Government Service Lunglutte Di’n Kisakkholh Ngai – Etkiikna! ~Upa Chinsum

Thupatna: A bu kawm etmai in bazar a kizuak laibu, career guidance booklet vantang a bangsim hi. Himahleh tuate tawh kibanglou ahi cih Chapter-II “GOU: NA GOU KEMBIT IN” i sim leh honglang duak. Laibu gelhtu Upa Khamhenthang Ngaihte in Gou - ‘Gou Paisawn’ leh ‘Gou Taktak’ ci in sehkhen a, sum-le-pai, innmun, loumun, innsung van, gari cih te’n hon taisan thei ahihziak un ‘Gou Taktak’ cing zoulou in ‘Gou Paisawn’ lel suak uhi, ci. Gou Taktak & Gou Manphapen Tate hizaw ahihdan leh tate kep/innkuan etkol diing dan akhil-khil in taklang hi.

2. Gou manpha penpen leh poimawh penpen tungtang a gelhna ah, Pu Thang in, Na tate a piankhiak ua pan nang ta ahi ua; ahong chidam ua leh nang ta chidam, a chidam kei ua leh nang ta chidamlou; a siat ua leh nang minsiatna ahi ding; himahleh ahoih ua leh nang min hoihna hi zel; tate kem siam “Nu leh Pa” na hi di uh. Ji leh pasal a neih ua leh leng nang a ahihna uh a bei kei hi. A ji hiam, pasal hiam toh ahong kikhen ua leh leng nang a ahi ua, a hin un leng, a sih un leng nang a, nang ‘Gou’ ahiden uhi. Ta hoihlou leh thulimlou na neih khak zenzen leh, tate kem siamlou, mi te’n ahon chi zel di uh. Kuamah na pesawn theikei, nang ta ahiden uhi ci.

2.1 Chapter-I ah ‘Thumapi leh Government Service Tuamtuam’, Chapter- III ah ‘Mimal Lunglutna Kitheihchet Poimoh’, Chapter - IV ah ‘Civil Services Coaching Centre’, Chapter -V ah ‘Khopi Lian Sunga Khosakna’, Chapter -VI ah ‘Siamsinna Mun Hoihpente’, Chapter -VII ah ‘Kumpi Buhpang Sawkkhawm Ni’, leh Chapter -VIII ah ‘Lai Simna Toh Kisai Kisakkholh (Plan) Ngai’ cih te tomkim taka suuttou diatdiat in zou hi. Kisakholhna poimawhdan gen in, Pu Thang in hiai ci - Kisakkholhna (planning) hoihtak om hi peuhmahleh sepna mu akhep (double) kibehlap thei lai di’a lamet i hi. Sepna zong laite kingaihtuah thak hun ahi. Theigah, a hunhuna honggah, a tunglam apana a min hong pulh ding, anuai a i pumngaak kal in tungleng vasate’n a kung ah ana taan ding ua, a gah hongpulh ma in ana ne bei vek ding uh. Huaiziakin ei mahmah in, a kung a vakal a, a gah i valoh poimoh hi.

3. Pu Paukhovung Ngaihte leh Pi Gouzaching (Pu Doukai Khuptong tanu) kikal a goutan a damsuah 11 (sawm-le-khat)te lak a a upa lam apan simsuk a a-9na Upa Khamhenthang, Thanlon khua ah nisim 16.05.1959 in piang (Saptuam record). Directorate of Field Publicity Office, M/o I & B, GOI, Imphal ah Cleaner post ah solkar nasep 14.06.1976 in pantou hi. Tua nungin, ManipurSecretariat ahLDC; SBI, Paona Bazar Branch, Imphal ah Clerk-cum-Typist, Allahabad Bank, Barpeta Town Branch, Assam ah Probationary Officer cih te khat-khit-khat in seemtou. Tua nung in LIC ah Assistant Administrative Officer post selection ngah, Calcutta (Kolkata) LIC pisa ah nisim15.06.1992 in va join hi. Ahun bang zel a kaisang tou; LIC of India a ahun nanung, 2008–2012 sung Zonal Office, Hyderabad ah Assistant Secretary, Department of Personnel & Industrial Relation assignment piak in om. South Central Zone (Andhra Pradesh & Karnataka) ah Reservation Policy lam enzuitu in pang.

4. Upa Khamhenthang, Saptuam (Tuiphum pawlpi) leh Siamsinpawl a kizang, contribution kilawmtham nei khat ahi. 2006 kum in EBCC Hiangtam Lamka tungtawn in Upa Ordination piak in om. EBC HQ, Dorcas Hall, Lamka ah: Member, Planning & Resource Sub-Committee, 1999-2001; Chief Auditor, 2002-2003 & 2003-2004; Member, EBC pay Commission, 2005-2006; Member, Financial Advisory Committee; Member, Employee’s Welfare Sub-Committee leh Member, Planning & Resource Sub-Committee, 2006-2008. EBC in, Saptuam a a pankhaknate pakta in Certificate of Appreciation nisim 25.05.2007 in pia uhi.

4.1 Siamsinpawlpi (SSPP) ah Life Member ahi. SSPP GHQ level ah Editorial Board Chairman in kum khat, 1985-86 sung pang. SSPP Consultant (Career & Guidance) apan sung 1997-98, namkal buaina ziaka i gam a lai zilnate 25% khawng niamkiak, naupang tam takte’n kam (sepna) siamna a muh hilou, sum-le-pai leh mi neih ziak a muh diing sakna nei uh ahi cih musuah; naupang tamtak lungkia (moral down) a omte khualna in Lamka zaang a veng tuamtuam ah tualsung saptuam – EBC, PCI, Church of Christ leh adg. te tungtawn in naupangte veh, SSPP Executive Committee member te tawh pang in khaw tuamtuam ah cialpina neihpih hi [Thugelh zohna ah].

5. Pu Thang in a ji, Nu S.T. Jamnu tawh Toupa apan vualzawlna goutan tapa 2 leh tanu 1 nei uhi. A tapa upazaw Pauzakham Ngaihte, BE(IT) in Indian Revenue Service (direct recruit) seem a, a ji Mrs. Biakhoih, MA; a tapa naupangzaw Thangminlun in Osmania Univ., Hyderabad apan BA zou in, IBPS exam 2012 gelhcing, Bank of Baroda piak in om. Pu Thang in Bank P.O. join saklou in, “A kum naupang lai ahihmanin, TOUPA lemgel bang om hiam cih veelna kawm in Civil Services Examination adi’n kisakkholhna neisak lai phot ung,” ci. Tu’n a innkuan un Hyderabad ah khawsa lel uh. A tanu Chinggounem, BA, in SBI ah Assistant Manager seem a, a pasal Mr Luaikhanlian H. Ngaihte, BSc tawh tanu Elena Thangmalsawm Ngaihte nei in Hyderabad mah ah khawsa uhi.

5.1 Pu Thang in Laibu ‘Pulakna’ a agelhna ah a officer te lak a khat in, “Pu, kum 6½ (guk leh akim) service hun nei lai chin a, tua voluntary retirement na laak sawm, nang mang (loss) lua na hi. A sum a tuat in lakh tampi na mang di’a; huan, promotion khat na chaanlai hi. Lunggel thak inla, na thupukna khekthak mai ve, nang toh sepkhawm a nuam hi” ci ahihdan leh, ama’n (a tup leh lunggelte genkhe nailou ahihmanin) lungsima a dawnna hibang in taklang: “Pu ei, kei ading kia ngaihtuah ka hi zenzen kei hi. Khangthak, mi kuahiam khat in, kei kithuahpihna ziaka Government a sepna (service) a hon muh theih aleh, amah khanggui a khangsawnte adi’a, atawmpen a, ama’n kum 35 bang hon seem thei di’a, ken kum 6½ ka sep sanga manpha leh phatuam zaw ding. Ama’n leng midang khat bek hon makaih thei lai ding”. TOUPA ei di’n hoihna e!

5.2 Hibanga laibu hoih (ei tualsuak hilai), tuunkim leh tulai, book-size – peekmai 68+12 a sah, T. 80/- (Teng sawmgiat) lel piaka copy ngah theih di’a INDIA gamsung mun tuamtuam a hong omta, i kipak petmah; hong kihawmkhiakna mun (Laibugelhpa tenna lel) hiai ahi: Jal Vayu Towers, Block-E, Flat No.804, Hyderabad– 500080[Mb. No. 08121644232, e-mail add: This email address is being protected from spambots. You need JavaScript enabled to view it.]. Hun paisa a i na lunggulh, “Career guidance kichup deuh kisam i hi..” leh, picingsa khenkhatte genkhak zeuhzeuh, “Hon na guide-tu hoihtak om hileh, tua ka tunna sanga dinmun hoihzaw/ sangzaw tung thei ka hi...” cihte, vaibang thenna di’a hiai laibu, Pa Pasian lemsakpihna tawh bawlkhiak a om ahidia’m cih in om. Nuam.

6. Chapter – VIII, ‘Lai Simna Toh Kisai Kisakkholh (Plan) Ngai’, pek 56 nuai-ah bang tuang hiam? HUN LUT DING ZAH:UPSC te saina nuai a Civil Services exam ding te ahihleh a tawmpen in kum 2(nih) khawng kisakkholh a ngai. Huan, Combined Graduate Level exam leh Banking Services a ding in, atawmpen a kum khat bek kisakkholh ngai hi. Etsakna ding in, July 2013 a pan a systematic tak a laisim apat ua leh June, 2014 tan ah kum khat aching di’a; huan, June, 2015 in kum nih aching ding; huchibang a ‘Hun’ leh ‘Sum’ lut di zah ngaihtuah detdet a, hih didan leh niteng hun zat didan toh kituak a kisakkholhna PLAN bawl ngai hi.

6.1   NITENG A HUN ZAT DING DAN (ETSAKNA): Khopi lian – Delhi, Bangaluru, Kolkata, Hyderabad, etc a lai sim di’a kisakkholhna (plan) bawl didan, ngaihdan tamlou(suggestion). A tangpi hiai anuai a dandeuh Niteng a hun zat ding dan (weekdays routine, except Sunday) hileh bang achi di’a?

Note: Coaching a telte a ding, atuam bawl a ngai.

================================

(1)Hun awl tuamtuam            : 6.50 hrs

(2)Ihmut hun                       : 7.50 hrs

(3)Laisim hun                       : 10.00 hrs

(4)Ni khat a hun zatkhiak (1+2+3)    : 24.00 hrs

6.2 Chapter – VIIIna sung mah, pek 62 apan beu khat taklang lai ni. KISAKKHOLHNA A GROUP A PANKHAWM AHOIH: A tangpi a et in naupang lai zillaite dinmun 70% te amau kia in piching zoulou leh a tup uh mualsuah zoulou deuh in kilang uhi. Hiai 70% dinmunte laka ding kha, nu-le-pate kianga ngaihdan (suggestion) ka kup ut ahihleh, innkuan 4 or 5 khawng pangkhawm in Group khat bawl uhenla, a tate uh lunglutna kibang, tup-le-ngim kibang, naupangte mun khat a kum 1 or kum 2 koihkhawm in “STUDY CENTRE” khat bawlkhia uhenla, a enkol ding in nu leh pate ki-volunteer uhenla, pangkhawm le uh hoih ding in ka gingta hi.

7. Laibu THU MAKAI gelhtu, Upa T Kaithang (Finance Director, Emmanuel Hospital Association, New Delhi) in, “Mi khenkhat in thilhoih a theihte uh gen in deihkhop ua, khenkhat in lah thilhoih hi di’a a theih uh a gen kia deih khoplou in semkhia uhi. Upa Khamhenthang Ngaihte hi a semkhete laka khat ahi” a cih, cidik leh cisiam ka sa. Awle, laisimna, sepna zonna kong, leh sepna mun, a.k.l. innkuan (ki)kepna a lawhsam kisa (lungkia) kuahiam I om zenzen leh laibu kawm nunglam a Laisiangthou Thu taklat a om in honneem hen! Tua bel - “Huan, David in, Huaite delh le’ng ka delh pha lai dia’m? chi in TOUPA a donga, Ama’n a dawnga, Delhi in, na pha ngeingei ding, na honkhe ngeingei ding, a chi a.” (1 Samuel 30:8).

Thukhupna: I gen lellel Laibu, mimal a sim di’a ahoih banah, innkuan milip aneu-aliante simsim di’a leng sit huailou ahi. Kibulphuhna (institution) - schools/ colleges tuamtuamte bang ah houh, sinsaktute leh sintute muh baihlam di’n a copy om depdap thei henla, ehem, laibu simna tungtawn in tu hun apan sim touh Kum 5/ kum 10 nung in Zogam ah kikhekna cingtaak hongtung maileh cih Laibu etkiikna gelhpa lunggulh leh thumna ahi. TOUPA, Nang hon panpih in! Hiai thu gelh ahihtan in anuai-a taklat sanggamte tungtawn in copy muhtheihta:-

 AWARD/ APPRECIATION FROM EVANGELICAL BAPTIST CONVENTION: