maban ah student te panlak ding dan tawh kisai in le ziltilna thu a gen a, Minister Dikho le ACI founder leh Board members khat ah a panna chung ah pakcha mama a hidan a gen hi. ACI Freshers’s Meet hun sung a chun, laa, choreography, Board member te a pat thugenna etc l a um hi. ACI ahileh January 4, 2017 a khah Manipur University tawh affiliate kibawl a hia, UGC in section 2(F) and 12(B) of the UGC Act 1956 tawh kituak ah July 11, 2017 a khah recognition piak a hi.

Medicinal Plant te Life Saving Drugs a hi: Health Minister

Imphal, Aug. 5 *(Nisin Thuhiltu)*: Directorate of Ayush, Manipur nuai ah Manipur State Medicinal Plant Board saina’ tuni’n Old Secretariat Building, Minister Office Chamber ah Prize Distribution Ceremony a um a, zia hun a chun, Manipur Health and Family Welfare Minister L. Jayantakumar Singh in Prize piakdawna a nei hi. A ma’n a thugenna a chun, ni dang ah medicinal plants te tuhun ah le pawimaw zing nalai a hidan gen in Medicinal Plants te chu Life Saving Drugs a hi ti’n a gen hi. Prize hawp ah um te chu tunaicha Manipur State Medicinal Plant Board in Drawing, Speech, Recitation & Essay Writing competition a saina’ ah a chungchuang diak te kiang ah piak a hia, Cash Prize leh Citations piak a hiu. Zia hun matna chu Dr A. Guneshwor Sharma, Director AYUSH leh Rk. Romesh Singh, Secretary Foundation of Development for Society, Keisamthong Top Leirak, Imphal te’n le a uap ui.

Manipur leipek humbitna ding ah community zosia pankhawm ngai: AMUCO

Imphal, Aug. 5 *(Nisin Thuhiltu)*: All Manipur United Clubs Organisation (AMUCO) in Manipur leipek humbitna ding ah ah chêng namtin te pankhawm pawimaw hi’n a gen hi. Zani, Manipur Dramatic Union Hall ah 20th Manipur Integrity Day matna hun a chun, AMUCO President, Ph. Devan in a chiata 1997 kum ah Govt of India leh NSCN (IM) in ceasefire agreement suai a kai dawilo suklatna ah mipi’n kiphinna a la nei chu genlang kawm in India nuai ah Manipur a um a pat a mipite’n haksatna tuak pan uh hi’n a la gen hi. AFSPA leh centre's Divide & Rule Policy nuai ah phaicham leh thingtangmite kal ah kihiatthiamlona piang hi’n le a ngaw a, state ah resource te lakdaw theina ding ah government in Multi-national company te tawh kinawptuana suai kai uh hi’n le a gen hi. Chun, Manipur leipek humbitna ding ah Meitei, Naga, Kuki leh Pangal te kilungtuak tak ah pankhawm ngai hi’n le a gen hi.

Aug 1 a pat World Breast Feeding Week

Imphal, Aug. 5 *(Nisin Thuhiltu)*: August 1 a pat kipan World Breast Feeding week tawh kizawi tawn in tuni’n Keishamthong Kabui Village Community Hall ah Breast Feeding tawh kisai ah seminar nei in a um hi. Ministry of Women and Child development in Department of Social Welfare tawh kithua in Manipur sung mun chuam chuam ah Breast Feeding Week matna chu ‘Sustaining Breast Feeding Together World Breast Feeding week’ ti thupi tawh a sai u’i. Tuni ah hun matna a chun, L.S Wallang in nausen a ding ah nawitui phatchuam dan genna a nei hi.

CM in Vistarak Campaign hawnna nei

Imphal, Aug. 5 *(Nisin Thuhiltu)*: Mipi te tawh direct contact um theina tup ziak ah patdaw ah um, Vistarak campaign chu tuni’n Chief Minister Nongthombam Biren in Nityaipat Chuthek ah party office ah hawnna a nei a, Vistarak volunteer 30 chuanna gari 20 te chu le flagged off a bawl hi. Zia hun ah chief minister in a genna a chun, volunteer te chun assembly constituency zosia ah polling booth 2,794 te chu vê tha ding leh Pandit Deendayal Upadhay thuhil te puangzâk ding uh hi’n a gen a, Narendra Modi Government in kum 3 sung leh state Government in ni 100 sung ah a sepdaw te tangkopi ding uh hi’n le a gen hi. Campaign a hileh Pandit Deendayal Upadhyay pianchampha kum 100 tin hiat zingna ding ah sai a hia, ama a hileh Rashtriya Swayamsevak Sang (RSS) leader pawimaw tak khat a la hi. Campaign hawnna hun chu Works Minister, Thongam Bishwajit leh BJP leader hunkhawp te’n le a uap u’i.

Hueiyen Lanpao news in Legal Notice mu
Imphal, Aug.5 *(Nisin Thuhiltu)*: Imphal based daily newspaper Hueiyen Lanpao, Manipuri Edition ah “Raksha Bandhan Pangthokkadouri” matna ding tawh kisai diklo tak ah sua ah a um ziak in Government of Manipur in tuni’n Legal-cum-Demand notice a sua a, zia dungzui a chu Hueiyen Lanpao in hilchianna a piak ding ti a hi.

Food supplement packet sung ah khaulang kimu
Imphal, Aug.5 *(Nisin Thuhiltu)* : Social Welfare Director, Jacintha Lazarus leh official te’n tuni’n Ghari, Imphal ah food supplement packet khenkhat ah kaulang (cockroaches) um ah gen a hina chung in spot enquiry bawlna a nei ua, zia hun a chun, official team in supplementary food packets te kituptak ah etchilna nei in, beneficiary te le a kiholimpi ui. Social Welfare Director, Jacintha Lazarus in thuthak lakhawm mite kiang ah thil umdan a genna a chun, Imphal West Food Safety Department in test a bawl ding ah samples thawt ah um hin a gen a, Ghari area ah food supplement packet hawpna le chawlsak ah um hin a gen hi. Chuleh, Social Welfare Minister Nemcha Kipgen in le ziagual thil report um chu ngaikhawk mama a hidan a gen hi. Press meet chu Food Safety Officer Dinesh Singh, AISF student body leh a kisaipi official te’n le a uap ui.