DC in Book Fair hawnna nei

Lamka, July 1 (Nisin Thuhiltu) : Bookline, Kolkata in Synod Hall, IB Road ah July 1 a pat July 8 sung a nei ding “a 4veina Book Fair 2017” chu tuni’n DC CCpur Shyamlal Poonia IAS in a hawng a, zuak a um lekhabu chuam chuam te a enkual hi. Book Fair a chun, a neu a pat a lian chan in a sim thei ding lekhabu chi chuam chuam ban ah Study Material chuam chuam, naupangte lunglut thei ding lekhabu chi chuam chuam tamtak chawk thei ding ah kawi in a um a, Novels, literature, Comics ti te pang in lekhabu sing val a um hi. Book Fair ah lekhabu kizuak te chu aman kizik a pat 10% niam zaw ah zuak a hia, tuni mai in le mi tamtak in lekhabu hunkhawp a chawdawk u’i.

Hospital ah Room chuam chuam hawnna nei

Lamka, July 1 (Nisin Thuhiltu) : District Hospital, Churachandpur a Labor Room panna’n Department bangzat hem ah room puathak a um te tuni’n a hawnna nei a hi. Dr. Karan Lokendro Singh, Director, Health Services leh State Mission Director in puathak a um 300 mA x-Ray Machine kawina room hawnna a nei a, zia a pat Common Collection Centre of Sample for Investigation kiti bawlthak a um room hawnna a nei ban in Free Diagnostic/Laboratory Test, Jan Aushadi Kendra ban ah Maternity Ward a A/C Labor Room thak hawnna le a nei hi. Room thak kibawl te hawnna zaw zaw in Medical Superintendent, District Hospital malatn’n Hospital ah Department chuam chuam in MS Conference Hall ah kipakpina hun a matpi ui. Free Diagnostic/Laboratory Test hawnna a nei masang ah Dr. Lokendro in Press Briefing bawl in, Center Government thupiak dungzui ah State Government in RIMS leh JNIMS a Free Diagnostic Test chi chuam chuam 57 tuni, July 1, 2017 a pat a thawn ah bawlthei ding ah thupia a hi dan a gen a, zia chun State sung a District Hospital zosia banah Community Health Centre (CHC) le huapkha ding a hi’n a gen hi. Zia tawh kitawn a chun Churachandpur District Hospital ah a thawn ah bawl thei ding test chuam chuam 49 te List kitâkdawk hawnna a la nei hi. MS Conference Hall ah kipakpina hun a chun, Dr. K. Lokendro in Free Diagnostic Testing hawn a hi tawh kitawn in tuni a pat hospital ah bawlthei test chuam chuam – zun leh ek, thisan, khaksuak leh a dang dang te a thawn ah bawl theita ding hi’n a gen a, zia ding a chun Central Government panpina Fund hung te kiningting mama ding hi’n le a gen hi. Van mat tawh kisai ah General Holiday leh chawlni chuam chuam te tilo in Free Diagnostic Testing chu hawitak ah chiapi hi ding in a puang hi. State pumpi ah Doctor 400 bep um a hina ah Doctor 300 lakthakna ding ah Cabinet tawh genkhawm a um hi’n a gen hi.

ZYA Singngat Block in kipakthu puang
Lamka, July 1 (Nisin Thuhiltu) : Singngat AC MLA Ginsuanhau @ GS Haupu, Chairman, MANIREDA in Singngat Primary Health Centre (PHC) leh Singngat Sub-Divisional Office (SDO) compound a mat ding solar lamp a kawina chung ah Zomi Youth Association (ZYA) Singngat Block in kipakthu a gen a, Solar lamp kikawi te bialsung mipi’n mani mimal a gual ah ngai leh kepbitna lam tawh kisai a kuamasap pangkhawm chiat ding in chialna a bawl hi. Chun, kuatawbang chialna leh hiatsakna ngaisak lo a, mani phatchuamna ding ngaituana ziak ah gu a zuak a um leh a zuaktu leh a chawtute chung ah action lakdan kibang ding a hi’n le hillawkna a bawl hi.

Conference-cum-Seminar khak

Lamka, July 1 (Nisin Thuhiltu) : Siamsinpawlpi (SSPP) GHQ malatna’n zani, June 30, 2017 nitak dak 6:30 in Mualnuam khua ah SSPP Tuivai Block Conference-cum-Seminar hunkhakna nei a hi. Chief Guest hina tawh uap Langkhanpau Guite, MDC, Tuivai Block in a thugenna a chun, SSPP GHQ in Zoudawn a thiamzilna ngaikhawk ziak ah gam zia chan ah kalsuanna a nei chu bialsung mipite a ding ah vangphat um a sak thu a gen a, SSPP lawi upate chung ah kipakthu puang kawm in thiam zil te’n thiamzil hun sung ah nu leh pa, hotu te banah sang ah lian zaw te za dan thiam ding leh tup kichian tak nei pum ah thaimzil ding in a tilkho hi. Conference-cum-Seminar a hileh June 27, 2017 ah kipan a hia, zia hunsung a chun kipawllimna chuam chuam leh lam chuam chuam a kitetna le a um banah Career Guidance hun le a um hi. A chiata June 28 ah a la kipan SSPP vai saina nuai ah‘Siamsin Zodawn Visit 2017’ chu zawthiang a hi tawh kitawn in a kuandawk SSPP team member te chu tuni’n Lamka a tung ta’u. ‘Siamsin Zodawn Visit 2017’ sung a chun C. Tuiveljang, Suangdoh, Lungthul T, G. Bualjang, Lungthul L, Lungthul D, Tuima, Thuangtam leh Mualnuam te pha in, zia khawte a chun School te entha in a kisaipi semtute leh School Managing Committee te tawh hun a mangkhawm u’i.

Zu leh khamthei zuak te hiatsak
Lamka, July 1 (Nisin Thuhiltu) : Young Paite Association (YPA), New Lamka Block in gan gual nei te banah zu leh khamthei zuakte hiat ding ah thusua a bawl na a chun, New Lamka huapsung ah gancha zalen tak ah thazakna tawh kisai ah khapna lakdaw hi nailo maleh veng khenkhat in zalentak ah a thazak chung chang YPA New Lamka Block leh Unit te'n ngaikhawk mama in nasatak ah etsui hi ding in a taklang a, khawlai ah âkcha, uicha, kelcha, bawng leh a dang dang in thil a tuak leh a neitu’n bangma a gen theilo ding hi’n le a taklang hi. Chun, New Lamka huapsung ah zu leh khamthei chuam chuam hi leh zuak khapna tawh kisai a le YPA in nasatak ah panla thak ah ensui ding a hina ah a zuak a um ah matdaw a hileh a chung ua thiltung te chu maw a kipuak mai ding uh hi’n le a gen hi.

Electric gui sukha umlo di
Lamka, July 1 (Nisin Thuhiltu) : Manipur State Power Company Ltd. (MSPCL),in132KV Khengjang a pat Thanlon kikal electric gui a thung zaw uh tawh kitawn in June 3, 2017 (Monday) nileh a khatvei na ding a mei pedawk/tha ding a hiu a, electric gui ki thunna khua cheng mite'n electric gui sukha thei ding bangma bawllo di’n S. Priyananda Singh DGM Transmission Division (TD) No.1 MSPCL, in hiatsakna a bawl hi.

Army pre-recruitment training tawh kisai ah hiatsakna
Lamka, July 1 (Nisin Thuhiltu) : Churachandpur Battalion Assam Rifles in a chiata June 27, 2017 ni District Training Centre (DTC) Tuibuang ah Registration-cum-Awareness a sai hun ah army pre-recruitment training ding ah min khumlut te banah lunglutna nei ah min khumlut kha nailo te zosia a hung tung ding July 3 zingkal dak 5:40 leh Tuibuang a um 27 Sector Assam Rifles gate ah chiakhawm chiat ding in hiatsak a hiu a, zia tawh kisai ah thuchian zaw hia nuam te’n Assam Rifles a hiloleh CT Lian, MDC kiang ah kanchian thei ding a hi.

CDCTA in Meeting nei

Lamka, July 1 (Nisin Thuhiltu) : Churachandpur District Council Teachers’ Association (CDCTA) in tuni’n B. Vengnom Community Hall ah Emergency General Body Meeting nei in zia hun chu Khaipao Haokip, Chairman, ADC Churachandpur leh Kamkholal Vaiphei, EM, ADC Churachandpur te’n le a uap u’i. Khaipao Haokip in MDC kitelna ah vote khat a ting le Member hi in, himaleh vote khat a kia le Member hitheilo hi’n a gen a, puitu ding ah teltin a um te thu zui ding hi’n le a gen hi. CDCTA member pension leh thina tuakte zângna dawpna tawh kisai ah kituplo tamtak um a hi dan hiat a um hi ah genlang kawm in General Body Meeting a zia thu chu a genkhawm ah thupukna lak a um te chu ama hiatsak ding in a chial hi. Meeting a chun a chiakhawm member te’n puaklut a um agenda chuam chuam te genkhawmna a nei u’i. Churachandpur District Council Teachers’ Association ah tu dinmun in in member 1,116 a um ua, 2016-2017 sung in member 10 in thina a tuak ban ua member 12 te a sepna ua kipat a la pension ui.

Post 16 a ding ah applicant 76 phâ
Lamka, July 1 (Nisin Thuhiltu) : Saikot ITI ah trade chuam chuam a ding ah kum khat course training ding lakna ding tawh kisai ah kidawtna lekha piaklut hun chu zani a bei tawh kitawn in, training ding in computer operator & programing assistant ah post 16 lak ah kidawtna pelut 76 a um a, Stenography English ah post 48 ah mi 16, Welder ah post 14 ah mi 12, Carpenter ah post 8 ah mi 6, Hair and Skin Care ah post 10 ah mi 16, Dress making ah post 9 ah mi 16 ban ah Vegetable processing ah post 11 umna lak ah kidawtna lekha pelut mi 16 a um hi.

ZAA in kipakthu gen
Lamka, July 1 (Nisin Thuhiltu) : A chiata 24th, June (Saturday) ni "CITYWIDE CONCERT 2017" lawting tak ah a um theina chung in Organizing Committee in concert lawtinna ding ah panla tute zosia chung in kipakthu a gen a, a diak in concert ding tawh kisai publicity lam ah panlakpi Printed & Media Partner te -1) Angles Vision (2) Hmasawnna Thar (3) Hornbill Cable Network, (4) Lamka Post, (5) Manipur Express, (6) Nisin Thuhiltu (7)Phualva Times, (8) Sky Net, (9) TC Network (10) Zolengthe, (11) Zogam Online (12) Zogam.com  te leh Concert kithuapina ding ah ticket Rs.2000/- , Rs.500/- leh Rs.100/- ah chaw te chung in Organizing Committee in kipakthu a gen hi. Chuleh kithuapina sum pia Minister V.Hangkhanlian Rs.50000/-, Ginsuanhau MLA Singngat, Rs.50000/- ,Vungzagin Valte MLA Thanlon, Rs.50000/- T. Khaikhomang MDC Lanva Rs.20000, Langkhanpau Guite Rs.10000/-, Rev. Khen P Tombing Principal Rayburn Collage, Rs.10000, Grace Zamnu MDC Muallum Rs.10000/- V Khaikhanmung MDC Zenhang Lamka, Rs.5000/-, Kamkholal EM, Rs.2000/- leh a dang dang te chung in kipakthu a gen hi.

Engineer diklotak ah nasem te case file khum hi ding: Work Minister

Imphal, July 01 (Nisin Thuhiltu) : Manipur Works Minister Thongam Biswajit in tuni’n New Secretariat Conference hall, Imphal ah Public Works Department official te second monthly review meeting a neipi hi. Meeting hun ah Minister Thongam Biswajit in a kisaipi thuneitu te chu nasepna kimang gari leh machine lian mat ah um te banah khutmat chuam chuam te nasep zawthian nung tiang ah le Works department khut ah a lutkitlona tawh ksai in official te vauna a bawl a, machine leh khutmat chuam chuam mang leh nung piak kitlo contractor te chung ah action lak hiding in a gen hi. Retired official te panna diklotak ah nasem engineer a um leh a chung ua Personal Liability Acts tawh kituak ah case file bawlkhum hiding in a gen hi. Review meeting hun ah Governor’s Raj Bhawan, Secretariat area, Sanjenthong Officers’ Colony, Babupara leh Singjamei Waikhom Leikai leh MayengLeikai area ah tui kivei sek te a vaima theipen ah a kisaipi official te’n a sukthian ding un Minister Biswajit in thupiak a nei a, a kisaipi EE te chu tuilet sung ah tui chawpdawna mat thei ding tui pump ti te ngaitua ding leh a lemchang thei ding pen ah panla ding in a hiatsak a, division 29 um lak ah 18 bep in progress report a piaklut theina ding ua a lung awilo thu taklang in thakit monthly review meeting masang ngei ah report pelutlo te’n report a piaklut ding uh hin a gen hi. Meeting hun a chun, Works Minister in PWD complex sukthiantho ding leh damthei huai tak ah kim leh kiang umsak ding pawimaw in a gen a, Baruni leh Koubru Hills ah feet 12 ah lian lampi kisiamna tawh kisai ah detailed report pelut ding leh a kisaipi official te’n Work Charged, Muster Roll leh Casual Staffs te utilisation detail le a piaklut ding uh pawimaw in a gen hi. National Highways ah nimchim a um mun mama na chung ah engineer te National Highways enzui zing ding leh nimchim a um hun ah lampi khak thei thil te a hun hun ah a sukthian ding uh pawimaw in le a gen a, Inspection Bungalows panna PWD nuai ah office umzosia te department min ah land ownerships register bawl ding in le hiatsakna bawl hi. Zia meeting a chu District Head Quarter ah Mini Secretariat building kisa te, Hot Mix Plant dinmun te gen khawm in a um a, Works Commissioner K Radhakumar in division wise ah thil umdan genkhawm pawimaw a hidan taklang kawm in 100-days programme nuai ah department in a sepdaw chuam chuam - Sendra Hillock ah Tourist Resort , Takmu ah Water Sports Complex, Bishnupur District ahTourism facility chuam chuam, districts Head-Quarters zosia lampi kisiam te leh NESRIP Projects nuai ah Tupul - Bishnupur leh Thoubal - KasomKhullen (ADB funded) kisiamna te banin Mao-Imphal Highway kisiam hawina tawh kisai in report piakna a nei hi.

Martyr jawan luang thâkdawna leh zana piakna nei

Imphal, July 01 (Nisin Thuhiltu) : Ukhrul District ah 27 Assam Rifles, Permanent Vehicle Check Post ah zani IED bomb puakna thina tuak- Rifleman/GD Biju Sorupuwar luang thaakdawna le zana piakna tuni’n Tulihal International Aiport, Imphal in HQ IGAR (South), 5 JAK RIF te mapuina nuai in a um a, zia chu Manipur Chief Secretary O. Nabakishore Singh, Additional Chief Secretary(Home) Dr. J Suresh Babu, Anand Prakash ADGP(L&O), Brig S K Sharma, DIG CRPF, Brig R K Singh, offg IGAR(S), Brig S K S Chauhan, Deputy GOC 57 Div& Brig J S Bainsla, Commander 9 Sector te’n hun matna uap in zana piakna le pakvui piakna a nei ui. Dr. J Suresh Babu, Additional Chief Secretary(Home) in thuthak lakhawm mite kiang ah a genna a chun, ziagual kithana chu nasatak in demna a bawl a, Biju in Manipur a ding ah thitiang ah panlakna a nei nung ah a inn uh zuan a hidan genkawm in martyr diktak hin a gen hi. Chuleh, public leh government in chamna leh muanna a um zing theina ding ah panlakna a neikhawm ding pawimaw in a gen hi. Rifleman/GD Biju Sorupuwar ahileh North Lakhimpur District, Assam a pat a hia, a zi leh a cha te pani (2) nusia a hi.

Teacher te thalaw, transfer & posting order suadaw pai hita ding: Education Minister

Imphal, July 01 (Nisin Thuhiltu) : Education Minister, Th. Radheshyam Singh in SSA Hall, Babupara ah tuni’n special meeting a ko a, District Board of Education (DBE) Chairmen leh member te tawh Kasturba Gandhi Balika Vidyalaya (KGBV) implement bawlna ding leh government residential schools banah school khantona ding tawh kisai a genpi hi. District Board of Education a chun, District zosia Deputy Commissioner te Chairman, Member ah SP, ADC, SDO, SDC, DPM leh ZEO te a pang ua, DBE mawpuakna chu Central Sponsored Schemes’ implementation tawh kisai etzuina a nei ding uh ti a hia, Proposal Approval Board (PAB) kiang ah piaklut ding report kimtak le a siam ding uh ti a hi.
Meeting hun in Education Minister in hun chiasa PAB in approve a bawl project leh a dinmun te etpina leh genkhawmna a neipi hi. Education Minister Thokchom Radheshyam in department zosia district level officer te’n school khat leh ni a etzui chiat ding uh leh thasin leh 1/ 2 vei bek school vena a nei ua, student te tilkhona a nei zing ding uh dawi a hidan a gen a, private school te ki tetpi (compete) theina ding ah district zosia residential school umsak ding pawimaw in a gen hi. District kisiam thakna mun te ah education lam tawh kisai ah a pawimaw chuam chuam te dinmun le meeting hun ah genkhawm in a um a, Minister in teacher te – salary, transfer & posting order tunung sawtlo ah suadaw hiding in a gen hi. Private school te etzuina ding ah Bill draft ah um in le Education Minister in a gen a, private school te’n teacher titna nei tak tak te, class room kining ting tak banah mipi kikawmtuana mun tawh kinailo deu ah school a um sak ding uh government in dawi hin a gen hi. IAS, IPS leh MCS officer te chu private Competitive Exam Class la ding in le chialna a bawl a, Principals ahiloleh ZEO te’n government school property - class room leh thil chuam chuam te kituptak ah a etzui ding uh hin a gen hi. Meeting hun a chun Principal Secretary Education Vineet Joshi in Kasturba Gandhi Balika Vidyalaya tawh kisai leh maban ah panlak ding dan chuam chuam guanggalna um te taklatna a nei hi.

Government leh mipi te’n financial discipline a nei theina ding ua Chartered Accountant ten pan a lak uh pawimaw: Chief Minister

Imphal, July 01 (Nisin Thuhiltu) : Hotel Classic Grande, Chingmeirong ah tuni’n Institute of Chartered Accountants of India (ICAI), Manipur saina nuai ah 68th Chartered Accountants’ Day mat in a um hi. Zia hun chu Manipur Chief Minister N. Biren Singh, Union Minister of State for Railways Rajen Gohain, Chief Secretary O. Nabakishore, Manipur Chamber of Commerce Vice-President Basudeva leh Chartered Accountants KN Agarwal banah Ksh Kunjabi te’n khuallian hina tawh hun matna a uap ui. Chief Minister N. Biren Singh in a thugenna a chun, Chartered Accountant te’n financial lam thil ah a diklo bep a etzui lo ding, government leh mipi te’n financial discipline a nei theina ding ua panlakna le a nei ding uh pawimaw in a gen hi. Chartered Accountants te’n mipi te Goods and Services Tax (GST) tawh kisai a hiatthiamsak ding uh pawimaw in le a gen a, Institute of Chartered Accountants of India (ICAI), Manipur in kituptak ah panlakna a nei zawm zel ding kinem hin a gen hi. Chartered Accountants te chu GST tawh kisai ah workshops leh seminar organised bawl ding in le chialna a bawl a, GST hiachianlo mitamtak un nalai a hina chung ah Chartered Accountants te a pui huaitu a pan ding hin a gen hi. Chief Minister in a gen zawm zelna a chun Manipur ah Chartered Accountant tamlo himaleh audit, taxation, finance leh consultancy lam thil ah a panlaknau thupi mama in a gen a, business leh financial lam thil ah Chartered Accountant te’n government suggestion a piak ding uh dawi leh mipi te’n economic dinmun a siam hawi theina ding ua panlakna a um ding le dawi hin a gen hi. Institute of Chartered Accountants of India (ICAI), Manipur chu India ah accountancy profession chiapi te dinmun etzuina ding ah kiphutdawk leh khawvel ah second largest professional accounting body hin a gen a, tu ah member 2,65,000 um hin a taklang hi. Union Minister of State for Railways Rajen Gohain in a thugenna a chun, Indian Independence nung ah indirect tax reform kibawl thak , GST in tax collection chawmkhawmna lam a sukhat ding bak ah thil man chuam chuam te le suniam a hidan a gen a, gamsung mipi te’n a phatchuam ding uh kinem hin a gen hi. Chuleh, GST beneficiary ding chu a diak ah micham (common people) te hiding un a gen bawk hi.