Democracy is a government of the rich people, who bought the people and forced the people”

Mipi’n vai ahawmna gam, mipi’ thuneihna gam chih a om, a taktak a mipi, a zawng leh nuainungte opdaat a aomna uh gam, mihausate’n vai ahawmna gam,minautangte leikhia a chihluihna tawh vai ahawmna gam uh tungtang i gen diing chiang in, eiloi’ batphak chiang politics ‘MLA Cup’ genkhaklouh theihlouh in om veu hi. India gam, khawvel pumpi a mipi’ vaihawmna gam lianpen (largest democratic country) chih a om a khawsa, mipite’n i palai diing uh i teelkhiakdan uh kuamah atheilou i omkei uhi.Gentam ngailou a miteng’ theih thuguk (open secret) ahi. Himahleh, hun hong paizel diing ah phattuamna nengchik beek ahong om kha mai diam chih suangtuahna leh lametna ziak in gelhkhak veu in om hi.

Sepaih thuneihkhum gam, sepaihte’n hiamgamtak a vai ahawmna uh, Burma (Myanmar) gam ah, tunaizek in laklawh kiteelna (bye-election) om a, huchikhop a gam haksa, mipite’ gentheihna gam a thiltung di’n ettontaak in lungluthuai mahmah hi. Pi Aung San in khumbichilh (house arrest) a aom apat zalenna ahon muh nung a kiteelna masapen ah, security (sepaih) kichi himhim duty omlou ua, polling personnel te ataangpi in Numei hi uh a, buaina bangmah a omlouh kia hilou in, kiteelna azawhphet chiang un polling station mun mahmah ah vote sim ngal mai uh kichi hi. India ah, mipi’n vai ahawmna gam ah, kiteelna a om chiang in sepaih atamthei tawp zat in om a, electronic voting machine a kizat ban ah voter te’ lim tanpha kila a, huchikhop a sorkar in pan alak in leng buaina leh soiselna diing adim-aha in om lai hi. Burma gam, gam zawng leh tuantual chi a i simmawh mahmah uh kha aphalou i hita uh ei.

Huchibang a, mipi’ deih leng hi pouhlou, sum hauh ziak leh gumtu neihhoih ziak a mipi’ palai chih dandeuh a ahong om chiang un, let in lian nalai seet uh a, mitengteng in zahtat a, amai uh vil a, a kawkna uh, a mit un a etna lampeuh a mi kikhiin duamduam ding houh sa zawmah uhi! OK, zahtathuai mah uh, maivil diing mah hi, ngaihsanghuai lawtel uh, vaihawmtute’ thuneihdan kivolhdan (protocol) a et in lian mah uh, mipi’ deih ngoihngoihna a ching ahikei uh……. chih thu lel hi. Apaisa Manipur MLA Cup a phaijang helpawl bangzah hiam kigawmte’n Congress I te deihkhop a ahon vau ua, phuk teitei ahon sawm uh bang leng adiktak in thil nuihzathuai pi, i gam dinmun chiangtak a genkhetu hizaw hi. Aziak chu, huai teloi kha political party khenkhat in a tawsawn uh hi leltak hi. Huaiziak in, Congress I te phukzou tawk in, kua party hiam in sorkar-na hon len hitaleh leng helpawl’ tawsawn sorkar hi thouthou hi. Congress I te’n anei hatzaw ua, chihman!

Huchitan in hun leh hoih diing hiven, akhawkzaw sem, mipi’ palaite’ mi-le-sate hong hi sawnsawn lai hi. A angvan deuh te un contract work hon nei reihruih diing ua, vaimim gau tan leng daihlou khawng peuh in ahon bawl diing uhi. Nidang in leng ka na gelhkha sek a, i gam uh puah na diing leh kawng tuamtuam a akhantouh na diing scheme tuamtuam tamtak om a, fund leng hong pailou hilou hi. Hileh leng, asemkhetu, ei mah, ‘eimi’ mahmah te’ zulhzau ziak in bangmah in kilang lou hi. Sorkar’ chiamtehna ah zaw i singtang louneihdan khawng uh leng Ngakul leh Farm chituamtuam khawng a khengkhe thamta ki-hi maithei eingal. Luidung teng a Dam (tuichinna) tamkhop kibawl a, huaite apat khawchih in tuinek tatsatlou a mu leng ki-hi maithei la-o! Manipur sorkar in hon nelhsiah, hon deihsak lou, hon puahlou chi in i vui mahmah uh.Ahi na a zaw, ei-leh-ei kivaihawm in, thuneihna lianpipi i khut uah hong om taktak leh……… tu-a car 1 neite’n 3 aneihbeh diing ua, building inn sawng 1 neite’n sawng 3 aneihbeh diing ua, kaam 2 neite’n 4 aneihbeh diing ua, mizawng, nektawm zong te’ dinmun bel deep down under poverty line hidaih diing hi. MDC Babuji-te’ ziak in ekbuk kumut khawng zaw hau kha nave hang!

MLA Cup kipat taktak ma a candidate diing te’n tup-leh-ngim a aneihte khawng uh ka ngaihtuahkik sek a, muhkholhna leh gam puah taktak na diing tupna zaw omlua in ka mu kholkei. Lemna (peace) omsak diing; khawsak haksate tundingna (prosperity) hahbawl diing; gamsung masawnna leh khantouhna (development) pibawl diing chihte khawng hi taangpi uhi. Huaite khawng chu ‘a omsa’ sepkhiak diing hilel hi. Centre leh State sorkar in dopkang hon sawmna a sep diing leh bawl diing tuamtuam ahon guansakte mumal leh ahidiing bangtak a sepkhiak in a omkei sek chihthu hizaw hi. Huaiziak in, bangchi leh gam khantouhna nasep ama sang a phatuamzaw a sepkhiak (effectively implemented) theih hi diing chihte ngaihsut a, paidan leh geeldan (strategy) thukzaw ngaihtuah hun hita hi. Huchibang ngaihdan leh muhkholhna neithei diing in i gam in misiam leh tuailai thahat tasam hetlou a, zatkhak in a omkei uh chihthu hizaw hi. Hiai tungtang bang leng ngaihtuahna leh lunggeel neithei chiang (intellectual circle) beek in bil ah bat in, ngaihtuah in nei le’ng deihhuai mahmah hi.

I theihphak chiang, Manipur ah mipi leh gamsung masawnna diing, khantouhna diing tawh kisaikha nasepte himhim adik-atang omlou a, huaite lah awlmawhtu, laigelhmite leh pawl tuamtuam in pawngpaw soisel ngam hilou maimah hi. Mipi tawh kisaikha, kuahiam in sep dukdaklouh leh lungtunhuai lou a asaikhakte soiseltu a om poimawh a, soiseltheih a om leng ngai hi. Tulai a kithang mahmah Singngat Tui thu tawh kisai in leng awlmawhtu mi tuamtuam in amau mimal’ ngaihdan leh muhdan ahon taklang sek uhi. Huai ban ah, Singngat khua khantouhna diing, a pallutna diing leh khawnuam leh ettontak ahihna diing a awlmawh a panlatu Singngat Vision 2020 Team in leng Singngat Water Augmentation Scheme, amun mahmah ah va enkhia uhi.Huai tungtang ah, amuhdan uh lungtunhuai a sa kei uh chih mi khenkhat in za mahle hang Team dan a thusuah leh mawhpaihna hiam, tangkoupih vakvak nei tuanlou uhi. Huaiziak in, amaute’n kuahiam sukminsiat tupna hiam, mi’ nasep (work order) etlahsak a deihgawh leh tuhkhiak sawm uh hiam hi hauhlou in, Singngat leh akiim a khua te’n TUI KININGCHING amuh diing deih uh, hi leltak hi.

Tu in leng Border Area Development Programme (BADP), 2012-13 a di’n Churachandpur District ah Rs. 484 lakhs sanctioned in om chih ahi. Hiai programme tungtawn in bang teng sepkhiak (seplouh!) in ahong om nawn dia chih theihbut hilou hi.Mipi’ phattuampih diing nna semkhe ut a kigen palai, ataktak a mahni hamphatpih diing zong heutute’n bangchi bang phet in hiai fund ahon soisa diing ua chih lungkhamhuai pi ahi. Adiktak in zaw, kuamah i mawhsa pah ahi zenzen kei. A sepkhiak leng thil haksa pi hihtuak hi. First installment bang chu ‘abeisa’ chih himawk, kua’n tang ei diam ah? Huchi hileh, percent bangzah nekmang a om a bangzah a a-nna kisem chih leng ngaihtuahhuai pi ahi. Bangteng hileh, ahoih leh manpha a sepkhiak a aom mah lunggulhhuai gige hi. Soiseltu aom chiang a lah mimal thil a lak hi mawk. Huai diing hilou inchin, kuahiam in diklel deuh a paukam ahon neihkhak hiam, ahon gelhkhak leh bel ‘huchi hilou ahi, hichidan ahi’ chi a ‘adikzaw’ taklat ngam ngai hi. Huchibang lah om tuanlou, agen hangsan tata in mawhkhu, thuak, adikzaw phoukhiak chih leng om tuanlou khawvel! Hui-ha!

Tua i paidan lel un bel nna hoihtak in kisem ngeilou diing a, nasemtu hoihloute leng kuaman kisoisel ngamlou diing hi mawk hi. Aziak poimawh mahmah hiai ahi. Politician leh Contractor te, UG te tawh kikawi uh a, Government lam apat scheme tuamtuam hong paite hoihtak a sepkhiak ut mahle uh, Government Official leh UG te kikawi zel uh a, a kikawi louh tawp un leng amaute lauhna ziak in dikloutak a fund piakkhiak ngai hi. Huan, nna kisemte enkhia a report pelut zel ding in Third Party (NGO, Media, etc) omsaam mahle uh, adiklouhnate ataktak in pelut theilou uhi, Sih-le-Hin thu ahihman in. Churachandpur District in District Administrator (DC/DM) fel leh hoih taktak i neikha mun mahmah uhi. Unau melhaih lai a hong om Sriram Taranikanti, anung a hong Sumant Singh, leh tulel a DC, Ms. Jacintha Lazarus (ken chu U Zachiin ka chimai, eimi ana hi reng aka hia) te fel un mipite awlmawh mahmah uhi. Hilehleng, a taktak a ahon theihchet chiang un bangpi semthei tuanlou ahihman un haksa sa mahmah diing un ka gingta hi. A lung uh leng kham di’n ka ngaihtuah hi. A kipiakzawhna uh, a lunglutna bangtak ua mipi’ nna sem dia sapna angah uh duhthusam bang a semkhe theilou (maithei) ahihman un vangsia leng kisa tuntun diing un ka gingta mawkmawk hi.Tawpthei mawk ahihlouh man ua om vel maimai hi diing un ka gingta lai hi.

Huchibang kha i dinmun uh ahih tel ziak in Muana Ngaihte in a sak, (a phuaktu ka theihlouh pi….) Zogam Mosi chih la ka ngaihkhak chiang in ka lungsim a khoih mahmah sek hi. “Zogam Mosi diing na omlou maw, Zogam Gandhi diing piang nailou hiam? Simthu lel tawh maw anbang n’ong it uh, na selungguk lah tang zou ke’ng, tulsa Zolei k’ong it kichite Sesum ngai hizaw uteh”. Hiai a ka lathu gelh hon sermon ek sawm ka hikei. Himahleh, hiai la ka ngaihkhiak chiang in Politics leh Sahkhua kikhen thei hetlou ahihdan ahon theisak thakthak hi. Eiloi in politics leh sahkhua kikhen theilou ahi chih i pomdan uh chu ‘Christian hoihtak i hih ngal leh vote khiat ngaihpoimawh diing’ chih khawng hi leltak hi. Huailou in, saptuam a hihna poimawh pipi neite, Upate, Dorca Pawl makaite, Pastor-te tanpha in Election a ut-le-dah a kibual a, vote zong, sum hawm a kipei chih khawng politics leh sahkhua’ kizopna, kitonkhawm gige ahihna, kikhen thei hauhlou ahihna in i ngai ua, ei-leh-ei kisiamtan-na (self justification) in i nei gawpgawp uhi. A omdan tak i ngaihtuah chiang a lah a ching diing teng mi’n a repsa vek uh, mipite vote zong a buai a buai, a awlmawh diakte bang kinak-kibal lawh, hi si! Ka nuih za vawt…hagagagagagaga.

Politics leh Sahkhua chu kikhen theilou mah hi. A tonkhawm gige diing ahi.Aziak chu, gamsung kivaihawmna, kivaipuakna, khawtang chidam leh gam-leh-nam vaisaina hoih leh mumaltak a omtheih na di’n Sahkhua leh sahkhaw makaite, saptuam mipite leh sahkhuana in naktak in tanmun nei hi. Huchi mahbang in, sahkhuana lam ahat a, ma asawn a tawisang a aom na di’n gam chidam, kivaipuakna kichup leh Pathian phawk piitu, Zogam Mosi, Zogam Gandhi kiphamawh hi. Huaidan hiveh aw saptuam leh politics kikhen theihlouhna, kei’ muhdan in. Germany gam in a President diing un Lutheran Saptuam a Pastor ana hisek, kum 72 a upa Mr. Jaochim Gauck teelching uhi.Lamdang i sa mahmah diing un ka gingta. Eilak khawng ah Pastor hihna khawng kitawp hiam, a pension-sa kuahiam khat in MDC/MLA/MP chih khawng hon tuh laizang leh mak i sak diing dan uh, nungtolh law mahmah, kithalkiat dimdem dan a ngai diing i hitel ve ua! Ahihziak a lah, saptuam te’n leng politician te’ sakhau nawlkhin phal tuanlou.Hauh de!!

Germany gam kon genkhak leh genlouh phallouh khat ahong dawk ka chi.Italia ’90 (World Cup football) omlai in ki-en ut thei mahmah hi. Lothar Mathews, Rudi Voelar (Sharp shooter), Juergen Klinsmann chih te’ chetlai ahi a, Klinsmann bang siam ka sak mahmah khat ahi. Timing khahsuah hetlou, through bawl hong kivawklut ana en vengveng a, khatvei kituan (bounce) khin phet kihei in alanglamte’ goal ah hon hlap lut zot bang chu nalhtak ahi. Huan, Singngat a Pa Khanlian-te’ inn ah, inndim zen zen in va ki-en sek hi. Zankhat, dak 11:30 vel a kimawl ka et lai un mi atamluat ziak in kongkhak ah ka dakpha hamham uhi. Zun tha dia ka paikhiak kar in agei a ding gige hon sa ahi dia,ka Pu Mung in, kei ka paikhiak a ka dinna mun ana luah geih Upa Nengkhan ana kawi heuhhauh hi. Ka va paikik nawn a kei ahon muh leh hon theikhe pan a, kisuanglah lua in kintak in khahpah hi. Chihngaihna theilou in ka pai top ua, zan dai sipsip nuai ah inn tan,ngaih a ngaih in ka nui tung hit-het uhi.

mangzouvl/19-4-2012