TOMKHA HINKHUA ADIA THIL MANPHA
Written by Thangkhanlal Ngaihte, Columnist Zogam.com
Nidang deuh, internet leh mobile phone chihte hong om madeuh khawng in Christmas leh New Year hun hongtun chiang in New Year Resolution chih ki thangsak mahmah hi. Ken kana sawmsek te, diary khawng a kana record khakte , ‘Bible simsuak ding’, ‘Class topper a pan sawm di’, ‘Zingkal chia taizel taak di’, ‘panpihtu hihsawm di’ chih khawng khawng ahi. ‘Sunday zingkal chia ann ngawl zel di’ chih bang le om …
Christmas zoh kal khat a kumthak hong kipan ahih man in hiai kal khat sung apaisa kumkhat sung I zat dan,I hinkhua paisa hun ina zatdante etkikna, leh kumthak adia plan bawl nadia hun hoihtak ahi. Hileleng, tulai inbel hiaidan te ki hihnawn lou in, nidang a akihih lai thute hai huaisa hi awmtak in chiamnuih in kigen ta hi. Screen neuchik khat tawi a hunteng zangbei ki hita. Kuamah diary/journal gelh peihle om nawnlou. Ki tangtun zoungei tuanlou, chih paulam khat ahi. Hileleng, I va suk pichin zoh kei taak zong in, tangtun sawm a panna (a attempt) himhim le manpha hilou adiam – tawpsan dirder maimah sang in?
Sam laibu ah David in Pathian kiang ah damsung kumte simdan honhilh in, chi’n ana ngen namah a, ngetluat di mah ahi. Career guidance seminar khawng ineih chiang un ‘na tup leh nadeih thei masa in’ khawng iki chi gagaih sek ua, hilele, experience leh exposure omlou pi in ‘hiai ahi ka ut/kadeih’ vachih geih haksa pi ahi. Mi tamtakte, kei tel in, ahongtung dandan phutou, huai kawmkawm a I utleh nuam isak te eimah in thiltuah tungtawn a awl a mukhe tou khawng kihi ahi. Tamtak te’n amuhsuah chiang un thilteng ana kikhel manta hi. Mihing pilna kia ahunkei a, Pathian kiang a nget petmah di thu khat ahi.
Tunai deuh a article nih kasim khak te’n hon kingaih tuahsak mahmah hi. Huaite tuh ‘Top five regrets of the dying: Bronnie Ware’ by Susie Steiner (Guardian, Feb 1, 2012) leh ‘My faith: What people talk about before they die’ by Kerry Egan (cnn.com apan) te a hi. Ware peen Australia a nurse, sihdi ngak a damlou te kemtu ahi a, Egan peen US a cancer hospital khat a hospice chaplain ahi.
Mihing te sihpah tading chih hong kithei chiang a, khovel a maban khosak nadi te a hong lungbuai nawnlouh chiang un khovel tomchik hinsung adia poimoh leh manpha hiai ahi, chih hon thei chiang mahmah uh, kichi hi. Bronnie Ware in a record na ah amah houpih khak sidia kisa damlou te gen tam mahmah chu ‘bangziak a ka hinkhua keimah sia-le-pha theihna leh dik kasak te mah paipih ngamlou a, midang te hon lamet dan a hinsawm a hun ana zang nilouh ka mahmah dia aw’ chih ahi. Tamtak te’n lawm-le-vual leh u-le-nau le pawl manlou zeen a nasep kia ana hahbawl luat uh kisik ua, adangte lah ‘bangziak a kahih na bangbang toh kipak tak a hun tamzaw ana zang beek lou kadia aw’ chi’n kisik mahmah uh, chi hi.
Kerry Egan’ experience ah leng sihdi ngak damlou te’n hinkhua a poimoh asak uleh agen nop peen te uh inkuan sung leh lawm-le-vual te thu: itna leh deihsakna ana ngah te uh, lamen leh poimoh law napi apoimoh uh itna leh lainatna ana ngahlouh hunte uh; itna leh deihsakna midang ana piakkhak te uh leh piakkhak louh te uh, chihkhawng ahi. Itna, ngaihdamna, thilpiak chihte hinkhua beikuan te’n a etkik chiang ua manpha sapeen uh ahi, chi hi.
I ngaihtuah leh: inkuan sung ah sihna bang ihon tuak a, I lawm ngaihte khawng in hon nusia ua, eikia a thawmhau leh lungleng a I om hun in I ngaihtuahna ah huat velvulna te hiam, mihing khutsuak hoih leh deih huai isak, car, smartphone, inn hoihtak I neih leh neih zohlouh,etc. te ki ngaihtuah kha kholkei veh aw. Lungleeng leh thawmhau a laa kiphuak khe te, hoih isak a I ngaihchim theihlouh te bangle khovel thilte toh kisai hilou in, ana omsa Pathian thilsiam I hatlai a houtak a I ngaih te, huihnung hiauhiau (breeze), vuahmal phiin sisiih, ni tumkuan, zan a khavak, mei kai ziiziai, sing-leh-lou te khawng mah pansan a itna leh kithuah khawmna (fellowship) thukhawng kigenna te mah hi uhi. Hiai te’n, agaal deuh apan et in, I hinkhua tomchik adia manpha peen te neih-le-lam toh kisai ahi kei, eimah a Pathian in honpiak sa te mah, kuapeuh hihtheih leh batphak a omte ngen mah ahi, chih honhilh hi.
Tu kumlui leh kumthak kipelh hun in atung a kigen te pansan in hun saulou beek kisu awngthawl in ei hinkhua chiat enthak le I hinkhua maban a priority di bangzah hiam ki muhsuah beh thak saam khading hi.
(Hiai article Gamchiam (EBCC-Delhi Monthly Newsletter) dated 28 December, 2014 ah le kisuah hi).