Manipur khangthu adia thil chiamtehtham ahi -CM
State Govt leh NEEPCO in kilemna suaikai

Imphal, Aug-28: Manipur govt leh North East Electric Power Corporation (NEEPCO) official te’n tuni zinglam dak 09:30 in Manipur a Hydro Power project 4 sepsuahna ding tawh kisai-in Pre-Implementation Agreement(PIA) ah suaikai uhi. NEEPCO leh state govt lam apan top official-te tel uh a, tua zawh in ‘Sustainable Development of Hydropower’ chih thupi zangin panel discussion poimawhtak om hi. State govt leh NEEPCO official te’n Hydro-Power project 4 sepsuahna dinga kilemna suai akaihna hun uah Chief Minister O. Ibobi, Dy CM Gaikhangam, RD Minister Francis Ngajokpa, Parliamentary Secy Vungzagin Valte, HAC Vice Chairman Gaidinbou Newmai, Jhemlung Panmei MLA, Chief Secretary PC Lawmkunga leh Advisor to Chief Minister (Power) Jarnail Singh telin state govt leh NEEPCO lam apan top official aza asim in uap uhi. Chief Minister in a genna ah, tuni a hibang kilemna om pe’n Manipur khangthu adia thil chiamtehtham ahi chi hi.
NEEPCO in Manipur ah hydro power projects 4 semsuah ding uh a, sepsuah ahihchiang in akigawmin electric power 368 Mega Watt pekhe ding hi. NEEPCO in a sepsuah ding project 4 te -Irang Hydro Project (60 MW), Tuivai Hydro Project (51 MW), Pabram Hydro Project (190 MW) leh Khongnem Hydro Project (67MW) ahi hi. Huai dingin Tuivai project adi’n estimated cost Rs 325.06 crore hi dinga, Irang adi’n Rs 331.20 crore Khongnem Chakha adi’n Rs 439.71 crore leh Pabram adingin Rs 1031.67 crore hiding hi.
NEEPCO Chairman banah Chief Managing Director PC Pankaj in a genna ah, Manipur govt in Project 4te semsuah dinga mawhpuakna ahon piak uh ka kipak mahmah ua, a hon muan bang ngei un na sepsuah ahi ding a, DPR telin a poimawh bangkim hihfel baihsawm ahi a, na leng abaihthei lama zawh sawm ahi chi hi. Chief Minister Ibobi in NEEPCO te kiangah dan leh thupiak dinmun hiam ahihkeileh helpawl lam hi’n kua hita leh NEEPCO in hiai project sepsuahna dinga buaina atuah ngeingei leh amaute panpihdia state govt mansa om ahihdan gen hi. Kum bangzahhiam paisa in Manipur a Power department a Chief Engineer khat helpawlte’ khutlum a a sih ziakin Manipur in power lam ah haksatna tuak toutou ban ahi chi hi.
Manipur State Power Corporation Ltd a Managing Director N Sarat Singh in agenna ah hibang project hong omkhiak theihna dinga panla pipente’ lakah Parliamentary Secy V. Valte leh Advisor to CM (Power) Jarnail Singh te’ tungah kipahthu ka gen chi hi. V.Valte in a paikhawm official tuamtuamte’ ma ah NEEPCO official te’ kiangah ngetna nei in Detail Project Report (DPR) kum 2 hilou a, kum 1 sungtan a zawhsak dingin ngen a, NEEPCO in leng ahihtheih tawp en a, kum 1 sunga zawhtheihna lampi ending ahihdan NEEPCO Chief Pankaj in chiam a, V Valte in project 4 te sep ahih hunchiangin labourer dingin local mi 80% tanbek piak hileh local mite’n a project genlouh nek-le-tak zonna mahmah ah phattuampih ding uh ahi chih ngaihdan a kup leng NEEPCO official te’n enzui ding uh ahihdan taklang kawmin skilled and non-skilled tawh kisai-in local mite ‘top priority’ piak ahiding uh chi’n gen hi.

Lamka ah Pradhan Mantri Jan Dhan Yojna kihong
Lamka, Aug-28: Dist Admn/CCpur leh Lead Dist Manager/CCpur saina in tuni nitaklam in IB road a Synod Hall ah Comprehensive Financial Inclusion Project kichi ‘Pradhan Mantri Jan Dhan Yajona (PMJDY)’hon hi a, Phungzathang Tonsing, Minister (Health & FW, GAD, CADA) khuallian in pang hong hi. Huai ah Guests of Honour in Dr Chaltonlien Amo, Chairman, Hill Areas Committee; T.Manga Vaiphei, Chairman/MTDC; Vungzagin Valte, Parliamentary Secy (Hort &SC/CADA); T.N Haokip, MLA (Saikot A/C) leh Ginsuanhau, MLA (Singngat A/C) pang uh a, DC, SP, CEO leh Lead Dist manager te’n PKJDY honna in candle de kuang uhi. PMJDY honna ah SDOte leh district level officer-te ban ah mi tamtak in uap uh a, MDC-te Delhi ah a zinkhiak ziakun teltheilou uhi. Synod Hall campus ah Canara bank, Vijaya bank, Axis bank, HDFC, SBI leh UBI te’n zero balance in mi tamtak bank account hongsak uhi. ‘Pradhan Mantri Jan Dhan Yajona (PMJDY)’ kichi Prime Minister Narendra Modi panlakna a project kipankhia hi a, tuni nitaklam dak 4.40 in Prime Minister’ in PMJDY honna kawma a thugen lai Live Telecast in khahkhiak in om hi.  Health Minister in agenna ah PMJDY kichi scheme thak hi a, bank A/C holder-te adia hamphatna ding hi’n gen hi. Huai project tungtawn bank account holder in sum haksatna tuakin Bank a/c ah Rs. 5000/- kia nei leleng amah sum hilou Rs. 5000 mah draw thei ding a, scheme neite’n gari accident hun ah ki-etkolman in Rs 1 lakh tan lathei ding hi’n gen hi. India PM in BJP leng mawk genlou a, Israel leh Palestinian buaina thu ah Israel mawhpaih thu genlou in vision leh dream hoihtak nei hi’n gen hi. Tunia scheme kihong BJP program hilou in National program hi a, PMJDY lawhchinna ding in pankhawm poimawh chi’n gen hi.  DC in a genna ah PMJDY in atup pen innchih in bank account neih ding, govt scheme tuamtuamte beneficiaries te’n bank A/C tungtawn a muhding, siangthou leh hoihtak ban ah midang kigolh omlou a direct a beneficiaries te’n bank A/C tungtawn a sum leh pai akim sipsip a ngahding gimna hi’n gen hi. PM Narenda Modi in Independence Day in a thugenna hun ah Aug 15 in India khua-le-tuite innkuan chih ading Bank Account patkhiak hiding chi a, tuni’n Delhi ah PMJDY kichi hongkhia hi. PMJDY scheme kichi phase 2 in dinga, Phase-I pen Aug 15, 2014 akipan Aug 14, 2015 kikal a zawhsiang hiding hi. Phase-I sungin Bank Branch leh Fixed Point Business Correspondent (BC) tungtawn a innchih adi’n account honsak ding, innkuan chih in RuPay Debit Card tawh kithuah Basic Banking Account a neih ding uh, tua account pen accident insurance Rs. 1 lakh tawh kithuah ding hi. Adhaar tawh kithuah account kha 6 sung neikhinsate’n leng overdraft facility Rs. 5000 hamphatpih thei ding uhi. Tua banah khaw chih ah sum-le-pai tawh kisai kisinsakna Financial Literacy Programme neih ding, govt. scheme tuamtuamte leng bank account tungtawn a Direct Benefit Transfer hihsak ding, Kisan Credit Card (KCC) pen RuPay Card a zat theih ding chihte PMJDY scheme Phase-I in huamkha hi. Phase-II pen Aug 15, 2015 apan Aug 14, 2018 kikal hiding a, tua ah mipi kuapeuh kianga Micro-Insurance piak ding, Swavalamban chihte telin sector Pension Scheme tuamtuamte Business Correspondents dan a paisak ding chihte tel hi. Hiai scheme chituamna bel khua (village) sangin innkuan ngaikhawk zaw a, tuma in singtang gam(rural) kia huam ding kichi mahleh rural leh urban huamsak in om hi. Union Finance Minister etkaina nuaiah digital financial inclusion om ding a, state capital, national capital, leh district HQ chih ah tuni’n PMJDY kihong hi.

NEC Adviser in Lamka hongpha ding
Lamka, Aug-28: Dr Bamin Tada, Adviser, NEC in Aug 31, 2014 tan om dingin tuni’n Manipur hongpha a, Aug 29, 2014 in Lamka hong pha ding in kigen hi.Aman zinglam dak 10:00 in Dist Hospital enkhe ding a, zinglam dak 11:00 in Imphal ah kiknawn ding hi. Sunnung dak 2:30 in Lamphel a College of Nursing leh Sky Hospital enkhe ding hi. Aug 30, zinglam dak 10:30 in Kakching a Jivan Hospital pha ding a, sunnung in JNIMS ban ah Dewlaland ah Christian Hospital enkhe ding a, Aug 31, 2014 zinglam in Shillong ah kiknawn ding hi.

Minister leh MLA-te Lamka ah giak
Lamka, Aug-28: ‘Pradhan Mantri Jan Dhan Yajona (PMJDY)’honna function a tel Health Minister Phungzathang Tonsing, Dr Chaltonlien Amo, Chairman , Hill Areas Committee; T. Manga Vaiphei, Chairman/MTDC; Vungzagin Valte, Parliamentary Secy; T.N Haokip, MLA (Saikot A/C) leh Ginsuanhau, MLA (Singngat A/C) tuzan Lamka ah giak uhi. Amau Aug 29, 2014 in Sim Veng a ‘Simte Inn’ ah Zomi Council Gen HQ saina a New Land Use Policy tawh kisai Seminar-cum-Workshop hun uap ding uhi.

Financial Literacy & Credit Counselling
Lamka, Aug-28: State Bank of India (SBI) leh Lead Bank Officer/CCpur in NABARD te’sponsore-na tungtawn in tuni sunnung in IB Road a Synod Hall ah Financial Literacy & Credit Counselling Camp sai uhi. Huai ah Khaisiamlal Guite, DDM/NABARD in financial planning poimawh leh neih ding ahihdan sinsak a, S. Kaikhanthang,Chief Manager, SBI/CCpur Branch in Bank Account tuamtuam- Non-fill (zero) account; small bank A/C; Basic saving A/C leh regular saving bank A/C te hilhchian in sinsak hi. Aman agenna ah tulai in cyber crime tam mahmah a, CCpur dist ah leng case tamtak omin mobile/internet tungtawn a lottery man, kua hiaminthil hongkhak a, huai tatna dingin bank A/C ah sum deposit ding chih tel a thil tuamtuam omte kuaman gingtalou ding leh kikhemna ahihdan theichiat a, Rs.5,000, Rs.10,000 deihna ziakin jail tantheih ahihdan mipi’n theithak dingin ngen hi.

Demand generation meeting om
Lamka, Aug-28: Hiangtam Lamka a PTC Conference Hall ah tuni in SVAVRITTI Project, Manipur Network of Positive People (MNP+) leh Solidarity and Action Against the HIV Infection in India (SAATHII) pangkhawm in Demand Generation meeting om hi. Huai ah Randhoni Lairikyengbam, Sr Program Officer, DACO, SAATHI, National Health Mission/CCpur representative; DSO (CAF &PD), DSWO, DRDA representative, BDO representative te’n deptt leh institution tungtawna scheme tuamtuam omte zangin thugen uhi.

Training kipat hun ding bikhiah
Lamka, Aug-28: DC/CCpur office kianga District Training Centre ah A/C 6 a BLO-te adin Aug 29 & 30, 2014 a training kipat hun ding zinglam dak 11.00 hiding chi’n Election deptt apan thutut kingah hi.Huailou in Tuibuong a TBC Central Church ah Aug 22-24, 2014 sung Crusade-cum-Seminar programme zan issue a kisuah ah thugen leh sinsaktu Rev Ginkhankhup kichi pen Rev Ginkhankap chih ding hizaw hi.

Mualtam ah gari accident:mi 2 liam
Lamka, Aug-28: Tuzing dak 7.00 velin Mata Mualtam a Quarry munah Truck (No. MN02/8362) a brake fail ziaka accident in asunga mi 2 tuangte liam uh a, district hospital puaktun nungin Imphal a etkol di’n referred in om uhi. Aliamte Thingkangphai khawmi tuak Lianminlal (30) s/o (late) Ginhau leh Thuampi (35) s/o Upa Thangcha hi uhi. Gari in suang adim a pawlai lamkhang ah lengkhia a, mi 2te a tawmkhiak man ziakun suakta uh hi’n kigen hi. Gari neitu Mangbeldam hi a, kise nak mahmah chi uhi.
Huailou in Md. Abdul Salam(50) s/o Md. Mehrun of Kwakta tuni’n bawng a chin lai a kitalpuk in akhut veilam guh kitan a, Douthanglien (9) s/o Nehkholal of Bijang tunitakin mau zum in a khut dawtliam a, himahleh admit hilou uhi.

Kum 1 chinna leh kipahthu genna
Lamka, Aug-28: New Lamka Area Numei thumpawlte kipatkhiak kum 1 chinna zatna leh kipahthugenna kithuah tuni in EBCC Hebron, New Lamka ah zang uh a, Pastor T. Vungkhansuan, Local Pastor in thumna in hun pan hi. Huai ah Adviser tuamtuam Rev. S. Vungminthang, Gen Secy EBC; Rev Khen P. Tombing, Chief Co-ordinator, PCI (R); Rev. Dr. Sut Khan Thang, Executive Secy, CBA leh Emmanuel Fimate, MPS, SDPO/CCpur apan thugen ngaihkhiakna om a, mipi’n kipahthu genna in thumkhawmna nei uh a, Pastor Ngulkam in thumna in hunkhak hi.

Sound System Project lawhching
Lamka, Aug-28: Bethel EYD pawlin kum 2012 akipan Sound System lei dia project a pat uh Aug 23, 2014 in Sound System lei in a project uh pichin uh a, Aug 24, 2014 (Sunday) in Pathian kianga latna leh local khut a piakkhiakna kithuah zang uhi. Aug 29, 2014 in khanglaite kikhawm in lopna nei ding uh chih thutut kingah hi.

Police-te’ zat gari hire man laktheih
Lamka, Aug-28: 16-Lok Sabha election hunlai in Police te’n mimal gari a zatte uh hire man lak theihta a, gari neite’n gari’ RC book ahihkeileh requisition slip tawi in SP/CCpur office a MTO kiang ah sum laktheih hi.

Cake/Pastry om nawnta ding
Lamka, Aug-28: Economic blockade ziakin Tedim Road, Hmuia Veng a Tunnu Bakes & Cakes ah ni 5 vel Birthday cake leh Pastry cake bawlthei lou uh a, tuni’n vanzat hongtun ziakin Aug 29 apan Birthday cake leh Pastry cake ngeina bangin bawlnawn ding uh hi’n thutut kingah hi.

Suunna :
Angom Rajen Singh (48) s/o (late) Angom Tomba Singh of GCK Veng, New Lamka zan nitak nungin sungna in si a, tuni zingsang in D Phailien Leimaram Leikai ah a luang kihal hi.
Lalliankim d/o Chinzakhup, Chaltlang, Aizawl tuni nitak dak 7.00 velin jaundise natna ziakin si a, Aug 29 in Aizawl ah kivui ding hi.