RSS WORKER KITHANA CHUNG AH GOVERNOR IN ACTION KHAUTAK LA DING AH KERALA CHIEF MINISTER HIATSAK  
Thiruvananthapuram, May 13 (Nisin Thuhiltu): Kerala, Kannur district, Payyanur town ah RSS worker te leh CPI(M) activist te kal buaina ziak in Simhaini (Friday) a khan Rashtriya Swayamsevak Sangh (RSS) worker Choorakad  Biju (26) chu sawisak lup in a um hi. Zia kithana tawh kisai chu sosang mama in Kerala Governor P. Sathasivam in tuni’n  Chief Minister Pinarayi Vijayan chu Kannur district ah kithana tawh kisai ah action khautak la ngal ding in thupiak a nei hi. BJP delegation meber 3 in Raj Bhavan ah tuni Governor kimupi ah, RSS functionary Biju kithana tawh kisai ah action lak ding phutna petition a piaklut uh tawh kitawn ah Kerala Governor in Chief Minister chu a pet pet ah action langal ding ah hiatsakna a bawl a hia, zialo a chun, BJP delegation member te petition copy le Chief Minister kiang ah thawtsawn a hidan thusuak in a gen hi.  Zia kithana ziak a chun, former Union Minister and MLA O. Rajagopal mapuina Bharatiya Janta Party (BJP) delegation in Kannur  Dsitrict chu disturbed areas ah  puan ding leh Armed Forces Special Powers Act (AFSPA) phutna a nei ua, Kerala BJP chief Kummanam Rajasekharan in le “disturbed area”  leh AFSPA kawi ding chu nasatak in a tangko hi. Politically sensitive Kannur district chu a chiata kum 1 sung ah  CPI(M) leh BJP-RSS activists te kal sosan zingna leh kibuai zingna mun uh a hia, tu ah kithana chu tukum January 2017 a pat pawl 2 kal buaina a sosan kit patna a hi. Police thusuak in a gen dan ah RSS worker Choorakad  Biju (26) chu motorcycle ah tai, Payyanur  Town kiangnai ah CPI(M) activist te’n a la lamtin ah a sawisak lup uh hin a gen hi. Local RSS leader Biju chu CPI(M) activist C V Dhanraj kithana case ah accused le a hia, jail a pat bail ah ki pawtsak a hi. A langkhatlam ah BJP delegation member te’n Governor kiang ah petition a piaknau a chun,  Kerala ah Left Democratic Front (LDF) in government amapui ua pat RSS worker 14 lam in ruling CPI (M) worker te attack bawl ziak ah a hinnau chaanta a hidan uh taklang kawm in State government chu Kannur district buaina support bawl in ngawna a siam ui. Zia kawmkal a chun, Union Minister of State for Micro, Small and Medium  Enterprises Giriraj Singh in tuni’n  Kerala ah CPI(M)-led LDF government chu “terrorism” leh “Goonda Raj” support bawl in a gen a, Kerala ah freedom of speech a umlo bak ah terrorism leh Gunda Raj te’n vaihawm un a gen hi. Mr. Singh in a genbena a chun, Kannur Dsitrict  buaina chu State level law & order  buaina hizawlo ah gamsung pumpi issue hin a gen hi.


VPC LINGSIPHAI, SANGAIKOT LEH IMPHAL BLOCK IN ELECTION NEI  
Lingsiphai, May 13 (Nisin Thuhiltu): Vaiphei Peoples’ Council (VPC) GHQ mapuina tuni, 13 May 2017 (Kiginni) in VPC block thum ah kum 2017-2020 sung ah puitu ding telna Lingsiphai, Makhau leh New Lambulane ah nei a hi. Zia block thum kitelna neite a hiu leh Lingsiphai block, Sangaikot block leh Imphal block te a hiu. Lingsiphai block in a huap hausa chuam chuam leh Unit a pat palaite’n Lingsiphai khua puitu thak ding telna a nei ui. Chairman ding in Upa Nengtingen leh Vice Chairman ding in Upa Nengsuanthang teltin a hiu. Zia kitelna hi VPC GHQ a pat Kap Banyan leh Khamneithang Vaiphei te’n puihuai in, teldaw ah umte VPC GHQ President Khatkhotong Baite in kitiamna a neisak hi. Ankuang sawkkhawmna le nei ngal uh ahi dan hiat a hi. Sangaikot block kitelna a hileh Makhau khua ah nei a hia, Seikholun Baite leh Mangcha Baite Chairman leh Vice Chairman ding in telti’n a hiu. VPC GHQ a pat Vice President Lalzakhai Vaiphei leh Customs & Culture Secretary Liankhothang te’n kitelna neipi in, kitiamna le Vice President in a neisak ngal hi. Imphal block kitelna New Lambulane ah MPCS hall ah nei a hi. VPC GHQ ah cabinet member Lunneikhup Vaiphei leh Dr. Lamkhogen te’n kitelna neipi in palai hungkhawmte’n kituak tak in Letsei Vaiphei Chairman ding in leh Hentinhau Vice Chairman ding in a telting ui. VPC kivaipuakna dan dungzui in teldaw ah um Chairman leh Vice Chairman te’n ni 15 sung in committee thak a siamdaw ding uh a hi. VPC kitelpi kum a hi dungzui in tuni tiang in Chongkhozou, Tonglon, Thanlon, Kangvai, Moreh, Lingsiphai, Sangaikot, Imphal leh Gangpimual block te’n election a nei zo tau. Election nei nailo Leilon, Jiribam, Eastern, K. Sabi, Halflong, Kanggui Tuiliduang, Singngat leh Lamka blockte tu thasung ngei ah zawthian ding ah guanggal a hi thu hiat a hi.


CHAIRMAN, ADC/CCPUR IN SAFE DRINKING WATER TANK HAWNG  
Lamka, May 13 (Nisin Thuhiltu): NERCORMP Churachandpur project nuai ah Tuibuong Block inVajing khua, Vajing NaRM-G ten Safe Drinking Water Tanky  ( small size) 2016-17 nuai ah a sak zaw tak uh chu  Khaipao Haokip, Chairman ADC Churachandpur in tuni, 13 May 2017 zingkal in in Chief Guest hina tawh uap in a hawng hi. A ma’n a thugenna a chun, NERCORMP Churachandpur project hi a gam in a pawimaw dan leh nasa tak ah khua mipi’n  phatchuampi a hi dan leh Central Government  project hawitak a hidan a gen hi.  D.Khuala Vaiphei, Project Manager, NERCORMP Churachandpur in le hun matna uap in, ama’n a thugenna a chun, khua mipi ten kilungtuak tak ah na a sep bep uh hilo, community contribution sangtak  a nei ziakun beneficiary household 25 reward dan ah piakbe ding ahi dan gen hi. Hun matna uap - James Doujapao Haokip, SDO Tuibuong in NERCORMP Office in Rs 50,000  bep a sanction na ah , a khua kochuam leh Village Authority ten Rs. 50,000 chiat tuakdaw be ah, pucca water tanky hawitak a sak uh chu lamdang a sak thu a gen a, mipi te kithu tuakna leh panlakna chu kipakpi ma ma a hi dan leh ettawn taak a hidan a gen hi.  Zia hun matna chun, Grace Zamnu, MDC leh Chief Functionary AWCA in le thugenna a nei hi. Chun, khua-hausa Semjakam in kipakthu genna leh guest te thilpiak piakna a nei hi.


CDSA IN CLUB/TEAM TE HIAT DINGA THUSUA BAWL
Lamka, May 13 (Nisin Thuhiltu): Churachandpur ah sports lama thuneitu sangpen Churachandpur District Sports Association (CDSA) in affiliated club/team te hiatding in thu a sua ua, player transfer bawlthei sung chu May 10 leh May 23, 2017 kikal hi dingin a taklang uh a hi. Zia dungzui ah hin AMFA chun district level ah player transfer tawh kisai semdawk dingin District Sports Association (DSA) khat nuai ah club khat apat club dang; DSA nuai ah MSL club khat apan club dang ah; DSA club khat MSL club hi lo apat MSL club dang ah; leh DSA nuai ah MSL club apat MSL club hi lo club dang ah hi`n tin, CDSA in CDSA nuai ah MSL club hi lo club kikal sung ah; MSL club kikal sung ah; MSL club apat MSL club hi lo CDSA nuai ah MSL club ah ti te hi ding a hi.  Player transfer bawlthei hunsung, May 10 apat May 23, 2017 zingkal dak 7:00AM apat dak 10:00AM kikal sung hi`n tin, chun tranfer application form zik lut hun phatle a kichawn ding player pa chu ama taksa ngei office ah a hang kilaak ding a hi. A pawimaw ding te a hile: 1. Limlak passport copy pani, 2. Tranfer Fee Rs. 1,000. Zia a chunga guala hin CDSA in amau nuaia club/team umte hiat dingin thu a sua u`i.  Chun CDSA lam apat thusuak um kit chu a hile, May ni 10, 2017 ni ah Executive Meeting a nei hun ua thupukna a siam gual un June 17, 2017 phatle 2017-2021 sunga CDSA ah office bearer ding telna um ding ti a hia, zia a dingin CDSA nuaia 2016 apat affiliated club te`n bio data kimtak chu May 27, 2017 ma ngei ah CDSA office ah piak lut ding uh a hi. Zia ban ah hin, inter district player transfer hun chu May 10 apat May 17, 2017 sung hi ding a hin, chun inter club players transfer hun chu May 17 apat May 23, 2017 sung hi bawk ding in a taklang u`i.  Tulai taka CDSA nuaia affiliation, fresh leh renewal bawlnuamte a di`n a bawl hun kihawn jing a hi a ti ban un, kichian zawsem ah he utte`n CDSA temporay office, Tuibuang ah office kai hun sung zingkal dak 7:00AM - 10:00AM sung ah kan chian thei hi ding in thu dawnna chun a taklang bawk hi.

HOSPITAL SUKTHIANNA NEI
Lamka, May 13 (Nisin Thuhiltu): Mualkawi a um STC BSF leh Society for Lamka Integrated Development Initiative (SLIDE) kithua in tuni’n District Hospital huangsung sukthianna a nei ui. Zia hi a hileh Swachh Bharat Mission chiapi na ding ah a bawl uh a hia, STC BSF leh SLIDE te chu SR Ojha, IPS, IG STC BSF Churachandpur in a malat hi. Zia hun a hin, BSF personnel te’n damdawi-inn huang sung sukthianna a nei ban un a nung lam suthiang in thingno phuna le a nei ui. Swachh Bharat Mission a hileh Prime Minister Narendra Modi mapui central government in India ah gamsung khantona ding ban ah a mite dawpkangna leh damtheina lam sukhat ding tupna ah a patdaw a hia, zia nuai a hin programme chuam chuam chiapi in a um hi. Hospital huangsung sukthianna hun a chun, Dr. T Nengkhangmang, Deputy Medical Superintendent, District Hospital in kituapina pia in SR Ojha tawh Hospital a ward chuam chuam te etthâkna le a nei ui. STC BSF Mualkoi in damtheina leh thiangthona ngai pawimaw ah hospital huangsung a sukthianna chung ua Hospital management committee kipak mama hi’n Dr T Nengkhanmang in a gen a, BSF in District Hospital ah Swachh Brahat Mission a chiapi chu mipi te’n entawn leh kithuapi ah nawp nawp na’ nîn pai talo ding leh thiangtho tak ah um chiat ding in le a chial hi. SR Ojha in gamsung hawina ding a nasep chu kithalawp mama a hi dan puangdawk kawm in Churachandpur district chu mun nuamtak, mi phatchuamngai leh  pawlnuam tamtak umna a hiban ah a diak ah BSF camp kîm leh kiang a um te tawh kizawpna hawitak um in buaina bangma um ngailo hi’n a gen hi. Chun, district leh mipi a ding ah phachuam ding a hi nak leh a kithuapi ding ah STC BSF kiman zing hi’n le a gen kawm in maban ah BSF in blood donation camp nei ding hi’n le a puang hi.


KHUGA Bn IN LAMPI PUAPHA
Lamka, May 13 (Nisin Thuhiltu): Khuga Dam a um Khuga Battalion in Khuga Dam zawtna lampi amau sum mang in a puaphau hi. Lampi chu a kisaipi government department in dawt leh dai aha nei lo ziak in Khuga Battalion in theitawpsua kum sin leh a siamphat zing sek a hi. Lampi chu nulla kitup a um lo ban ah dam canal siatna a pat tui luangdawk leh chuk lai hawktui te ziak in lampi chu se mama in mun chuam a pat Khuga Dam en a chia gua khualmi te mu ding in a kilawmlo deu a bang hi. Puaphatlo a hi tawh kitawn in chuklai leh buanthuak in khâl lai leh leivui in a dim sek a hina ah a mun a um Army te’n a kibawl uh a ngai mai hi. Khuga Battalion in amau bull dozer leh mimal khenkhat te truck hire ban ah amau personnel te ma in na sem in lampi a siam phau hi.


DISCIPLESHIP SEMINAR
Lamka, May 13 (Nisin Thuhiltu): Evangelical Baptist Convention nuai a Lamka Division 2- EBC Lamka North Division leh EBC Lamka South Division in tuni’n 10:00 AM a pat mun chuam gel in Pastor, Upa leh Kochuam pakchakna lekha sângte a ding in Discipleship Seminar a nei hi. EBC Lamka North Division in dak 10:00 AM a pat 3:30 PM kikal in EBCC Bungmual Biakinn in Seminar chu a nei a, Rev. Paukhanmang Guite, Director of Missions, EBC in Seminar hun la in thupi chuam chuam pansan in thugenna hun a mang hi. EBC Lamka South Division in seminar chu EBCC Mata Biakinn in a nei a, zia hun a chun Rev. Ginmalsawm, Director of Social Development, EBC in thupi chuam chuam pansan in seminar lakna a nei hi.

‘MEEYAMGI NUMIT’ (PEOPLE’S DAY)
Imphal, May 13 (Nisin Thuhiltu): Chief Minister’s Secretariat ah  May 15 leh  first ‘Meeyamgi Numit’ (People’s Day) a umna ding tawh kisai in arrangement bawl in a um hi. Chief Minister N. Biren Singh in tumasang ah a puan dungzui ah thasin date 15 chu Meeyamgi Numit’ (People’s Day)  hiding ti a hia, public in zingkallam dak 10 a pat nitaklam dak 4:00 kikal ah Minister, Administrative Secretary te, DCs, SDO leh HoDs etc te kimupi thei ding leh  a haksatnau ahiloleh ngaidan leh dawidan tut thei ding uh ti a hi. Zia gual arrangement kisiam chu State Government in elected leader, top bureaucrat leh officer te public in bailam tak ah a kimupi theina ding tupna a hi. Chief Minister N. Biren Singh in thasin leh date 15th ‘Meeyamgi Numit’ ah mat ding chu Khwairamband Keithel ah numei van zuak (women vendors)  te’n April 9, 2017 ni reception function a neipi hun ua a puan a hi.

KSO BLOOD DONATION CAMP
Imphal, May 13 (Nisin Thuhiltu): Kuki Students Organisation (KSO) in IHBT-RIMS tawh kithua in tuni’n Kuki Inn, Imphal ah Blood donation camp organised a bawl hi. Zia Blood donation camp chu kumsin leh KSO in Imphal ah blood bank te kithuapina ding ah organised a bawl a hia, tukum ah blood donation camp chu  Anglo-Kuki War 1917-19, Centenary Celebration tawh kituak hin Seiboi Haokip,General Secretary, KSO General Headquarters in a gen hi. Anglo-Kuki War 1917-19, Centenary Celebration hun tawh a kituak khak tawh kitawn ah donor te’n British te a pat zalenna a um theina ding ah thisan phalngam ah panlakna a la nei uh geldawk kawm ah thisan donate bawl uh hin le a taklang hi. Blood donation camp chu TT Haokip, Chairman Hill Areas Committee in hawnna a nei a hia, ama’n a thugenna a chun, KSO panlakna kipakpi a hidan taklang in, KSO chu tunung tuban ah le society a ding ah thilpha bawl sunzawm zing ding in tilkhona a nei hi. Dr. A. Barindra Sharma, Head of IHBT-RIMS in blood donation pawimaw dan te genna a nei hi. Blood donation camp hun sung in volunteer 100 val in RIMS blood bank a ding in thisan unit 1 chiat donate a bawl ui. Seiboi Haokip,General Secretary, KSO General Headquarters in a taklat kitna a chun, KSO in Jawaharlal Nehru Institutes of Medical Sciences (JNIMS) tawh kithua ah 1 July 2017 leh blood donation camp bawl kit ding hin a gen hi.

MINISTER LETPAO IN TRAUMA CENTRE UMNA DING MUN ENTHA  
Imphal, May 13 (Nisin Thuhiltu):  IFCD  & YAS Minister Letpao Haokip in tuni’n Tengnoupal district, Pallel ah Trauma Centre umna ding mun leh DSA, Kakching ground, Aihang village, Chandel district ah tribal etthakna a nei hi. Minister Letpao Haokip in Pallel –(Moreh-Imphal highway) ah trauma centre chu lamkal ah accident ahiloleh damlona ziak ah buaina tuak te kituptak ah etkawlna ding hin a gen hi. Moreh-Imphal highway chu highway pawimaw mama te lak ah khat a hina chung ah Trauma Centre kawi ding ah lemsakna um hin a gen hi.  Trauma Centre a et masang in Minister Letpao Haokip chu  Molnoi Area Welfare Council in Pallel Molnoi ah kipakpina hun amat piu a, mipi lak ah a thugenna a chun, communal tak ah kikhenna umlo ah area mipi te’n vaidawnna leh kipakpina hun siam uh chu kipak mama hin a gen a, kituaktak  ethnic community zosia chenkhawm ding pawimaw hin a gen hi.

LITERATURE LEH CULTURE IN PANMUN PAWIMAW TAK NEI: DY CM
Imphal, May 13 (Nisin Thuhiltu): Manipur Deputy Chief Minister Yumnam Joykumar Singh Chief Guest hina tawh tuni’n  Maharaj Chandrakirti Auditorium, Palace Compound, Imphal ah 82nd Annual Convention of Manipuri Sahitya Parishad, Imphal a uap a, ama’n a thugenna a chun, literature & culture banah dance leh music in state sung ah kipumkhatna siam hawi chuam mama leh panmun pawimaw tak nei a hidan a gen a, literature, art & culture in society dinmun sulang a hidan a gen hi.  State sung ah community chuam chuam um te culture leh tradition te chu  khat leh khat in kihiat piaktua ding leh ki za (respect) tua piak chiat ding pawimaw in le a gen a,  ziana ding a chu a kuakua’n mawpuakna kinei chiat a hi ti’n a gen hi. Deputy Chief Minister in zia hun matna a chun, “Yumnam Kesho Singh Memorial Lifetime Achievement Award in Literature, Art & Culture” kiti a pa (father) hiat zingna ding ah tunung ah umsak hita ding a hidan a puang a, zia award chu  cash prize rs 1 lakh, Certificate leh Plaque hiding in a gen hi. Guest of Honour hina tawh hun matna uap Education Minister Th. Radheshyam Singh in a thugenna a chun, lam chuam chuam ah panlakna a kua kua’n chamna leh muanna leh kituakna a um theina ding ah panlak chiat ding pawimaw in a gen a, discipline neitak ah society ah um chiat ding pawimaw in le a gen hi.  Zia hun matna a chun, Deputy Chief Minister leh  Education Minister in- “Life and Works of Pandit Khelchandra”  leh “Ningshinghouba Khara Libiramba Khara Pandit Ningthoukhongjam Khelchandra”  kiti lekha pani hawnna le a nei ui.  Chun, P Manipuri Sahitya Parishad President -  Professor Thoidingjam Tombi, President of Manipuri Sahitya Parishad, Assam Karam Ibungohal leh President of Manipuri Sahitya Parishad, Meghlaya te’n le hun matna a uap ui.

HEPATITIS C FREE TREATMENT BAWL HIDI:  HEALTH MINISTER
Imphal, May 13 (Nisin Thuhiltu): Health Department, Manipur State Aids Control Society  leh Yaswant Rao Gaitonde Centre for Aids Research Education (YRGCARE) saina Hotel Classic Grande, Imphal ah tuni’n Hepatitis C free treatment a um a, zia hun chu Health and family welfare minister, L. Jayentakumar in khuallian hina tawh uap in state sung ah Hepatitis C natna ziak ah haksatna tuak te a thawn ah treatment  (free treatment) bawl a hitheina ding ua provision siam hiding in a puang hi. State sung ah natna sukbeina ding leh healthy society a um theina ding panlak chu state government mawpuak hin le a gen a, Health Department, Manipur State Aids Control Society  leh YRGCARE in Hepatitis C ziak ah haksatna tuak te kithuapina ding ah panlakna a nei uh chu kipak pi mama a hidan taklang kawm in, a vaima theipen ah free treatment provision sukfel hiding in a gen hi. Zia hun matna chu  Additional Director of Health, Dr. S. Manikanta  leh  Research Manager of YRGCARE, AK Srikrishnan te’n le a uap ui.

PANDIT N. KHELCHANDRA SINGH, 100TH BIRTH ANNIVERSARY
Imphal, May 13 (Nisin Thuhiltu):  IPATHOUKOK leh Ningthoukhongjam Khelchandra Singh Charitable Trust saina’ Lamphel, IPATHOUKOK Kombirei Shanglen huangsung ah tuni’n  Pandit N. Khelchandra Singh, 100th birth anniversary mat in a um a, zia hun a chun ‘Ningshingluba Khara, Libiramba Khara’ kiti lekhabu thak hawn in a um hi. Zia hun chu  Education, Labour & Employment Minister Th. Radheshyam leh MAHUD, Parliamentary Secretary N. Indrajit Singh banah IPR, Works and CAF&PD Commissioner K. Radhakumar te’n khuallian hina tawh a uap ua, Minister Th. Radheshyam in a thugenna a chun,  Pt. N. Khelchandra Singh in Manipur’s art & culture, tradition leh literature lam ah panlakna a nei te chu zat chuam leh thupi mama hin a gen hi. Manipur’s art & culture, tradition leh literature lam ah Pt. N Khelchandra Singh in a sepdaw hiatthei khenkhat chu Manipur  Cheitharol Kumbaba, Royal Chronicles of Manipur, Manipuri to Manipuri & English Dictionary, Manipuri Language-Status & Importance ti lekhabu te a hi.