Inn lam zuan nanana tuh nuam himai! Bil bing khekhu in chingchi khuang chuaichuai mahleh lungsim mitkha tuh Teisiang leh Saikot tangdung te ah a vak pah dundun mai a. Huai Kros, a tuamna aluminum pek a guk khitsa peuh uh, mitkha ah hong langchiang kerkor khopmai. Koi lam a pan hiam chih theihlouh huihvot hong nung honhon ichihleh Flight AC System ana hidaih a!

 

Chihleh, thakhat in ka tutna hong kising dodot a. Lamkuak gawikha kisa ka dakkhiak leh koilak lamkuak! Huihkhua a om kihilai. Boh le boh nailou a, New Lamka Vengnuam suahlam deuh a Vangai Street tawnkha mah kibang luapluap aka, nak noprouh.

 

Lamka ihong tung taktak chu! Huuilai sang in lampi ana hoihzaw, chihna ding thu a om himhim kei. Zenhang Bazaar tan zaw a dandan omlai. Lamka Tung area I hong tailut tuh, hiihih! Nuam tellou! Hyundai i10 ngou kekkak, officer tuanna di awmtak a tuang himahle’ng ‘ficer-na ding himhim a omkei. Luai hoihlou luaikha mah kibang. Hon hih luhluh, hon hawi duaihduaih…ah! ka gen siamkei. Va sin tei mai uah!

Huchihziak mah akei dia, ka omsung in ‘Na lungtunna mah’ Angel’s Vision te’n Thukup kichi mobile discussion hon pan ua, “Traffic Rule leh Lampi Hoihlou” chih thupi masapen di’n a zang hial uh aka. Gennop nei tam atave!

 

Huailam hizah hiphot leh. Aban ka gennop tuh, kicheina uangbawl mahmah ihi d’uh, chih ahi. Ke’n tuh achik-achik a Lamka fashion sang ka sak reng ahi. Vaite khawng in Beauty Contest chih atheihma ua ei, Lamka te’n,‘Miss Churachandpur’ chih khawng sai a, swimsuit peuh toh ana vaak aat-aat ngam ta ihihchiang ua!

 

Huchinapi , theihsiamlouh ziak hia, ahihke’h uang lawliap, ka theikei. Moral Policing lampang ana hat viau a. I suan mahmah YPA lamte bang in numei niiksiing ana buaipih uh ngai tazen aka. Tuma deuh a Meitei helte’ thusuahkhauh (diktat) bangdeuh, numeite kivat di dan thupiak ana suah hial uh eivoi.

 

OK! Pawlpi in innsung nu-le-pa sep ding sepsak chisim mahle hang, nu-le-pa mahni mohpuakna zoulou/theilou, tate khawng mi hon control sak lamen zaw ihihchiang un ahi di mah ahi, ka chimai. I muan mahmah I Pawlpi hong lohching henla, mi tengteng in niiktual hon teng ta uhen. (Oh! ‘Mi tengteng’ ka chih in pasal te a huapkha kei!)

 

Banah, Pathianni zingsang a ka lawmpa ka fon leh, “Mata Dam a kihih zong,” chiin hon dawng kauh a. Hon explain thak leh YPA-vai mah a ‘duty’ ana hi maimah uh. “Kare, park khawng nei le le huchia duty khum ngai zel di ihih ualeh zaw I neihlouh mah uh hoihzaw e!” ka chi lungsim hi.

 

Abang hileh, thil himhim I zatsiamlouh ziak a Pawlpi mah hong kigolh a, mimal zalenna leh khoheizia tanpha hong thuneihkhum uh ngai zel eifoi. A hih ding him uh suak, morems!

 

Huchikawm kal ah, gintaklouh pipi ana ‘teacher’ siausuau zenhouh ua, va paukhelh khak di bang lauhhuai zozen. Chihbel, ‘Na thugen a grammar a dikkei’ peuh hon chi le uh buai di ihihchi’a! Teacher-te sepna mun a omlou chiin I phun souhsouh na ua zaw aw, ke’n tuh a huchi di mah ahi, ka chi. Aziak bel, I economy dinmun ulah I theihsa a’ihchi’a, kaam khat mi nih in sem gegeih, double employment hi gegeih inchin, hoihlua eivoi. Kei ba’ in tuh a ‘proxy’ te’n le mi ‘proxy’ sawn lai uhenla, tamlou-lou mah in a loh uh kihawm le uh, ‘socialism & equality’ diktak hong kipatna houh himailou di hia, ka chi maimah.

 

Huchia khotang kilualna ding lunggel a, mahni sepna tanpha itlou, mi kikoppih ngam hial zen I omlai in, a muhdahhuai hawktui in bel mihingte toh lamlian kikop ding simthu ana lel nai tuankei. Lamlai ah a vung dedaw ua, a khawkna deuh ngial ah tuh a luang hawhaw uhi. Huchihchia’n mihing te tuh amei-apa chih omlou in, lamsik-lampan ah kitawm seselh in siikna ding mun zong in a phaphet kei uhi.

 

Awle, hichidan thute zaw kua sawl le hingellou a awlmoh ek theih himawk inchin, genvak a le phatuam di ahihlouh toh, thutuam hon gen mai ning.

 

I masawnna mahmah khat tuh om in ka thei ve. Building tampi ana pun beh chih kia hilou in. A mihing te himhim le I lungsimput uh a kikhek om hiv’aw.

 

Nidang banglou tak in, Lamka te, Zomi te ichi zaw diam, sapsap di’n tuh kipahtak dan ana zil mahmah ta hile’ng kilawm. A Old Course lam te, a kikhek (thei) nailou om zek mahleh. Chihbel, kei tuh laibu release dia pai ka hi a, ka laibu (sample copy) ka va etsak pawl khat te’n, aveel le veel nailou pi, “Sappau ahihleh zaw dictionary toh pan ngai ven,” hon chi pah ua. Mak sim abang. Himahleh, hichibang te khovel bukimna ahi. “Commenting for the sake of commenting,” chihdan in ka la a, zakdah in ka neikei. A laibu hon phen ua, preface leh 1st page khawng hon sim denden ua, “Eh! A sim a nuam lawvoi…” hon chi thou ua. A laimal chiang sa uhia, a thuvual te sim nuam sa, ka thei zoukei. Hilele, a comment masa uh baak kik ahi himhim ua, huai ah leng nidang bangzen zaw hik’hang e, chihtheih in ka mu. Nidang hileh, hoihsa in nuamsa sim le uleng, “A nuam lawna a….hilele….” chi hamham d’u hi a.

 

Mi khat in bel, “The Good Old Days” na chih pen, ‘E-N’ telkhalou aka hia, chiin ‘Old’ pen ‘Olden’ hong suah sawm nilouh a, thumvei tham bang hong gen mahleh correcting fluid a om lemchang geihlouh ziak in ka bawldik nawn tuan takei ve!

 

Hun hong pai zel a….kal khat sung bang ‘programme item’ a tel ding te ka ‘confirm’ kawikawi nung in ka programme ding k’on sun thei khong a. A kalnawn sung phial programme hawm in ka buai leuleu a’i. Huchiin, Friday the Thirteenth hong hita nghenghe chu…sapte’n ‘uneventful’ achih uh kal nih phial bang hun ka zat nung in ‘eventful’ hong kipanta.

 

13th ma deuh lak ah, UBI kong ah car leh bike kiphukha k’on tuak kha a. Mipi kipungkhawm te’n bike hekpa iplah tak in hih tonton zel mahle uh ‘common sense prevail’ ahi ding a, khutkha hial bel ka mukei. Minute 5 & 6 sunglou in police hong pai ua, buaina piang thei ding lai bengdai in a mohte pawkhe hiau uhi.

 

A zing nawn in District Hospital kong a pharmacy te a lawmte chial a ka omlai in Minister 2, damdawi-inn enkhia, ka gal muh hi. Sepaih leh mipi’n a zui dudup uh. Dudup ka chih hang in nidang bang zen a ‘politician’ te haipih nawnlou ibang. Tam lua hikei uh, chihzawk di hiinteh! Hun tomchik kal in minister tegel a tummang hiau ua, meeting nei, achi uh. Huchih laitak in damdawi-inn mai a building sung hong puak ta romrom mai. Nuam tellou! Thau khawng hong gin pok di kilau sim. Bok dia mansa a om, lungsim a posi la khin kihi zezen. Chihleh, KCP-surrenderee te’n VDF te khat va khoih uh chih thu hong thang, lungsim nuam ngellou in innlam ka zotsan ta mai ve.

 

Ka laibu release ni ding hong nai hiaihiai. Chileh, Friday the Thirteenth hong tung taktak ta ngei…2013 hi sawnsawn lai! Superstitious deuh te a di’n tuh hichi kan a kituakrem a omkei di.

 

Kizawltai Meitei kopkhat in Pa Thongkhankhup leh Pa Chinkhanthang te hon phulum guih tamai uh. Poi lotel…. “Ka hong hoh di,” chi lawm-le-vual, heutu leh chialtuam tampi te zanhak, han hoh leh a dangdang a buai gawp uh. Hong hoh sunsun te le mun 2 mun 3 a kikhen nung hita uh…

 

Hiai k’on gen khanglang nasan hiai ahi….

 

Huchibang ‘shocking’ lua thiltung te lak ah, ki-adjust siamtak in ka programme item a tan nei te a hun lap in hong tung ua, nidang toh teh in hun kepdan bang le theisim ta ibang. Huchiin, 11:00AM programme ding tuh 11:08 vel in k’on pan thei uhi. Lamka a Function kisai sapsap di’n tuh punctual tak ahi….minute 8 vel keleu late!

 

Laibu hongtu ding Pu Thangkhopau Ngaihte, IAS (Retd.) tuh hun kipatma 20 minutes in hong tung. Laibu lantu ding Rev. Khen P. Tombing, Principal, Rayburn College 18 minutes, Pu Langkhanpau Guite, Chairman, ADC, CCPur, Pu Tualchin Neihsial, Vice President, Paite Literature Society te 10 minutes vel leh Pu Nangmuansang Lethil, Gen. Secretary, Siamsinpawlpi GHQ 45 minutes vel sap in hong tung khin daih ta uhi. Fel maw! Huchibang kal ah, Pi NCy Doungel, most celebrated Thadou-Kuki poetess, in leng Tuibuang a pan hon delh vengveng in hun kipatma minute 10 vel mah in hon lap hi! Khekhekheih! Nawn zezen! Chilou thei ka hikei!

 

Lamka te tuh ka theihlouh kal a ana kizil ek nei ve ua maw, ka chi lungsim a….

 

Huchiin, buaina husa vingveng toh programme k’on zang thei hamham ua. Kei leng office lam awlmoh chih dandeuh in Kolkata zuan in Pathianni in k’ong kithawi kikpah vilvel hi. Pathianni a ka paina ziak thudang khat a om. Pu Thangzalian Tonsing, ADSP, CBI, Kolkata, in, “Pathianni a I pai leh bandh omlou pen” achih thudik lenkip a kinei le ka hi deuh.

 

Chihleh, innsung devotion sawtkha dek. Dak 11-leh chihvel a dingkhe thei pan. Tai suk leh Khomoi a tuak suk ngal. Huai Thingchawm-incident toh kisai a kihou theilou sim houh ahi uhiam, lampi lai ah tangval-nou leh noulou, han simsim khawng le singkhuah-singbong toh ana ding tamai uh. Aziak di thei nailou ihihchia, gari a pan kumkhia in, “I aw, kei zaw maw, lenna delh hi’ing a maw…” ichih pat dekdek leh, “Koima che theilou ding….” Chiin tangvalnou khat in hon dawngbul geih hi.

 

Hilele, minute 2 vel ding in ‘volunteer’ te’n hon khuthui zauhzauh ua, kin-a-kin in driver pa kiang ah, “Huai car san nung zui ouh!” ka chi a, ka paisuan nawn ta uhi. Mun 3 mun 4 vel ding ah lampi ana khaktan mahle uh ‘Kihou theita hi unteh’ chiin hon paisuak sak vanglak uhi.

 

And the rest, they say, is history! Huai ban zaw na theivek ta d’uh.

 

Lenna tuang, Kolkata zuan dengdeng himai. Hilele, ka gennop khemkhem khat tuh, seat 3 kizom ah Agartala zuan Bengali tangval khat toh ka tukhawm ua. Kolkata a om chih mahtak, Bengali pau in ka houlim ziahziah uh, chihna ahi tuankei. Bengali pau theilou ka’ihchi’a! Ama’n Agartala ah hon kumsan a, atutna hong luah lah kuamah a om nawnkei a, kei kia in ka tu vevauh kha ta ve.

 

Airhostess khat, samtom, thau sim behbah, mel le hoihsim, niksing vehvah khat ka kiangkiang ah hong kivaivai a, hon star deuhmah zaw hi di aka . YPA te’n mu le uh zaw! ka chi lungsim a. Hilele, sungpuak toh, huchibang thil te ngaisut theih taktak ahi kei. Kei kia mah tu hilel ka’ihchiang in zumna ding omkei chiin ka kaang tou lihleh a, kuama’n hon ngaihsak kei na’nteh chiin ka veih ka sang phut hi. Kizephawk sim a ka kim ka vel ka et gaugau leh kuama’n hon ngaihsak kei taktak.

 

Huchilou tuh gen di lua omkei. Vaigam lam zaw lenna-lampi nasan ana mamdeuh bang aka, chih vel leh damtak in Kolkata ka tung chih khawng ahihkei ngalleh!

 

 

This email address is being protected from spambots. You need JavaScript enabled to view it.(23/09/2013)