*JAC-AATB in Lamka District demand a bawl supiting thei ding dinmun ah State Govt umlo: CM N. Biren Singh*

Imphal, April 13 (Nisin Thuhiltu): Manipur Chief Minister N. Biren Singh in tuni'n Thangmeiband DM College Road (opposite ABC Godown) ah PMKVY Training Centre hawnna a nei a, a thugenna a chun, state sung ah khangthak te a ding ah skill development pawimaw mama leh khangthak te masawnna ding ah a lotheilo thil hin a gen hi. Pradhan Mantri Kaushal Vikas Yojana (PMKVY) chu Union Ministry of Skill Development and Entrepreneurship (MSDE) flagship scheme a hia,Skill Certification Scheme in a tup chu khangthak tamtak te'n industry-relevant skill training a nei ding uh leh khawsakna nuamzaw a theina ding uh ti a hi. Chief Minister in Employment Exchanges record dungzui ahh State sung ah sepna neilo khangthak 7 lakh um a hidan a gen a, Prime Minister Narendra Modi in India ah sepna neilo te'n sepna a neitheina ding ua lunggel nei a hidan a gen a, State Cabinet in PM Modi lungtup mualsua theina ding ah Labour and Employment Department nuai ah Manipur Skill Development Mission chiapi ding lemsa a hidan a gen hi. Government in Skill training kituptak in chiapi leh private firm te tiang in khangthak tam tak te sepna pethei ding uh hina gen a, entrepreneurship promote bawlna ding ah State Government in Departments zosia Manipur khutsuak thil te 'Make-in-Manipur' a ngaikhawk semna ding ua order sua ding hin a gen hi. State Government in corruption chung ah panlakna a neina tawh kisai Chief Minister in a genna a chun, Anti-Corruption Cell siamdaw ah a um nung ah Government in complaint tamtak mu a hidan a gen a, case khenkhat a kisaipi DC leh SP te action la ding ah hiatsak ah um a hidan taklang in, Anti-Corruption Cell te nasepna leh panlakna enzui ding ah Monitoring Committee siamdaw hiding in a gen hi. Churachandpur issue tawh kisai a genna a chun, JAC Against Anti-Tribal Bills (JAC-AATB) demand te lak ah pakhat Lamka district kiti supiting thei ding dinmun ah State Government umlo hin a gen a, District Boundary Commission in report bangkim a piaklutzaw tak leh bep Lamka District damand chung chang ngaitua hiding ah State Government in JAC Against Anti-Tribal Bills leader te hiatsak hin a gen hi. Education and Labour and Employment Minister Th. Radheshyam leh PMKVY National Co-ordinator Hemanta Larma banah Manipur Medical Council President Prof. Sinam Rajendra te'n le PMKVY Training Centre hawnna hun chu a uap ua, Minister Th. Radheshyam in a thugenna hun in per industry requirements/demand dungzui ah khangthak te training piak ding leh ziltil ding pawimaw in a gen a, a pawimaw dungzui ah khangthak te training piak a hilo ua leh skill development programmes in gasua neilo ding hin a gen hi. Chuleh, state sung ah entrepreneurship promote bawl ding leh 'Make-in-Manipur' ngaikhawk thak ding pawimaw in a gen hi.

*Sugnu Mamang Leikai ah inn khat kangtum*
Lamka, April 13 (Nisin Thuhiltu): Kakching District huapsung ah um Sugnu Mamang Leikai ah tuni'n inn khat a kangtum hi. Thu kimu dan in Manglem kiti chenna chu Inn tusun ah kang hin a kigen a, innsung a van vakthei umlo ah kangtum vek hin a kigen hi. In kiang ah um Buhekna khawl (rice Mill) kangsia'n a sum ah hisap ah lakh 30 val man ding kangtum in thudanna'n a gen hi. Meikang kipatna innsung ah Electrict gui hawilo ziak hiding in le a kigen a, Sugnu Fire- Brigade leh Sugnu police leh mipi pangkhawm ah mei phelmit a hi.

*PTC in Executive Committee meeting nei*
Lamka, April 13 (Nisin Thuhiltu): Paite Tribe Council: General Headquarters Executive Committee in tuni zingkal dak 7:00 in PTC/GHQ Office, Hiangtam Lamka ah Executive Committee meeting a 38veina, member absent umlo in a nei ui. Meeting hun ah, a hung tung ding April 22, 2017 ah MLA tingthak te CWC PTC/GHQ ah ex-officio member ding ah laak lutna leh CWC Meeting nei ding ti'n proposed a bawl ua, PTC/GHQ Rising day 2017 ding tawh kisai leh PTC/GHQ Assembly leh General Election ding tawh kisai le a gen khawm ui.PTC/GHQ Rising Day leh Assembly cum General Election ding tawh kisai a hileh, neikhawm ding lemsa lo in, Rising day pen chu a ni ma mat ding, Assembly cum General Election ding tawh kisai chu tu ah term bei hun ah nei ding in a thupuk ui. Zia lo a chun, Guite Road siamna nasep chiatha zing tawh kisai chu, PTC/GHQ in a etzui ding in lemsakna le a nei ui.

*FA II Prize distribution*
Lamka, April 13 (Nisin Thuhiltu): Kaprang khua ah The Heritage Academy in tuni'n amau school ah school staff te saina Formative Assessment (FA) II Prize distribution a nei ua, The Heritage Academy school a kai student nu le pa, school dawisaktu te leh student leh staff te kimtak in a pang ui. Zia hun chu Langkhanpau Guite, Chairman ADC CCppur in chief guest hina tawh a uap a, Dr Chinkholal Thangsing in Guest of Honour leh TThangkhomang Mate, SI BSF in Functional President hina tawh a uap ui. Chief Guest Langkhanpau in student, teacher leh school thu nei tute a ding in tilkhona thu a gen a, Student hinkhua lawtinna ding ah neu a pat a enkawl tu Nu leh Pa, Ziltiltu teacher banah I sang ah upa zaw te za leh thumatna, Pathian ah kibul phutna hawitak nei ding banah Pathian lau kawm ah hinkhua matna a pat lawtinna thupi tak um thei a hidan a gen hi. Chun, The Heritage Academy ah kai FA II Exam ah lawtinna chang a chung chuang diak te kiang in prize piakdawna a nei hi.The Heritage Academy chu Prep a pat Class 7 tiang umna a hia, Class zosia First Division a pat Third division tiang ah pize piak in a um hi.

*Singngat ah Vaisakhi/Baisakhi kimang*
Lamka, April 13 (Nisin Thuhiltu) : Khawvel mun chuam chuam ah Sikh leh Hindu sakhua zuite ding ah ni pawimaw mama Vaisakhi/Baisakhi kiti tuni, April 13, 2017 in Singngat khua ah Khuga Battalion nuai ah 6th Sikh LI Camp, Sikh Biakbuk, Gurudwara ah mat in a um hi. Baisakhi ahihleh Sikh sakhua zuite a ding ah Nisa tawh kituak ah Kumthak banah Sikh sakhua a piandawni leh Khaal thaichi lakkhawmzaw hun ah Kut dan kimang a hia, Sakhua bep hilo Chawndan (culture) tawh kituak ah mat le a hi sek hi. Tuni hun matna a chun, Battalion Guru in Biakkhawmna hun a mapui a, Colonel Mukesh Sharma, Commanding Officer, 6th Sikh LI banah Battalion sung ah Sikh sakhua zui hunkhawp in hun matna a uap ui. Battalion in sun ann nek ding le bawl in, khosungmi banah Hill Model School, Singngat ah kai student-zosia ann a nekpi ui. Baisakhi ahileh kum sin leh April 13 ahiloleh April 14 ni mat ahi sek hi.

*YPA Unit election chiatha zing*
Lamka, April 13 (Nisin Thuhiltu) : Young Paite Association (YPA) New Lamka Block sung ah Unit 12 te term a bei tawh kitawn ah 2017-2019 sung vaipaw thak ding telna zani a pat uh chu tuni sunzawm in V Munhoih leh Khominthang Unit vaipaw thak ding telna anei ua, zia hun a chun, V Munhoih YPA Unit election hun ah candidate 63 um te lak ah YPA member mi 65 in mi 15 telna a nei ui. Teldaw ah um te chu ; T Tunzakham, V Thangkhogin, T Chinpau, M Thankhanlian, V Biaklal, K Zonunsang, H Vunglemthang, K Thianzathng, L Manggoulian, Seikhohau, S Paukhanmung, T Kamkhomang, H Thangthiankham, H Ginthanlian leh S Pumzagin te a hiu. Ziagualma a chun YPA Khominthang Unit vaipaw ding in Lalthakmai, Dongzasiam, Benzamin, Thanglianbel, Zamkhenthan, Tuankhanthang, Moithansang, G Liansang, Pauzalian, Lianchinson, Hausuan, Ngulzakham, Luaiminthang, Langpau leh T Pauginlian te teltin in a um ui. Unit 2 ah Election zingkal lam dak 11:30 vel ah a zaw uh tawh kitawn in nitak dak 6:30 in Unit Office gel in Cabinet ding kitelna a nei kit ua, zia hun a chun, cabinet member 6 leh Executive member 9 teldaw in a um ua, Block lawiupa te'n kitiamna neisak in pauchakna a nei piak ngal ui. Zing April 14 zingkal dak 7 in Vengnuam Unit leh Vengnuam South Unit te'n kitelna nei ding a hiu.

*Hill-Valley mite kal ah ki chuam kawina a umlona ding ahDr Ambedkar gual ah panlak pawimaw: N. Kayisii*
Imphal, April 13 (Nisin Thuhiltu): Centre for Study of Social Exclusion and Inclusive Policy (CSSEIP), Manipur University saina tuni'n Court Hall, Manipur University ah Baba Saheb Ambedkar, 126th Birth Anniversary mat in a um a, zia hun chu Minister of Tribal Development & Hills and Fisheries, N. Kayisii, Vice-Chancellor of Manipur University, Prof. Adya Prasad Pandey, Prof. L. Tombi Singh, Former Director, CSSEIP, M.U. leh Prof. N. Lokendra Singh, Dean, School of Social Sciences, Manipur University te'n khuallian hina tawh a uap ui. Minister N. Kayisii in a thugenna a chun, "Dr. Ambedkar chu nam neu te ki chuam bawlna, kibang tak ah thuneina a umlona kiti te nasatak ah thuakto leh ki chuam bawlna a umlona ding ah nasatak ah panla tu a hidan a gen a, Manipur ah cheng Hill-Valley mite kal ah kikhen chuamna, kihiatthiamlona leh ki chuam kawina um te Dr. Ambedkar gual ah dodal ding leh ki bang tak ah a kua kua'n chanvo a hiloleh thuneina a nei theina ding ah panlak ding pawimaw in a gen hi. Kivaihawmna leh chanvo bang tak a um masang sia khantona leh kituakna umlo ding a hidan a gen a, satte sung ah change a um theina ding government in panlakna nasatak chiapi zing hin a gen hi. Chuleh, a kua kua'n ki dawisak chuamna, ki chuam bawlna chiapilo ding in chialna a bawl hi. Zia hun matna a chun, "Issues in Gender Discrimination" kiti lekha thak le hawn in a um a, Minister N. Kayisii in a hawng hi. Dr. Ambedkar 126th Birth Anniversary mat a hina tawh kitawn in Prof. Ksh. Bimola Devi in "Ambedkar as Social and Political Leader" ti thupi mang in thugenna a nei a, Prof. E. Bijoykumar Singh in "Economic Thoughts of Ambedkar" leh Dr. Yaiphaba Ningthoujam in "Regional Disparities in Development." ti thupi mang in thugenna a nei ui.

*PM in Lucky Grahak Yojna winner te prize pedawk di*
Imphal, April 13 (Nisin Thuhiltu): Prime Minister Narendra Modi in 14th April, 2017 leh Lucky Grahak Yojna for consumers and Digi-Dhan Vyapar Yojna ah winner te prize piakdawna nei ding a hia, zia chuleh digital payment tawh kisai ah panlakna ding chuam chuam le hawn ah um ding a hi. Narendra Modi thugenna chu Doordarshan ah 14th April, 2017 leh 12.25 P.M. - 1:40 P.M sung ah live telecast hiding a hi. Chief Secretary, Government of Manipur in Additional Chief Secretary, Principal Secretary, Commissioner, Secretary, Heads of Department zosia zia programme chu en chiat ding in chialna a bawl hi. Digital Payment System, masawn theina ding ah National Institution for Transforming India (NITI) Aayog, Government of India in scheme pani-Lucky Grahak Yojna for consumers leh Digi-Dhan Vyapar Yojna for merchant a hawn a hia, zia schme 2 te nuai a chu lucky draws for consumers leh merchant te ding ah 25th December, 2016 a pat a khah lucky draw chiapi ah um a hi.

*CM N. Biren kiang ah PREPAK (PRO) cadre 2 ki surrender*
Imphal, April 13 (Nisin Thuhiltu): People's Revolutionary Party of Kangleipak (Progressive) PREPAK (PRO) cadre 2 tuni'n Manipur Chief Minister N. Biren Singh kiang in, Chief Minister's Secretariat, Imphal mun in a ki pedawk (surrendered) ua, zia chu tawh kitawn ah cadre 2 te homecoming ceremony matpi in a um ui. Chief Minister N. Biren Singh in a thugenna a chun, galvan chawi leh gitlo bawl haisan ah mainstream zawm cadre te rehabilitation tawh kisai etthak hiding in a gen a, surrender policy review bawl hiding in a gen hi. Thingnuaimi a ki surrender te government in a inn sungmi teu banah a umna ding uh kituptak peding leh a nei a go tiang uh venbitna peding hin a gen a, cadre 2 te pakchat thu a gen hi. PREPAK (PRO) cadre 2 tuni ah ki surrendered te chu (1) Sergeant Major Salam Sitoljit alias Seven Kumar alias Seven Star Singh ( 28), s/o S. Phulchand of Uripok Khumanthem Leikai leh (2) S/S Corporal Pebam Bishorjit alias Tomcha Singh (24), s/o P. Rojit Singh of Kiyamgei Awang Leikai te a hiu a, Eastern Nagaland, B2 Camp Taka, Myanmar - Nongket, NCTF( Nongpok Chingkhei Task Force), Myanmar camps a pat Chief Minister's Secretariat, Imphal tung ah ki surrender a hiu. Zia hun matna chu Deputy Chief Minister Y. Joykumar leh Cabinet Ministers, Parliamentary Secretaries, DGP, Additional Chief Secretary(Home) leh top ranking police official te'n le a uap ui.

*Digital India tawh kisai ah Interactive Session nei*
Senapati, April 13 (Nisin Thuhiltu): District Administration, Senapati saina' tuni'n 'Digital India, Next Generation Services- Faceless, Paperless & Cashless' ti tawh kisai in DRDA Conference Hall, Senapati ah Interactive Session a um a, zia hun chu Ng. Roben Singh, MCS in BJP Government nuai ah digitalisation of India programme chuam chuam te taklatna a nei a, Deputy Comminssioner (DC) posting thak Athem Muivah, IAS in le hun matna uap in a ngaidan share a bawl hi. Interactive session chu State Bank of India, Senapati Branch, Hepuni Bismarck leh Lead District Manager Tholi Paul te'n phones app leh sms system ah facility chuam chuam um te taklatna a nei ui. Athem Muivah, IAS in tunung ah ziagual awareness programme chu bank te tawh kithua ah sai zing hiding in a gen hi.