Huan, hichi ahi a, thugen siam khat in thu a gen a. Innsakpa a het khak leh dik, genkha kholdiak i sa. Peuh i recommend sim pah. Ei hon kawk sim lebel i heh velvul. Thugentu toh kimeltheih ihih ngial in tuh, hon attack nuam a pulpit chance la a bang.

Huchimahbang in laigelh leng ahi. English te'n a gelh ua, hon chih khak sim uleh kituak lua bang kisak in om. Hilele, Paite kampau sung a mi'n hon gelh a, hon kheuh khak sim ngeingei letuh va inn-phul bang i ut sim aka. Huchilou tawp in le, kituahkhakna munmun a tuh....

Awle, huchibang ahihziak in, Paite te lak a laigelh leh thugen thil nuam liai ahikei. I lungsim uh a kochik a, i ngaihdan uh a kawi. I ngaihdan uh a kituah sung i kingai ua, thil etdan tuam deuh nei a om chiang in i mukpik zel. Mi etna 'angle' a pan thil i en theikei uh. Ei etdan lou ngal etdan dang om thei di'n i koih kei. 'Kipilsak' chih thumal i nei fuh uh. Ei sang a mi'n theizaw a i theih leh, 'kipilsak' i chisuk geih a, ei pilzaw kisuak. Aziak bel, 'kipilsak' ichih te 'mihai' bang a ikoih te ahih naknak ziak in. "A coin has two sides" i chi dandan peuh na a zaw, a philosophy i man teuh kei uh. Unau Thadou te'n 'Kangpokpi khel a kho um nalai di baha?' achi uh, ichi ua, i 'most favourite joke' uh ahi zozen. A kua phuah le hiam chi ka ka! Paite te mahmah ihi d'u. Lamka-zaang leh Guite kual pawlam a Paite khua omlou chi uh a'ihbang. En zaw theikh'ang. Thadou leh Hmar te khua bel Assam phaidung nasan a om ahi achi mawk ua hiven.

Miteng simmoh in i nuaisiah a, mi'n ei hon huchih chiang in lah chiltang mek i bang. Huaiziak tak in, khangtou, khangtou kichi lehang le a khangtou ngellou kihizaw lim ahi. Lamka a building hunkhop om ziak a khangtou kihimawk lou hi.

Mi dem chiing nam ihi. Mi i hih heihai ua, hilele chiamnuih i dawl kei uh. Houlim i siam kei ua hilele mi' genkhelh tuh i theithei reuh zel si uh. A huaitak bang point a la in counter-attack zazat zomah. Huai le i theih thakthak leh ei theih tawm man a genkhial ana sa kha hi nalaiset, kateisei o. I diklouh dan thei khonung in, mai bang le san phephu, hilele ki-admit nuam nailou. Huchikhop kha kihi inchin...

Vai vom khat i muh leh vaite tengteng vom vek di sa mawk, nak noplouh. Lamka a vaite nuaisiah sawm hamham, hilele, India mi hihna bel deih veve. Meitei te'n Bihari kiloh te ana kaplup zialzial uleh Kolkata a Meitei om teng liing gawp. Eheu, Meitei te kia sa! ZCFK kikhopna a le kipuang kha zozen ei ngal. Manipur mi tengteng hon balsialnuai sawm uh, pawtkhiak tamlouh ahoih, chi kawi zozen in. A ziing newspaper in huchibang thu omlou ahi hon chi zenzen a. Kihahuai akamole! Huaiziak a thil teng 'generalise' pahpah ding hilou ahi. Bengali te khat a chalak ziak a a vek ua chalak di a hipah kei uh. Paite te le chalak i om thou d'un ka ging. "Kolkata a posting na hihleh n'ong chalak ta mah di maw?" chi a September 2009 a suti ka pai lai a welcome address hong gen pa dawngthuk leng a ut diam aw, ka chi lailai. Gen di theilou hon sa ahi mai dia zaw, lungsim tawng a dawnna mansa om kiukiau a theihlouh man lah hilel ven. Hilele, mi'n ek ne leh va nek tei di chih mawk pen ki-ut deuhlou a'ihchia, kidam. 'Pa aw, amah ngaidam in, a thugen a theikei a ahi,' chi suk. Bible zatna lemtang himai!

Hiai toh kizawitawn in, Lamka a i thilhih peuhpeuh in khopi leh muntuam a om imi-isa te sukha nak ahi chih theih a ngai. Bangziak a diam zaw theike'ng. Kilaiguizop ihihziak khawng hiinteh. Inn lam a thusia a omleh khual gam ah nase zawsem in puang hi. Etsakna gen le: 1995-6 a Jonai Mission Field a om te'n Lamka nopdan chiltui phuan zen a kigen sek hiv'aw. Mahni kiphat utlou ki-omlou a'ihchia. Chihleh, khat ana khemzou laizang pawl om. Amah le a kumnawn lam a hong zin petmah. Chihleh, Mission Veng hong kap nitak uh hikha geih inchin, zankhovak a lupna nuai a bok. A ziing a Blue Hills a kik nawn bhengbheng. "Nou Pathian thu hong gen-gen, hilele nou kithat-that," hon chi ta uh.

Awle, a koimun peuh ah om le'ng, i khepi a khawlkhau kikhih bang in, Lamka lam a pan mah hong kisat leuhleuh hilel zaw hi. Huaiziak in, Lamka te hon kaih dandan in ki-awn duaiduai mai hi, chi le'ng i zadah zel d'uam ah.

Huchi kawm kal ah, sana leibuan tampi lak a kilakhia bang deuh in, i hoihna uh le om sam mah e. Heutu zahna i nei thei lai ua. Mimal khat in nampum buaina di zen thil i hih kei deuh uh. Kipawlkhen deihlou mi ihi a...eh, saptuam chihlouh. Saptuam zaw pawl le hikei. Pathian' organisation ahi a, mihing gen vual hikei chimai ni. Van-gam bang le saptuam-wise a tut di himaithei a'ihbang. Saptuam tam te mah in nuamsa pen zel ve un, huchileh! Huaiziak hiinteh, saptuam lianlian, a foreign-reign, ikidelh huan uh. Saptuam neilou missionary nnasep hah-a-hahpan te nak choh chi uh ka sa! Huchibang a om uleh ka chihna.

Kipumkhatna lam zaw gen dah mai ni. Kituahlouhna lam ah i kituak zaw uh.Chinapi, khat k'on gen himhim deh: Seppih Naga te khat nikhat hong sun vak el-ol. Houlim-lim, leh Zomi te pau kitheituah dialdial hon englua uh ahihdan hon gen laizang. A zuau pipi, a naknuai kamsiam a. Kolkata a te bang houh, houkhawm-bekhawm chin ua, chi zomah. Nak theihlouh. Hilele, etna dang khat a i et leh dik thei veve!

Paite te chituamna riau khat tuh maw, i 'eimi pai' mahmah uh eivoi. Nam feeling i nei hat fe ua. "Eimi" ahihkei nakleh namdang himai, chiin Pu Khamkhokam Guite in a laibu gelh Hinkhua Daakmual kichi sung ah Jesu hunlai a Paite te lungsim put ana gelh. A dik lai mai di. Eimi is equal to Paite hi sese lai. Khovel a eimi om sun tuh Paite te ahi. Huaiziak akei dia mi'n hon ngaikei i chihchih. Denchia'h CDSU le PDSU hong suak khong in teh. Eh, huchileh houh a hoih kik vanglak di e! Hileh, Churachandpur bang le Lamka suaksa himai di. Lamka a le namdang tengteng hawlkhiak suk vek di aka. Ka chih maimai! Hilele, eimah a diklou ihi diam chih bang le kingaihtuah huai thou zel, maw. Khatvei, ZCFK te Lamka Headquarter (Dorcas Hall) apan Dorca Pawl in hong veh dek ua, 2009 lak vel ahi di. Huai toh kizom in ZCFK nupi chhuanvawr khat in, "Ei Paite te..." chi a kikhopna a thu hon puan thahah laizang leh Paite pau paulou 'namdang' te'n a tutna a taw uh a hek suih uh aka. Kuama'n bangmah a gen kholkei a hiven. Huchibang 'subtle indications' te i mat siamlouh ziak a mi'n i thu hon kalh ngamlou chichi ina hi kha di. Denchia'h eimi lou teng hong langpang maizen le uh zaw aw. Buailai a 'Kuki versus Paite' chi a Imphal newspaper te'n a gen chiang ua i hehluat a, 'Kuki versus Zomi' chih di, i chih uh hong bang maimah d'eive. A huai dia mi'n lampi sialsial bang ana himawk le uh zaw. Paite khonung pil zel tel di hang a...oi hah!

Paite-quality gen di a tam lawlai. Eimi lou te le gen leng bei ke'n teh. Hilele, ei leh ei i kigen mah hoihzaw. Mi'n hon gen chiang ua zaw a hilou lam hita ahi. 'A man who cannot laugh at himself is an idiot' chih Sap thupil nalh ka sa. A thumal te zaw hichi chiah hikei. Hilele, a kawk kibang chi a k'on own-word suk ahi. Eimah kigen a zil ding. Eimah leh eimah mai niin i kihilh ding, mite bel hon nuihsan ding a mansa hi mawk uh a'ive.

Zang tam kisa sim mahlehang, MLA pawlam leng i ngaihtuah uh hun ta ka sa. Kum 5 hal zel a anntang bag khat saan veu le kivang deuh hiv'aw. Meikuang paisuak man thaw ika. Ban ah, SSPP lou in le laisiam pipi i om thei ta. YPA in leng a koi saptuam te hiam kia huap ahikei. A huapkha vek. A koi pawl hiam a i va ki-register louh ziak a khotang a ki-ngeu-et e, tan dia kilawm tanlouh e, huikhaklouh sese e, a omlouh kilawm hileh kilawm. Huaiziak in, lungsim kochik nei lailai i om leh...oh, ka tisual, huchi hial lungsim kochik nei Paite te a om tatak ngel ua hia? chi dek ka hizaw. SSPP, YPA te bei hen chihna hizaw lou in hat sem henla, huapzau sem henla, eimi kialou le huap thei hial leh chih deihna ahi zaw e. Na na lakawi get di maw, Suanapa!