GOVT IN JOURNALIST WELFARE SCHEME DING AH RS 10 CRORE SANCTIONED: CM

Imphal, July 16 (Nisin Thuhiltu): “The Kangleipakki Meira” saina' tuni’n Eclipse Community Hall, Konjeng Leikai, Imphal ah 35th Journalist Award Ceremony a um hi. Zia hun chu khuallian hina tawh Chief Minister N. Biren Singh in a uap a, ama’n a thugenna a chun, state government in Manipur State Journalist Welfare Scheme, corpus fund ding ah Rs. 10 crore sanction bawl ta a hidan a puang a, State khantona ding ah ngaidan leh dawidan, hiatna leh thiamna te sun-khawm ah panlak ding pawimaw ah gen in, government policy leh programme hawilo a um leh state mipi te’n kihawng tak ah suggestion ahiloleh demna a bawl ding uh pawimaw in a gen hi. Assembly session zaw leh government in infrastructure development, drinking water leh lui (river) sunthiantho ding ngaikhawk pen ah kawi ding hin a gen hi. Government in transparency a chiapi zingtheina ding leh check & balance hawitak a um zing theina ding ah panlak khawmna pawimaw mama hin a gen hi. Mipi te haksatna hiatzui zing a hitheina ding ah ‘Meeyamgi Numit’ leh Hill Leaders’ Day chiapi ah um hin le a gen hi. Zia hun matna a chun, Chief Minister in journalism lam thil ah panla chung chuang diak teldaw a um - journalist 5 te kiang in Award leh local mi student lawtinna chung chuang diak nei te kiang in award piakdawna le a nei hi. Award dawng journalist te chu - print media section, ah Best Male Journalist Award - Th. Premchand of Poknapham, Best Female Journalist Award - Baby Serin of Ichel Express. Best Journalist Electronic Media - N. Sanajaoba of ISTV, Best Appreciated DIPR Personnel - P. Romesh Singh leh Best Hawker - Chirom Biren te a hiu. Hun matna uap Minister for IPR & PWD Th. Biswajit Singh in a thugenna a chun, media thiltup chu news mai hilo, state mipi te Information piak, a hiathiamlo te hiatthiamsak, kihona matna hawitak umsak ti te hin le a gen a, media person te’n thudikma a tangko ding uh pawimaw leh mipi te kal ah gap um te a umlona ding ah panlakna a nei ding uh pawimaw in a gen hi. Zia hun matna chu Minister for CAF & PD Karam Shyam, Parliamentary Secretary (Health and Family Welfare) S. Subashchandra Singh, President, AMWJU leh Editor-in-Chief of The Kangleipakki Meira, Director(IPR) Meghachandra Kongbam, senior journalist tamtak te’n le a uap ui.

CM IN THOUBAL AH FAMILY COURT HAWNG

Imphal, July 16 (Nisin Thuhiltu): Chief Minister N. Biren Singh in tuni’n Thoubal District level Officers’ Complex ah Law and Legislative Affairs Department, Government of Manipur organised bawlna nuai in Family Court hawnna a nei hi. Chief Minister in a thugenna a chun, Judiciary in mipi te muan ngamna leh taksanna a thasuaklo ding pawimaw a hidan a gen a, Family Courts kiti insung buaina case te tutna mun leh thukhenna mun a hina chung ah Court chuambik a hidan genkawm in kituptak leh a hiding gual tak ah Judiciary a um theina ding ah government a pawimaw dungzui ah support bawl ding hin a gen hi. State sung ah mipi te’n dan (law) chawi gual ah amau nawp dandan ah nasep thil bawl a nei uh (mob-justice) uang thak mama a hidan taklangkawm in judiciary kithuapina tawh state sung ah mob-justice sukbei hiding in a gen hi. Kuama’n bawlkhial nei a um leh dan (law) chawi gual ah kuama sawisak ahiloleh action lalo ding ah chialna bawl in, Rule of Law nuai ah mizosia um a hidan hiatmillo ding pawimaw hin le a gen hi. Drug addict te’n ngaina gual ah hinkhua a mat kittheina ding ua panlak ding chu tuhun ah a pawimaw mama thil a hidan le gen in, khamthei addict te etkawlna sen leh so um te government pawdawk ding hin a gen hi. Chief Minister in state sung ah numei 24,000 women te chu AIDS natna tawh khawsa a hidan uh le a gen a, maban hawitak a um theina ding ah panlakkhawmna pawimaw in a gen hi. Chief Minister N. Biren Singh in Meeyamgi Numit leh Hill Leaders’ Day tawh kisai a genna a chun, Meeyamgi Numit leh Hill Leaders’ Day mat a hina a pat government in a mun tak ah thil umdan (ground reality) leh society mipi te khawsak dan hiadawk thei a hidan a gen a, haksatna chuam chuam a kiang tut ah um te lak ah pianbukimlo, meithai leh teksia te dinmun ngaikhawk mama hin a gen hi. Hun matna uap Minister for Education & Labour and Employment, Th. Radheshyam in a thugenna a chun, kuama tualthattu hiding nuam umlo himaleh bang ziak ah tualthana piang sek a hi emit ngaitua kham ting a hidan gen in, a kua kua’n gitlo bawl, tualtha um sek te a um taklona ding ah panlakkhawm thak ding pawimaw in a gen hi. A langkhatlam ah hawn thak ah um Family Court, Thoubal, Judge ding ah Mrs. Benny Ngangom, MJS guat in a um hi. Family Court hawnna hun chu, Minister for Law and Legislative Affairs, L. Jayantakumar Singh, Chief Justice (Acting) Mr. Justice N. Kotiswar Singh, Justice Kh. Nobin Singh, Judge, High Court of Manipur, Chairman of Bar Council of Manipur, O. Maduchandra Singh, President of All Manipur Bar Association, H. Chandrajit Singh, President of High Court Bar Association, Kh. Bijoykumar Singh, President of Thoubal District Bar Association, Officials of High Court of Manipur, Judges leh Senior Advocates tamtak in le a uap ui.

JNIMS DIRECTOR I/C DING DR THONGAM BHIMO SINGH
Imphal, July 16 (Nisin Thuhiltu): JNIMS,Imphal ah Director Dr L Deben Singh tenure a bei tak tawh kitawn in Dr Thongam Bhimo Singh, Professor Department of Medicine, JNIMS chu director in-charge mawpuakna tuk ding ah guat in a um hi.

LAWTINNA CHANG TE KIPAKPINA NEI

Lamka, July 16 (Nisin Thuhiltu): Evangelical Graduates Fellowship (EGF), Churachandpur saina ah tuni’n Rayburn Chapel ah Inter-Collegiate Evangelical Union (ICEU), Churachandpur a kikhaikhawm Junior Graduate thakte kipakpina hun matna a um a, Elder T. Tualkam in hun hawnna nei in P Goulungmuon Singsit @ PG Singsit, Assistant Director, Manipur Police Training College, Pangei in a genna a chun, taksa lam ah lawtinna sang ah kumtuang mun ding ngaituana ziak ah zia ministry a chu lunglut a hi dan puangdawk kawm in zia ziak ma a chun mi hunkhawp te’n hun matna chu uap uh hi’n a gen hi. Chun, ministry a pat Jesu hepina hiadawk in zia hepina ziak a chu mimal ngaituana kihiatlo sak ah midang te hepina zildawk a hi dan le a gen hi. Zia hun matna a chun Dr. Rev. Enn Za Sian in lawtinna chang student te a ding ah pauchap piak in Higer Secondary leh Degree Student lawtinna chang te a pat thugenna’n a zui hi. ICEU, Churachandpur nuai ah Evangelical Union (EU) 8 a um a, zia te chu - Rayburn College Degree Section EU, Rayburn College EU, Rayburn Higher Secondary EU, Rayburn Higher Secondary (CBSE) EU, Rayburn High School EU, Churachandpur Government College EU, Bethany Christian College EU leh Young Pillar College EU a hia, zia te a pat tukum in Class XII ah student 61 leh Graduate ah student 19 ua, Degree a chun Manipur pumpi ah Rayburn College EU a pat Alicia in Sociology subject ah top 2 la in, Churachandpur Government College EU a pat Hatchonghoi, Anthropology subject ah top 4 leh Lamminlun Haokip in English subject ah top 9 mu in Memento leh Rs. 1,000 chiat piak a hiu.

LABU LEH MOBILE APP HAWNG
Lamka, July 16 (Nisin Thuhiltu): Simte Kristian Music Committee (SKMC) saina in Simte Inn, Simveng ah tuni’n Simte Kristian Labu leh Labu Mobile App hawnna leh latna nei a hia, Pastor Haumuanthang a pat Labu tawh kisai leh Rev. Lalpi Simte a pat Labu Android Apps. tawh kisai Report a um hi. B. Dongzalian Simte, President, STC GHQ in Labu hawng in Simte Labu Android App matpat hitheita ding a hi dan a puangdawk a, Rev. H. Thangliankham in Simte Labu leh Mobile Apps latna a nei hi. Pastor Haumuanthang in labu tawh kisai a genna a chun, 2015 a pat panlakna pat himaleh buaina chuam chuam ziak ah tukum June tha a khan Thawnsau a piakthak a um in tuni hawndaw thei a um hi’n a gen a, lâ phuaktu leh lâ tawh kisai hiatchianlo um te a awng ah kawi a um in revision bawlthak hun ah belap hi ding in a gen hi. Chun, maban ah Tonic Solfa tawh kithua labu bawl a hi theina ding ah mitin in panlakhawm ding ah chialna le a bawl hi. Rev. Lalpi Simte in Labu Android Apps tawh kisai a genna a chun, pau kepbitna leh mobile a pat Pathian chawihawi thei na ding banah khangthak te’n a phalam ah mobile a mat ding uh dawina ziak ah mobile a pat etthei ding Labu Android Version bawl a um hi’n a gen hi. Labu a hileh mikiphal hunkhawp te tuakkhawm te mang ah kibawl a hia, a sung ah lâ 550 val a um hi.

GST TAWH KISAI ZILTILNA
Lamka, July 16 (Nisin Thuhiltu): Lamka Traders & Self Employed Association (LATSEA) saina nuai ah tuni’n St. Paul’s Institute, Gouchinkhup Veng, New Lamka ah Goods & Services Tax (GST) tawh kisai kiziltilna a um a, zia hun a chun Mumbai ah pansa Sunny Patni & Associates neitu, Sunny Patni, Chartered Accountant in Income Tax leh GST te tawh kisai hilchianna a nei a, North-East bial state chuam chuam a cheng thingtangmite Income Tax in huam khalo maleh July 1, 2017 ni a pat mat ding ah a patdaw, GST in kuama hâwi neilo ding leh 1986 tiang ah tax piaklo a umte lakkit gua hi’n a gen hi. Income Tax Department a pat Zamkhanthang in GST Bill a mudan tamlo genna nei in CT Lian Guite, MDC leh Coordinator, LATSEA in huntawp ah kipakthu genna a nei hi.

BSI ANNUAL CONF. 2017 KHAK
Lamka, July 16 (Nisin Thuhiltu): Bible Society of India (BSI), Churachandpur Branch in EBCC Bethany, Bungmual ah ni 2 sung Annual Conference 2017 a nei tuni nitak kikhawp hun ah khak a hi. Tuni zingkallam biakna kikhawp hun ah Rev. V. Khamvum, Principal, GBC in Pathian thu genna a nei a, Upa Vanlallawm, Treasurer a pat Finance Report ngaithak a um in Award chuamchuam piakdawna le a um hi. Nitak kikhawp hun ah Rev. Zathangsing Zote, Executive Secretary, ICI in Pathian thu genna a nei a, Pastor T. Muan Khup, BCM in malzawlna gen in hun khakna a siam hi. Conference a hileh zani kipan in Business session ah 2017-2018 sung Budget ding in Rs. 17,00,000 a la namdet u’i.

NIMCHIPNA MUN AH THILUANG MUDAW HITA

Imphal, July 16 (Nisin Thuhiltu): Senapati District Administration team in Deputy Commissioner Athem Muivah, IAS mapuina’n Ningani zan ah nimchip ziak ah Maram-Peren Road ah um Tamphung Village, Manipur-Nagaland border, Tadubi Assembly Constituency ah mi 2 in thina a tuak bak ua mi 6 in liamna a tuakna mun uh et-thaakna tuni’n a nei ua, thina tuak mi pani insungmite a kimupi in suunpi thu a puang hi. Athem Muivah in thuthak lakhawm mite kiang ah a genna a chun, District Administration team -DC, Senapati, Tadubi leh Willong SDO te, CMO, Senapati Dr. Loli Mao mapui medical team te banah official khenkhat te’n Chief Minister N. Biren Singh leh local MLA banah Minister, Tribal Affairs & Hills N. Kayisii thupiak dungzui ah nimchipna mun vena nei a hidan uh taklang kawm in nimchipna mun ah thil umdan etzuina nei a hidan uh a gen hi. MLA, Tadubi leh TD Minister N. Kayisii in nimchip hun hun ah nimchipna mun etthak ding gua-maleh Churachandpur ah Cabinet Meeting ah a pan bak ah nimchim in lampi a khak ziak ah a hun hun ah nimchipna mun tung theilo hin a gen hi. Hiatthei khat chu Tamphung Village ah nimchipna ah mi 2 in thina a la tuak ua, mi dang 6 te’n liamna a tuak ui. Thiluang khat mudaw pai ah um himaleh thiluang khat chu tuni ah mudaw hibep in a kigen hi. Zia ah nimchip ziak a chun, National Highway 129A - Maram-Peren Road mattheilo a suak a, BRTF in lampi siamthakna nasep a chiapi zing uh le a hi. Tamphung Village ah nimchip ziak ah thina tuak mi pani te chu - Ileulungbe(35) S/o Haichanglakpe leh Puirangzaile(36) D/o Namzube te a hiu a, Ileulungbe pianna pa (father) Haichanglakpe chu Tamphung Village Authority, Chairman le a hi. Liamna tuak mi 6 te a hiu leh - Tamphung Village a pat Ngailang Pungchui (53) S/o Insalung, Heintiple (45) W/o Ngailang leh Insolungbe (21) S/o Haisobing te a hiy a, BRTF labourer - Manual, a zi Sunita leh a chanu Solomi te a hiu. Chuleh, Tamphung Village Chaiman leh BRTF te umna inn pani chu nimchip in nasatak ah a suksiat a hia, inn 10 val leh lo (paddy filed) huntiang chu nimchip in a suksiat hin le a kigen hi.

MANIPUR CONGRESS MLA 8 IN BJP ZAWMTA
Imphal. July 16 (Nisin Thuhiltu): Congress MLA Kshetrimayum Biren leh Paonam Brojen in BJP a zawm ua, zia chu tawh kitawn ah BJP Manipur Pradesh in Nityaipat Chuthek ah zani tak zan sawtnung a khan lawplutna (reception) a nei ui. Kshetrimayum Biren ahileh Okram Ibobi mapui Congress Government lui ah works minister a hi. Chief Minister Nongthombam Biren in party zawm thak MLA te kipakpi a hidan genkawm in muakna a bawl a, hun matna chu Ministers, Parliamentary Secretary te leh BJP MLA ten a uap ui. Chun, Lilong Municipal Council ah Councillor 4 te leh Manipur Pradesh Congress Committee, MPCC office bearer pani’n le BJP a zawm thak ua, MPCC office bearer pani te chu - media cell chairman L. Memo lehsecretary P. Sashikanta a hiu. Hiatthei khat chu 11th Manipur Legislative Assembly election result puan ah a um nung ah Congress MLA BJP zawm 8 tinna a hitai.

GOVT IN MANIPURI PONY A VENBIT DING PHUTNA NEI
Imphal. July 16 (Nisin Thuhiltu): Co-ordinating Committee of Polo Clubs of Manipur in state government chu Polo kihelna kimang , sakawl (Manipuri Pony) venbitna ding ah panla ding in chialna a bawl hi. Manipur Press Club ah tuni, Co-ordinating Committee, Chairman Ningthoukhongjam Bedajit in thuthak lakhawm mite kiang ah a genna a chun, sakawl (Manipuri Pony) umna ding gam reserve ah kawi ding pawimaw leh a venbitna ding ah government in panlakna a nei ding pawimaw hin a gen a, Manipur khangthu gancha vul ah um leh kiheln (games) ah kimang Manipuri pony in panmun pawimaw tak nei maleh tuhun ah kiam deu deu leh a manthai khak ding lau-um hin a gen hi.

CM RELIEF FUND DING AH RS10.9 LAKH DONATE BAWL

Imphal, July 16 (Nisin Thuhiltu): Manipur ah tuilet ziak ah haksatna tuak te kithuapina ding ah mipha chuam ngai leh pawl chuam chuam in Chief Minister’s Relief Fund ah lut ding ah sum donate a bawl zing ua, zia chu tawh kitawn in tuni’n Chief Minister Secretariat, Imphal ah Babina Group of Companies ah Managing Director Dr. Th. Dhabali in Chief Minister khut in Rs 5 lakh piakdawna a nei a, Panthoibi Housing Finance Company Ltd team in Th. Hemo Singh mapuina’n Rs 2.10 lakh piakdawna a nei ui. Chun, Manipur Tourism Forum in Rs 1 lakh, Chamber of Commerce in Rs 1 lakh, JBB Constructions in Rs 1 lakh, Education(S) Departmentally Verified Adhoc/Unitil further Order Employees Association in Rs 50,000 leh Manipur Relief Association in Rs 30,000 piakdawna a nei ua, a kigawm in Rs. 10.9 lakh a tung hi. Hiatthei khat chu tuma a khan, Mega Manipur School, Apunba Manipur Matam Ishei Kanglup (AMMIK), Manipur Home Guards Employees’ Welfare Association leh All Manipur Government Aided College Teachers’ Association (AMGACTA) etc te panna organisations chuam chuam leh Schools chuam chuam in CM’s Relief Fund a ding in sum donate a la bawl ui.

NATNA CHUAM CHUAM TAWH KISAI AH SEMINAR NEI
Tengnoupal July 16 (Nisin Thuhiltu): HQ IGAR (South) nuai ah 11 Assam Rifles of 26 Sector Assam Rifles in “Communicable Diseases during Monsoons” ti thupi mang in H Mongjang village, Moreh of Tengnoupal district ah zani a khan seminar organize a bawl hi. Zia hun a chun unit Chief Medical Officer in chuuk (monsoon) hun ah natna chi chuam chuam piang nuam diak -Malaria, Dengue, swine flu etc te a pat kiven ding dan leh thianthona chiapi ding pawimaw a hidan gen in a um hi. Chuleh, local mi te’n hiatthiamlo a neiteu dawtna zat chuam chuam nei in, lawting tak in seminar a zo ui.
HQ IGAR (South) nuai ah 11 Assam Rifles of 26 Sector Assam Rifles in “Communicable Diseases during Monsoons” ti thupi mang in H Mongjang village, Moreh of Tengnoupal district ah zani a khan seminar organize a bawl hi. Zia hun a chun unit Chief Medical Officer in chuuk (monsoon) hun ah natna chi chuam chuam piang nuam diak -Malaria, Dengue, swine flu etc te a pat kiven ding dan leh thianthona chiapi ding pawimaw a hidan gen in a um hi. Chuleh, local mi te’n hiatthiamlo a neiteu dawtna zat chuam chuam nei in, lawting tak in seminar a zo ui.