“Bangdang teng sang in leng VL in hiaisan ah banghiam khat ahon gensak kha ding chih mahmah ahi khawvel a ka lauhpen” - Suanlyan Tungnung

Innsung ka lut phet un nungak thouhak ahikei chih ka mu ngal mai. Ann a ne naikei ua, gas thuktung khawng ana hahsiang a, hon na houpih leh houpihlouh leng ka theibun kei, kou teng mah ka va chiak vengvung ua. A tuang uh a siang mahmah a, sualtung leh tutphah-nuai khawng a newspaper thaang nengnung a omkei. Tutna-tung a puan kibat niai-nuai chih leng a omkei. Naupang 2 a om ua, TV a en hit-hiat uhi. Channel khen zihzeh chih a omkei a, lenglate’ a dia bengsenglua, houlim theihlouh na ding khop in leng a suging kei uh. Sawtlou nung in kou kiang ah ahong tuphei a, hon enzauh in biangkuak teutau in a nui a. A pautam vengvung kei a, ka chiamnuihna te uh ana nuihpih maimai, huai leng nakpi a nuikhe lualua ahikei.

A pawngpaw kichei vekvuk kei a, huaimah chu a nalhna ahi daih. Mawlnalh. Kichei kichi hi siangthouna chikhat ahi a, i kichei deuh in chu munkhat peuh ah i mawk tut maimai utkei. Huai kha a tawlhuai mahmah na chiang a om. Hileleng, mahni khawsakna hiam, i kimehpihlouh pi khawng a kichei vak chu a kilawm kei. Abiktak in, numeite bang office kaina khawng a leggings achi uhia, akuakna leh apotna tengteng kilangthei dia gak khawng tawh ahong kuan hial chiang un nalhlou hi. ‘Na zan-luppih khekor khawng tawh na hong kuan maimai ua’ ka chisek a, poi chu a sa kholkei uh. I gam uh, i khawpi uh, i lampi uh khawng et in kichei ngam na di leng ahikei. Khedap tawsang deuhmai tawh Lamka khawpi a pai trah-trah ngaihna a omkei. Kicheidan awmtawk leh a mun leh hun a om ka chih nopna ahizaw. Kei bang chu office kai ding leng kichei peihlou, kichei vekvuk leleng, office room, furniture leh vanzat-te khawng a ngaihna omlou, zumhuai. Huaiziak a casual dress kha nuamzaw.

Kuva ahon bawl a, kei bang ahon pemasa sese a, ka gelhkhak lau zaw ahi ngei di chu. Hileleng, a zarda kha tam ka sadeuh a. Complain laizang di’n lah, kei leltak complain in bangmah kongrou suvak di’n ka gingta kei a, ka buai mapmap khopmai. Kideidanna khawvel hiven, eikhawng bangmah hiloute’ adi’n bangmah gen ngam na ding hikei chi in a hidandan in ka hai suk a, ka kham zawmah hi. Sawtlou nung in innkong ah ka pawt ua, kei kuva kham lam hon theilou hi ding hiven, bike luideuh khat in hon phukha dek a, a hekpa’n helmet khulou lai. A hattai dan mawngmawng 20 kms/hour khawng ahi di! Buannawi hon thehsak zawmah, a hehhuai taktak ahi. Huchidan a, khe a paite leh midangte adop kei mawk uleh khe a paite’n leng helmet khuk ngai khong di eihchu, hon phupuk kha le uh. Auto ka tuan chiang bang a leng ka kiatnawn khak lau ing a helmet khuk mai dia hoih sa ka hita.

Huai, hon phukhadekpa’n a maizek a electric khuam phukha ok leh ka chi mawle. Amah ka hamsiatna zaw ahi zenzen kei. Electric ban (post) te kha lampi dal tamlua, lamsiik deuh khawng a khinkhiak di’n hoih hi. Hileh, lampi bangleng liansot deuh di’n gintakhuai hi. Hiai Electric Department-te leng prepaid a bawlsawm ahih vanglak uleh zattheih di’n hon saipah le uh ka chi ve. A gui niaih-nuaihte khawng leng laikhe vek uh henla, wireless in hon bawl vanglak le uh. Mobile phone dandeuh a i neihzawh dandan a thun mai di’n. Hileleng, chih omzerrrr…… A network omlou chih dandeuh khawng a tamlaw zel diam ah. Bangteng hileh, electric hi, abik in, Lamka khawpi ah deihthusam tung ngeilou hi. Nitaktung a load shedding om, i zat-uthun laitak a vaaklou, zingkar lam a vaak nilouh. Bang a a omzia? Zanlai a zang phatuam mi bangzah a om ding ua? Zingkar lam a khawl ging churchur, singnawtna/sing-atna a zang, factory/industry tuamtuam a zang phatuam a om taaaaaak leh!

Zomi Football Club leh DMRAO te’n Chittamani Memorial Winners Cup final 1st leg a kimawl ni un ka va entei a, huailak khawng bang leng suang a kiden kithang ahihchiang’ chi in helmet ka khu a! World Cup, Euro chihte bawn ki-en peihlou a chi in Lamka mawltual a football tournament a om chiang in ka en ngeikei hi. Hileleng, local club a kimawlte bang leng a class uh sang ka sa a, muhnop-huai ka sa vanglak hi. Tactic, technique, skill, stamina, fitness leh adangdang ah kuamah phalahlou hihang chih ka va mu hi. Ahihziak in, a kisam khat a om. Stadium. Public ground kilteng ah step dan pian maimai hileleng entute’ tutna ding kibawlsuak vek leh nuamtuam in kilawmtuan mahmah ding hi. Hiai kha thuneitute’n ngaihven tuak mahmah ka sa. Zomi Football Club in huai Winners Cup a lak uh kipahhuai ka sak ban ah, a sum lawhkhiak uh tagahte panpihna dia a hawm uh thupi ka sa hi. Ahihziak in huchibang a tournament liantham ding in chu a prize tawm ka sa ve.

Kuama’n ka Pen mang kha buaipih nawnkei ua, adang ka neita. Zanlam deuh in Editor-Pu’n Parker pen khat ahon penawn a, ka kipak mahmah hi. Tu’n chu sumang nawn le’ng le hon penawn thou di ahih chi’a poilou, kuama’n buaipih-pih nawnlouh ding ahi aw. CT Scan mang, Activa mang, singpek mang chihte khawng maimai buaipih-pih louh ding ahi, akisaipih thuneitute’n hon ngaihtuah nawn mai ding ahi uh. Guta-lata tawh kisai in i phun souhsouh ua, akisaipih thuneitute’n panla u’hen chih i deih mahmah uh. Kuate a akisaipih ‘thuneitu’ i chih vettak uh? Adiktak in, thuneitu i tamlua ua i lak ua guta tam eihkha. Vengchih ah ‘duty’ kibawl in pan i la ua, guta i man ua, thunei kisa in, ei’ deihdan in vai i hawmkhum ua, a sam uh peuh tangiau sak khempeuh in, soisa in i khahnawn ua, ‘pai inla, va gunawn oh’ chihna tawh a kibang. Kamsiam deuh hi lehang, “Toupa’n hon makaih hen” i chilai ding uh!

Hiai a ‘thuneitu’ i chihte uh kha, gentam ngailou in Police-te i chihna uh ahi chih theilou ka hikei. Police-te’ lak ah pekhe lehang leng ana khahkhe nawn nepnup maithei uhi. Hileleng, i theih ding ua poimawh a om. Lamka lak a guta i chihte, a tamzaw khamtheih hihte ahi uhi. Amaute kha soisak vak a, vuak ek a pha ding jat hilou uh a, vuaktaak leng hilou zawmah uhi. Khenlum kha le’ng, a sungte un a nin mahmah uh hinapi a ‘thubuai’ lianpi hon bawl ding uh himawk inchin. Ban ah, Imphal jail te’n eilam-mi khamtheih hihte deih mahmah lou uhi. A va khum dia leng Police Officer kuamah kuan utlou uhi. Aziak, Jail thuneitute’n ana housenak theilua uh. Huaiziak in, ka gennop zawk chu, Lamka District Jail puahthak ngai hiveh. Eilak a guta, khamtheih hih leh a buaihuai deuhte beek khumna ding in District Jail puah lehang adan a omdeuh diam? chidan ka’ih chu.

Tulai chu khua a vot ta bok a kuamah kibual peih gige leng ki-om nawnkei, mai kia siang vekvok, iron tang hi awmtak in. Iron tang kha a pawlam kia khum (sugar coated) inchin, a sunglam chu… kichai! Neulai a school a iron tang hong hawmsek unchin, i muam leh khum zezen, i hon haigawp taktak chu nithum leh zanthum khawng uak theih, aka. Tulai a chu iron tang hawm chih om nawnlou, huai’ sang a thupizaw, manphazaw ngen kihawm ta. Newspaper a ‘midday meal nesak uh’ chih khawng a limlak tawh ahong kigelh chiang in ka nuih a zasim sek hi, huai ni chauh nesak ei d’u maw ka chi a. Niteng a nesak hile uh niteng a a suah ngai di hia maw? Christmas leng a naihta bok a Vaite’ dawr ah va kilut henla, “Christmas a ding midday meal ka deih ua, wholesale in bangzah in n’on pethei ding ua” houh va kichi leh bang a chi d’ua aw? “Sarva Siksa Abhiyan ser khat ah bang chi’n na zuak uh?” peuh va kichi leh bangchi’n hon na dawng d’ua aw? chih khawng ka ngaihtuah maimai, ka chi.

Tulai in eiloi’ lak ah beh-le-phung thu a kihuituamna, ‘inkuan’ chi a kilawhtuamna a tam mahmah hi. Ahoihkei ka chikei a, hoih chu ka sa kholkei. A nghong (consequences) lam i ngaihtuah kholkei ua hiven, i theilouh kar ua poi sautak ana sukha hikha maithei hi. Kei’ ngaihtuahna lel ahi a, a dikpen ka chi tuankei. Himahleh, huchibang a beh-le-phung thu a kihuituamna in i minam sung ah kikhenna leh kituambawlna hon tun in ka mu hi. Huchi hikei leh Village Authority kitelna lawmlawm khawng huchitel in i buaipih ngal d’ua hia? MP/MLA/MDC chu thutuam, VA kitelna tel khawng i huchi buaipih uh chu a lungkhamhuai lampang ahita. Maban ah, Saptuam Upa kitelna khawng leng ahong buai kei ding kua a chi ngam? Ke’n chu, Khawmpi Lian a hawh ding te bang in leng Helmet khuk vek dia hoih sa ka hita, tukum in bang a chikei maimai a hiven. Hamphathuai mahmah. Pouh kichi leh!

Mi tampite’ ngaihdan in Village Authority member hih i huchi ut uh kha, Job Card ziak ahi chih ahi. Hiai Job Card (MNREGS) a sum bangzah om a, bangzah thelthang thei a, bangzah nek ding om a tel a? Ke’n ka theikei, kaumah leng ka haza bok kei. Kei’ deihdan a pai ding hileh beisak dia hoih ka sak ahi. Sorkar in sum sengthawnlua hiveh aw. Ahong kipattung in “Hiai khawng ei, lawh nei nimnem saamte’ ading hilou” ka chi ua ka sai utkei uhi. Huaiziak in kum khat ka taan kha uh. Hileleng, mi’n ana deih mahmah uh, ana buaipih mahmah uh, neihlouh khak ana lau mahmah uh ana hi a. A hausa in leng kei ka hithei deuh chilou, nektawm zongte khual mawngmawng lou a ‘sum thawh’ a seplouh dan ding hon saikhia uh, thawh ding neilou, lawh a lawhkhiak a kitoudelhte’ adia haksa phet. Huan, hiai Job Card in scheme dangteng liahkhuh vek, a omlou hilou napi a adang teng a chetheite’n liaksiang vek uh, hilim veh aw. Huaiziak in, Job Card bei suk leh ka chi.

Manipur Express vaisaite’n Monday Issue ahon patkhiak uh kipahhuai mahmah hi. Thuthak theihna lam kia hilou, damtheihna tawh kisai a leng mipite ahon khualna liauliau uh ahihdan ka thei a, ka pakta mahmah hi. Newspaper omlouh ziak a Seppatni zingkar a dailen nuamlou, ekthak lemloute’ adi’n damdoi hoihtak a suak a, huaiziak a mi tampi’n a lak (subscribe) lawh uh ka gingta hi. Amau adi’n a lawkna kibehlap kei mahleh ahon sutzop touh uh ka lamen a, ka deihsak a, ka duhthusam gige ahi.

Ka kuva kham a reh a, sun ihmut ka na hi a, ka mumang lek ana hi, akale.

mangzouvl/3-12-2012