THILUANG MUHINAILO; A HAWLNA CHIA THA ZING
Lamka, June 2 (Nisin Thuhiltu):Lanva lui in a taw unau 2 te lak ah a neu zaw, Baby Kimngaihsiam (3) luang chu tuni tiang in muzaw a hi nai puai. Zani a pat luang hawlna a la chia tha zing chu tuni zingkal ah sutzawp in a um hi. Zia hun a chun, Rayburn High School leh Rayburn College staff te leh student te ban ah Hmar Youth Association (HYA), Young Paite Association (YPA) New Lamka Block, Young Vaiphei Association (YVA) Town Unit leh mi phachuam ngai hunkhawp te kithua in tawmngai tak in a hawl ua, Khumuzamba Meitei Society in zingkal lam in thiluang hawl te nek ding a ngaitua piak hi. CCpur DC thak Shyam Lal Poonia, IAS malatna’n District administration official hunkhawp ban ah District police leh Medical team te le thiluang hawlna’ chun a va pang u’i. MTDC Chairman ban ah Thanlon A/C MLA, Vungzagin Valte in tuni sunnung in galna va nei in kithuapina’n bawngnawi, thingpiche leh anchang a va piak ban ah unau 2 te khiakthakna mun le a va entha’i. ADCC Chairman, Khaipao Haokip in le a luang mudaw a um K Lianlunmang galna nei in lusûn inkuan te Rs. 10,000 a piak ban ah thiluang hawlte thingpi dawnna ding in Lanva lei bul a um Information centre ah Rs. 2,000 le a pia’i. Zia lo chun, Information centre ah District administration in dawn ding tuithiang, mineral water a kawi ban ah Bialtu MDC T Khaikhomang in Rs. 2000 leh District Police OC in Rs. 1000 kituapina in piau hi. Chuleh, tuni zingkal in ADCC Ex-Chairman Langkhanpau in ama gari mang in thina tuak innkuang te tawh K Lianlunmang luang District morgue ah a va kawi ui. Zia thu zik a hi chan in Baby luang mu a hi nai pua, mu a hi hun hun ah Lanva Youth Club inntekna nuai ah Lanva thânmual ah a pani ua vuiliam hi ding a hiu.
MINISTER V HANGKHANLIAN IN EX-GRATIA PIAKDAWNA NEI
Lamka, June 2 (Nisin Thuhiltu): State Government in ex-gratia piak hiding ah a puan dungzui in tuni’n Agriculture/ Vetirinary and Animal Husbandry Minister V Hangkhanlian in Lanva lui tui ah thina tuak unau pani- K. Lianlunmang (4) leh Kimngaihsiam (3) insung mite kiang in ex-gratia Rs. 4 lakh cheque piakdawna a nei a, a luang kimu nailo Kimngaihsiam (3) hawlna panla philantropic organization chuam chuam te mat-dawn ding in kithuapina Rs 20,000 piakna le a nei hi. Chun, thina tuak insungmite suunpi a hidan puang kawm in, thil tung chu khawk a sakna thu a puang hi. District Administration - Churachandpur, DC Shyam Lal Poonia, AC to DC Thienlaljoy Gangte, SP Rakesh Balwal leh police official te’n le ex-gratia piakdawna hun chu a uap ua, Minister in district administration leh philantropic organization chuam chuam te’n thiluang hawlna pan a lak dan uh chu pakcha mama hin a gen hi. A langkhatlam ah philantropic organization chuam chuam leh community chuam chuam in Kimngaihsiam (3) luang hawlna a chiapi zing ui.
KIKHUTSANNA NEI
Lamka, June 2 (Nisin Thuhiltu): Vaiphei People Council (VPC), Gangpimual Block in a chiata June 1, 2017 a khan kikhut sanna a nei hi. Zia hun a chun, vaipaw lui te leh teltin thak a um te a pang ua, kikhut sanna nei a um in Upa Thangkam in vaipaw thak ding te a ding in pauchapna a nei piak hi. Teltin thak a um te a hiuleh: Chairman - Hauginlian @ H.Lianpu, Vice Chairman - Upa P.Boijoy Vaiphei, Secretary - Haulalven, Assistant Secretary - Sanga, Information Secretary - S.Lalmuan, Finance Secretary - Upa Ngulthang, Treasurer - Ngaineithiam, Members - Lunkhomang, Upa Ginsuanthang, Kaitinlun, Kaikap leh Vungthang a hiu. Chun, Adiviser ding te a hiuleh - Kaipu, Paukholal, S.Haulal, Khaitinlal leh Khamkhothang a hiu.
NURSE TE’N TRAINING NEI
Lamka, June 2 (Nisin Thuhiltu): ‘District Level Orientation Training for Nurses on RI/MI, Hep-B, Measles & JE’ kiti tuni’n DFWO Conference Hall, District Hospital ah nei in a um hi. Dr. Kimngaihching, CMO, Churachandpur in training chu hawng in thugenna a nei a, sepna nei hingal ah a thasang ah sem ding ah midang sawl kiti chu thil hitheilo a hi a tia, amau thasang ah a sawl te un hikhial a nei ua leh sepna neitu in maw a puak ding ti’n le hillawkna a bawl hi. Training hun ah Dr. VC Pau Tonsing, DIO/DFWO, Churachandpur; Vanlalven Langel, DCCM leh Nalini Devi, DPHNO te’n Routine immunization maintain ding tawh kisai ban ah Cold Chain Management, Mother and Child Tracking System (MCTC), Health Management Information System (HMIS) report piak ding dan tawh kisai a hil ua, zia hun a chun District sung ah PHC chuam chuam a duty nurse 36 a pang ui.
VDF IN LUKHUK CHUAM NEI TA
Lamka, June 2 (Nisin Thuhiltu): VDF Personnel te’n khuk ding, P-Cap a nei thakna chung ua, Churachandpur District Village Defence Force Welfare Association (CDVDFWA) in kipahthu genna a nei hi. CDVDFWA President, Laltingen Vaiphei in thuthak lakhawm te a kimupi hun a chun, VDF a um nung a pat tuni chan ah VDF te’n Police te lukhuk kikhawp pi to a, Police leh VDF hiat khen theina ding pawimawna liantak a um dungzui ah May 31, 2017 a khan CCpur SP, Rakesh Balwal IPS kimupi in VDF te a ding lukhuk chuam bawl dawna ding a phalna la hi’n a gen hi. CCpur SP in a phalna a piak tawh kitawn ah VDF lukhuk, P-Cap bawl pat a um in zia lukhuk chu Manipur ah VDF te’n khuk suak vek ding ah order sua a hi dungzui in tuni a pat VDF te’n duty na’ khuk pan ta uh hi’n le a gen hi. ta ding uh VDF personnel te’n lukhuk chu Rs.150 a chaw chiat ding leh duty hun ah khuk chiat ding in le chialna a bawl hi. Chun, maban ah VDF teptena shoulders badge le bawl daw hipan ta ding hi’n le a gen hi. Zia hun ma a hin, VDF lukhuk bawldaw thei na ding ah panla, CCpur SP Rakesh Balwal, IPS leh Additional SP Lunkhomang Khongsai ban ah panla kha police rank officer te chung ah CDVDFWA sik in President Laltingen in kipakthu genna le a nei hi.
LALTHANKUNGA HMAR KIPAKPINA NEI
Lamka, June 2 (Nisin Thuhiltu): Lalthankunga Hmar in World Customs Organization’s Certificate of Merit 2016 leh Presidential Award 2016 for “Specially Distinguished Record of Service” kiti a muna chung ah Pathian kiang a kipakthu genna tuni’n HYA Hall, Sielmat ah nei in a um a, Rev. Lalhmingthang Famhoite, Presbytery Superintendent, EFCI, Saikawt Presbytery in tilkhona thu gen in Lalthankunga Hmar lawtinna chung ah Pathian kiang ah kipakthu genna leh a um pina dawt piakna in pauchapna a nei piak hi. Zia hun a chun, Rev. (Dr) JL Songate, Secretary (Missions), ICI; Joseph Lalrothang, President, Hmar Inpui; Lalthankunga Hmar ban ah mi dang hunkhawp te’n le a thugenna a nei ui. Lalthankunga Hmar a hileh tu nai a khan Superintendent of Customs & Central Excise, Shillong Zone a pat Aizawl Customs Division ah kichawn a hia, January 24, 1989 a khan Inspector ah a la lut a hi.
YPC IN PAWL 12 ZO TE KIPAKPINA NEI
Lamka, June 2 (Nisin Thuhiltu): Young Pillars College (YPC), S Canan Veng ah tuni’n Thanksgiving-cum-Felicitation Program for Successful Students of Higher Secondary Education 2017 nei in a um a, Rev. LB Angam, Executive Director, ECA (ECCI) in lawtinna chang student te ziak ah Pathian kiang ah kipakthu genna leh malzawl dawt piakna a nei hi. Zia hun a chun, YPC Principal, Onthong Haokip in kipak man chuam chuam piakdawna a nei hi. Young Pillar College a pat tukum pawl 12 exam Arts Stream ah student 177 leh Science Stream ah student 61, a kigawm student 238 a hia, zia lak a chun student 132 passed in pass percentage 84.87 a tung zo hi.
UCHIWA AREA AH IMPHAL RIVER LUIBANG CHIM
Imphal, June 2 (Nisin Thuhiltu): Mayang Imphal huap sung ah Uchiwa area ah Imphal river luibang tuni’n a chim a, ziana a chu chenna inn leh lo (paddy field) hun tiang a siai. Mayang Imphal MLA leh Parliamentary Secretary Education, Kongkham Robindro in a mun tak ah thil umdan te etthakna a nei a, luibang feet 30 lam ah sau a chip thakna chung ah Uchiwa Wangbal Awang Leikai, Uchiwa Loukok, Uchiwa Bengul, Uchiwa Meitei Khul leh Uchiwa Kabui ten haksatna tuak un a kigen hi. Chuleh, lo (paddy field) 2000 hectare lam te chu tui in chum a, Uchiwa Wangbal Awang leikai ah relief camps 3 hawn in a um hi.
ONE-DAY BRAINSTORMING SESSION
Imphal, June 2 (Nisin Thuhiltu): Department of Planning, Govt. of Manipur panna Steering Committee saina’n tuni’n Institute of Co-operative Management, (ICM), Lamphelpat ah "Additional Resource Mobilization in Manipur" ti thupi mang in one-day brainstorming session a um hi. Zia hun chu Director, Commerce & Industries, Govt. of Manipur, M Luikham, I.A.S ; Former Director, Economics & Statistics, Govt. of Manipur, O. Biren; Chairman, Steering Committee, Two-Day State Level Seminar on Development Priority, Prof. N.Mohendro leh Director, ICM ,Lamphelpat, Dr.N.Ranjana Devi te’n resource persons hina tawh session a mapui ua, Department of Commerce & Industries and Forests, Govt. of Manipur, MU faculties leh affiliated colleges, entrepreneurs, intellectuals leh official chuam chuam tamtak in a uap ui. O. Biren in a genna a chun, 2016-17 Budget estimate, State's tax income 3.9 % hin a gen a, zia chu Rs.667.20 crores sang ah tamzaw a hidan taklang kawm in non-tax income 5.67% hin a gen a, zia chu Rs. 199.22 crores sang ah tamzaw hin a gen hi. Central tax lak ah State share chu 14.34% hin a gen a, a sum ah Rs.3561.89 crores tung zo a hidan genkawm in resources dang ah Govt. of India income chu Rs. 4947.39 crore s tawh kibang 76.02% hin a gen hi. Manipur ah small non-tax utilisation ziak ah additional finance pawimaw in le agen a, State's tax muna pi pen chu: land revenue,State's Excise duty,Sales Tax, Stamp & Registration, Electricity, Entertainment Tax, Professional Tax, Taxes on Vehicles, Taxeson Passengers & Goods, Agriculture & Income Tax, Urban Immovable Property Tax leh Hill-House Tax te a hidan a taklang hi. State Planning Unit in kituptak ah documentation tawh mawpuakna a chiapilona chung ah, department zosia documentation cell a umlo leh information update bawl thei hilo in a gen a, zia chu Index of Industrial Production (IIP) khuattuakna ding ah pawimaw hin le a gen hi.
86 BN CRPF IN 33RD RAISING DAY MANG
Imphal, June 2 (Nisin Thuhiltu): Lamphelpat ah um 86 Bn CRPF in tuni’n Kalyan Singha, Commandant puihuaina nuai in 33rd Raising day a mang a, zia hun chu officer, jawans leh a insungmi teu tamtak in a uap ui. Raising day matna hun chu Vikram Sahgal, IGP Manipur & Nagaland sector in Chief Guest hina tawh a uap a, Indian leh Chinese Food stalls chuam chuam hawng in, cultural event tawh 33rd Raising day amang ui. Unit leh local orchestra chuam chuam in laa sakna, cultural dances, bamboo dance, Khamba Thoibi dance, Bihu & d Bhangra dance ti te suklatna a nei ui. Hun matna chu - Chief Guest Vikram Sahgal, IGP Manipur Nagaland sector banah Dr. Subhash Damle, DIGP GC Imphal, Mohindra Singh, DIGP Ops sector M&N, Brig.(Retd.) S.K.Sharma, DIGP Range Imphal, R. Duidang, DIG (Adm) M & N sector, Dr. H.C. Lingaraj, DIG Medical, CH Imphal leh Commandant banah Imphal based units officer chuam chuam in le a uap ui.
CM IN NI 3 SUNG UM DING ‘MODI’ FESTIVAL HAWNG
Imphal, June 2 (Nisin Thuhiltu): Chief Minister N. Biren Singh in tuni’n Iboyaima Sanglen, Imphal ah ni 3 sung um ding State-wide publicity campaign 'MODI fest' (Making of Developed India Festival) hawnna a nei hi. Centre ah Narendra Modi government kum 3 tin lawpna ding ah Modi fest chu organised a hi.
Prime Minister Narendra Modi mapui NDA government in kum 3 sung ah a sepdaw leh a bawldaw te Chief Minister N. Biren Singh in taklatna a nei a, mipi te dawina gual ah government in nasem zing ding a hidan a gen hi. Tuhun ah state sung ah Communal harmony pawimaw mama in a gen a, Communal harmony a pat khantona leh masawnna um ding hin a gen hi. Chief Minister in a gen belapna a chun, damdawi chi 300 val te Primary Health Centres panna government hospital te ah tunung sawtlo ah a thawn ah muthei hita ding hin a gen a, MRI scan tiang ah natna chi chuam chuam zendamna ding ah damdawi a thawn ah muthei hiding in le a gen hi. Zia hun matna chu - MP, Rajya Sabha, Ksh. Bhabhananda Singh, Minister for Tribal Affairs and Hills and Fisheries N Kayasii, Parliamentary Secretary (Home), L. Sushindro Meitei, Parliamentary Secretary (Health and Family Welfare) Soibam Subhashchandra Singh te’n le a uap ui.
CM N. BIREN SINGH IN AIR IMPHAL WEBSITE LEH MOBILE APPLICATION HAWNG
Imphal, June 2 (Nisin Thuhiltu): Chief Minister N. Biren Singh in tuni’n All India Radio (AIR), Imphal a ding website "airimphal.in" leh mobile application "airnewsimphal" hawnna, office complex AIR, Palace compound, Imphal in a nei hi. Chief Minister N. Biren Singh in a thugenna a chun, radio chu communication lam ah hat mama te lak ah khat, state sung ningtin leh mitamtak huappha a hidan a gen a, AIR, Imphal in state sung ah national integration, communal harmony leh emotional integration lamthil ah thil thupitak sem dawk in a gen hi. Website leh mobile application - Parliamentary Secretary (Home), L. Sushindro Meitei, Deputy Director General, AIR Imphal RP Joshi, Director-in-Charge Dilip Mayengbam, Head, Regional News Unit, AIR Imphal Dr. A. Ibomcha Sharma leh AIR Imphal official ten a uap ui. Hiatthei khat chu, India ah All India Radio, Imphal chu website leh mobile application nei masapen a hinalai hi.
MOREH LAMPI SECURITY TE ATTACK TAWH KISAI KHUAL DING 7 MEMBER COMMITTEE SIAMDAW AH UM
Imphal, June 2 (Nisin Thuhiltu): Manipur State Home Department in order a suana a chun, Moreh leh a kiangnai tuam ah tulak IED sukpuak, security forces te ambush leh civilian tha kiti a um mun mama na chung ah State Government in thil umdan leh a ziak, a zal khualna nei ding 7 member Committee siamdawk a hidan a taklang a, zia Committee chu Pramod Asthana, ADGP in Chairman hina tawh mapui ding a hidan taklang kawm in member ding ah S. Ibomcha Singh,IGP(Admin), Brig(Retd) S.K. Sharma,DIG/CRPF, A. Shamoo Singh, DIG/BSF banah IGAR (South), GOC, 57Mtn Div leh DD/SIB a pat member khat chiat guat a hidan a taklang hi. Zia Committee chun attack kibawlna, IED sukpuak ah a umna leh kitha kimatna um te kua groups ahiloleh mimal nasep thil bawl a hi em ti khualna nei ding uh leh ni 15 sung ah Report a piaklut ding uh ti a hi.
JWALAMUKHI BATTALION IN KUFO CADRE 1 MAN
Imphal, June 2 (Nisin Thuhiltu): Senapati Brigade nuai ah Jwalamukhi Battalion troops te’n a chiata 31 May 2017 ni a khah KUFO cadre khat Saikul Bazar ah mandawk a hidan tuni’n taklat in a um hi. Mat ah um cadre chu Seikham Chongloi (49) s/o Abong Chongloi, r/o Lhungtin Village, PO – Saikul of Kangpokpi district a hia, a kipuan dungzui ah KUFO Finance I/C a hi. Ama a pat chu 01 x Country made 9 mm pistol, 01 x Magazine 9 mm pistol, 02 live rounds of 9 mm pistol, 01 x Pouch & 02 x Mobile banah SIM card mudaw a hi.
POWER MINISTER MAPUINA POWER DEPARTMENT IN MONTHLY REVIEW MEETING NEI
Imphal, June 2 (Nisin Thuhiltu): Power Minister Thongam Biswajit Singh chairman hina nuai ah tuni’n ama office conference hall, New Secretariat, Imphal ah Power Department monthly review meeting a um a, zia meeting chu Chief Secretary Oinam Nabakishore, Manipur State Power Company Limited & Manipur State Power Distribution Company Limited Managing Director N Sarat leh Executive Director L Priyokumar te panna department official te’n a uap ui. Meeting hun ah Minister in Centre chiapi dungzui ah Smart Meter a lotheilo ah mat ding ti chu state ah le chiapi ding in official te a hiatsak a, Imphal bazaar area ah Smart Meter installation pan ding in thupiak a bawl hi. Department revenue a hawi theina ding ah electricity quality supply a um ding pawimaw in a gen a, complaints a um hun ah ni 1 sung ah le transformer thak peziang thei ding ah department a um ding pawimaw in a gen hi. Chief Secretary Oinam Nabakishore in a genna a chun, department official leh staff te’n customer te kituptak ah bawl ding leh mipi’n department a etla theina ding ah panla chiat ding in chialna bawl a, department prepaid service chu billing system sang ah mantawmzaw a hidan taklang kawm in department in prepaid system mang ding ah customer te tilkhona nei ding in le chialna a bawl hi. Department official ten le issue chuam chuam taklatna nei in Kangpokpi leh Senapati circle ah 2100 prepaid meters activate bawl ah um a hidan a taklang ua, consumer khenkhat in prepaid meter kitua nung ah a fee tamthei talua complaint bawl pawl um a hidan te le hiss chuam chuam a taklang ui. Department official te haksatna chuam chuam ngaitha kawm in Power Minister Thongam Biswajit Singh in electric kigu check bawl zing ding leh state pumpi huap ah AV cables install bawl masa ding in hiatsakna a bawl a, AV cables install masat hileh diklo tak ah electric gu leh mangtute matdaw bailam ding hin a gen hi.
PWD MINISTER IN PROJECT REPORT PELUT DING AH PWD ENGINEER TE HIATSAK
Imphal, June 2 (Nisin Thuhiltu): Public Works Minister Thongam Biswajit Singh in tuni’n PWD official te Chief Engineer PWD Ch Tiken panna review meeting a nei pi a, zia hun a chun - division zosia Executive Engineer te Chief Engineer kiang ah a vaima theipen ah progress report pelut ding ah hiatsakna bawl in, project min, deadline, IVRs, OVRs, MVRs, highways panna lampi kisiamna zosia status detail le pelut ding in hiatsakna bawl hi. Minister Thongam Biswajit Singh in meeting hun ah a thugenna a chun, manpower kining ting tak a um theina ding leh department kituptak ah a function theina ding ah panla chiat ding in department official te chialna a bawl a, SO leh staffs dang dang kining ting tak a um theina ding ah recruitment bawl ding ah guanggalna um a hidan taklatna a nei hi. Muster-rolls leh nisin nikhawtha kilaw te dinmun kituptak ah enzui ding in official te thupiak a nei a, Imphal area ah tui let ziak ah haksatna um te le kituptak ah enzui ding ah hiatsakna bawl hi. Department in amat gari lian te dinmun kitup tak ah enzui ding ah thupiak nei kawm in official te chu kum 15 sang ah upa zaw gari te zuak dawk ding in chialna bawl a, a kisaipi engineer te chu highway leh State Assembly mai ah lampi kuakna te a vaima theipen ah siampha ding in hiatsakna a bawl hi. Chief Engineer in government ni 100 programme nuai ah Imphal-Senapati-Mao lampi siatna te siamphatna chiatha zing hin a gen a, Sendra Tourist Circuit chu June 26 leh zawthian hiding in a gen hi. Tupul - Kasom Khullen, Tongjei Maril, Irang Bridge leh Leimatak Bridge te panna restoration work chuam chuam chiapi ah um a hidan taklang kawm in Bungalows leh PWD office dinmun te genna latna a nei hi. Chulegh, Churachandpur leh Tamenglong tilo District zosia Mini Secretariat kisathak te zothian hita hin a gen hi. Chuleh, 12th Five Year Plan ah NERDS nuai ah road development a ding ah Rs.450.00 crores bithiat a hidan a gen hi.
STATE ASSEMBLY SESSION AH GST BILL LUIDAW AH UM; 5TH JUNE LE GENKHAWM HIDI
Imphal, June 2: 11th Manipur Legislative Assembly, 1st session (Part-II) tuni’n a kipan a, 6-Keirao Assembly Constituency a pat Congress MLA lui, damlona ziak ah tunaicha a la mualliam Karam Thamarjit Singh suunna leh Business Advisory Committee report piakna banah Governmnet Bill “Manipur Goods and Services Tax Bill, 2017” luidaw in a um hi. House leader Chief Minister Nongthombam Biren in suunna hun ah a thugenna a chun, Karam Thamarjit Singh mualliam chu khawk a sakthu taklang in a nutsia a innsung mi te suunpi thu a puang hi. Opposition leader leh Chief Minister lui Okram Ibobi Singh in famta Karam Thamarjit tawh a hun matkhawm dan uh leh talented enterprenuer a hidan te a gen a, Speaker, Y. Khemchand, Ministers Karam Shyam, Th Biswajit, Losi Dikho, Nemcha Kipgen leh MLA Paonam Brojen te’n le Congress MLA lui Karam Thamarjit Singh suunna thu a gen ui. Suunna hun matzaw in, Finance portfolio le tuk Deputy Chief Minister Yumnam Joykumar Singh in Government Bill “Manipur Goods and Services Tax Bill, 2017” luidawna a nei a, GST Bill phatchuam dan te genlatna nei in, GST bill chu Bill pawimaw mama hin a gen hi. Bill pawimaw mama a hina chung ah house member zosia GST Bill support chiat ding in chialna a bawl a, Manipur in GST Bill chu nasatak ah phatchuampi ding a hidan a gen hi. A langkhat lam ah tuni ah luidaw ah um “Manipur Goods and Services Tax Bill, 2017” chu June 5, 2017 leh Assembly ah genkhawm hiding a hi. Tuni Assembly session a chun - MLA, RK Imo, Ksh Biren leh Dr. Chaltonlien Amo te a pang puau a, medical ground ah leave la hi ua hiat a hi. Chun, BJP join thak Congress MLA te lak ah minister Thounaojam Shyamkumar tilo a dang sia opposition bench in a chu vek ui.