DEMO-CLA-CY
By Lian Samte

Kumlui-kumthak zanhah chite ka chiindan ahikei. Aihziak in, tukum zet tuh Tribal Martyrs te zahna in Pumbuk leh Morgue ah ka va zanhak kha pehpah zezen hi. Bekthamlou, deihsakna bang va tang sawnsawn in, thugenna hun bang piak a va om sek nalai. Hinapi, mimal haksatna leh buaina te ziak in lungsim kisakkhawlna lam chau lua in bangmah ka va gen zou nepnup sek k'a hiven. Alah, kisakhol ek leng le bang thupi zaw gen thei tuan diak kei ning, ka theihsa.
Huai zoh, January 8, 2016 in Alert Zone leh The Singtangmite Whatsapp Group te huaihotna in Morgue ah zan hun ka va zang kha nawn a. Thugen ngaihnophuai taktak ngaihkhiakna kinei. Bil tai in navakhuai thei mahmah. Alert Zone Admin, Pu Lian Suantak in hon makaih in slogan kisam zoihzoih. Huai hun toh kituak geih in Delhi lam te'n le ana sam uh. Mobile phone a voice kingaisak tuah lalaih. Nuam ei. MTFD convenor Pu Romeo Hmar in telephonic report leh encouragement hon bawl bang tuu-tuh, kalaisai himai!

Zan sawt deuhdeuh, khua vot deuhdeuh, lah nuam deuhdeuh. Hilele, hun khak louh-theihlouh. Htp. Lian Suantak mah hong kipan nawn. Mimal tak a a kipumpiakna pahtakna etsakna in Pa Khan hun hon angkhak. Pa Khan bel mi kipumpiak tak ahi. FIR file-na dia a poimoh leh cheng siingkhat a pang ding ka hi, chi eivoi. Nasetel!
Pa Khan hong ding. Thu gen di isak leh silogan hon sam pih ut ana hi. Mipi hon tokphur phot. Huaizoh, slogan pai di dan hon gen. "All Taival Moo-men" (All Tribal Movement) ka chih chiang in, "Demo-cla-cy" (Democracy) chiin na hon dawng ding uh, hon chi. Ding dimdiam leh placard liik dia mansa in mipite'n, "Awle," chi. Pa Khan hong kipan. "All Taival Democlacy" hon chi kha pah. Mipi'n gen di kitheilou, kiding ngeknguk. Kipan thak. "All Taival Democla...eh, bangchi ahi?" hon chi nawn. Huaitak a mipi lam a kipan ana panpih cheuh khat om. Huai nung tuh hong hithei ta.

"All Taival Moo-men!" "Demo-cla-cy!"
"All Taival Unity!" "Demo-cla-cy!"
Ziazia mai, nuam eive aw.

Zan lah sawt deuhdeuh, silogan lah nuam deuhdeuh. A ut leh taikhua val hen. Huchia kidawn tuah ziahziah laitak Pa Khan mah in, "All Taival Democlacy..." hon chi kha nawn khanglang. Mipi te thanuam leh tai tak a hon koih hemhom. Gen di thei zok ki-om lou. Chihleh, mipi te nunglam apan aw tual deuh duap khat in, "Ahilaw ngut!" hon chi. Huchia silogan sap kikhawl thei khong. Huaizoh tuh hun khakna in zom himei. What a memorable night! What a memorable silogan! Demo-cla-cy!

Hiai event te report sawm ka hikei. Innlam pai nanana chi a muhdan leh lungsim a vei giugiau thu te sekhe cheuh nuam ka hizaw. Inn lam zaw leivui khu lawtel. Lampi te lah phok himai; khe nasan a le kipai dukdak theilou. Adiak a veng-le-veng kikawmtuahna lampi te kha. Governament in le lampi bawl sawm tellou a de aw. Movement bang neih sawmsawm talaitei hang. Ka dah. Khominthang apat Tedim Road tan gari a le dakkal kimkhat mahmah lut akei maw. Huchilak ah sepaihte'n hon vohcha delh le uh ei koi a bangchi taimang di? Kare, I lampi te uh uisu law ngal eivoi. Damna di lampi kawlou. Auto bang I tuan ngial leh iguh-itang kolong gai leh kilawm!

Kalasa, i lampi te un huchia kiphin ek dia hon sa mahmah lou hiveh aw! Ei leh ei kikhum lum di ika. Ahuai thei a lawmte'n hon huchi ngamthoh uh akei dia. I lampi te uh bawlhoih masa leng i gamtat khohei le hong kin dia, hong zang dia, hong fel di aka hia. Contractors check!
Mi'n Tuibuang tan hon bandh khum lele buai gawp hilou ihi? Huai theilou a i phih ding omsun Guite Road lah lawizawi s'a le chau zaw. Nak zumhuai! Kiphin dek ganggang. Guite Road kha ei a dia lifeline om sun ahi aw. Huai le thei nailou tribal te'n political mass movement khawng patsawm chih bang tuh....CM-pa ikh a le nam di sa mai. A nuih le za lou de! Rajnikant ngen pang di houh ihihkei ngalleh, chance omkei law ngal.

Huchikawm kal ah, I buaina toh kisai in I khotang/nampi sung ah current nih hat-a-hat pai in ka mu. 3-Bills nanglou/nang utlou pawl (the Obnoxious Triangle ka chi mai, ke'n zaw) leh anang ut pawl (mipi te)...kilaikhen litlet. Tuam pai giugeu tuak. Maban election a final pek di hilai, huphurh huai ei. Kimalben (selective targeting) leh kipumnawkna hong piang ngeingei dia um mawk ka'i. Hiai human tragedy pumpelhtheihna omsun tuh election boycott ahi. Maichiam le?

Governament (Sum) hong pau, Meithal (thau tawi leh a control pawlpi himhim) in support ngal. Pathian (saptuam) in nungthuap nalaiset! Katasai, dou vual hilou himhim pi a. Mipi te tuh Aigupta khomial sang a sahzaw maban in hon ngak hi ei. Na thei vuai?

Hichibang maban in hon ngak lai in, O, heutu hoih poimoh hinatel hang e (chi vangvang zezeen)! A nop sung kia, pakkhi oh hun kia, mipite pahtak loh sung kia heutu hilou, hun haksa a le ki-resign lou ngam heutu poimoh lua hang. Roses ahih sung heutu phenphan, brickbats ahihchia tawp lauh zel mi tuh heutu taaklou ahi ngal a. O! Asia-apha atawpkhawk tadong hon makaih ngam tuh heutu taktak ahi naknak zaw hi. Huai ka chih chiang in lungsim mitkha ah Mosi bang hong lang dundun a.

Amah kha, a mipi te diklouhna a le gum ngam eihchu. Toupa'n Isarel tate pathian-bawltawm abiak ziak ua thah chimih a sawm lai in Mosi in Toupa a ngen a. "Toupa, hiai na mite na suk manthat di leh Hinna Laibu apan ka min le rubber in nulmang oh," chi ngam tel avele. A mite diklouhna a le gum ngam, sihpih ngam, tangtawn hinna le khelahlou ngam, atazen veh. Huiha! Ka star top, hiai Mosi chiah chu!

Heutu ihihleh hichi di mah eivoi. I makaih mipi te a diklouh zenzen hun ua le sihpih ngam di. For, it's better to be wrong with the people than to be right alone. For, it's the people who (will) have the last word in a democratic world. Mipi om ziak in heutu a om a, heutu om ziak in bel mipi a om tuan hauh kei. Mipi ziak in lalte (kings) a om thei ua, lalte ziak a mipi om tuh a hi zel kei. Ah, nak gen lua hang. Ui ngoi hilele siang tante'h. Hiai lam hizah in hunsak ni.

Awle, lungsim kam gige khat tuh I boycott vaai uh kha hiveh aw. Gen ta muat mai le: Ke'n tuh a tuung a pan boycott hikei zawdeuh leh ka na chipah aka. Aziak tuh...
Ei ina kihuchi kiboycott keukau a le bang phatuam di ahi, ka chi sim. I na kisuna maimai uh ka sa. Bangzah in kiboycott lehang le iki-unauna, pi-le-pu ihihna, nu-le-pa ihihna, ni-le-gang ihihna, innsak-innkhang ihihna, vagera, vagera, a bei tuan sin ngal kei a. Ei-le-ei ikisumaingallou maimai uh. Aziak tuh, a mi mudah ihikei a, a hih ding ua kilawm/kilawmlou ana hihkhak/hihkhaklouh ziak uh ahizaw. Tunung chiang in lah innsung khat ah I omkhawm thouthou sin ngal ua. Ki-ngeu-et luakluak, meikhup duunduun a om maimah theih ahi aw.

Kitawp uhen, ichi ua, a kitawp uhia? No. A kisik uhia? No. I boycott ua, poi a sa uhia? No, no, no. Kisuanlahna kampau khat le I za kei. Zak le za kei ni. Aziak bel, ei kiboycott in kongrou sulou ding ahi chih mu kilkel eihchiang ua mom. Hon en bhengbheng di ua, a nui cheuh lel di uh. Kihuchih ngam thouthou ihihleh, ke'n tuh hiai dan in hihzaw le ka chi ve:
Public Renunciation leh Declaration bawl di. Direct a Union Govt. leh Manipur Govt. a lai thehlut di. Hichia gelh di—

We, the tribal people of Manipur, on this day of ... (date), hereby renounce all our elected representatives to the State and Union Govts. for not standing up against the infamous land bills passed by the Manipur Assembly on the ... (date). We, henceforth, refuse to be represented by them either in the Assembly of Manipur or in the Union Parliament. No Govt. (State or Union) shall liaise with us through these disavowed members and doing so shall be tantamount to direct defiance and insult to the tribal electorates of Manipur. We categorically demand the ouster of these reneging representatives from the State Assembly and Union Parliament. Any delay to that effect shall be considered as an attempt to undermine the rights and existence of tribal population in Manipur and a deliberate act to discharge them from the State and Union of India. If these tribal elected members of Manipur are not removed from their seats of power immediately, then it is not our will but the Govt.'s conscious effort to force us declare independence from the State of Manipur, and if need be, the Republic of India. God, help us!

Hichih phingpheng le tuh, ngeingaihlou chih ngeingai te omlou di. Malak ah, State leh Union Minister te hong dianglut vengvung di uh. Sepaih hon nawnlut di ua, hong bui-toholh di uh. Bomb bang le hong khe nuam di uh aihbang. Huaichiang in tuh, lampi a kikou netnawt toh teh in national leh international te theihphakna I ngah zaw mahmah ding a, Al Jajeera kia hilou in BBC leh CNN te tanpha in hong houlimpih ding uhi. I ngam em?

Huchia kiphin a, Separate Administration tangkou pih ngam taktak di ichih leh i kimanna (preparedness) velchet kul mahmah in teh. Meitei te (Manipur State) om maimai di'n ngaihsun ke'n. Thamlou in, ei singtangmi te lak ah 50% mahmah Govt. lam pang (loyalists) hi lai di ei zenhouh voi. Tulel in le sehnih in I pai a, i sikhop ngial hilou maw? Sum hong pau a, Thau leh Pathian in hon zathuap nalai tuh...khai, i movement uh a mit duakduak eikahia. Mipi lou te "universal winners" ngen toh pangkhawm mawk uh eihchia!

Asam tam law lai maw.
Huchi kawmkal ah, January 2nd week, nitak khat Tipaimukh Road a va tai kha. Pumbuk kha ana mial bikbek. Lungsim nuam chiahlou. Zogam.com te concert lai khaw zaw mi tamlua hi a, chih phet a om. Huai nitak a lungsim a hong lut phut khat:

Hiai Pumbuk tuh Martyrs te memorial/commemoration pian hong suak phot ahihchiang a, a mun bek baihlam tak a muh gige theih ahih di ahi. Huchia mial nuai a aman mai di hilou. Huai di'n, huui ah, amalam deuh khat ah phutuan (potawn) khat kibawl henla, akiang ah bawmpi khat, a tui koihna di, kibawl henla, huai ah mi kiphal te'n khawnvaktui I phal bangbang va sung zel le...kam-se-kam kum 4 kum 5 tuh kide zom zou mahmah di. Mi, vaite'n bawn a temple ua kum 2000 val kuang zom sak ua...

Hilele, ei sep manlouh, mi hih di va gensaksak chih khawng kha nuam chiahlou inchin. Huaiziak in, hiai idea zaw ka gen dah mai di. Hiai tan na sim leh na thei mai na di, article a sausau toh na chi bok dia...
Ka zou!

—25012016/1654ptpl—