—SINGGAM PAN TONGSUAK V.2.0

TULAI TRIBAL MOVEMENT VELCHETNA-II: TEKEL
— Lian Samte

Luang kua hong kikham zet le tuh gen tam i ngai kei umaw. Phulun phul i bang mai uh. Mihing hiai zahzah ihih lam le i theihlouh, lampi bang dim in i hong dim ua. Mipil hiai zah omlam le i theihlouh, print leh social media te bang ngaihdan hoih pipi in hong let zezen a. Ut teng sekhia, tuah teng gen, lungsim dimlet sungbua tuh ihi peuhmah ua. Nidang a agen di, agelh di omlou chia i chiauchiau, tu'n tuh hong kidaih sot a, i 'unity' uh lohching le himai lou ahi ka chisuk, ke'n zaw.

Huchi kawm kal ah, kho-ul, sisan, tha-le-zung seng thei dinmun a omlou te a di diak in, lungsim kia a awlmoh akihi maimah a, banglou teng suangtuah leh gen khiak khak sek in om a; a field lai a a ball pek te hon kisuthadah kha di chih bang le lauhhuai lah lou hiin maw. Hilele...ka chichi lai di...

Tutung i buaina tuh lamet louh pi a Pathian in hunlem hon bawlsak ahi, ka chi a. Huaiziak mah a le man nailou pi vuahsia in hon lap bang ikei ua. Hilele, Pathian in tuh mihing zia ngaklou aka. Mihing deih hunhun a gamta le hilou. Amah thuthu a om khat hiveh aw hiai tunglam a Pa kha. Huaiziak a, ni li bang a zekai lele a hunlap hi thouthou dan a'ive, amah tuh.

Huchi ahi a, hiai buaina (ke'n tuh 'hun lem' ka chi mai a) i lakdan, i paipih dan (tuni tan in) hoihlou chihna ding khat le ka neikei. Kei tuh ka lungkim. Hilele...ka chichi nawn di ('hilele' chih i neih mahmah uh phaze ka sa)...huchizaw deuh leh chih i neih nawnlouh chia tu, van-gam a om hita di hang a. Huai lah kihi nailou deuh a'ihchia maw, kipaupau kha mah aka. Thil himhim, i siamna i chitna i gengen chiang a tuh maban nei nawnlou kihisim. Pawl sawm i passik zoh chia tuh i laisim khaklouh, i note by-haat khak louh te khawng kigengen nawnlou. Huaiziak a, i fellouhna, i chinzohlouhna, i hihkhelhna te i gengen theih lai tuh maban i neilai, lampi a kihong lai chihna ahi. Sapte'n, "There is room for improvement even for the best," achi ua. Dik di le a diam.

Dik in dik takei leh, etdan nei chiat a kihi a, muhna chiangchiang gen ihih toh ngaihdan kituaklou deuh le om ngeingei di. Huchibang a om lele chillum toh ikivalhsak tuah uh ngai ahi. A huchih kei mawk a tuh mi khat vaihawmna hong suak dia, huai tuh Sapte'n 'despotism' chi unchin, hoih hetlou achi uh. Ei lak ah le mi khat kia in thuneihna hon tawi leh tuh buai di mah ika. Huchih hetlouh di chihna, buai i ut kei leh.

Hilele, mi khenkhat tuh ngaihdan mawk siat khiakkhiak, lak di lah om khollou. Huchi te tuh mi sulung-am maimai ahi uh. Ngaihdan khat hong kigelhkhia lah sim khak vettak in a om a. Laktheih ding ngaihdan gelh tawitawi tuh a poikei. Laktheih ngellouh gen fokfok tuh mahni kisuksiatna ahi. 'Constructive criticism' kichi theihkhenna di khat tuh, thu khat i soisel leh a bawlhoihna di toh gen khawm teitei di. Huchilou te 'destructive' hiziang.

Etsakna dia, zanlam a Pu R. Sanga in a khut ngeingei a a sepsuah, i martyr te kepchingna di, lemon-grass-oil tampi JPO te apiak leh mi khat in facebook a, "A zatna di ka theikei. JPO toh lemon grass oil bang kizopna om ahia? Marketing strategy ahi di..." chihsan zenhouh. Thil tengteng i theihvek in i lawmte'n bang ahih di ua e?

Thil tengteng i thei vek kei dia, i theihlouh tengteng le a diklou ahi vek kei, chih theih bang le pilna khat ahi ve. Mi khat in a khutsuak i nampi 'cause' a dia apiak nop leh hadawtna (toothpick) hilele ikipahpih di aka. Mi, gam khangtou te bang in khut a sepkhiak thilte ngai thupi lua uh a'ihbang. E'n tuh 'a kizopna' di bang ana buaipih hang a. Mak thei ngei! "Nung chiang in thei ni, a vek in thei ni," chimei ni, peuhpouh!

Awle, hunlem-tuihual (wave of opportunity) in hon fawn taktak tuh, a ut toh utlou toh, ikawt vek na uh maw? I social leh political dinmun hon 'tekel' vak mai a, a chingzou i om ta hauh kei uh abang. Huai tuh kei muhdan lel ahi a, huchia hehna a laktaak le ahikei. "I kiging k'a eivoi," i chi vek maithei. But, the signs have long shown. And we are not reading them! "Pupa huaisa i Zolei gam nunnuam, khangsawn tawisawn lim ngabang bualna..." chia la bang sa daldal zozen. I tusawn-khangsawn te 'nunnuam...lim ngabang' hong bual ngial na di uam maw?

Laphuak leh laigelhmi te'n zaw kilchih-kawichih ah hon na hianghiang sam ve uh aw. But we don't want to see the writing on the wall! (Okhaih, Sappau le aleng mun e. A kham zaw ka hi hetkei aw. Ka thang a pai lua a ahi!)

Hitamahleh, ke'n tuh laigelhmite ka mohsa masa pen ut. I socio-political vision leh principles & methodology ei toh kituak (di) i muh bangbang kuamah laibu suah (published sese hikei lele) i om kei ua. Tua tsunami in hon ziar phut leh mipi leh heutu te ngatna di theilou a kipingpevei dek maimah hilou ihi? They have nobody, nothing, to turn to! Hichi hun leh dinmun ina muhlawkna uh om tellou adiam? Have we not anticipated such political upheavals in spite of our political awareness? Huchi ihihleh tuh i muhna puanbuk uh kaihparh hun lawta chihna eive. Khai, hiai te lak a kisim tel ut sam ka hisim a, mahni chitlouhna gengen zaw ki-ut khollou hiveh aw. Laigelhmite thulimlouhna tuh hiai tan ah k'on nga mai dia, midang te fellouhna k'on gen zaw phot aw, a nuam zaw di.

Khaile, mipi te buuk in i om leuleu a, chinglah zel i bang. Siluang hong kizam hial leh i kiguih zot ua, huai bel spontaneous reaction ahi. Khukbuk khetsai bang sim ake, huai tuh. Hiai pen i heutu te'n proper mass movement ana sa dan in ka mu hi. Mipi te kiman sa kha. Adikchiah a lah mipi sousang (riotous) hisim lim. Kua'n ma kai, kuan kailou chihle theih but hilou. Inn peuh gam hal. Innhal pen diklou chihna hipah lou a, dik chihna le hipah diaklou. Ke'n bel, 'public hysteria' dan in ka na koih mai a. Huaiziak mah le ahi di, a khonung in ei-le-ei bang i kikham konkon a ngaih. 'A huchih uleh ka theihpih kei uh...amoh akipuak di uh...' chihdan deuh thupuan bang le hong om thethup hilou ahi? Ka theikei.

Numei pawl bang hong dingsuah hial ua. Luang kikham beh di venna in. Hilele, hun hong pai zel a, movement chi khat hong suak sim. Hat mahmah. Thupi uh le ka sa. Hilele, hiai women's power kha 'unharnessed hydropower' bang sim ka sa. Student te bang le amau thutum hileh kilawm tak a hong kiphin beh lai uh. Skul kai dia sawl pawl toh, kailou dia sawl pawl toh. Amau a di'n le lung-ap huai kha ngial ve. Huchibang vengvung a kipan in hiai i movement tuh 'coordination' tasam mahmah ahihdan kilang ka sa mawk hi.

Huchi napi, heutu te'n sustained movement di dan in ana en pah kha ua, ikisa dek ek a, amah-erohtuh tribal fraternity sung a 'crack' hong kilang pah inchin, khonung buai dek phiing maimah ibang. Mi'n i weak point nak theih lawtel uh e!

Sadar Hills anntah haak pawl ki-om pah. Tribal unity heeng pah deidoi. Denchiang a sumlom valh pawl hong om lai di. Khenkhat lah 'thuchiam' hoih pipi tang di uh. Huai chiang zet in tuh, 'khat khat a apai khiak chiang un' chih ibang d'u. Hiai i kisuanpih mahmah 'mass outbreak' tuh meikuang tuinilh bang in a ging siisii dia, a kichai mai di.

Unity ICICI (i chichi) na a zaw, unity lou hial ihi uh. Accept the fact. A chianna tuh, MTFM Conclave Resolution No. 1 dated 10.10.2015 ah hichiin ana chi hi: " The Conclave once again re-affirms the Unity and Fraternity of all the Tribals of Manipur..."

'Re-affirm' maimai le hilou 'once again re-affirm' hi sawnsawn lai tuh gen nei law tel ahi. A thupukna pen hoih salou n'on sa kha di ua. A huchi dan hi thahah lou. A kipahpih law lam ka hizaw. Hilele, re-affirm-firm ngai unity tuh unity tatak ahikei. Something is wrong with our unity. Our 'once again' re-affirmation affirms our insincerity or at least our uncertainty towards our fraternity. Hiai khawng tuh ei-le-ei kal a i chih ut leh chih maimai di. Huchia resolution hial di chi hilou aka. Re-affirm zel ngai a i om nilouh ziak ua kha khat iki-unity sung ua le buai dekdek hilou ihi? Issue tuamtuam hong dawk. Kuki-Zomi, Thadou-Paite, Kuki-Thadou, Zomi-Paite chih khawng hong thang vengvung maimah hilou? Hiai 'flimsy unity' mu thlang a Phaizang Gulpi Teek in Sadar Hills chikhum hon muam ziau zomah. I unity uh kithing dawrdawr mai hilou a'i?

Ke'n tuh hiai ka chi lai di (with sincere apologies to MTFM): "We don't need a unity that needs re-affirming 'again and again'. To me, we are already united, by default, by birth. We did not call for unity when the first fire was shot at our martyrs. We've just stood up together. That's true unity. A re-affirmed unity only shows the chink in our unity armour."

Unity leh demand for separate administration chih pen bul pat thakthak a ngaikei. A omsa, mazuih ding, ma kikhiang sa lel ahi. History saupi le va et kik a ngai zenzen kei. Do you remember this public declaration made just more than nine years ago? Those were the same culprits who landed us in this political soup today. Tua hon makaih pawlpi (ATSUM) mah khutnuai a kibawl hi zomah:

We, the people who gather on the funeral of Pu Tunglut Thangthuam, IPS, today, the 1st January 2006, solemnly declare that we the tribal people are no longer safe under Manipur and the majority Meetei community and hence denounce to be the subjects of the Manipur Government.

The killing of a high echelon (officers) like Mr. T. Tualkhanpau, MPS & Mr. T. Thangthuam, IPS and the continued dying of innocent civilians in landmines are nothing but select-targeted elimination pogrom of the Meetei community.

Therefore, we the tribal people urge the Government of India to decide the fate of Manipur at the earliest. Till then, we shall fight for our survival.

Long live, tribal unity.

Na mu uhia, a last line? When did we re-affirm this 'tribal unity' of 2006? We don't need to, then. Why now? Something's really not right.

MLA/MP te'n hiai hun ding mukhol lua uh ahihman in a ommun uah nui hieuhuou in hon gal-et di ua, a lungsim un, "Kitawp nguar ang," achichi di uh (chih khawng ka ngaihtuahna ah hong lut maimai).

Eilawi lah vision/programs/policies omlou chihmahtak, gamteng su, achang chia state su, achang chia centre su, ka thei zoukei. Separate administration deih maw? Bill 3 te repeal deih maw? A huchihchih lezaw a tawp chiah carbon copy luui hong bang dia, sim theihlouh in mang maimah na ve. Huaizoh chia'h tuh election lam mah ah ikidelh tou nawn vingveng di ua.

Eilawi bel a fellou, hatlou, pillou le hilou, hilele, pandan siamlou i di uam, first half a tawl khin vek sek hang a. A daihsawt zawng bang le om di tuh hi a. Second half a lah mi nung a hat-a-hat a tai zel. Sem khalou hiveh aw. Tuni chiangchiang i socio-political paidan i et leh 'second half' ngen a pan kha bang zomah lai ika. Hehna louh di'n.

MLA/MP te le buuk in a om ua, a chingzou hauh kei uh. Bang di'n a ching mah di ua. Mipi'n i deih a i tel lah hi laizang lou ua (chimawk le). Amau bel a pu uh kipahna a lut hilel eive uai. Huai alut theihna di ua ei (mipi te) kiang a kum nga hal zel a 'mandate' hong lei zel uh eihchu. I chih dandan ua om di ina sak himhim ule nak hai lawtel ivoi. I power uh zuaksa akei.

Huai Bill 3 te bang le theilou taktak mah hi di uh aka. Aziak tuh, amau kha 'saheb' hita unchin, lai bang le mawk simsim thahah lou di uh. Saheb ahihma ua a sim te uh zat theih lai om te kha 'a pil' dan a ineih uh ahi nengnawn ve. Amau bel suai kaih (khutpi suai zaw ahi ngal di'n ka gingta k'a) a nnapi uh hiinchin. Assembly Hall khawng a a va gen di uh omlou pi.

I gam uh en le uchin, a va pau ngeikei uh chih a chiang voi, khemkhem geuh. Pau le ule mipite hamphat luatna di va gen peuh kei un teh. A phattuampih mahmah om tuh teltuam mimal khenkhat leh saptuam te ahi deuh un ka mu. Hiai bel a lamdang hilou. Saptuam bel a khalam security uh enkai tu ahi a, nial theilou uh aka. Gam corrupt taktak te ngial bang a tuh 'saptuam' a investment abawl te uh bit pen eivoi. Aziak bel, bangteng Pathian kiang a piak tuh 'white' suak vek inchin, governamen in le huchia pomsuk ahi di.

Bangteng hileh, amau neih-le-lam thu gen ut ka hikei. A hauh ding mah uh ahi chi a pangpang te kha hiing a. Hilele, mipi lungkimlouhna a ngeingaih louh uh tuh a kellu phum uh dawk lua ka sa a. Huchikei le uh zaw maban nei lawlai hi ua, chi a ana deihsak bawl lawlai tuh ka hi ve. Tu'n le zaw kum khat vel a omlai a, hiai buaina tuh veng man mahmah na ve.

I representative te toh kisai a ka gen nop zawk tuh hiai ahi. A hih ding ua kilawm a hihlouh ua, a tung ua i lungkim kei leh hih ding dan lampi om lawtel dia gingta tlat ka hi. Tua ihihdan uh, YPA te'n PZT leh VZG ana boycott mawk pen, kei mimal ngaihdan maimai in, hih diklou chihna hikei lele, hoih pen ahi de aw, ka chi sim. Ei-le-ei kihuchi boycott gegaw mawk zaw gen neilou hiv'aw. A tunna di tung tuanlou di. Eisung kikhasiatsakna maimai. Aziak bel, tangtawn in lah ikiboycott zou tuankei dia. Ban ah, bangzah in boycott le'ng le ibeh, iphung, i-U, inau, ilaina ahihna uh beilou ding a'ihchia mom.
Kei ngaihdan maimai a tuh, huchia boycott sang in, central deng ding in mipi'n lai gelh henla (signature campaign ahih lele poilou), PUBLIC RENUNCIATION kibawl leh. Chih bel, "Hiai mihing te kou sik-le-tang a ding in ka pom nawnkei uh. Kou sik-le-tang in a pau thei nawn kei ding uh..." chiin phualpi sorkar deng ek le tuh Lamka kual a ina kiboycott sang un kongrou a suzaw himhim di. A mihing mudah ihikei a, a nnasep ( or seplouh) uh zadah ihi zaw. Hiai hileh, amau le dam di, ei le dam di, sorkar bildoh le ngahzaw lai di (chih ka um tinten a'i).

Huaizoh, mipi le huchia i pankhop raurau leh, election chiang in ei deih mah, ei telching diktak mah chi tinten thei le'ng maban ah i bit dia, loh leng ilohching zaw di. Election chiang a bang interest neih di ahia chih Pathian in hiai buaina tungtawn a practical class hon neihpih eihtu. MLA/MP te hi in UG te hitaleh mipi thahatna lou in a khosuak sin kei uh. A hitak in zaw, eimah thusiamlouh mah thuak hilim ihi. Lamlian bawlhoihlouh toh kibang. A kontektol pa le a tung a tai thou. Nuam sa tuanlou, he, he!

Nam sepaih te le buuk in a om ua, a ching zou kei chiang uh. Full stop.

I political vision and acumen tekel in a om a, a chingzou kei. Hiai zaw frank tak in ka gen mai di. Hmar, Kuki, Mizo, Zomi hitaleh, singtangmi tengteng huamkha ding a political vision nei i om kei uh. Laldenga in Mizo a ding biik in a bawl a, a hamphatna di uh a khuat khe mah uh. Taisan phot ni. Hmar le, siangtak a gen in, utna tumta neilou in baak bang in aleng vialvial a. Mi kiang (in mainland India) ah Mizo ka hi achi ua, innlam a lah akingai lua le hilou khat. A suahpih uh Kuki or Zomi lah a deihkei ua. A ziak a om di.

Hiai te gen fellouh a i koih nilouh uh a koi lamlam a dia supna ahi. We need table-dialogues, not gun-speak, so that there is no more need for re-affirmation of unity. Hmar ka ngoh bik ahikei. I'm just stating one instance. Kuki-Zomi (Paite-Thadou) kal le ahi thou. Denchiang in Kuki-Thadou kal le a huchihchih theih leh, Zomi-Paite kal bang le hong huchi kha mahna!

Ei lawi tuh thau in ikihou pahpah ua i houlimna uh bong aka. I thau te uh kamtam thei law ngal hiveh aw. Thau a kikapkap chih khawng thau zatlouhdan thei nailou te hihdan eihtu. Thau a pautam peuh leh i civilized nailouh dan alang deuhdeuh. Nidang in tem-le-tei in ikibawl ua, tu'n thau in. I headhunting mentality tuh, 'yesterday, today, forever our mentality is the same/all might change but our tribality never...' chih himei, peuhpouh!

Khai, hong sau law man zel a, ka dah!

13102015/1933/tue/ptpl-wb