ZOMI NAMNI 2015 ZOH A NGAIHTUAHNA A THAAM THU KHENKHAT..
-Thangkhanlal Ngaihte, Columnist Zogam.com
Zomi Namni 2015, February 20 in zat in om nawn hi. Report te apan in Lamka chauhlou, India leh gamdang a khopi tuamtuam ah le hiaini observance kibawl chih muhtheih hi. Tukum a Lamka a main function adia kiteel khia thupi ‘ Marching forward in unity’ chih hidan ahi. Mundang a zang te’n bel amau hoihsak bangchiat theme ana bawl uh hileh kilawm; Bangalore ah ‘Blessed Nation’ chih hi a, America a Washington DC area ah ‘Zomi Sung ah Inkuan khat hi hang’ ana chi ua, mundang tamtak ah a theme chih pi le omlou in, mahni nopsak dan chiat toh kizang hi.
Zomi ihih na uh chiangvek simta hi hang. Zogam ihon chihnawn chiang in Manipur south district hongsuak leuleu (Mizoram, Burma-Chin State, Sadar Hills, etc. te le I huamsak tham a, hilele huai a mite’n ‘unau’ ihihlam phawk vek na pi in Zogam chih peen pom chetlou zel uhi). Hiai suangtuahna (imagination) sung a I neih Zogam sung ah Nam vai (national politics) teng Zomi Re-unification Organization (ZRO) te’n uun (monopolize) uhi. Huaiziak in nampi huam a Zomi Namni lopna te ah le amau inntek hi ua, amau nuai ah thilteng kisai hi.
ZRO te intekna in 1993 apan in Zomi Namni thupi tatak in ki zang gige hi. Lamka te kha hausa pipi, government a seem tele office kailouh ale loh muhmuh na mun ahihman in khawmpi leh function thupi tak a sai isiam mahmah ua, a uap tu di mi bang iki daih gige ua, tutung le thupi tak a kizou hinawnta. Tutung leh hun paisa a I nazat dan te uapan ngaihtuah na a hong omte kon kum di.
Khatna: Deih le deihlouh thu hilou in national/ethnic politics ah ZRO/ZRA nuai ah ki om hi. ZRO/ZRA day chih tutan in mipi theihpih in observance kibawl nailou hi. Zomi Namni peen amau adan in uun (monopolize) in amau chih dandan a kipai ahi, ‘national level’ ah chu. Huchi ahihvet leh kumteng a hongtung zeel di ahih toh saudeuh a gel kholhna om henla, omzia neitak in tukum hiailam kawk, kumnawn chia theme di hiai, hiaimun a observance om di, etc. te omsa omleh hoihkha ding hi. Tudan abel huchi dedet a geelkholhna om hilou mah bang hi.
Nihna: ZRO te imaginary Zomi Nation sung ah sovereign power kipia uhi. Huai dungzui in huai huangsung a om Zomi te lak ah tax te la ua, poimoh asak chiang un mi leng that ua, dan te khung in vaihawm uhi. Mipi te hi’n I gam sung a pawlpi dang – saptuam, social bodies, etc. – te’n le adidan tuan omlou ahihchia ki zui mai, ki accept, legitimacy kipe mai hiphot hi. Solkar te hihdan copy in cabinet leh department tuamtuam, home, defence/army, etc. te nei uhi. Ahi a lah tutan in avaihawm nanuai ua om mipite lak ah anasep khiak te uh pulakna, sum-le-pai muhna leh zatna, a programme te uh leh tup-le-ngim te genchetna kichian tak om hetlou hi. 1993 kum a pichingtak a kiphut khia ZRO in tutan in pawlpi’ mouthpiece di newsletter/bulettin, etc. khat le nei nailou tel hi (Tutung in Souvenir magazine khat asuak achi ua, keibang inle nget a ka om bang in article khat kana contribute a, hilele tutan in a magazine le kamu kha naikei; contributor tekhawng chu honkhak ngal didan uhia…).
Thumna: Hiai pawlpi in sovereign power neidana a om hang in, India solkar khing a gamtat sawmlou hi. India mah inleng, dan nuai ah India sepaihte chauh in galvan tawithei, zangthei hi napi in ZRA leh helpawl dangte’ galvan neihte tolerate zel in, informal tak in kitheihsiamna dan om in, power peen a parallel a neituak suak uhi. Helpawl, revolutionary organization khenkhat in amau ukkhak gamsung ah solkar nasepna, scheme tuamtuam te implement phallou chihkhawnga a omlai un ei pawlpi te’n bel phal lawtel, huai tungtawn a sum hongpai te mah nek muhna a na nei hizel uhi. India kivai hawmna democracy a mipi sik-le-tang a vaihawm di telna bangle boycott chihte omlou in, asung ah amau mah kipei in thuneihna lianpi tawi uh suak hi. Hileleng, tu dinmun in, hiai thilte toh kisai pawlpi in policy kichian neilou in, pawlpi sung aseem a chethei thei in amau interest a pawlpi aseem ahihna uh pansan a manipulation bawl uh bang maimah hi. Hiai thu kha mipi te’n angaih khawk mahmah uh, hun paisa a pawlpi dang te tamtak ana puksiat sekna uh thu ahi.
Lina: ZRO dinkhiak nung kum 22 bang a hita a, ei gamsung ah bel a contest di omlou hiphot hi. Amau ading in chu lohchinna khat ahi. Hilele, tutan a eimite I hatzoh ngeilouhna uh chu midang, namdang, government toh kisai politics ah ahi. I kiim-ikiang a mite eidan a akituah theihlouh hang un heutu midangte zahtaak tham, pilna/thugen siam, etc. ale sithuai hetlou nei zaw uh bang gige mawk (hiai kha politics chauh lou, saptuam lam bang ah le ahi). Namdang toh networking kisiam lou. Namdangte’n kisathei khawng honsa, eilah a zei lou lawlam khawng ana hi daih.
Ngana: Hichi tellou hile hang tu dinmun bang achu Manipur a I thupai mahmah hun di uh ahi. Congress party support hang a, a candidate teng uh pawlpi huhna toh chingsak vek hang a, MDC tengle Congress ateng mah selection pia hang a..tua amau Government hi zawmah uh. Ahi a lah, Manipur a I political demand uh Autonomous Tribal State (ATS) lah koi koihiam a memorandum submit chihlouh bangmah sepbeh omlou, movement chihle om tuanlou. State assembly khawng ale genkhak ngei di banglou. Zomi Namni 2012 ‘national level celebration’ Imphal a kinei in, Ibobi Singh, huai laitak a lamb-duck CM hilel (Election notification suak khin, caretaker dan a CM le’n) kha chief guest a chial. Pahtawi ek. Hichi kaan I demand te phuut nadi platform hoih, bargain bawltheihna hun omkei leh kilawm hi zenpi kuamah in ATS chih bang genkha lou hizeel (Zomi Council chairman inchu a thugenna a khatvei hiam kamteh kha). Manipur pawtsan sawm zenzen lou, asung mi tatak kahi uh chih hahgen in, huai dungzui a Zomi Namni, February 20 le I state ua dia state holiday di’n hon pomsak un, chihbel genkhia. Anungzek a election a eilawi full support toh Ibobi telawi mah telching nawn. Amau dia iki koihleh kipak lawleng kilawm hia… I demand te genkhak leh sepsuah khat mahle om tuanlou, tutan a (Churachandpur ADC te’n a term uh beitoh kituak in contract work toh kisai khalou issue poimoh nih, 6th schedule leh Churachandpur kichi peen Lamka chi a amin khen di chihtoh kisai demand abawl uh). A Meitei chief minister in agen kei lele I telching eimi te mah inle assembly khawng a gensawm tuanlou; a demand nei pawlpi lam inle gen un chi tuanlou adi uam ah…contract work chihlam toh chu kisai khalou ahimah ve. Eilawi imite lak a thunei kisa lawna hang a, midang te’n bangmah a honmu mahmah lou, hon thusim mahmah lou uh hidia gingta tinten ta kahi.
Gukna: Tukum a Lamka a Namni lopna hun ah bang I gen ua le? Unau khat, suangtu kibang ihi. Dik lawzeen a, zaak chimtak huai petmahta… Kipah tawi tuah dan siam di, ki gensiat siat louh di. (Ok, diklua. Kuamah adiklou pi a gensiat hetlouh di ahi, Bible bang inle adeih hetlouh tekhat ahi). Zomi Inpi (Zomi Secretariat Complex) chihkhat bang hongkhia, suangphuh lianpi khat bawl. Zomi Council Veng chihbang neithak. Football match bangchu a entu tampet mah, record break chi uh (bang record adiam ah..). Alamdang kei, eisung (internal) ah zaw I ut ut hihzou lai tadih mah hang. Hilele, political demand nei ihih leh huaite bangtan a ki delhzui, bangtan tungta, maban ah bang kisawm, mipite’ pantheihna koilam ah, I gamsung ah mipite haksatna, khosakna leh neek-taak zonna ah bang ahia, singtang lam ah bang awlmoh huai a om a, economic development leh government project tetoh kisai awlmoh huai isak om hia (etsakna: Lanva Lui encroachment ziak a beidek petmah, I lampi te hoih ngeilou, chihbang), pawlpi sung kivai puakdan hoihzel hia, bang bawlthak tuak a om a…etc., bangmah report a omlam kathei kei. Theisiam hang, report di om hetlou zong hikha ding hi.
Sagihna: Hiai khawng ana sut sut, ana buaipih ziak in lohtaak kanei vak kei a, adiktak in hiai khawng lou le mimal adia phatuam zaw di hihdi hau petmah kahi. Hilele, I gam kingai, amite ki it, ki awlmoh lawsam ahihchia hongpawt zeel ahi. Gam itna nasep seem a kingai lawtel kihi ahi. Adiktak in ki gengen peih nawnlou lamle ahita. Kuamah ki mimal iplah keini hang, eimah in hoih isak dan leh a situation dungzui a khosa chiat hihang, mate… Zomi Namni 2016 ngak in, omnuam leh mangpha.