State Cabinet in July 20 a pat Assembly Budget Session kipan ding ah lemsakna nei

Imphal, July 04 (Nisin Thuhiltu): Cabinet Hall, Chief Minister Secretariat ah tuni’n Chief Minister N. Biren Singh chairman hina nuai in tuni’n State Cabinet meeting a um a, zia hun a chun July 20, 2017 leh11th Manipur Legislative Assembly Second Session (Budget Session) kipan ding in State Cabinet in lemsakna a nei hi. Cabinet in Imphal, Nambul leh Kongba lui a pat tui let ziak ah haksatna chuam chuam te sukvenna ding ah detailed project reports (DPR) chung chang le genkhawmna a nei a, thing leh gua nasatak ah a kisuksiat bak ah tanggam ah lo bawlna chawn lum let ziak ah tui let mun diak in Cabinet meeting in a taklang hi. Lui (river) te a pat tu a let mun mama na chung ah lui te puaphat thak ding leh lui baang dengdel deuna mun te ah retaining wall kituptak siam ding in le Cabinet in lemsakna a nei a, PHED nuai ah Divisions 5 kisiam dawk thak te nasepna enzui ding Superintending Engineering (Rural Circle No. III) post siambe ding in le lemsakna a nei hi. Chuleh, State Social Welfare Department nuai ah State ICDS Mission ah Joint Director post siamdaw ding approve bawl in Manipur Fiscal, Responsibility and Budget Management Act, 2005, Section 8 Clause chu a bailam zaw ding ah siamthak ding in le State Cabinet in lemsakna a nei hi.

Police Welfare Canteen hawng di
Lamka, July 4 (Nisin Thuhiltu): Superintendent of Police, campus, District Headquarter, Tuibuang, Churachandpur ah 5th July, 2017 nitak lam dak 3:30 leh District Police Welfare Canteen hawnna um ding a hi. Zia hun chu police department ah official te leh chial ah um civil society organisation chuam chuam ah leader ten uap ding a hiu.

Dengue positive case 6 mudawk
Lamka, July 4 (Nisin Thuhiltu): Henglep Sub-Division huapsung ah um Hengkom khua ah Dengue positive case 6 mudaw ah um chu thil lamdang mama khat a hi dan Dr. Jamthianlal, DMO/CCpur in a gen hi. Official tak ah Dengue natna kipatna confirmed hinailo himaleh kumlui, 2016 in Hengkom khua ah Tower bawl labour-te khat khawsik ah buaisia kha um a hidan khawnung ah report um a hina ah Hengkom khua ah Dengue natna chu imported ding a ginmaw a hi tin Dr. Jamthianlal in a gen hi. Alangkhat ah Hengkom khua ah Dengue positive patient 6 te'n hallam a manaw ta ua, himaleh District Malaria staff te'n Dengue outbreak um ding venna in zing, July 5 in Tuilaphai area sung leh kiim a khuate ah focal spraying nei ding uh hin Dr. Jamthianlal, District Malaria Officer, Churachandpur in a gen hi.

25 AR CO thak ding Col. Mithun
Lamka, July 4 (Nisin Thuhiltu): 25-Assam Rifles Commanding Officer (CO) thak ding ah Col. Mithun guat ah um a hidan Sanjay Kumar, CO, 25-AR in press te a kimupi hun in a gen a, Churachandpur District mipi'n ama (Col. Sanjay Kumar) co-operation a piak gual ua Col. Mithun le kithuapina hawitak pe chiat ding in le district mipi te chialna a bawl hi. 25-Assam Rifles, Headquarter Veng, CCpur Commanding Officer (CO) ding ah guat ah um Col. Mithun ahileh Army Headquarter, New Delhi a pat a hia, Army Officer dang bangle, North East India gamsung ah um kha nailo a, posting kha nailo hi ah hiat a hi. Zia gualmi a hina chung a chu Col. Mithun a ding ah kuama dawisak chuam leh khenchuam umlo ding, mi zosia kibang hiding in le Churachandpur nusiata ding Col. Sanjay Kumar a gen hi. A langkhatlam ah Col. Sanjay Kumar in thingtangmi te chu emotional leh sensational a hi bak ua mipawl nuamte a hiu ti’n a gen a, Churachandpur district mipi te a khiakla thu le a gen hi. Col. Mithun tawh kikhutsanna a neizaw tak uh leh Col. Sanjay Kumar in Nagpur, Maharastra zuan ta ding a hi.

School 196 te'n registration bawl

Lamka, July 4 (Nisin Thuhiltu): Mid-Day Meal enjoy (Govt., ADC & Aided school) Principal/Headmaster/Headmistress te'n June 10, 2017 (on or before) tiang ah Designated Officer (Food Safety) CCpur District (CMO Campus, CCpur) ah registration bawl chiat ding ti himaleh tuni, July 4 tiang ah school 196 te'n registration bawl pan a hidan uh Food Safety Office a pat report in a gen hi. Food Safety Office ah registration form la tuni, July 4 tiang ah school 271 ting ta hin le report in a gen bawk hi. Churachandpur District sung ah Food Business Operators (grocery stores, hotels & restaurants, canteens, bakeries, food manufacturing/processing units, vegetable vendors, fruit sellers, fish & meat sellers, diary units, packaged drinking water units, mid-day meal schemes under SSA, School boarding, College Hostel, etc) te'n Food Safety Office, CMO Office Campus a registration bawl ding in K. Sunita Devi, Designated Officer, Food Safety/ CCpur District in tuma a khan hiatsakna a la bawl hi.

June sung ah Malaria vei mi 2 mudawk
Lamka, July 4 (Nisin Thuhiltu): Malaria Department, Churachandpur in thalui, June 2017 sung in Malaria test mi 2,131 a bawlna lak ah Positive 2 a mudawk hi. June 15, 2017 chan ah Department in Malaria Clinic leh District sung ah Testing Centre chuam chuam ah malaria vei hi ding ah ginmaw thisan sample 826 etthâkna a neina lak ah mi 2 positive hi ah mudaw in a um a, June 16, 2017 a pat mi 1,305 test kibawlna lak ah positive mudaw a hilo banah thalui sung ah Plasmodium Falciparum (PF) mudaw umlo hi’n SMO, Regional Health & Family Welfare, Imphal leh Director, Health Services, Government of Manipur ah report piakna a chun a kitaklang hi.

Vocational Course on Media and Journalism hawnna nei

Lamka, July 4 (Nisin Thuhiltu) : Churachandpur Government College ah tuni’n Vocational Course on Media and Journalism kiti hawnna nei a hia, zia hun chu Vanlallawm Guite, Principal, Churachandpur College in Chief Guest hina tawh a uap a, L. Pangamte, Vice Principal, Churachandpur College leh SR Gangte, Head of Political Science Department & NSS Programme Officer, Churachandpur College te’n Functional President leh Guest of Honour hina tawh a uap ban un Dr Lalzagou Neihsial, Head of Geography Department, Churachandpur College in Special Invitees hina tawh a uap hi. Hun matna a chun khuallian ten candle lighting nei in Vocational Course Media and Journalism Course hawnna a nei u’i. Pauchungnung Vaiphei, Nodal Officer, Rashtriya Uchchartar Shiksha Abhiyan (RUSA) in a thugenna a chun, Government in thiamzilna leh khutthiam thilbawl ah nek hawl theina ding in RUSA mangcha ah vocational course chuamchuam pandawk in zia tawh kitawn a chun Media and Journalism course hawn a um hi’n a gen hi. Student te’n industry chuam chuam ah sepna a mutheina ding ua RUSA leh Community College in industry chuam chuam tawh kizawp ah a ziltil a hia, tu dinmun in RUSA nuai ah Media and Journalism a Industry partner Manipur Express ban h Community college ah Industry partner Maruti Company Easter Motor, Imphal hi ah gen kawm in zia industry a chun Automotive Technology student 13 in sepna muta uh hi’n le a gen hi. Chief Guest Vanlallawm Guite in hawn a um Media and Journalism Vocation course chu student te’n phatchuampi thei na ding ua panlak a hi dan taklang kawm in tuni’n Lamka College leh CCpur Government College te pang in Manipur pumpi’ government college leh government aided college kigawm college 40 te ah vocational course chuam chuam hawn a um a hi dan a gen hi. Vocational Course on media and journalism a hileh one year Diploma course a hia, Manipur University hiatpina nuai ah course piting tak a hina ah student te’n a phatchuampi ding uh kinep thu le chief guest in a puangdawk hi. Hawn a um Vocational Course on Media and Journalism a hileh Rashtriya Uchchartar Shiksha Abhiyan (RUSA) nuai ah Vocational Higher Education course a hia, a zilnuam te’n zing a pat kum khat course fee Rs. 1000 pia’n admission bawl thei ding a hiu a, Industry partner Manpiur Express in ziltiltu ding ah Certified Journalist sawl ding a hi.

Police in zu hunkhawp mandawk

Lamka, July 4 (Nisin Thuhiltu): Churachanpur District Police, Women police leh Drug Cell Unit kithua in tuni’n New Bazar Bus Parking area ah special drive a bawlna ua chun, zu zuakna mun 3 a pat local zu 63 litre, IMFL bottle 96 ban ah Beer leh Grape Wine bottle 48 a mandawk ui. Mat a um sia chu a sum ah Rs.80,700 tuam man zo ding hi’n a kigen a, a zuaktu 3 te le mat in a um u’i. Police in Tuibong, Teddim Road zul ah zu zuakna mun chuam chuam a bulu na a chun local zu 190 litre tuam a matdaw be kit hi.

Badminton Championship khakna nei di
Lamka, July 4 (Nisin Thuhiltu): Churachandpur District Badminton Association (CDBA) Tournament Board saina nuai ah a chiatha zing, 17th District Level Badminton Championship 2017 chu zing, July 5, 2017 sunnung dak 2:00 leh CDBA Indoor Stadium, Hiangtam Lamka ah khak hiding a hia, zia hun chu Manipur DGP leh Hill District Badminton Association, Manipur ah President, LM Khaute, IPS, in Chief Guest hina tawh uap ding a hia, Bijoy Koijam, President, Manipur Badminton Association leh IK Muivah, IPS, DIG (Range-III), Manipur te’n Guests of Honor banah Shyamlal Poonia, IAS, DC Churachandpur in Functional President hina tawh uap ding a hiu a, Chief Host ah Thangkhosuanmung Guite, MDC, Chief of Hiangtam Lamka pang ding a hi.

Orientation Camp nei di
Lamka, July 4 (Nisin Thuhiltu): Evangelical Baptist Convention (EBC), Lamka South Division in a hung tung ding July 6, 2017 leh Dorcas Guest House, Dorcas Hall Campus, New Lamka ah ni 3 dai ding “Evangelist Teachers’ Orientation Camp 2017” kiti hawnna nei ding a hia, Rev. V. Nenglian, Divisional Superintendent, LSD in Orientation Camp hawnna leh latna nei ding a hi. Zia hun a chun T. Tungindam in Meitei Mayek tawh kisai ziltil ding a hia, Rev. S. Vung Minthang, General Secretary, EBC in Pathian thu genna nei ding a hi. Evangelist Teachers’ Orientation Camp a hileh July 8, 2017 leh Upa S. Lalngailian, Chairman, Division Working Committee, Lamka South Division in khak ding a hi.

Drug addict te’n ngaina gual ah hinkhua amat kit theina ding ua govt in panla di: CM

Imphal, July 4 (Nisin Thuhiltu): Chief Minister Nongthombam Biren in Banquet Hall, 1st Manipur Rifles, Imphal ah drug addict te leh a nu leh pau teu holimna a neipi a, ama’n a thugenna a chun, Government in drug addict te’n hindan ngaina a chiapi kit theina ding ua panlakna nei ding a hidan a gen a, Drug addict 47 te Social welfare department nuai ah rehabilitation centre chuam chuam ah etkawl ding in thaakdawna le a nei hi. Chun, IG (Administration) Dr S Ibomcha chu Government in drug addict te a etkawlna Nodal Officer ding ah guat in a um hi. Chief Minister Nongthombam Biren in a gen belapna a chun, Social Welfare Department in Police Department tawh kithua ah panlakna kituptak a nei ding un hiatsakna a bawl bawk hi. Chief Minister in thuthak lakhawm mite kiang ah a genna a chun, state sung ah khamthei ah buaisia tamtak um leh kibelap zing in a gen a, drug ziak ah buaina chuam chuam tung te khawk a sakthu gen in, ama mapui Government in state sung ah khamthei bawl te’n ngaina gual ah hinkhua a mat kit theina ding panla zing ding a hidan a gen hi. Zia hun chu Manipur DGP LM Khaute, Principal Secretary of Social Welfare Department, Director of Social Welfare Department leh top officials hunkhawp te’n le a uap ui.

Disaster Control Room hawn a um
Imphal, July 4 (Nisin Thuhiltu): Principal Secretary, Relief and Disaster Management, Government of Manipur in tuni thusua a bawlna a chun, DMI, Babupara ah 24/7 State Disaster Control Room hawn ah um a hidan a taklang a, tuilet ziak ah haksatna tuak te’n telephone number 0385-2443441 ah Control Room thuhiat thei ding un a taklang hi. Zia 24/7 State Disaster Control Room ezui ding a chu MCS officer pali (4) guat a hiu a, MCS officer 4 te chu - Soiminlian Lengen (Contact No. 8974042816), Bijananda Chabungbam (Contact No. 8415940020), Seminthang Lenthang (Contact No. 8415803658) leh Mangminlian Vaiphei (Contact No. 8132817540) te a hiu.

Dr. Subhash Bhamre in NCC 50th CAC meeting mapui

New Delhi, July 4 (Nisin Thuhiltu): Minister of State for Defence Dr. Subhash Bhamre chairman hina nuai ah tuni’n National Cadet Corps (NCC), 50th Central Advisory Committee (CAC) meeting a um hi. Meeting hun ah Dr. Bhamre in presidential address a bawlna a chun gamsung ah NCC te panlakna pakcha kawm in, khangthak te’n nasatak ah phatchuampi a hidan uh a gen a, umchan leh leadership lam ah kizilna hawitak a hidan le a gen hi. Tu leh tu India gamsung ah NCC cadet 13 lakhs um in le a gen a, zia chu 15 lakhs tiang bek tunsak ding ah guanggalna um in a gen hi. Meeting chu Chief of Naval Staff Admiral Sunil Lanba, Chief of Army Staff General Bipin Rawat, Chief of Air Staff Air Chief Marshal B S Dhanoa, Defence Secretary Shri Sanjay Mitra, Financial Advisor (Defence Services) S K Kohli, Director General of NCC Lt. General Vinod Vashisht, Members of Parliament Kum.Sushmita Dev leh AnupamKher te’n le a uap ui. Chun, DG, NCC, Lt. General Vashisht in NCC activity chuam chuam te taklatna a nei hi.

Gul chuk khat Assam Rifles ten hukdawk

Imphal, July 4 (Nisin Thuhiltu): HQ IGAR (South) nuai ah 2 Assam Rifles of 9 Sector Assam Rifles medical team in tuni’n gul (snake) in a chuk Kh Bashu (47) of Khangabok, Thoubal District chu kituptak ah enkawl in a hinnna a huk hin piak ui. Kh Bashu (47) ahileh huan (garden) a sukthianna gul in a chuk hi a hia, Assam Rifles medical team in a etkawl nung in treatment bawlbe dinng ah District Hospital, Thoubal tut in le a um hi.

Presidential Election candidate Meira leh Kovind

Imphal, July 4 (Nisin Thuhiltu): Returning Officer for Election to Office of President of India, 2017 in tuni press release ah a taklatna a chun, July 17 leh Indian Presidential Election candidate ding pani hiding hin a taklang a, candidate pani ding te chu - New Delhi a pat Meira Kumar leh Kanpur, Uttar Pradesh a pat Ramnath Kovind hiding a hiu.

Diploma Coure in Media & Journalism hawng

Imphal, July 4 (Nisin Thuhiltu): Director, Information & Public Relations Meghachandra Kongbam, in tuni’n N. G. College, Imphal ah One Year Diploma Course in Media & Journalism hawnna a nei hi. Diploma Course chu N. G. College, RUSA Unit in Free Press School of Journalism ah a run ding uh a hi. DIPR Director Meghachandra Kongbam in a thugenna a chun, Journalism kiti chu zikthaw leh media ah kihomatna lam zilna a hidan taklang kawm in Journalism a pat mipi te a hun hun ah thil tung te hiatsak leh tangko tu a hidan a gen hi. Journalism leh media pawimawna kibelap zing in le a gen a, media, press, radio, television, film, advertising agency leh Public Relations Officer ah sep chu ki aat um hin a gen hi. Chun,Vice Principal & Nodal Officer, RUSA of N. G. College in vocational course on journalism tawh kisai genna a nei a, Chief Editor of Imphal Frees Press Pradip Phanjoubam in kithuapina nasatak a piakna chung in kipakthu a gen hi. Hiatthei khat chu Manipur Chief Minister N. Biren Singh in 100 Days Programme nuai ah D. M College Multipurpose Hall, Imphal ah a chiata June 29 ni a khah Manipur ah Government Colleges 29 leh Government-Aided Colleges 11 ah Vocationalisation of Higher Education under Rashtriya Uchchattar Shiksha Abhiyan chiapi ding ah a la hawn a hia, zia chu a sukpitinna ding ah Diploma Course in Media & Journalism kihawng thak a hi.

Residential Workshop on Holistic Empowerment for Widows khak hita

Imphal, July 4 (Nisin Thuhiltu): DSSS, Mantripukhri ah Women and Youth For Peace and Development (WYPD) in Manipur Voluntary Health Association (MVHA) tawh kithua ah organised a bawl uh ni 3 sung ‘Healing to Empowerment- A 3-Day Residential Workshop For Women Affected by Conflict in Manipur’ chu tuni’n khak in a um hi. Zia workshop chu U.S. Department of State panlakna Alumni Innovation Engagement Fund 2016 nuai ah‘ Healing to Empowerment: Story of the Manipuri Women’ ti project chiapi a hi tawh kitawn ah project sukpitinna ding ah nei a hi. Project in a tup chu numei te thuneina sukhat ding , a diang ah meithai haksana tuak leh lunggim tak ah hinkhua mang te dinmun siamhawi thak ding ti a hi.

State sung mun khenkhat ah July 5 ni guazu tam di: IMD
Imphal, July 4 (Nisin Thuhiltu): Gua zuk ziak ah Manipur state sung mun chuam chuam tui a letna chung ah India Meteorological Department thusuak in a taklatna a chun, Northeast state - Mizoram, Nagaland leh Tripura ah le gua zu nasa mama in a gen a, Assam leh Meghalaya a hileh state pumpi huaplo, mun khenkhat ah gua zu hin a taklang hi. India Meteorological Department in Manipur ah gua zuk ding dan tawh kisai a gen kitna a chun, state sung mun khekhat ah July 5 ah gua hat mama ding leh July 6 a pat gua hatlo a kizawm ah ni 3 sung zu ding in predict a bawl hi. Chuleh, tunai ah gua zuk hun ah Tengnoupal leh Chandel ah gua hat diak in IMD in a gen a, gua hatdan 115. 6 to 104.5 mm tung leh Chuarachandpur town ah gua hatdan 2 mm hin le a gen hi.

Chief Election Commissioner thak ding ah Achal Kumar Joti guat ah um

New Delhi, July 4 (Nisin Thuhiltu):: Chief Election Commissioner thak ding ah Mr. Achal Kumar Joti,1975-batch IAS officer guat in a um hi. Ama ahileh Gujarat Chief Minister ah tu ah Prime Minister Narendra Modi hi hun ah Gujarat Chief Secretary panmun a la lua a hi. Election Commissioner (EC) ding ah Achal Kumar Joti hi July 4 ah appoint kibawl a hia, ama’n tu ah Chief Election Commissioner Nasim Zaidi thasan ding a hi. Chun, July 6, 2017 leh Chief Election Commissioner panmun lua panta ding a hidan Law Ministry thusuak in a taklang hi. Chuleh, tu ah Chief Election Commissioner Mr. Zaidi in July 5 leh office nusiata ding a hi. Mr. Joti, 1975-batch IAS officer in May 8, 2015 a khah three-member Commission - Election Commissioner a la join a hia, January 17, 2018 tiang ah Chief Election Commissioner office lua ding a hi. CEC ahiloleh EC tenure ahileh kum 6 sung hisek a hia, himaleh kum 6 a tinna masang ah kum 65 a tin ua leh a tenure uh kichai thei a hi. Mr. Joti hi, 21st CEC hiding a hia, tumasang ah, Gujarat Vigilance Commissioner, chairman Kandla Port Trust (1999 -2004), managing director -Sardar Sarovar Narmada Nigam Ltd. (SSNNL), Gujarat Industry, Revenue and Water Supply Departments Secretary mawpuakna a la tukha ta le a hi. Chief Election Commissioner thak ding appoint a hi tak tawh kitawn ah government in tunung sawtlo ah Election Commissioner ding guatna le pai ding in ginchat a um a, Om Prakash Rawat hi Election Commissioner dang hiding ah muanmaw a hi.