Police-te’ nasep hoih kipahpih uh
Lamka, Aug-24: New Lamka Numei Thumpawl (New Lamka Women Welfare Assn) pawlin tulaiin SP leh SDPO makaihna in district Police te’n khawtang a siatna bawlhoih tupna in sual douna adikin zu zuakte douna ah hahtaka pan alak ziak ua nasepkhiak thupitak omte ziakin pahtakthu puang uh a, SP leh SDPO makaihna a Police-te nasepna support in back-up gige uh ahihdan puang uhi. Aug 28, 2013 in New Lamka Numei Thumpawl kipankhia ahi uh a, amau Aug 28, 2014 in kum khat chinna zatsawm uhi.

EBC Dorcas Division Khawmpi 5 veina om
Lamka, Aug-24: EBC Baptist Dorcas Fellowship, Lamka South Divn Khawmpi 5veina Aug 22, 2014 nitak dak 6:00 in EBCC G. Mualkawi campus ah Rev Dr Sonna Langzakham, DS Lamka South Divn. in hong a, khua/veng tuamtuam 21 apan paikhawm uhi. Rev S. Vung Minthang, Gen Secy, EBC in Pathian thu gen a, tuni sunnung in ‘Makaihna leh Committee paiding dan’ chih pansan in Rev. Dr. Sonna Langzakham, DS in sinsak hi. Zan sunnung in Khawmpi palai te’n 2014-17 sung Divn Baptist Dorcas Fellowship (DBDF) makai ding telna, Budget leh Year Plan genkhawm uhi. Huai ah 2014-17 sung makai ding mi 15 tel uh a, amau sung ah Officer Bearer ding guang ding uhi. Kum nawn 2015 a DBDF budget din Rs.3 lakh bikhiah uhi. Tuni nitaka kikhopna ah makai dinga telching thak teng Rev. Dr. Sonna Langzakham, DS in na gotna pia a, kidemna result puanna leh kipahman hawmna om a, nitak kikhop zawh in Khawmpi khak hi.

Khawvaiphei Ring Road honna
Lamka, Aug-24: Vaiphei Peoples Council (VPC), Kangvai Block panlakna nuai ah Kangvai leh Loklaiphai kikal kawmtuah a lampi kibawl ‘Khawvaiphei Ring Road’ kichi tuma deuh in honna om hi. Thutut kingah dan in Kangvai khua ah Aug 16, 2014 zinglam dak 8.00 in Ring Road thak honna programme om a, huai ah T. Manga Vaiphei, Chairman/MTDC & MLA (57-Henglep A/C) khuallian a pang hong hi.

Miss Chongngaihchawi panpihna pia
Lamka, Aug-24: Bomb puak ziaka akhe kisia Miss Chongngaihchawi d/o Benjoy of Molnuom (Tipaimukh sub division) tulelin Tuimon khua a innluah kawma VK Tawna College akai tuni’n YMA Chiengkawn Branch te’n panpihna a donkhawmte uh pia uhi. Tuni sunnung dak 1.00 in a inn uh Tuinom ah YMA Chiengkawn Branch President H. Songtinpau Thangzom in sum Rs.11,340/- banah antang bag 1 pia hi. Huaite mi tuamtuam in YMA tungtawn a a thawhkhawm uh hi’n kigen hi.

SP office renovation zou uh
Lamka, Aug-24: SP/CCpur makaih in Dist police leh VDF pangkhawm in kha 1 val SP office renovation a bawl uh zousiang uh a, room teng atuang (floor) ah tile phah uh a, ceiling leh electric wire hoihloute bawlhoih in asung leh apua rong nuhthak uhi. SP/CCpur apan kizadan in anuai a sem Police personel leh VDF-te pankhawm ziaka office renovation bawl zawh hi'n gen hi. Office renovation ziak ahihleh discipline hoihsemna, standard semna ding, nasepna lamzang sem ding, office etlawm mai hilou in a sung a semte'n thoveng, hoihtak leh nuamtaka na semthei a, mipi panpihtheihna ding a renovation kibawl hi'n gen hi.

Khuga Canal tukum in 3vei kichim
Lamka, Aug-24: IFCD in zawhsiang hidan a official report a bawl, Khuga Canal (Left & Right) tukum sungin 3vei kichim a, Aug 22, 2014 in munkhat kichim nawn hi’n JAC on Khuga Dam Project in thusuah bawl uhi. JAC thusuakin a gendan in Centre Govt. apan AIBP fund tamtak zangin kibawl mahleh km 5 sung leng zawhsiang omlou in avangkim in canal kichim a, mihing hinna a laklouh ziakin vangphat huai chi uhi. JAC pawlin Khuga Project a component 3 – Irrigation, Drinking Water & Electricity omna din JAC in panlatou zel ding hi’n puang uhi.

YPA N/L Unit 11na ding hongkhia
Lamka, Aug-24: YPA New Lamka Block nuai a Unit 11a V. Munhoih Unit zanhal nitakin Upa V Vungzathang, Chairman, CEC YPA Gen HQ in hong hi. Huai hunah S.Chin Ngaih Pau, President YPA Gen HQ; Luahkhanchin, President YPA New Lamka Block; T. Awnzachin, President YPA Vengnuam Unit leh President YPA V.Munhoih Unit te’n thugen uh a, BYF Vengnuam, BYF V. Munhoih leh YPA Khominthang Unit ten lapawl sa uhi. YPA V. Munhoih Unit ah inn 134 om hi.

Thanglunmang’ luang mukheta
Lamka, Aug-24: Jiri lui a kelum Thanglunmang (13) s/o Dalkhanlian of Jiribam luang zanhal nitaklam dak 4.30 velin Kapakhal area ah mukhia uhi. Amah August 16, 2014 sunnung dak 1.00 velin Jiri lui a kisil dia kumsuk tuahsia hi a, a tuahsiatna mun apan km 5 vela gamla ah aluang kimukhia hi’n kigen hi.

District Level Science Seminar
Lamka, Aug-24: High School Student (class VIII-X) te adingin Aug 30, 2014 zinglam dak 10.00 akipan in IB Road a Synod Hall ah ‘Innovations in Agriculture for a sustainable future:prospects & challenges’ chih thupi a nei in District Level Students’ Science Seminar om ding a, huaia tel dinga recommend a om student-te telkim chiat dingin ZEO/CCpur in theisak hi. Seminar kipatma in writtern Aptitude test om masa ding chih ahi hi.

Bike in mi 1 phukha in mi 4 liam
Lamka, Aug-24: Lamka lam zuan Pulser bike 180 (red) No. MN02A-1210 a tuang mi 3 te’n tuni sunnung dak 2.00 in Monglianphai khua ah lampi nawl a waiting shed khuam(pillar) lenkawm a dinglai Lalthangthuom @ Thuoma (55) h/o Niengkhochong om Tollen phupai in bike atuang mi 3 leh a phutpa uh liam in bike leng kisia hi’n kigen uhi. Bike taihat petmah hi’n mit a mute’n gen uh a,kike atuangte Driver Jangkholun (24) s/o Ginlam of Sialnah (Singngat sub divn) leh anung atuang Khaimang (37) s/o Thongkholun of Zalenphai (Singngat sub divn) leh Zalenphai khawmi mah Mangkholam (33) s/o Letkam hi uh a, bike a tuang teng atal uh liamvek a, mi 3te leh a phut uh Thuoma tawh Dist Hospital tut in om uhi. Mangkholam a gim deuhziak in Doctor te’n Imphal ah refered uh a, midang 3te Dist Hospital ah admit hi uhi. Bike neitu Lalcha (25) s/o Letkam of Leimatak hi a, sanggampa’ Mangkholam in a zat hi’n kigen hi.
Huailouin tuni nitaklam dak 6.00 velin ZEO office kiangah scooter a mi 3 kipua a taite Bike khat in phukha a, Scooter driver Muanthang (20) s/o Lianmuanthang of Zion Veng, New Lamka liam in hospital ah admit in om a, alawmte bel liam naklou in first-aid piakzawh a paisak hi uh a, scooter phukhatu Bike in taisan hi’n gen uhi.

Medical Assessment camp om ding
Lamka, Aug-24: Dist Medical Board (Disability) saina in Aug 27, 2014 zinglam dak 10:00 akipan in Dist Hospital campus ah Disability Assessment camp om ding hi. Huai hun ah CCpur dist sung a vualphaloute’n Disability Certificate a ngahtheihna ding un doctor te’n medical examination nei ding uhi. Khawzakna hoihloute ading in Aug 26, 2014 zinglam dak 10:00 in Dist Hospital ah atuam in Audiometry neih hiding hi.

Interview hun ding bikhiah thak
Manipur Express a sem ding staff lak behna dingin interview/efficiency test anuai abang a om ding in bikhiah thak ahi a, zinglam dak 11.00 zela kipan ding ahihman in application piate’n ahun lap chiat dinga theihsak hi uhi.
1. Aug 27,2014 : News Editor
2. Aug 28, 2014 : Designer-cum-Computer Operator
3. Sept 1, 2014: Offset Printer
4. Sept 2,2014: Printer trainee-cum-Helper
5. Sept 3,2014: Night Duty-cum-Chowkidar

Suunna :
Mr. Zolianzuala (60) s/o (L) Thrangliana of Red Cross Road tunitaklam dak 4:00 in BP Stoke in si a, Aug. 25 in Lamka Cemetery ah kivui ding hi.

Gen. Tunkhopum Baite’ luang lakkhiakna Video hongkhia
Lamka, Aug-7: Mizoram state sunga kiphum General (late)Tunkhopum Baite, CNLA luang pholhkhiakna leh a vuina hun zatnate ex-CLA Society in a bawlkhiak uh Cassette(DVD Video) tuni’n Hiangtam Lamka a PTC Conference Hall ah Vungzagin Valte, Parliamentary Secretary(Hort & SC/CADA) khuallian a pangin hong a, Rev. Sutkhanthang, Executive Secy, CBA in Pathian kiang ah thumna in lan hi. Huai hun ah Functional President in Langkhanpau Guite, Chairman, ADC/CCpur pang a, Guests of Honour dia seh a om Ginsuanhau,MLA leh S. Hangshyanthang tel theilou uhi.
Chief Guest in a thugenna ah Zosuante ngen kihi a, Chin state ah om lehang Chin hong chi ding ua, muntuam deuh ah om leng Mizo, Kuki, Zomi chih bang in hong kiminvuah ding a, tuate leng a tuamlua hilou in a kilamdanna om tuanlou a, tawndan kibang ngen, kisapdan kibanglou lel i hihman in ikibatna pipen leh i hihna diktak Zosuante chih ahi chi’n gen hi. Functional President in a genna ah nam khangtou hihtheihna dingin lam chituam tuam a masawnna leh khantouhna (all-round development) poimawh a, nam ittu ding a poimawh kawm in nam khangtou hihtheihna dingin education mah poimawhpen a, siamsinte leh khangthakte’n General (late)Tunkhopum’ chihtakna leh kuhkalna dungsun a enton dingin hasuan hi.

Khuga Dam thu ah Minister of State in Union Minister laikhak
Lamka, Aug-7: Minister of State(MOS) for Home Affairs Kiren Rijiju in Union Minister for Water Resources Sushri Uma Bharti kiangah tuni’n laikhak a, Mata khua a Khuga Multipurpose Project ginalou taka om pen akisaipih Department te’n enkai dingin theisak hi. Minister of State in Union Minister kianga a laikhak bel JAC Khuga Dam pawlin Minister of State ava muh nung ua gelhthawh a ngetna apiak nung uh hi a, kal masa in amau Prime Minister’ office a akisaipih Ministry ah lehkha pia uhi. MoS in tuni mah in leng Piyush Goyal, MoS (New and Renewabe Energy , Coal and Power) kiangah laikhak a, Water Planning and Projects Wing of the Centre Water Commission in hilhchetna pe dingin Water Resources Minister in ngiat hi. Khuga Multipurpose project ahihleh kum 2010 in honkhiak himahleh a huai apan piangkhia dinga bikhiah (component) tuamtuam water supply,electric power leh irrigation khat mah leng ginataka function omlou a,huai tungtang ah Delhi a vazin JAC pawlin tuni’n Gen(retd) V.K. Singh , Minster of DoNER leh central leader tuamtuam kimuhpih uhi.

CCpur District akipan mi 7 in Merit Scholarship ngah ding
Lamka, Aug-7: Directorate of Education (S) inkum 2013 a class X leh XII passed student-te lak akipan Merit Scholarship ngahding selection bawl uh a, CCpur Dist apan class X passed student 1 leh class XII passed student 6 telkha hi.Class X passed te’n kum 1 in Rs.6000/- leh class XII passed student te’n kum 1 in Rs.12,000/- ngahding uhi. Class X passed ahihleh Donglianlal Samte s/o Pumkhanmang of Beulahlane (St Pauls’ Institute) hi a, class XII (Arts stream) ngen Kimngainem d/o Pauminlun of Saipum (St Mary College, Shillong); Rebecca Ngaihoihching d/o Khamkhanhang of Lhangvem (CCpur College); T.Mary Neihoihthiem Haokip d/o T.Ginzalam Haokip of D.Phailian (CCpur College); Kimlamching d/o Hangkhankhup of Tangnuam (Rayburn College); L.Richard Ngamboi Mate s/o L.Lawrence Holkhomang Mate of Ngathal (Don Bosco Hr Sec School) leh Lamzapau s/o Khaikholal of HQ Veng (CCpur College) hi uhi. Merit scholarship muding a telkhiak a omte’n ZEO/CCpur office ah document lak ngai ding a, huai tungtawn in bank account ah panpihna sum a lut kei leh complain theih ding hi’n kigen hi.

Private School-te hunchiam omlou in tuni apan kikhak vek ding
Lamka, Aug-7: CCpur Distrct Private Schools’ Assn(CDPSA) a member school omte kiangah helpawl khenkhat in sum a nget ban uah a vau ziakun tuni a CDPSA General Body meeting thupukna dungzui in Aug 8, 2014(Friday) akipan CDPSA nuai a school teng hunchiam omlou in kikhak ding hi. CDPSA thusuak in a gendan in school khak ding ut kei mahle uh helpawlte akipan sum ngetna omsek banah vau tawh a thuah ziakun hibang bouruak ah dinmun haksatak a om uh ahihman in school khak mah ngai phot a, thuneitute leh kuapeuh in theisiam ding in ngen uhi.

Chairman,ADC/Ccpur in hong ding
Lamka, Aug-7: YPA Hanmual, New Lamka a Waiting Shed kibawlthak Aug 8, 2014 zingsang dak 7.00 in Langkhanpau Guite, Chairman, ADC/CCpur in hongkhe ding chi’n Secretary, YPA New Lamka Block apan thutut kingah hi.

Tuni in Street Preaching om
Lamka, Aug-7: District Hospital kiang a IB road ah tuni zinglam in EBCC G.Mualkawi akipan Pastor H.Jamkhanpau’ makaihna in tuailaite leh lasiam tuamtuam in kithuahkhawm in Street Preaching nei uh a, huai hunah Pastor in Pathian thugen in, Mungbawi Neihguk, Evan Muanthang, Evan K.Muanlal leh M.Thangboi te’n a vangkim in phatna lasa uhi. Street Preaching hun ah Pathian thu ngaikhe dingin akim a mi omte paikhawm uhi.

Licence/Permit neilou te’n zuaklou di’n deptt in theisak
Lamka, Aug-7: Agriculture deptt/CCpur apan kizadan in khawpi sung ah pesticide, chemical fertilizer leh insecticide zuaktheihna ding a licence/permit neiloute’n zuaklou dingin theisak uh a, a zuaknuam kuapeuh in deptt akipan ngen dingin theisak uhi. Licence/permit neilou a pesticide, chemical fertilizer leh insecticide zuakte action laktheih ahih ban ah a case leng serious mahmah hi’n kigen hi.

School a potkhia Phaiza khua ah kimu
Lamka, Aug-7: Jalenphai khua a Living Water School a class I simlel Neichonghoi d/o Thangkang of Matijang tuni sun half hun in school apan uniform tawh potkhia in school tungkik nawnlou a, inn leng a tunkiklouh ziakin school thuneitute, KKL Gen HQ leh ZYA Gen HQ leh pawl tuamtuam in zong uh a, tuni nitak dak 8:00 velin Geljang khawkhen a Phaiza village ah mukhia uhi. Thu kizadan in Phaiza hausapu in numei naupang uniform tawh omlai mukha in ana kem a, KKL te a theihsak ziakin tuni nitak KKL te’n Phaiza khua apan vala in anu-le-pa kiangah pekhia uhi.

Police te’n gari check ding
Lamka, Aug-7: Police te’n zu doudalna kawmin gari tuamtuam check phutphut ding uh hi’n kigen a, Diesel Auto-rickshaw ban ah khawpi sunga tui supply khenkhat leng check in zu pua om uhiam? chih check uhi. Police te’n nitak kia hilouin sunlai in leng gari tuamtuam check phutphut thei uh ahihman in kuapeuh in gari document leh driving licence puak gige poimawh hi’n kigen hi.

Headmister te’n submit kin ngai
Lamka, Aug-7: Addl Director of Education (S) Hills saina in Sept 2014 sungin State Academy of Training, Takyelpat ah State Account Training(76th batch) om ding a, Dist teng apan Office Procudure Examination passed UDC leh LDC te telding uhi. CCpur dist akipan Hr Sec. School, H/S leh Jr H/S a Head tengin akinlam in ZEO office ah proposal submit ngai a, Aug 12, 2014 in training a telding teng Addl Director of Edn (S) Hills ah a list submit hi’n kigen hi.

ASHA Facilitator- te meeting pih
Lamka, Aug-7: Vung Mary, DCM/NHM in tuni in Intensified Diarrhoea Control Fortnight (IDCF) Program (July 28-Aug 8,2014) tawh kisai ASHA Facilitator teng meeting neihpih a, ASHA te’n amau area chiat a innteng a naupang kum 5 nuailam omna ah ORS hawm taktak uhiam? IDCF hoihtaka semsuah uhiam chi’n dotna bawl hi. Meeting zawhin ASHA Facilitator te’n Monthly report bawl uhi.

Mi 1 jail ah lut, 1 bail in kikhah
Lamka, Aug-7: Police te’n tuni’n Imphal a CJM Court ah Nehkholal Vaiphei (36) s/o Saikhogen Vaiphei of S.Kotlian leh Lambenlian Vaiphei (26) s/o Saikap Vaiphei of S.Kotlian pawkhia uh a, CJM in Nehkholal Vaiphei pen Judicial Custody (Jail) a om ding in thutankhum a, huaiziakin Police te’n Jail ah koih uhi. Lambenlian Vaiphei ahihleh CJM in bail in khahkhia hi. Mi 2 te 7-A/R pawlin Ballei village (Kangvai khawsaklam) ah 9mm pistol 1, magazine1, atang 6, 9mm pistol tanghawm 1, Mobile handset 1leh simcard 1 tawh a matkhiat uh hi’n kigen hi.

SUUNNA
Niangpalching @Palching (28) d/o Ngulzasiam of Lamlian Veng, Bungmual tuni zinglam dak 11.00 velin cancer ziakin si a, tuni in Bungmual hanmual ah kivui hi.