T. Thangkhanlun vuaklupna tawh kisai ah police in mi 4 man

Lamka, July 28 *(Nisin Thuhiltu)* : TP Electrical Store, Teddim Road, Central Lamka a sum gukna thu tawh kisai ah thina tiang a tun ziak in district police in tuni’n a kigawl kha mi 4 a man hi. Thutut kimu dungzui in, zani masa July 26, 2017 sunnung dak 1:30 ah TP Electrical Store a semlui T. Thangkhanlun (30) s/o T Pumhang of Sahei Road, Vengnuam, New Lamka in dawr sawngchung ah sum kawina a pat sum hunkhawp a la gudawk a, sum guklai tak chu dawr sung a kitua CCTV in a lâk khak ziak ah a hina hiatdaw hipai in TP Elecotrical Store neitu’n a sungkuante a hiatsak ngal hi. Thiltung tawh kisai ah T Thangkhanlun U, T Pauminlian in a genna a chun, zani sun dak 12:04 ah number khat a pat phone call dawng in, anau in TP Electrical Store a pat sumbawm tawh sum a lakh ah sim gudawk a hidan hiatsak a hi banah gucha pa hawldawk ding leh a mu loleh innsung vai ah kiho ding a hi dan le hiatsak a um hi’n a gen hi. Sum tamtak gukdaw a hi chu pawna mama kawm in a zawlpa tawh a naupa a va hawl ua, aginchatna mun khat ua a la um phat ah TP Electrical Store nei tute hil in zia taka chun anau T Thangkhanlun chu TP Electrical Store te khut ah pedawk hi’n le a gen hi. Aban a genna a chun, anau pa a piakdaw nung, sunnung dak 2:11 ah phone bawl in anaupa tawh kisai thuchian kan na a pat sum mang banghem zat mu kit a um ta a hi dan hil uh hi’n a gen a, zia nung dak 8:55 ah phone call dawng in a naupa piadawk ding uh a hi dan a hil hun ua inn ah hung thak mai ding ah hiatsakna bawl himaleh a ginchatlo lam tak in a naupa chu inn a thak ua hopi thei talo hi’n a gen hi. Kintak ah hospital puaktun himaleh doctor in a thisa’ puaktung a um hi’n a la gen piak a, zia a pat chu Police Station ah FIR ziklut hi’n le a gen hi. T Pauminlun in a gen be na a chun, a nuapa T. Thangkhanlun chu phalo leh gilo a hi chu pawm in hiatpi maleh a thu genveng thaw ding ah anaupa a piakdaw chu ama ginchat phaklo in hopi leh etkawl theilo ding ah inn a tut uh chu pawna mama in zia gual ah thagum sua ah kitha kimatna dawilo a hi dan taklang kawm ah zia gual chu a tung kit taklo na ding ah kusamsap in panla ding in le a chial hi. T Thangkhanlun vuaklupna tawh kisai ah tuni’n police in TP Electrical Store nei tu Liantungnung @ Chungnou (60) s/o (L) Khaivum of Beulahlane, Central Lamka leh a chapa Vumthansang @ Sangboi (27) banah Lalpiaklian Munlou (34) s/o (L) Henthang of Beulahlane Central Lamka leh T Ginkhanlian @ Liana Thomte (48) s/o T Pauthuam of Simveng te a man a, tualtha chung ah ngaw pipen a um, Romeo a hileh kisel mang ziak in tu chan ah matdaw a hi nai puai. Thiltung tawh kisai ah Simte Inn, Shyam Lal Poonia, IAS, DC/ CCpur, Rakesh Balwal IPS, SP CCpur leh pawl chuam chuam ah palaite’n kihona nei in DC in government a pat kithuapina thei chan piak hi ding in a tiam hi. SP in a genna a chun, Romeo matna ding ah police in nasatak ah pan la in Army tawh kithua ah mun chuam chuam hawl hi zing hi’n a gen a, zia nung ah mudaw a hilo leh a taimang (absconding) ah puan hi ding leh mun chuam chuam banah newspaper chuam chuam ah a lim suadaw hi ding ti’n le a gen hi.

State Assembly Session ah demands for Grant pali passed ah um kit

Imphal, July 28 *(Nisin Thuhiltu)* : A chiatha zing 11th Manipur State Legislative Assembly Session ah tuni’n House in demands for Grant pali a ding in Rs.14,039,299,000 a passed a hi. Demands for Grant 4 te chu – Demand No 4- Land Revenue, Stamps & Registration & District Administration (Rs. 101,69,19,000); Demand No 5- Finance Department (Rs. 12,75,92,38,000); Demand No 28-State Excise (Rs. 18,84,98,000) leh Demand No. 29- Sales Tax, other taxes/duties on Commodities & Services (Rs.7,46,44,000) a hi. Demands for Grant 4 te chungchang genkhawm hun ah opposition leader O. Ibobi Singh; MLAs Th. Lokeshwar Singh; K. Meghachandra Singh; Kh. Joykishan Sigh leh R.K. Imo Singh te’n a thil mudan uh leh a ngaidan uh taklatna a nei ua, MLA O Lukhoi Singh;Y. Surchandra leh Dr. Y Radheshyam te’n le ngaidan genna a nei ui. Zia nung a chun, a kisaipi Minister Y. Joykumar Singh leh Karam Shyam in thil umdan hilchianna a nei ua, zia nung a chu Rs. 14,039,299,000 passed a hi. Chun, Deputy Chief Minister, in-charge finance,Y. Joykumar Singh in "The Manipur Fiscal Responsibility & Budget Management (Amendment) Bill 2017; Education Minister Th. Radheshyam Singh in "The Manipur Private School (Registration & Regulation) Bill, 2017 leh "The Manipur Coaching Institute (Control and Regulation) Bill, 2017" luidawna a nei ua, passed in le a um ngal hi.Tuni Session khak ding kuan ah MLA Kh. Joykishan Singh in House ah private member resolution luidawna a nei a, House in Government of India chu Manipur ah Armed Forces Special Powers Act, 1958 ladawk ding ah hiatsak ding in lemsakna a nei hi.

Govt in state sung ah indigenous mite vengbit ding: Chief Minister
Imphal, July 28 *(Nisin Thuhiltu)* : 11th Manipur State Legislative Assembly Session ah Opposition MLA R.K. Imo Singh in illegal migrants te etzuina ding ah plan/policy chiapi a nei em ti ah dawtna a siam, house leader Chief Minister N. Biren Singh in a dawnhuna a chun, state sung ah indigenous mite bitna ding ah state government in kituptak ah panlakna nei zing ding a hidan gen in ILPS (Inner Line Permit System) dawi ah kiphinna nei student te chu kiphinna chawlsan ding leh talk nei ding in chialna a bawl a, Churachandpur ah Check Post hawn hipaita ding a hidan gen in, Imphal Airport, Mao leh Jiribam ah January 5, 2017 a pat a khah Foreigners’ Check Post function panta hin a gen hi. Gam kawmtua lumlet foreigner te etzuina ding ah kihawng Moreh ah Foreigners’ Check Post chu Immigration Check Post ah November, 2014 a khah a min kisang a hidan le taklang in illegal migrant etzuina ding ah vigilance sukhat ding pawimaw in a gen hi. Chuleh, JIribam MLA in Jiribam ah Immigration gates hawn ding ah proposal pelut a hidan taklatna nei in, Myanmar border, Gopijang Village, Chandel district ah border fencing zawthian hinailo in a gen hi. Opposition MLA K. Meghachandra Singh in tumasang ah Bill 3 passed ah um te dinmun dawtna a siam N. Biren Singh in a dawnhuna a chun, passed ah um Bill 3 te lak ah “The Protection of Manipur People Bill No. 16 of 2015” chu President of India in withheld a bawl, “The Manipur Land Revenue and Land Reforms (Seventh Ammendment Bill No. 17 of 2015)” leh“The Manipur Shops and Establishment (Second Ammendment Bill No. 18 of 2015)” te chu Central Government khut ah pending hizing nalai in a gen a, hills leh valley areas ah a sukkhak ding stakeholder te thuhiat ah Bill thak luidaw ah um ding a hidan le a gen hi. Opposition MLA D. Korunthang in Integrated Check Post (ICP) March tha ah hawn ding ah guanggalna a la um chu banggual dinmun ah um a hi tae m ti ah dawtna a siam, Chief Minister in a dawnhuna a chun nasepna 75% zaw hita hin a gen a, bandh, blockade um sek ziak, landslides leh atmosphere hawilo ziak ah nasepna chanchuum hin a gen hi. Health Insurance Policy tawh kisai ah dawtna Health Minister L. Jayentakumar Singh in a hilchianna a chun, State government tu leh tu BPL family te ding ah Health Insurance Policy neilo a hidan gen in, Tamil Nadu, Mizoram leh Uttrakhand ah health insurance policy chiapi ah a umdan models, health department in study bawl zing nalai in a gen hi. Opposition MLA R.K. Imo in “Pollution Under Control” (PUC) certificates tawh kisai ah dawtna a siam Transport portfolio le tuk Chief Minister in a dawnhuna a chun, DTO/IE (ISBT, Duelaland) leh DTO/IW (erstwhile MST complex, Moirangkhom) te chu transport department a ding ah centre pani a hidan gen in, petrol pump te ah test centres umsak leh umsaklo ding chung chang ah ngaidan leh dawidan lakkhawm hiding iin a gen a, pollution dodalna ding ah dealer 5 te e-rickshaw supply bawl thei ding ah phalna (permission) piak ah um hin a gen hi. Zero Hour ah BJP MLA TT Haokip in House chu Henglep ah medical facility leh doctors taksapna liantak um in a hiatsak hi.

MHJU in Executive meeting nei
Lamka, July 28 *(Nisin Thuhiltu)* : Manipur Hill Journalists’ Union (MHJU) Executive member te’n tuni 28, July 2017, sun dak 12:00 in Manipur Press Club, Imphal ah meeting a nei ua, zia hun a chun, MHJU membership fee, Annual Audit, MHJU Foundation Day 2017 tawh kisai genkhawmna a nei ui. MHJU membership fee penailo te’n August 17, 2017 tiang ah piaklut thei ding in lemsakna a nei ua, Hill area ah Journalist um te tawh kithuhiat ah August 17, 2017 leh “Special Meeting” nei ding in le lemsakna a nei ui. Chun, MHJU Foundation Day –cum-General Election 2017 chu Tamenglong District headquarter a nei ding in lemsakna a nei ua, September 6 leh election um ding, September 7, 2017 leh MHJU Foundation Day matzawm ding in le lemsakna a nei bawk ui.

State Cabinet in Dhanamanjuri University Bill, 2017 luidaw ding ah lemsa

Imphal, July 28 *(Nisin Thuhiltu)* : State Cabinet in tuni’n a chiatha zing State Assembly session ah Dhanamanjuri University Bill, 2017 luidaw ding in lemsakna a nei hi. Zia lemsakna chu Chief Minister’s Secretariat ah Chief Minister N. Biren Singh chairman hina nuai ah Cabinet meeting in a siam a hi. Dhanamanjuri University Bill, 2017 dungzui a chu - Cluster University nuai ah institution panga (5) Dhanamanjuri College of Science, Dhanamanjuri College of Arts, Dhanamanjuri College of Commerce, LMS Law College leh GP Women’s College te umsak ding ti a hi. Zia ah proposal chu Project Approval Board (PAB) of Rashtriya Uchchatar Shiksha Abhiyan (RUSA) kiang ah May 13, 2013 a khah tut ah um hitaleh 2014 ah approved hita a hi. Chun, tu ah a umsa gam, building, infrastructure etc zosia chu Dhanamanjuri University khut ah piakdaw hiding a hi. Dhanamanjuri University Bill, 2016 chu Cabinet in August 26, 2016 ah approved a bawlsa le hita a hia, draft Bill ahileh September 2, 2016 ah luidaw ah um leh September 5, 2016 ah Manipur Legislative Assembly in a passed a hi. A langkhatlam ah Dhanamanjuri University Bill, 2016 chu approved leh passed ah um himaleh sukdik ding khenkhat a um ziak ah Governor in April 4, 2017 a khah lemsakpina pelo ah a tuktan a hi. Zia chu tawh kitawn ah a thak ah Bill luidaw ding ah lemsakna um a hi.

MU in admission form piaklut hun susau
Imphal, July 28 *(Nisin Thuhiltu)*: Manipur University ah registrar i/c Prof. M. Shyamkesho Singh in thusua a bawlna a chun, session 2017-18 ah PG Courses chuam chuamm (1st Semester) zilna ding ah admission form piaklutna ding ah last date chu August 5, 2017 tiang ah suksau ah hin a gen hi.

Union Minister in NH dinmun entha; CM Biren kimupi

Imphal, July 28 *(Nisin Thuhiltu)* : Union Minister of State for Road Transport, Highways and Shipping, Pon. Radhakrishnan in tuni’n PWD leh National Highways and Infrastructure Development Corporation Limited (NHIDCL) official te tawh Imphal- Mao lampi (National Highways) dinmun etthakna a nei a, 29th July 2017 ah National Highways (Imphal-Jiribam) dinmun entha ding a hi. Nitamlam in Manipur Chief Minister Nongthombam Biren Singh, a office chamber in a kimupi a, zia hun a chun state cabinet minister chuam chuam te tawh issue chuam chuam genkhawmna a nei ui. A langkhatlam ah Classic Grande, Chingmeirong, Imphal ah 29th July, 2017, 12:15 p m leh Union Minister Pon. Radhakrishnan in Press Conference nei ding a hi.

Science & Arts Exhibition hawng

Lamka, July 28 *(Nisin Thuhiltu)* : Don Bosco Higher Secondary School, Salem Veng ah tuni’n Science & Arts Exhibition hawnna a um a, zia hun chu Hausuanthang, EM, ADC Churachandpur in Chief Guest leh T. Goukhomang, Former ZEO Churachandpur in Guest of Honor hina tawh a uap gel u’i. Chief Guest Hausuanthang in Science & Arts Exhibition hawnna a nei hun ah a thugenna a chun, Don Bosco School, Churachandpur chu a khan letna leh kum 5 sung Boarding ah a la um a hi na ah mikhual kisalo a hi dan a gen a, 1981 kum a pawl X a zaw chan zia school a chu kai hi ah genlang kawm in nasatak ah school a khanto a mu chun kipaksak mama a hi dan a puang a, Principal leh a staff te pakchat um a sak thu le a gen hi. Guest of Honor Goukhomang in student lak ah zia gual Extra Curricular activity te nei zel pawimaw a sak thu puangdawk kawm in zia gual hun a chun student te le a tam thei pen pang sek ding hi’n a gen a, lawting tak ah Science & Arts Exhibition zaw thei a hi ding dawisak thu le a lân hi. Hun matna a chun Student te a pat Drill suklatna le a um a, Guest te’n Exhibition te etthâkna a nei ui.

Social Worker 1 in hospital ah damlo vena nei
Lamka, July 28 *(Nisin Thuhiltu)* : Henglep bial ah khua pathum a pat damlo, District Hospital a um te tuni’n Akhup Kom kiti social worker khat in panpina a piai. Naupang te pang ah damlo 41 zani Hospital tut a um te chu tuni’n Observation room ah Akhup Kom, Social Workers of Lower Keirap, Henglep Sub Division in vena nei in, amau a ding ah hithei um sun ti’n damlo mi 41 te kiang ah horlicks bûk khat chiat leh a dawnna ding no khat chiat a pia’i. Zani damlo ziak ah hospital puaktun a um te tilo in a dang 20 tuam tuhin Henglep ah damlo in a um nalai ua, Bialtu MLA TT Haokip, Chairman, HAC in zani hospital a phak hun ah hospital puaktun hinailo damlo mi 20 tuam um te puakna ding ngaitua hi ding ti ah a gen tawh kitawn in zani ma in damlo paw ding ah shaktiman khat in Henglep zuan ngal in Henglep a pat kipan dawk kit nailo hi’n a kigen hi.

OC, TCP in traffic tawh kisai ah Press Briefing bawl

Lamka, July 28 *(Nisin Thuhiltu)* : Traffic Control Police (TCP), Churachandpur ah OC thak, Liankhansang, SI in tuni TCP Control Room, Police Station ah Diesel Auto tawh kisai press/media briefing a bawl na a chun, Churachandpur ah Traffic kitiaktak himaleh mipi te’n mangthiam ah midangte ettawn hi ding dawi um a sak thu a puang a, a chiata July 20, 2017 ah thupukna dungzui in khawpi sung kawmtua ah tai, Diesel Auto line chuam chuam te’n changlam pang ah kawt kak bing ding leh Passenger kuama kumsaklo ding; a veilam pang ua a tainau Line Number takdaw ding banah Diesel Auto Association line chuam chuam a tai te’n Association member te min, auto number, phone number ti te OC, TCP, Churachandpur kiang ah a piaklut ding kiti chu huntiam bei pai ta ding a hi tawh kitawn in July thasung ngei ah sufel ding ah dawtna bawl kawm in August tha a pat Drive chuam chuam pat hiding in a gen hi. Churachandpur chu Manipur a ding ah 2nd Town himaleh Traffic dinmun in zillo hi’n a gen a, gari neu a tai tapo in helmet a khuk ding banah gari hek ding ta phawt in a lo theilo ah Driving License paw chiat ding in le a dawn hi.

Mun chuam chuam ah thokâng lo kâp

Lamka, July 28 *(Nisin Thuhiltu)* : Churachandpur District sung ah natna hî a lêng vengvung tawh kitawn in tuni’n Malaria Department in mun chuam chuam ah thokâng lo kapna a nei hi. Tulai ah thokâng a pat kikâi sawn thei natna lau um mama - Dengue leh JE kithang mama in Malaria Department in tu masang a pat khan pan nasatak ah la in, mun chuam chuam ah thokâng lo a kâp nung in tuni sunnung in Chief Medical Officer (CMO) office, Malaria office banah CMO office huangsung, GNM Training School, morgue ti te panna’n District Hospital huangsung ah kâp a hi ban in DC Quarter, Lailam Veng leh Headquarter Veng ah le kâp a hi.

ZRO/ZRA in hilchetna bawl
Lamka, July 28 *(Nisin Thuhiltu)* : T. Thangkhanlun (30) s/o T Pumhang of Sahei Road, Vengnuam, New Lamka vuaklup chung chang ah Ministry of Information & Publicity, ZRO Headquarter in thusua a bawlna a chun thiltung tawh kisai ah ZRO/ZRA kigawl khalo a hi dan puangdawk kawm in thiltung chu lamdangsa leh lungphawn um sa a hi dan a taklang hi. Zia tawh kisai ah Zomi Re-unification Organization/ Zomi Revolutionary Army (ZRO/ZRA) in kigawl khakna neilo leh gukchak thilchin tawh kisai thubuai tut a umlo a hi dan a taklang hi. ZRO/ZRA in tripartite political dialogue a buaipi laitak a hina ah zia gual buaina te sai leh kigawl manlo hi’n le a gen hi. Chun, buaina tawh kisai ah pawl 2 te kal ah pu-pa chawndan tawh kituak ah kiholemna a um ding dawisak thu puang kawm in kuamasap pilvang kawm ah buaina thil a tunglo theina ding ngaitua ah kilemna a um theina ding ah kithuapina pia ding in ZRO/ZRA kimansa a um a hi dan le a taklang hi.

Kawnggâk tawh student sawisa
Loklaiphai, July 28 *(Nisin Thuhiltu)* : Rayburn College ah Class XI, Arts (CBSE) simlai, Tinghoikim @ Boinu, d/o Lamneimang of Loklaiphai chu College ah teacher khat in kawnggâk mang ah sawisa hi’n a kigen hi. Thutut kimu dungzui in, a chiata tu hapta Nilaini a khan test a la um maleh Boinu in damlona ziak ah ziani a chun college kai zo lo in test a la pe ta pua, test a piaklo na chung ah tuni’n Geography teacher, Sir Robert in kawnggâk mang ah sawisa hi’n le a kigen hi. Thiltung tawh kisai ah a innsung mite’n lungkimlo thu puang kawm in a kisaipi pawl leh thuneitu te’n ensui ah student te kilawmlo tak ah sawisakna suk beina ding ah panla ding in a dawn u’i.

YPA NL Block in damlo ve
Lamka, July 28 *(Nisin Thuhiltu)* : Young Paite Association (YPA) New Lamka Block malatna’n tuni zingkal in YPA V. Munhoih Unit tawh kithua in Nianghoihkim @ Hoihkim (18) d/o (L) H. Rema vena a nei ua, zia hun a chun Awnzachin, Vice President, YPA New Lamka Block in Block huapsung ah damlo veding tam maleh innkuan khawsakna leh ki etkawlna tawh kisai ah Hoihkim te ngaikhawkna ziak ah kal suan uh hi’n a gen a, Hoihkim khut ah vena sum piakdawna a nei hi. H. Ginthanlian, President, YPA V. Munhoih Unit in zia gual ah Block puitute’n Unit huapsung ah kal a suanna chung ua kipakthu a gen hi. Hoihkim pu, Ngulsum in Hoihkim damlona leh innsung thu tawh kisai a genna a chun, Hoihkim pi chu taksa zawngkhal ziak ah lupna ngak leh lupna chung ah ann piak a hi banah a zun leh ek thiak piak ngai a hi dan genkawm in amau nupan kivâk himaleu ama le a keng a hawilo banah a mit le hatlo a hina ah amau ki enkawl zolo in a cha dang te’n a etkawl uh hi’n a gen hi. Annhuan leh innsung nâ zosia ensui, Hoihkim in damlona a tuak a pat thil dang bangma ngaitua theilo in a lungbuai mama hi’n le a gen a, ngainatu chuam chuam a pan malsawmna a dawng zosia chung ah lopina Pathian in a hcnag ding dawithu le a puang hi. Hoihkim damlo dan tawh kisai a genna a chun, Hoihkim in a nawi bawk hi ah a hiatsak chu a hi ding him hi ah a la dawnhu maleh College kai le haksa a sak a pat doctor kiang pui in doctor in nauvawp ding ah a la muangmaw in doctor thiam zaw kiang ah sawl a um hi’n a gen hi. A hin la, zia doctor chun le nauvawp hilo ah mudawk kit in Dr. Chinkholal Thangsing a ki etsak a pat a natna hiatdaw hipan hi’n le a gen hi. Ki etkawl ding dan hiat be talo leh lungkham tak ah a um lai ua vengsung, khaw kim leh kiang a pat ngainatu leh lainattu tamtak um a hi a mu ah mitthi luang kan thei pan a hi dan genlang kawm in zia gual ah ngainatu leh lainattu te chung ah kipak thu le a puang hi. Damlo vena a nei hun ua chun YPA New Lamka Block President in Hoihkim chung ah khut nga kawm in pauchap piakna a nei hi.

KZP in felicitation hun ding chawn
Lamka, July 28 *(Nisin Thuhiltu)* : Khangthah Zuun Pawl (KZP) in zing sunma dak 11 leh Simte Inn, Simveng ah tukum ah class 10, 12 leh degree a lawtinna chang student te kipakpina hun mat ding ah a la guanggal lawk chu vuaklup a um T Thangkhanlun chung chang ah bang,a thuchian a um nailo ziak in zia felicitation programme mat ding hun chu chawn a hi dan thutut a ki dawng hi.

Tribal movement ni 700 tinna nit di
Lamka, July 28 *(Nisin Thuhiltu)* : All Tribal Women Union (ATWU) General Headquarter, Churachandpur in a hung tung ding July 31, 2017 sunma dak 10:00 a pat Jehova Jire Home, L. Kamkhanthang’ Inn, Beulahlane ah Tribal Movement ni 700 tin nitna nei ding a hia, zia hun a chun Rev. K. Kamchinkhup, Divisional Superintendent, Imphal Division, EBC in thugenna nei ding a hi.

"Swami Rama Humanitarian Award”
Imphal, July 28 *(Nisin Thuhiltu)* : State Manipur nuai ah Home Department in July 25, 2017 ah hiatsakna thusua a bawl dungzui ah "Swami Rama Humanitarian Award" for the year 2017 dawng thei ding ah titna nei mimal ahiloleh institution te’n application piaklut thei hiding a hi. Swami Rama Humanitarian Award ahileh Himalaya Institute of Hospital Trust in a founder uh, H.H. Dr. Swami Rama hiatzingna ding ah economic, environment, scientific, social & spiritual developmetn of humanity lam thil ah panla chungchuang diak te award a piak sek hi a hia, zia Award dawng te chu citation, plaque leh Rs. 5 lakh piak hisek a hi. Jury ahileh M.N. Venkatachaliah, former Chief Justice of India in amapui a hi. Lunglutna nei ten application form leh a pawimaw document te August 5, 2017 tiang ah Deputy Commissioner te kiang ah piaklut thei ding a hi.

CM Relief Fund ding ah Rs 1 lakh donate
Imphal, July 27 *(Nisin Thuhiltu)* : Manipur ah tuilet ziak ah haksatna tuak te kithuapina ding ah mimal, pawl chuam chuam banah institution chuam chuam in Chief Minister’s Relief Fund (CMRF) ding ah sum donate a bawl zing uh tawh kitawn in tuni’n Bharat Petroleum Corporation Limited Dealers Association, Manipur in Rs. 1 lakh donate a bawl a, Chief Minister’s Secretariat ah Chief Minister N. Biren Singh khut in Association palai te’n cheque piakdawna a nei ui.