Nisin Thuhiltu - 9 April 2017

YVA Compound Veng Unit mapuina vengsung ah Social Work nei

Lamka, April 8: Young Vaiphei Association (YVA) Compound Veng Unit mapuina' tuni 8 April 2017 zingkal lam dak 9:30 a pat in vengsung mip'n Social Work a nei ui. Zia social work a chun mi 200 val kuan khawm in, vengsung ah nullah leh lampi ah plastic sia kipai te pang ah nin kipai thang te sukthianna a nei ui. Zia hun ah YVA Unit President Mr Luaithang in a thugenna chun, pi leh pu te hunlai sang ah tu khang hi khangto mama a hi tawh kitawn ah, nin leh thilsia le a tam diak a, thianthona leh damtheina pawimaw etzui zing a ngai a, i umna chiat sukthian hi a pawimaw hi ti'n a gen hi. Gua zuk leh chuk hun ah nullah kituplo ziak ah mipi'n haksatna tuakzing in, zia chu khawksakna liantak a um ziak a social work sai ah um a hidan le a gen hi. Chun, tuni social work hun ah nupi pawl in lampi ah nin te phiat thiang in, pawsal te'n nullah te suthian in, nin ziak ah nulla bing leh nullah umlo na mun te a siamthak ua, vengsung mipi te kithumatna leh pan khawmna ziak ah social work lawting ahidan Mr Luaithang in a gen hi. Vengsung mipi te chung ah kipak mama in le Mr Luaithang in a gen a, maban a le mipite tawh hawitak ah kithua khawm to zel ah vengsung siamphat zel a hi ding kinepthu taklang in, YVA Compound Veng unit nasepna zosia hun del zui, hun hiatpi leh cover hun bawl piak Press/Media te chung inle YVA Compound Veng unit thasik in kipakthu a gen hi.

LYF GHQ saina' Written Bible Quest kidemna nei
Lamka, April 8: Manipur Evangelical Lutheran Church (MELC) nuai ah Khanglai Pawl, Lutheran Youth Fellowship (LYF) General Headquarter in Diamond Jubilee lawpna ding ding tawh kisai ah kisaklawkna dan in Kochuam member leh khanglaite lak ah kisuklimna leh Pathian a kituklut thakna ding in kidemna chuam chuam neito zel in tuni, April 8, 2017 sunma dak 10:30 in ELWA Jubilee Hall, MELC Office, Zomi Colony ah Lutheran Youth Fellowship, General Headquarter nuai ah Moral and Religion Department saina' Written Bible Quest kidemna a nei ui. Kidemna masang in Pro Pastor M Thangboi Zou, Moral and Religion, Secretary LYF GHQ mapuina hun saulo mat in a um a, Rev Thangliankham, DM, MELC, In-charge Youth in hunmatna ding Pathian' kiang ah hawlsakna nei in Upa S Zamkhanpau, General Secretary, LYF GHQ in thugenna saulo a nei nung in, Bible Quest kidemna pat in a um hi. Bible Quest ah MELC kochuam member 23 a pang ua, kipakman a hileh Diamond Jubilee lawp hun ah piakdaw hiding a hi. LYF GHQ in Daimond Jubilee lawpna ding tawh kisai a chun kum 2016 a pat in kochuam mipi lak ah kitaitetna chuam chuam a sai ua, Diamond Jubilee Marathon, Football, Volley Ball kidemna, Diamond Voice kidemna le a chiapi zing a hi. Diamond Voice Second Round chu April 9, 2017 sunnung dak 1:30 leh Bethel Chapel, Hiangzou ah um ding ti a hi. Chun, Diamond Jubilee tawh kisai ma ah April 15, 2017 leh Sehken MELC ah Fasting Prayer nei ding a hiu a, MELC Central Church, Tuibong ah Praise and Worship hun mang ding a hiu. April 17, 2017 leh Singngat Playground ah Daimond Jubilee football leh volleyball final match um ding a hia, April 18, 2017 leh ELWA Jubilee Hall, MELC Office, Zomi Colony ah Coordination Meeting nei ding, April 21 a pat April 23, 2017 kikal in Diamond Jubilee hunpi matna leh Jubilee lawpna um ding a hi.

One Day Lok Adalat ah ko ah um mi 100 lak ah mi 4 pang
Lamka, April 8: District Legal Service Authority, Churachandpur saina' tuni, April 8, 2017 sunma dak 11:00 a pat Chief Judicial Magistrate Court, Tuibuang ah Bank ah Loan la a batneite a ding in One Day Lok Adalat kiti a um a, zia hun a chun Bank chuam chuam ah loan la a ditkitlo mi 100 val a bat uh tawh kisai genkhawm ding ah ko himaleu mi 4 bep a va pang ua, a bat uh tawh kisai District Legal Service Authority, Churachandpur nuai ah Advocate te'n Bank-te tawh genkhawmna nei in, Bank te'n a bat ua kipat Rs. 33,740 ngaidam ding in lemsakna a nei ui. Zia hun a chun, Canara Bank, Churachandpur Branch a pat mi 2 leh State Bank of India, Churachandpur Branch a pat mi 2 a pang ui.

5th Graduation Program mang

Lamka, April 8: Angel's Place, Bungmual in 5th Graduation Program tuni, April 8, 2017 sunma dak 11:00 in Lydia's Hall in a nei ua, Ringsokmi in hun pat pauchapna nei in, Dr. R. Sanga in vaidawn thugenna tawh hun matna tawh kisai genlatna a nei a, 2 Little Angels te'n Special Item suklatna a nei ui. 5th Graduation Program a chun, Jan C. Swensen, USA, Bill Minsaker, USA, Gordon L. Mendenhall, USA te'n thugenna a nei ua, Angels Trio-ten lasakna a nei banun Zezz Boys & Co. te'n Dancing with the Beat kiti suklatna a nei ui. Hun matna chu Chief Guest hina tawh Th. Joykumar, Managing Director, Thangjam Agro Industries Private Limited in a uap a, ama'n a thugenna a chun, kim-le-kiang ah thing-le-gua leh ganhingte kepbit pawimaw a hidan genkawm in, Dr. R. Sanga leh USA a pat suapi pathum te'n Angel's Place a bawldaw nung ua naupang tampi'n phatchuampi a hina chung ua amau te gual ah damsung ah midang te a ding ah thilpha chuam sep ding dan a gen hi. Angel's Place 5th Graduation Program ahileh Angel's Place in kum nga sung ah graduate student-te a ding ah a nei uh a hia, zia dungzui a chu kum 2011 in mi 1, 2014 ah mi 2, 2015 ah mi 9, 2016 ah mi 9 leh 2017 ah mi 14, a kigawm ah mi 35 te graduation program matpi a hi. A kigendan in Class XII a zaw tak uh leh Home ah um Home a pawtsan uh ngai in a kigen hi. Angel's Place chu nu leh pa neilo, nu neilo, pa neilo te umna ding ah kibawl a hia, tu leh tu pasal 76 leh numei 85, a kigawm ah naupang 161 Home in a um ui.

PLS in pau matdan leh lekha zik dan genkhawm

Lamka, April 8: Paite Literature Society/Paite Laipau Saipawl (PLS) Lamka in tuni, April 8, 2017 sunma dak 11:00 a pat Dorcas Mini Auditorium, Dorcas Hall, New Lamka ah General Body meeting a nei a, zia meeting a chun, Paite sung ah lekha zik mi, pau-le-ham lunglut mi hunkhawp le a pang ui. Meeting hun ah S Lallianmang, Secretary, PLS leh S. Vungsing, Finance Secretary, PLS te'n Secretary Report leh Finance Report piakna a nei ua, Paite Elective Sub Committee tawh kisai T Awnzagen, Chairman in genna a nei hi. Lianzapau Samte, President, SSPP GHQ in Special Report piakna a nei hi. Chun, Paite pau ah lekha zikdan, pau leh ham matdan tawh kisai a chiakhawm member te'n genkhawmna a nei ua, PLS khantona ding leh maban panlak dingdan tawh kisai le a gen khawm ui. Paite Literature Society ahileh Kum 1945 ah Paite Literature Fund ti min mang ah dindaw ah um, 1953 kum ah Paite Literature Committee ah kisang, May l0, 1954 ni ah Paite Literature Society (PLS) ti ah a min kisang kit, tuni tiang ah zia chu mat hizing a hi.

Seppatni Old Age Pension sum kihawm zawm ding
Lamka, April 8 (NISIN THUHILTU): District Social Welfare Office, Chiengkhonpang, Tipaimukh Road ah Churachandpur District a ding in Indira Gandhi National Old Age Pension Scheme nuai ah tha 5, April 2015 a pat August 2015, tha khat ah Rs 200/- a kigawm ah Rs 1,000 kihawm in, taksa ngei ah sum la chiatheilo ding te'n zikthaw ah District Social Welfare Officer kiang ah kidawtna a piak lut ding uh ti a hi. Old Age Pension sum ahileh Seppatni, April 11, 2017 leh Thanlon Assembly Constituency nuai ah Pension Card Holder te'n Pension Sum la ding, April 12, 2017 leh Tipaimukh Assembly Constituency te'n la kit ding a hiu.

March tha sung ah Dist Damlo-Inn ah nausen 261 piang; Damlo 22 thi
Lamka, April 7 (NISIN THUHILTU) : District Hospital, Churachandpur ah thalui, March 2017 sung in Out Patient Department (OPD) ah ki-etsak mi 11, 276 a um a, Maternity Ward ah nausen 261 piang in, Blood Bank ah thisan Unit 122 piakdaw in a um hi. OPD ah ahihleh General ah mi 11, 276, pasal 4624 leh numei 6652 in ki-etsakna ding in ticket a lau a, Maternity Ward ah March tha sung in nu ni a pat nausen piangkawp 2 pang in nausen 261, Pasal 121leh 117 a piang hi. Zia lak a chun, a thisa piang nausen 2 a um hi. March thasung in Operation, Major 122 leh Minor 62 a um a, Casualty/Emergency Department ah ki-etsak mi 1545 lak ah mi 281 admit a hiu. March tha sung in hospital ah numei 11 leh pasal 11, kigawm mi 22 in thina a tuak ua, Patholoy leh Microbiology Investigation 1705 um in, Radiological investigation 603 a um hi. Blood bank ah thisan unit 135 lakkhawm in a um a, zia lak a chun, replacement 78 leh voluntary ah thisan donate kibawl unit 57 a um hi. March thasung ma in thisan Unit 122 piakdaw in a um a, Biochemistry report 914 a um hi. District hospital ah damlo te a ding ah lupna umdan ahihleh Medicine ward ah lupna 31, Pediatrics ward ah lupna 28, surgery, ortho, ENT Eye leh Dental ward ah kigawm ah lup 38, Gynae leh OBST Ward ah lupna 25, Post partum ah lupna 8 leh Casualty observation ah lup 11, hospital ah damlo a ding lupna ward chuam chuam kigawm in lupna 141 a um hi.

ADCC Chairman mapuina thil chuam chuam genkhawm
Lamka, April 7 (NISIN THUHILTU) : Autonomous District Council (ADC), Churachandpur nuai ah Member ding ah um teltin ah um MDC te'n tuni, April 7, 2017 sunnung dak 2:00 in ADC Chairman' Office Chamber ah Informal Meeting nei in thu pawimaw chuam chuam genkhawmna a nei ui. Meeting hun ah teltin ah um MDC tamzaw a pang ua, Langkhanpau Guite, Chairman, ADC Churachandpur in meeting amapui hi. Chairman, ADC Churachandpur in meeting tawh kisai thuthak lakhawm mite kiang ah a genna a chun, Thingtang ah Lo bawl mi a tamzaw'n lo hal nailo a hinau ah maban ah Lo bawl hak ziak ah Kial tungthei dinmun ah um, Member zosia'n amau bial sung chiat ah panlakna kituptak a nei ding uh leh ADC etkawlna nuai ah um School 11 ah Biometric Attendance System mat pat ding dan leh tunung sawtlo ah School 10 kawibe ding dan, April 15, 2017 leh 11th Manipur Legislative Assembly Election 2017 ah Churachandpur District a pat teltin thak ah um te ADC in kipakpina hun a pun ah matkhawm pi ding chung chang genkhawm uh hin a gen hi.

ADCC nuai ah Headmaster/Headmistress te'n meeting nei di
Lamka, April 7 (NISIN THUHILTU) : Autonomous District Council (ADC), Churachandpur nuai ah um School zosia Headmaster/Headmistress te'n a hung tung ding April 10, 2017 sun dak 12:00 leh ADCC Meeting Hall, Tuibuang ah meeting nei ding a hiu a, school zosia Headmasters/Headmistress te pello ah pangkim chiat ding in Soiminlian Lengen, MSC, Chief Executive Officer, ADC Churachandpur in hiatsakna a bawl hi. Meeting hun ah ADC nuai ah um School um te tawh kisai ah thu chuam chuam chua banah school puaphat dingdan genkhawm hiding ti a hi.

International Conference ah lecture bawl
Lamka, April 7 (NISIN THUHILTU) : Miss Betty Lala d/o Rev PG Lala Vaiphei & Sonkim chu tunaicha a khan Singapore khawpi ah 5th International Conference on Civil Architecture, Environment and Waste Management hun in gam chuam chuam a pat research paper present bawl te lak in a pang a, zia hun a chun ama'n a research bawlna tawh kisai in lecture a la bawl hi. Miss Betty Lala hi, Dr. DY Patil College of Architecture, Akurdi, Pune ah kum 2010 ah B.Arch (Bachelor of Architecture), 1st division ah a la zo, Indian Institute of Technology Roorkee (IITR) ah master's program a zawp masang ah kum 2 sung architectural firm ah a la sem, IITR ah master's program a zawp nung ah student exchange program ding selection a mu tawh kitawn ah DAAD IIT sandwich student exchange program piak ah um, Technical University of Berlin, Germany ah research zo a hi. A ma'n 18th-21st January 2016 sung ah, ChiangMai Thailand ah um Asian American Academic Conference hun a khan le "Thermal comfort" tawh kisai in lecture a la bawl hi. Miss Betty Lala ahileh tu leh tu Manipal University (Faculty of Architecture) ah Assistant Professor a hi. Chuleh, ei thingtangmi te lak ah International Conference chuam chuam ah Architecture lam tawh kisai ah research paper present bawl hiatthei umsun hinalai in a kigen hi.

YPA nuai ah Unit 12 in election nei di
Lamka, April 7 (NISIN THUHILTU) : Young Paite Association (YPA) New Lamka Block nuai ah um Unit 12-te, a term uh a bei tawh kitawn in a hung tung ding April 12 a pat April 18, 2017 kikal sung ah Election thak nei ding a hiu. Zia hun a chu leader ding mi 15 teldaw masat hiding a hiu a, teldaw ah um te'n Cabinet member ding mi 6 a teldaw ding uh, a dang mi 9 te chu Executive Member hiding a hiu. Ni khat ah Unit 2 zel ah Election nei ding a hidan uh S. Manlian, President, YPA New Lamka Block in a gen hi.

Kholmun (A) leh Leisang Polling station ah TN Haokip in vote mutam pen
Lamka, April 7 (NISIN THUHILTU) :11th Manipur Legislative Assembly Election 2017 ah 59-Saikot Assembly Constituency sung ah Vote khiak dan tawh kisai tuni, April 7, 2017 sunma dak 11:00 in Gibeon Cottage, Bijang ah Booth Level Performance Review Meeting leh Kipakman hawpna banah Public Interaction Function kiti a um hi. Zia hun a chun, Nehthang Mate, Ex-MDC in Election tawh kisai nung etkitna leh Report piakna a nei a, Ngamhao Touthang, Election Agent in 59-Saikot Assembly Constituency sung ah Booth Level Performance Review mapui in, 59-Saikot Assembly Constituency ah MLA ding ah teltin ah um TN Haokip a ding ah Vote mu hoina pen pen te kipakman piakdawna a mapui hi. 59-Saikot Assembly Constituency ah teltin ah um TN Haokip a ding ah Vote kikhiakna sangpen ahihleh Kholmun (A) a hia, Vote Percent 83.6 khiak in a um a, zia chu tawh kitawn ah kipakman Rs. 30,000/- piak a hiu a, Second ah Leisang a pang a, Vote Percent 74 khiak a hi tawh kitawn ah Rs. 20,000/- piak a hiu. Third ah Vote Percent 71.3 kikhiakna Mata Lambulane leh Tuinom te'n kipakman Rs. 10,000/- tuak a dawng ui. Category dang ah Tribe Level ah Hmar Area ah Hmar Veng A leh Kom Area ah Moirang Mantak te'n Vote pehawi pen in kipakman Rs. 10,000/- gel piak in a um ui. MLA TN Haokip in zia hun matna a chun, Election ah Congress MLA 17 teltin ah um, BJP a pat MLA 13 um maleh BJP in diklotak ah party dang dang te chawmkhawm ah government form in a gen a, Election zawthian a hi tak tawh kitawn ah Congress in Complain bangma bawllo ding ah thupukna siam a hidan taklang kawm in maban ah Panchayati Raj, Municipal Council, District Council election a umna ding ah kisaklawkna pawimaw a hidan a gen hi. Congress Candidate a kailo zosia le kihopi ah a kailona ziak uh leh thil umdan kituptak ah kanzui a hidan a gen a, hun chiasa chu a chiasa kawi ah, maban ah Congress Worker ten kituptak ah panlak ding pawimaw a hidan gen in, Assembly Election ah ama ding ah panla tu te zosia chung in kipakthu a gen hi.