Theihlouh Nungak’ Hon Thuchah
Written by VL Mangzou, Columnist Zogam.com

“……. U Mang leng mangpha ka khak, tangthu gelh ding ka chihpen zaw amah thuthu hi’n teh, mangpha”

Laigelh tawh kisai a kumkhat mawngmawng casual leave ka lak a bei tawh kiton in ka hong zomkik nawn ta. Thugelh khenkhat i sim chiang in simsuak sipsip louh in a gen-ut leh a tup theihbut hilou hi. Khenkhat lah 2/3 vei simsuah nung inleng kithei tuanlou a, a khente lah a bul i pat leh a tawpna ding tan muhkholh theih in om hi. Tutung in, gelhdan tuamdeuh khat in ka hon pan hi. Sim nawnkei le uchin leng huai theihlouh nungak in ahon thuchah, ka zi’ kiang a kei leng mangpha hon khak, tangthu gelh ding a chihpen kei’ thuthu ahihdan na theikhin uhi. Hileleng, bangziak a huai theihngeilouh mihingnu’n hiai thu hon chah houhkhat ahia chih na theih na ding ua chu na simsuak thouthou uh ngai.

Mihing khat adi’n mahni hinkhua, midangte’ hon theihpihlouh, adiak a i hoihlouhna leh thulimlouhnate khawng kipuan ngam kha mahni kitawlemna hivek tuanlou in, hangsanna leh midangte’ adia sinlai hoihtak piakna hizawthei hi. Misual leh kholou penpente’n leng huchibang a akipuannate uh laibu a bawl in laibu khotkhiak hoihpen, best seller hihna tanpha ngahsek uhi. Numei khat, ahihna kigen utloupi in a hinkhua a bawlthak theih vuallouh lampi diklou ana totkhakte ka kiang a hong kipuang a, tangthu ngaihnophuaitak hiding a gelhkhiaksak dia ahon nget lai in haksa ka sa mahmah hi. Mihing’ hinkhua ah lampi phei leh nuam, suk leh tou, haksa leh kense pipi khawng totkhak theih mah hi. Huchi’n, kei ka ki-en a, ka hinkhua a minsiatna, mualphouna, vangtahna, zahlakna leh maizumna ka na tuah zouzaite’ hunlai a hon hehnemtu chu ka inkuante, ka tanau-lainate, ka lawm-le-vualte hizawlou in ka theihkhak ngeilouh midang daih khawng ana hihsek ziak in, theihlouh nungak’ hon ngetna kha hih buchinsak ka mawhpuak hi in ka ngai hi.

Nitak khat, Assam Rifles-te tawh duty ka kuankhawm kha ua, huai hun in Aizawl tangval khat tawh kithuah nilouh in sawtkhop ka houlim uhi. LD-a kichipa’n hichi’n hon gen a, “Aizawl tangval lak ah a suanhuailou pawl, khawlak mawk vakvak khat ka hi. Hileleng, tangval nanana chu nungak hon deihtu bang ana omsam ua, huai nungak tawh ka kigu uhi. Dan khatna a kiten ding ka sawmpah ua, a ni ding leng ka hihfel vek nung un (kiteng kichian manlou in) AR training dia sap in ka om a, lungsim buaitak a ka om lai in maban a hoihzaw ding lametna in sepaih training ding in ka kuansan hi. Himahleh, ka training sung in ana paikik a, ka pawtsuah in leng ahon kitenpih ut nawnkei a, ka lungsim nalaw mahmah ahihman in zu hahdawn in ka dawn hi. Nikhat, ka sappa un hon sam a, a ziak ka gen leh hon thuhilh kawm in a phattuamlouhdan ahon genpih nilouh hi. Huai apat zudawn ka tawpsan vengveng a, tuni tan in laizial/kuva nangon teplou/nelou in ka omthei” achi a.

Ke’n leng ka hinkhua a haksatna ka tuahte ban ah laigelhmi ka hihdan khawng ka gentei a. Ahon dawnna chu, ”Thilhoihlou na hihte na tawpsan theilua, nang a ki-nga liuliau ahi, kuamah’ hon phutluih theih ahi kei. Nidang a lai na gelhsek lai a mark 100 hon pete’n, na hinkhua bawlthak inla gelhthak nawn chiah dih e mark 200 ahon pe ding uh. Khatvei i kimuhna himahleh ka hon ngaina ngal a, ka hon deihsak ngoihngoih” ahon chimawk hi. Lamdang ka sa a, deihsaktu meltheih leh inkuan-tanau tamtakte’ hilhna ka zak mai hilou in Pastor hial inleng ka lu a khut nga in ahon thumsak ngei ta. Amaute’ hon deihsakna ka ngainep chihna hi hetlou in, huai tangval, ka khatvei muhna lel in huchi lawmlawm a hon it a, ahon deihsak tel thupi ka sa a ka lungsim a khoih mahmah hi. Mihingte’n i lametlouh na lam daih apat vualzawlna kimusek mah hitah e ahon chisak hi. Huaiziak in, kei bangmah hilou, khamitak leh thummi leng hilou, counselling bawlsiam leng hilou lak a numei khat hong kitulut a, ka panpihna, ka hehnepna ahon nget hi ka sukbuchinsak leh amah adia leng vualzawlna thupitak hi (kha) ding chi in hiai thu ka hon gelh hi.

LD-a mizia ka ngaihtuahkik sek a, kei’ mizia tawh a kibatlouhluat ziak in zumhuai bang ka sa mawk a. Kei chu, mi ka theihngeilouhte khawng kimuhpatni a ngaina ngal a, deihsaktak a thuhoih muamthei ding zaat ka hikei. Huchih naksang in, ka utzawng chu lawmte khawng tattuah ek-ek in, seppihte khawng gense vakvak in, mi’ mualphounate khawng a theimasapen hi awmtak in midang’ kiang ah gen huk-huk le chih khawng ahi. Karkhat a nihvei beek insak-inkhang tawh kinak ding; hun-awl neih liai leh mi 3 chiang beek gensiat teitei ding; a phatuamlou ding pi a mi’ sum hauhthutdan khawng buaipih a gengen; kuahiam khat zahlakna leh diktatlouhna khawng leh, mi’ minsiatna leh fellouhna lam ngen khawng tangkoupih ding a self-styled goodwill ambassador ka hi a! Midang chu adan om, ka inkuante, ka tanaute, ka veng leh pamte leh ka zi leh tate nangon ka hawi ngeikei. Huchibang mi ka hihziak in kei apat theihlouh nungak in khamuanna a lamet hi theihsiam haksa ka sa hial hi.

August 27, 2013 ahi a, naute naunei ding a om ziak un Lamka Damdawi Inn ah ka om uhi. Nitak ann nezou, Maternity Ward kong a kawm kuva haisan nenua a, sankha biri teepkhu luahluah a, ka mit a meikhu ahong lut ziak a ka mit, sip sa deuhmai a ka om liailuai laitak in ka phone ahong ging chitchiat a, ka lakma in Thangboi Mangte in, “Ngaih aw kei vabang ka lenna peuh ah, sen-gual nunnuam a kholkhawm ka muhchiang’ ngaih aw nang tawh i kholhlai sial ing e, kei maw ka sial……..” a chih ruahruah (ka ringtone) laitak in a tawp daih a. Ngaihsaklou a ka om leh ahong gingthak a, ‘koilam zawngsan amai?’ chikawm a ka lak leh, numei, aw-neem hiau khat in hon houpih hi. “Nang kua e?” ka chih leh kigen utlou a, hon houpih nuam, a hinkhua a ana hihkhelhte hon kup ut ahihdan ahon gen hi. “If Tomorrow Never Comes na gelh apat na laigelhte ka sim gige a, mi care-theipi na hihtuak, hon panpih in” ahon chi hi. Huchi’n, hun-awl ka neihdan zir in a tanchin ahon hilhsiang sipsip a, papi-sa khat tawh ana kingaihkhakdan uh, kum 2/3 nung a lah ngaihsaklouh a om maimah a, naa asakdan leh a kingaih sung ua ahun zatdan uh bangkim imm neilou in ahon hilh hi.

Ngaihsaklouh a a-om nung a haksa a sakdan, kahkah louhngal hih ding a theihlouhdan leh sun nisat laitak, kongzingte dai zikzik a a-om chiang a lungzuang ngoihngoih a hihdante ahon hilh hi. “U Mang ei, a zi bangleng ka ut-le-dah a hou ing a, kua na hia ahon chih a na pasal’ zi ka hi ka chih a leng hon zonsuah sawmlou, hon huat tuaklou, poi sak chilou inchin bangchi ngaihdan nei ahi dia?” ahon chi a, dawndan ding ka buai mahmah hi. “Ash, ke’n ama’ lungsim ka thei mawk di hia” ka chih chiang inleng ahon dong thakthak a, atawp in, “Thei-ut taktak maw, k’on hilh di, ngaikhia oh. Na ngaihzawngpa’ zi’n kha nang bangbang a numei thulimlou ana kitotpih munlawta, bangmah a ngai nawnlou. Hehna a leng simzou nawnlou, ngeinaseh, nathei hia? Nang kha a 17-na vel, gin-omtak a ahon kop na hih mel kua’n athei a?”ka chih leh a nuih a za top hi. Khatvei houh a lungkhamdan hon gengen leh ahong kap a, a kidiik hithit laitak in, “B’achia hon hichi kahkhum e, kahna bang (wailing wall) n’on sa ahia?” ka chihkhum leh amah leng ahong nuisuah a.

“Ahihleh maw, U Mang, huai pa’n kei hon phawkthou di’n na gingta hia? Tu law-law hikei leleng ka kiang a hong kiknawn di’n na gingta hia?” ahon chizel a, “Ash, na dotnate hou si, dawn haksa si (it’s a simply complicated questions). Bang di’n ke’n ka thei dia, psychologist hon sa maw? Ama’ lungsim ke’n ka thei mawk di hia, nang genlouh amah leng ka theihngeilouhpi?” ka chih leh, “Nang chu pasal nei vele, pasalte’ lungsim paizia na theilaw di” ahon chi teitei a. “OK, thei ut taktak na hih leh ngaikhia oh, ahon phawk di, a damsung in ahon mangngilh nawnkei ding. Hileleng, na theih dia hoih chu maw, pasal, papisa, pomlai nei in numei dang a sai himhim leh thilphaltak a hon care mahmah dan a om ding uh, ahon zawh chiang ua hon ‘lutai’ dimdem ding unchin, hon kihepkhiaksan hiaihiai ding uh, na gingta hia?” ka chih leh, “Dik” a chi ve! A lungkhamdan kia a gengen tak in ka chisuk ek a, “Nang’ mawh eivele, kua na ngawh tuan dia? Na kitheih nung uh karkhat paipan a zu dawnkhawm thei chin ua, anung sawtlou a hotel a giahpihtheih a om chin a………”, gen ding a theikei rengreng!

“U Mang ei, ngai lawtel kei ve, aman lah tu-a hon ngaihsak nawnlou, ka lungkham petmah himai. Pasal a nei dia leng kiman ing a, aman leng hon pilut kingap zaw hi-a, bang ka lawh ta dia?” achi kheikhoi nilouh a. “Ngaihtuah dih e. Nang kha, hong kiknawn hitaleh leng hon khemzou zel chilou a luangliam ding sa neivoi maw? Ngaikhia oh, tu-a na ngaih tuntun kha maw, a insung uah valut chiah dih e nuam na sa hia, na gintak abang hia? Na kingaihna uh, na kikhiatlahna un karkhat adaih diam? A insungmite’n hon paktalou ding, nang kha mi’ zi hinglai suan chih hi ding, khawtang in hon mawhpaih ding, nang’ lam a na tanau-lainate nangon in hon musit ding uh eive…….” ka chihkhum leh zaw a dai vengveng aka. A khonung deuh in, “Hilou, ke’n ka itna taktak ana pekhin ing a…..” achi teitei a. “Hehehe, itna taktak chih khawng nungak-tangval lai in a kitheisiam zenzen kei, i ki-itna taktak chu maw i hong kiten a, inkuan khat a i hong omkhawm a, i felna leh fellouhna teng i hong kitheihsuah taktak chiang a hong kilangkhe pan eive……. mihai” ka chihkhum kuau leh, “Heiha, ka thei zoukei” chi in a nui nalhnalh a.

“Bangteng hileh kimu himhim ni in, i haksatnate kikumkhawm le’ng ke’n leng ka hon kuptheih tampi om ding ahi. Kimulou, kitheiloupi a kihou zaw hoih salou hive’ng aw” ka chih chiang in utlou bilbel a, kimuh sang in a tanchin gelhlouh telzaw hi. Nitak khat, dak 10 vel in hon phone a, “Zingchiang in Sauliim Restaurant ah tukhawm ni, na tangthu gelh taktak di chi na hih leh n’on treat ngai inteh” ka chih leh, “Kimuh ngailou, kei chu maw mihing hilou, sikha ka hi, tu inleng hanmual apat ahi ka hon phone” ahon chi a, huai nitak chu zun leng ka nawn ngamkei phial ahi. Ke’n amah theikei mahle’ng aman ahon theichian mahmah a, ka mintak khawng ngen in ahon sam kengkang vial a. Amah lah kigen utlou ahihman in khatvei-vei ka hehtha suak in, ka engchih tawh ka chiamnuih tawh, ka suheh dekdek sek hi. Khatvei, “Na toihpa’n hon deih nawnlou ahihleh kei tawh kisai ta mai le eivoi” ka chih chiamnuih leh, “Ehe, n’on thawhbawl na e, kei kha sihnip (easy) lua dan a hon ngaihtuah maw?” chi in a lungkim kei sim hi. Hileleng, chiamnuih hat ka hihdan leh ka mizia ahon matlouh ziak maimai ahihdan ka hilh lebel a theisiam thak vanglak hi.

Huai ka theihngeilouh nungak, ka suangtuahna a neunalh sim kerhkarh, vom-mam heuhau, a nuih chiang a puakrop zel leh a paunopdan apat a neulai a bible chang gen kidemna khawng a mi 2 a kidem ua leleng 3-na la veu, om-awl viau e chilou dia khetul khi deuhreng hi dia ka gintak-nu in ka kihoupih khak chiang un pau siamlouh himhim neilou a, kua beh, kua chi, kua zaat ahia chih theihbut hilou hi. Paite, Simte, Thadou, Vaiphei, Gangte, Lushei, Hmar, Zou leh singtangmi’ pau dangdang ‘ori’ himai. Manipuri, Hindi, English lah ‘zar’! Hiai apat a ka muhkhiak chu, neudeuh lai khawng in numei pauteng siamte kha a khawlou deuhte dan in kikoih a, adiak in Meitei pau siamte bang chu handyman-te khawng tawh kikawi-kawi theite hideuh un kikoih hi. Tuchiang ah huai ana hilou inchin, i khanletna, i lawm-le-vualte leh i khawsakna leh sepna mun zir a pau tuamtuam siamtheih luat ana hizaw hi. Adang khat ah, nidang deuh a numeite’n tarmit a bulh uleh ‘nurse na bang’ kichimawk, nurse-te’n tarmit ana bulh deuh uh hi maithei.

Savdhan Lamka. Lamka Fights Back. Hiai tangthu a taktak a thiltung, a thuaktunu in ahon gendan zulzui a gelh ahi. Hiai tangthu apat in aman thil 2 deih a nei hi. Khatna –. Amah bangbang a a-numeipih midangte’n lampi diklou ahon zuihlouhna ding uh. Nihna – Hiai tangthu a toihluipa’n a simkhak chiang a huchikhop a thuak a vei ahihdan a theih na ding. T in, ama’ hon gendantak in ka hon gelh ta ding – “Mihausa chih a theihtham hikei mahle ung inkuan khawsakna ah bel mi ka eng tuntun kholkei uhi. Ka nu-leh-pa’n sepna neituak in, ka u-te leng khawpi tuamtuam ah sepna nei in khawsa uhi. Nungak khat i hong hih teisam chiang in chu kicheina bangleng i hon deihtui tei ta a, tangvalte tawh kimu dia i pawtkhe dek bang zaw aw, nungak kideih huntawk khat adi’n ‘underpant bangpen ka teng dia aw’ chih maimai leng dressing table mai a minute 10 khawng buaipihtham pha hi’n maw? Nu-le-pa apat a biakna limsakmi hithou mahle ung Pathianni nitaklam khawng chu, thilsia i vahih kei nak leh, bike nung a noipeek zen a tuan chih khawng nuam ka sak zawngtak hi vanglak hi. Ahihziak in, huaite’n gah hoih a suang kholkei chih ka theihna chu naupang chik in pasal ka neihlawh a, kumkim leng om peihlou in ka nawlam ah ka kik thepthup hi”.

“Ka nu-le-pa’ kiang a ka omkik nung in om maimai chih hitheilou, kisukharhna ban ah sum muhna leng hiding chi in company van zuakte lam ah ka kipei a, ka nuai ah mi (clients/down line) hunkhop nei in sum leng ka huilut nak thou hi. Hiai ka sepna tawh kisai in khateng in Guwahati ah meeting nei ding in kuan ngai a, huchih hun chiang in hotel changkang taktak a kitung ahihman in lawmte tawh kithuahkhawmna hun nuam pipi kizangsek hi. Ann nek ding chiang in zu changkang taktak hon hawm zel ua, atunglam in bel ka hihthei mahmah kei. Hileleng, lawmte’n, “Mahni khawsakdan changkang viau si hiai khawng hihtheilou” ahon chih ziak un, thring hihtuam ding utlouhman in ka peg zel sam hi. Huaiban ah, ka sepna tawh kisai mah in karteng in Imphal ah 2/3 vei hawh ngai gige a, sum lam kihoihmuh mahleh a tawlhuai hun tam mahmah hi. Huchibang a khualzin a ngaih gige ziak ahi hiai thugelh ahong piankhiakna”.

“Khatvei, Imphal ka hawh, activa part lei ding ka neihziak in Dhramshala ah ka va baangkoi a. Ka van deih ka leina mun ah eimi pasal khat, kichei ngellou, a smart zetzat chi hilou ana omtei a, pau a siamlouh ziak in dawr-ngakte’n ngaihsak khollou uhi. Ke’n leng awlmawh in ka va houpih a, a van deih gensak a ka leipih khit in amah leng kipak mahmah ahi dia, “Kipahhuai lua, koi a om e, koi a paidek e?” ahon chi a, Lamka a paidek ka hihdan ka hilh leh amah leng amahkia a gari a Lamka paidek, lem ka sak leh amah tawh kiton ding in ahon chial a, lemtang sa in a gari in ka hong paikhawm uhi. Mi paunuamtak ahi a lampi ah houlim leh chiamnui a ka tai lai un phone ahong ging a, ka sakhau uh ka sawktuak uhi. Alamdang mahmah chu ka ringtone uh ana kibang – Mary Lun in a larpih ‘Buanlei suak mai ding maw’ chih laa kha! Ki-entuah a ka nuih uleh amah a ana hi a. Lamka ka tun un ka inn penna tan uh hong kha a, phone no. kipia in ka kikhen phot uhi”.

“Nitak lup-hun vel ahih in ka phone ah SMS ahong lut a, tuni-a ka kitonpihpa’ hon khak ana hi a, ‘good night’ chih a kigelh hi. Azing baihtak in, ‘good morning’ chih ahong kikhak nawn a, ke’n leng ngeinadan (normal feeling) in ka thuktei mai a. Hileleng, ni 3 vel zawh apat, ‘good night honey’, ‘good morning honey’ chih ngen ahong hi ta hi! Honey chih ahong kibehlap apat chu ka hi hiamhuam sim a, ‘ann nezou maw, tuni bang hih di?’ chihte niteng a kidot ahong hi ta a, SMS ahong lutlouh chiang bang in thawmhauna khat om hileh kilawm hi. ‘Bangziak a SMS hon khaklou a dia aw, hon call kei na e’ chi in banghiam khat a nuamlou (restlessness) a om mawk ta hi. Huaite chu anepte ahong hi ta a, Imphal zinna ding ka neih chiang in aman leng a neitei geih zel a, ka hih ding poimawh ka hih sungteng ahong ngak charchar zel a, amah zinnasan bel ka dong kholkei. Nikhat, huchia Imphal ka hawhkhawm ukha, ka hihding teng ka hihfel zawh in sepaihte’ canteen khat ah zusante hon valakpih a, Khuman Lampak Sports Complex ah ka va dawn uhi. Khamlua hikei mahle’ng ngeina sang in ka muizaw a, ka pawtkik lam uh bang chu mi’n hon mu le uh nupa kingeihtak ahon sa ding uh, khut kilen in ka pai halhal ua”.

“Hun ahong paizek a, nikhat a SMS leh Call 2/3 vei chihte a huntawk nawnkei, 17 vei tuak khawng ahi ta. Amah hon call bangleng ka ngakzou nawnkei a, kisuanglah hetlou in ka call sam ta a, hawhna ding ka neihte leh ka hih ding khempeuh amah zasak lou in ahithei nawnkei. Amah leng ahi thou. Imphal a hih ding a neihlouh inleng ahong zui a, kivenna in, a gari zanglou in Winger tuamtuak khawng a tuang in Imphal ah ka va kimutuah zel uhi. Ka niteng hun zatna ah amah tellou in ahithei nawnkei. Nikhat chu, ka gawl a nat ziak in Imphal a ki-ensak ding leh ka sepna tawh kisai a poimawhte sai ding in ka hawh uhi. Zankhat giah a ngaih ziak in ka manmawh kholkei ua, nitaklam a ka giahna ding ahon dot in tanaute hiam lawmte hiam’ inn khawng a giah mai ding ka chi hi. Himahleh, aman, ngailou a chi a hotel room khat ana book khin dimdiam ana hi a. Huchi’n, Imphal khawpi a hotel changkangpen pawl Hotel Airlines ah ka giak uhi. Ka lawmnu phone a houpih in ka nute’n ahon kan uleh ihmukhin chi di’n ka hilh a, ka phone uh switchoff tuak in huai hotel ah hun ka zang uhi. Numei piching leh pasal piching tuak, hotel room khat a giakkhawm nanana chu ka ‘om maimai’ uh chile’ng na gingta d’uam? Hehe, ka shooting fuh khopmai uh! Huai ni chu ka kikar uh a kipsem ni, ka thuklut sem ni uh ahi. Zingkar in ka gawl ka va ensak ua, senna tengteng aman ahon piaksak vek hi”.

“Hunte ahong paizel a kimuhlouh ni chih a om ngeikei. A lamdang mahmah chu, kimuh gige ut, nuamsalua, kingailua hinapi ka kimuh chiang un ka dinmun uh ka genkhawm zel ua, haksa ka sakluat ziak un ka kapkhawm zel uhi. Aman ‘nunu’ hon chi a, ke’n ‘papa’ chi in ka sam a, Lamka khawpi leh a sehvel a mun nuam leh thawveng a i neihte uh hawhkhawm khaklouhna ka neikei uh. Khuga Dam, Ngaloi, Saidan lam, Khuga canal, Bus terminal leh adangdang ah hun ka zangkhawm sek ua, himahleh, nu-pa kipolhna bel ka huchi thaangzat kei uh, kei huchilam ka hatlouh ziak a ka pasal tawh leng sawt omkhawm theilou ka hi ua. Christmas leh New Year hunte mahmah nuam ka sa ua, kikhop tawp leh lenkhop kikar hun tomchik sung lel leng ka kimu guigui zel uhi. Kumkhat chu Christmas in puanten nalhtak mai khat ahon present a, ke’n leng kameez mantam huntawk khat ka pe sam a, zungbuh, amah a ding a atuam mawngmawng a ka bawlsak leng ka pia a, ‘na buh gige di’ chi in order ka suahkhum hi”.

“Phone a ka kihoupih munluat ziak un ka nute’n lamdang a sa ua, ka clients/down line-te hi uh ka chihleh, ‘na nuai a te leng a pau uh kibangvek ahi maw’ ahon chi a, ka kisuanglah sim a ‘papa’ phone a hong pai munluat chiang bang in ekbuk khawng ah ka tailut mawk zel a. Kum ahong kivei hial chiang in zaw atunglam abang gige thei nawnkei. Kihou bakbak chang bangleng a om-om ta mai. Ka kimuh chiang un ka genlem zel ua, mittui luang zoihzoih in gin-omtak a om di’n ka kichiam zel uhi. Achang in, nisa enkawm peuh in k’on ngailua ka kichihsiak zel ua, hahchhiai louh theihlouh ahihman in haksa mahmah hi. Ahi a, mihing’ lungsim sual ahong lang mun deuhdeuh a, hazatna a khang semsem a, a zi zaw bangmah in ka ngai kei, hileleng, midang tawh leng hon saikhawm ding a muanmawhna ka neilian hiaihiai hi. Amah lungsim leng huchibang thou ahi a, phone a mituam ka houpih chiang un leng ka na zaktheih tuak na ding un ka phone uh conference in ka koih hial ta uhi. Ka nna tawh kisai a mi tampi ka houpih a ka sai ngai ahi a, huaite ngaisiamlou in, atawp in ka sepna leng tawp di’n ahon sawl a, amah ka itna ziak kia in ka tawp taktak a”.

“Khatvei, singtang lam a atanaute un program poimawhtak nei uh a, a zi leh tate tawh hawh ding ahihdan uh ahon hilh hi. Kei leng sualpi khat ka hi a, ‘na zi a hawh leh nang na hawhlouh ding, nang na hawh leh na zi a hawhlouh ding’ ka chi bilbel a, ka subuai zou mahmah. Atawp in, a zi hawhsak in amah hawhlou hi! Nikhat, ka u-te damlou ompih a Lamka Damdawi Inn a ka om lai in ahong samkhia a, a gari a kipua in Saidan Lei lam ah ka tai vengveng uhi. Damlou ompihtu pen pawtmang vengveng ka hihman in ka u-te’n ahon phone nilouh uhi. Huchih lai in ‘papa’ phone leng ahong ging a, a zi ahi chih ka theih ziak in ‘nunu’ chi a na sap ngeingei leh chi in ka vau malam a. Huchia a kihou sung un ‘nunu’ a chikha taktak a, hehlua a ka sawn ek leh kei kilehpuk in a gari ah ka tal ka tatkha a, bawk leekluuk in ka paikik uhi”.

“Ka kar uah kimuanmawhna a sang deuhdeuh a, kinak simsim hun a tam hiaihiai ta hi. A zi bang leng bangzahvei hiam ka hou-se kha a. Khatvei, a zi naunei ding Damdawi Inn ah ompih uhi. ‘Midang sailou taktak na chi maw, na zuau na gen ngeingei leh nau na neih chiang ua hong kilang ding ahi aw, ana en ou’ chi in ka vau a. Nuam a sa chiahkei chih ka thei a, hileleng ‘aw’ a chitei mai a, nau a neihni un kintak in hon phone a a paukam apat banghiam fellou om ahi chih ka theithei mai hi. ‘Nunu’ hon chi a, naungek ka nei ta uh, na muh ut leh ka hong pi ding achi a, Damdawi Inn a vahawh hial utkei mahle’ng ama a ka vauna ziak in muh ka ut a, hong pi ding in ka gen hi. Ahong pi a, Damdawi Inn a hon lutpih lou in mun fianrial, gamla sim tak ah ka pai ua, munkhat ah ka va tu uhi. Bangmah genlou in a om nilouh a, a omdan ka dot leh naungek kha a pian apat minute 5 zou a si ahihdan ahon hilh hi. Poi na e maw ka chilel a, a phone a naungek limlak ahon lah ka muhphet in zaw ka kidekzou kei. Ka kapkhe homhom a, hon ngaidam in aw ‘papa’ chi in ka kawi chonchon a, amah leng a kidekzou tuankei. Naungek piangsual eivoi!”

“Hun ahong kivei tou zel a ka kar un hoihlam sang in siatlam a manawh semsem a, a business bang hong paizang lou in huaite kha kei ahon ngawhbawl mawk sek a, hon hehsan in ni 2/3 bang hon houpihlou in om ta hi. Ahon phone louhna a kihal sawt hiaihiai a, atawp in chu phone butlouh phialphial in a om a, huai apat in kei’ thuakna a kipan ta hi. Sun leh zan in ngaihtuah in, ngai ngoihngoih mahle’ng a zi lah ma ngamlou ahih chiang in phatuam nawnlou hi. Kei lam ka ki-et chiang inleng haisawt kisakna ahong om a, a phatuamlou ding a minsetak a ka thuakna ding lel ka buaipih sang in tawpsan vengveng utna ahong lang ta hi. Huchi’n, kum 2013 Christmas bouruak ahong kipat in, ka hunluite uh phawkik di’ing a haksalaw ding chi a thuak ngamlou in zinmang ka sawm a, U Mangzou’ zi phone in ka hilh a, U Mang leng mangpha hon na khaksak inla tangthu gelh ding ka chihpen zaw amah thuthu hi’n teh chi in, huai thu chah in ka zinkhe ta hi”.

mangzouvl/14-09-2014