Student zosia ding ah NCC alotheilo a hi ding pawimaw: Governor

Imphal July 7 (Nisin Thuhiltu): Manipur Governor Dr. Najma Heptulla in tuni’n National Cadet Corps (NCC) Group Headquarter, DM College Campus, Thangmeiband, Imphal vena nei in cadets te holimna a neipi banin 10-Days NCC Combined Annual Training Camp of 65th Manipur Girls Independent Company, NCC, Imphal hun matna’n thugenna a nei hi. Governor Dr. Najma Heptulla in a thugenna a chun, NCC chu institution khangthak te’n discipline leh mihing hinna value a hiathiamnau hin a gen a, school leh college kai khangthak te’n khat leh khat kihiathiamna, gamsung dinmun, pau leh ham, chawn leh khan chuam chuam te a hiatthiam theina ding ua NCC a pan ding uh pawimaw hin a gen hi. NCC chu student zosia ding ah a lotheilo (mandatory) ah a pan ding le dawi hin a gen a, gamkhat hina leh gamsung kipumkhatna ding ah khangthak ten panlakna a nei ding uh pawimaw in a gen hi. Israel ah mizosia te ding ah National Service ah pan ding alotheilo a hidan sulang kawm in India ah le national service alotheilo ah kawi ding leh khangthak te’n training a bawl ding uh pawimaw hin a gen hi. Governor in a gen belapna a chun, masang ah NCC kiti school curriculum activity khat gual ah kawi himaleh a phatchuamna tamtak um hin a gen a, student zosia’n pan a lak theina ding ua school curriculum ah kawikit ding pawimaw hin a gen hi. Chuleh, State leh Central Government, Defence Ministry thuhiat ah Manipur ah NCC siamhawi thakna ding ah panla ding hin le Governor Dr. Najma Heptulla in a gen hi. Zia hun matna a chun, Governor in meritorious cadets wings pathum - 14th Manipur Battalion NCC, Imphal, 65th Manipur Girls (I) COY NCC leh No. 1 (Manipur) Air Squadron NCC, Imphal te kiang in Cadet Welfare Society Scholarship piakdawna le a nei a, Brigadier Vivek Sharma, VSM, Group Commander, NCC Group, Imphal, Instructors leh cadet ten hun matna a uap ui.

DC mapuina’ DLO meeting nei

Lamka, July 7 (Nisin Thuhiltu): Lamka, July 7: Churachandpur Deputy Commissioner (DC), Shyam Lal Poonia, IAS mapuina ah tuni’n BRGF Hall, DC Office Complex, Churachandpur ah District Level Officers Meeting nei in a um a, zia hun chun CCpur SDO, Kangvai SDO leh CMO ti te office banah Circuit House, Mini Secretariat, Ima Market, Bus parking, FCI Godown leh Peace ground ah Sports complex kisakna tawh kisai ngun tak ah genkhawmna a um hi. SDO te a ding gari, District Hospital a ding Life Support Ambulance, Churachandpur kîm leh kiang ah lampi banah Khuga Dam ah Tourist Resort puaphatna ding tawh kisai le genkhawmna a um hi. Chun, office chuam chuam ah buaina leh haksatna um te puaklut a um in zia te tawh kisai ah maban panlak ding dan le genkhawmna a nei u’i. Meeting a chun, DC/CCpur in district sung ah department tin in kawng bangkim ah district a khantona ding ah kithuapina pia chiat ding leh developmental work pending a um nalai te chu a kintheilam ah sai fel ding in a chial hi. DLO meeting a chun Churachandpur sung ah DLO 33 a pang u’i.

Mipi’n a phatchuampi thei scheme chuam chuam te genkhawm

Lamka, July 7 (Nisin Thuhiltu): Sub-Divisional Officer (SDO) Henglep Office, Bijang ah tuni’n Social Welfare Department nuai ah mipi phatchuampi thei scheme chuam chuam umte tawh kisai genkhawmna a um a, DC/CCPur Shya, lal Poonia in Chief Guest hina tawh a uap hi. Zia hun a chun, Henglep Area Chief Association ah Secretary, Hauneilal, Chief of Munpi in Hausate sik in thugenna a nei a, Umarani Devi, District Social Welfare Officer (DSWO), Churachandpur in Scheme chuam chuam umte tawh kisai a genna a chun, Social Welfare nuai ah Indira Gandhi National Old Age Pension Scheme (IGNOAP), Indira Gandhi National Disabled Pension Scheme, Indira Gandhi National Widows Pension Scheme leh Indira Gandhi National Family Benefit Scheme ban ah Manipur Old Age Pension Scheme (MOAP) leh Annapurna Scheme tite um hhi’n a gen a, Old Age Pension nuai ah kum 60 chunglamte thasin leh Rs. 200 banah kum 80 chunglamte Rs. 500 piak a um uh a hi dan le gen kawm in, Henglep Assembly Constituency a pat IGNOAP a beneficiary 617, MOAP a beneficiary 467, Widows ah 56, Family Benefit Scheme ah 10 leh Disability a beneficiary 4 um a hi dan a puangdawk hi. Scheme te chu Proof nei zosia’n SDO ah apply thei ding leh SDO in Social Welfare Office a pelut in Social Welfare in DC a pesawn ding banah DC in State a pawlut in zia a pat chu a muthei dingte piak a um ding uh hi’n le a gen a, pension sum chu Bank Account ah piak a um hi’n le a gen hi. Hun matna chu Henglep AC a pat hausa 30 tuam in a uap u’i.

Lamka sung mun chuam chuam ah Vanamahotsav kimang

Lamka, July 7 (Nisin Thuhiltu): India government in kumsin leh July tha hapta masapen ah ni 7 sung chu Vanamahotsav (Tree Planting Festival) ah a la puang tawh kitawn in India gamsung pumpi ah thingno phuna hun ah mat in a um sek hi. Zia tawh kizawi tawn a chun, tuni’n Divisional Forest Officer, CCpur Southern Forest Division malatna nuai in district level ah mat in a um a, tuni’n District sung ah Government Office/Institution, Private School, Veng/Khua ti te panna’n mun chuam chuam 30 ah thingno phuna a um hi. New Lamka West Bialtu MDC CT Lian Guite mapuina nuai ah tuni zingkal in CT Lian Team, North-East India Tribal Development Foundation Churachandpur District Disabled Union CDDU banah Ebenezer Academy leh New Lamka Upper Primary School student te’n Doras Road, Traffic Junction a pat Dorcas Road chan ah thingno phuna a nei u’i. Chun, Joint Action Committee Against Anti-Tribal Bills (JACAATB) malatna’n pawl chuam chuam te’n Tribal Martyrs Park bawlna ding mun ah Southern Forest Division, CCpur tawh kithuah in thingno a phu ui. Vanamahotsav matna chu District Police leh Southern Forest Division, CCpur kituana’n CCpur SP Office, Tuibong ah thingno phuna a um a, zia hun a chun Imphal a pat N Khaizalian, Additional Principal, Chief Conservation of Forest Government of Manipur, T. Thangchinlian, Incharge Divisional Forest Officer, Southern Forest Division CCpur ban ah District Police a pat Autustine J Khongsai, MPS, SDPO/ Thanlon mapuina nuai in huang sung ah thingno phuna a nei a hi. Chun, CCpur district sung mun chuam chuam ah thingno phuna ensui ding in Southern Forest Division CCpur staff te team 3 in a kikhen u’i. N Khaizalian, Additional Principal, Chief Conservation of Forest Government of Manipur malatna’n thingno kiphuna mun te etthâkna nei a hia, zia hun a chun T Thangchinlian, In-charge, Divisional Forest Officer, Southern Forest Division, CCpur leh staff te’n a zui u’i. VANAMAHOTSAV kimatna a chun, CCpur district sung ah mimal leh pawl chuam chuam te’n a kigawm ah thingno 10,000 vâl a phudawk u’i.

ZRA Drug Cell in khamthei hunkhawp hâl

Lamka, July 7 (Nisin Thuhiltu): Zomi Revolutionary Army (ZRA) nuai ah Drug Cell in khamthei zuak leh a hi zawngsak mi chuam chuam a pat khamthei chi chuam chuam a mat daw te tuni’n muun thawveng khat ah press leh media mai in a hâl hi. ZRA Drug Cell in a hileh kum tamtak chiata a pat khamthei dodalna a la nung ah mun chuam chuam a la entha sek in zani’n lekha a kichûn, Heroine (No. 4) pieces 7 tawh pawsal khat a la mankhawm hi. Number 4 tawh mat khawm a um a hileh Kapliankham s/o Ginzathang of Bethel Veng, New Lamka a hia, ama’n khamthei a hi sek banah thingtang lam ah supply sek hi'n kipuang hi. ZRA Drug Cell in hun bangchan a hem chiata a pat khan mi chuam chuam a pat number 4 piece 1900, WY Tablet 2500 leh SP (Spasmo Proxivon) chang 350 a man a, zani matdaw aum te tawh halkhawm in khamthei kiman cheng chu a kigawm ah Rs. 3 lakh tuam hi ding ah tuat a hi.

Âktui zuakna mun te entha

Lamka, July 7 (Nisin Thuhiltu): District Police leh Food Safety & Standard Wing kithua in tuni’n khawpi sung ah âktui zuakna mun chuam chuam etthâkna a nei ui. Tulai Social Media khenkhat ah China a pat kipan plastic âktui um hi ah thuthang a um ziak in SP Churachandpur thupiak dungzui in etthâkna nei a um a hia, zia hun a chun AK Singh, OC, CCPur Police Station, H. Jonny Sharma, SDPO/ Churachandpur, Augustine J. Khongsai, SDPO/ Thanlon, Nengneilam, SI, Women Police leh Police Personnel hunkhawp ban ah Food Safety &Standard Wing, Churachandpur a pat Staff te a pang u’i. Khawpi sung mun chuamchuam ah âktui kizuak te etthâkna nei maleu plastic âktui mudaw neilo uh hi’n a kigen hi.

RSETI ah puankhui training chiatha zing
Lamka, July 7 (Nisin Thuhiltu): State Bank of India-Rural Self Employment Training Institute (SBI-RSETI), Bijang ah khangthak kum 18 leh kum 45 kikal mite kiang ah course chuam chuam a thawn ah training a piak sek chiato zel in tuhin numeite a ding in puankhui kizilna a um hi. Women’s Tailoring a hileh July 3 a khan pat a um in ni 30 sung um ding a hia, ni 4 theory class nei zaw in zani’n practical a kipan hi. Puankhui zil a chun numei 30 a pang ua, Bethel Tailoring a pat Engmai Ngaite in a hil a hia, August 5 leh training zawthiang hi ding a hi. SBI-RSETI, Bijang ah women’s tailoring training a kichai zaw leh mi 25 in Photography & Videography training nei kit ding a hiu.

Local Church Leaders’ Seminar kipan
Lamka, July 7 (Nisin Thuhiltu): Lamka, July 7: Ministerial Board, EOC saina nuai ah tuni’n Neihsial Veng EOC Biak-Inn ah Local Church Leaders’ Seminar a kipan a, Pastor James Th. Minlun, Lamka Nuai Area Pastor in a hawnna leh latna a nei hi. July 9 tiang um ding zia seminar a chun, thupi chuam chuam ah pansa in Evan. TL Mang Vaiphei, Child Promoter; Mr. Elvis Lalven; Rev. Dr. Robert H. Vaiphei, Director of Missions, EOC; Rev. L. Khupboi Vaiphei, Director of Ministries; Rev. Lamkhogin Khaute, Chairman, Ministerial Board; Rev. Harry Muanlal, Executive Director, EOC, leh Miss Ngaithiannem te’n seminar la ding a hiu a, tuni’n a hileh Evan. TL Mang Vaiphei in “Puitu pha leh Puitu hina ah mani Kithununna Hinkhua” ti thupi tawh kisai in seminar paper lâkna a nei hi. Seminar a hileh EOC Miniisterial Board in mun chuam chuam ah a la sai uh chiapi zel in Neihsial Veng EOC, Zion Church EOC, Central Church EOC, Hmuia Veng EOC, El-Shaddai Church EOC leh Bethel Church EOC te a ding ah July 7-9 sung Neihsial Veng ah um ding a hi.

ZMA in unit thak hawng
Lamka, July 7 (Nisin Thuhiltu): Zomi Mother Association (ZMA) in veng leh khua chuam chuam ah Unit a phudaw uh chiato zel in tuma lam a khan Sainoujang leh Thuangtam ah Village Authority leh ZYA hiatpina tawh unit thak a hawng a, zia tawh kitawn a chun ZMA Sainoujang Unit ah vâipaw ding telna a la um hi. Sainoujang Unit ah President ding in Chingneikim, Vice Present ah Zenzakim, Secretary ah Khawlnu, Assistant Secretary ah Khawlhoihsiam, Finance ah Ningngaihlian leh Treasurer ding a Nianghoih te teltin a hiban un information & volunteer ding ah Thangneihching, Chingzavung, Dimneihkim leh Chingmanzik te teltin in a um u’i. ZMA Thuangtam unit ah President ding in Niangkhannem, Vice President ah Dimlianmawi, Secretary ah Nemthangpui, Assistant Secretary ah Hauneihching, Finance Secretary ah Ngaipari leh Treasurer ding in Ngaizasiam te teltin a hiu a, Member ding in Neingaih, Ngaizaniang leh Vungngaihzen banah Adviser ding in G Thangkhansuan Chairman In-charge, Village Authority leh K Khamkhanlian, Secretary ,Village Authority te guat in a um u’i.

Dawichuam100 te lak ah Justice T Vaiphei pang

Lamka, July 7 (Nisin Thuhiltu): House of Kalam in launched a bawl Dr A.P.J. Abdul Kalam International Foundation in India President lui leh Missile Man of India ti ah kihia famta Dr A.P.J. Abdul Kalam hiatzingna ding ah a sak “ Kalam Mausoleum” hawnna a hung tung ding 27th July 2017 leh Peikarumbu, Ramanathapuram District, Tamil Nadu ah um ding a hi. Zia hun chu India Prime Minister Narendra Modi in a cabinet member te tawh uap ding leh a hawnna a nei ding a hi. Chun, 26th July 2017 leh Dr A.P.J. Abdul Kalam “Memorial Event” mat ah um ding a hi. Zia hun uap ding leh Dr A.P.J. Abdul Kalam chanchin tawh kisai thucha video ah gen ding, India gamsung pumpi huap in mi challang diak mi 100 dawichuam ah chial in a um ua zia lak a chun Justice Tinlianthang Vaiphei @ Justice T Vaiphei, Chief Justice, Tripura High Court le chial in a um hi.

Chief Minister in Khuman Lampak Sports Complex entha

Imphal July 7 (Nisin Thuhiltu): Manipur Chief Minister N. Biren Singh in tuni’n Khuman Lampak Main Stadium ah flood lighting system installation dinmun etthakna a nei a, Youth Affairs & Sports Minister Letpao Haokip, Youth Affairs & Sports Department a pat top official te’n le CM a zui ui. Stadium etthakna a neizaw in Chief Minister in Sports Minister leh officials te lighting system te install bawlna a hawi thei ding pen ah chiapi ding in chialna a bawl a, official te chu stadium complex thiangtho tak ah kawi ding in a hiatsak hi. Chuleh, complex ah security dinmun siamhawi thak ding in thupiak a nei a, regular tak ah stadium sung ah lut te identity cards issue piak ding in le a hiatsak hi.

68th Vanamahotsava kimang;
Forest Department in public kithuapina pawimaw: Minister Shyamkumar

Imphal July 7 (Nisin Thuhiltu): Forest Department mapuina nuai ah Manipur state sung mun chuam chuam ah tuni’n 68th 'Vanamahotsava' mat in a um hi. 'Vanamahotsava' matna kawm in district 10 ah thingno 1.3 lakh phu in a um a, July thasung ah thingno 10 lakh phudaw ding ah guanggalna um in Forest Department thusuak in a gen hi. 'Vanamahotsava' ahileh kum 1950 a pat Union Minister for Food & Agriculture lui (late) Kanaiyalal Maneklal Munshi in July first week chu 'Vanamahotsava' ah mat ding ah a puan tawh kitawn ah kumsin leh kimang sek a hia, zia festival hun a hi, thingno phu a hi sek hi.
Manipur Forest Department saina Andro Assembly Constituency, Yairipok Top Chingtha ah 'Vanamahotsava' matna hun chu Forests and Environment Minister Thounaojam Shyamkumar in a uap a, ama’n a thugenna a chun, Forest Department bep in environment vengbit zo lo ding hin a gen a, titak tak ah public in support a bawl ding pawimaw mama hin a gen hi. Minister Shyamkumar in a gen belapna a chun, Manipur ah tuilet, nimchim ti te a um mun mama na ziak thing leh gua suksiat ziak hipen in le a gen a, State Government in luitaw (riverbeds) sukthian thak ding ah guanggalna nei hin a gen hi. Chuleh, chemical fertilizer kimatdan te le etthak ding pawimaw hin a gen a, thingno phu mai huntawklo a hidan taklang kawm in, tunung ding khualna thing leh gua venbit ding pawimaw hin a gen hi. Zia hun a chun, Forests and Environment Minister Th. Shyamkumar banah official dang dang te leh volunteer te’n thingno chi chuam chuam phina a nei ua, Top Chingtha ah thingno 7,300 tuam phudaw in a um hi. Principal Chief Conservator of Forests & Head of Forest Force (PCCF & HoFF) K. Angami; RK Srivastava, IGF, Project Elephant, Govt of India; L. Baite, Additional PCCF; Forest Department official te’n le zia hun chu a uap ui. Minister Shyamkumar leh Forest Department official te’n Kheba Ching, Khongjom, Thoubal District mun in le thingno phuna a nei ua, Forest Department in Kheba Ching ah thingno 1,000 a phu ui. Zia zaw a chun, Minister Shyamkumar in Samumakhong, Khwairamband Keithel in a thawn ah numei vanzuak te kiang in thingno hawpna leh piakdawna a nei hi.

NDA presidential candidate Ram Nath Kovind, Imphal tung

Imphal July 7 (Nisin Thuhiltu): India President thak ding telna 17 July 2017 leh a umna ding ah NDA presidential candidate Ram Nath Kovind in ama supporter ding hawlna (campaign) a chiapi zing tawh kitawn in tuni’n Imphal a tung a, BJP National General Secretary leh N-E Co-ordinator Ram Madhav leh Manipur Rajya Sabha member Kshetrimayum Bhabananda te’n le zui in Imphal Airport ah Th. Biswajit Singh, Public Works, Rural Development & Panchayati Raj, Information & Public Relations, Administrative Reforms, Commerce & Industries in vaidawnna a nei hi. NDA presidential candidate Ram Nath Kovind in Imphal ah a um sung ah party Chief Minister panna party leader te kimupi ding a hi.

Chief Secretary kisan dawilo ah Ningthoukhong mipi’n kiphinna nei

Imphal, July 7 (Nisin Thuhiltu): Manipur Chief Secretary mawpuakna a pat Director General, State Academy of Training (in the apex Pay Scale) mawpuakna tuk ding ah Oinam Nabakishore Singh , IAS, 1984 Manipur-Tripura cadre transfer ah a um bak ah Chief Secretary thak ding ah 1983 batch, senior IAS officer Mr Rajani Ranjan Rashmi guat ah a um lung awilo ziak in tuni’n Ningthokhong ah local mi te’n kiphinna a nei ua, lampi khak in gari taitua te a su nawngkai mama ui. Chief Secretary lui Oinam Nabakishore Singh in DG/SAT mawpuakna tuk ding ah transferred a hi tawh kitawn ah ama mimal lemchanlona ziak ah 9th Otober 2017 leh voluntary retirement la ding a hidan a suklat kit tawh kitawn a, diklo tak ah bawl a hi ziak ah voluntary retirement lakgua a hi ti ah thuzuau thezak a hi ziak ah kiphinna piang hin a kigen hi. Chun, Oinam Nabakishore Singh date of birth 1/12/1959 ahina chung ah service rules dungzui ah ama chu 2019 tiang ah semzawm theina lai ding in le a kigen hi.

Education Minister in T. G. Higher Secondary School entha

Imphal July 7 (Nisin Thuhiltu): Manipur Education Minister Thokchom Radheshyam in tuni’n T. G. Higher Secondary School, Imphal dinmun etthakna a nei a, ama’n a thugenna a chun, state government thak in education leh health sector ngaikhawk pen ah kawi a hidan taklang kawm in high school examination passed zaw hun ah admission bawl kitna ding tawh kisai student te haksatna hiatpi mama hin a gen a, zia chu tawh kitawn ah state sung ah government higher secondary school hawipen T. G. Higher Secondary School ah admission bawl nuam a tam bak ah lemchanlona khenkhat um ah gen a hi ziak ah school vena nei a hidan a gen hi. Chun, Principals, Vice Principal leh Director of Education (S) banah nu leh pa te kimupi in admission changzo lo ah um kha te, admit a hitheina ding lampi genkhawmna a nei hi.
Education Minister Thokchom Radheshyam in science laboratories, girl's hostel leh a chiatha zing school construction work dinmun te etthakna a nei a, panlak theina chan ah school siamhawina ding ah panla ding hin a gen hi. Zia hun a chun, Education, Labour and Employment Minister Th. Radheshyam leh Parliamentary Secretary S. Shubashchandra te chu college, indoor stadium ah felicitation programme matpi in le a um ui.

AMGACTA in CM Relief Fund ding ah Rs 1 lakh donate

Imphal July 7 (Nisin Thuhiltu): Manipur ah tui let ziak ah mitamtak in haksatna a tuakna chung ua mi pha chuam ngai te leh pawl chuam chuam in tuilet ziak ah haksatna tuak te kithuapina ding ah panlakna a nei zing uh tawh kitawn in tuni’n All Manipur Government Aided College Teachers’ Association (AMGACTA in Chief Minister’s Secretariat ah Chief Minister’s Relief Fund ding in Chief Minister khut in Rs. 1 lakh piakdawna a nei ui. Association member te chu Secretary Kh. Inaobi in amapui hi. Hiatthei khat chu Manipur Home Guard Employees’ Welfare Association in le July 5th ni a khan Rs. 1 lakh donate a la bawl bawk hi.

NDRF ah DG thak Sanjay Kumar in mawpuakna lâ
New Delhi, July 7 (Nisin Thuhiltu) : Himachal Pradesh Cadre ah 1985-batch Indian Police Service (IPS) officer, Sanjay Kumar in zani’n National Disaster Response Force (NDRF) ah Director General (DG) mawpuakna a la’i. NDRF DG lui, R K Pachnanda chu Indo-Tibetan Border Police (ITBP) ah DG ding ah guat a hinung ah zia post chu a awng ah a la um a hi. Sanjay Kumar in zia masang a hin Himachal Pradesh ah state Director General of Police (DGP) panmun a la lua a, ama’n a nutsia nung in a thatheng ding in President’s Police Medal for Distinguished Services dawng kha, Somesh Goyal guat in a um hi.